XANNAˈIYO HUUPHE YOHUWAA 25
“Taani Ta Huuphen Ta Dorssata . . . Koyana”
“Taani ta huuphen ta dorssata xomoosananne koyana.”—HIZ. 34:11.
MAZAMURE 105 “Xoossai Siiqo”
HA XINAATIYAN *
1. Xanttiya aayeera Yihooway bana geeddarssidoy aybissee?
YIHOOWAY hananabaa yootiya Isiyaasa wode, “Aayyiyaa ba xanttiyo na7aa doganau danddayaiyye?” giidi oychchiis; yaatidi ba asawu, “Geelladan a dogiyaakkokka, taani nena dogikke!” yaagiis. (Isi. 49:15) I darotoo issi aayeera bana geeddarssenna. SHin, hagan geeddarssiis. Yihooway ba ashkkarata keehi siiqiyoogaa qonccissanawu aayeenne naˈaa gidduwan deˈiya mino siiquwaa goˈettiis. Daro aayetussi Hasminiigaadan siyettees. A, “Neeni naˈa dichchiyo wode, deˈo laytta ubban takkiya dumma dabbotaa medhdhaasa” yaagaasu.
2. A ashkkaratuppe issoy haggaaziyoogaa aggiyo wode Yihoowawu aybi siyettii?
2 Yihooway ba ashkkaratuppe issoy sabbakiyoogaanne shiiquwaa shiiqiyoogaa aggiyo wode erees. Hegaa gishshawu, layttan layttan A ashkkaratuppe daroti awu haggaaziyoogaa aggiyo * wode I keehi azzaniyoogee qoncce.
3. Yihooway koyiyoobay aybee?
3 Yihoowawu haggaaziyoogaa aggida alˈˈo ishanttuppenne michchonttuppe daroti gubaaˈiyawu simmiyo wode nuuni keehi ufayttoos! Yihooway eti simmanaadan koyees; qassi nuunikka koyoos. (1 PHe. 2:25) Nuuni eta waati maaddana danddayiyoo? Ha oyshaa zaaranaappe kase, eti shiiquwaa shiiqiyoogaanne sabbakiyoogaa aggidoy aybissakko eriyoogee loˈˈo.
ISSOTI ISSOTI YIHOOWAWU HAGGAAZIYOOGAA AGGIDOY AYBISSEE?
4. Issota issota oosoy waati qohidee?
4 Issoti issoti oosoy bantta deˈuwan aybippenne aadhdhanaadan oottidosona. Isiyaa biittan deˈiya Hunga * giyo issi ishay hagaadan giis: “Taani oosuwan daro wodiyaanne wolqqaa wurssaas. Taayyo daro miishshay deˈikko, taani Yihoowawu loyttada haggaazana danddayays gaada eeyyatettan qoppaas. Hegaa gishshawu taani daro saatiyaa oottaas. Taani shiiquwaa shiiqiyoogaa issi issitoo aggiyoogaa doommaas; wurssettan muleera aggaagaas. Asay leddan leddan Xoossawu haggaaziyoogaa agganaadan oottanawu Seexaanay eta qofay shaahettanaadan ha alamiyaa goˈettees.”
5. Issi michchiyo daro metoy gakkin waanadee?
5 Hidootaa qanxxanaadan oottiya daro metoy issi issi ishanttanne michchontta gakkees. Inggilizen deˈiya Aana ichchashu naatu aayo. Aana hagaadan gaasu: “Ta naatuppe issoy yelettiyo wode bollay ayyo sila. Amarida wodiyaappe simmin ta naˈiyaa bohettaasu; qassi ta naˈay haray guuggiyaa sahettees. Taani keehi unˈˈettido gishshawu shiiquwaa shiiqiyoogaanne sabbakiyoogaa aggaas. Wurssettan, Yihoowawu haggaaziyoogaa muleera aggaas.” Aaniyyo, I soo asaayyoonne hegaa mala metoy gakkiyo haratuyyo nuuni keehi qarettoos!
6. Issi uri Qolasiyaasa 3:13 oosuwan peeshshennan aggiyoogee Yihoowawu haggaaziyoogaa agganaadan waati oottana danddayii?
6 Qolasiyaasa 3:13 nabbaba. Issi issi Yihoowa ashkkarati bantta mala Kiristtaanee oottidoban qohettidosona. Issi issitoo issi ishay woy michchiyaa nuna ‘hanqqettissiyaabaa’ oottana danddayiyoogaa kiitettida PHawuloosi akeekiis. Ubba qassi nuna naaqoy gakkana danddayees. Nuuni naagettana xayikko, uluwan lancciyaa oyqqana danddayoos. Yiillotiyoogee issi uri wurssettan Yihoowa asaappe haakkanaadan oottana danddayees. Tohossa Amarkkan deˈiya Pablo giyo ishaa hanotaa qoppa. Moorobaa oottiis giidi A wordduwan mootin gubaaˈiyan haggaaziyo maatay appe ekettiis. Yaatin I waanidee? Pabloy, “Taani keehi yiillotaas; qassi loddan loddan gubaaˈiyaappe haakkaas” yaagiis.
