EMHUOGHAẠPH ITUUGHẠ PHỌ 26
“Ḅula Esi Amhị”
“Iḅula esi amhị, bịn Mị kaḅula ni esi anyinha.”—MAL. 3:7.
AḌUỌR PHỌ 102 “Assist Those Who Are Weak”
OGHAẠPH OOKARAGH *
1. AZihova raloghoma ghan ika mem dị oniin ebenhẹ odị lọ aphe aḅula esi odị?
SIPHẸ emhuoghaạph phọ eten bọ, aZihova atomaạm loor odị idiphọ ogey opoghom dị amhoọgh ogbolhomaam iyool phọ odị. Ḅilhẹ mọ odị rawạ ghan ni olọ aphe. AZihova aḅenhị we Izrạl phọ oḅuạ bọ esi odị mọ: “Iḅula esi amhị, bịn Mị kaḅula ni esi anyinha.” Kụ yira olegheri mọ odị aloghoma ni eniin phọ eten phọ ḍio arodon, loor esi dị odị aḅẹm mọ: “Mị ra/nmia ghan.” (Mal. 3:6, 7) AZizọs aḅẹm mọ, aZihova ḅilhẹ r’aruukpaạny phọ romoọgh ghan ni iboom ibo mem dị oniin ebenẹ Odị lọ aphe aḅula esi Odị.—Luk 15:10, 32.
2. Yira kooḅeghiọn eeghe siẹn emhuoghaạph phọ ephẹn phọ?
2 Uguạ ooḅeghiọn iraạr oghaạph omaaniọm aZizọs dị agbon ilọ olhoghonhaạn aḍighaạgh buphẹ momheel bọ oḍuạ esi aZihova. Kụ oḅilhẹ ooḅeghiọn iniin araagharạ dị ewạ dị yira komoọgh orue olhoghonhaạn aḍighaạgh oyool dị aphe oḅula esi aZihova. Yira komiịn kẹn iyaạr phọ ekpeanhaạn bọ ni olhọgh inyaạm obakị abuphẹ modugh bọ.
IDỊ OWẠ OMHIỊN OKPOKI DỊ APHE
3-4. Eeghe kụ iḍighi kụ anhịr phọ oghaạph bọ oghol siphẹ Luk 15:8-10, amhiigha bọ loor awạ okpoki phọ odị?
3 Ewạ ni mọ olhọgh iboom inyaạm orue owạ omhiịn abuphẹ rowạ bọ oḅula esi aZihova. Ḍiniin aḍidogh dị ogẹ siphẹ aḍinyạ phọ aLuk, aZizọs aghaạph idị oniin anhịr awạ okpoki odị dị aphe. Oghaạph omaaniọm mọ ophọn phọ akaạph ilọ ikuph phọ anhịr phọ alhọgh bọ owạ okpoki phọ.—Bạl Luk 15:8-10.
4 AZizọs aghaạph ni ipẹ anhịr phọ alhoghoma bọ mem mọ odị amhiịn bọ okpoki phọ odị amhạn bọ maạr. Mem mọ aZizọs arọl bọ siẹn ade phọ, abuniin aburuniin abuọ aJu phọ uuko ghan ḍioph okpoki oseere, ongọ onyanhị abidị dị rabạl ilhom, ḍio apinien phọ. Eeni okpoki anhịr phọ ophọn aḍighi aani opọ phọ. Anhịr phọ aatughiạn ghan mọ okpoki phọ odị ameel ude. Kụ iḍighi kụ odị asụ otozị awaạm kuolọ odị o/mhiịn. Eeni esoorom otozị phọ i/manạm dị anhịr phọ kamiịn iyaạr phọ odị rawạ bọ. Ekureriom mọ, odị amhiigha ni loor aḅeer oomo otu phọ odị. Siphẹ iisaạr phọ odị aḅeer bọ kụ edị odị amhiịn dị okpoki phọ odị ranmanạ r’aḍiḅaạl otozị phọ. P’eeghe idị odị aseere ekpom! Odị aamhaghạgh ni righirị odị r’amatuman odị mọ oghị oḍighan nyinọ obo.
