TANE MEKUN 26
“Bëeke Jë Nyipunieti Koi Ni”
‘Bëeke jë nyipunieti koi ni, nge tro ni a bëeke koi nyipunie.’—MAL. 3:7.
NYIMA 102 “Xatuane Jë La Ite Ka Kucakuca”
MEKUN KA TRU *
1. Nemene la aliene hni Iehova ngöne la kola bëeke hmaca hnene la ketre mamoe ka paatr?
HNE së hna ce wang ngöne la tane mekun hnapan ka hape, ceitui Iehova memine la ketre atre thupë mamoe ka thupëne hnyawa la itre mamoe i Nyidrë. Maine kola paatre la ketre, Nyidrëti a canga ithel. Öni Nyidrë kowe la angetre Isaraela ka trotriji Nyidrë: “Hmacaju nyipunie koi ni, nge tro ni a hmaca koi nyipunie.” Caasi palahi la aqane ujë i Nyidrë kowe la itre ka trotriji Nyidrë enehila. Öni Nyidrë: “Tha ka [“saze,” MN] kö ni.” (Mal. 3:6, 7) Öni Iesu ka hape, tru la madrine i Iehova me itre angela ngöne la kola bëeke hmaca hnene la ketre mamoe ka paatr.—Luka 15:10, 32.
2. Nemene la hne së hna troa ce wang ngöne la tane mekun celë?
2 Tro sa ce wang la köni ceitun hna hamën hnei Iesu ka amamane la aqane tro sa xatuane la itre ka trotriji Iehova. Tro fe sa ce wang la itre thiina ka nyipiewekë matre troa atreine xatuane la itre mamoe ka paatr. Tro fe sa ce ithanatane la kepin matre nyipiewekë tro sa xatua angatr.
THELE JË LA “PIES KA PATR”
3-4. Pine nemene matre hnene la föe hna qaja ngöne Luka 15:8-10, hna thele hnyawa la pies ka paatr?
3 Loi e tro sa nue trengecatre matre troa xatuane la itre ka ajane troa bëeke hmaca koi Iehova. Ame ngöne la tusi Luka, hnei Iesu hna hamën la ketre ceitun. Kola qaja la aqane thele hnene la föe la ketre pies sileva hna hape, drakeri. Kola amamane la enyipiewekëne la troa ithele hnyawa.—E jë la Luka 15:8-10.
4 Iesu a amamane la aliene hni ne la föe ngöne la angeic a öhne la pies ka paatr. Ame ngöne lo ijine cili e Iudra, itre thin a hamën la 10 lao pies sileva kowe la nekö i angatr jajiny ka faipoipo. Maine jë, ame la pies hna qaja ngöne la ceitune i Iesu, tre, ketre ahnahna nyine troa hamën. Nge hna mala lai pies, matre eahlo a amelene la laam me ithel. Tha hudrume hnyawa kö la laam matre tha canga öhne kö eahlo la pies. E cili, eahlo a nyihnyawan asë la uma. Öhne ju hi eahlo la pies kola melemel. Drei la madrin ka tru koi eahlo! Eahlo a hëne la itre sinee i eahlo matre ce thawa la madrine i eahlo.
5. Pine nemene matre jol e troa öhne hmaca la itre ka trotrije la ekalesia?
5 Tune la hna amamane hnene la ceitune hna hamën hnei Iesu, loi e tro sa isine matre troa öhne hmaca la ewekë hna aluzin. Ketre tune mina fe, loi e tro sa isin me nue trengecatr matre troa öhne hmaca la itre ka trotrije la ekalesia. Maine jë, nyimu macatre ne tha hane kö angatre sine la itre icasikeu. Maine pena, hnei angatr hna fek kowe la ketre nöj, nge pëkö trejin hnei angatre hna atre e cili. Aja i angatr troa bëeke hmaca koi Iehova. Angatr a ajane troa ce nyihlue i Iehova memine la itre xaa trejin, ngo nyipiewekë troa xatua angatr.