7. Bana mooranchchadan xeelliya uri waanana danddayii?
7 Issi uri kase gita nagaraa oottikko, I daro wodiyawu bana mooranchchadan xeellana danddayees. Qassi Xoossay tana mule siiqenna giidi qoppana danddayees. I nagaraappe simmidi maarotaa demmikkonne, hegaappe simmin Xoossaa asa gidanawu danddayennabadan qoppana danddayees. Fransisko giyo ishawu hegaadan siyettiis. I hagaadan giis: “Pokkobaa oottido gishshawu tawu seeray imettiis. Koyro heeran taani shiiquwaa aggennan shiiqiyaaba gidikkonne, guyyeppe unˈˈettaas; qassi Yihoowa asaa giddon deˈana bessiya ura gidikke gaada qoppaas. Tana mooranchchadan xeelliyoogaa aggabeykke; qassi Yihooway tawu atto gibeenna gaada tana ammanttaas. Guyyeppe, sabbakiyoogaanne shiiquwaa shiiqiyoogaa aggaas.” Nuuni beˈido asatuugaa mala hanotay gakkido ishanttanne michchontta xeelliyaagan neessi aybi siyettii? Neeni etawu qarettikkii? Ubbaappe aaruwan, eta xeelliyaagan Yihoowawu aybi siyettii?
YIHOOWAY BA DORSSATA SIIQEES
Israaˈeela biittaa henttanchchay bayida dorssawu keehi qarettees (Mentto 8-9 xeella) *
8. Yihooway baayyo kase haggaazidaageeta dogii? Qonccissa.
8 Guutta wodiyawu A asaara hashetiyoogaa aggikkonne, Yihooway bawu kase haggaazidaageeta dogenna; eti awu haggaaziyoogan oottidobaakka I dogenna. (Ibr. 6:10) Hananabaa yootiya Isiyaasi Yihooway ba asawu ay keenaa qoppiyaakko keehi ufayssiya leemisuwan qonccissiis. Isiyaasi, “I ba wudiyaa henttanchchaadan mizees; ba dorssa maratakka ba qesiyan shiishshidi, ba kiyuwan idimmana” yaagiis. (Isi. 40:11) A ashkkaratuppe issoy haggaaziyoogaa aggiyo wode nu Gita Henttanchchawu Yihoowawu aybi siyettii? Yesuusi ba erissiyo ashkkarata kaallidi deˈiyaagaadan oychchido wode Yihoowawu siyettiyaabaa qonccissiis: “Issi asayyo xeetu dorssati de7iyaageetuppe issoi bayikko, uddufun tammanne uddufunaa deriyan yeggi bayidi, he bayidaagaa koyanau beennee? Intte woigeetii? Taani intteyyo tumaa gais; i demmikko, bayibeenna uddufun tammanne uddufun dorssatuppe aattidi, he issi dorssan ufaittees.”—Maa. 18:12, 13.
9. Beni wode, loˈˈo henttanchchay ba dorssata waati naagii? (Koyro sinttan deˈiya misiliyaa xeella.)
9 Nuuni Yihoowa henttanchchaara geeddarssana danddayiyoy aybissee? Beni wode, loˈˈo henttanchchay ba dorssatuyyo keehi qarettiyo gishshataassa. Leemisuwawu, Daawiti ba wudiyaa naaganawu gaammuwaaranne beeriyaara baaxiyaa gayttiis. (1 Sam. 17:34, 35) Loˈˈo henttanchchay ba dorssatuppe issuwaa xallay xayikkonne, loytti erees. (Yoh. 10:3, 14) Hegaa mala henttanchchay 99 dorssata heemmiyoosan aggidi woy hara henttanchchay naaganaadan oottidi bayida issuwaa koyanawu bees. Yesuusi keehi koshshiya ha tumaa nuna tamaarissanawu ha leemisuwaa goˈettiis: “Saluwan de7iya intte Aawai ha guuttatuppe issoi bayyanaagaakka koyenna.”—Maa. 18:14.
