1. Ano patikol ko cecay sikawdan ni Yihofa i tatihi Ningra i, samanay ko harateng Ningra hani?

FAFEKANGAY lalakaw milengoay, palinian ni Yihofa ko Niyah to ngaˈayay pakaenay, wa damsay Cingra midimokos to kahacecay a lopayˈay siri. Ano moraraw ko cecay siri, misaˈicelay Cingra a mikilim panokay toniya siri. Pasowalan ni Yihofa koya miliyasay Cingraanan a Israil tamdaw: ‘Ka patikol tayni i tatihi Ako, wa patikol Kako tayra i tatihi namo.’ Mafanaˈay kita mahaenay ko pinengneng ni Yihofa anini to mihawaday mitosil a salikaka, samanen sanay ko sowal Ningra: ‘Cowa ko mamafalic Kako.’ (Malaki 3:6, 7) Sowal ni Yis ano patikol ko cecay sikawdan no Kawas i tatihi no Kawas, ci Yihofa ato coyoh o tataˈangay ko hemek.—Luka 15:10, 32.

2. Oniya lalakaw wa milengo to maanan?

² Oniya lalakaw wa milengo to tolo a sapatinako ni Yis, oniya tolo sapatinako milingatay to sasamaan padama to mihawaday midoko to Kawas a tamdaw. Milengoho ko lalakaw, pakayni sapadamaaw to moraraway a lopayˈay siri patikol i tatihi ni Yihofa, o papaihkal kita to maanan a capeling. Minengnengho kita, pakalalok to malonayay a salikaka hano o ciepocay.

3-4. Misowalan no Luka 15:8-10 a fafahiyan, hano misongilaˈ mikilim to mahidayay ekim a payci ningra hani?

³ Sapikilimaw to makalimay patikol i tatihi ni Yihofa a salikaka, o mamihadak kita to ˈicel. Itini Luka cecay sapatinako, masowalay ni Yis ko cecay fafahiyan misongilaˈay a mikilim to mahidayay ekim a payci. Songilaˈay mitadtad koniya sapatinako to pikilim noniya fafahiyan to ekim a payci.—ˈOsien ko Luka 15:8-10.

⁴ Somowalay ci Yis tiya mahela noya fafahiyan koya ekim a payci samanay ko harateng. Itini lintad ni Yis, ano mikadafo ko fafahiyan no Israil i, paˈorongay ko wina to moetep ekim a payci  i fafahiyan wawa. Itini sapatinako o mahidayay noya fafahiyan o mahaenay ekim a payci alatek. Harateng ningra oniya ekim a payci materakay icowa no lomaˈ, orato mitotomay cingra to dawdaw mikilim, kawra cowa ka kilim, samanen cowa ka taengad koya dawdaw. Ikor, misongilaˈay cingra miasik to lomaˈ. Salikor, maˈarawayto ningra ko talapiyatay a dafong, oya ekim a payci! Tada lipahakay cingra, mitahidangay to widang ato fiyaw malacafay a maacang.

5. Sapikilimaw to mihawaday mitosil a salikaka, hano cowa ko madoloay nolatekay hani?

⁵ Mitadtaday ko sapatinako ni Yis, sapikilimaw to mahidayay a dafong o mamihadak to ˈicel. Malecaday, sapikilimaw kita to mihawaday mitosil a salikaka, o mamihadak to ˈicel. Halafinayto cangra caka picawmaˈ kitaanan alatek, anca malinahay tayra i roma pala, o itiraay a salikaka cowa ka fanaˈ cangranan. Nohatini, i lalomaˈ nangra maedeng iraay ko makalimay patikol i tatihi ni Yihofa, miliyaw a malacafay to kasakopang a midoko ci Yihofaan. Tada misaaliay cangra to sapadama ita cangranan.

