YIGIL 26
“Témb i meeni”
“Ni témb i meeni, ndi m’a témb i bééni.”—MALAKI 3:7.
HIÉMBI 102 “Di nit bet ba yé ntombok”
DINYO MALÉP *
1. Kii Yéhôva a nôgda i ngéda ntômba wé wada u ntémb i nyeni?
KIKI di ntehe mu yigil i ntagbe, Yéhôva a nhégha nyemede ni ntééda mintômba nu a ntôñ hiki ntômba wé. Ibale ntômba wada u nimil, a nyéñ wo. I ngéda bon ba Israel ba bi waa gwélél Yéhôva, a kal bo le: “Ni témb i meeni, ndi m’a témb i bééni.” Di nyi ntiik le a nôgda nlélém jam i len ini, inyule a nkal le: “Me nhéñha bé.” (Malaki 3:6, 7) Yésu a kal le, Yéhôva ni biañgel ba nok maséé ma bilim i ngéda ngwélél Djob to wada nu a bi ke nye haa a ntémb i nyeni.—Lukas 15:10, 32.
2. Kii di ga tehe munu yigil ini?
2 Di béñge dihéga di Yésu diaa di di ñunda bés lelaa di nla hôla i bet ba bi ke haa ni Yéhôva. Di ga pôdôl ngim bilem bilam i mbéda bés inyu hôla bo. Di ga tehe ki bisai di nla kôs ibale di nhôla mut i témb yak Yéhôva.
NYIÑA U DRAKMA
3-4. Inyuki muda kaat Lukas 15:8-10 i mpôdôl a nyoñ ngéda i yéñ drakma yé?
3 Di nlama sal ni ngui inyu léba i bet ba nyéñ témb yak Yéhôva. Mu hihéga Yésu a bi ti i kaat Lukas, a bi pôdôl muda nu a bé yéñ drakma yé i i bi nimil, inyule i bééne nye nseñ ngandak. Nlôm jam munu hihéga hini a yé biliya muda a mboñ mu nyiña wé.—Añ Lukas 15:8-10.
4 Yésu a mpôdôl i yom muda nu a nôgda i ngéda a nléba i drakma i. I dilo di Yésu, bôda ba Lôk Yuda bahogi ba bé ti bingond gwap jôm li drakma i ngéda ba bé ke libii. I nene le i drakma i, i bééne nye nseñ
ngandak inyule nyañ nyen a bi ti nye yo i ngéda a bé ke libii. I muda nu a bé yi le i drakma i i bi kwo ’isi. Jon a nkuye lambe inyu yéñ yo, ndi a ntehe bé. I nene le lambe yé i mbai bé ngandak, i bak ki le i drakma i i nlôôha sii. A nyoñ ngéda i sas ndap yosôna. Mu binan a nkot nyen a nléba drakma yé. Kinje maséé a nôgda! A nsébél mawanda mé ni bôt bé ba libôk inyu legel bo nwin nlam u.5. Inyuki i ta bé bun i léba i bet ba bi ke haa ni Yéhôva?
5 Kiki hihéga hi Yésu hi ñunda, bun a ta bé inyu léba i yom di nimis. Nlélém jam ni i bet ba bi ke haa ni Yéhôva, di nlama sal ni ngui inyu léba bo. I nla ba le nano a yé ngandak nwii le ba bi tjôô likoda. Ba bi ke ba yén i het bilôk bikéé bi nyi bé bo. Bebek le i ngéda di yé i yéñ bo, ba gwé ngôñ i témb yak Yéhôva, ikété lihaa li bagwélél bé, ndi ba gwé ngôñ ni mahôla més.
6. Lelaa bés bobasôna di nla yoñ ngaba i yéñ i bet ba bi ke haa ni Yéhôva?
6 Njee a nla yéñ i bet ba bi ke haa ni Yéhôva? Bés bobasôna; hala wee mimañ, basañal, batéé likalô, tole bôt bap ba lihaa. Baa u gwé mut woñ lihaa tole liwanda joñ li li bi ke haa ni Yéhôva? Baa u ma boma wada wap mu likalô li mandap ni mandap, tole i likalô li mbamba? Toñle nye le, ibale a gwé ngôñ le ba yuuga nye, w’a ba maséé i ti mimañ mi likoda mi libôga jé jôl jé ni nomba yé téléfôn.
