1. Sonaha ma pangahap ni Jahowa anggo adong biribiri-Ni na mulak use?

BANI artikel na salpu domma iulas hita ipausih Jahowa do diri-Ni songon sahalak parmahan na madear na mansarihon biribiri-Ni. Ipindahi Ia do anggo adong na magou. Ihatahon Jahowa do bani halak Israel na dob manadingkon-Si, “Mulak ma hanima hu Bangku, ase mulak Ahu bannima.” Sonai do homa pangahap ni Jahowa ronsi sonari, halani Ia mangkatahon, “Seng mubah-ubah anggo Ahu.” (Mal. 3:6, 7) Jesus mangkatahon malas tumang do uhur ni Jahowa ampa malekat-Ni anggo adong juakjuak ni Naibata na mulak use hu Bani.​—Luk. 15:10, 32.

2. Aha ma na laho iulas hita bani artikel on?

² Sonari ulas hita ma parlajaran na ponting na boi dapot hita humbani tolu limbaga na igunahon Jesus. Hunjai gabe ibotoh hita ma sonaha hita boi mangurupi halak na mandaoh humbani Jahowa janah sifat-sifat aha do na porlu ipatuduh hita laho mangurupi sidea. Iulas hita homa mase lang soya-soya na ibahen hita ai.

3-4. Mase naboru na ipatugah bani Lukas 15:8-10 marusaha manorihi duitni na magou?

³ Maningon torus do hita marusaha mangindahi halak na sihol mulak hubani Jahowa. Humbani limbaga ni Jesus na isurat bani Injil Lukas ipatorang do pasal sada naboru na manorihi duit logam drakhma na magou. Hunjai ididah hita ma sonaha pongkutni naboru ai manorihi duitni na magou ai.​—Basa Lukas 15:8-10.

⁴ Bani panorang ni Jesus, anggo marhajabuan sada naboru, somal do ibere inangni sapuluh duit logam drakhma hu bani. Tontu maharga tumang do iahap ia duit ai. Jadi  sanggah magou duit ai, iagan ia ma domma madabuh ai hu toruh. Halani ai, ipagara ia ma palita laho manorihi duit ai, tapi lang dapotsi. Dob ai, anget-anget ma ia manapui rumahni laho manorihi use. Ujungni, dapotsi ma duit ai. Tontu malas tumang uhurni dobkonsi dapot duit ai. Jadi, idilo ia ma hasoman ampa tetanggani laho patugahkon pasal ai.

5. Mase maningon marusaha hita mangindahi sanina botou na lang aktif?

⁵ Songon na ipatuduh bani limbaga ai, anggo adong barangta na magou, tontu marusaha do hita manorihi ai. Sonai ma homa anggo adong sanina botounta na magou, marusaha do homa hita mangindahisi. Ra, domma martahun-tahun sidea lang be roh hu partumpuan. Ra do homa domma pindah sidea, janah sanina botou na ijai lang manandasi. Hassi pe sonai dong do humbani sanina botou na magou ai sihol mulak hubani Jahowa. Sihol do sidea ase boi mangidangi Jahowa use rap pakon sanina botou. Tapi lang tarhorjahon sidea ai anggo lang iurupi hita.

6. Sonaha ganup sanina botou i kuria boi dihut mangindahi halak na lang aktif?

⁶ Ise ma na boi dihut mangindahi sanina botou na lang aktif? Ganup parbarita, sintua, perintis, kaluarga, ampa hasoman boi dihut mangurupi. Ai dong do hasoman atap kaluargamu na lang aktif? Aha do na laho bahenonmu anggo jumpah ham pakon halak na lang aktif sanggah ham marbarita hun rumah hu rumah, ampa i ianan na mabuei? Patugah ma bani anggo rosuh ia irohi, ra do ham mambere nomor henponni hubani sintua i daerahni.

7. Humbani na ihatahon sada sintua na margoran si Thomas, aha ma na boi iparlajari nasiam?

⁷ Sasintongni, maningon iurupi sintua do hasoman na lang aktif ase mulak hubani Jahowa. Sonaha carani? Pardiateihon ma na ihatahon si Thomas, * sada sintua i Spanyol. Dong hira-hira 40 Saksi na iurupi ia ase mulak use hubani Jahowa. Si Thomas mangkatahon, “Parlobei, husungkun ma sanina botou ija do rumah ni hasoman na lang aktif ai. Atap husungkun ma bani parbarita ai adong do idingat sidea hasoman na domma dokah lang martumpu. Malas tumang uhur ni sidea mangurupi halani mambotoh tugas ni sidea do homa on. Dob ai, sanggah roh ahu hu rumah ni hasoman na lang aktif ai, husungkun ma pasal niombah ampa kaluargani. Hinan, ra do iboan sidea niombahni martumpu janah dong do ra humbani niombahni ai na gabe parbarita hinan. Porlu do homa sidea iurupi ase mulak use hubani Jahowa.”