6. Nemene la aqane tro la itre trejin ne la ekalesia a xatuane la itre ka nanazij?
6 Drei la ka ijij troa thele la itre trejin ka nanazij? Ijiji easë asë hi troa ixatua, ene la itre qatre thup, itre pionie, itre ka hetre sinee ka nanazij me itre xaa trejin. Hapeu, hetre sinee i epuni kö ka nanazij? Ame la epuni a cainöj ngöne la itre hnalapa trootro maine ngöne la gaa tru atr, hnei epuni kö hna ithanata memine la ketre trejin ka nanazij? Tro sa qaja koi angeic ka hape, maine angeic a ajane troa wai angeic, ijije hi tro sa hamën kowe la itre qatre thup la adresse maine numero ne mobilisi angeic.
7. Nemene la ini hne së hna xom qa ngöne la hna kuca hnei Thomas, ketre qatre thup?
7 Nemene la aqane tro la itre qatre thup a xatuane la itre ka nanazij troa bëeke hmaca koi Iehova? Hanawang la hna kuca hnei Thomas *, ketre qatre thup ne Espagne. Hnei nyidrëti hna xatuane la 40 lao trejine troa bëeke hmaca koi Iehova. Öni nyidrë: “Ame itre xaa ijin, eni a hnyingëne kowe la itre xaa trejin la hnalapa ne la itre trejin ka nanazij. Maine pena, eni a hnyingë pengöne la itre ka tha hane hmaca kö sine la itre icasikeu. Tru catre la madrine ne la itre trejin ke, angatr a ajane troa xatua ni troa ithel. Nge ame la eni a wange la itre trejin ka nanazij, eni a hnyingë pengöne la itre nekönatr me itre xaa sinee i angatr. Ame la itre xaa nekö i angatr ke, ka hane sine ekö la itre icasikeu me cainöj. Ijije hi troa xatua nyudren troa bëeke hmaca koi Iehova.”
XATUANE JË LA ITRE NEKÖ I IEHOVA TROA BËEKE KOI NYIDRË
8. Ame ngöne la ceitun ne la nekön ka tro ngöne Luka 15:17-24, nemene la aqane ujë ne la kem ngöne la kola bëeke hnene la nekön?
8 Nemene la itre thiina ka nyipiewekë matre troa atreine xatuane la itre ka ajane troa bëeke koi Iehova? Nyimutre la itre ini hne së hna troa xom qa ngöne la ceitune ne la nekön ka tro hna hamën hnei Iesu. (E jë la Luka 15:17-24.) Hnei Iesu hna qaja la kepin matre angeic a bëeke hmaca kowe la keme i angeic. Hnei nyidrëti fe hna qaja la etrune la madrin me ihnimi ne la kem, ngöne la kola nyenyap me idrem memine la nekö i nyidrë. Ngo kola huliwa la mekuthetheu ne la nekön, nge ame koi angeic, tha ijiji angeice kö troa kapa la ihnimi ne la kem. Hnei angeic hna fe la hni angeic koi kem, nge hnei nyidrëti hna utipin me hnimi angeic. Hnene la kem hna amamane laka, tha trenyiwa kö angeic maine hlu ngöne la hnalapa, ngo neköne pe hna hnim. Nge hnei nyidrëti hna kuca la ketre feet me hamë angeic la ketre iheetr ka mingöming.
9. Nemene la itre thiina ka nyipiewekë matre troa atreine xatuane la itre ka nanazij troa bëeke koi Iehova? (Wange ju la hna eköhagen hna hape, “ Aqane Troa Xatuane La Itre Ka Ajane Troa Bëek Koi Iehova.”)
9 Ceitui Iehova memine la kem ngöne la ceitune celë. Nyidrëti a hnim la itre trejin ka nanazij, nge aja i Nyidrëti tro angatr a bëeke hmaca. Maine tro sa nyitipu Iehova, tro hë sa atreine xatua angatr. Celë hi matre, nyipiewekë tro sa atreine itreqe, me utipin, me ihnim. Pine nemene matre ka nyipiewekë la itre thiina cili, nge nemene la aqane tro sa amamane itre ej?
10. Pine nemene matre nyipiewekë troa atreine itreqe matre xatuane la ketre trejin ka nanazij troa bëeke koi Iehova?
10 Tha ka hmaloi kö troa canga bëeke koi Iehova. Celë hi matre loi e tro sa atreine itreqe memine la itre trejin ka nanazij. Önine la itre trejin ka nanazij ka hape, hna anyimua wai angatr hnene la itre qatre thup memine la itre xaa trejin ne la ekalesia. Öni Nancy, ketre trejin qa Asie du Sud-Est: “Hnene la ketre sineeng e hnine la ekalesia hna xatua ni me hnimi ni, matre kösë mamang angeic. Hnei angeic hna amekunë ni lo itre hnei nyio hna kuca. Nge hnei angeic hna drei eni hnyawa me hamë eamo koi ni. Ketre nyipi sinee angeic ka canga xatua ni.”