5. Eeghe kụ iḍighi kụ ketue bọ ni ekpạr owạ abuphẹ mowilhẹ bọ ookpomhoghan phọ?
5 Oghaạph omaaniọm mọ aZizọs uḍeenhaan iyira mọ resighẹ ghan ni inyaạm owạ iyaạr dị ephe. Eniin phọ eten phọ kụ edị eeni yira kolọgh ni inyaạm owạ omhiịn oye lọ awilhẹ ookpomhoghan phọ. Loor esi dị eeni ibadị asiạ meten ni oye phọ awilhẹ bọ ookpomhoghan phọ, eeni kẹn oye phọ akị ekpisi dị abumor dị nyodị u/legheri kụ odi. Kuolọ nyiidiphọ iikia i/lo mọ abuniin abuẹn phọ okạr ri rowạ oḅula esi aZihova. Bidị rowạ okumu aZihova r’eghunotu abuọ iiseeny phọ odị, kuolọ bidị omoghi ni olhoghonhaạn aḍighaạgh ayira.
6. Ika kụ idị oomo ayira siẹn ookpomhoghan phọ koḍighom aani owạ abuphẹ moophoọm bọ?
6 Abuọ anhiạn kụ kowạ bọ buphẹ mophe bọ? Oomo phọ ayira—ikumor awe phọ, abukọy eten phọ, abuọ eghunotu phọ, ḅilhẹ r’abukaaphọm mọ odi bọ siphẹ ookpomhoghan phọ—kotue ni ologhonhaạn ḍighaạgh owạ abidị. Nạ amoọgh ni oyaghirị obobọ onyọ asiya dị maaphoọm ḍughụm? Nạ mazuan ghan ni oye dị maaphoọm mem dị nạ odi oḍuạ otu ogbạ otu obobọ mem dị nạ rangọ ogbaanhaạn esi ogbo ḍughụm? Eḍighi maạr dị oye phọ amheera ni ongọ anạ ḍien esi phọ odị arugh bọ, pọ nạ atue ni asighẹ angọ ikumor awe phọ.
7. Nạ atuughạ eeghe ḍighaạgh okumor oye phọ oghol bọ mọ Thomas?
7 Ighẹn aradạ kụ edị ikumor awe phọ kogbariọn orue owạ abuphẹ rowạ bọ oḅula esi aZihova? Oniin okumor oye dị oghol mọ Thomas, * dị odi ghan epẹ Spain, dị malhoghonhaạn ḍighaạgh Bugbaanhaạn dị mopel li 40 oḅula isiẹn ookpomhoghan phọ aḅẹm mo: “Mị uphụr ghan apuru bumor r’abumarani phọ mughumọ bidị olegheri ni onyọ umor dị ra/tu ghan mun ituughạ. Obobọ mughumọ bidị olegheri ni esi dị onyọ umor dị maaphoọm arugh. Ibadị siphẹ ookpomhoghan phọ umhegheron ghan r’oḅaạl olhoghi loor esi dị bidị ulhoghoma ghan mọ bunọ oḍighom aani ni owạ phọ. Kụ mem lọ mị aghị ophogh abuphẹ moophoọm bọ, mị rapuru ghan ni ilọ ibạm anmụny abidị r’asiya abidị. Abuniin abuphẹ moophoọm bọ uphạm ghan ni ibạm anmụny abidị orumom ituughạ, dị eeni ibạm anmụny phọ moḍighi ni bukaaphọm. Ibạm anmụny phọ abuphẹ phọ kẹn ni bịn emoghi ni dị kologhonhaạn ḍighaạgh oḅula esi aZihova.”
