1. Jehovah winyo nining ka kilaro romone acel mo ki i lobo pa Catan?

KIT ma wanyamo kwede i pwony mukato-ni, Jehovah opore kekene ki lakwat maber ma gwoko romine ducu ki acel acel. Dok en yenyo romo mo keken ma oa woko ki i kin luwote. Jehovah owaco bot Luicrael ma guweke ni: “Wudwog bota, an bene abidwogo botwu.” Wangeyo ni en pud winyo kit meno pien en owaco bene ni: “An . . . pe alokke.” (Mal. 3:6, 7) Yecu owaco ni Jehovah ki lumalaika cwinygi bedo yom adada kadi ka Laticce acel mo murwenyo odwogo cen Bote.​—Luka 15:10, 32.

2. Ngo ma wabinyamo i pwony man?

² Kong dong wanenu lapor pa Yecu adek ma kubbe ki konyo jo ma gua woko ki bot Jehovah. Wabinyamo bene kit mogo ma omyero wabed kwede wek wakony romi murwenyo me dwogo cen. Dok wabineno ni wanongo yomcwiny madwong ka watiyo matek me konyo jo ma ticgi okwe me dwogo cen bot Lubanga.

3-4. Pingo dako ma kiloko i kome i Luka 15:8-10 oketo cwinye adada ka yenyo cilinge murwenyo?

³ Myero wati matek wek wanong jo ma gimito dwogo cen bot Jehovah. I lapor ma kicoyo i Jiri pa Luka, Yecu otito kit ma dako mo oyenyo kwede cente ma nyige ma pire tek ma en orwenyo. Gin ma pire tek i lapor man aye tute pa dako-ni me yenyo cente meno.​—Kwan Luka 15:8-10.

⁴ Yecu otito kit ma dako-ni owinyo kwede i nge nongo ciling ma en orwenyo-ni. I kare pa Yecu, ka onongo dako ma Laicrael tye ka nyomme, i kine mogo onongo mine miyo bote nyig cente apar. Twero bedo ni nyig cente murwenyo-ni onongo pire tek bot dako-ni pien tye i kin cente apar ma mine omiyo bote i nino nyomme. Dako-ni obyeko ni cente man  opoto i dye ot. Pi meno, en ocwinyo tara ci oyenyo, ento pe oneno gin mo. Twero bedo ni mac tarane onongo pe ryeny maleng tutwal ma twero konye me neno nyig cente matidi-ni. I agikkine, en oyweyo dye ot ducu ki diro. I kin yugi ma en ojubo, en oneno nyig ciling ma pire tek-ki tye ka ryeny, kun mac me tarane caro. Cwinye pud dong okwe ya me nongone! En olwongo lureme ki jiranine kacel me nywako kwena maber man kwedgi.

5. Pingo twero bedo tek adada me nongo jo ma gua woko ki i kacokke?

⁵ Kit ma waneno kwede i lapor pa Yecu-ni, mitte ni watute matek wek wanong gin mo ma orweny. I yo acel-lu, twero mitte ni watute matek wek wanong jo ma guweko ribbe ki kacokke woko. Twero bedo ni dong otero mwaki mapol ma pe gubedo ka ribbe kwedwa. Romo bedo ni jo magi gudak i kabedo mukene ka ma omege ma kunnu pe ngeyogi. Ento watwero bedo ki gen ni i kare-ni, jo magi ma ticgi okwe woko-ni, gitye ki mitti me dwogo cen bot Jehovah. Gitye ki miti me tic pi Jehovah kacel ki omege ki lumege odoco, ento pe gitwero timo man ka pe kiminigi kony.

6. Jo ducu ma i kacokke gitwero nywako nining i yenyo jo ma ticgi okwe woko?

⁶ Anga ma twero yenyo jo ma ticgi okwe woko? Wan ducu​—luelda, lupainia, wadigi, kacel ki lutit kwena me kacokke ducu—​gin ducu gitwero nongo jo magi. Tika itye ki laremi nyo watti mo ma ticce okwe woko? Tika dong irwatte ki ngat mo ma ticce okwe woko i kare ma itye ka tito kwena i ot ki ot nyo i dye lwak? Ka ngat meno tye atera me mini namba cimme nyo nying kabedone, ci itwero miyo ngec meno bot luelda ma i kacokkeni.

7. Gin ango ma ipwonyo ki i lok pa laelda ma nyinge Thomas?

⁷ Jami mene ma luelda gitwero timone me nongo jo ma gimito dwogo ceng bot Jehovah? Nen kong lok pa laelda mo ma nyinge Thomas, * ma bedo i lobo Spain. En okonyo Lucaden makato 40 me dwogo cen i kacokke. Thomas owaco ni: “Mukwongo acako kong ki penyo omege ki lumege me kacokke ka gingeyo ka ma ngat mo ma ticce okwe bedo iye. Nyo bene apenyo lutit kwena ka wigi po i kom ngat mo ma con onongo bino i cokke ento i kare-ni ogiko bino woko. Pol pa omege ki lumege gigamo ki mit kom pien nongo giwinyo calo gin bene gitye ka yenyo ngat meno. Lacen ka alimo omego nyo lamego meno ma ticce okwe woko-ni, apenye kit ma lutinone nyo wadine gitye kwede. Twero bedo ni jo mogo ma ticgi okwe woko onongo yam gikelo lutinogi i cokke, dok lutino magi kare mogo onongo gubedo lutit kwena. Gin bene kitwero konyogi me dwogo cen bot Jehovah.”

