1. Fa Yehofa e fii te wan sama di á be e dini en moo daai kon neen baka?

ENKE fa u be luku aini a artikel di pasa, da Yehofa e maiki enseefi anga wan sikapuman di e luku den sikapu fi en bun. Te wan sikapu fi en lasi ai go suku en tu. Yehofa be taigi den Islayelisama di á be e dini en moo taki: ‘U daai kon a mi baka, da miseefi o daai kon a u.’ Na aseefi fasi Yehofa e denki ete, bika enseefi be taki: ‘Mi nai kengi’ (Male. 3:6, 7). Yesesi be taki ná pikin piisii Yehofa anga den engel e piisii te wan fu den sama di be gwe fika Yehofa daai kon baka.​—Luk. 15:10, 32.

2. San wi o luku aini a artikel ya?

² Wi o luku dii ageisitoli fu Yesesi di e soi fa u sa yeepi wan sama di nai dini Yehofa moo. Wi o luku tu sowtu manii u mu abi fu man yeepi wan sama di be gwe fika Yehofa fu daai kon neen baka. Boiti dati, wi o si taki useefi o piisii te wi e yeepi sama fu kon dini Yehofa baka.

3-4. Saide a uman di kai aini a ageisitoli fu Lukasi 15:8-10 meke moiti fu fende a solufu moni fi en di be lasi?

³ Efu u wani yeepi den sama di gwe fika Yehofa, wi abi fu meke taanga moiti. Aini wan ageisitoli di sikiifi aini a Beibel buku Lukasi, Yesesi e taki fu wan uman di e suku wan solufu moni fi en di be lasi. A moni ya a be gaan moni aini a ten de. A ageisitoli ya e soi taki ná pikin moiti a uman ya meke fu fende a moni fi en baka.​—Leisi Lukasi 15:8-10.

 ⁴ Yesesi e soi fa a uman ya be fii di a fende a moni fi en. Aini a ten fu Yesesi son mma be e gi den umanpikin fu den tin solufu moni te den be o toow. Kande a uman ya be lasi wan fu den tin solufu moni di a be mu gi a umanpikin fi en. A uman be sabi taki aini a osu a moni kai, neen meke a leti wan faya neen a bigin suku en. Kande a faya di a be leti á be e kiin sai fu si a pikin solufu moni ya. A di a sibi a osu fosi neen a si a moni. Ná pikin poolo a poolo di a fende en. A kai den mati anga den sama di be e tan koosube fi en fu kon poolo anga en.

5. Saide a á makiliki ala yuu fu fende den sama di nai kon a komakandaa moo?

⁵ A ageisitoli ya e soi taki te wan sani fu u lasi a bunbun moiti u mu meke fu fende en baka. A letiso u mu meke moiti fu yeepi den sama di nai kon a den komakandaa moo, efuso di nai peleiki moo fu daai kon a Yehofa baka. Kande a omen yali den sama ya gwe fika Yehofa kaba. Kande den foloisi go tan a wan peesi pe den baala anga sisa di e tan ape á sabi den. Nownow a omen sama di be gwe fika Yehofa wani daai kon baka. Den wani kon dini Yehofa baka makandaa anga den baala anga sisa fu den, ma den abi yeepi fanowdu.

6. Fa ala sama aini a kemeente sa yeepi suku den sama di nai kon a komakandaa moo?

⁶ Sama sa yeepi suku den sama di nai kon a komakandaa moo? Na ala u sa du a sani ya, owluman, pionili, famii anga peleikiman. Yu abi wan mati efuso wan famii di nai kon a den komakandaa moo? I miti wan fu den baala efuso sisa ya di i be e peleiki osu fu osu efuso di i be e peleiki anga a pikin wagi? Kande a sama ya taigi i pe ai tan efuso kande a gi yu en telefon nombuu. I sa akisi en efu den owluman sa kon luku en a osu.

7. San den sani di Thomas taki e leli u?

⁷ Fa owluman sa yeepi den sama di wani daai kon a Yehofa baka? Wan owluman den e kai Thomas * di e tan a Sipanyookondee yeepi moo enke 40 Kotoigi fu daai kon a Yehofa baka. A baala ya taki: ‘A fosi sani di mi e du na akisi mi e akisi baala anga sisa efu den sabi pe sama e tan di nai kon a komakandaa moo. A omen fu den baala anga sisa ya e poolo taki den sa yeepi den sama ya. Bakaten te mi e go luku den sama di á be e dini Yehofa moo, mi e akisi den fa ai go anga den pikin fu den anga den taa famii fu den. Son wan fu den be e tyai den pikin kon a komakandaa. Kande den pikin ya be toon peleikiman kaba. U sa yeepi den pikin ya tu fu daai kon a Yehofa baka.’