KIẠ AWẠ NMỤNY PHỌ R’ANMANYAẠN PHỌ AZIHOVA MOPHE BỌ
8. Odaphạn Luk 15:17-24, ika kụ idị odẹ phọ azoọm oọny uruur phọ akiton bọ?
8 Ighẹn araagharạ kụ edị yira komoọgh eḍighi maạr dị yira rowạ olhoghonhaạn aḍighaạgh bulọ rowạ oḅula esi aZihova? Omhiịn iniin araraạr dị yira kotue otuughạ esi oghaạph omaaniọm mọ aZizọs ilọ oọny uruur phọ aḅuạ bọ olhoghotu. (Bạl Luk 15:17-24.) AZizọs aḅẹm mọ oọny uruur phọ alhoghoma ni loor kụ asopha oḅilhẹ oḅula olhoghotu. Odẹ phọ aghiil li aghị ateẹny oọny phọ odị, kụ aghuraam ongọ odị okuphom owol mọ onọ apomoghiạn ni nyodị. Ooruẹn olhoghi oọny uruur phọ agụr ri dị tutụ alhoghoma mọ onọ o/kpeanhaạn mun dị koḅẹm mọ onọ oọny odẹ phọ odị. Odẹ phọ aseenyạn ni oọny phọ odị mem mọ aghaạph bọ ipẹ odị alhoghoma bọ aḅenhị nyodị. Odẹ phọ agbariọn ni radạ oḍeenhaan mọ onọ o/sighẹ nyodị idiphọ ophirineen oye, kuolọ idiphọ oọny olọ olhoghotu dị okạr ophomhoghiạn. Oḍighi oḍeenhaan iphẹn phọ, odẹ phọ aakolhobian ni male, aḅilhẹ angọ oọny phọ imạ asuomạ.
9. Ighẹn kụ araagharạ dị yira komoọgh orue olhoghonhaạn aḍighaạgh bulọ modugh oḅula esi aZihova? (Miịn igbe phọ “ Idị Kotue Ologhonhaạn Ḍighaạgh Buphẹ Rowạ Bọ Oḅula Esi AZihova.”)
9 AZihova akịgh idiphọ odẹ phọ siphẹ aḍidogh phọ. Odị apomoghiạn ni bumor r’abumarani phọ ayira moophoọm bọ kụ rowạ bọ ni oḅula esi odị. Esi otuughaạny aZihova, yira kotue ni ologhonhaạn bidị ḍighaạgh oḅula. Oḍighi iduọn phọ ewạ okparạm, oseenyạn, ḅilhẹ r’ephomhoghiạn ḍighaạgh ayira. Eeghe kụ iḍighi kụ yira koḍeenhaan ghan bọ raagharạ phọ ipẹ phọ, ḅilhẹ ika kụ idị yira kotue oḍighi iduọn phọ?
10. Eeghe kụ iḍighi kụ ewạ bọ ni okparạm orue olhoghonhaạn aḍighaạgh oye oḅula esi aZihova?
10 Ewạ ni okparạm loor esi dị resighẹ ghan ni mem kụ oye agbi oḅula esi aZihova. Ibadị abudị momheel ghan oḅuạ uḅẹm mọ ikumor awe phọ r’abunhọn moghị ni oḅilhẹ okị ikika amem opogh bidị kụ bidị ogbi bọ oḅula isiẹn ookpomhoghan phọ. Umarani dị oghol mọ Nancy, epẹ Asia, agẹ mọ: “Oniin ogbogh oyaghirị amhị siẹn ookpomhoghan phọ ulhoghonhaạn imhị ḍighaạgh agey, odị usighẹ imhị idiphọ okumor umarani odị, kụ uutughianhạm ghan imhị imạ amem mọ yoor oghelhọm ghan bọ. R’okparạm, alher ghan ni rurụ ungọ imhị mem dị mị rakaạph ipẹ mị alhoghoma bọ, kụ o/wilhẹ ghan ongọ amhị oroma. Akạr kụ aḍighi ogey oyaghirị, dị aakolhobian olhoghonhaạn amhị ḍighaạgh torọ amem.”
