1. Yéhôva a wô’ô aya éyoñe mbo ésaé wé wua a beta bulane be nye?

BI NGA yen ayé’é ya mvuse na Yéhôva a ne ane mbamba mba’ale mintômba, a na a nyane mone ntômba wé ase. A ke fe a jeñe mi mise mi dimiya. Yéhôva a nga jô bone b’Israël be nga lume nye mvuse na: “Bula’ane be ma, a ma ye bulane be mia.” Bia yeme na a ngenan a wô’ôtan avale da den, amu émien a nga jô na: “Me ne te [tyendé].” (Mal. 3:6, 7) Yésus a nga jô na Yéhôva ba beéngele be ne wu a mevak éyoñe ba yen ane mbo ésaé Zambe wua wua a beta bulane be nye.​—Luc 15:10, 32.

2. Jé bia zu yen ayé’é di?

² Bi tame zu la’ase bive’ane bilale biziñe Yésus a nga belane bie, a yen aval avé bi ne volô ba be biliya ate’e nsisim. Bia zu yene mefulu méziñe me ne volô bia na bi yeme su’u be. Bia zu fe yen abim avak bi ne bi éyoñ bia volô bôte na be bulane be Yéhôva.

3-4. Amu jé minga ya kalate Luc 15:8-10 a kôme nyoñ éyoñe ya jeñe nsañe drachme wé?

³ Bia yiane ve ngul ése na bi jeñe ba ba kômbô bulane be Yéhôva. E kalate Luc, Yésus a kobô ajô minga a jeñe nsañe moné be mbe be loene melu mvuse na drachme, nsañe moné ôte ô mbe tañ anen. Ve jame da dañe mfi nkañete ôte, e ne nju’u minga ate a nyoñ asu na a yene nsañe moné wé.​—Lañe’e Luc 15:8-10.

⁴ Yésus a kate bia avale minga ate a wô’ôtan éyoñ a yeneya moné wé. Melu me Yésus, éyoñ minga a mbe a kele’e aluk, e mbe kui’ na nyia a dasé nye mbome minsañe mi drachme awôm. Éko éziñe nsañe minga nyi a jeñ ô ne wua ya mbome minsañe nyia a nga ve nye éyoñ a kele’ aluk.  Minga a yeme na nsañ ôte wo te ku tyia. Nde a bo’é lambe na a jeñe wô, ve teke ndoñ. Éko éziñe lambe a nji tu’a faé éfufup amu kalasini a nga zu man, drachme ki a ne ve mon ôyôme nsañ. Ane minga a tyi’i na a jibi mane vose nda ése. E viane tem jôm é nga faé mbuan été, a yeneya drachme wé! Minga a suu édudu nyi! A loene ki bemvôé bé avôl avôle na a kate be mbamba foé.

5. Amu jé é ne ôbe ayaé na bi jeñe ba be kandaneya tabe bisulan?

⁵ Éve’ane Yésus éte ja liti na abui ésaé ja sili éyoñe jôm ja te jañe bia. Aval ete fe asu ba be kandaneya tabe bisulan ayap. Bia yiane ve abui ngul asu na bi jeñe be. Bevo’o ya été be yianeya bo abui mimbu teke sulan a bia Aba Éjôé. Éko éziñe bobejañe ya vôme be ga ke tabe be nji yeme yeme be. Ve jam bia yiane yem é ne na, bobejañ béziñe be telé été éte be bili nya nkômbane ya bulane be Yéhôva. Ba kômbô zu beta kañe nya Zambee a bia, ve jam ete da kate be. Nde ba yi jôme jia ve na bi volô be.

6. Aval avé bia bese bi ne ke bia jeñe ba be te’eya nsisim?

⁶ Za a yiane jeñe ba be voéya nsisim? Bia bese. Bemvendé, bekpwa’a mefan, bibu’a ya menda me bôte map, a bekañete mbamba foé bese bevok be ne volô na bi yene be. Ye nyo mvôé nge ke ébu’a ya nda bôte jôé éziñ é voéya nsisim? Ye ô tôbaneya avale môt ete nkañete? Ye a nga kate wo vôm a too nge ve wo nombo nkole jé? Kate’e nye na nge a kañese, ô ne ve bemvendé nombo nkole jé, nge ke lebe be vôm a too.

7. Jé jame Thomas a jô da ye’ele bia?

⁷ Mam mevé bemvendé be ne bo mfa’a ya jeñe ba ba kômbô bulane be Yéhôva? Thomas a bili jame ya jô mfa’a ôte. * A ne mvendé Espagne, a a volôya bôt a lôte 40 na be beta bulane be Yéhôva. A jô na: “Jam ôsu, ma sili bobejañe ya akônda nge be ne yeme vôme bobejañe be voéya nsisim be too. Me ne fe sili be nge ba yeme mojañ nge sita éziñ a kandaneya tabe bisulan ayap. Abui ya be be da volô ma tyi’ibi amu ba wô’ôtane ve ane be’e fe ba nyoñe ngab ésaé éte. Éyoñe ki ma kui be mojañ nge sita a kandaneya tabe bisulan ôbe nté, ma taté sili nye nge nda bôte jé é ne mvo’é. Abui ya be be e mbe e so’o bone baba bisulan, a bone béziñe ya été be nga kui kui na be bo bekañete. Bone bete fe ba yiane mvolan asu na be bulane be Yéhôva.”

