STODI AATIKL 26
“Kohn Bak tu Mi”
“Kohn bak tu mi, an Ai wahn kohn bak tu unu.”—MAL. 3:7.
SANG 102 “Tek Kayr a Dehn Wan Weh Week”
WEH WI WAHN DISKOS? *
1. How Jehoava feel wen wan a fi hihn sheep geh sayv?
LAIK weh wi mi diskos eena di laas aatikl, Jehoava kompyaa ihself tu wahn gud shepad weh tek gud kayr a ih sheep. Ahn hihn saach fi eni wan a dehn weh geh laas. Jehoava mi tel di Izrelait dehn weh mi lef ahn: “Kohn bak tu mi, an Ai wahn kohn bak tu unu.” Wi noa dat hihn stil feel di saym way bikaaz hihn seh: “Ai noh chaynj.” (Mal. 3:6, 7) Jeezas seh dat Jehoava ahn di aynjel dehn feel hapi wen eevn wan a fi Hihn servant hoo mi laas kohn bak tu Ahn.—Look 15:10, 32.
2. Weh wi wahn kansida eena dis aatikl?
2 Mek wi kansida chree a Jeezas iloschrayshan weh wahn teech wi sohn impoatant lesn bowt how fi help peepl weh schray weh fahn Jehoava. Wi wahn diskos sohn kwalitiz weh wi need fi ga fi mek wi ku help Jehoava sheep weh laas kohn bak tu ahn. Wi wahn si how hapi wi feel wen wi werk haad fi help eni sheep weh lef Jehoava fi kohn bak tu ahn.
SAACH FI DI PRESHOS KOIN WEH LAAS
3-4. Wai di uman weh menshan da Look 15:8-10 mi werk soh haad fi chrai fain wahn preshos koin weh ih laas?
3 Wi need fi werk haad fi fain dehn wan hoo waahn kohn bak tu Jehoava. Eena wahn iloschrayshan eena di buk a Look, Jeezas mi taak bowt wahn uman weh chrai haad fi fain wahn preshos koin weh ih mi laas. Di mayn paat a di iloschrayshan da how haad wahn uman mi werk fi chrai fain di preshos koin.—Reed Look 15:8-10.
4 Jeezas diskraib how wahn uman feel wen ih fain wahn preshos koin weh ih laas. Eena Jeezas day, wen wahn uman da Izrel mi geh marid, ih ma wuda giv ahn ten preshos silva koin pan ih wedn day. Maybi dis koin mi soh speshal bikaaz da mi paat a di set weh ih ma mi giv ahn. Di uman figa dat di koin mi jrap pahn di floa. Soh ih lait wahn lamp ahn luk rong bot ih noh fain it. Di lait mait noh bee brait inof fi mek ih ku si di preshos silva koin. Soh den ih sweep di hows gud. Ahn rait eena di dos weh ih sweep op ih si sohnting di shain; ih fain ih preshos silva koin. Wen ih fain it, ih feel soh hapi dat ih kaal ih frenz ahn naybaz mek ih tel dehn di gud nyooz.
5. Wai wi mait haftu werk haad fi fain peepl weh lef di kangrigayshan?
5 Jeezas iloschrayshan teech wi dat wi haftu werk haad fi fain sohnting weh wi laas. Saym way soh, wi mait haftu werk haad fi fain peepl weh lef di kangrigayshan. Ih ku bee yaaz sins dehn stap preech er goh da meetin wid wi. Maybi dehn eevn moov tu wahn ayrya wehpaat di bradaz weh liv deh noh noa dehn. Bot eevn now wi ku bee shoar dat som a dehndeh poblishaz weh noh aktiv reeli waahn kohn bak tu Jehoava. Dehn waahn serv Jehoava agen lang wid dehn bradaz ahn sistaz, bot dehn kyaahn du it widowt wi help.
6. How evribadi eena di kangrigayshan ku help saach fi poblishaz weh noh aktiv?
6 Hoo ku help saach fi poblishaz weh noh aktiv? Aala di poblishaz eena di kangrigayshan ku help fain dehn poblishaz weh noh aktiv. Eevn di eldaz, painyaaz, an enibadi hoo ga relitiv weh da poblishaz weh noh aktiv eena dehn famili. How bowt yoo? Yoo ga eni fren er famili memba weh da wahn poblisha weh noh aktiv? Weh yu shuda du if yu di du hows tu hows preechin er poblik witnisin ahn yu meet wahn poblisha weh noh aktiv? Yu ku eksplayn tu di persn dat if ih wuda laik fi mek sombadi vizit ahn, yoo wuda bee hapi fi gi di eldaz ih ajres er foan nomba.
