1. Jehovha a ti pfisa kutxani ngako nvuta yakwe yi txi wuya?

NGA ha hi nga ti wona ngu kona ka msungo wu wu nga pinda, Jehovha a ti fananisa ni m’dyisi wa mnene awu a khatalako ngu tinvuta takwe. Ene a xota yimwani ni yimwani a yi yi mwalalako. Jehovha a gete Vaisrayeli a va va nga ti mu lekile ku khene: “Tshumelelani kwangu, se nani ni na tshumelela kwanu.” Ha tsaniseka ti to ene a ngadi a txi ti pfa ngu nzila yoneyo, nguko a khene: “Ani kha ni txitxi.” (Mal. 3:6, 7) Jesu a wombile ti to Jehovha ni tingelozi ta tsaka ngutu ngako m’thu awu a nga ti mwalate e tshumelela ka Jehovha.—Luka 15:10, 32.

2. Hi na bhula ngu txani ka msungo wuwa?

² A hi xolisise sidinganiso siraru sa Jesu mayelano ni kuvhuna ava va nga mwalaleka. Hi na bhula ngu tifanelo ati ti lavako hi va nato ti to hi vhuna nvuta ayi yi nga mwalala ti to yi wuya ka Jehovha. Hi na wona to ngu kutxani ti txi tisa litsako la hombe kuvhuna ava va nga hola ve wuyela dibanzani.

3-4. Ngu kuya ngu dibhuku da Luka 15:8-10, ngu kutxani awule wamsikati a di xoletete txheleni yakwe yi yi nga ti mwalate?

³ Ti lava hi maha mthumo wa hombe ti to hi mana va va lavako kuwuyela ka Jehovha. Ka txidinganiso txi txi ku ka dibhuku da Luka, Jesu a womba-womba ngu wamsikati awu a xoletelako txheleni ayi yi nga mwalala. Gondo ya lisima ka txidinganiso txiya i mthumo wu ene a wu mahako ti to e yi mana.—Lera Luka 15:8-10.

⁴ Jesu a tshumete e womba nzila yi awule wamsikati a nga ti pfa ngu yona mbimo yi a manako txheleni yile ya lisima yi nga ti mwalate. Ka timbimo ta Jesu, ti woneka nga vamame va txi tolovela ku ninga vanana vawe va mahorana digumi da  matxheleni ka ditshiku da mtxhadho. Ti nga maha txheleni yoneyo i di yimweyo ya kona. Mbimo yi a nga yi pwata a pimisile ti to yi to wa hahatshi. Se, a to layitha dilambu e xola madhawani kambe kha wona txilo. Liwoningo la dilambu li vile lidotho kha ta koteka ku yi mana. Ngu magwito a to ñola diphiyelo e hiyela kotshe nyumbani. Ngako a di gwitile, a to wona txheleni yakwe ya lisima yi di patanile ni nzambwa ayi a nga hiyela. A to sinya makhara, se e ramba vangana vakwe ni vavhizinyo ve ta tsaka nayo

5. Ngu kutxani ti nga karatako ku mana ava va nga ti hambanisa ni dibanza?

⁵ Nga ha hi nga ti wona ngu kona ka txidinganiso txa Jesu, ti lava mizamo ya hombe ti to hi mana txi hi nga mwalata. Ngu ha kufanako, ti nga lava hi thuma ti to hi mana va va nga ti hambanisa ni dibanza. Vamwani ti nga maha ku di pindile malembe a mangi va di emile ku ta mitshanganoni. Se ti nga maha va di rurile ve ya ka wukhalo wumwani amu vanathu va wukhalo wonewo va si va ziviko. Kambe, athu ha tsaniseka ti to vanathu vonevo va nga hola, va ti lava kuwuya ka Jehovha. Vona va ti lava ku ta khozela Jehovha kumweko ni vanathu, kambe va lava txivhuno.