8. Ésaa ya kalate Luc 15:17-24 a nga bo aya éyoñe mon a nga liti na a jôban abé dé?

⁸ Mefulu mevé bia yiane bi asu na bi volô ba ba kômbô bulane be Yéhôva? Tame lañ éve’ane Yésus a nga nyoñ a lat a mon a nga bame fé, a yene mam é ne ye’ele wo. (Lañe’e Luc 15:17-24) Yésus a nga jô na mongô ate a nga su’ulane fase na a yiane bulane b’ésaa. Nné ane ésaa a nga yene nye a za’a ôyap, a nga bumu a ke wubane nye, fulu ya liti nye na a nye’e nye. Mon ate a mbe a simesa’ane na a nji yiane beta loobane na mon ésaa wé, amu mone môte ya nlem a mbe a bôme’e nye. Ve ésaa a nga ko nye éngôngo nté a mbe a vô’ôlô nye a kobô’ô mam mete. A nga bo fe mam méziñ asu na a liti mone na a kañese nye nda jé a mevak. A nji belane  nye ane ôlo, ve ane édiñe mone jé. A nga tu’a yemete nye’ane wé asu mon éyoñ a nga bo nye abôk a ve nye mbamba mengômesan.

9. Mefulu mevé bia yiane bi asu na bi volô bobejañe be biliya ate’e nsisim? (Fombô’ô nka’ale ô ne nlô ajô na: “ Avale bi ne volô ba ba kômbô bulane be Yéhôva.”)

⁹ Yéhôva a ne ane ésaa ya éve’ane Yésus. A nye’e bobejañ a besita be ne ate’e nsisim, a a yi a nlem ôse na be beta bulane be nye. Bia liti na bia vu Yéhôva éyoñ bia volô be. Ve ésaé éte ja sili na bi bi mefulu ane ôjibi, mvam, a nye’an. Amu jé bia yiane liti bobejañ bete mefulu mete, a aval avé bi ne bo de?

10. Amu jé da sili na bi bo ôjibi éyoñ bia volô môte na a beta subu Yéhôva bebé?

¹⁰ Bia yiane bi fulu ôjibi amu aveñe ya nsisim da yete ki tyi’ibi. Bi wô’ô wô’ô bobejañ be nga voé nsisim be jô’ô na, nge be nga su’ulane bulane be Yéhôva, a ne amu bemvendé a bobejañe ya akônda be nga bo mbane ya ke jome be. Nancy, sita a nyiñ Asie a jô na: “Mvôé jam éziñe ya akônda é nga volô ma nya abuii. A nga nye’e ma, ô ye’e jô na monyañe mvendé wom émien. A mbe a jô’ô ma na mbamba biyoñ bia nye bi mbe bi lôtô’ô bia jembane nye. A mbe fe a kôme’e nyoñ éyoñe ya vô’ôlô ma éyoñe ma yooé nye nlem, a va’a fe ma melep éyoñ nalé a sili. A nga liti fo’o na a ne nya mvôé, avale mvôé é ne avôle ya same wo.”

11. Amu jé da sili na bi bo mvam éyoñ bia volô môt a ju’u nlem?

¹¹ Fulu mvam é ne ane biañe ja saé  nleme wo ju’ a mintaé. Bobejañe béziñe be nga voé nsisim amu, abui mimbu mvus, môt éziñe ya akônda a nga bo be jam é nga taé be nlem, a azukui den, be ngenane be wô’ô jam ete nya ôlunu. Nalé ki a nga viane bo na be yeme mebo si, teke kômbô beta bulane be Ésaa wop. Bôte béziñe be ne yene na be nga tôban ékotekot. Avale bôt ete da yiane na bi vô’ôlô be, a na bi yeme tebe été jap. (Jc. 1:19) María, sita éziñ a nga telé ésaé ôbe nté, a jô na: “Me mbe me yii môt a vô’ôlô ma, môt a fimi mili’i mam, a nyô a bi ma wo na me ke ôsu a kañe Yéhôva.”

12. Amu jé bia jô na nye’ane Yéhôva a nye’e bia ô ne ane nkol?

¹² Bible a jô na nye’ane Yéhôva a nye’e bia ô ne ane nkol, nge ke ngata. Aval avé? Bi tame jô na wo te ku ébé. Ébé éte é ne édo’o aval é ne na, ô vo’o vam été a ngule jôé womien. Da sili jôme jia ve na, môt a kalane wo nkol, a na a dutu wo ôte’ete’ ôte’etek. Yéhôva a nga kobô ajô bone b’Israël be nga lume nye mvus a jô’ô na: ‘Me nga ke ôsu a dutu be a minkole ya nye’an.’ (Os. 11:4) Nne Yéhôva a lôô ba be te’eya nsisim a ba ba tôban abui minju’u éyiñe nalé den. A yi na be kôme wô’ôtane na a nye’e be, a na a yi na be subu nye bebé. Wo fe ô ne bo na bôte bete be wô’ôtane nye’ane Yéhôva.

