1. Cosa sinti si Jehova si bira el uno del de suyu siervo?

COMO cosa kita ya discuti del ya pasa articulo, ya compara si Jehova con el de suyu mismo cuerpo na un buen pastor quien ta cuida gayot con el de suyu cada carnero. Y ta busca le con aquellos quien ya perde. Si Jehova ya habla con el maga Israelita quien ya deja con ele: “Bira ustedes conmigo y hay bira yo con ustedes.” Ansina siempre le ta sinti ahora cay ya habla le: “Gendeh yo ta cambia.” (Mal. 3:6, 7) Ya habla si Jesus que bien alegre si Jehova y el maga angel si bira con Ele maskin uno del De Suyu maga siervo quien ya perde.​—Luc. 15:10, 32.

2. Cosa kita considera na este articulo?

² Considera kita con el tres ilustracion de Jesus que ta enseña kanaton si paquemodo ayuda con aquellos quien ya separta con Jehova. Hay discuti kita con el cuanto especifico calidad que necesita kita para puede ayuda kanila para bira con ele. Aprende tambien kita si cosa el resulta si hace kita esfuerzo para ayuda con el maga maluya.

3-4. Porque el mujer na Lucas 15:8-10 ya busca gayot con el dracma que ya perde?

³ Necesita kita hace esfuerzo para busca con aquellos quien quierre bira con Jehova. Na ilustracion de Jesus na Evangelio de Lucas, ya menciona le acerca con el un mujer quien ya busca con el un bien importante cosa​—un sencillo de dracma. Este ilustracion ta hace claro si cosa esfuerzo ya hace el mujer para busca con el sencillo que ya perde.​—Le con el Lucas 15:8-10.

⁴ Si Jesus ya habla si cosa ya sinti el mujer cuando ya incuntra le con el bien precioso dracma que ya perde. Na tiempo de Jesus, cuanto maga Judio nana el ta dale diez sencillo de dracma con el diila anak mujer na dia del de suyu casamiento. Posible que uno de ese el sencillo que ya perde. Ya pensa el mujer que baka ya cae este na piso. Poreso, ya sindi le lampara y ya busca con ese pero nuay incuntra. Posible gendeh bastante el claridad del lampara para alumbra con el diutay sencillo de plata,  poreso ya barre le na entero casa. Y alla na tumpuk de polvos, ya mira le con el de suyu precioso dracma que ta brilla. Ya queda gayot le alegre cay ya incuntra le con ese. Poreso, ya llama le con el de suyu maga amigo, amiga y vecinos para habla kanila el buen noticia.

5. Porque posible dificil busca con aquellos quien ya separta na congregacion?

⁵ Como cosa kita ya mira na ilustracion de Jesus, necesita esfuerzo para busca con el un cosa que ya perde. Posible que necesita tambien kita hace grande esfuerzo para busca con aquellos quien ya perde na congregacion. Posible que cuanto año ya que nuay sila man junto kanaton. O baka ya cambia pa gane sila na otro lugar donde no conoce kanila alla el maga hermano y hermana. Pero puede kita asigura que na este mismo tiempo, cuanto de ese maga gendeh activo el quierre gayot bira con Jehova. Quierre sila sirvi otravez con Jehova junto con el maga hermano y hermana, pero necesita sila con el diaton ayuda.

6. Paquemodo el todo na congregacion puede ayuda busca con el maga gendeh activo?

⁶ Quien puede ayuda busca con ese maga gendeh activo? Todo kita​—maga anciano, pioneer, miembro del familia y publisher​—puede ayuda busca kanila. Tiene ba tu amigo o pariente que ya queda gendeh activo? Tiene ba tu con quien ya puede conoce que gendeh activo mientras ta predica tu na casa en casa o mientras na public witnessing? Habla con ele que si quierre le que visita con ele, alegre tu dale con el de suyu adres o cellphone number na maga anciano.

7. Cosa tu ya aprende na cosa ya habla el un anciano que si Thomas?

⁷ Cosa puede hace, especialmente el maga anciano, para busca con aquellos quien quierre bira con Jehova? Nota si cosa ya habla el un anciano que si Thomas, * quien ta queda na Spain. Ya puede le ayuda con el mas de 40 hermano y hermana para bira na congregacion. Si Thomas ya habla: “Una, ta pregunta yo con el maga hermano y hermana si sabe sila si onde ta queda el maga hermano y hermana que gendeh activo. O ta pregunta yo con el maga publisher si tiene sila con quien ta acorda que gendeh mas ta atende na miting. Mayoria na congregacion el alegre ayuda cay ta sinti sila que ta puede sila ayuda para busca con ese maga hermano. Na uliji, si visita yo con el maga gendeh activo hermano y hermana, ta pregunta yo acerca na diila maga anak y na diila otro pariente. El cuanto maga gendeh activo ta lleva con el diila maga anak na miting de antes. Y posible, ese maga anak ya queda tambien publisher. Puede tambien ayuda kanila para bira con Jehova.”

