1. Ka lasandirubei Heowá dan le lagiribudun aban lubúein le féridihalibei?

KEI warihini lidan arütíkulu le ásügürübei, rúguati Heowá lungua kei aban hóuniri mudún le buitu, le óunigirubaliña lilügüniña mudún lau ínsiñeni ani áluahaloun to eferidiruboun. Luagu aban dan, ariñagati houn ísüraelina ha meha adisedubaña luéi: “Giribu humá nun, ábame nagiribudun hun!” Subudi wamuti ligiaméme lan lasandirubei uguñe weyu, lugundun ariñagati: “Masansiragungidina”. (Mal. 3:6, 7). Ani ariñagati Hesusu dandu lan Heowá kei ánheligu sanditiña lan ugundani dan le lasakürihan aban lubúein le féridihalibei (Luk. 15:10, 32).

2. Kaba wariha lidan arütíkulu le?

² Lidan arütíkulu le, warihuba ǘrüwa sügǘ le labahüdahan Hesusu luagu le lunbei wadügüni lun wíderaguniña ha adisedubaña luéi Heowá. Wayanuhaba luagu kaba burí lan igaburi warufuda lun wíderaguniña agiribuda lun Heowá luma ka lan uagu buidu lubéi lun wáfaagun lun wíderaguniña ha débilibaña.

3, 4. Ka uagu táluahei würi to uáguboun labahüdahan Hesusu lidan Lúkasi 15:8-10 lau ubebeni seinsu le teferidirubei?

³ Mégeiwati saragu áfaaguni lun hadarirún íbirigu ha busenbaña hagiribudun lun Heowá. Lidan ewanhéliu lani Lúkasi aliihatiwa luagu aban abahüdaguni le ídabei layanuhan tuagu aban würi to alubahaboun somu katei gebegiti le eferidirubei tuéi: aban seinsu le gíribei düraküma. Le súdinibei lidan abahüdaguni le, áfaaguni le tadügübei würi to lun tadariruni (aliiha huméi Lúkasi 15:8-10).

⁴ Genegeti lidan lan meha lidaani Hesusu, dan meha le hamarieidun würiña huríu añahein meha úguchurugu íchugutiña 10 murusun seinsu le gíribei düraküma houn. Másiñati aba lan teferidiruni würi to uáguboun layanuhan Hesusu aba lídangiñe seinsu lauti pülata ligía. Samina wamá aba lan léiguadun seinsu tuéi muárugun aba tébedun lanpu lun táluahani, gama lumoun madarirun tumuti. Másiñati lougua lan ladurangun lanpu lun tadariruni. Ábati tabuidahanu muna buidu. Darí lun tarihin somu katei ámiriha  laganagua kaliki: daridügü tan tiseinsun le gebegibei! Afuranguagüdati Hesusu aba lan tasandirun würi tuguya ñuruguaü luma ugundani darí lun tagúarun houn tumadagu luma houn tubesinanigu lun tabahüdahani lubuidun uganu le.

5. Ka uagu mégeiwa lubéi áfaaguni lun háluahoun íbirigu ha mapurichihaañabaña madamuridagun hagía?

⁵ Arufudahati abahüdaguni le labahüdagunbei Hesusu mégeiwa lan áfaaguni lun ladarirún somu katei le eferidiruti. Ligiaméme asuseredubei lidan háluahoun íbirigu ha mapurichihaañabaña madamuridagun hagía. Másiñati barühaña lan saragu irumu mídinga lidan adamuridaguni. Háfuga hawinwanduña lidan aban fulasu le ñein lubéi ibidiñe hamá houn íbirigu. Ani chóuruti busén hamá hádangiñe hagiribudun lun Heowá guentó. Busentiña lunya heseriwidun lun Heowá úara hama hábirigu, gama lumoun, mégeitiña ídemuei.

6. Ida luba hídehan sun lílana damuriguaü lidan háluahoun íbirigu ha mapurichihaañabaña madamuridagun hagía?

⁶ Ka lúnbaña hídehan áluahaña íbirigu ha mapurichihañaba madamuridagun hagía? Sun lílana damuriguaü, dandu haduheñu, kei wéiyaaña lidan afiñeni, prekursorugu hama apurichihatiña. Anihein san aban wamada o waduhe le mapurichihaali madamuridagun ligía? Darihadiwa san aban íbiri le mapurichihaali madamuridagun ligía lidan wapurichihan lidan guririguaü o tidan burí muna? Anhein busén lubéi íbiri ligía lun labisidahóuniwa, ariñaga wamá lun wásügüragüdübei lan ariñahani lau sun wagundan houn wéiyaaña lidan afiñeni ha lídanbaña damuriguaü le ñein wabéi.