Issi henttanchchay bayida dorssawu beni Israaˈeelan qarettees (Mentto 9 xeella)
YIHOOWAY BA DORSSATA KOYEES
10. Hizqqeela 34:11-16n qonccidaagaadan, Yihooway bayida dorssata waatanaagaa yootidee?
10 Yihooway ba wudiyaappe bayida ‘guuttata’ gujjin, nuna ubbaakka siiqees. Xoossay bayida dorssaa koyanaagaanne eti aara zaarettidi dabbotaa minttanaadan maaddanaagaa hananabaa yootiya Hizqqeela baggaara yootiis. Qassi I eta ashshanawu oottanabaa yootiis. Issi dorssay bayiyo wode Israaˈeela henttanchchay oottiyoobaara issi malabaa I oottana. (Hizqqeela 34:11-16 nabbaba.) Koyruwan, henttanchchay he dorssaa koyana; hegee daro wodiyaanne wolqqaa wurssana. I bayida dorssaa demmiyo wode, ba wudiyaakko ekkidi ehaana. Kaallidi, dorssay qohettikko woy namisettikko, henttanchchay daafurida dorssaa siiquwan maaddees, A masunttaa qachchees, A tookkees, qassi A mizees. “Xoossaa dorssaa wudiyaa” heemmiya cimati, gubaaˈiyaappe haakkida oonanne maaddanawu hegaara issi malabaa oottana koshshees. (1 PHe. 5:2, 3) Cimati eta koyoosona, gubaaˈiyaa zaarettidi simmanaadan eta maaddoosona, qassi eti Yihoowaara dabbotanaadan maaddiyoogan eta siiqiyoogaa bessoosona. *
11. Loˈˈo henttanchchay ay akeekii?
11 Loˈˈo henttanchchay dorssay bayiyo wode erees. Qassi issi dorssay wudiyaappe bayikko, henttanchchay A shocenna. Yihooway baappe amarida wodiyawu haakkida ba ashkkarata maaddiyoogan nuussi loˈˈo leemiso gidiyoogaa qoppa.
12. Yihooway Yoonaasa waati oyqqidee?
12 Hananabaa yootiya Yoonaasi bawu imettida oosuwaa aggidi baqatiis. Gidikkonne, Yihooway Yoonaasan hidootaa qanxxibeenna. Loˈˈo henttanchchaadan, Yihooway A naagiis; qassi I ba oosuwaa polanawu koshshiya wolqqaa demmanaadan maaddiis. (Yona. 2:7; 3:1, 2) Guyyeppe, asaa deˈoy alˈˈo gidiyoogaa Yoonaasi akeekanaadan maaddanawu Xoossay gosiyaa goˈettiis. (Yona. 4:10, 11) Hegaappe ay tamaariyoo? Cimati Yihoowawu haggaaziyoogaa aggidaageetun sohuwaara hidootaa qanxxana koshshenna. Cimati issi dorssay wudiyaappe haakkido gaasuwaa akeekanawu baaxetoosona. Qassi he dorssay Yihoowakko simmiyo wode, cimati A siiqiyoogaanne ayyo qarettiyoogaa aggokkona.
13. Yihooway Mazamure 73 xaafidaagaa oyqqido ogiyaappe nuuni ay tamaarana danddayiyoo?
13 Mazamure 73 xaafidaagee iitatu deˈoy ubbatoo injjetidaba milatiyoogaa beˈidi hidootaa qanxxiis. Xoossaa sheniyaa oottiyoogee aynne maaddenna giidi qoppiis. (Maz. 73:12, 13, 16) Yihooway waatidee? I he bitaniyaa boribeenna. Ubba qassi Xoossay ha bitanee haasayidobay Geeshsha Maxaafan xaafettanaadan oottiis. Wurssettan, ha mazamuriyaa xaafidaagee Yihoowaara dabbotido dabbotaappe aadhdhiyaabi aybinne baynnaagaa akeekiis. (Maz. 73:23, 24, 26, 28) Nu ay tamaariyoo? Yihoowawu haggaaziyoogee aynne maaddenna giidi qoppiyaageetu bolli cimati eesuwan pirddana koshshenna. Cimati eta bolli pirddiyoogaappe eti hegaa ayssi haasayidaakko, qassi hegaa ayssi oottidaakko akeekanawu malana koshshees. Yaatidi, cimati eta minttettanawu Geeshsha Maxaafaa goˈettana danddayoosona.
14. Eelaasawu maadoy koshshidoy aybissee, qassi Yihooway A waati maaddidee?
14 Hananabaa yootiya Eelaasi Kawee Elzzaabeelippe baqatiis. (1 Kaw. 19:1-3) I Yihooway kiittin hananabaa yootiyaagaa gididi haggaaziya hara asi baa giidi qoppiis; qassi I ba oosoy aynne maaddenna giidi qoppiis. Eelaasi keehi unˈˈettidi hayqqanawu koyiis. (1 Kaw. 19:4, 10) Yihooway Eelaasa bolli pirddiyoogaappe, I barkka attibeennaagaa, I Xoossay immiyo wolqqan ammanettana danddayiyoogaa, qassi biron darobaa oottanaagaa awu yootiis. Yihooway Eelaasa qofissiyaabaa loytti siyi simmidi awu ooratta oosuwaa immiis. (1 Kaw. 19:11-16, 18) Nu ay tamaariyoo? Nuuni ubbaykka, ubba qassi cimati Yihoowa ashkkarata kehatettan oyqqana koshshees. Issi uri keehi yiillotinkka woy qassi Yihoowa maarotaa mule demmennabadan qoppinkka, I ba wozanaabaa qonccissiyo wode cimati ezggoosona. Yaatidi, he bayida dorssay A Yihooway siiqiyoogaa ammanettanaadan oottanawu eti baaxetoosona.