11. Pine nemene matre nyipiewekë troa utipine la ketre trejin hna akötrën?
11 Ame la atr ka utipin, tre, angeic a trotrohnine la itre xan. Ceitune hi la utipine së memine la trepe ka menyik. Ijije hi troa xatuane la ketre atr ka akötr, me akeukawane la hni angeic. Ame la itre xaa trejin ka nanazij ke, hna akötrë angatr ekö hnene la itre xaa trejin. Angatre palahi a elëhni kowe la itre ka akötrë angatr, matre kola sewe angatr troa canga bëeke koi Iehova. Ame kowe la itre ka nanazij, tha ka meköti kö la hna kuca koi angatr. Celë hi matre, nyipiewekë troa drei angatre hnyawa me trotrohni angatr. (Iako. 1:19) Öni Maria, ketre trejin ekö ka nanazij: “Eni a ajane troa drei ni hnyawa, me aupune la itre treijeng me xatua ni.”
12. Pine nemene matre kola aceitunëne la ihnimi Iehova memine la ketre otretr?
12 Tusi Hmitrötr a aceitunëne la ihnimi Iehova memine la ketre otretr. Pine nemen? Pane mekune jë laka, easa troa nunucil. Easa madrin ke, kola kuiën koi së la ketre bouet. Ngo tha celë kö lai ka troa amele së. Kola hnötr nge ka lepanyi la tim, matre nyipiewekë troa të hune la ketre he. Easa ajane tro la ketre a huli së qa kuhu hnagejë. Celë hi hna kuca hnei Iehova kowe la angetre Isaraela ka trotriji Nyidrë. Öni Nyidrë: “Hnenge hna e nyudeni ngöne la ite [...] eno ne ihnim.” (Hos. 11:4) Ame fe enehila, Iehova a xatuane la itre trejin ka nanazij me ka akötr hnene la itre jol. Aja i Iehova tro angatr a atre la etrune la ihnimi Nyidrëti koi angatr. Iehova fe a ajane tro angatr a bëeke koi Nyidrë. Nge tro fe Iehova a upi së troa amamane la ihnimi Nyidrëti koi angatr.
13. Qaja jë la ketre ceitun ka amamane la enyipiewekëne la ihnimi trejin.
13 Nyipiewekë tro sa amamane kowe la itre ka nanazij laka, Iehova a hnimi angatr nge ketre tu së fe. Ame Pablo, tre, ketre trejin qa Amérique du Sud, nge ka nanazij koi 30 lao macatre. Öni angeic: “Ame la ketre ijin, hnenge hna iöhnyi memine la ketre trejine föe ka qatre hë, nge hnei eahlo hna ithanata amenyikeny koi ni. Hnenge hna treij tune la ketre nekönatr. Öning koi eahlo ka hape, Iehova la ka upi eahlo koi ni. Eni hë e cili a mekun troa bëeke hmaca koi Iehova.”
TROA HNIME LA ITRE TREJIN KA NANAZIJ
14. Thenge la ceitune i Iesu ngöne Luka 15:4, 5, nemene la hna kuca hnene la atre thupë mamoe ngöne la kola öhn la mamoe ka paatr?
14 Thupene la hne së hna wang la itre trejin ka nanazij, loi e tro palahi sa xatua angatr. Maine jë, tru la akötre i angatr tune lo nekön ka tro ngöne la ceitune i Iesu. Hnene laka hna ajolë angatr hnene la fene i Satana, matre angatr a nanazij. Celë hi matre loi e tro sa xatua angatr troa acatrene hmaca la lapaune i angatre koi Iehova. Ame ngöne la ceitune i Iesu ne la mamoe ka paatr, hnene la atre thupë mamoe hna xep acone la neköi mamoe me bëeke sane ej kowe la hnënge mamoe. Hnei angeic hna nue traem me trengecatr matre troa ithel. Trotrohnine hi angeic laka, pëhë trengecatre ne la neköi mamoe, matre nyipiewekë troa xepe ej.—E jë la Luka 15:4, 5.
