1. Ha ano nga paagi hi Jehova pariho hin nanay nga nagpapasuso?

“MAKAKALIMTAN ba han usa nga babaye an iya nasuso nga anak?” Ito an iginpakiana ni Jehova ha panahon ni propeta Isaias. “Bisan kon ini nga mga babaye mahingalimot, ako diri gud mahingangalimot ha imo,” siring han Dios ha iya katawohan. (Isa. 49:15) Kasagaran nga diri niya iginpapariho an iya kalugaringon ha usa nga nanay. Pero hito nga takna, iginpariho ni Jehova an iya inaabat ha iya mga surugoon ha daku nga gugma han usa nga nanay para ha iya anak basi ipakita nga hinigugma gud Niya hira. Kadam-an nga nanay pariho an inaabat ha sister nga hi Jasmin nga nagsiring, “Kon nagpapasuso ka han imo anak, nagkakaada kamo espesyal gud nga relasyon nga nagpapadayon ha bug-os nga kinabuhi.”

2. Ano an inaabat ni Jehova kon an usa han iya mga anak nagigin diri aktibo?

² Maaram hi Jehova kon an usa han iya mga anak diri na natambong ha mga katirok ngan diri na nagsasangyaw. Salit, hunahunaa la an kasakit nga iya inaabat kon nakikita niya nga yinukot han iya mga surugoon an nagigin diri aktibo * kada tuig.

3. Ano an karuyag ni Jehova?

³ Damu hinin hinigugma nga kabugtoan nga nagin diri aktibo an nabalik ha kongregasyon, ngan nalilipay kita kon ginbubuhat nira ito! Karuyag ni Jehova nga bumalik hira, ngan ito liwat an aton karuyag. (1 Ped. 2:25) Paonan-o kita makakabulig? Antes naton batunon ito nga pakiana, mas maopay nga mahibaroan naton kon kay ano nga an pipira diri na natambong ha mga katirok ngan diri na nasangyaw.

4. Paonan-o nakakaapekto ha pipira an sekular nga trabaho?

⁴ An iba nagin sagipo gud ha ira sekular nga trabaho. “Sobra kadamu nga panahon ngan kusog an akon gin-gamit ha akon trabaho,” siring ni Hung * nga brother nga taga-Asia. “Kalurongan nga ginsidngan ko an akon kalugaringon nga kon mas damu an akon kwarta, makakag-alagad ako hin mas maopay kan Jehova. Salit nagtrabaho ako hin mas damu ka oras. Hinay-hinay nga diri na ako nakakatambong ha mga katirok tubtob nga waray na gud ako makig-upod ha kongregasyon. Baga hin an kalibotan gindisenyo basi hinay-hinay nga ipahirayo an mga tawo tikang ha Dios.”

5. Paonan-o nakaapekto ha usa nga sister an sunod-sunod nga mga problema?

⁵ An iba nga kabugtoan nanluluya tungod han damu nga problema. Hi Anne nga taga-Britain may lima nga anak. “Usa han akon mga anak natawo nga may grabe nga depekto ha lawas,” siring ni Anne. “Paglabay han panahon, usa han akon mga anak nga babaye an na-disfellow ngan an akon anak nga lalaki nagkaada sakit ha hunahuna. Nadepres gud ako salit waray na ako tumambong ha mga katirok ngan waray na magsangyaw. Ha urhi, nagin diri aktibo ako.” Napaid gud kita kan Anne ngan ha iya pamilya, pati na ha iba nga may sugad nga problema!

6. Kay ano nga an usa mahimo bumulag ha katawohan ni Jehova kon diri niya gin-aaplikar an Colosas 3:13?

⁶ Basaha an Colosas 3:13. An pipira han mga surugoon ni Jehova nasakitan ha ginbuhat han usa nga igkasi-tumuroo. Hi apostol Pablo nagsiring nga usahay bangin may angayan kita nga “hinungdan . . . nga magreklamo kontra” ha usa nga bugto. Bangin gintratar pa ngani kita hin diri maopay. Kon diri kita mag-iikmat, mahimo kita magtipig hin kasina. An kasina mahimo magin hinungdan nga an usa bumulag ha katawohan ni Jehova. Tagda an eksperyensya ni Pablo nga brother ha Sur Amerika. Gin-akusaran hiya nga nakahimo hin sala salit nawad-an hiya hin pribilehiyo ha kongregasyon. Ano an iya reaksyon? “Nasina ako,” siring ni Pablo, “ngan hinay-hinay nga waray na ako makig-upod ha kongregasyon.”

