AWTIK POU ÉTIDYÉ 26
« Viré owa an mwen »
« Viré owa an mwen, é mwen an ké viré owa a zòt » (MAL. 3:7).
KANTIK 102 « Venons en aide aux faibles »
ON TI LIDÉ ASI SA NOU KAY VWÈ *
1. Ka Jéova ka rèsanti lèwvwè on timouton ki té pèd ka wouviré owa a-y ?
SIMENN pasé, nou vwè kè Jéova limenm a-y ka konparé-y èvè on bon bèwjé ki ka pran swen a chak timouton a-y èvè lanmou. É siwvwè yonn pèd, i k’ay gadé la i ka touvé-y. Lè sé Izraélit-la lagé-y, mi sa i di-yo : « Viré owa an mwen, é mwen an ké viré owa a zòt. » Jòdijou osi, ni onpakèt moun ki lagé Jéova é nou sav byen kè Jéova ka fè-yo menm envitasyon-la pas limenm ka di : « An pa’a chanjé » (Mal. 3:6, 7). Jézi di kè Jéova é sé zanj-la ka kontan toubònman lèwvwè onsèl timouton ki té pèd ka wouviré owa Bondyé (Lik 15:10, 32).
2. Ka nou ké vwè adan awtik-lasa ?
2 An-nou ègzaminé 3 ègzanp kè Jézi pran é ki ka montré kijan nou pé édé moun ki pa’a maché èvè Jéova ankò. Nou ké palé dè déotwa kalité nou bizwen pou édé sé timouton-la ki pèd la wouvin owa Jéova. É nou ké vwè kè si nou ka édé sé inaktif-la wouviré, sa ké mété onlo jwa an tchè an nou.
CHÈCHÉ PYÈS-MONNÉ LA KI PÈD LA
3-4. Sèlon Lik 15:8-10, poukwa madanm-la ka fè tousa i pé pou chèché pyès-monné la i pèd la ?
3 Fò-nou fè onpakèt éfò pou nou pé sa touvé toutmoun ki vé wouvin owa Jéova. Adan on ègzanp nou ka touvé an Lik, Jézi ka palé dè on madanm ki pèd on pyès-monné ki ni onlo valè. Yo ka kriyé pyès-monné lasa drakm. Ègzanp-lasa ka aprann-nou kè menmsi sa rèd, sa enpòwtan kè nou kontinyé chèché (li Lik 15:8-10).
4 Jézi ka èspliké sa madanm-la ka rèsanti lèwvwè i ka touvé pyès-monné la i té ka chèché la. An tan a Jézi, lè on fi izraélit té ka mayé, souvantfwa, manman-y té ka ba-y 10 drakm. Adan ègzanp-la Jézi pran la, pétèt kè pyès-monné la madanm-la té ka chèché la té ni onlo enpòwtans pou-y pas i té ka fè pawti a sé 10 pyès-la manman-y té ba-y la. Pou madanm-la, pyès-la tonbé atè-la, sé pousa i ka limé on lanp é i ka gadé toupatou. Men i pa’a vwè-y ponkoté : lanp a luil a-y pa’a kléré asé fò pou i pé sa vwè ti pyès an awjan lasa. Anfinaldikont, i ka pran tan a-y pou baléyé tout kaz-la. É ka i ka vwè ka gadé-y an pousyè-la ? Ti pyès-la i ka chèché la é kè i pé pa pi enmé ki sa ! Pyès-la ka kléré anba limyè a lanp-la. A pa ti soulajé madanm-la soulajé ! Tèlman i kontan, i ka kriyé zanmi a-y é vwazin a-y pou di-yo sa.
5. Pou touvé séla ki lagé lasanblé lokal la sa pa oblijé fasil. Poukwa ?
5 Adan ègzanp a Jézi, nou ka aprann kè lè nou pèd on biten, fò-nou fè onpakèt éfò pou nou touvé-y. Menmjan-la, dépawfwa, fò-nou fè onlo éfò pou nou touvé moun ki lagé lasanblé lokal la. Pétèt sa ja ka fè plizyè lanné kè yo pa’a maché èvè pèp a Bondyé ankò. Pétèt osi, kè yo déménajé é kè la yo ka rété konnyéla la, pa ni pon frè é sè ki konnèt-yo. Men nou sèten kè alèkilé, ni onlo frè é sè inaktif ki anvi viré owa Jéova. Yo anvi woukoumansé sèvi Jéova èvè frè é sè a yo, men si nou pa’a édé-yo yo pé’é rivé fè sa.