8. Na ilustracion na Lucas 15:17-24 acerca na anak que ya sale na casa, paquemodo ya trata el tata con el anak que ya arripinti?

⁸ Cosa maga calidad kita debe tiene para ayuda con aquellos quien quierre bira con Jehova? Nota con el cuanto leccion que puede kita aprende na ilustracion de Jesus acerca con el anak hombre quien ya sale na casa. (Le con el Lucas 15:17-24.) Ya explica si Jesus si paquemodo ya realiza el anak que gendeh justo el cosa le ya hace y ya decidi que bolbe kanila. El tata ya corre para hace encuentro con el de suyu anak y ya abraza con ele para asigura que ta ama siempre le con ele. Yan conciencia el anak y ya sinti que gendeh mas conviene llama con ele que anak del de suyu tata. Ya tiene empatia el tata con el de suyu anak, quien ya habla con ele si cosa le deverasan ta sinti. Tiene cosa ya hace el tata para asigura con el de suyu anak que ya ricibi otravez con ele, gendeh como un trabajador, sino como un miembro  otravez del familia. El tata ya manda prepara celebracion y ya dale bonito ropa con el de suyu anak que ya arripinti.

9. Cosa maga calidad kita debe demonstra para puede ayuda con el maga gendeh activo que bira con Jehova? (Mira con el cajon “ Si Paquemodo Ayuda con Aquellos Quien Quierre Bira.”)

⁹ Igual si Jehova con ese tata na ilustracion. Ta ama le con el diaton gendeh activo hermano y hermana y quierre le que bira sila con ele. Si imita kita con Jehova, puede kita ayuda para bira sila. Para hace se, necesita kita dale mira paciencia, empatia y amor. Porque kita debe demonstra con ese maga calidad y paquemodo kita hace con ese?

10. Porque kita necesita queda paciencioso para puede ayuda bira con Jehova el un persona?

¹⁰ Necesita kita queda paciencioso cay ta necesita tiempo para puede bira otravez con Jehova el un persona. Ya admiti el manada del maga gendeh activo de antes que ya puede lang sila bira despues kanila visita por cuanto beses el maga anciano y el otro na congregacion. El un hermana que si Nancy, de Southeast Asia, ya escribi: “Ya ayuda gayot conmigo el de mio amiga na congregacion. Ta ama gayot le conmigo como un mayor hermana. Ya hace le acorda conmigo con el diamon maga pasada de antes. Con paciencia le ya oi mientras ya habla yo si cosa yo ta sinti y nuay le man alang-alang dale conmigo consejo. Ya dale le mira que un deverasan amiga le, quien pirmi preparao ayuda.”

11. Porque kita necesita empatia para puede ayuda con el un persona quien ya sinti duele?

¹¹ El empatia igual na un medicina; puede este ayuda para queda bueno el sentido del un persona. El cuanto del maga gendeh activo ta sinti siempre duele y rabiao con el un persona  na congregacion maskin pa cuanto año ya el ya pasa. Por causa con ese, gendeh sila ta bira con Jehova. Posible, ta pensa el cuanto que nuay kanila trata enbuenamente. Posible, necesita sila un persona quien oi y entende con el cosa sila ta sinti. (Sant. 1:19) Si María, que gendeh activo de antes, ya habla, “Necesita yo un persona quien oi conmigo y quien puede dale comforta, ayuda y consejo conmigo.”

12. Ilustra si paquemodo el amor de Jehova igual na amarro.

¹² El Biblia ya habla que igual na un amarro el amor de Jehova para na de suyu maga siervo. Na cosa manera el amor del Dios igual na amarro? Considera con este ilustracion: Imagina que tan lumus tu na mar y tiene contigo quien ya buta salvavida. Asigurao, aprecia gayot tu con ese cay ayuda este para man lutao tu. Pero, gendeh bastante el salvavida para salva tu. Frio el agua y gendeh tu salva si gendeh tu llega na barco. Necesita que tiene quien buta contigo amarro y hala para na barco. Si Jehova ya habla acerca na maga Israelita quien ya separta con ele: “Ta hala yo kanila . . . por medio de amarro de amor.” (Os. 11:4) Ansina tambien ta sinti el Dios ahora con aquellos quien ya descanza sirvi con ele y quien ta experiencia manada problema y lingasa. Quierre le manda sabe kanila que ta ama le kanila y quierre le que bira sila otravez con ele. Y puede contigo usa si Jehova para manda sinti con el de suyu amor para kanila.