6. Mba mani va va patekako ko xota ava va nga hola?

⁶ I mani wu a patekako ko xota ava va nga hola? Hotshethu dibanzani hi nga vhuneta, mwendo hi madhota, hi va nyaphandule mwendo hi maxaka awe. Ina awe u ni dixaka adi di nga hola ngu didhawa da moya? Ina u khala kumanana ni m’thu wu a nga hola u txi txhumayela ngu mti ni mti mwendo u txi txhumayela ha kubasani? Ngako m’thu eneyo a txi tumela ku kuninga numeru yakwe ya fone, teka u ya ningela ka madhota dibanzani.

7. Hi gonda txani ka txikombiso txa mwanathu Thomas?

⁷ Ngu tihi ati madhota ma nga ti mhahako ti to me xota ava va lavako kuwuyela ka Jehovha? Wona ti a nga womba mwananathu wu i ku didhota a dhanwako ku i Thomas * a zumbako Espanha. Ene a vhuni 40 wa vanathu ti to ve tshumelela dibanzani. Ene a womba tiya: “Txo khata ni wotisa vanathu ti to i mani wu a zivako amu ku zumbako mwanathu wu a nga hola. Mwendo ni wotisa to i mani wu a zivako mwanathu wu a nga ema kuta mitshanganoni. Vo tala va ti tsakela kuvhuneta nguko ni vona va tipfa va txi pateka ko xota vanathu vonevo. Se mbimo yi ni endelako vanathu va va nga hola, ni va wotisa ngu ta vanana vawe ni maxaka awe. Vamwani va kona va ti tolovela ku ta ni vanana vawe mitshanganoni, se ti nga maha va di vile vahuweleli. Ni vona vanana va nga vhunwa ve wuyela dibanzani.”

8. Ka txidinganiso txa mwanana wo mwalala atxi txi ku ka Luka 15:17-24, tate a mu ñolisile kutxani mwanana wakwe?

⁸ Ngu tihi tifanelo ati hi fanelako kuva nato ti to hi vhuna ava va lavako ku wuya ka Jehovha? Wona ti hi nga ti gondako ka txidinganiso txa Jesu ngu mwanana wule wo sakana ni tithomba takwe. (Lera Luka 15:17-24.) Jesu a txhamusete ti ti nga mu maha e wona to a ti timete se e tshumelela mtini. Tate wakwe a to tutuma e mu hingeta e ta mu bharasara, e mu tsanisekisa ti to wa mu randa. Dijaha dile se di txi pekwa ngu livhalo di tipfa di si faneleki kudhanwa kota mwanana. Tate wakwe a pfete wusiwana mwanana wakwe mbimo yi a nga womba ti a nga ti ti pfisa tona. Tate wule a mahile to kari ti to e mu komba ku wa hoyozeleka mtini  kwakwe, i singa kota txithumi, kambe kota mwanana wa ha mtini. Ti to e ti komba to wa mu dhunda ngu ditshuri, ene a mahile m’buso e mu xavela siambalo so dhula.

9. Ngu tihi tifanelo ati hi fanelako ku va nato ti to hi vhuna ava va nga hola ve wuyela ka Jehovha? (Wona dibhokiso di di ku “ Hi nga va vhunisa kutxani ava va lavako kuwuyela ka Jehovha?”)

⁹ Jehovha a fananiswa ni tate ka txidinganiso txonetxo. Ene wa randa vanathu va va nga hola ni ku a lava ku ve wuya mtini. Ngako hi txi etetela Jehovha, hi nga va vhuna ve wuyela. Ti to hi tikota ti lava hi va ni kutimisela, wumbilu ni lirando. Ngu kutxani ti txi lava hi va ni tifanelo toneto, ni ku hi nga mahisa kutxani?