8. I lapor pa awobi ma orwenyo, ma tye i Luka 15:17-24, wego-ni otero wode ma ongut-ti nining?

⁸ Kit ango ma myero wabed kwede ka wamito konyo jo ma gimito dwogo cen bot Jehovah? Nen kong pwony ma wanongo ki i lapor pa Yecu i kom awobi ma wiye otang ma oa woko ki gang. (Kwan Luka 15:17-24.) Yecu otito kit ma awobi man oniang kwede ni etimo gin me mingo ci omoko tamme me dwogo cen paco. Wonne oringo ongolo wii wode ci okwake kun weko wode ngeyo ni emare. Cwiny wode obedo ka pide matek pi bal ma en otimo, man oweko en owinyo calo pe epore me bedo latin pa wonne. Kica omako wonne i kare ma wode otite kit ma en winyo kwede ki i cwinye. Wonne otimo jami mogo  me nyuto ki wode ni ejolle paco, pe macalo laticce, ento macalo wode ma emaro matek. Me moko ni emaro wode ma ongut-ti dok ejolle paco, wonne oyubbe karama dok omiye bongi mabeco.

9. Kit neno ango ma myero wabed kwede ka wamito konyo jo ma ticgi okwe woko me dwogo cen bot Jehovah? (Nen bok ma wiye tye ni “ Kit me Konyo Jo ma Gimito Dwogo Cen.”)

⁹ Jehovah tye calo wego ma i lapor man. En maro omege ki lumege ma ticgi okwe woko dok mito ni gudwog cen bote. Ka walubo lanen pa Jehovah, ci watwero konyogi me dwogo cen. Wek watim man, myero wanyut cwiny me mar, kica, paro pi dano kacel ki diyo cwiny. Pingo myero wanyut kit magi, dok watimo man nining?

10. Pingo mitte ni wadi cwinywa ka wamito konyo ngat mo me dongo watte ki Jehovah odoco?

¹⁰ Myero wadiyu cwinywa pien tero kare ki ngat moni me cang i yo me cwiny. Jo mapol ma ticgi onongo okwe woko gutito ni gimoko tamgi me dwogo cen i kacokke i nge kare ma luelda ki omege ma i kacokke olimogi tyen mapol. Lamego mo ma nyinge Nancy ma a ki i lobo Acia, ocoyo ni: “Larema mo macok i kacokke okonya adada. En onongo mara calo lamera madit. En opoyo wiya i kom kare mabeco ma wabedo kwede i kare mukato angec. En onongo tero ite dok diyo cwinye winyo loka ka atitte kit ma awinyo kwede, dok onongo pe lworo mina tam. En obedo larem me ada, ma onongo tye atera me miyo kony i kare ma mitte.”

11. Pingo omyero wanyut cwiny me kica ka wamito konyo jo ma kicwero cwinygi?

¹¹ Ka ngat mo kicwero cwinye, en winyo arem calo ngat ma tye ki wang bur. Kica bedo calo yat ma twero konyo ngat meno wek en owiny maber. Jo mogo ma ticgi  okwe woko, twero bedo ni ngat mo ma i kacokke ocwero cwinygi dok pud gitye ki kiniga. Pi tyen lok man, giwinyo calo pe gitye atera me dwogo cen bot Jehovah. Jo mogo giromo bedo ki tam ni kiterogi marac. En twero mito ni ngat mo owiny lokke dok oniang kit ma en winyo kwede. (Yak. 1:19) María, ma i kare mo ticce kong okwe woko owaco ni, “Onongo amito ni ngat mo owiny lokka, ocuk cwinya, dok omina tam kacel ki kony ma amito.”

12. I yo ma nining ma mar pa Jehovah tye calo tol?

¹² Baibul poro mar pa Jehovah pi jone ki tol. I yo ma nining ma mar pa Jehovah tye calo tol? Tam kong i kom lapor man: Go kong ni itye ka mwony i nam ma piine tye ka twagge matek ci ngat mo obolli jaket ma weko ikwang i wi pii. Ki lok ada, ibibedo ki pwoc pi kony meno pien twero konyi weko pe imwony i te pii. Ento jaket man ma weko dano pe mwony-nyi pe bikonyi tutwal me wek ibed kwo. Pii meno ngic adada, dok pe ibitwero bwot ka pe idonyo i yeya. Pi meno, imito ni ngat mo obolli tol dok oywayi wek io ka ma yeya tye iye. Jehovah oloko kit man i kom Luicrael ma wigi otang woko ni: “Yam abedo ka telogi ki tol, ki twon mar madwong.” (Koc. 11:4) Lubanga pud winyo kit meno i kom jo ma gugiko tic pire woko dok pekki kacel ki par me lobo-ni odiyogi. Jehovah mito ni gunge ni en pud emarogi, dok emito konyogi me dwogo cen bote. Dok Jehovah twero tic kwedi me nyutigi mar mere.