8. San a dda di kai aini a ageisitoli di sikiifi a Lukasi 15:17-24 du gi a boi fi en di a daai kon a osu baka?

⁸ Sowtu manii u mu abi fu man yeepi den sama di wani daai kon a Yehofa baka? Luku san u sa leli fu a ageisitoli fu a lasi manpikin. (Leisi Lukasi 15:17-24.) Yesesi taki a boi ya kisi enseefi neen a daai go a osu baka. A dda lon go miti a boi fi en a pasi neen a baasa en fu soi en taki a lobi en. Ma a boi ya kosensi be e fon mi en ete. A be e fii enke a á bun moo seefi fi en dda kai en en pikin moo. A dda meke moiti fu soi a boi fi en taki a piisii taki a daai kon a osu baka. A boi ya taigi en dda fa a be e fii. A dda soi en taki  a á be e si en enke wan saafu, ma enke en boi di a lobi. Neen meke a seeka wan fesa gi en, neen a gi a boi fi en di be soi taki a sani di a du be hati en moin koosi fu wei.

9. Sowtu manii u mu abi efu u wani yeepi sama fu daai kon a Yehofa baka? (Luku a faki ‘ Fa u sa yeepi den sama di wani daai kon a Yehofa baka?’)

⁹ Yehofa de enke a dda aini a ageisitoli ya. A wani den baala anga sisa di nai kon a komakandaa moo daai kon neen baka, bika a lobi den. Useefi mu waka a Yehofa baka. U wani yeepi den baala anga sisa ya fu daai kon a Yehofa baka. Ma efu u wani du a sani ya u mu abi pasensi, tyali-ati anga lobi. Saide u mu abi den manii ya? Fa u sa soi taki wi abi den manii ya?

10. Saide u mu abi pasensi fu man yeepi wan sama fu kon dini Yehofa baka?

¹⁰ Ai teke ten fu yeepi wan sama fu kon dini Yehofa baka. Neen meke u mu abi pasensi. Omen fu den sama di á be e dini Yehofa moo, taki a omen leisi owluman anga taa sama aini a kemeente be kon luku den fosi den bigin go a komakandaa baka. Wan sisa fu Asiya di den e kai Nancy taki: ‘Ná pikin yeepi wan bun mati fu mi aini a kemeente yeepi mi. A be e si mi enke en gaan sisa, a be lobi mi, a be e meke mi pakisei den bun ten di u be de makandaa. A be e aliki anga pasensi te mi be e taigi en fa mi e fii. A á be e feele fu poti mi a pasi tu. En a be wan tuutuu mati. Ala yuu a be de kabakaba fu yeepi mi.’

11. Saide u mu abi tyali-ati efu u wani yeepi wan sama di mandii gwe fika Yehofa?

¹¹ Te yu e soi tyali-ati gi wan sama, da a leti enke yu e deesi wan soo. Son sama  ati boon fu di wan sama be du wan sani anga en omen yali pasa. Na a sani de meke den nai kon a den komakandaa moo. Fu di den e fii enke taawan á libi bun anga den, meke den abi wan sama fanowdu di o aliki den, anga di o fusutan fa den e fii tuutuu (Yak. 1:19). María di á be e go a komakandaa wan hii pisiten moo taki: ‘Mi be abi wan sama fanowdu di be o aliki mi, di be o toosutu mi, di be o yeepi mi, anga di be o poti mi a pasi te a de fanowdu.’

12. Fa a lobi fu Yehofa de enke wan tetei?

¹² Beibel e maiki a lobi di Yehofa lobi a foluku fi en anga wan tetei. Fa a lobi fu Yehofa de enke wan tetei? Meke u taki i sungu, a wataa e seke, ná pikin koo a wataa koo tu. Yu e feti fi yu á dede a wataa. Efu wan sama aini wan boto iti wan agubalin gi i, yu o poolo. Ma dati wawan á sai fu meke i tan a libi. Yu abi fu komoto aini a wataa. Den sama aini a boto mu iti wan tetei gi i, da den hali i kon aini a boto. Yehofa be taki fu den Islayelisama di á be e dini en moo taki: ‘Anga tetei fu lobi mi be e tyai den’ (Hos. 11:4). Na aseefi fasi Yehofa e fii gi den sama aini a ten ya di nai dini en moo. Den sama ya lai booko-ede. Yehofa wani den sabi taki a lobi den. A wani yeepi den fu daai kon neen baka. Yehofa sa koboloiki u fu soi den sama ya taki a lobi den.