7. Kii mbôgi i mañ wada le Tômas i niiga bés?
7 Mambe manjel mimañ mi nla gwélél inyu léba i bet ba nyéñ témb yak Yéhôva? Mañ wada le Tômas * i loñ Panya nu a bi hôla iloo 40 ma bôt i témb yak Yéhôva a nkal le: “Me mbôk ndugi me bat lôk kéé i bôda ni i bôlôm ibale ba nyi mambai ma bilôk bikéé bi bi bi ke haa ni Yéhôva. Tole me mbat batéé likalô ibale ba nyi mankéé wada nu a nsôga lo makoda. Ngandak lôk kéé i yé maséé i ti mahôla inyule ba nyi le i bôlô i i mbéñge yak bo. I mbus, i ngéda me nyuuga bilôk bikéé bi bôda ni bi bôlôm bi bi nke haa ni Yéhôva, me mbat yak bo bon bap, ni bôt bap ba lihaa bape. Bahogi ikété yap ba bééna lem i lona bon bap i makoda, i nla ki ba le bon bap ba bé batéé likalô. Yak bo ba gwé ngôñ ni mahôla inyu témb yak Yéhôva.”
DI HÔLA BON BA YÉHÔVA I TÉMB I NYENI
8. Mu hihéga hi Yésu i kaat Lukas 15:17-24, lelaa isañ a bi leege man wé?
8 Bimbe bilem bi nla hôla bés i témbna bagwélél ba Yéhôva ikété ntôñ? Di ôt biniigana mu hihéga hi man nimlaga nu a bi pam i ndap isañ. (Añ Lukas 15:17-24) Yésu a nkal le i man nu, a bi sôk nôgda le a nlôôha jôñôp, a kit le a ntémb i ndap isañ. Ngéda isañ a bi tehe nye a nlo, a ke ngwéé i sambla nye, inyu unda nye le a ngwés nye. Kiññem i bé kéés i mañge nu, jon a bi kal isañ le a kôli bé ba man wé. Isañ a bi kônôl nye ngoo i ngéda a bi yible nye ñem wé. I mbus, a boñ mam ma bé unda man wé le a yé maséé i leege nye, ha kiki nkol bé, ndi kiki man wé nugwéha. Inyu kwés nye nkaa le a ngwés toi nye, a bi ha nye mambot malam, a naña ngand.
9. Bimbe bilem u nlama bana inyu hôla i bet ba bi ke haa ni Yéhôva? (Béñge minkéñék mi matila le “ Lelaa di nla hôla lôk kéé i i nsômbôl témb yak Yéhôva.”)
9 Yéhôva a yé kiki isañ hihéga hini hi mpôdôl. A ngwés lôk kéé i bôda ni i bôlôm i i bi ke haa ni nye, a nsômbôl ki le ba témb i nyeni. Ibale di nigle Yéhôva, di ga hôla bo i témb i ntôñ. Inyu pam i boñ hala, di nlama bana wongut, ñem ngôô ni gwéha. Inyuki di nlama bana bilem bi, kii i nla hôla bés i bana gwo?
10. Inyuki wongut i yé nseñ inyu hôla mut i témbna maada mé ni Yéhôva?
10 Di nlama bana wongut inyule i mbéda ngandak ngéda inyu boñ le mut a témbna maada mé malam ni Yéhôva. Ngandak lôk kéé i i bi ke ndugi haa ni Yéhôva i nkal le mimañ ni lôk kéé ipe ba bi yuuga bo ngandak ngélé ndi ba bôdôl lo i makoda. Sita yada le Nancy nu a yé i nwelmbok i pes likôl i Asia a nkal le: “Sita yada i i bé liwanda jem i bi hôla me ngandak. A bi yoñ me kiki manyañ nu mbus. A bigdaha me mangéda malam di bi tégbaha ntôñ. A bi emble me ni wongut i ngéda me bé yible nye ñem, a bé ki bebee i ti me maéba. A bé toi bañga liwanda, to imbe ngéda me bééna ngôñ ni mahôla, a bé ha.”