8. Bani limbaga pasal anak na magou na isurat bani Lukas 15:17-24, sonaha ma pangahap ni bapani sanggah mulak use anakni?

⁸ Sifat aha do na porlu ipatuduh hita sanggah mangurupi halak mulak use hubani Jahowa? Pardiateihon ma parlajaran humbani limbaga ni Jesus pasal anak na manadingkon rumahni. (Basa Lukas 15:17-24.) Bani limbaga ai isaritahon ibotoh anak ai ma hasalahanni janah maningon mulak do ia hu rumahni. Dob ididah bapani ia, mintor lintun do bapani laho mangalo-alosi, lanjar irohop. Gabe ibotoh ia ma holong ope uhur ni bapani mangidahsi. Halani ai, ihatahon ia ma lang talup be ia goranon anak halani banggalni dousani. Tapi lang sonai pangahapni bapani. Mintor ibere ma pakeian na  sijengesan hubani anakni ai, janah ibahen ma pesta. On patuduhkon totap do holong uhurni mangidah anakni ai.

9. Sifat aha do na maningon ipatuduh hita sanggah mangurupi hasoman na lang aktif? (Tonggor ma kotak “ Cara Mangurupi Halak Ase Mulak hubani Jahowa”.)

⁹ Usih songon bapa bani limbaga ai do Jahowa. Holong tumang do uhur-Ni mangidah sanina botounta na lang aktif. Sihol do uhur-Ni ase mulak sidea. Maningon itiru hita ma homa Jahowa sanggah mangurupi sidea mulak use. Patuduh ma hasabaron, idop ni uhur, ampa holong. Mase maningon ipatuduh hita sifat-sifat ai, janah sonaha carani?

10. Mase maningon sabar hita sanggah mangurupi hasoman ase mulak hubani Jahowa?

¹⁰ Maningon sabar do hita sanggah mangurupi hasoman na lang aktif ase mulak use mangidangi Jahowa. Bahat do sidea na lang aktif hinan mangkatahon ase boi sidea mangidangi Jahowa use, maningon marulak-ulak do sintua ampa sanina botou manrohi sidea. Sada botou na margoran si Nani, na tading i Asia manurat, “Dong sada hasoman i kuria na bahat mangurupi ahu. Holong do ia mangidah ahu janah songon kakak do ia bangku. Itarsingati ia do sonaha malas ni uhurnami sanggah rap hinan. Sabar do ia manangihon saritangku janah ra homa ia mamodahi ahu. Taridah ma anggo ia sahalak hasoman na bujur, na sirsir mangurupi sadihari pe huporluhon.”

11. Mase porlu patuduhkon uhur na sapangahapan hubani halak na marborit ni uhur?

¹¹ Sanggah sasahalak marborit ni uhur, usih songon ugah na maniak do ai. Jadi sanggah dong na patuduhkon uhur na sapangahapan, usih songon tambar do ai  bani. Dong do hasoman na lang martumpu sadokah martahun-tahun halani borit uhurni ibahen sasahalak i kuria. Halani ai, porlu do ra dong hasoman na ra manangihonsi janah mangarusi pangahapni. (Jak. 1:19) Si Maria, na ongga lang aktif mangkatahon, “Porlu ma adong hasoman na ra manangihon saritangku, mangapoh, mamodahi, anjaha mangurupi ahu.”

12. Bahen ma limbaga na patuduhkon holong ni Jahowa bani halak na lang aktif.

¹² Bibel mangkatahon itarik Jahowa do hita hu Bani, marhitei holong-Ni. Sonaha cara-Ni? Bayangkon ma madabuh ham hubagas lombang. Halani bagas tumang lombang ai, lang tarnangkih ham ai. Maningon dong ma sasahalak na mambere tali hu bamu ase boi ham itarik hu atas. Ihatahon Jahowa do bani halak Israel na mandaoh hun Bani, “Hutogu-togu do sidea marhitei tali idop ni uhur.” (Hos. 11:4) Sonai do homa pangahap ni Jahowa sonari mangidah halak na lang be mangidangi-Si halani bahat sitaronon ampa holsoh ni uhurni. Usih songon madabuh hubagas lombang na bagas do sidea ai. Sihol do Jahowa ase ibotoh sidea anggo Jahowa mangkaholongi sidea janah sihol ase sidea mulak hu Bani. Anjaha igunahon Ia do nasiam laho patuduhkon holong ni uhur-Ni.