6. Chakmoun adan lasanblé-la pé jouwé on wòl pou touvé frè é sè ki inaktif. Kijan yo pé fè sa ?
6 Kimoun ki dwètèt ay chèché frè é sè ki inaktif ? Toutmoun an lasanblé-la pé bay on pal adan travay-lasa : sé ansyen-la, sé pyonyé-la, moun fanmi a yo inaktif, é tout sélézòt pwoklamatè-la. Ès ou jwenn on frè oben on sè ki inaktif pannan ou té ka préché dè kaz-an-kaz oben pannan ou té ka fè prézantwa ? Ou pé di-y kè si i dakò, ou ké kontan ba ansyen a lasanblé lokal a-w adrès a-y é niméwo téléfòn a-y pou yo pasé vwè-y.
7. Lè ou ka gadé sa on ansyen non a-y sé Thomas fè, ka sa aprann-vou ?
7 Sé ansyen-la ni on gwo rèsponsabilité. Fò-yo touvé moun ki inaktif é ki vé viré an bra a Jéova. Kijan yo pé fè sa ? Thomas *, sé on ansyen ki ka viv an Èspagn. Grasa-y, ni plis ki 40 Témwen ki woukoumansé frékanté lasanblé-la. Gadé kijan i ka fè : « Pawfwa, pou an sav ola an pé touvé on frè oben on sè ki inaktif, an ka mandé sé frè é sè la. Konsa, sa pi fasil dè ni enfòwmasyon-la. Délè, an ka mandé sé pwoklamatè-la si yo konnèt on moun ki pa’a vin réinyon ankò. An jénéral, sé frè é sè la ka byen kontan lè ou ka mandé-yo sa pas yo ni lenprésyon kè yo ka chèché ansanm èvè-w. É apré, lè an k’ay vwè sé inaktif-la, an ka pran nouvèl a timoun a yo é ta fanmi a yo osi. Pawmi yo, ni déotwa ki té ka vin èvè timoun a yo lasal é pétèt kè sé timoun-lasa té pwoklamatè a épòk-lasa. Yo osi, nou pé édé-yo wouvin an bra a Jéova. »
ÉDÉ GASON A JÉOVA É FI A-Y WOUVIN AN BRA A-Y
8. Lik 15:17-24 ka palé dè on gason ki té pran mové chimen, kijan pap’a-y aji èvè-y lè tiboug-la viré an kaz-la ?
8 Pou nou édé moun ki vé wouvin owa Jéova, ki kalité pou nou ni ? Jézi pran ègzanp a on gason ki té pran on mové chimen. Ègzanp-lasa pé aprann-nou onlo biten (li Lik 15:17-24). Jézi èspliké kè tiboug-la rann-li kont kè sa i té fè la sé on biten ki té sòt é i viré aka pap’a-y. Aprésa, Jézi ka ajouté kè lè papa tiboug-la vwè-y, i kouri ay jwenn-li é i séré-y an 2 bra a-y pou montré-y kè i enmé-y. Konsyans a tiboug-la té ka bat-li é i té ka èstimé kè i pa té gason a pap’a-y ankò. I di pap’a-y sa i té ka rèsanti é pap’a-y touvé-y ni konpasyon pou-y. Papa-la fè sèwten biten pou montré tiboug-la kè i kontan vwè-y viré akaz a-y. I pa aji èvè-y konsi sé té on sèwvitè men i montré tigason a-y kè i enmé-y. É, pou i té montré tiboug-la jan i té ka aprésyé-y i fè-yo pòté bèl lenj pou-y é i fè on gran bwè-é-manjé ba-y.
9. Ki kalité pou nou ni si nou vé édé frè é sè an nou ki inaktif viré an 2 bra a Jéova ? (gadé ti karé-la « Ka nou pé fè pou édé moun ki vé wouvin owa Jéova »).
9 Jéova kon papa-la ki adan ègzanp-la nou sòti vwè la. I enmé frè é sè an nou ki inaktif é i vé yo viré an 2 bra a-y. Si nou ka imité Jéova, nou ké pé édé-yo fè sa. Pousa, fò nou ké aji èvè pasyans, èvè konpasyon, èvè mizérikòd é èvè lanmou. Poukwa sé sé kalité-lasa nou bizwen, é kijan nou ka montré kè nou ni yo ?