11. Inyuki ngôô i yé nseñ inyu hôla bôt ba bi babaa?
11 Ngôô i yé kiki bee bi bi nla hôla Yakôbô 1:19) Maria nu a bi ke haa ni Yéhôva, a nkal le: “Me bééna ngôñ ni mut a ñemble me, mut me nla nigbene, ni mut a nhôla me.”
mankéé nu a bi ke haa ni Yéhôva inyule mut a bi babaa nye. Ngim lôk kéé i bi nom i mbégdé inyule ba bi unbaha bo. Hala a bi boñ le ba bana ha bañ ngôñ i témb i ntôñ. Bahogi ba yé le ba hoñol le ba bi boñ bo béba ngi njom yo ki yo. Bebek ba gwé ngôñ ni mut a ntibil emble bo, mut a nok bo. (12. Ti hihéga hi ñunda lelaa gwéha i Yéhôva i nhôla i ôt bôt ba ba bi ke nye haa?
12 Bibel i nhégha gwéha i Yéhôva inyu bagwélél bé ni nkôô. Inyuki? Di yoñ hihéga: Hégda le u nkwo i tuye, mangudga ma yé ini pes ni ii, ndi mut a yé môñgô a leñ we yom i i nhôla we i leñel i ngii malép. Kinje maséé w’a nôgda. Ndi i mba i mbéda we jam lipe inyu pei. W’a bana ngôñ le a leñ we nkôô inyu hôla we i jôp i môñgô, inyule malép ma nsune. Yéhôva a kal bon ba Israel ba ba bi ke haa ni nye le: “Me bi ôt bo ni minkôô ba yé le ba udul mut binam, yak ni minsiñga mi gwéha.” (Hôséa 11:4) Nyambe a ngi nôgdaga nlélém jam inyu bet ba bi ke haa ni nye, ba ba gwé ngandak mandutu ni nduña i nlôôha. A gwé ngôñ le ba yi le a ngwés bo, a nyéñ hôla bo i témb i nyeni. Inyu hala nyen Yéhôva a nla gwélél we inyu unda bo gwéha yé.
13. Ti hihéga hi hi ñunda le gwéha yés i nla hôla i bet ba bi ke haa ni Yéhôva i témb?
13 I yé nseñ i yis bôt ba nke haa ni Djob le Yéhôva a nlôôha gwés bo, ni le yak bés di ngwés bo. Mankéé Pablô, nu di nsima i yigil i ntip tagbe a bi tégbaha iloo 30 ma nwii haa ni Yéhôva. A nkal le: “Kegla yada, me bé nyodi i ndap, ñunuk mankéé nu muda wada u boma me, u pôdôs me ni minyaô. Me kahal ee kiki isii mañge. Me bi kal nye le a yé ndik wee Yéhôva nyen a ñom nye i pôdôs me. Ha nyen me bi yoñ makidik i témb yak Yéhôva.”
DI NIT I BET BA NTOMB NI GWÉHA
14. Inoñnaga ni hihéga di nléba i kaat Lukas 15:4, 5, kii ntééda mintômba a bi boñ i ngéda a bi léba ntômba wé?
14 Di nlama bé waa nit i lôk kéé i bi ke haa ni Yéhôva. Kiki man nimlaga Yésu a bi pôdôl, i nene le mandutu ba bi boma ma ngi tééñgaga bo. I nla ki ba le ba mboma mandutu ma nkoñ ’isi ma ma ntômbôs bo i pes mbuu. Di nlama hôla bo i lédés hémle yap. Mu hihéga hi ntômba u u bi nimil Yésu a bi ti, a bi kal le kiki ntééda mintômba a nléba ntômba wé, a begee wo bituu, a témbna wo i het bémba i yé. Ntééda mintômba a mpémés ngui, a tégbaha ki ngandak ngéda inyu yéñ ntômba wé. Ndi hala a nsôña bé nye i begee wo inyu témbna wo i bémba.—Añ Lukas 15:4, 5.
