EKICWEKA C’OKWEGA 26
‘Mugaruke ahu ndi’
‘Mungarukire, nanye ninyija kubagarukira.’—MAL 3:7.
ECESHONGORO CA 102 ‘Hwera Abataine Maani’
EMPINYE *
1. Ni bata oku Yehova ari kwehurira omuhereza weye yagaruka kumuhereza?
Nk’oku twakirebire omu kicweka ecabandize eki Yehova nayegeranisa n’omurisa murungi ori kufa aha ntama zeye, kandi naronda ebuzire. Yehova akagambira Abaisraeli ababire bamwehagwireho ngu: ‘Mungarukire, nanye ninyija kubagarukira.’ Nitumanya ku na hati ari ko ari kwehurira ahakuba nagira ngu: “Timpinduka.” (Mal 3:6, 7) Yesu akagamba ku Yehova na ba marayika bari kushemererwa munonga bareba omuhamya omwe owabire abuzire yagaruka omu kibina.—Luk 15:10, 32.
2. Ni enki eki twaza kushwijuma omuri eki kicweka?
2 Reka turebe ebyokureberaho bya Yesu bishatu ebiri kutwereka oku yabire natwariza abayehagwire ahari Yehova. Nambwenu nitwija kureba emitwarize eyi tushemerire kugira kugira ngu tukwase entama eyabuzire kugarukira Yehova. Kandi twaza kushwijuma enshonga ahabw’enki kiri ec’omugasho kutaho amani ngu tubayambe.
OKURONDA EFEZA EBUZIRE
3-4. Ahabw’enki omukazi ori kugambwa omuri Luka 15:8-10 yaronzire efeza yeye ayetonzire?
3 Tushemerire kutaho amani kugira ngu turondese abari kwenda kugarukira Yehova. Omu ngiri ya Luka Yesu akatugambira enkuru y’omukazi owabire ari kuronda efeza y’omuhendo eyabire ebuzire. Eyi nkuru ni ey’omugasho munonga ahabw’okuba netwereka amani agu owo mukazi yatireho kugira ngu abone eyo feza.—Shoma omuri Luka 15:8-10.
4 Yesu nagamba oku ogo mukazi yayehurire ku yabwine eyo feza y’omuhendo. Omu bwire bwa Yesu, omwana ku yabire nakoresa obugenyi nyina akaba namuha rupiha ikumi z’efeza. Omuri obwo bwire rupiha ekaba eri ey’omuhendo ahari ogo mukazi ahabw’okuba ekaba eri kimwe omu bi nyina yabire aramuhe. Ogo mukazi akaba nayesiga ku efeza yeye ebuzire arije kugibona. Obwe rero akahemba etara yarondesa hona konka tiyagira eki yabona. Orumuri rw’itara yeye rukaba ruri ruce rutari kubasa kumukwasa kubona eyo feza yeye nce. Kikamushaba kuboneza enju yona kugira ngu arebe ku yakugibona. Akabona ya feza yeye omu bisingwe ebi yabire yamara kukondora. Mbehi ku yagibwine akehurira ata? Aketa banywani beye n’abatahi kugira ngu abagambire eyo nkuru ndungi.
5. Ahabw’enki kiri kwetengesa kutamu amani kuronda abo abarekire kwekwatanisa n’ekibina?
5 Nk’oku twakireba omu cokureberaho ca Yesu niketengesa amani kurondesa ekintu c’omugasho ekibuzire. Ni co kimwe, n’itwe tushemerire kutaho amani kugira ngu turonde omuntu owarekire kwekwatanisa n’ekibina. N’obu hakuba hahwire emyaka myingi arekire kwekwatanisa n’ekibina. Nabasa kuza n’ahantu ahu benetata na banyanyazi b’okwe batari kumumanya. Konka nabwe nituba twine obwesige ku ogo muntu arigarukira Yehova. Naba acayenda kuhereza Yehova ari hamwe na benetata na banyanyazi konka naba ari kwetenga obuyambi bwitu.