6. Wa sasamaan kita mihadak to ˈicel, mikilim to mihawaday mitosil a salikaka hani?

⁶ Cima ko papadama mikilim to mihawaday mitosil a salikaka hani? Ano paro no lomaˈ nangra, anca malohemay malitengay no kasakopang, misakafahay ato roma mitosilay, wa ngaˈay mihadak to ˈicel. Iraay ko widang anca salawina iso mihawaday mitosil han? Itini pakalomaˈay mitosil anca mirienang to kaˈalomanay a pisawacayan i, na malitemohay iso ko mihawaday mitosil a salikaka han? Ano makahi cingra pafeli to sapirinak tisowanan, wa ngaˈay pafelien iso ko malohemay malitengay i kasakopang.

7. Mikitini i sowal ni Tomas mananam iso ko maanan hani?

⁷ Mikiriwiˈay ko malohemay malitengay mamikilim toya makalimay patikol i tatihi ni Yihofa a salikaka, o sasamaan ko hademak nangra hani? O cecay malohemay malitengay ci Tomas *, itiniay i Sipanya, na mataˈlifay ko 40 mapadamaay ningra a salikaka patikol i kasakopang. Sanay ci Tomas: “Salakat milicayan ako ko salikaka, samanen mafanaˈay cangra to icowaay ko kitiraan no mihawaday mitosil a tamdaw. Milicayanho ako ko ˈalomanay maharatengay ko cima cowato pirienang to saˈopo. Tawlikay ko ˈalomanay a padama, samanen sapihadakaw cangra to ˈicel. Ano milisoˈ kako to mihawaday mitosil a salikaka i, milicayay to pakayraan no wawa nangra ato salawina. O roma mihawaday mitosil a tamdaw miˈorongay to wawa mirienang to saˈopo i salakat, o wawa nangra nao mitosilay alatek. Oniya kaemangay misaaliay to sapadama ngaˈ patikol i tatihi ni Yihofa.”

8. Itini Luka 15:17-24 malafelay wawa a sapatinako, samanay ko picada no wama toya minokayay a wawa hani?

⁸ Ano sapadamaaw to makalimay patikol i tatihi ni Yihofa a salikaka, misaaliay kita to maanan a capeling hani? Mikitini misowalan ni Yis malafelay wawa a sapatinako wa ngaˈay kita milifok to sadama. Iraay ko cecay wawa tada macoliay, liyas sanay to lomaˈ. (ˈOsien ko Luka 15:17-24.) Ikor, talipaˈelalay ko falocoˈ ningra, misetek ko falocoˈ minokay. Comikayay ko wama a miraod i cingraan a mitakec, mahapinangay ningra kamayan a maolah ko wama cingranan. Kawra tada makesemay ko harateng ningra, caayto ka tatodong malo wawa no wama ko niyah. Maharek mitengil to nafalocoˈan no niyah i, tada siniˈadaay ko wama cingraan, milimasmas to tangidaf maacang to kapinokay ningra, mialaho to sangaˈayay a rikoˈ parikoˈ cingraan, pasowal cingranan cowa ko mawmahay cingra, ao kalimlaan a wawa.

9. Pakayni sapadamaaw to mihawaday mitosil a salikaka patikol i tatihi ni Yihofa, wa paihkal kita to maanan a capeling hani? (Nengnengen ko sapatongal lalakaw “ Samaan Padama to Makalimay Patikol a Tamdaw.”)

 ⁹ Ci Yihofa malecaday oya sidaˈitay a wama i sapatinako. Ciharatengay Cingra to mihawaday mitosil a salikaka, tada makalimay patikol cangra i tatihi Ningra. Mitodong kita ci Yihofaan paihkal to mihadidiay, ciolahay falocoˈ ato siniˈadaay falocoˈ, wa ngaˈay padama cangranan mihaen ko demak. Hano papaihkal kita to hatiniay a capeling hani? Wa ngaˈay kita samaan ko demak hani?

10. Sapadamaaw to tao patikol to kalawidang aci Yihofaan, hano misaaliay to mihadidiay hani?

¹⁰ O papaihkal kita to mihadidiay, samanen sapatikolaw ko cecay tamdaw to kalawidang aci Yihofaan misaaliay to toki. ˈAlomanay na mihawaday mitosil a tamdaw sanay ko sowal, itini pisaliyaliyaw no malohemay malitengay ato roma salikaka a milisoˈ cangranan ikor i, palidlid sanay cangra a mafalic. Cecay itiniay Tongnanya (Kowaping) fafahiyan salikaka ci Nansi, sanay: “O cecay ngaˈayay widang i kasakopang taˈangayay ko sapadama takowanan, maolahay cingra takowanan, malecaday o malikakaay kami. Milengoay cingra to kahemekan niyam malacafay i salakat. Mihadak kako to nafalocoˈan a harateng i, mihadidiay cingra a mitengil, pafeliay takowanan to ngaˈayay sapaini. Ano hacowato makahiay cingra a padama, tada o soˈlinay a widang ako.”

