NGANI JAKULIJIGANYA 25
“Chinasisosesose Ngondolo Syangu Namsyene”
“Chinasisosesose ngondolo syangu namsyene ni kusisamalila.”—ESEK. 34:11.
NYIMBO NA. 105 “Mlungu Ali Chinonyelo”
YACHITULIJIGANYE *
1. Ana Yehofa akusalandana chamtuli ni jwamkongwe jwakwete mwanache?
“ANA yili yakomboleka jwamkongwe kumliŵalila . . mwanache jwakuŵeleka jika?” Yehofa ŵawusisye chiwusyochi mundaŵi ja jwakulochesya Yesaya. Yehofajo ŵasalile ŵandu ŵakwe kuti, “Atamosetu [jwamkongwe] komboleka kumliŵalila mwanache, une ngasinamliŵalila kose.” (Yes. 49:15) Jwalakwe ndaŵi syejinji ngakusaliwanichisyaga ni nangolo jwamkongwe. Nambope jwalakwe pandaŵiji jwaliwanichisye ni nangolo jwamkongweju. Yehofa ŵakamulichisye masengo chinonyelo chachikusaŵa pasikati pa mwanache ni mamagwe pakulosya mwakusatendela yindu ni ŵakutumichila ŵakwe. Achinangolo ŵajinji akusakamulana ni yaŵaŵechete mlongo jwine lina lyakwe Jasmin. Jwalakwe jwatite, “Pawukumjonjesya mwanache yikusakamuchisya kuti mŵeje ŵakunonyelana mnope mpaka kalakala.”
2. Ana Yehofa akusapikana wuli jumo mwa ŵakutumichila ŵakwe pawujile munyuma?
2 Yehofa akusamanyilila naga jumo mwa ŵakutumichila ŵakwe alesile kulalichila kapena kusongana. Kusala yisyene, Yehofa yikusampweteka mnope pakwawona ŵakutumichila ŵakwe ŵajinji ali mkuwujila munyuma * chaka chilichose.
3. Ana Yehofa akusasaka kuti ŵandu ŵaŵalesile kulalichila soni kusongana atende chichi?
3 Ŵajinji mwa abale ni alongo ŵaŵalesile kulalichila soni kusongana, akusatandilasoni kusongana ni mpingo. Soni payiche akusapocheledwaga ni magasa gaŵili. Yehofa akusasaka kuti jemanjaji awujile kwa jwalakwe, yeleyi ni yatukusasakasoni m’weji. (1 Pet. 2:25) Ana mpaka twakamuchisye chamtuli jemanjaji? Mkanitujanje chiwusyochi, mpaka yiŵe chenene kumanyilila kaje yayikusiyatendekasya ŵane kuti aleche kusongana soni kulalichila.
LIGONGO CHICHI ŴANE AKUSALEKA KUMTUMICHILA YEHOFA?
4. Ana ŵandu ŵane akusasimana ni yamtuli ligongo lya masengo gawo?
4 Ŵane akusagawona masengo gawo kuŵa gakusosekwa mnope. M’bale jwine lina lyakwe Hung * jwakusatama ku Asia jwatite, “Namalilaga ndaŵi soni machili gangu pakukamula masengo. Nalilambusyaga kuti, pachinjipata yindu yejinji yakusosechela paumi chinjitanda kumtumichila chenene Yehofa. Myoyo nakamulaga masengo kwa mawola gejinji. Kaneko natandite ngajawulajawula kumisongano, soni kaneko nalesile kwene kwawula kumisongano.” Satana akusakamulichisya masengo chilambochi pakusaka kwasokonasya ŵandu kuti aleche kumtumichila Mlungu.
5. Ana yakusawusya yaŵasimene nayo mlongo jwine yamkwayiye chamtuli?
5 Abale ni alongo ŵane akusasimana ni yakusawusya yejinji yayikusiyatendekasya kuti awujile munyuma. Anne akusatama ku Britain soni akwete ŵanache msano. Jwalakwe jwatite, “Mwanache jwangu jwamlume jwapali jwamlemale. Soni pandaŵi jine, mwanangu jwamkongwe ŵamtyosisye mumpingo, soni mwanache jwangu jwine jwamlume jwatandite kulwala ulwele wanganisyo. Yeleyi yasokonasisye mnope mwamti nalesile kusongana soni kulalichila.” Kusala yisyene tukusosekwa kwaganichisya soni kwatendela chanasa ŵandu ŵane ŵakusimana ni yindu mpela yaŵasimene nayo Anne.