6. Ni bata oku buri omwe omu kibina ari kubasa kwekwatanisa omu kuronda abafukire?
6 Ni baha abari kwekwatanisa omu kuronda abo abafukire? Twena nitubasa kukikora otwariremu abazehe, abapayoniya, ab’omu ka, n’ababurizi bona b’omu kibina. Mbehi oyine omunywani ninga omunyabuzare owafukire? Mbehi obu wabire ori omu murimo, okabugana omuntu owarekire kwekwatanisa n’ekibina? Ogo muntu yakwikiriza ngu muganire akakuha n’enamba yeye y’esimu nobasa kuziha abazehe rero bamuyamba.
7. Ni enki eki turi kwegera aha bi omuzehe ori kwetwa Thomas yagambire?
7 Ni ziha ntambwe ezi abazehe bashemerire kutera kugira ngu bamukwase kugarukira Yehova? Yetegereze eki omuzehe ori kwetwa Thomas * otwire omuri Sipeyini yagambire. Akakwasa abahamya abari kurenga 40 kugarukira Yehova. Akagira ngu: “Ecokubanza, nimbuza benetata na banyanyazi yaba bari kumanya ahu omuntu owafukire atwire. Ninga shi mbuza ababurizi abu bari kwijuka abarekire kwija omu nterane. Abari omu kibina nibashemerererwa kukwasa abo abafukire. Rero ku ndi kuza kutayayira mwenetata ninga munyanyazi owafukire, nimubuza aha bikwatirine n’abana beye n’abanyabuzare beye. Abamwe omu bafukire nibareta abana babo omu nterane rero bwanyima abo bana nibaba ababurizi. Abo bana nibabasa kukwasa abazire babo kugarukira Yehova.”
BAHIGE KUGARUKA OMU KIBINA
8. Omu nkuru y’omwana w’ekirara eri omuri Luka 15:17-24, ishe akamutwariza ata?
8 Ni eha mitwarize eyi tushemerire kuba twine kugira ngu tukwase abari kwenda kugarukira Yehova? Yetegereze ishomo eri turi kubasa kwegera aha cokureberaho ca Yesu c’omwojo owarugire omu ka. (Shoma omuri Luka 15:17-24.) Yesu nashoborora oku ogo mwojo yijire kuhindura entekateka zeye mbi rero akasharamu kugaruka omu ka. Ishe akaza kumubugana yamuhobera ashemerirwe kandi yamwereka rukundo. Ogo mwojo akaba ayine omuntuwomunda ori kumutera kandi akaba ari kuhurira atahikire kwetwa omwana omu ka. Ishe akamugirira embabazi. Ishe akamwereka ku yamwakira omu ka, ku atari nk’omugaragwa ahobwe ku ari omwana omu ka kandi ori kukundwa munonga. Ebyo akabimwereka ari kumutebekanisiza embaga kandi yamujweka n’ebijwaro bisya.
9. Ni eha mitwarize eyi tushemerire kwereka kugira ngu tukwase abafukire kugarukira Yehova? (Reba akashanduku akari kugira ngu: “ Oku turi kukwasa abari kwenda kugaruka omu kibina.”)
9 Yehova ni nk’ogo muzire ori kugambwa omuri eco cokureberaho. Nakunda benetata na banyanyazi abafukire kandi nayenda ngu bamugarukire. Nitubasa kutoreza Yehova turi kubakwasa ngu bagaruke. Eco nicetengesa okwehangana, embabazi, na rukundo. Ahabw’enki tushemerire kwereka eyo mitwarize kandi shi ni bata oku turi kubasa kukikora?
10. Ahabw’enki kiri kwetengesa okwehangana kugira ngu tuhike hihi ori kwenda kugarukira Yehova?
10 Tushemerire kwehangana ahakuba nikibasa kukwata obwire buringwa kugira ngu agarukire Yehova. Abafukirire abingi nibagaruka omu kibina abazehe bamara kubatayayira. Omunyanyazi ori kwetwa Nancy w’omuri Asia, nagamba ngu: “Omunywani owa hihi omu kibina akankwasa kugaruka. Akaba nankunda munonga. Akanyijusya oku twabire nitushemererwa turi hamwe omu kibina. Ku nabire ndi kumugambira oku ndi kwehurira, akampurikiza ge ayetonzire, rero yampa obuhabuzi. Akanyereka ku omunywani owa buzima ari kuba ayetegwire kukukwasa omu bwire bwona obu ori kumwetenga.”