11. Eeghe kụ iḍighi kụ ewạ bọ oseenyạn, orue olhoghonhaạn aḍighaạgh oye dị aḍuanhạm r’ophin olhoghi?
11 Oseenyạn ghan aḍighi idiphọ elo ikuoghị, katue ni aakonhom ophin olhoghi. Abuniin abudị owilhẹ ookpomhoghan phọ, urolhọm ghan ophin olhoghi esi ibadị asiạ loor iyaạr dị oye aḍighi bidị siẹn ookpomhoghan phọ. Kụ ophin olhoghi phọ opọ phọ o/mheera mọ bidị oḅula esi aZihova. Eeni buniin rootughiạn ghan mọ mozoọm bidị eten dị i/nighẹ. Eeni bidị kowạ ni oye dị kaler rurụ angọ bidị, aḅilhẹ anaghanhạn ipẹ bidị olhoghoma bọ. (Jems. 1:19) AMaría, onyọ umarani dị amheel aḅuạ eniin amem aḅẹm mọ, “Mị uwạ rurụ dị kinhaghanhạn imhị, ḍikpe onyorian kụ omhoghi, ḅilhẹ r’aḍighaạgh dị kiiḅakị imhị.”
12. Ika kụ idị ephomhoghiạn phọ aZihova eghịgh bọ oḍigh?
12 ABaibul phọ atomaạm ephomhoghiạn phọ aZihova amhoọgh bọ aghị esi awe phọ odị idiphọ oḍigh. Ika kụ idị ephomhoghiạn phọ Enhaạn eghịgh bọ oḍigh? Esi omaạm, oḅẹm mọ nạ rawạ oḅi ophiịny abazị, kụ oye aroph asuomạ dị rapoophom ghan oye umuụm angọ nyinhạ, nạ kasereghiạn ni loor esi dị nạ ka/ḅi mun, kuolọ asuomạ phọ opọ phọ bịn nyinhạ ka/phẹl. Loor esi dị amuụm mọ raaphoọm ni, kụ kemoghi oghuugh orue omhoọgh apelieẹny. Kewạ dị oye katoph oḍigh aruomnaan nyinhạ, kụ akpaaghị nyinhạ alọgh olhoghi oghuugh. AZihova aghaạph ilọ Izrạl phọ abuphẹ momheel bọ oḅuạ mọ: “Mị ughiọm ni ghisigh aḍurom ghan bidị r’iḍigh ephomhoghiạn.” (Hos. 11:4) Enhaạn aloghoma aani kẹn iniin phọ ilọ abuphẹ mowilhẹ bọ okumu odị, kụ roḅi bọ esi iiḅaghamhị r’ooḅaghamhiạn aloor aḅirinhi phọ aḍio arodon. Odị rawạ mọ bidị olhegheri mọ odị apomoghiạn ni bidị, kụ rawạ ni oḍur abidị olhoghomạ. AZihova katue ni asighẹ nyinhạ aḍighinhom oḍeenhaan ephomhoghiạn phọ odị amhoọgh bọ aghị esi abidị.
13. Kaạph idị emite dị eḍeenhaan mọ ephomhoghiạn abumor phọ ayira emoọgh ni iikpọ agey.
13 Emạn ni maạr agey ongọ okuphom owol buphẹ moophoọm bọ mọ aZihova apomoghiạn ni bidị, ḅilhẹ mọ yira phọ kẹn opomoghiạn ni bidị. APablo, opọ oghaạph bọ oghol epẹ omhạn, amheel li aḍuạ esi 30 asiạ, odị aḅẹm mọ: “Ḍiniin aḍiroọr, Mị atele ramite k’amhị kụ mị azuan onyọ umarani dị asiạ meghị ni anyụ iboom, odị uḅaanhaạn ni imhị eten ephomoghiạn. Kụ mị amhiigh omhoghi mudị obumoọny. Kụ mị aḅenhị umarani phọ mọ ekịgh mudị aZihova kụ arom nyinhạ oru oghaaphạn amhị. Pọ kụ amem dị mị asopha oḅula esi aZihova.”