13. Labol pa Pablo nyuto nining ni marwa twero konyo jo mukene me dwogo cen bot Jehovah?

¹³ Pire tek ni wakony jo ma ticgi okwe woko wek gunge ni Jehovah kacel ki wan wamarogi. Pablo, ma kiloko i kome i pwony mukato-ni, orii pi mwaki makato 30 ma  ticce pi Jehovah okwe woko. En owaco ni: “Odiko mo acel, i kare ma atye ka a ki gang, arwatte ki lamego mo ma otegi dok en oloko kweda i yo me mar adada. Acako kok ki pig wanga calo latin. Awacce ni nen calo Jehovah aye ma ocwale me lok kweda. Cakke i cawa meno, amoko tamma me dwogo cen bot Jehovah.”

14. Ma lubbe ki lapor ma tye i Luka 15:4, 5, gin ango ma lakwat-ti otimo i kare ma onongo romo ma orwenyo-ni?

¹⁴ Myero wamedde ki konyo jo ma ticgi okwe woko dok wacuk cwinygi ka wanongogi. Calo awobi ma orwenyo ma i lapor pa Yecu-ni, twero bedo ni gitye ki arem matek i cwinygi ma gimito kare wek gucang. Dok nongo gitye magoro i yo me cwiny macalo adwogi me jami ma otimme i komgi i lobo pa Catan. Mitte ni wakonygi me jingo watgi ki Jehovah odoco. I lapor pa romo murwenyo-ni, Yecu otito kit ma lakwat otingo kwede ki romone i wi gwoke ci odwoke cen i kin luwote. Lakwat-ti onongo dong otiyo matek dok otero cawa malac ka yenyo romo meno. Ento en oniang ni onongo mitte ni eting romo meno edwok cen i kin luwote pien pire kene romo man onongo pe twero wot.​—Kwan Luka 15:4, 5.

15. Watwero konyo jo ma goro i yo me cwiny me dwogo bot Jehovah nining? (Nen bok ma wiye tye ni “ Gin Tic ma Pire Tek Adada.”)

¹⁵ Twero mitte ni water cawa malac kacel ki kero madwong me konyo jo ma ticgi okwe woko wek gulo ariya ma tye ka gengogi me dwogo cen ka tic pi Jehovah. Ento ki kony pa cwiny maleng pa Jehovah, Baibul, ki bukkewa ma wanongo ki i kacokke, watwero konyogi me jingo watgi ki Jehovah. (Rom. 15:1) Watwero timo man nining? Laelda mo ma dong otiyo pi mwaki mapol dok  tye ki ngec madwong owaco ni, “Pol pa jo ma ticgi okwe woko mitte ni kikwan Baibul kwedgi ka gumoko tamgi me dwogo cen bot Jehovah.” * Pi meno, ka kilegi ni ikwan Baibul ki ngat ma ticce okwe woko, pingo pe ijol mot man ki cingi apar? Laelda man bene owaco ni, “Latit kwena ma bikwano Baibul ki ngat meno omyero obed omego nyo lamego ma tye larem, ma ngat ma ticce okwe-ni twero tite mung ma i cwinye.”

16. Ngo ma weko wamoko ni watye ki kony ma a ki bot lumalaika?

¹⁶ Tye labol pa jo mapol ma moko ni lumalaika gitye ka tic kacel kwedwa me konyowa nongo jo ma ticgi okwe woko ma gimito dwogo cen bot Jehovah. (Yabo 14:6) Me labolle, Silvio, omego ma bedo i lobo Ecuador olego ni Jehovah ocwal ngat mo wek okonye me dok cen i kacokke. I kare ma en pud tye ka lega, owinyo ka kidwongo doggolane. Luelda aryo aye onongo gucung i nyim ode. I kare me lim meno, luelda magi gubedo ki yomcwiny madwong me cako mine kony ma en mito.

17. Adwogi maber ango ma wanongo ka wakonyo jo magoro i yo me cwiny?

¹⁷ Wabinongo yomcwiny madwong adada ka wakonyo jo magoro wek gudwog cen bot Jehovah. Nen kong lok pa Salvador, lapainia ma tute matek me konyo jo ma ticgi okwe woko. En owaco ni: “Ka atamo i kom jo ma ticgi onongo okwe woko ma gudwogo cen bot Jehovah, i kare mogo pig wanga cwer pi yomcwiny madwong ma atye kwede. Yomo cwinya adada me neno ni Jehovah olaro romone mo ki i lobo pa Catan dok abedo ki mot me tic kacel Kwede i tic man.”​—Tic 20:35.

18. Ka ticci okwe woko, gin ango ma pud itwero bedo ki gen iye?

¹⁸ Ka igiko ribbe kacel ki jo pa Jehovah, bed ki gen ni Jehovah pud mari. En mito ni idwog cen bote. Tye jami mogo ma bimitte ni itute me timone wek idwog cen. Macalo wego ma i lapor pa Yecu-ni, Jehovah bene tye ka kurri me dwogo cen bote, dok bijoli paco.