7. Ka hafurendeirubei lídangiñe le lariñagubei aban wéiyaali lidan afiñeni le gíribei Thomas?

⁷ Lidan hakesin wéiyaaña lidan afiñeni, ka lunbei hadügüni lun hadariruniña ha busenbaña hagiribudun lun Heowá? Ariha waméi le lariñagubei aban wéiyaali lidan afiñeni Esüpáñana gíriti Thomas *. Íderaguaali hóugiñe 40 Gefentiña agiribuda lun Heowá. Ariñagati: “Furumiñe, álügüdagua numutiña saragu íbirigu anhein subudi lubéi houn halía lan heredera íbirigu ha mapurichihaañabaña madamuridagun hagía. O nálügüdüniña apurichihatiña anhein subudi habéi somu íbiri le madamuridagunhali. Gúndaatiña hiibe-agei íbirigu lau hídeha lidan haluahóun íbirigu ha. Dan le nidin arihaña íbirigu ha mapurichihaaña madamuridagun hagía, álügüdahatina hawagu hasaanigu o hawagu haduheñu. Añahein hádangiñe íbirigu ha barǘ hamutiña meha hasaanigu lidoun adamuridaguni ani háfuga furí hamá meha apurichiha. Gayaraati giñe hiderawagúniwa hasaanigu agiribuda lun Heowá”.

8. Kei waliihani lidan Lúkasi 15:17-24, ida liña lóuseruni úguchili lisaani le asakürihaalibei?

⁸ Ka igaburi lunbei warufuduni anhein busén wabéi wíderaguniña ha busenbaña hagiribudun lun Heowá? Ariha waméi kaba lan wafurendeira lídangiñe abahüdaguni luáguti isaani le acharagadubei (aliiha huméi Lúkasi 15:17-24). Abahüdahati Hesusu aba lan lasaminarun isaani le ani aba lagiribudun hábiñoun. Aba léibaagun úguchili lubaroun ani aba lóuburuni lau ínsiñeni lun larufuduni lun hínsiñememegili lan lun. Le lueirin busiganu luagu isaani aba lasaminarun madüna lan lun lanügüni lúguchi keisi lisaani. Dan le larihinbalin úguchili lisaani adararoun lanigi lun ani subudiléi asakürihaali lan aba lagudemedagun lun. Aba ladügün úguchili aransehani lun ladügǘn aban fedu ani amuriaha ligía lun tadaürǘn tubuidun-agei daüguaü luagu. Lau igaburi le larufudei lun, meresibirun lani kei aban nadagimeinti, lubaragiñe lira, aba leresibiruni kei aban hádangiñe lisaanigu ha hínsiñebaña lun.

9. Ka igaburi lunbei warufuduni lun wíderaguniña íbirigu ha mapurichihaañabaña madamuridagun hagía lun hagiribudun lun Heowá? (Ariha huméi rekuáduru “ Ida luba wíderaguniña ha busenbaña hagiribudun lun Heowá”).

⁹ Ítara liña Heowá kei úguchili le lídanbei abahüdaguni. Hínsiñetiña wábirigu ha mapurichihaañabaña madamuridagun hagía lun ani  busenti lun hagiribudun lun. Ánhawa áyeihei, gayaraabei wíderaguniña lun hagiribudun. Lun lira, lunti gaguraasun wamá, gudemehabu ani hínsiñehabu wagíame. Ka uagu megei wabalin burí igaburi le, ani ida luba warufuduni?