10. Ngu kutxani ti txi lava hi va ni kutimisela ti to hi vhuna m’thu e hanya ngu didhawa da moya?

¹⁰ Ti lava hi va ni kutimisela nguko ti nga teka mbimo ti to ve hanya ngu didhawa da moya. Vo tala va nga ti hote va womba to va tumete kuwuya msana ko va va di endetwe makhambi o tala ngu madhota ni vamwani dibanzani. Mwanathu mmwani a dhanwako ku Nancy wa Ásia a ti khene: “Mwanathu mmwani i nga ti mngana wangu a ni vhunile ngutu. Ene a txi ni dhunda ku nga ni to ko va mnanda wakwe. Ene a ni khumbutisile timhaka to tsakisa a ti ni nga ti maha nokha kale. Mbimo yi hi nga txi bhula ene a txi ni engisela kha kwati ni txi ti phofula, e tshumela a ni ninga sialakanyiso asi si nga txi laveka. Ene a vile mngana awu a ni dhundako mbimo yotshe.”

11. Ngu kutxani ti txi lava wumbilu ti to hi vhuna ava vo pandiseka?

¹¹ Wumbilu wu fana ni mrende awu wu nga holisako kupanda ka mbilu. Vamwani va wonisana  ni kupandiseka ka mbilu ngu ku va nga ñolwa ngu nzila ya tshofu dibanzani. Se ngu mhaka ya toneto, ta va karatela ku wuya ka Jehovha. Vamwani va nga pimisa ti to va mahetwe wubihi. Ti nga maha va txi lava m’thu awu a no ta va engisela kha kwati ni kupfisisa matipfelo awe. (Jak. 1:19) María awu a nga ti hote a womba tiya: “Ani ni ti lava m’thu awu a no ni engisela kha kwati, awu ni no dila kwakwe ni ku ni vhuna.”

12. Womba txikombiso txa nzila yi Jehovha a ndindako ngu yona vathu ti to ve wuyela dibanzani.

¹² Bhiblia yi fananisa lirando la Jehovha ngu vathu vakwe ni dijoke. I ngu nzila yihi lirando la Txizimu li txi fananiswa ni dijoke? Wona txikombiso txiya: Alakanya u di matini u txi bhwabhwamela se m’thu wo kari e ku rinzela ma salva vida. Ti ha kubasani ti to awe u nga tsakela ngutu txivhuno txonetxo nguko u na tikota kusambela. Kambe ma salva vida dwe ma nge hulukisi wutomi wako. Ti nga maha mati ma txi titila, ni ku u nge hanyi u si mani kubela ka ngalava. Kulaveka m’thu awu a no ku rinza dijoke ti to u bela ngu dona ngalavani. Jehovha a gete Vaisrayeli ava va nga ti mwalate a txi khene: “Ni va ndindete kwangu ngu majoke a wuthu.” (Hos. 11:4) Txizimu txi ti pfisa toneto ni nyamsi ngu va va nga ema ku mu thumela ava va bhwabhwamelako mu sikaratoni sa wutomi. Jehovha a lava ti to ve ti ziva to wa va randa. Ni ku Jehovha a nga ku thumisa ti to u kombisa lirando lonelo.

13. Txikombiso txa Pablo txi hi vhunisa kutxani kuwona to lirando la Wukristu li nga vhuna vamwani ve wuya ka Jehovha?

¹³ Nda lisima ngutu kutsanisekisa ava va nga hola ti to Jehovha wa va randa ni nathu ha va  dhunda. Pablo awu a nga wombwa ka msungo wu wu nga pinda, awu a nga zumba 30 wa malembe ni kupinda a si ti mitshanganoni a womba tiya: “Ditshiku dimwani ni txo khukha mtini, mwanathu mmwani wo kumba wo dhundeka ngutu a ni mani e bhula ni nani ngu nzila ya lirando. Ni khatile kudila ku nga no va mwanana. Ni mu gete to ti woneka nga Jehovha a to mu ruma ku e ta bhula ni nani. Kukhukhela ditshiku donedo ni mahile txisungo txo wuya ka Jehovha.”

14. Ngu kuya ngu txifananiso txi txi ku ka Luka 15:4, 5, m’dyisi a ti maha txani mbimo yi a nga ti mana nvuta yo mwalala?