6. Ana kulepela kukuya yayili pa Akolose 3:13 mpaka yimtendekasye chamtuli mundu kuleka kusongana ni ŵandu ŵa Yehofa?
6 Aŵalanje Akolose 3:13. Ŵakutumichila ŵa Yehofa ŵane ŵawujile munyuma ligongo lya yindu yaŵatendele ŵakulupilila achimjawo. Ndumetume Paulo jwamanyilile kuti ndaŵi sine m’bale kapena mlongo mpaka “amlemwechesye mjakwe.” Ndaŵi sine mpaka yisimanikwe kuti tutendeledwe yangali chilungamo. Naga ngasamala payitutendechele yeleyi mpaka tutumbile mnope. Naga mundu atumbile, mpaka yimtendekasye kulekangana ni ŵandu ŵa Mlungu. Aganichisye yayamtendechele m’bale jwine jwa ku South America lina lyakwe Pablo. Jwalakwe ŵamlambuchisye kuti jwatesile chakulemwa, yayatendekasisye kuti akakola upile wakutumichila mumpingo. Ana jwatesile wuli? Jwalakwe jwatite, “Natumbile mnope, mwamti nalesile kusongana yimpepe ni mpingo.”
7. Ana chikusatendekwa chichi kwa mundu jwakusalijimba magambo ligongo lya yindu yaŵatesile?
7 Kulijimba magambo mpaka kumlagasye mnope mundu juŵatesile chakulemwa chekulungwa. Jwalakwe mpaka aliwoneje kuti ali jwangasosekwa soni kuti Mlungu nganaŵa amnonyele. Atamose kuti jwalakwe ali akululuchidwe ligongo lyakuti alosisye kupitikuka mtima, mpaka aliwoneje kuti nganaŵa mundu jwakuŵajilwa kuŵa m’gulu ja ŵandu ŵa Mlungu. M’bale jwine lina lyakwe Francisco jwalipikanaga myoyo. Jwalakwe jwatite, “Napochele chamuko ligongo lyakutenda chikululu. Nambope atamose pandanda napitilisyagape kusongana, nalagasikaga nganisyo soni kulipikana kuti ndili jwangasosekwa kuŵa pasikati pa ŵandu ŵa Yehofa. Chikumbumtima changu chanagasyaga soni naliji jwakusimichisya kuti Yehofa nganangululuchila. Mkupita kwandaŵi nalesile kusongana ni mpingo.” Ana akusapikana wuli pakwamba ya abale ni alongo ŵakusimana ni yakusawusya mpela yeleyi? Ana akusiŵatendelaga chanasa? Nambi Yehofa akusiŵawona chamtuli jemanjaji?
YEHOFA AKUSASINONYELA NGONDOLO SYAKWE
8. Ana Yehofa akusiŵaliŵalila ŵandu ŵaŵamtumichile jwalakwe? Alondesye.
8 Yehofa ngakusiŵaliŵalila ŵandu ŵaŵamtumichile jwalakwe nambo pandaŵi jine ŵajimichile kaje kutenda yindu ni mpingo. Ngakusaliŵalilasoni masengo gaŵatendaga pakumtumichila jwalakwe. (Aheb. 6:10) Jwakulochesya Yesaya jwapeleche chiwanichisyo chambone pakulosya yakusati Yehofa pakwasamalila ŵandu ŵakwe. Yesaya jwalembile kuti, “Tachisilanga ngondolo syakwe mpela jwakuchinga. Tachasonganya ŵanache ŵangondolo ni kwanyakula m’miyala mwakwe.” (Yes. 40:11) Ana Yehofa akusapikana wuli mundu jwine palesile kumtumichila? Yesu jwasasile mwakusapikanila Yehofa pandaŵi jaŵawusisye ŵakulijiganya ŵakwe yiwusyo ayi, “Sambano mkuganisya wuli? Mundu naga akwete ngondolo makumi likumi [100], nipo jimo jikusokonechela, ana ngasileka ngondolo makumi msano ni mcheche kwisa msano ni mcheche [99] sila mwitumbi ni kuja kusosasosa jimo jijasokonechele jila? Nditu ngusamlichisya kuti naga ajisimene, kusangalala kwakwe kwakujisangalalila jele ngondolojo, kukusapundanganya kusangalala kwakusisangalalila sine syanganisisokonechela sila.”—Mat. 18:12, 13.