7. Weh wi laan fahn weh wahn elda weh naym Thomas mi seh?
7 Di eldaz eena di kangrigayshan sopoas tu tek di leed eena di saach fi poblishaz weh noh aktiv. How dehn ku du dat? Wahn elda da Spain weh naym Thomas * don help oava 40 poblishaz weh neva aktiv fi kohn bak tu Jehoava. Hihn seh: “Fers, Ah aks difrent bradaz ahn sistaz if dehn noa wehpaat dehndeh poblishaz liv. Er Ah wuda aks di poblishaz if dehn memba enibadi weh noh kohn da meetin agen. Moas a di bradaz ahn sistaz eena di kangrigayshan reeli hapi fi help bikaaz dehn geh fi bee paat a di saach. Den wen Ah di vizit dehn poblishaz weh noh aktiv, Ah aks dehn bowt dehn chiljren er dehn famili. Som a dehn poblishaz weh noh aktiv yoostu bring dehn chiljren da meetin, ahn maybi fi dehn chiljren yoostu bee poblishaz tu. Wi ku help dehn fi kohn bak tu Jehoava tu.”
BRING BAK JEHOAVA SON AHN DAATA DEHN WEH LAAS
8. Eena di iloschrayshan bowt di prodigal son da Look 15:17-24, how di pa mi chreet ih son weh mi ripent?
8 Weh kwalitiz wi need fi ga fi mek wi ku help dehn wan weh waahn kohn bak tu Jehoava? Noatis som a di lesn dehn weh wi ku laan fahn Jeezas iloschrayshan bowt di prodigal son. (Reed Look 15:17-24.) Jeezas mi eksplayn dat di son mi riyalaiz dat hihn mi mek wahn mistayk, an ih mi disaid fi goh bak hoam. Di pa mi ron owt ahn hog op ih son fi mek ih noa dat ih lov ahn wahn lat. Di son mi feel bad bowt weh ih mi du, an ih mi feel laik ih neva dizerv ih pa lov er fi mek ih pa kansida ahn az ih son. Di son mi poar owt ih haat tu ih pa, ahn di pa mi ga kompashan fi di son. Den di pa mi du sohn tingz fi shoa ih son dat ih mi welkom ahn bak hoam. Ih neva mi wahn chreet ih son az wahn werka bot az ih son weh ih lov wahn lat. Fi proov dat ih mi lov ih son, di pa mi ga wahn big paati an ih mi giv ih son di bes kloaz fi put aan.
9. Weh kwalitiz wi need fi ga fi mek wi ku help dehn poblishaz weh noh aktiv fi kohn bak tu Jehoava? (Si di baks “ How fi Help Poblishaz Weh Waahn Kohn Bak tu Jehoava.”)
9 Jehoava da laik di pa eena da iloschrayshan. Hihn lov wi bradaz ahn sistaz weh noh aktiv, ahn hihn waahn dehn kohn bak tu ahn. Wi ku help dehn fi kohn bak tu Jehoava wen wi fala fi hihn egzampl. Bot fi du dis wi need fi ga payshens, kompashan, ahn lov. Wai wi need fi ga dehndeh kwalitiz, ahn how wi ku koltivayt dehn?
10. Wai wi need fi ga payshens fi help sombadi kohn bak tu Jehoava?
10 Wi need fi ga payshens bikaaz ih mait tek taim fi mek wahn persn get bak kloas wid Jehoava. Wahn lata poblishaz weh neva aktiv fi wahn wail seh dat dehn mi kohn bak kohn serv Jehoava bikaaz di eldaz an adaz eena di kangrigayshan mi kip aan di vizit dehn. Wahn sista fahn Asia weh naym Nancy seh: “Wahn kloas fren fahn eena di kangrigayshan mi help mi wahn lat. Shee lov mi jos laik if ih da-mi mai oalda sista. Ih mi rimain mi a di gud taimz weh wi yoostu ga tugeda. Ih wuda lisn tu mi wid payshens wail Ah ekspres how Ah feel, an ih neva hoal bak fahn gi mi advais. Shee mi proov fi bee wahn reel fren weh aalwayz redi fi help mi.”