R’EPHOMHOGHIẠN BAKỊ BUPHẸ MODUGH BỌ
14. Odaphạn Luk 15:4, 5, opoghom mọ aḍighi ika mem mọ amiịn bọ oyool ogạ phọ aphe bọ?
14 Ewạ ni oghiọm aghisigh olhoghonhaạn ghan aḍighaạgh buphẹ moophoọm bọ. Idiphọ oọny uruur phọ siphẹ aḍidogh phọ aZizọs, eeni bidị moḅonyonhu ni ozuan. Ḅilhẹ eeni asiya phọ abidị r’aZihova medugh ni loor ipẹ bidị mozuan bọ epẹ aḅirinhi phọ aSetan. Ewạ ni dị yira kologhonhaạn bidị ḍighaạgh oḅilhẹ okparamhị omheeraam mọ abidị esi aZihova. Siphẹ oghaạph omaaniọm oyool ogạ phọ aphe bọ, aZizọs aghaạph ni ipẹ opoghom mọ aphoophe bọ oyool phọ anyora ophạ odị, kụ aḅulhemhi epẹ aḍita phọ edi bọ. Opoghom mọ alhọgh ni mem r’inyaạm owạ oyool phọ, kuolọ odị amhiịn ni mọ ewạ ni dị odị kapạm aḅulhemhi epẹ aḍita phọ edi bọ, loor esi dị ogina odị ka/moọgh inyaạm orelhe oḅula.—Bạl Luk 15:4, 5.
15. Ika kụ idị yira kotue ologhonhaạn ḍighaạgh buphẹ modugh bọ oḅula esi aZihova? (Miịn igbe phọ “ Iyaạr Dị Ekạr Enhighẹ Osighẹ Oḍighinhom.”)
15 Kewạ ni olhọgh amem r’inyaạm olhoghonhaạn aḍighaạgh buniin abuphẹ moophoọm bọ orue okpạr opu asidugh phọ abidị. Kuolọ r’olhoghonhaạn aḍighaạgh uwaloor phọ aZihova, Ekpo onhụ phọ odị, ḅilhẹ r’arinyạ phọ ookpomhoghan phọ omiteom bọ, yira kotue ni ologhonhaạn bidị ḍighaạgh oḅilhẹ okparamhị asiya phọ abidị r’aZihova. (Rom. 15:1) Ika kụ idị yira kotue oḍighi iduọn phọ? Oniin okumor oye dị mabia ni siẹn igey phọ aḅẹm mọ: “Remoghi ghan ni oḅilhẹ otughemhị aBaibul phọ ogbogh opol abuphẹ moophoọm bọ mem dị bidị mokạr onyạ oḅula esi aZihova.” * Kụ iḍighi kụ eḍighi maạr dị okumor oye ookpomhoghan phọ aḅenhị nyinhạ otughemhị oye dị maaphoọm, nạ kaloghonhaạn ni ḍighaạgh? Okumor oye phọ aḅilhẹ aḅẹm mọ, “Ewạ ni dị okaaphọm dị ratughemhị oye dị maaphoọm kaḍighi ogey oyaghirị, ḅilhẹ aḍighi oye dị opọ dị ratughemhị bọ k’akaạph ghan torobọ iyaạr aḅenhị.”
