MUTWE WAKULILONGESA 26
“Hilukenu Kuli Yami”
“Hilukenu kuli yami, ni yami munguhiluka kuli yenu.”—MALA. 3:7.
MWASO 102 “Kukwasa Waze Keshi Tachi”
CHIKUMA CHILEMU *
1. Kuchi Yehova akwivwa muze kavumbi yoze watokele akuhiluka kuli iye?
NGWE chize twalilongesanga ha mutwe wapalika, Yehova kanalitese ni kafunga mupema yoze wakufunga kanawa mapanga jenyi. Iye kakufupa mapanga eswe waze hanatoko. Yehova kalwezele A-Izalele waze ahambulukile ku shimbi jenyi ngwenyi: “Hilukenu kuli yami, ni yami munguhiluka kuli yenu.” Tunanyingika ngwetu, nihindu Yehova che akwivwa, mumu kanambe ngwenyi: “Yami Yehova chishi kwalumuka.” (Mala. 3:6, 7) Yesu kambile ngwenyi, Yehova ni angelo kakuwahilila chinji muze umwe kavumbi yoze watokele akuhiluka kuli Iye.—Luka 15:10, 32.
2. Yika mutulilongesa ha mutwe uno?
2 Mututala yilweza yitatu ya Yesu yinashindakenya ha chize mutuhasa kukwasa waze hanasosoloka kuli Yehova. Mutulilongesa nawa yitanga yize twatamba kupwa nayo mba tukwasa waze hanatoko hanga ahiluke kuli Yehova. Mutumona nawa mumu liaka twatamba kusa tachi hanga tukwase waze hanahongo ku ufulielo.
KUFUPA LUMBONGO WATOKA
3-4. Mumu liaka pwo anatongola ha Luka 15:8-10, asele tachi jinji hanga afupe lumbongo yoze watokele?
3 Twatamba kusa tachi jinji, mba tuwane waze anazange kuhiluka kuli Yehova. Chishima chize Yesu atele chili ha mukanda wa Luka, chinasolola chize umwe pwo asela tachi hanga afupe lumbongo yoze watokele. Chishima chino, chinashindakenya ha tachi jize pwo asele hanga afupe lumbongo wacho.—Tanga Luka 15:8-10.
4 Yesu kanasolola chize pwo wacho evwile muze awanyine lumbongo yoze te anafupu. Ha mashimbu ja Yesu, amama kapwile ni kuhana kumi lia mbongo kuli mwana wa pwo ha mashimbu a umbachiso. Lumbongo yoze pwo wacho apwile ni kufupa kapwile mulemu chinji, mumu kota naye mwe wamuheleyo. Muze pwo amwene ngwo lumbongo hatoka, yakwachisa ndeya, yaputuka kumufupa-fupa. Alioze kakamumwene. Ndeya yenyi yakamukwashile kuwana lumbongo yoze waholokele. Hachino, yakomba zuwo lieswe, muze hakunga yiswaswa yeswe mu zuwo, mba yawana lumbongo wenyi ha mavu. Yevwa kuwaha chinji, yatambika masepa jenyi ni enyembo jenyi hanga awahilile hamuwika.
5. Mumu liaka muchihasa kupwa chikalu kuwana waze hanalitwamina kuya ku kukunguluka?
5 Ngwe chize twamona ha chishima cha Yesu, twatamba kusa tachi jinji mba tuwane chuma chize chatoka. Chizechene nawa, twatamba kukalakala chinji mba tuwane mandumbu waze hanalitwamina kuya ku kukunguluka. Chize haze mandumbu jacho echele kuya ku kukunguluka, kota hikunapalika miaka yinji. Hanji kayile ni kutwama kweka, kuze mandumbu kaanyingikine. Alioze, ha mashimbu wano, mandumbu waze hanazeye ku ufulielo kanazange kuhiluka kuli Yehova. Kanazange kuwayila Yehova hamuwika ni mandumbu jo a mu ufulielo. Kashika, kanafupu ukwaso wetu.
6. Kuchi mandumbu eswe mu chikungulwila mahasa kukwasa kufupa waze hanazeye ku ufulielo?
6 Iya watamba kufupa mandumbu waze hanahongo ku ufulielo? Yetu eswe mutuhasa kufupa. Makulwana, mapionelu, asoko ni akwa-kwambujola eswe. Shina uli ni umwe sepa hanji usoko yoze hanazeye ku ufulielo? Ha kwambujola ku zuwo ni zuwo hanji ha mbunga, shina hiunaliwana kama ni ndumbu yoze hanazeye ku ufulielo? Nyi muliwana ni ndumbu wacho mulweze ngwo nyi kanazange hanga amufupe, mahasa kukulweza kuze atwama hanji kukwaha numero yenyi ya telefone, hanga uyihane kuli makulwana a mu chikungulwila amufupe.