13. Relata un experiencia que ta dale mira que puede kita ayuda con otro que bira con Jehova por medio na diaton amor.

¹³ Importante que asigura con el maga gendeh activo que ta ama kanila si Jehova y ta ama tambien kita kanila. Si Pablo, que ya menciona  del ya pasa articulo, ya queda gendeh activo por mas de 30 año. Ele ya habla: “Un dia cuando pa-salida yo na casa, ya puede yo conoce con el un de edad hermana quien yan cuento conmigo na amable manera. Ya llura yo igual na un bata. Ya habla yo con ele que dol ya imbia gayot con ele si Jehova para man cuento conmigo. De aquel tiempo, ya decidi yo que bira con Jehova.”

14. Asegun na ilustracion na Lucas 15:4, 5, cosa ya hace el pastor cuando ya incuntra le con el carnero que ya perde?

¹⁴ Necesita kita continua ayuda con el maga gendeh activo despues kita incuntra kanila. Igual con el anak que ya sale na casa na ilustracion de Jesus, posible que tiene sila maga dolor na emocion. Y posible que mahina sila na espiritual por causa na cosa sila ya experiencia na mundo de Satanas. Necesita kita ayuda kanila hace fuerte con el diila fe con Jehova. Na ilustracion acerca na carnero que ya perde, ya menciona si Jesus si paquemodo el pastor ya pone con el carnero na de suyu hombro y ya lleva con este otravez na grupo del maga carnero. Grande tiempo y fuerza ya el ya perde con el pastor para busca con aquel carnero. Pero sabe le que necesita le carga con este para lleva otravez na maga uban de este cay nuay este fuerza para camina.​—Le con el Lucas 15:4, 5.

15. Paquemodo kita puede ayuda con el maga maluya quien quierre bira con Jehova? (Mira con el cajon “ Un Bien Valoroso Ayuda.”)

¹⁵ Posible que necesita kita grande tiempo y fuerza para puede ayuda con el maga gendeh activo para enfrenta con el diila problema que ta hace dificil para kanila que sirvi otravez con Jehova. Pero, por medio na espiritu de Jehova, na de suyu Palabra y maga publicacion que ta dale por medio na de suyu organizacion, puede  kita ayuda kanila queda fuerte otravez na espiritual. (Roma 15:1) Paquemodo kita puede hace con ese? Un experienciao anciano el ya habla, “Necesita conduci Bible study con el mayoria del maga gendeh activo quien ya decidi sirvi otravez con Jehova.” * Poreso, si ya pidi contigo que estudia junto con el un gendeh activo, con alegria con ese ricibi privilegio. Aquel mismo anciano ya habla, “El publisher quien conduci con el Bible study necesita queda un buen amigo con quien puede man cuento y confia el gendeh activo persona.”

16. Porque kita sabe que ta ayuda kanaton el maga angel?

¹⁶ Tiene manada maga experiencia que ta dale mira que ta ayuda kanaton el maga angel para busca con el maga gendeh activo quien quierre bira con Jehova. (Rev. 14:6) Por ejemplo, si Silvio quien ta queda na Ecuador, sincero ya reza con Jehova que ayuda con ele bira na congregacion. Mientras ta reza le, ya llega el dos anciano na de suyu casa. Durante aquel visita, alegre sila ya principia ayuda con ele.

17. Cosa premio kita ricibi si ayuda kita con el maga maluya na espiritual?

¹⁷ Hay queda gayot kita alegre si ayuda kita con el maga maluya na espiritual que bira con Jehova. Nota si cosa ya habla el un pioneer que si Salvador, quien ta hace especial esfuerzo para ayuda con el maga gendeh activo: “Tiene vez, gendeh yo ta puede evita que gendeh llura na alegria. Bien alegre yo cay ya puede salva si Jehova con el uno del de suyu maga carnero na mundo de Satanas y ya puede yo tiene el privilegio que ayuda con Ele na ese trabajo.”​—Act. 20:35.

18. Si etu gendeh activo, na cosa tu puede asigura?

¹⁸ Si ya descanza tu man junto con el maga siervo de Jehova, puede tu asigura que ta ama siempre contigo si Jehova. Quierre le que bira tu con ele. Necesita tu hace cuanto cosas para puede bira con ele. Pero igual con el tata na ilustracion de Jesus, si Jehova ta espera con el de tuyu birada y alegre le ricibi contigo otravez.