IBO EPẸ K’AKẸ PHỌ R’ISIẸN ADE PHỌ
16. Ika kụ idị yira olhegheri bọ mọ aruukpaạny phọ kulhoghonhaạn ni iyira ḍighaạgh?
16 Ibadị areḍeenhaan emạ ni emiteom mọ aruukpaạny phọ rulhoghonhaạn ni iyira ḍighaạgh owạ abulọ mophe kụ rowạ ni oḅula esi aZihova. (Ogan. 14:6) Esi omaạm, aSilvio epẹ Ecuador, aaḅereghị ni ilọ olhoghonhaạn aḍighaạgh oḅilhẹ oḅula isiẹn ookpomhoghan phọ. Odị odi raaḅereghị kụ anhaghạn dị okar eghuugh odị. Akị apogh iyạl ikumor awe dị oghị ophogh odị. Olhoghi abidị aḅaạl li agey, omhiighom ongọ olhoghonhaạn aḍighaạgh phọ ewạ bọ.
17. Eeghe iikpiạ kụ edị yira komoọgh mem dị yira olhoghonhaạn ḍighaạgh bulọ modugh?
17 Yira komoọgh ni ibo esi olhoghonhaạn aḍighaạgh buphẹ modugh bọ oḅula esi aZihova. Oniin okọy eten dị oghol mọ Salvador, dị alhọgh ghan ikuph olhoghonhaạn aḍighaạgh buphẹ moophoọm bọ, aḅẹm mọ: “Eeni amem mị ra/tue ghan kaphamhaghạn loor, loor oḅaạl olhoghi. Olhoghi amhị raḅaạl ghan agey ophinhom aani abin mem dị aZihova atagharạn oniin oyool odị asighẹ siphẹ aḅirinhi phọ aSetan.”—Iiḍighi 20:35.
18. Ewạ mọ kuphom owol eeghe, eḍighi maạr dị nạ mawilhẹ ookpomhoghan phọ aZihova?
18 Eḍighi maạr dị nạ mawilhẹ ooḍikuan r’awe phọ aZihova, pọ legheri mọ aZihova aphomhoghiạn ni nyinhạ. Odị rawạ ni mọ ḅula esi odị. Ewạ ni ikuph orue oḅula esi aZihova. Kuolọ idiphọ odẹ phọ siphẹ oghaạph omaaniọm mọ aZizọs, aZihova rakori ni omhiịn dị nạ kaḅula esi odị, kụ r’oḅaạl olhoghi odị kaghuraam ni nyinhạ.
AḌUỌR PHỌ 103 Shepherds—Gifts in Men
^ par. 5 AZihova rawạ ni mọ buphẹ mowilhẹ bọ ookpomhoghan phọ oḅula esi odị. Yira omoọgh ni oboom oḍighi, olhoghonhaạn aḍighaạgh buphẹ rowạ bọ omhegheron aḍimhạgh phọ aZihova eḅẹm bọ mọ: ‘Ḅula esi amhị.’ Siẹn emhuoghaạph phọ ephẹn phọ, yira kooḅeghiọn idị yira kotue ologhonhaạn bidị ḍighaạgh oḍighi iduọn phọ.
^ par. 7 Iniin asiḍien monmeeghi.
^ par. 15 Kotue ni ologhonhaạn ḍighaạgh buniin abuphẹ moophoọm bọ esi otughemhị iniin ariisi aḍinyạ phọ oghol bọ mọ How to Remain in God’s Love, ḅilhẹ buniin kenighẹ ooḅula iniin arumhuoghaạph siphẹ aḍinyạ phọ Draw Close to Jehovah. Ekụ Arukumuan Ookpomhoghan phọ kụ kopogh ḍilọ ekạr ekasiạn otughemhiọm.
^ par. 68 ILỌ AFOTO: Iraạr abumor rologhonaạn ḍighaạgh onyọ umor dị rawạ oḅula esi aZihova. Bidị uḍighi iduọn phọ esi oghaaphạn odị, ongọ odị okuphom owol mọ aZihova r’abumor phọ opomoghiạn ni nyodị, ḅilhẹ r’olher ghan arurụ onhaghanhạn odị.