7. Yika twalilongesa ha yize ndumbu Tomas mukulwana wa mu chikungulwila ambile?
7 Yika makulwana a mu chikungulwila mahasa kulinga hanga awane waze anazange kuhiluka kuli Yehova? Tutalenu yize ambile umwe mukulwana wa mu chikungulwila avuluka ngwo, Tomas * wa ku Espanha. Tomas kakwashile mandumu 40 hanga ahiluke kuli Yehova. Iye yamba ngwenyi: “Chitangu nakuhula mandumbu anji nyi kananyingika kuze kuli mandumbu waze hanazeye ku ufulielo. Nakuhula akwa-kwambujola nyi kanewuluka umwe yoze unakokoloka ku ufulielo. Mandumbu anji kakukumbulula ni chiseke cheswe, mumu no kananyingika ngwo kanakwasa mu mulimo wa kufupa. Muze nakumeneka mandumbu waze anakokoloka ku ufulielo, nakwahula hanga ngunyingike chize ana ni asoko jo ali. Mandumbu waze anakokoloka ku ufulielo, kapwile ni kwiza ni ana jo ku kukunguluka, nawa ana jacho, kota kapwile akwa-kwambujola. Kashika, no twatamba kwakwasa hanga ahiluke kuli Yehova.”
KUKWASA ANA JA YEHOVA WAZE HANATOKO HANGA AHILUKE
8. Ha chishima cha mwana yoze wakatukile kuzuwo chili ha Luka 15:17-24, kuchi tato asolwele ngwo kamutambula kanawa?
8 Yitanga yika twatamba kupwa nayo mba tuhase kukwasa waze anazange kuhiluka kuli Yehova? Tutalenu yize mutuhasa kulilongesa ha chishima cha Yesu chinahanjika hali mwana yoze wakatukile ku zuwo lia tato. (Tanga Luka 15:17-24.) Yesu yalumbununa yize yalingiwile kuli mwana mba ahiluke kuli tato. Muze tato hamumona, yazomboka hanga alitakane nenyi, yamukangayika mu kondo. Mwana yanyingika ngwenyi, kavulumuna chinji ku meso ja tato. Kashika, yalituna kumuvuluka ngwo mwana. Chisemi wacho yevwa keke yinji ha kumona chize mwanenyi analinyenge. Hachino, kakamutambwile ngwe ndungo, alioze yamutambula ngwe mwanenyi yoze azanga chinji. Yamululiekela chiwanyino chipema ni kumwaha mazalo a ngunda hanga asolole ngwo kakumuzanga.
9. Yitanga yika twatamba kupwa nayo mba tukwse waze anazange kuhiluka kuli Yehova? (Tala mushete unambe ngwo, “ Chize Muhasa Kukwasa Waze Anazange Kuhiluka Kuli Yehova.”)
9 Yehova kali ngwe tata wa ha chishima chino. Kakuzanga chinji mandumbu waze anazange kuhiluka kuli iye. Nyi mutwimbulula Yehova, mutuhasa kwakwasa hanga ahiluke. Twatamba kupwa ni keke, zango ni uhomboloji mba tuhase kwakwasa. Mumu liaka twatamba kusolola yitanga yino, nawa kuchi mutuhasa kupwa nayo?
10. Mumu liaka twatamba kupwa yihomboloji muze tunakwasa umwe ndumbu hanga ahiluke kuli Yehova?
10 Kwakupalika mashimbu anji mba mutu akole cheka ku ufulielo. Kashika, twatamba kusolola uhomboloji. Amwe waze akokolokele ku ufulielo, kambile ngwo, kahilukile mu chikungulwila mumu lia kwameneka chinji kuli makulwana a mu chikungulwila ni mandumbu akwo. Umwe ndumbu wa ku Asia, avuluka ngwo Nancy, kasonekene ngwenyi: “Umwe sepa liami wa mu chikungulwila mwe wangukwashile chinji mba nguhiluke kuli Yehova. Kapwile ngwe mwanakwetu. Yangwiwulula mashimbu apema waze twapwile ni kukalakala chimuwika mu mulimo wa Yehova. Yangupanjika kanawa ni uhomboloji weswe muze te ngunahanjika, nawa yangwaha yiyulo yipema. Yasolola ngwenyi, kali sepa wamwenemwene ha kungukwasa.”