10. Ka uagu mégeiwa lubéi gurasu lun híderawagun íbirigu ha mapurichihaañabaña madamuridagun hagía?

¹⁰ Mégeibadiwa gurasu ladüga lanügüba saragu dan lunya gamadagua lan aban gürigia luma Heowá. Saragu íbirigu ha meha mapurichihaañabaña madamuridagun hagía, ariha hamuti abisidaha hamaniña wéiyaaña lidan afiñeni hama lílana damuriguaü saragu wéiyaasu lubaragiñe hagiribudun lun Heowá. Abürühatu aban íbiri gíritu Nancy, lídangiñetu oubaü le ñéingiñe lubéi laboucha weyu Asia: “Íderagua tumutina saragu aban tubuidun umadaü lídangiñetu damuriguaü. Hínsiñetina meha tun kamá hamuga tamulelua nuguya. Adügatu lun naritaguni lubuidun dan le wásügürübei úara. Dan meha le nayanuhan tuma luagu le nasandirubei, aganba tumutina lau gurasu ani masaminarun tumuti bián wéiyaasu lubá tíchugun adundehani nun. Aban meha umadaü buitu ani súnwandan ñein tan nurugabu lun tíderagunina”.

11. Ka uagu megei wabéi warufudun gudemehabu lun wíderagun somu gürigia le wuribabei lasandiragun lungua?

¹¹ Ítara liña gudemehabu kei aban árani le gayaraabei lareidaguagüdüni luriban wasandiragun woungua. Saragu íbirigu ha mapurichihaañabaña madamuridagun hagía aba hadisedun luéi Heowá ladüga lachararun somu lílana damuriguaü houn ani areidatiña igarigu luagu saragu irumu. Ligía mabusenrun habéi hagiribudun lun Heowá. Añahein amu háfuga samina hamá óuserua hamá lau marichaü. Másiñati busén hamá lun haganbúniwa luma lun gunfurandawa hamá (Sant. 1:19). Ariñagatu aban íbiri gíritu María, to meha mapurichihaboun madamuridagun tuguya luagu saragu dan: “Mégeitina meha somu gürigia  lun nadaarunun nanigi luma lun lichugún dǘgüdaguaü luma ídemuei nun”.

12. Ida liña ítara liña lan línsiñehabu Heowá kei aban gúrudu?

¹² Ariñagatu Bíbülia ítara liña lan línsiñehabu Heowá hawagu lubúeingu kei aban gúrudu. Ida? Ru wamá aban hénpulu. Samina humá hañaradaguña lan lidan lérouga ani aba lachüürün aban gürigia aban salufu hun tídangiñe aban ugunei. Chóuruti heteingirubei lan gürigia ligía ladüga tíderagubadün lan salufu lun mabuluchun humá. Gama lumoun úati buídurügü lan lau ñein tan aban salufu huma. Kei le dilí lubéi duna; lun hesefurun, mégeibadün lun lachüürǘn gúrudu hun lun hádinun tidoun ugunei. Ligíati, ariñaga lumuti Heowá dimurei le hawagu ísüraelina ha adisedubaña luéi: “Achawaha numutiña nuouguoun lau ínsiñehabuni” (Ose. 11:4). Anihán le labusenrunbei Heowá ladügün hau íbirigu ha mapurichihaañabaña madamuridagun hagía ha sandiguabaña houngua kamá hamuga hañaradaguña lan lau bandi turobuli luma idiheri. Busenti líderaguniña lun hagiribudun lun luma lun hasubudiruni hínsiñe hamá lun. Ani gayaraati layusuruniwa lun larufuduni línsiñehabu houn.

13. Ida liña larufuduni le lásügürübei Pablo gayara lan líderaguniña wínsiñehabu íbirigu ha mapurichihaañabaña madamuridagun hagía agiribuda lun Heowá?

¹³ Súdiniti lun wachoururagüdüni houn íbirigu ha mapurichihaañabaña madamuridagun hagía hínsiñe hamá dandu lun Heowá kei woun. Rédeiti meha Pablo, le uágubei wayanuha lidan arütíkulu le ásügürübei mapurichihanga madamuridagun ligía lóugiñe 30 irumu. Ariñagati: “Aban binaafin, dan le náfuridun núbiñegiñe, aba tabusuragunina aban íbiri derebuguharu ani aba tayanuha numa lau gudemehabu luma lau ínsiñehabuni. Aba nagumeserun ayahuaha kei aban irahü. Aba nariñagun tun genegeti lan  Heowá lan óunahabarun ayanuha numa. Ligía nanúadirubei nagiribudun lun Heowá”.