7. Ano an mahimo magin epekto ha usa nga tawo han pag-abat hin kakonsensya?

⁷ An pag-abat hin kakonsensya mahimo magpasakit liwat ha usa nga nakasala hin seryoso hadto, nga tungod hito inaabat niya nga diri hiya angay higugmaon han Dios. Bisan kon nagbasol hiya ngan ginpakitaan hin kalooy, bangin abaton niya nga diri na hiya angay magin usa han katawohan han Dios. Ito an inabat han brother nga hi Francisco. “Ginsaway ako tungod ha pakabuhat hin seksuwal nga imoralidad,” siring niya. “Bisan kon ha una padayon ako nga naatender ha mga katirok, nadepres ako ngan inabat ko nga diri ako angay makig-upod ha katawohan ni Jehova. Nakukonsensya la gihapon ako, ngan inabat ko nga waray ako pasayloa ni Jehova. Ha urhi, waray na ako makig-upod ha kongregasyon.” Ano an imo inaabat ha kabugtoan nga naatubang hin mga sitwasyon nga pariho han ginhisgotan pa la? May empatiya ka ba ha ira? An mas importante, ano an inaabat ni Jehova mahitungod ha ira?

8. Nangangalimtan ba ni Jehova adton mga nag-alagad ha iya hadto? Isaysay.

⁸ Diri nangangalimtan ni Jehova adton nag-alagad ha iya hadto pero temporaryo nga waray na makig-upod ha iya katawohan; diri liwat niya nangangalimtan an ira mga ginbuhat para ha iya. (Heb. 6:10) Hi propeta Isaias naggamit hin maopay nga ilustrasyon basi ipakita nga hinigugma gud ni Jehova an iya katawohan. Hi Isaias nagsurat: “Pariho hin paraataman hin panon iya  mamangnoan an iya panon. Pinaagi han iya butkon titirukon niya an nati nga mga karnero, ngan iya ito kukuguson dida ha iya dughan.” (Isa. 40:11) Ano an inaabat han Harangdon nga Paraataman nga hi Jehova kon an usa han iya mga karnero nawawara? Iginpakita ni Jesus kon ano an inaabat ni Jehova han nagpakiana hiya ha iya mga disipulo: “Ano ha iyo paghunahuna? Kon an usa nga tawo may 100 nga karnero ngan nawara an usa hito, diri ba niya babayaan an 99 ha kabukiran ngan malakat basi bilngon an usa nga nawawara? Ngan kon hiagian niya ito, susumatan ko gud kamo, mas malilipay hiya tungod hito kay han 99 nga waray mawara.”​—Mat. 18:12, 13.

9. Paonan-o gintatratar han maopay nga mga paraataman ha panahon han Biblia an ira mga karnero? (Kitaa an retrato ha kobre.)

⁹ Kay ano nga angayan gud nga ipariho hi Jehova ha usa nga paraataman hin karnero? Kay an maopay nga paraataman ha panahon han Biblia nagmamangno gud ha iya mga karnero. Pananglitan, hi David nakig-away ha usa nga leon ngan oso basi protektaran an iya panon. (1 Sam. 17:34, 35) Napapansin gud han maopay nga paraataman kon may bisan usa la nga karnero nga nawawara. (Juan 10:3, 14) Babayaan hito nga klase hin paraataman an iya 99 nga karnero ha talwas nga toril o ibibilin niya ha igkasi-paraataman ngan bibilngon an usa nga nawawara. Gin-gamit ni Jesus ito nga ilustrasyon basi tutdoan kita hin importante nga kamatuoran: “Diri karuyag han akon Amay nga aadto ha langit nga mawara an bisan usa hini nga mga ubos.”​—Mat. 18:14.