¹⁴ Ava va nga hola va lava kuvhunwa mbimo yotshe. Kufana ni mwanana wule ka txikombiso txa Jesu, ava va nga hola va nga karateka ngutu. Ti nga maha va txi titila ngu didhawa da moya ngu mhaka ya ti va nga pinda ngu ka tona ka mafu ya Sathani. Hi lava ku va vhuna ve wuseta likholo lawe ka Jehovha. Ka txifananiso txa nvuta yo mwalala, Jesu a txhamusete ti to mbimo yi m’dyisi a manako nvuta yi yi nga mwalala wa yi pakata e yi wuyisa mtxhambini. Ti nga maha m’dyisi se a di hetile mbimo a txi yi xola. Kambe a nga tumbula to ti lava e yi gula e yi yisa mtxhambini nguko yi nge sikoti kutshumela yokha.—Lera Luka 15:4, 5.

15. Hi nga va vhunisa kutxani ava va nga hola ngu didhawa da moya ku ve wuyela ka Jehovha? (Wona dibhokiso di di ku “ Farameti ya lisima.”)

¹⁵ Ti nga lava mbimo ni mizamo ti to hi vhuna va va nga hola ngu didhawa da moya. Ngu kona ha ka moya wo sawuleka wa Jehovha, Bhiblia ni mabhuku a sengeletano hi nga kota ku va vhuna ve tsana ngu didhawa da moya.  (Var. 15:1) Hi nga ti mahisa kutxani toneto? Mwanathu mmwani wu i ku kale i di didhota a wombile tiya: “Vavangi va va nga hola ngu didhawa da moya va lava ku tsimbitiselwa gondo ya Bhiblia msana kova va di ti mahite txisungo txo tsumelela ka Jehovha”. * Se i di ti to wa kombelwa ku mu tsimbitisela gondo m’thu wu a nga ti hote ngu didhawa da moya, ngu kutxani u si yi teki i di lungelo? Didhota dimwani di womba tiya: “Mwanathu wu a tsimbitisako gondo yoneyo ku laveka a di ni txingana, a wu a no thembwa ngu txigondo txonetxo.”

16. Hi ti zivisa kutxani ti to tingelozi ta hi vhuna?

¹⁶ Ku ni sikombiso so tala sikombisako ti to tingelozi ti thuma kumweko ni nathu ti to ti hi vhuna kumana ava va lavako kuwuya dibanzani. (Mtu. 14:6) Ngu txikombiso, Silvio wa Ecuador a mahile mkombelo a txi kombela kuwuyela ka Jehovha. A txi ngadi a txi maha mkombelo, madhota mambidi ma pekile ditimba da nyumbani kwakwe. Madhota ma yi woni i di lungelo ku mu ninga txivhuno atxi a nga txi txi lava.

17. Ngu tihi ti hi ti manako hi txi vhuna m’thu awu a nga hola?

¹⁷ Ta tisa litsako la hombe ngutu kuvhuna ava va nga hola ve wuyela ka Jehovha. Salvador i ku nyaphandule awu a khatalako ngutu ngu vanathu ava va nga hola a womba tiya: “Mbimo yimwani na tanda ni kutiñola ni humisa mirongo ya litsako. Ta ni tsakisa ngutu kuwona to Jehovha a hulukisile nvunta yakwe ka makwasa a Sathani ni ku ni vile ni lungelo yo thuma kumweko Nayo ka mthumo wuwa.”—Mith. 20:35.

18. Ngako awe u di emile ku ta mitshanganoni, u nga tsaniseka ka ti to txani?

¹⁸ Ngako awe u di emile ku ta mitshanganoni, tsaniseka ti to Jehovha a ngadi a txi kulava. Ene wa ti lava ngutu ti to u wuyela kwakwe. Kambe ti na lava ku maha to kari ti to u wuyela kwakwe. Kambe, kufana ni tate wule ka txifananiso txa Jesu, Jehovha nene wa tsimbila e kuxota ti to u tshumelela kwakwe, ni ku athu hi na ku hoyozela.