Jwakuchinga jwa Chiyisalaeli jwasamalilaga chenene ngondolo jajasokonechele (Alole ndime 8-9) *
9. Ana mu ndaŵi ja Baibulo, ŵakuchinga ŵambone ŵatendaga yindu mwamtuli ni ngondolo syawo? (Alole chiwulili cha pachikuto.)
9 Ligongo chichi yili yakuŵajilwa kum’wanichisya Yehofa ni jwakuchinga? Yili myoyo ligongo lyakuti mundaŵi ja Baibulo, jwakuchinga jwambone ŵasamalilaga chenene ngondolo syakwe. Mwachisyasyo, Daudi jwawuleje lisimba ni chimbalangondo pakusaka kusichenjela ngondolo syakwe. (1 Sam. 17:34, 35) Jwakuchinga jwambone akusamanyilila atamose ngondolo jimpepe pajisokonechele. (Yoh. 10:3, 14) Jwakuchinga mpela jweleju mpaka asileche ngondolo 99 pamalo gambone ni kuja kusosasosa jimpepe jajisokonechele. Yesu jwakamulichisye masengo ngani jakuwanichisyaji pakusaka kwiganya usyesyene wakuti, “Atati ŵetu ŵali kwinani ngakusaka kose kuti atamose jumo jwa ŵanache ŵakwe ajonasiche.”—Mat. 18:14.
Jwakuchinga jwa Chiyisalaeli jwasamalilaga chenene ngondolo jajasokonechele (Alole ndime 9)
YEHOFA AKUSASISOSASOSA NGONDOLO SYAKWE
10. Mwakamulana ni Esekiele 34:11-16, ana Yehofa jwasasile kuti chachitenda yamtuli ni ngondolo jajisokonechele?
10 Yehofa akusatunonyela wosopewe kupwatikapo ŵandu ŵaŵalesile kutenda yindu yimpepe ni abale ni alongo. Kupitila mu yaŵalochesye Esekiele, Mlungu jwasasile kuti chachisosasosa ngondolo syasisokonechele soni chachisikamuchisya kuti siŵe paunasi wambone ni jwalakwe. Jwasasilesoni yachachitenda pakusikulupusya ngondolosi. Yaŵasasile Yehofa kuti chachitendayi yili yakulandanasoni ni yaŵatendega ŵakuchinga ŵa mundaŵi ja Aisalaeli ngondolo pajisokonechele. (Aŵalanje Esekiele 34:11-16.) Chandanda, ŵakuchinga ŵajisosaga ngondolojo, soni yeleyi yasakaga ndaŵi soni machili. Chaŵili, pajipatile ngondolojo ŵajijigalilaga kwasili sine. Chatatu, naga ngondolojo jili jewulale kapena jikulaga ni sala, ŵakuchingaŵa ŵajisamalilaga mwachinonyelo, kutaŵa maŵanga, kujinyakula soni kujipa yakulya. Achakulungwa ŵamumpingo ŵakusalangaga “likuga lya ngondolo sya Mlungu,” akusosekwa kutenda yeleyi pakumkamuchisya jwalijose mumpingo. (1 Pet. 5:2, 3) Achakulungwaŵa akusiŵasosaga ŵandu ŵasokonechele ni kwakamuchisya kuti awujile mumpingo. Akusiŵalosyasoni chinonyelo jemanjaji mwakwapa chikamuchisyo chausimu. *
11. Ana jwakuchinga jwambone akusamanyililaga chichi?
11 Jwakuchinga jwambone akusamanyililaga kuti ngondolo mpaka jisokonechele. Naga ngondolo jityosile pasili sijakwe, jwakuchinga nganajitendelaga yangasa. Kwende tulole chisyasyo chakulosya yaŵatesile Yehofa pakwakamuchisya atumiki ŵakwe ŵele ndaŵi jine ŵamlesile jwalakwe.