15. Nemene la aqane tro sa xatuane la ketre trejin ka nanazij troa bëeke koi Iehova? (Wange ju la hna eköhagen hna hape, “ Ketre Jiane Huliwa Ka Lolo Catr.”)
15 Loi e tro sa nue traem me trengecatr matre troa xatuane la ketre trejin ka nanazij. Easa xatua angeic troa atreine cile kowe la nöjei jol ka sewe angeic troa nyihlue i Iehova. Ngo jëne la uati hmitrötre i Akötresie, me Tusi Hmitrötr, memine la itre itus hna hnëkën hnene la organizasio i Iehova, ijije hi tro sa xatua angeic troa acatrene la lapaune i angeic. (Rom. 15:1) Tune kaa? Önine la ketre qatre thup: “Nyipiewekë troa ini Tusi Hmitrötr memine la itre trejin ka ajane troa bëeke koi Iehova.” * Maine kola sipo së troa xatuane la ketre trejin ka nanazij, loi e tro sa kapa madrin. Önine hmaca lai qatre thup: “Loi e tro la trejin ka xatuane lai ka nanazij a ketre nyipi sinee, matre hmaloi koi angeic troa fe la hni angeic.”
MADRIN E KOHO HNENGÖDRAI ME E CELË FEN
16. Nemene la ka amamane laka, kola xatua së hnene la itre angela?
16 Nyimutre la itre tulu ka amamane la ixatua ne la itre angela. Angatr a xatua së troa öhne la itre trejin ka nanazij, ka ajane troa bëeke koi Iehova. (Hna ama. 14:6) Celë hi hna melën hnei Silvio, ketre trejin ka nanazij qa Équateur. Hnei angeic hna thithi iele koi Iehova troa xatua angeic troa bëeke koi Nyidrë. Ame ngöne la angeic a thith, kola fenafena la qëhnelö. Lue qatre thup a traqa troa wai angeic. Madrine catre nyidro troa xatua angeic.
17. Nemene la itre eloin hne së hna kapa ngöne la easa xatuane la itre trejin ka nanazij?
17 Nyimutre la itre eloin hne së hna kapa ngöne la easa xatuane la itre trejin ka nanazij troa bëeke koi Iehova. Hane hi la hna qaja hnei Salvador, ketre pionie ka majemine xatuane la itre trejin ka nanazij. Öni angeic: “Ame itre xaa ijin, eni a treije madrin ke, hnei Iehova thapa la ketre mamoe i Nyidrë qa ngöne la fene i Satana. Nge hna aijijë ni troa ce huliwa me Nyidrë.”—Itre hu. 20:35.
18. Ngacama ka nanazije së, ngo nemene la ka xecie koi së?
18 Ngacama ka nanazije së, ngo Iehova palahi a hnimi së. Aja i Iehova tro sa bëeke koi Nyidrë. Ngo hetre nyine tro sa kuca. Ame pe, xecie koi së laka, ceitui Iehova memine lo kem ngöne la ceitune i Iesu. Nyidrëti a mejiune laka, tro hmaca sa bëeke koi Nyidrë, nge tro kö Nyidrëti a kepe së!
NYIMA 103 Itretre Thupë Mamoe, Itre Atr Nyine Ahnahna
^ Aja i Iehova tro la itre ka nanazij a bëeke hmaca koi Nyidrë. Nyidrëti a hë angatr me hape: “Hmacaju nyipunie koi ni.” Nyipiewekë tro sa ithuecatre kowe la itre ka kapa la ihë celë. Ame ngöne la tane mekun celë, tro sa ce wang la aqane tro sa xatua angatr.
^ Hna saze la itre ëj.
^ Loi e tro sa ce wang memine la trejin ka nanazij, la itre tane mekun ngöne la itus hna hape, Ihnimi Akötresie maine Approchez-vous de Jéhovah. Tro pë hë la itre qatre thup a iëne la ka troa ini tusi me angeic.
^ ITRE IATR: Köni trejin a xatuane la ketre trejin ka nanazij troa bëeke koi Iehova. Angatr a hë angeic, me hnimi angeic, me utipin me drei angeic.