11. Ahabw’enki turi kwetenga omutwarize g’okoreka embabazi kugira ngu tuhurire obusaasi bw’ondijo?
11 Omutwarize g’okwereka embabazi ni omubazi gw’amani; nigubasa kutuma twayetegereza obusaasi bw’ondijo. Abamwe abafukire nibabasa kumara emyaka myingi bari kwehurira kubi ahabw’okutwarizibwa kubi n’abantu ab’omu kibina. Ezo nyehurira nizibazibira kugarukira Yehova. Abamwe nibabasa kutekateka ku bari kubagendaho. Abo bantu nibaba bari kwetenga ow’okubahurikiza ge akamanya enyehurira za bo. (Yak 1:19) María, owamazire obwire afukire, nagira ngu: “Nkaba ninyetenga owo kumpurikiza ge, owo kugambira oku ndi kwehurira kandi akankwasa kukora ensharamu ndungi.”
12. Ni bata oku rukundo ya Yehova eri nk’omurunga.
12 Bibuli negamba ku Yehova ari kutweta ngu tumuhike hihi. Ni bata oku ari kukikora? Tekateka ahari eki co kureberaho: Reka tugire ngu wagwa omu kina kiringwa munonga, tori kubasa kuceyihamu. Oburyo bumwe oburi kubasa kukukwasa kuruga omuri ezo mbera, ni oku omuntu ari kukuha omurunga rero akakukurura. Yehova akagamba aha bikwatirine n’Abaisraeli ababire bamwehagwireho ngu: ‘Nkabiriza hihi n’emirunga ya rukundo.’ (Hos 11:4) Ruhanga ni ko ari kwehurira ahari abo abarekire kumuhereza ahabw’ebizibu ebi bari kubugana. Nayenda ngu bamanye ku ari kubakunda, kandi ku ari kwenda ngu bamuhike hihi. Yehova nabasa kukukoresa omu kubereka rukundo yeye.
13. Gamba ecokureberaho ekiri kwereka ku rukundo ya benetata eri ey’amani.
13 Ni ec’omugasho munonga kugambira abafukire ku Yehova ari kubakunda kandi ku n’itwe turi kubakunda. Pablo owu twagambireho omu kicweka ecabandize eki, akamara emyaka 30 afukire. Akagamba ngu: “Izoba rimwe, obu nabire nyeberire omu ka, munyanyazi okuzire kandi murungi akija yanganiza omu muringo gwa rukundo. Nkatandika kurira nk’omwana. Nketegereza ku Yehova yabire amusindikire ngu ayije agambe nanye. Obwo bwire nkahika ninsharamu kugarukira Yehova.”
BAKWASE OMURI RUKUNDO
14. Tukuratize ecokureberaho ekiri omuri Luka 15:4, 5, ni enki eki omurisa yabire nakorera entama yeye eyabire ebuzire yamara kugibona?
14 Abafukire nibaba bari kwenda ngu tubayambe kandi tubagaruremu amani. Nk’omwana w’ekirara, nibaba bine obusaasi bwingi. Kandi nibaba barahwire amani omu by’omwika ahakuba nibaba bari omu nsi ya Sitaane. Nituba tushemerire kubakwasa kugira ngu bashube bikirize Yehova. Omu cokureberaho c’entama eyabuzire, Yesu nagamba oku omurisa yabire ari kuyita aha mabega, rero akayigarura omu busyo. Omurisa akaba nataho amani n’obwire bweye kugira ngu abone eyo ntama ebuzire. Konka akaba namanya ku eyo ntama eri kwetenga obundi buyambi; akaba atari kuhika nayita omu zindi ahakuba neba etakagizire amani nk’aga kare.—Shoma omuri Luka 15:4, 5.