12. Ana Yehofa ŵatesile yindu mwamtuli ni Yona?
12 Jwakulochesya Yona jwatisile masengo gaŵampele Yehofa. Nambope Yehofa nganaleka kumtuma Yona. Mpela jwakuchinga jwambone, Yehofa ŵamkulupwisye soni kumkamuchisya jwalakwe kuti apate machili gakutendela utumiki waŵapochele. (Yon. 2:7; 3:1, 2) Kaneko, Yehofa jwakamulichisye masengo chitela cha mbalika kuti amkamuchisye Yona kupikanichisya kusosekwa kwa umi wa mundu. (Yon. 4:10, 11) Ana tukulijiganya chichi? Achakulungwa ŵamumpingo ngakusosekwa kwanguya kuleka kwakamuchisya ŵandu ŵakuwoneka kuti akuwujila munyuma. Mmalo mwakwe achakulungwaŵa akusosekwa kupikanichisyaga chachimtendekasisye mundu kuti awujile munyuma. Mundujo pawujile kwa Yehofa, achakulungwa ŵamumpingo akusasangalala najo.
13. Ana mpaka tulijiganye chichi pa mwaŵatendele yindu Yehofa ni mundu juŵalembile Salimo 73?
13 Mundu juŵalembile Salimo 73 jwatengwiche pajwayiweni kuti ŵandu ŵakusakala ŵagambaga kutupilatupila. Jwalakwe jwakayichilaga naga kutenda yakusasaka Mlungu kwana umbone wuliwose. (Sal. 73:12, 13, 16) Ana Yehofa ŵajiweni wuli nganiji? Jwalakwe nganamjimba magambo munduju. Yeleyi yili yisyene ligongo Mlungu ŵakundile kuti maloŵe ga jwamasalimoju galembedwe m’Baibulo. Kenako jwamasalimo jwamanyilile kuti kuŵa paujakwe wambone ni Yehofa kuli kwakusosekwa mnope paumi wa mundu kupunda chine chilichose. (Sal. 73:23, 24, 26, 28) Ana tukulijiganya chichi? Achakulungwa ŵamumpingo akajanguyaga kwajelusya ŵandu ŵakusakayichila yakuti kutumichila Yehofa kwana umbone wakwe. Mmalo mwakwawona kuti ngakutenda chenene, akusosekwa kupikanichisya chachikwatendekasya kuti aŵechete soni kutenda yindu mwakutendelamo. Kaneko, mpaka yiŵe yangasawusya kuti amlimbikasye mundujo pakamulichisya masengo Malemba.
14. Ligongo chichi Eliya jwasosechelaga chikamuchisyo, soni Yehofa ŵamkamuchisye chamtuli?
14 Pandaŵi jine jwakulochesya Eliya ŵamtilaga Yesebele. (1 Ayi. 19:1-3) Jwalakwe jwaganisyaga kuti pangali jwine juŵatumichilaga Yehofa mpela jwakulochesya soni kuti masengo gaŵakamulaga galiji gangali mate. Eliya jwalagasiche mnope nganisyo mwamti jwasakaga kuti bola agambe kuwa. (1 Ayi. 19:4, 10) Mmalo mwakuti amjamuche Eliya, Yehofa ŵamsimichisye kuti nganaŵa jika soni akusosekwa kudalila machili ga Mlungu. Ŵamsimichisyesoni kuti pana masengo gejinji gakusosekwa kukamula. Yehofa ŵapikanichisye chenene yaŵadandawulaga Eliya soni ŵampele masengo gane. (1 Ayi. 19:11-16, 18) Ana tukulijiganya chichi? Wosope, mnopemnope achakulungwa ŵamumpingo akusosekwa ŵasamalileje chenene ŵakutumichila ŵa Yehofa. Chinga mundu jwine atumbile mnope kapena akuyiwona kuti Yehofa nganaŵa amkululuchile, achakulungwa akusosekwa kumpikanilaga mundujo pakusala mwakupikanila mumtima. Kutenda yeleyi kuchakamuchisya achakulungwa kuti amsimichisye mundujo kuti ali jwakusosekwa kwa Yehofa.
ANA TUSIWONEJE WULI NGONDOLO SYA MLUNGU SYASISOKONECHELE?
