1. Ki mannyer Zeova i santi ler enn son serviter ki ti’n elwannyen i retourn kot li?

PAREY nou ti vwar dan sa lartik avan, Zeova i konpar son lekor avek en bon berze ki pran byen swen avek sakenn son bann mouton. I osi rod sa bann mouton ki’n elwannyen avek li. Zeova ti dir bann Izraelit ki ti’n kit li: “Retourn kot mwan e mon ava retourn kot zot.” Nou konnen ki Zeova i ankor santi parey parski i dir: “Mon pa sanze.” (Mal. 3:6, 7) Zezi ti dir ki Zeova ek bann lanz i vreman kontan ler en serviter Zeova ki ti’n elwannyen, i retourn kot Li.​—Lik 15:10, 32.

2. Ki nou pou diskite dan sa lartik?

² Dan sa lartik, nou pou diskit lo trwa legzanp ki Zezi ti servi. Sa bann legzanp pou ed nou vwar ki mannyer nou kapab ed bann ki’n elwannyen avek Zeova. Nou pou osi diskit lo serten kalite ki nou bezwen annan pour nou kapab ed bann mouton perdi retourn kot li. Apre, nou pou vwar akoz i vo lapenn fer zefor pour ed bann inaktif retourn kot Zeova.

3-4. Akoz sa madanm ki ganny mansyonnen dan Lik 15:8-10 ti rod son pyes larzan partou?

³ Nou bezwen fer bokou zefor pour trouv bann ki anvi retourn kot Zeova. Levanzil Lik i koz lo en legzanp ki Zezi ti donnen. Dan sa legzanp, Zezi i dekri lafason ki en madanm ti rod en pyes larzan ki i’n perdi. Sa legzanp i ed nou vwar ki kantite sa madanm ti rod sa pyes larzan.​—Lir Lik 15:8-10.

⁴ Zezi i dir nou ki mannyer sa madanm ti santi ler i ti vwar sa pyes larzan ki i ti’n perdi. Dan letan Zezi, i paret ki serten manman ti donn zot fiy dis pyes larzan zour zot maryaz. I kapab ki sa pyes larzan ti sitan presye pour sa madanm akoz i ti form parti sa dis pyes larzan ki son manman ti’n donn li. Sa madanm i krwar ki sa pyes larzan in tonm  ater dan son lakaz. Alor, i alim en lalanp e i get partou me i pa vwar nanryen. I kapab ki son lalanp delwil pa ase kler pour li vwar sa pti pyes larzan. Pour fini kont, i balye son lakaz e i vwar sa pyes larzan dan lapousyer, pe klate dan laklerte son lalanp. Sa madanm i vreman kontan pour trouv son larzan. I kriy son bann zanmi ek vwazen e i rakont zot sa ki’n arive.

5. Akoz i kapab difisil pour trouv bann ki’n elwannyen avek kongregasyon?

⁵ Parey nou’n vwar dan legzanp Zezi, i demann bokou zefor pour vwar en keksoz ki nou’n perdi. Pareyman, i kapab ki nou pou bezwen travay dir pour nou trouv bann ki’n elwannyen avek kongregasyon. I kapab ki bokou lannen in pase depi ki zot in elwannyen. Petet zot in menm al reste dan en landrwa kot bann frer ek ser pa konn zot. Kantmenm sa, nou kapab asire ki aprezan, serten sa bann inaktif i vreman anvi retourn kot Zeova. Zot anvi rekonmans servi Zeova ansanm avek zot bann frer ek ser, me zot bezwen nou led.

6. Ki mannyer tou dimoun dan kongregasyon i kapab ede pour trouv en inaktif?

⁶ Lekel ki kapab ede rod bann ki’n elwannyen avek kongregasyon? Nou tou, ki swa nou ansyen, pionye, manm fanmir oubyen proklanmater, nou kapab ede rod zot. Eski en manm ou fanmir oubyen en zanmi in elwannyen avek kongregasyon? Eski ou’n zwenn en inaktif ler ou ti pe fer temwannyaz an piblik oubyen pe anons sa bon nouvel kazankaz? Eksplik sa dimoun ki si i ti a kontan ki bann ansyen i vizit li, ou ti pou kontan pour donn son ladres oubyen nimero telefonn avek bann ansyen.

7. Ki ou aprann avek sa ki en ansyen ki apel Thomas ti dir?

⁷ I responsabilite sirtou bann ansyen pour rod bann ki anvi retourn kot Zeova. Thomas * en ansyen ki reste Lespanny, in ed plis ki 40 serviter Zeova pour retourn dan kongregasyon. I dir: “Premyerman, mon demann bann frer ek ser si zot konnen kote bann inaktif i reste. Oubyen mon demann zot si zot rapel okenn dimoun ki nepli asiste bann renyon. Laplipar dimoun dan kongregasyon i kontan pour ede parski zot santi zot konsernen. Apre, ler mon vizit bann frer ek ser inaktif, mon demann zot konsernan zot zanfan ek lezot manm fanmir. Serten sa bann frer ek ser ti abitye anmenn zot zanfan renyon e i kapab ki zot bann zanfan ti bann proklanmater. Nou kapab ed zot bann zanfan osi pour retourn kot Zeova.”