10. Sumala ha Ezekiel 34:11-16, ano an iginsaad ni Jehova nga iya bubuhaton para ha iya nawawara nga mga karnero?

¹⁰ Hinigugma ni Jehova an tagsa ha aton, upod na an “mga ubos” nga nawawara ha iya panon. Pinaagi kan propeta Ezekiel, nagsaad an Dios nga bibilngon niya an iya nawawara nga mga karnero ngan bubuligan hira nga maibalik an ira maopay nga espirituwalidad. Ngan iya gin-unabi an espisipiko nga iya bubuhaton basi talwason hira, mga pitad nga kasagaran nga ginhihimo han Israelita nga paraataman kon may nawawara nga karnero. (Basaha an Ezekiel 34:11-16.) Una, bibilngon han paraataman an karnero, nga mahimo  magkinahanglan hin daku nga panahon ngan pangalimbasog. Katapos, kon makita na niya an nawawara nga karnero, ibabalik niya ito ha panon. Kon an karnero nasamaran o nagugutom, mahigugmaon nga bubuligan han paraataman an maluya nga hayop, bibendahan an samad hito, kakargahon, ngan papakaunon. Sugad nga mga paraataman han “panon han Dios,” kinahanglan liwat buhaton han mga tigurang an pariho nga mga butang basi mabuligan an bisan hin-o nga diri na nakikig-upod ha kongregasyon. (1 Ped. 5:2, 3) Ginbibiling hira han mga tigurang, ginbubuligan nga makabalik ha kongregasyon, ngan ginpapakitaan hin gugma pinaagi ha paghatag han ira kinahanglan nga espirituwal nga bulig. *

11. Ano an nahibabaroan han maopay nga paraataman?

¹¹ Maaram an maopay nga paraataman nga an mga karnero mahimo mawara. Ngan kon mahibulag ha panon an usa nga karnero, diri ito ginsisirotan han paraataman. Hunahunaa an susbaranan nga iginpakita han Dios han ginbubuligan niya an pipira han iya mga surugoon nga ha halipot nga panahon waray magtuman han iya mga iginsugo ha ira.

12. Paonan-o gintratar ni Jehova hi Jonas?

¹² Hi propeta Jonas waray magtuman ha sugo ni Jehova. Bisan pa hito, waray dayon hiya isalikway ni Jehova. Pariho han maopay nga paraataman, gintalwas hiya ni Jehova ngan ginbuligan nga magkaada kusog basi matuman an iya toka. (Jon. 2:7; 3:1, 2) Ha urhi, gin-gamit han Dios an tanom nga upo basi buligan hi Jonas nga maintindihan an pagkaimportante han kinabuhi han tagsa nga tawo. (Jon. 4:10, 11) Ano an leksyon? An mga tigurang kinahanglan diri dayon humunong ha pagbulig ha mga diri aktibo. Lugod, naniningkamot hira nga masabtan kon ano an hinungdan nga binulag an usa ha kongregasyon. Ngan kon bumalik na hiya kan Jehova, an mga tigurang padayon nga magpapakita hin mahigugmaon nga interes ha iya.

13. Ano an aton mahibabaroan ha reaksyon ni Jehova ha ginsiring han nagsurat han Salmo 73?

¹³ An nagsurat han Salmo 73 nanluya gud han nakita niya nga baga hin naglalampos an mga magraot. Nagruhaduha hiya kon may kapulsanan gud ba an pagbuhat han kaburut-on han  Dios. (Sal. 73:12, 13, 16) Ano an reaksyon ni Jehova? Waray hiya isgi. Ngani, iginpasurat han Dios ha Biblia an mga pulong han salmista. Ha urhi, nasabtan han salmista nga an maopay nga relasyon kan Jehova mas importante gud kay ha bisan ano​—ito an nakakahimo ha kinabuhi nga magin mapulsanon gud. (Sal. 73:23, 24, 26, 28) Ano an leksyon? Kinahanglan diri dayon hukman han mga tigurang adton nagtitikang magruhaduha kon mapulsanon ba an pag-alagad kan Jehova. Imbes nga sawayon hira, kinahanglan mangalimbasog an mga tigurang nga maintindihan kon kay ano nga ito an ira ginyayakan ngan ginbubuhat. Katapos mahimo na gamiton han mga tigurang an Biblia basi parig-unon hira.