13. Saritahon ma pangalaman na patuduhkon porlu tumang do ipatuduh hita holong hubani halak na lang aktif.

¹³ Maningon iurupi hita do hasoman na lang aktif ase porsaya ihaholongi Jahowa do sidea. Janah hita pe holong do bani sidea. Si Pablo, sanina na ipatugah bani artikel na salpu, ongga do lang  aktif sadokah 30 tahun. Ia mangkatahon, “Bani sogod ni ari, sanggah laho hudarat ahu, roh ma sada botou na matua, na bujur anjaha basar mamparsahapkon ahu. Gabe tangis ma ahu songon dakdanak. Huhatahon ma songon Jahowa do na marsuruh ia manjumpahi ahu. Jadi bani ari ai, huputuskon ma maningon mulak do ahu bani Jahowa.”

14. Songon na ihatahon bani Lukas 15:4, 5, aha ma na ibahen parmahan ai dobkonsi jumpahsi biribirini na magou ai?

¹⁴ Songon anak na magou bani limbaga ni Jesus, pusok do homa uhur ni sanina botounta na lang aktif ai. Halani ai, porlu do torus iurupi anjaha iapoh hita sidea. Ra, halani domma dokah sidea manadingkon Jahowa, lang be orot parhasomananni pakon-Si. Jadi maningon iurupi hita ma ase toguh use haporsayaonni bani Jahowa. Anggo idingat hita use limbaga pasal biribiri na magou, ihatahon do dobkonsi jumpah parmahan ai biribirini, mintor itampeihon ma hu atas abarani janah iboan mulak. Hassi pe domma loja ia mangindahi biribirini nongkan ai, tapi ibahen ia do sonai halani mambotoh domma galek biribirini ai janah lang margogoh be laho mardalan.​—Basa Lukas 15:4, 5.

15. Sonaha hita boi mangurupi halak na galek na sihol mulak hubani Jahowa? (Tonggor ma kotak “ Publikasi na Boi Mangurupi”.)

¹⁵ Ra do lang urah iahap hasoman na lang aktif ai mangidangi Jahowa use. Halani ai, maningon ipasirsir hita ma gogoh ampa panorangta laho mangurupi sidea. Marhitei tonduy na pansing, Bibel, ampa publikasi hun organisasi, boi do iurupi hita sidea ase orot use parhasomananni pakon Jahowa. (Rom 15:1) Sonaha  carani? Sahalak sintua na marpangalaman mangkatahon, “Bahatan do hasoman na lang aktif ai porlu marlajar Bibel ulakkon hassi pe domma mulak sidea hubani Jahowa.” * Jadi, anggo ipindo sintua ham mangurupi hasoman ai marlajar Bibel, tontu malas uhurmu mangkorjahon ai. Nini sintua ai use, “Parbarita na mangurupi hasoman na lang aktif ai, maningon boi do homa gabe hasoman na bujur ase porsaya ia hu bani.”

16. Hunja ibotoh hita iurupi malekat do hita mangindahi hasoman na lang aktif?

¹⁶ Bahat do pangalaman na patuduhkon iurupi malekat do hita laho mangindahi hasoman na lang aktif na sihol mulak bani Jahowa. (Pangk. 14:6) Umpamani, si Silvio, sada sanina na tading i Ekuador, martonggo bani Jahowa mangindo ase isuruh sasahalak mangurupisi mulak hu Bani. Sanggah martonggo ope ia, dong na mangkartuki labahni. Hape domma roh dua sintua hu rumahni. Sanggah ai malas tumang do uhur ni sintua ai mangurupisi mulak hubani Jahowa.

17. Sonaha pangahapta halani boi mangurupi halak na galek?

¹⁷ Malas tumang uhurta halani boi mangurupi halak na galek mulak use hubani Jahowa. Pardiateihon ma pangalamanni si Salvador, sahalak perintis na marusaha mangindahi hasoman na lang aktif. Ia mangkatahon, “Sipata anggo hudingat use hasoman na dob mulak ai, gabe tariluh do ahu halani malas ni uhurhu. Martarima kasih tumang do ahu bani Jahowa halani boi rap marhorja pakon-Si laho mangurupi biribiri-Ni na magou ase mulak use hu kuria.”​—Lah. 20:35.

18. Anggo lang aktif ham, aha do na porlu idingat ham?

¹⁸ Anggo ham parbarita na lang aktif, pos ma uhurmu totap ope holong uhur ni Jahowa bamu. Sihol do Ia ase mulak ham. Jadi, marusaha ma ham ase boi mulak hu Bani. Usih songon bapa bani limbaga ni Jesus ai do Jahowa. Sai tarpaima-ima do Ia bani parmulakmu ai. Janah malas tumang do uhur-Ni anggo ra ham mulak.