8. Dan sa legzanp garson perdi ki dan Lik 15:17-24, ki mannyer sa papa ti tret son garson ki ti’n repantir?

⁸ Ki serten kalite nou bezwen demontre pour nou kapab ed bann ki anvi retourn kot Zeova? Annou vwar serten leson ki nou aprann dan legzanp Zezi lo sa garson ki ti kit lakour son papa. (Lir Lik 15:17-24.) Zezi i eksplike ki mannyer sa garson ti finalman realize ki son aksyon ti bet e i ti retourn dan lakour kot son papa. Son papa ti taye pour al zwenn li e i ti may li. Sa ti reasir sa garson ki son papa ti kontan li. Sa garson ti annan en konsyans sarze e i ti santi ki i nepli merite ganny konsidere konman garson son papa. I ti devid son leker avek son papa e son papa ti konpran son santiman. Apre, sa papa ti montre ki i ti’n aksepte li kot lakour, pa konman en travayer me konman son garson ki i  kontan. Sa papa ti fer en festen e i ti donn son garson ki ti’n repantir bann zoli lenz.

9. Ki kalite ki nou bezwen demontre pour nou kapab ed bann inaktif retourn kot Zeova? (Vwar bwat “ Lafason nou kapab ed bann ki anvi retourn kot Zeova.”)

⁹ Zeova i parey sa papa dan sa legzanp. I kontan nou bann frer ek ser ki inaktif e i anvi ki zot retourn kot li. Nou kapab ed zot retournen par swiv legzanp Zeova. Nou fer sa ler nou demontre pasyans, lanmour e nou montre ki nou konpran zot santiman. Akoz nou bezwen demontre sa bann kalite e ki mannyer nou kapab fer sa?

10. Akoz nou bezwen demontre pasyans ler nou pe ed en dimoun retourn kot Zeova?

¹⁰ Nou bezwen demontre pasyans akoz i pran letan pour en dimoun retourn kot Zeova. Bokou bann ki ti inaktif i dir ki bann ansyen ek lezot dan kongregasyon ti bezwen vizit zot plizyer fwa avan ki zot ti rekonmans servi Zeova ankor. En ser ki sorti Lazi e ki apel Nancy i dir: “En zanmi pros dan kongregasyon ti ed mwan en kantite. I ti kontan mwan parey son gran ser. I ti fer mwan rapel bann bon moman ki nou ti’n pase ansanm. Avek pasyans, i ti ekout mwan ler mon ti eksprim mon santiman e i pa ti ezite pour donn mwan konsey. I ti montre mwan ki i en bon zanmi ki pare pour ed mwan nenport ler.”

11. Pour nou kapab ed en dimoun ki’n ganny ofanse, akoz nou bezwen konpran son santiman?

¹¹ Ler en dimoun i sagren oubyen ankoler, sa santiman i kapab parey en boubou ki fermal. Ler nou konpran santiman sa  dimoun, sa i parey en latizann ki kapab ed li santi li pli byen. Serten inaktif ti ganny ofanse dan lepase e plizyer lannen apre zot ankor ankoler avek sa dimoun. Akoz sa, zot pa anvi retourn kot Zeova. Serten i kapab panse ki zot in ganny trete dan en fason enzis. I kapab ki zot pou bezwen en dimoun pour ekout zot e konpran zot santiman. (Zak 1:19) María, ki ti inaktif avan, i dir: “Mon ti bezwen en dimoun pour ekout mwan, rekonfort mwan, donn mwan bann bon konsey e ed mwan.”

12. Eksplike ki mannyer lanmour Zeova i parey en lakord?

¹² Labib i dir ki lanmour ki Zeova i annan pour son pep i parey en lakord. Dan ki fason? Annou vwar en legzanp. Meton ou’n tonm dan lanmer. I annan bann gro laroul, delo i fre e ou pe noye. Apre, en dimoun dan en bato ki pre avek ou, i anvoy en zile sovtaz pour ou kapab flote. Ou vreman kontan pour sa, me ou bezwen plis led pour ou kapab sirviv. Ou bezwen sorti dan sa delo. Alor, ou bezwen ki en dimoun i anvoy en lakord pour ou tyonbo e ki i ed ou sorti dan delo. Konsernan bann Izraelit ki ti’n kit li, Zeova ti dir: “Mon ti kontinyen gid zot, avek lakord lanmour.” (Ose. 11:4, NWT) Ozordi, Bondye i ankor santi parey pour bann ki’n aret servi li e ki pe noye oubyen ki’n fatige akoz bann problenm ek lenkyetid. I anvi zot konnen ki i kontan zot e i anvi ed zot retourn kot li. Zeova i kapab servi ou pour demontre son lanmour pour zot.