15. Mwakamulana ni Yohane 6:39, ana Yesu ŵasiwonaga chamtuli ngondolo sya Atati ŵakwe?
15 Ana Yehofa akusasakaga kuti tusiwoneje wuli ngondolo syakwe? Mpaka tulijiganye kutyochela pa yaŵatesile Yesu. Jwalakwe ŵamanyililaga kuti ŵakutumichila ŵakwe wosope ali ŵakusosekwa mnope kwa Yehofa. Myoyo, Yesu jwatesile yakakombwele pakwakamuchisya ‘Aisalaeli ŵali mpela ngondolo syakusokonechela’ kuti awujile kwa Yehofa. (Mat. 15:24; Luk. 19:9, 10) Mpela jwakuchinga jwambone, Yesu nganasaka kuti ngondolo ja Yehofa jilijose jisokonechele.—Aŵalanje Yohane 6:39.
16-17. Ana achakulungwa ŵamumpingo akusosekwa kwawona wuli ŵandu ŵawujile munyuma? (Alole libokosi lyakuti “Mwakusapikanila Mumtima Mundu Juŵalesile Kusongana.”)
16 Ndumetume Paulo ŵaŵendile achakulungwa ŵa ku Efeso kuti akuyeje chisyasyo cha Yesu. Paulo jwatite, “Tukwenela kwakamuchisya ŵandu ŵakwete machili panandi, mkumbuchile maloŵe agala ga Ambuje Yesu gakuti, ‘Kupeleka kukusampa upile mundu kulekangana ni kupochela.’” (Mase. 20:17, 35) Malemba gakusalosya kuti achakulungwa ŵamumpingo akwete udindo wapajika ŵakwasamalila ŵandu ŵa Yehofa. Jwamkulungwa jwamumpingo jwine jwa ku Spain jwatite, “Panguganichisya mnope yakusatenda Yehofa pakusisamalila ngondolo syakwe syasisokonechele, yikusalimbikasya kutenda yampaka ngombole pakusikamuchisya ngondolosi. Mpela jwakuchinga jwausimu, ngusamanyilila kuti Yehofa akusasaka kuti nasisamalileje.”
17 Ŵandu wosope ŵaŵawujile munyuma ŵatwakolasile munganiji, ŵapatile chikamuchisyo ni kuwujila kwa Yehofa. Apanopano ŵandu ŵajinji ŵaŵawujile munyuma akusasakagasoni ali awujile kwa Yehofa. Ngani jakuyichisya tuchikambilana yejinji yampaka tutende kuti twakamuchisye jemanjaji kuwujila kwa Yehofa.
NYIMBO NA. 139 Aliwoneje Ali M’chilambo Chasambano
^ ndime 5 Ligongo chichi ŵandu ŵane ŵaŵele ali mkutumichila Yehofa kwa ndaŵi jelewu akusaleka kusongana ni mpingo? Ana Mlungu akusiŵawona wuli jemanjaji? Nganiji chijijanje yiwusyo yeleyi. Chijisalesoni yampaka tulijiganye kutyochela pa yaŵatesile Yehofa pakwakamuchisya ŵandu ŵakusakolanjidwa m’Baibulo pandaŵi jaŵasakaga kuti aleche kumtumichila jwalakwe.
^ ndime 2 NGOPOLELO JA MALOŴEGA: Mundu jwakuwujila munyuma jwatukumsala munganiji, ali mundu jwakusalepela kupeleka mawola kwa miyesi 6 kapena kupunda. Atamose kuti yili myoyo, ŵandu ŵawujile munyuma akusaŵa kuti ali abale ni alongo ŵetu soni tukusitwanonyela mnope.
^ ndime 4 Mena gane munganiji tugachenjile.
^ ndime 10 Ngani jakuyichisya chijisale matala gampaka achakulungwa ŵamumpingo akamulichisye masengo pakukuya yindu yitatuyi.
^ ndime 60 KULONDESYA YIWULILI: Ŵakuchinga ŵajisosaga ngondolo jajisokonechele ni kujikamuchisya kuti jiwujile kwasili ngondolo sine. Ŵakuchinga ŵausimu ŵamasiku agano akusatendasoni myoyo. ^ ndime 64 KULONDESYA YIWULILI: Mlongo jwalesile kutenda yindu ni mpingo pakwembecheya kuti basi jinyakuche, akwawona ŵa Mboni ŵaŵili ali mkulalichila pamalo gakusimanikwa ŵandu ŵajinji.