14. Según Lúkasi 15:4, 5, ka ladügübei aban hóuniri mudún dan le ladarirun aban mudún to eferidiruboun?

¹⁴ Dan le hagiribudun íbirigu ha mapurichihaañabaña madamuridagun hagía, mégeiwati lun wasigirun íchiga ídemuei luma dǘgüdaguaü houn. Másiñati wéiriti lan gáriti le hasandirubei tidan hanigi kei isaani le acharagadubei le uágubei labahüdagua Hesusu. Ani kei lídangiñe lan ubóu le lábugiñebei lubafu Satanási hayabin, chóuruti débili lan hamadagua luma Heowá. Ligíati, mosu lubéi wíderaguniña ederebudagüdei hafiñen luagu Heowá. Lidan abahüdaguni tuáguti mudún to eferidiruboun, ariñagati Hesusu barǘ lanu hóuniri mudún mudún légewagu hamoun ha híbiri mudún. Barǘ hali hóuniri mudún saragu dan áfaagua lun ladarirunu mudún. Ani subudi lumuti mosu lan líderagunu agiribuda ladüga méreboun lan lun tadügüni tábugua (aliiha huméi Lúkasi 15:4, 5).

15. Ida luba wíderaguniña ha débilibaña agiribuda lun Heowá? (Ariha huméi rekuáduru “ Aban agumeiraguagüdüni to wéiriti tebegi”).

¹⁵ Másiñati mégeibadiwa lan saragu dan luma erei lun wíderaguniña íbirigu ha mapurichihaañabaña madamuridagun hagía lunya hederebudagüdüni hamadagua luma Heowá (Rom. 15:1). Lun lira, anihein lani Heowá sífiri sandu wama, Lererun tuma burí agumeiraguagüdüni to tíchuguboun lóundarun woun. Ida luba wíderaguniña? Ariñagati aban wéiyaali lidan afiñeni le subudihali saragu: “Dan le hagiribudun íbirigu ha mapurichihaañabaña madamuridagun hagía, saragu hádangiñe méigeitiña lunya híderawagun aturiahoun Bíbülia”. * Ligíati, anhein amuriaha wéiyaaña lidan afiñeni wama lun wíderaguniña  íbirigu ha, ánhara wamá lau sun wagundan. Ariñagati ligiaméme wéiyaali lidan afiñeni: “Mégeibaña íbirigu ha mapurichihaañabaña madamuridagun hagía lun ábanbei lan umadaü buiti íbiri le lunbei líderaguniña ani afiñe hagíame luagu íbiri ligía”.

16. Ida liña wasubudiruni íderagua hamutiwa lan ánheligu?

¹⁶ Anihein burí saragu sügǘ le arufudubalin woun íderagua hamaniwa ánheligu adariraña íbirigu ha mapurichihaañabaña madamuridagun hagía ani busentiña íbirigu hagía lun hagiribudun lun Heowá (Aruf. 14:6). Kei hénpulu, amuriahati aban íbiri gíriti Silvio, lídangiñeti ageiraü Ekuadóru luma Heowá lun líderaguni agiribuda lidoun damuriguaü. Lidan anihán lan afurieida, aba hadaünha bián wéiyaaña lidan afiñeni luagu lubenari. Lidan bisida ligía, ru hamuti íbirigu ídemuei le lemegeirunbei lun lau sun hagundan.

17. Ka afayeiruahaü wibihubei dan le wíderaguniña íbirigu ha débilibei hamadagua luma Heowá?

¹⁷ Barüti saragu ugundani woun wíderaguniña ha débilibei hamadagua luma Heowá agiribuda lun. Ariha waméi le lariñagunbei Salvador, aban prekursoru le áfaagubei saragu lun líderaguniña íbirigu ha mapurichihaañabaña madamuridagun hagía: “Anihein dan siñati nárügüdagun nungua lun mayahun nan ladüga ugundani. Ma nugundan lau nasaminarun sefu laali lan Heowá lídangiñe ubóu le lábugiñebei lubafu Satanási lubúein le eferidirubei, ani gúndaatina lau nídehan luma” (Adü. 20:35).

18. Anhein mapurichihaadün lubéi madamuridaagun huguya, ka lunbei hachoururuni?

¹⁸ Anhein móundaraguhaadun lubéi hama lubúeingu Heowá, chouru huméi hínsiñegidün lan lun ani busenti lun hagiribudun lun. Inarüni mosu lan hadügün fiu katei. Lau sun lira, haritagua huméi úguchili le uágubei labahüdaha Hesusu. Lagurabahaña Heowá lun hagiribudun hadoun lumutuniña, ani leresibirubaadün lau larüna daragu.