15. Lelaa di nla nit i bet ba nyéñ témb yak Yéhôva? (Béñge minkéñék mi matila le “ Sélél i i nlôôha nseñ.”)
15 I nla béda bés ngandak ngéda ni ngui inyu hôla i bôt ba bi ke haa ni Yéhôva. Ndi ni mahôla ma mbuu u Rôma 15:1) Kii di yé le di boñ inyu hôla bo? Nhôôlak mañ wada i nkal le: “Ngandak lôk kéé i i nsômbôl toi témb yak Yéhôva i nlama tiimba nigil Bibel.” * Jon ibale ba mbat we le u nigil ni wada wap, baa w’a ba bé maséé ni nsima u? Mañ u, u nkônde le: “Ntéé likalô nu a ntégbaha yigil yé a nlama ba liwanda jé, mut a nla yible ñem.”
Yéhôva, Bañga yé, ni bikaat bi ntôñ, di nla hôla bo i témbna maada malam ni Yéhôva. (MASÉÉ I NGII NI HANA ’ISI
16. Kii i nyis bés le biañgel bi nhôla bés i léba i bet ba nke haa ni Yéhôva?
16 Ngandak mam i ñunda le biañgel bi nhôla bés i léba i bet ba nyéñ témb yak Yéhôva. (Masoola 14:6) Kiki hihéga, Silviô nu a yé i loñ Iqwatôria (Équateur), a bé yemhe Yéhôva le a hôla nye i témb i nyeni. A bé a ngi soohege ngéda mimañ ima mi bi lo i yuuga nye. Mimañ mi, mi bi bôdôl hôla nye.
17. Bimbe bisai di nkôs i ngéda di nhôla i bet ba ntomb i pes mbuu?
17 Ibale di nhôla bôt ba ntomb i pes mbuu i témb yak Yéhôva, hala a ga ti bés ngandak maséé. Yimbe i yom Salvador, nsañal nu a mbéna hôla i bet ba bi ke haa ni Yéhôva, a nkal: “Ngéda me ntehe kiki Yéhôva a nhôla ntômba wé i nyodi i nkoñ ’isi u Satan, me hoñlak nsima me gwé i yoñ ngaba mu nson u, me yé me ee inyu ngandak maséé.”—Minson mi baôma 20:35.
18. Ibale u bi ke haa ni ntôñ Yéhôva, kii u nlama yi?
18 Ibale u bi ke haa ni ntôñ Yéhôva, yi le a ngi gwéhék we. A nsômbôl le u témb i nyeni. U nlama boñ ngim mam inyu témb i nyeni. Ndi kiki isañ man nimlaga, Yéhôva a mbem we, a ga ba ki maséé i leege we.
HIÉMBI 103 Batééda bémba—bôt ntinak kiki makébla
^ liboñ 5 Yéhôva a nsômbôl le i bet ba bi ke haa ni nye ba témb ba kahal gwélél nye. Di nla boñ ngandak mam inyu hôla bôt ba nsômbôl neebe nsébla u Yéhôva le: “Temb i meeni.” Munu i yigil ini, di ga tehe kii di nla boñ inyu hôla bo.
^ liboñ 7 Di nhéñha ngim môl.
^ liboñ 15 I ma pam le ba bat ngim bôt i i ntip témb yak Yéhôva le ba nigil i kaat ini le Lelaa di nla tééda bésbomede ikété gwéha Nyambe, bape ba bi nigil ngim bipes bi kaat ni hop Pulasi ini le Approchez-vous de Dieu. Juu li nson li likoda li ga noode ôt pék inyu yi njee a kôli tégbaha i yigil i.
^ liboñ 68 NDOÑI I BITITII: Bilôk bikéé biaa bi nhôla mankéé wada i témb yak Yéhôva. Ba ntilna nye i téléfôn, ba ñunda nye gwéha, ba emblege nye ngéda a néhne bo ñem.