10. Lèwvwè nou vé édé on moun wouvin owa Jéova, poukwa fò-nou pran pasyans èvè-y ?
10 Pou on moun viré owa Jéova, sa pé rivé a pran on ti tan. Kifè, fò nou pran pasyans èvè on moun ki anvi wouvin an bra a Jéova. Onlo pwoklamatè ki té inaktif ka di kè fò sé ansyen-la é sélézòt frè é sè la té wouvin vwè-yo a plizyè rèpriz avan yo té woukoumansé sèvi Jéova. Mi sa Nancy, on sè ki ka viv an Azi ékri : « Adan lasanblé-la, an té ni on bon bon zanmi ki édé-mwen onlo menm. I té ka konsidéré-mwen kon ti sè a-y. I té ka fè-mwen sonjé onlo bèl moman kè nou ni lokazyon pasé ansanm. I té ka kouté-mwen èvè onlo pasyans lèwvwè an té ka di-y sa an té ka rèsanti é i pa té pè ban-mwen konsèy. An pé di sé té on vré zanmi menm ! I té toujou paré pou édé-mwen. »
11. Si nou vé édé on moun tchè a-y an bobo, poukwa fò nou aji èvè konpasyon ?
11 Lè on moun ni konpasyon, i ka rivé rèsanti sa lézòt ka rèsanti. Lè nou ka aji èvè konpasyon épi on moun tchè a-y an bobo pas yo fè-y soufè, sé konsi sé on ti pomad nou ka pasé asi-y pou kalmé doulè a-y. Sèwten pwoklamatè inaktif dépi plizyè lanné pas on moun an lasanblé-la fè-yo on biten. Jousalè, yo ni moun-lasa si tchè é sa ka anpéché-yo viré owa Jéova. Pétèt sèwten ni lenprésyon kè yo aji èvè yo on mannyè ki pa jis. Si sé sa, yo té’é byen bizwen on moun pran tan kouté-yo é mété-y an plas a yo (Jak 1:19). María, sé on sè ki rété inaktif pannan on bon moman. Mi sa i ka di : « An té bizwen on moun pou kouté-mwen, pou konsolé-mwen, pou ankourajé-mwen é pou ban-mwen on konsèy. »
12. An ki sans nou pé di kè lanmou a Bondyé ka touvé-y kon on kòd ?
12 Labib ka di kè Jéova enmé pèp a-y é kè lanmou-lasa ka touvé-y kon on kòd oben on kòdon. An ki sans ? An-nou pran on ègzanp : Imajiné kè ou an lanmè. Lanmè-la mové é ou ka santi ou k’ay néyé. Lèwgadé, on moun ka voyé on boué ba-w. Ou ké kontan toubònman pas sa pé sové vi a-w. Men a pa pas ou ni boué-la ou ké rété vivan piskè dlo-la glasé. Ou pé’é sové touttan ou pa monté òbò on kannòt. Kifè, fò on moun voyé on kòd ba-w é fò i halé-w owa kannòt-la. Lè sé Izraélit-la arété maché èvè-y, mi sa Jéova di : « An kontinyé halé-yo èvè [...] kòd a lanmou » (Ozé 11:4). Jòdijou, Jéova ka aji menmjan-la èvè moun ki arété sèvi-y, ki angwasé é ki ka néyé anba pwoblèm. I vé kè yo mèt an tèt a yo kè i enmé-yo. I vé édé-yo wouvin owa a-y. É i pé sèvi èvè-w pou fè-yo santi kè i enmé-yo.
13. Bay on ègzanp ki ka montré kè si nou enmé frè é sè an nou sa pé édé-yo wouvin owa Jéova.
13 Fò nou fè frè é sè an nou ki inaktif sav kè Jéova enmé-yo é kè nou enmé-yo osi. Adan awtik a simenn pasé, nou palé dè Pablo ki rété inaktif pannan plis ki 30 an. Mi sa i di : « On jou maten, pannan an té ka sòti akaz, an jwenn on sè ki té ja ni on bèl laj. I té dous é lè i palé ban-mwen, an santi i enmé-mwen. An mèt-mwen ka pléré kon timoun. An té ni lenprésyon kè sé Jéova ki té voyé-y palé ban-mwen. An té oblijé di-y sa. Sé a moman-lasa an désidé wouvin an bra a Jéova. »
AJI ÈVÈ LANMOU ÉPI MOUN KI FÈB
14. Adan ègzanp-la ki an Lik 15:4, 5 la, ka bèwjé-la té ka fè lè i té ka touvé timouton-la ki té pèd la ?
14 Lè nou touvé on moun ki inaktif, fò-nou kontinyé soutyenn-li. Pétèt tchè a yo an bobo menmjan ki tiboug-la adan ègzanp a gason-la ki té pran mové chimen-la. Èvè tousa yo viv an mond a Satan, pétèt kè yo pa bon zanmi èvè Jéova ankò. Kifè, fò-nou édé-yo konsolidé fwa a yo. Adan ègzanp a timouton-la ki té pèd la, Jézi ka di kè bèwjé-la ka mèt ti bèt-la asi zépòl a-y é i ka menné-y viré an twoupo-la. I ja pasé bon enpé tan ka chèché-y é i fè onlo éfò pou touvé-y. Men i sav kè ti bèt-la bizwen yo édé-y. I pa ni asé fòs pou i maché tousèl a-y pou i ay jwenn twoupo-la. Sé pousa bèwjé-la ka chayé-y pou menné-y viré (li Lik 15:4, 5).