11. Hano papaihkal kita to siniˈadaay a falocoˈ, ngaˈ ngaˈay mihinom to tao?

¹¹ O siniˈadaay falocoˈ malecaday o ngaˈayay sapaiyo, ngaˈayay miadah to adadaay a falocoˈ. O roma mihawaday mitosil a tamdaw na midokaˈan no tao i kasakopng i salakat, tahaniniay kamayanho a maketer. O hatiniay masofaway harateng milowanay to sapatikolaw a ˈicel nangra  i tatihi ni Yihofa. Mapakararaway ko niyah sanay ko roma tamdaw miharateng, misaaliay to mamitengil to nafalocoˈan nangra a tamdaw, cipinang to nafalocoˈan nangra. (Yakop 1:19) Ci Mariya na mihawaday a mitosil, sowal ningra: “Misaaliay kako to mamitengil to nafalocoˈan, mihinom takowanan, padama takowanan, pafeli takowanan to ngaˈayay sapaini.”

12. O olah no Kawas ato sasoˈot iraay ko maanan kalecadan hani?

¹² Palinian no Fangcalay Cudad ko olah ni Yihofa to finawlan Ningra to sasoˈot. O olah no Kawas ato sasoˈot iraay ko maanan kalecadan hani? Haratengen hena, itini kiso i citapelikay a riyar mamaˈemekto, toniya tatokian ira ko mitekolay to sapipaˈorip a rikoˈ. Maedeng mamiakoˈid kiso cingranan, samanen o ngangaˈayto kiso a mapawpaw i fafekang no nanom. Kawra o sapaˈorip aca a rikoˈ cangoˈotayho, samanen kietecay ko nanom, misaaliay kiso pilaliwan a tamina hongaˈay madipot ko ˈorip. Mihaenay, ira ko mitekolay to sasoˈot tisowanan, dotoc mitengteng tisowanan patayra i tamina. Masowal ni Yihofa koya miliyasay Cingranan a Israil tamdaw, sanay: ‘Tano olah a sasoˈot ko sapisolot cangranan tayni i ˈaˈayaw Ako.’ (Hosiya 11:4) Anini, kamayanho mahaen ko harateng ni Yihofa. Pakayra toya cowato pidoko Cingraanan, mamaˈemekto no pasangaray no niyah a salikaka, tokel ni Yihofa nanay mafanaˈ cangra to maolahay Cingra cangranan, makalimay patikol cangra i tatihi Ningra. Wa ngaˈay pakaynien ni Yihofa tisowanan a paihkal toniya olah cangraanan.

13. Pairaen ita ko olah to tamdaw hano papadama cangranan patikol i tatihi ni Yihofa hani? Tano tinakoan ni Papolo mitadtad.

¹³ Fanaˈen ko mihawaday mitosil a salikaka ci Yihofa ato kita tada maolahay cangranan,  masakalimlaan ko pihaen to demak. Masowalay i fafekang lalakaw ci Papolo na mihawaday mitosil to 30 miheca, sanay: “Cecay papacem, mamahadak kako i, maˈaraw no cecay matoˈasay fafahiyan salikaka kako damsayay a ciharateng takowanan. Cowato pakaˈemet kako sano wawa sanay a tomangic. Pasowalan ako cingra, malecaday o miocoran ni Yihofa cingra a masasowal takowanan. Toya tatokian, misetekay to falocoˈ kako patikol i tatihi ni Yihofa.”