13. Gi wan ondoofenitoli di e soi taki a lobi di wi e soi gi taawan sa yeepi den fu daai kon a Yehofa baka.

¹³ A pelensipali fu e taigi den sama di nai kon a komakandaa moo taki Yehofa  lobi den ete. Useefi lobi den tu. A 30 yali langa Pablo, wan baala di e tan a Zuid-Ameekan á be go a den komakandaa. A taki: ‘Wan mamanten di mi komoto a osu, neen mi miti wan gaandi sisa. A taki switi anga mi. Di a du a sani ya, mi bigin kee enke wan pikinnengee. Mi taigi en taki a gei a Yehofa seefi sende en fu taki anga mi. Na a sani de yeepi mi fu daai kon a Yehofa baka.’

14. San a sikapuman aini a ageisitoli aini Lukasi 15:4, 5 du di a fende a sikapu di be lasi?

¹⁴ Te u miti wan sama di be gwe fika Yehofa, u mu tan meke moiti fu yeepi en. U mu tan gi en taanga-sikin tu. Leti enke a lasi manpikin aini a ageisitoli fu Yesesi, a so omen sani miti den sama ya. A o teke ten fu den kisi denseefi baka. Boiti dati, fu di den be de aini a goontapu fu Saatan meke den mu meke moiti fu den anga Yehofa toon mati baka. U mu yeepi den tu fu den biibi taanga baka. Aini a ageisitoli fu a sikapu di be lasi, Yesesi e taigi u fa a sikapuman poti a sikapu neen sikoo, neen a tyai en go a pe den taa sikapu de. A bunbun moiti a sikapuman be meke fu fende a sikapu ya. Ma di a fende en kaba, a fusutan taki a abi fu diki en tyai go a pe den taa sikapu de, bika a ná abi a kaakiti fi enseefi waka doo den taawan.​—Leisi Lukasi 15:4, 5.

15. Fa u sa yeepi den sama di daai kon a Yehofa baka? (Luku a faki ‘ Wan bun wookosani.’)

¹⁵ A bunbun moiti u mu meke fu man yeepi wan sama di abi wan polobelema di e meke a taanga gi en fu daai kon a  Yehofa baka. Ma anga yeepi fu a santa yeye, Beibel, anga den buku fu a olikanisâsi, u sa yeepi en fi en anga Yehofa toon mati baka (Rom. 15:1). Fa u mu du a sani ya? Wan owluman di abi ondoofeni taki: ‘A omen fu den sama di be gwe fika Yehofa mu sutudeli Beibel baka.’ * Neen meke efu wan owluman akisi i fu sutudeli anga wan sama di daai kon dini Yehofa baka, da gaantangi, efi i poi, yeepi en. A owluman ya e taki: ‘A peleikiman di e sutudeli anga a sama ya mu meke moiti fu toon wan mati fi en. A so a sama o fitoow en. A o go e taigi en fa ai fii tu.’

16. Fa u du sabi taki den engel e yeepi u?

¹⁶ A omen ondoofenitoli e soi taki den engel e yeepi u fu fende den sama di wani daai kon a Yehofa baka (Openb. 14:6). Luku a toli fu Silvio di e tan a Ekwador. A be e begi Yehofa fu sende wan sama fu yeepi en fu daai kon neen baka. Fosi a kaba begi, neen tu owluman koko neen doo. Anga ala piisii den baala yeepi en fu daai kon a Yehofa baka.

17. Fa wi e fii te wi e yeepi sama fu daai kon a Yehofa baka?

¹⁷ Ná pikin piisii wi e piisii te wi e yeepi sama fu kon dini Yehofa baka. Wan pionili baala di e meke moiti fu du a sani ya taki: ‘Te mi e pakisei den sama di daai kon a Yehofa baka, da mi mu holi miseefi fu mi á kee. Mi e piisii taki mi sa wooko makandaa anga Yehofa fu yeepi den lasi sikapu fi en fu kon aini a kemeente baka.’​—Toli 20:35.

18. San yu á mu feegete efi yu a wan sama di nai kon a den komakandaa moo?

¹⁸ Efi yu a wan sama di nai kon a den komakandaa moo, ná feegete taki Yehofa lobi yu ete. A wani i daai kon neen baka. Ma i mu meke taanga moiti fu man du a sani ya. Leti enke a dda aini a ageisitoli fu Yesesi, a so Yehofa e wakiti a dei di yu o daai kon neen baka. A o piisii taki i kon aini en osu baka.