13. Aval avé nkañete Pablo wo liti na nye’an ô ne mfi éyoñ bia kômbô volô môte na a bulane be Yéhôva?

¹³ E ne nya mfii na bi liti ba be voéya nsisime na Yéhôva a nye’e be, a na bia fe bia nye’e be. Pablo bi nga jôô nye ayé’é  ya mvus a nga bo mimbu 30 a mvuk teke telé abo ésulan. A jô na: “A nga bo na, mame tyé méziñ, me ndeme fo’o telé abo nseñe ya nda jam ana, me nga tôbane nya mingaa ya akônda. Mbamba sita ate a nga belan étua mbamba bifia na a kobô ma. Ane me nga taté na ma yôn ane mone mongô. Me nga jô nye na Yéhôva émiene nnye a te lôme nye na a zu kobô ma. Môs ôte ñwô me nga nyoñe ntyi’ane ya bulane be Yéhôva.”

14. Kalate Luc 15:4, 5 a liti na jé mba’ale mintômba a bo éyoñ a yene ntômba wé?

¹⁴ Bobejañe be voéya nsisim ba yiane na bi su’u be éyoñe ya éyoñ ése. Fo’o ve ane mon a nga bame fé, mone môte ya nleme wop a ne bôme be angôndô, a e ne sili abui éyoñ asu na be yet. E ne fe bo na be nga bili atek amu mam be nga tôbane me mbia émo Satan nyi. Bia yiane volô be na be beta yemete mbunane wop. Éyoñ a nga kobô ajô ntômba ô nga jañ, Yésus a nga jô na mba’ale mintômba a bete mone ntômba wé, a be’e nye tôé, a bulane nye abemba. Tame simesan abim éyoñ a abime ngul bia te sili asu na a yene ntômba ôte. Ve a yene fe na ntômba ôte ôbien ô vo’o wulu akekui abemba amu ô te’eya, jôm ete nje a jibi be’e wô.​—Lañe’e Luc 15:4, 5.

15. Aval avé bi ne su’u ba ba kômbô bulane be Yéhôva? (Fombô’ô nka’ale ô ne nlô ajô na: “ Angôndô ya mbamba nsoé kalate.”)

¹⁵ E ne sili bia abui éyoñ a abui ngul asu na bi volô bobejañe na be dañe minju’u mia bo na be bili atek. Ve Yéhôva a ve bia nsisime wé, Kalate wé, a bekalate Tin ékôane ja kuli, asu na bi volô be. (Bero.  15:1) Nde bi ne bo jam ete aya? Mvendé éziñ ja jô na: “Bobejañ abui ba kômbô bulane be Yéhôva ba yiane bi ayé’é Bible.” * Nde ñhe, nge bemvendé ba jô wo na ô wulu avale môt ete ayé’é, te ben; beta mvome nnye ô bili le! Mvendé éte ja ke ôsu é jô’ô na: “Môt a wulu aval ayé’é éte a yiane bo mbamba mvôé, avale môte mojañ a ne tabe de ndi.”

16. Jé ja liti na beéngele ba volô bia?

¹⁶ Abui mam da liti na beéngele ba volô bia na bi yene bobejañe ba kômbô bulane be Yéhôva. (Nli. 14:6) Silvio, mojañe ya Équateur, a nga de’ele Yéhôva mo na a volô nye na a bulane be Nye. A mbe a ngenan a ye’elan éyoñ a nga wô’ô môt a kute’e mbé. Za fe le? Bemvendé bebaé ya akônda. Bemvendé bete be nga wô’ô mvaé ya liti nye aval avé a ne beta bulane be Yéhôva.

17. Ma’ane mevé wo ye bi nge wo volô ba be te’eya nsisim?

¹⁷ Bia ye bi abui mevak nge bia volô bobejañe be voéya nsisime na be bulane be Yéhôva. Nkpwa’a mefan éziñ a bibane na a bo de, a jô na: “Nleme wo jaé ma a mevak éyoñe ma yene bobejañe be bula’ane be Yéhôva. Ma wô’ô mvaé éyoñ ma yen avale Yéhôva a te faté mone ntômba wé mo me Satan, me ne fe mengo’o dol amu A te belane ma ane ébe mbo ésaé wé mfa’a ôte.”​—Mam. 20:35.

18. Nge ô teléya nsula’ane wongane ya vôma wua, jé ô ne tabe je ndi?

¹⁸ Éngôngol te buni na Yéhôva a nji beta nye’e wo amu wo beta ki fe tabe bisulan. A de’ele wo mo na ô beta bulane be nye. Da ye sili wo ve bone mengul asu na ô bulane be Ésoo. Fo’o ve ane ésaa ya éve’ela Yésus, Yéhôva a yange wo mo me yoo, amu a ne ôjeja’a ya zu wubane wo.