13. Ki mannyer leksperyans Pablo i montre ki lanmour ki nou demontre i kapab ed lezot retourn kot Zeova?

 ¹³ I enportan pour reasir bann ki inaktif ki Zeova i kontan zot e ki nou osi nou kontan zot. Pablo, ki’n ganny mansyonnen dan sa lartik avan, ti inaktif pour plis ki 30 an. I dir: “En bomaten, ler mon ti pe kit kot mwan, mon ti zwenn en ser aze ki ti koz avek mwan dan en fason zantiy. Mon ti konmans plere parey en zanfan. Mon ti dir li ki i ti konmsi Zeova ti’n anvoy li pour koz avek mwan. I ti sa moman ki mon ti deside pour retourn kot Zeova.”

14. Dapre sa legzanp dan Lik 15:4, 5, ki sa berze ti fer apre ki i ti’n trouv sa mouton perdi?

¹⁴ Nou bezwen kontinyen ed e ankouraz bann ki inaktif apre ki nou trouv zot. Parey sa garson perdi dan legzanp Zezi, i kapab ki zot annan bann douler emosyonnel ki pou pran plizyer lannen pour geri. Osi, vi ki zot ti dan lemonn Satan, i tre probab ki zot nepli annan en bon lanmitye avek Zeova parey avan. Nou bezwen ed zot ranforsi zot lafwa dan Zeova. Dan sa legzanp konsernan mouton perdi, Zezi i dekri lafason ki sa berze ti met sa mouton lo son zepol e anmenn li dan berkay. Sa berze in pas en kantite letan ek lenerzi pour rod sa mouton. Me i realize ki i pou bezwen anmenn sa mouton parski sa mouton napa ase lafors pour li marse ziska kot lezot mouton i ete.​—Lir Lik 15:4, 5.

15. Ki mannyer nou kapab ed bann ki feb ki anvi retourn kot Zeova? (Vwar bwat “ En zouti tre itil.”)

¹⁵ I kapab ki nou pou bezwen pran letan ek lenerzi pour ed enn ki inaktif pour sirmont  son bann febles. Me avek led lespri sen Zeova, Labib e bann piblikasyon ki nou gannyen dan kongregasyon, nou kapab ed zot pour ranforsi zot lanmitye avek Zeova. (Rom. 15:1) Ki mannyer nou kapab fer sa? En ansyen ki annan leksperyans i dir: “Laplipar bann inaktif ki deside pour rekonmans servi Zeova i bezwen fer letid Labib.” * Alor, si ou ganny demande pour fer letid en dimoun ki ti inaktif, aksepte sa privilez si ou kapab. Sa menm ansyen i dir: “Sa proklanmater ki fer letid sa enn ki inaktif i bezwen en bon zanmi pour li. I bezwen en dimoun ki sa inaktif i kapab annan konfyans ladan e ki i kapab fasilman koz avek.”

16. Ki mannyer nou konnen ki bann lanz pou ed nou?

¹⁶ I annan bokou leksperyans ki montre ki bann lanz pe ed nou trouv bann inaktif ki anvi retourn kot Zeova. (Rev. 14:6) Par egzanp, Silvio, en frer inaktif ki sorti Ekwador ti sipliy Zeova pour ed li retourn dan kongregasyon. Anmezir ki i ti pe priye, de ansyen ti ariv kot son lakour. Sa de ansyen ti kontan pour konmans donn li sa led ki i ti bezwen.

17. Ki mannyer nou pou santi si nou ed bann ki inaktif?

¹⁷ Nou pou vreman kontan ler nou ed enn ki inaktif pour retourn kot Zeova. Remarke ki Salvador, en pionye ki fer zefor pour ed bann ki inaktif i dir: “Parfwa mon vin emosyonnel ler mon mazin bann inaktif ki’n retourn kot Zeova. Mon vreman kontan ki mon kapab travay ansanm avek Zeova pour ed enn son bann serviter ki vreman presye, pour sorti dan lemonn Satan e pour retourn dan kongregasyon.”​—Akt 20:35.

18. Si ou inaktif, ki ou kapab asire?

¹⁸ Si ou’n elwannyen avek pep Zeova, ou kapab asire ki i ankor kontan ou. I anvi ki ou retourn kot li. Ou pou bezwen fer zefor pour retourn kot li. Me parey sa papa dan legzanp Zezi, Zeova pe esper ou retourn kot li e i pou kontan pour akeyir ou.