14. Kay ano nga kinahanglan ni Elias hin bulig, ngan paonan-o ito iginhatag ni Jehova?

¹⁴ An propeta nga hi Elias pinalagiw tikang kan Rayna Jezebel. (1 Hadi 19:1-3) Kahuna niya nga waray na iba nga nag-aalagad sugad nga propeta ni Jehova, ngan inabat niya nga waray pulos an iya ginbubuhat. Nadepres gud hiya salit karuyag na niya mamatay. (1 Hadi 19:4, 10) Imbes nga sawayon hi Elias, ginpasarig hiya ni Jehova nga diri hiya nag-uusahan ngan makakasarig hiya ha gahum han Dios, ngan damu pa an buruhaton nga iya hihimoon. May pagkabuotan nga namati hi Jehova ha mga kabaraka ni Elias ngan gintagan hiya hin bag-o nga mga toka. (1 Hadi 19:11-16, 18) Ano an leksyon? Kita ngatanan, labi na an mga tigurang, kinahanglan trataron nga may pagkabuotan an mga surugoon ni Jehova. Magpahayag man hin kasina an usa o abaton niya nga diri hiya angayan han kalooy ni Jehova, an mga tigurang mamamati samtang iya iginsusumat an iya inaabat. Katapos mangangalimbasog hira nga pasarigon hiya nga hinigugma hiya ni Jehova.

15. Sumala ha Juan 6:39, ano an inaabat ni Jesus ha mga karnero han iya Amay?

¹⁵ Ano an karuyag ni Jehova nga abaton naton ha iya nawawara nga mga karnero? May mahibabaroan kita ha susbaranan ni Jesus. Maaram hiya nga an tanan nga karnero ni Jehova presyoso ha Iya, salit ginhimo ni Jesus an tanan nga iya mahihimo basi buligan an “nagkawawara nga mga karnero han panimalay ni Israel” nga makabalik kan Jehova. (Mat. 15:24; Luc. 19:9, 10) Sugad nga maopay nga paraataman, ginbuhat liwat ni Jesus an iya pinakamaopay basi waray bisan usa nga mawara ha mga karnero ni Jehova.​—Basaha an Juan 6:39.

16-17. Ano an angay abaton han mga tigurang mahitungod ha pagbulig hadton mga nawawara? (Kitaa an kahon nga “ An Mahimo Abaton han Usa nga Nawawara nga Karnero.”)

¹⁶ Gin-aghat ni apostol Pablo an mga tigurang ha kongregasyon ha Efeso nga sundon an susbaranan ni Jesus. “Kinahanglan buligan niyo an mga magluya ngan kinahanglan hinumdoman niyo pirme an ginyakan han Ginoo nga hi Jesus, han hiya mismo nagsiring: ‘Mas daku an kalipay ha paghatag kay ha pagkarawat.’” (Buh. 20:17, 35) Matin-aw, an mga tigurang yana may importante gud nga responsabilidad nga atamanon an katawohan ni Jehova. “Kon ginhuhunahuna ko nga hinigugma gud ni Jehova an iya nawawara nga mga karnero, napapagios ako nga buhaton an tanan ko nga mahihimo basi buligan hira,” siring ni Salvador nga tigurang ha Spain. “Sugad nga espirituwal nga paraataman, kombinsido ako nga karuyag ni Jehova nga atamanon ko hira.”

¹⁷ An tanan nga gin-unabi hini nga artikulo nga nagin diri aktibo nabuligan nga bumalik kan Jehova. Hini mismo nga takna, damu pa nga nawawara an karuyag liwat bumalik. Hihisgotan hin mas detalyado han sunod nga artikulo kon ano an aton mahihimo basi mabuligan hira nga makabalik kan Jehova.