11. Mumu liaka twatamba kupwa ni keke mba tukwase waze hanasosoloka kuli Yehova?
11 Mandumbu amwe akokoloka ku ufulielo, kota kakupinda ha miaka yinji ha mukunda wa yuma yipi yize aambile kuli umwe ndumbu wa mu chikungulwila. Yuma yacho yakwakwika kuhiluka kuli Yehova. Amwe kakunyonga ngwo, yuma yize anakaalinga, yili ya uhenge, hachino, chakupwa chikalu kuhiluka kuli Yehova. Kashika, kakufupa mutu yoze maapanjika kanawa muze anahanjika. (Tia. 1:19) Maria yoze wakokolokele mu ufulielo yamba ngwenyi: “Ha mashimbu jacho nafupile sepa wamwenemwene yoze te mangupanjika, mangulembejeka ni kungukolweza.”
12. Lumbununa chize zango lia Yehova liakukwasa waze hanazeye ku ufulielo hanga ahiluke kuli iye.
12 Mbimbiliya yinasolola ngwo zango lia Yehova hali atu jenyi lili ngwe lwoji yoze keshi kutetuka. Mumu liaka mutuhasa kwamba ngwetu, zango lia Zambi hali atu jenyi lili ngwe lwoji yoze keshi kutetuka? Tala chilweza chino: Achinyonga ngwe hiwaholokela mu lwiji, nawa unambe kutoka unaminyaminya meya. Alioze umwe mutu makukongela chihanda cha lipaya. Kwamba pundu, musakwilila chinji mumu lipaya liacho mulikukwasa hanga uhone kushimbama. Alioze, lipaya liacho, kulichi kukukwasa ha mashimbu anji. Kashika, watamba kufupa wato hanga unyinemo. Mumu nyi kuwachilingile muhasa kutoka mu meya. Alioze, katamba kukukongela lwoji hanga akukoke mba unyine mu wato. Yehova kambile kuli A-Izalele muze apiangukule ngwenyi: “Naasongwelele ni mihipu ya keke, ni malenge a zango.” (Hoze. 11:4) Ni musono, Zambi che akulinga muze akumona tuvumbi twenyi malitwamina kumulingila ha mukunda wa yipikalo. Kanazange hanga ayo anyingike ngwo, kakwazanga chinji, nawa kanazange hanga ahiluke kuli Iye. Yehova mahasa kusolola zango liacho hali ayo ha kututuma hanga twakase.
13. Kuchi chilweza cha Paulu chinasolola ngwo zango lietu mulihasa kukwasa akwetu hanga ahiluke kuli Yehova?
13 Chili chilemu kukwasa waze hanazeye ku ufulielo kunyingika ngwo, Yehova kakwazanga chinji, nawa ngwo ni yetu twakwazanga. Paulu yoze twatongolanga ha mutwe wapalika, kazeyele ku ufulielo ha miaka 30. Yamba ngwenyi: “Tangwa limwe chimene muze te hinakatuka ku zuwo liami, yingulitakana ni umwe ndumbu wa pwo, kashinakaji, yahanjika ni yami ni zango lieswe, yinguputuka kulila chinji ngwe kanuke. Yingumulweza ngwami, kota Yehova mwe wakutuma hanga uhanjike ni yami. Kukatuka hazehene, yingukwata chiyulo cha kuhiluka kuli Yehova.”
TUSOLOLENU ZANGO HA KUKWASA WAZE ANAHONGO
14. Kulita ni chishima chili ha mukanda wa Luka 15:4, 5, yika kafunga alingile muze awanyine panga yoze watokele?
14 Twatamba kununga ni kukwasa waze anazeye ku ufulielo. Ngwe mwana wa ha chishima cha Yesu, yoze watokele, hanji ayo kanapinji ni yinyengo yinji mu mbunge, kanazeye ku ufulielo ha mukunda wa yuma ya hano hashi ha Satana ni yize yalingiwa ku mwono wo. Twatamba kwakwasa hanga akolese ufulielo wo muli Yehova. Ha chishima cha panga yoze watokele, Yesu kasolwele chize kafunga akwanda panga wacho ni kumusa mu kondo hanga amufunyise ha chendo cha mapanga akwo. Kafunga kakusa mashimbu ni tachi hanga afupe panga yoze watoka. Kafunga kananyingika ngwenyi, katamba kukwasa panga wacho ni kumusa mu kondo hanga amufunyise mu chendo.—Tanga Luka 15:4, 5.