14. Mikitini i Luka 15:4, 5 a sapatinako, mahela no pakaenay ko moraraway a siri ikor samaanay ko demak?

¹⁴ O mihawaday mitosil a salikaka misaaliay to pipadadotoc kita a padama cangranan. Malecad o malafelay wawa a sapatinako ni Yis, maedeng tada misemsemay cangra alatek. Itini hekal ni Satan padadotocay a misafirofiro cangra, miaraayto ko kalalaˈed nangra ci Yihofaan alatek. O papadamaen ita cangra miliyaw palahad to pakasoˈlinay falocoˈ ci Yihofaan. Itini moraraway a lopayˈay siri a sapatinako, somowalay ci Yis o pakaenay to siri panokay i masafelaway siri. Soˈlin adihayayto ko mipalakan a toki ato ˈicel no pakaenay a mikilim to siri, kawra mafanaˈay cingra o ˈaˈafalangen ko siri panokay i masafelaway siri, samanen awaayto ko ˈicel no siri a minokay.—ˈOsien ko Luka 15:4, 5.

15. Sasamaan kita padama to sapatikolaw i tatihi ni Yihofa a tamdaw hani? (Nengnengen ko sapatongal lalakaw “ Ciepocay a Lalosidan.”)

¹⁵ Pakayni sapadamaaw to mihawaday mitosil a tamdaw miremo to dangoc nangra, wa adihay ko mihadakan ita a toki ato ˈicel alatek. Kawra pakayni pitiˈer to fangcalay saocor, Fangcalay Cudad ato mitepangan no likakawa no Kawas a cudad, wa ngaˈay mapadama ita cangra miliyaw mala widang no Kawas. (Loma 15:1) Sasamaan ko hademak ita hani? O cecay kadofahay ko nalifetan a malohemay malitengay sanay: “O mihawaday  mitosil a tamdaw ano misaˈosi patikol i tatihi ni Yihofa, o mamiliyaw micada to picekiw to Fangcalay Cudad.” * Sanayho ko sowal: “O misikayay pacekiw a tamdaw o mamalo widang noya tamdaw, ho makahi cingra mihadak to nafalocoˈan a demak.” Ano mitahidang ko malohemay malitengay tisowanan malalengo to mihawaday mitosil a tamdaw, wa makahi kiso han?

16. Hano mafanaˈ kita o papadama ko coyoh kitaanan hani?

¹⁶ Misawacayay ko adihayay tinakoan, padamaay ko coyoh kitaanan mahela ko makalimay patikol i tatihi ni Yihofa a tamdaw. (Paˈarawan 14:6) Itiniay i Ekuwato ci Siewiaw na micangacangay ci Yihofaan padama cingranan patikol i kasakopang. Mitolonayho cingra i, tatosaay malohemay malitengay mikongkongayto fawahan. Ngaˈay padama cingranan, tada mahemekay koniya tatosaay salikaka.

17. Ngaˈay padama to mihawaday mitosil a tamdaw patikol i tatihi ni Yihofa, wa iraay ko masamanay a harateng ita hani?

¹⁷ Ngaˈay padama to mihawaday mitosil a tamdaw patikol i tatihi ni Yihofa, maedeng o mamahemek kita. Ci Saewato o misakafahay, tada lipahakay cingra padama to mihawaday mitosil a salikaka, sanay cingra: “Latekay, tahatangicay kako to kahemek. Maharateng ko pilidong ni Yihofa to lopayˈay siri nai hekal ni Satan, hanaca ngaˈay kako malacafay ci Yihofaan, tada malikoay ko harateng ako.” —Dmak 20:35.

18. Ano mihawadayto kiso a micawmaˈ to finawlan ni Yihofa, wa ngaˈay pakasoˈlin kiso to maanan?

¹⁸ Ano mihawadayto kiso a micawmaˈ to finawlan ni Yihofa, ka pakasoˈlin, kamayan a maolah ci Yihofa tisowanan, makalim patikol kiso i tatihi Ningra. Manaokaniw, oha mamidemak kiso to kalimlaan a demak miliyaw a malawidang ni Yihofa. Kawra malecad i sapatinako ni Yis a sidaˈitay a wama, makalimay ci Yihofa patikol kiso i taˈangayay paro no lomaˈ Ningra. Ano patikol kiso, o mamahemek Cingra a mihamham tisowanan.