11. Wai wi need fi ga kompashan tuwaadz dehn wan weh feelinz geh hert?
11 Wen sombadi feel sad bikaaz dehn feelinz geh hert, ih ku hert dehn laik if dehn geh kot. Wen yu shoa dehn kompashan, da laik yu di gi dehn medisn fi mek dehn feel beta. Maybi sombadi eena di kangrigayshan mi hert dehn feelinz ahn dehn mait stil sad ahn beks. Sayka dis dehn noh waahn kohn bak tu Jehoava. Som a dehn mait tink dat dehn neva geh fyaa chreetment. Dehn mait need sombadi fi lisn tu dehn an andastan how dehn feel. (Jay. 1:19) María, wahn sista weh neva aktiv fi wahn wail, seh: “Ah mi need sombadi fi lisn tu mi, fi krai wid mi, ahn fi gaid mi eena di rait dairekshan.”
12. How Jehoava lov da laik wahn roap?
12 Di Baibl seh dat Jehoava lov fi ih peepl da laik wahn roap. How Jehoava lov da laik wahn roap? Kansida dis iloschrayshan: Imajin dat yu jrap da see ahn di wayv dehn hai ahn di waata koal. Yu staat tu jrongdid. Den sombadi weh deh eena wahn boat chroa wahn laif jakit fi yu. Yu wuda tank da persn bikaaz dehn help yu owt lee bit. Bot now yu need moa help fi servaiv. Yu need fi get owta di koal waata. Soh yu need fi mek di peepl eena di boat chroa wahn roap fi yu ahn haal yu kloas tu di boat fi mek yu ku get een. Dis da weh Jehoava mi seh bowt di Izrelait dehn weh mi ton weh fan ahn: “Ah yooz lov ahn kainis laik wahn roap fi gaid dehn tu mi.” (Hos. 11:4) Gaad feel di saym way bowt peepl weh stap serv ahn, an weh di jrongdid eena dehn prablemz ahn woriz tudeh day. Hihn waahn dehn noa dat ih lov dehn, an ih waahn dehn kohn bak tu ahn. Ahn Jehoava ku yooz yoo fi shoa dehn dat hihn reeli lov dehn.
13. How Pablo ekspeeryens shoa wi dat wi lov ku help dehn wan weh noh aktiv fi kohn bak tu Jehoava?
13 Ih impoatant fi mek wi kip aan di tel eni poblisha weh noh aktiv dat Jehoava lov dehn ahn dat wee lov dehn tu. Pablo, weh wi mi menshan eena di laas aatikl, mi stap preech ahn neva gaahn da meetin fi oava 30 yaaz. Hihn seh: “Wahn maanin wen Ah mi-di lef mi hows, wahn sweet lee oalda sista meet mi ahn taak tu mi eena wahn lovin way. Ah staat tu baal laik wahn lee pikni. Ah tel ahn dat Ah feel laik da Jehoava mi sen ahn fi taak tu mi. Dat da wen Ai mi disaid fi kohn bak tu Jehoava.”
SHOA LOV AHN HELP DEHN WAN WEH WEEK
14. Akaadn tu di iloschrayshan da Look 15:4, 5, weh di shepad mi du wen ih mi fain di sheep weh ih laas?
14 Afta wi fain dehn poblishaz weh noh aktiv, wi need fi kantinyu inkorij dehn. Jos laik di prodigal son eena Jeezas iloschrayshan, dehn moa dan laikli di sofa imoashanal payn. Ahn bikaaz dehn mi deh eena Saytan werl, dehn praabli noh kloas tu Jehoava agen. Wi need fi help dehn fi schrentn dehn fayt eena Jehoava. Eena Jeezas iloschrayshan bowt di sheep weh laas, hihn mi diskraib how di shepad mi put di sheep pan ih shoalda ahn kehr ahn bak tu di ada sheep. Di shepad mi spen wahn lata taim an enerji di luk fi di sheep weh laas. Bot hihn noa dat di sheep need moa help. Ih noh schrang inof fi waak aal di way bak tu di ada sheep. Soh hihn bak ahn pan ih shoalda.—Reed Look 15:4, 5.