15. Kuchi mutuhasa kukwasa waze anazange kuhiluka kuli Yehova? (Tala mushete unambe ngwo, “ Mukanda wa Kukwasa Nawo Waze Anazeye ku Ufulielo.”)
15 Ha mashimbu amwe, twatamba kusa tachi jinji mba tukwase waze anazeye ku ufulielo ahiluke kuli Yehova. Alioze, ni ukwaso wa spritu yisandu ya Yehova, Liji lienyi ni mikanda yize yili mu ululikiso wetu, mutuhasa kwakwasa hanga akole cheka ku ufulielo. (Roma 15:1) Kuchi mutuhasa kuchilinga? Umwe mukulwana wa mu chikungulwila yamba ngwenyi: “Mandumbu waze hanazeye ku ufulielo anazange kuhiluka kuli Yehova, katamba kulilongesa Mbimbiliya.” * Kashika, nyi makutongola hanga usongwele longeso lia Mbimbiliya kuli ndumbu yoze wazeya ku ufulielo, tayiza.” Mukulwana wacho yamba nawa ngwenyi: “Mukwa-kwambujola yoze masongwela longeso lia Mbimbiliya kuli ndumbu yono, katamba kupwa sepa mupema, yoze majikijila.”
CHISEKE MU MALILU NI HASHI
16. Kuchi tunanyingika ngwetu angelo kakutukwasa mu mulimo wa kufupa waze hanazeye ku ufulielo?
16 Kuli sango jinji jize jinasolola ngwo, angelo kanatukwasa hanga tuwane atu waze hanakokoloka ku ufulielo ahiluke kuli Yehova. (Uso. 14:6) Chakutalilaho, Silvio wa ku Equador, kalembele hanga Zambi amukwase kuhiluka mu chikungulwila. Shimbu te machilemba, makulwana aali a mu chikungulwila yangongwela ku chikolo chenyi. Hazehene, yaputuka kumukwasa hanga ahiluke kuli Yehova.
17. Yiwape yika twakuzuka muze twakukwasa waze hanazeye ku ufulielo ahiluke kuli Yehova?
17 Nyi mutukwasa waze anazeye ku ufulielo, mutuwahilila chinji. Tutalenu yize ambile Salvador, umwe pionelu wakulihulumba chinji hali waze hanazeye ku ufulielo. Yamba ngwenyi: “Muze nakunyonga hali mandumbu waze hanahiluka kuli Yehova, nakuwahilila chinji. Nakuwahilila chinji ha kunyingika ngwami, ngunakalakala ni Yehova mu mulimo uno wa kukwasa waze hanazeye ku ufulielo hanga akatuke hashi hano ha Satana ahiluke kuli Yehova.”—Yili. 20:35.
18. Chipwe ngwe hiunazeye ku ufulielo, shindakenyo yika watamba kupwa nayo?
18 Nyi hiunalitwamina kuya ku kukunguluka, pwako ni shindakenyo ngwe, Yehova nihindu kakukuzanga. Kanazange hanga uhiluke kuli iye. Kashika, watamba kusa tachi hanga uhiluke kuli iye. Chizechene ngwe tata wa ha chishima cha Yesu, Yehova kanazange hanga uhiluke kuli iye, makutambula kanawa mu zuwo lienyi.
MWASO 103 Tufunga—Kali Yawana Kuli Atu
^ kax. 5 Yehova kanazange hanga waze eswe hanalitwamina kuya ku kukunguluka ahiluke kuli iye. Mutuhasa kuling yuma yinji hanga tukolweze waze eswe anatayiza mutambi wa Yehova wakuhiluka kuli iye. Unambe ngwo: “Hilukenu kuli yami.” Ha mutwe uno, mutulilongesa chize mutuhasa kwakwasa hanga atayize mutambi wacho.
^ kax. 7 Majina amwe kapwa kwalumuna.
^ kax. 15 Waze hanazeye ku ufulielo mahasa kwakwasa ha kulilongesa no mukanda unambe ngwo, Nunga mu Zango Lia Zambi, akwo, mukanda unambe ngwo, Kukundama Kuli Yehova. Makulwana a Komite ya Mulimo ya Chikungulwila e masakula ndumbu yoze masongwele longeso lia Mbimbiliya kuli ayo.
^ kax. 68 ULUMBUNWISO WA YIZULIE: Amwe mandumbu kanakwasa ndumbu yoze unazeye ku ufulielo hanga ahiluke kuli Yehova. Kanamukwasa ha kuhanjika nenyi, kumulweza ngwo kakumuzanga ni kumupanjika kanawa muze anahanjika.