15. Ka nou pé fè pou édé on frè oben on sè ki fèb wouvin an bra a Jéova ? (gadé ti karé-la « On zouti-filé »).
15 Pétèt kè sa ké pran-nou onlo tan é fò-nou ké fè onlo éfò pou édé frè é sè an nou ki inaktif rivé about a difikilté ki ka anpéché-yo sèvi Jéova. Men grasa lèspri sen a Bondyé, grasa Pawòl a-y é grasa sé piblikasyon-la lòwganizasyon ka ban-nou la, nou pé édé-y wouvin bon bon zanmi èvè Bondyé (Wom. 15:1). Kijan nou pé fè sa ? Mi sa on ansyen ki ni èkspéryans ka di : « Byensouvan, frè é sè ki inaktif ki vé woukoumansé sèvi Jéova bizwen on moun étidyé Labib èvè-yo *. » Sé pousa, si sé ansyen-la ka mandé-w édé on frè oben on sè ki inaktif, aksèpté privilèj-lasa èvè onlo jwa. Mi sa ansyen-la ka ajouté : « Fò pwoklamatè-la ki ka fè étid-la vin zanmi èvè inaktif-la, konsa, inaktif-la ké pé fè-y konfyans é i ké pé wouvè tchè a-y ba-y. »
AN SYÈL-LA É ASI LATÈ, TOUTMOUN KONTAN
16. Kijan nou fè sav kè sé zanj-la pé édé-nou ?
16 Ni onlo ègzanp ki ka montré kè sé zanj-la ka édé-nou touvé frè é sè an nou ki inaktif é ki vé wouvin an bra a Jéova (Rév. 14:6). Pa ègzanp, Sylvio, sé on frè ki té inaktif é ki ka viv an Ékwatè. On jou, i sipliyé Jéova pou i pé sa voyé on moun pou édé-y viré an lasanblé-la. I poto’o menm fin priyé, i tann yo ka sonné akaz a-y. Lèwgadé sé 2 ansyen ki té douvan pòt a-y. Yo té kontan toubònman pas tousuit yo koumansé édé-y wouvin an bra a Jéova.
17. Ka nou ké rèsanti si nou édé on moun ki inaktif ?
17 Nou ké kontan toubònman si nou édé on inaktif wouvin an bra a Jéova ! Salvador sé on pyonyé ki ka fè bon éfò pou édé frè é sè ki inaktif. Mi sa i ka rèsanti : « Défwa, tèlman an kontan, an pé pa anpéché dlo vin an zyé an mwen. A pa ti kontan an kontan travay èvè Jéova pou édé on timouton a-y sòti an mond a Satan é viré an 2 bra a-y ! » (Akt 20:35).
18. Si ou inaktif, dè ki biten ou pé sèten ?
18 Si ou inaktif konnyéla, sav kè Jéova enmé-w toujou ! Mèt sa fon an tèt a-w ! I vé ou viré an 2 bra a-y ! Pou ou rivé fè sa, ou ni sèwten biten pou ou fè. Men kon papa-la ki adan ègzanp-la Jézi pran la, Jéova ka véyé si ou ka viré pou i pé sa akéyi-w bra gran wouvè !
KANTIK 103 Les bergers, des dons de Dieu
^ par. 5 Jéova té’é vé kè moun ki pa’a vin lasal ankò viré an 2 bra a-y. Mi sa i ka ankourajé-yo fè : « Viré owa an mwen. » Ni onlo biten nou pé fè pou ankourajé frè é sè an nou ki inaktif. Adan awtik-lasa nou ké vwè ka nou pé fè pou édé-yo.
^ par. 7 Yo chanjé sèwten non adan awtik-lasa.
^ par. 15 Pou édé on moun ki inaktif nou pé étidyé déotwa chapit a sé liv-lasa èvè-y : Restez dans l’amour de Dieu oben Approchez-vous de Jéhovah. Sé komité a sèwvis a lasanblé lokal la ki ké désidé kimoun ki ké fè étid-la.
^ par. 68 SA NOU KA VWÈ ASI SÉ IMAJ-LA : Si chak imaj, ni on frè diféran ki ka édé on frè ki inaktif ki anvi wouvin an lasanblé-la. Yo ka rété an kontak èvè frè-la, yo ka fè-y santi kè yo enmé-y é yo ka pran tan kouté-y byen.