15. Ni bata oku turi kubasa kushagika abari kwenda kugarukira Yehova? (Reba akashanduku akari kugira ngu: “ Ekikoreso c’omuhendo.”)
15 Tushemerire kutaho amani n’obwire bwitu omu kukwasa abafukire kugira ngu bagaruke kuhereza Yehova. Birabire aha mwika oguri kwera gwa Yehova, Ekigambo ca Ruhanga, n’omu bitabo byitu nitubasa kubakwasa kugaruka kuba ge omu by’omwika. (Rom 15:1) Nitubasa kukikora tuta? Omuzehe omanyirire akagamba ngu: “Abafukire abingi basharamu kugarukira Yehova nibaba bashemerire kwega Bibuli.” * Mbehi tori kushemererwa bakushaba kwegesa Bibuli omuntu ofukire? Nambwenu akongeraho ati: “Omuburizi ori kumwegesa Bibuli naba ashemerire kuba munywani weye wa hihi, kugira ngu amwesige kandi amugambire byona.”
OKUSHEMERERWA OMU IGURU N’OMU NSI
16. Nitumanya tuta ku ba marayika bari kutukwasa?
16 Twine ebihamya byingi ebiri kutwereka ku ba marayika bari kutukwasa kubona abari kwenda kugarukira Yehova. (Kush 14:6) Ecokureberaho: Mwenetata ori kwetwa Silvio w’omuri Ekwado, akashaba Yehova ngu amwoherereze owo kumukwasa kugaruka omu kibina. Ku yabire acashaba, akahurira abazehe babiri batera aha rwigi. Obwo bwire, abazehe bakashemerererwa kumuha obuyambi obu yabire ari kwetenga.
17. Nitwehurira tuta ku turi kukwasa abafukire?
17 Nitwija kushemererwa munonga twakwasa abafukire kugarukira Yehova. Yetegereza ecahikire aha mupayoniya, ori kwetwa Salvador owatireho amani ari kukwasa owabire afukire, nagira ngu: “Ku ndi kutekateka aha muntu owagarukira Yehova nimpurira nshemerirwe munonga, ahakuba Yehova naba yamwiha omu nsi ya Sitaane kandi nimpurira guri omugisha kukora na Yehova omuri ogo murimo.”—Byak 20:35.
18. Ku orabe wafukire omu by’omwika, ni enki eki oshemerire kwesiga otari kubanganisa?
18 Ku orabe warekire kwekwatanisa n’ekibina, oyesige otari kubanganisa ku Yehova acakukunda. Nayenda ngu omugarukire. Oshemerire kumugarukira. Nk’omuzire ori kugambwa omu cokureberaho ca Yesu, Yehova naba ayetegwire kukwakira omu ka yeye.
ECESHONGORO CA 103 Abareeberezi—N’Ebiconco omu Bantu
^ par. 5 Yehova nayenda ngu abantu abarekire kwekwatanisa n’ekibina bamugarukire. Nitubasa kukora ekiri kubasika cona turi kubahiga ngu bikirize obutumire bwa Yehova oburi kugira ngu: ‘Mugaruke ahu ndi.’ Omuri eki kicweka, twaza kushwijuma oku turi kubasa kubakwasa kukikora.
^ par. 7 Amazina gamwe gakahindurwa.
^ par. 15 Abamwe abafukire nitubakwasa turi kubegesa ebicweka bimwe by’ekitabo Oku Oine Kuguma Omuri Rukundo ya Ruhanga, abandi bo nibagasirwa bari kwega ebicweka bimwe by’ekitabo Hika hihi ya Yehova (Draw Close to Jehovah). Komiti y’omurimo y’omu kibina, nesharamu omuburizi murungi ori kubasa kumwegesa.
^ par. 68 EBISHUSHANI: Benetata bashatu bari kukwasa mwenetata ori kwenda kugarukira Yehova. Nibakikora bari kumweta aha simu, bari kumuhamiza ku bari kumukunda, kandi bari kumuhurikiza ge.