15. How wi ku help dehn wan weh waahn kohn bak tu Jehoava? (Si di baks “ Wahn Impoatant Tool.”)
15 Wi mait need fi spen wahn lata taim an enerji di help poblishaz weh noh aktiv fi get oava eni prablem weh mek it haad fi dehn serv Jehoava agen. Bot wid Jehoava hoali spirit, ih Werd di Baibl, ahn di poblikayshanz weh wi geh chroo di kangrigayshan, wi ku help dehn fi schrentn dehn rilayshanship wid Jehoava. (Roam. 15:1) How wi ku du dis? Wahn elda weh ga lata ekspeeryens seh: “Moas a di poblishaz weh noh aktiv need fi ga wahn Baibl stodi if dehn reeli waahn kohn bak tu Jehoava.” * Soh if di elda dehn aks yu fi stodi wid wahn poblisha weh noh aktiv, bee hapi an aksep di asainment if yu kud. Di elda aalso seh: “Di brada er sista weh stodi wid di poblisha weh noh aktiv need fi bee wahn gud fren, sombadi weh dehn ku chros.”
JAI DA HEVN AHN JAI PAHN DI ERT
16. How wi noa dat di aynjel dehn di help wi?
16 Dehn ga lata ekspeeryens weh shoa wi dat di aynjelz di help wi fi fain dehn poblishaz weh noh aktiv weh waahn kohn bak tu Jehoava. (Rev. 14:6) Fi egzampl, Silvio, fahn Ecuador, mi bayg Jehoava fi sombadi fi help ahn kohn bak tu di kangrigayshan. Ahn wail ih stil mi-di pray, too bradaz reech da ih hows. Joorin da vizit, dehn mi hapi fi giv ahn di help weh ih mi need fi kohn bak tu Jehoava.
17. How wi wahn feel if wi help dehn poblishaz weh noh aktiv?
17 Wi wahn geh wahn lata jai wen wi help dehn poblishaz weh noh aktiv fi kohn bak tu Jehoava. Salvador da wahn painyaa weh chrai haad fi help poblishaz weh noh aktiv. Noatis weh hihn seh: “Sohntaim wen Ah tink bowt dehn poblishaz weh noh aktiv weh kohn bak tu Jehoava, Ah geh soh hapi Ah waahn krai anaal. Ah feel soh hapi dat Ah kuda mi werk lang wid Jehoava fi mek ih preshos servant get owta Saytan werl ahn kohn bak tu di kangrigayshan.”—Aks 20:35.
18. If yoo da wahn poblisha weh noh aktiv, weh yu ku bee shoar a?
18 If yoo da wahn poblisha weh mi stap preech ahn stap goh da meetin, yu ku bee shoar dat Jehoava stil lov yu. Hihn waahn yu kohn bak tu ahn. Yu wahn haftu werk haad fi kohn bak tu Jehoava. Bot jos laik di pa eena Jeezas iloschrayshan, Jehoava di wayt fi mek yu kohn bak, ahn hihn wahn welkom yu wid lata lov.
SANG 103 Shepadz—Wahn Gif Fahn Jehoava
^ párr. 5 Jehoava waahn poblishaz weh noh aktiv fi kohn bak tu ahn. Jehoava invait dehn: “Kohn bak tu mi.” Wee ku du wahn lat fi inkorij enibadi weh waahn kohn bak tu Jehoava fi aksep da invitayshan. Eena dis aatikl, wi wahn kansida how wi ku help dehn du dat.
^ párr. 7 Som a di naym dehn chaynj.
^ párr. 15 Sohn poblisha weh noh aktiv ku geh help if dehn stodi paats a di buk How fi Stay Eena di Lov a Gaad, an adaz geh help wen dehn stodi sohn chapta fahn di buk Draw Close to Jehovah. Di Kangrigayshan Servis Komiti wahn disaid hoo ku kandok wahn stodi wid wahn poblisha weh noh aktiv.
^ párr. 68 DI PICHA DEHN: Chree difrent bradaz di help wahn poblisha weh noh aktiv fi kohn bak tu Jehoava. Dehn du dat wen dehn kip di vizit ahn, wen dehn rimain ahn dat dehn lov ahn, an wen dehn lisn tu ahn wid andastandin.