XOOSSAA DORSSATI BAYIDAAGEETA NUUNI WAATI XEELLANA BESSII?
15. Yohaannisa 6:39y yootiyoogaadan, Yesuusi ba Aawaa dorssata waati xeellii?
15 Yihooway bayida dorssata nuuni waati xeellanaadan koyii? Nuuni Yesuusa leemisuwaappe tamaarana danddayoos. Yihoowa dorssati ubbay Xoossaa sinttan keehi alˈˈo gidiyoogaa Yesuusi eriyo gishshawu, ‘bayida dorssay, Israaˈeela asay’ Yihoowakko simmanaadan I bawu danddayettida ubbabaa oottiis. (Maa. 15:24; Luq. 19:9, 10) Yesuusi loˈˈo henttanchcha gidiyo gishshawu, Yihoowa dorssatuppe issoynne bayennaadan bawu danddayettida ubbabaa oottiis.—Yohaannisa 6:39 nabbaba.
16-17. Bayidaageeta maaddiyoogaa cimati waati xeellana bessii? (“ Bayida Dorssatuyyo Siyettiyaabaa” giya saaxiniyaa xeella.)
16 Kiitettida PHawuloosi Efisoonan deˈiya gubaaˈe cimati Yesuusa leemisuwaa kaallana mala hagaadan minttettiis: “Daafuranchchata maaddanaassinne Godaa Yesuusi ba huuphen, ‘Ekkiyaagaappe immiyaagee anjjettidaagaa’ giidoogaadan, a qaalaa intte [hassayanawu bessees].” (Oos. 20:17, 35) Ha wodiyan hegaara gayttidaagan cimatussi gita aawatettay deˈiyoogee qoncce. Isppeenen deˈiya Salvadora giyo issi cimay hagaadan giis: “Bayida ba dorssatussi Yihooway ay keenaa qarettiyaakko taani qoppiyoogee, eta maaddanawu tawu danddayettida ubbabaa oottanaadan tana denttettees. Taani etawu qoppanaadan Yihooway koyiyoogaa erays.”
17 Yihoowappe haakkida, ha huuphe yohuwan denttido asati ubbay aakko simmanaadan maaduwaa demmidosona. Haˈˈikka bayida daroti hegaadan oottanawu koyoosona. Eti Yihoowakko simmanaadan nuuni waati maaddana danddayiyaakko kaalliya huuphe yohoy loytti qonccissana.
MAZAMURE 139 Ubbabay Ooraxxiyo Wode Deˈiyaabadan Qoppa
^ MENT. 5 Yihoowawu ammanettidi daro layttawu haggaazida issoti issoti ayyaanaaban shuggiyoy aybissee? Eta xeelliyaagan Xoossawu aybi siyettii? Ha huuphe yohoy ha oyshatu zaaruwaa qonccissees. Qassi Yihooway oottanaadan yootidobaa oottibeenna, beni wode deˈida issota issota I maaddido ogiyaappe nuuni ay tamaarana danddayiyaakkokka beˈana.
^ MENT. 2 QONCCISSIDO QAALAA: Yihoowawu haggaaziyoogaa aggidaageeta giyoogee usuppun aginawu woy hegaappe daruwawu gubaaˈiyaara hashetidi sabbakibeennaageeta giyoogaa. Gidikkonne, eti haˈˈikka nu ishanttanne nu michchontta; qassi nuuni eta siiqoos.
^ MENT. 4 Issi issi asatu sunttay laamettiis.
^ MENT. 10 Kaalliya huuphe yohoy cimati ha heezzubata waati oottana danddayiyaakko qonccissana.
^ MENT. 60 MISILIYAA QONCCISSUWAA: Bayida dorssawu qoppiya Israaˈeela biittaa henttanchchay he dorssaa koyees, qassi wudiyaara walahettanaadan maaddees. Ha wodiyan ayyaanaaban heemmiyaageetikka hegaadan oottoosona.
^ MENT. 64 MISILIYAA QONCCISSUWAA: Yihoowawu haggaaziyoogaa aggida issi michchiyaa otobisee denddana gakkanaashin uttada naagaydda ufayttiiddi haggaaziya naaˈˈu Yihoowa Markkata xeellawusu.
