1. Gurhe Yehova anachiyunva amango muguma w’omubantu bage amashuba kuhwanza kumukolera?

NK’OKU rhwanabonaga omu mwazi gwa geraga, Yehova achishushanyize n’omungeri mwinja onashishikala buli ntama yage. Analonza na buli yoshi yaherere. Yehova alibwirire Abaizraeli bachikulaga kuye intya: “Mungalukire, nani nabagalukira.” Rhuyinji oku oko kon’okola ku anachichiyunva bulala aderhere: “Intahindamuka.” (Mal. 3:6, 7) Yesu aliderhere oku Yehova na ba malaika banasima bwenene amango muguma w’omu bakozi Bage wali waherere amashuba kumugalukira.​—Lu. 15:10, 32.

2. Bichi rhwaganirako mu gunola mwazi?

² Leka rhulole mifano esharhu omu mifano ya Yesu ekazize okurhabala balala bachihenwire ku Yehova. Rhwaganira ku ngeso ziguma za ngombwa yi rhugala kurhabala entama zaherere zigalukire Yehova. Kandi rhwalola bulagurhe birhumere rhuchihangane kangana ahola omu kurhabala abazamba.

3-4. Charhumaga omukazi oderherwe omu Luka 15:8-10, alonza-lonza echicheri chage chaheraga?

³ Birhuhemere rhuchihangane bwenene yi rhubona abalonzeze bagalukire Yehova. Omu chigereranyo chili omu injili ya Luka, Yesu afasiriye gurhe omukazi analonza echicheri ch’akachiro chiyirikirwe drakma chakaba chamuherere. Echola chigereranyo chilonzeze kuyerekana ahanene okuntu oyula mukazi alichihanganire kuchilonza.​—Osome Luka 15:8-10.

⁴ Yesu afasiriye gurhe omukazi alichiyunvirhe amango abonaga echola chicheri ch’akachiro chabaga chaherere. Omu siku za Yesu, bishushire oku bakazi baguma ba Bayahudi bagendaga baha omunyere bicheri ekumi by’edrakma olusiku l’okushabwa kwage. Inkabaga echola chicheri chaliri chiguma mw’ebyola nyina amuhaga. Oyola mukazi alibere amenyere oku nya chicheri  nyine omunju mu chanarhogere. Nantyo akoleza etara n’okulola eyi n’eyi aliko arhachibonaga. Etara lyage lyakaba eyi lirhaliherhe omwangaza gutosheze okuderha mpu abone echola chicheri chityuli che arja. Buzinda, abiza enju yage yoshi. Lolaga lero, mu obola buchafu alundire mw’omuli echola chicheri chage ch’akachiro, omwangaza gw’etara lyage yigwachikolezako chananyenyeza. Chirhulirizo chinene wa! Arhali ntyo si? Ahamagala bera bage n’abaturanyi bage haguma ababwira kw’eyola myazi y’obuholo.

5. Bulagurhe byakaba bikomere okupata abachihenwire oku chibaga?

⁵ Nk’okurhubwene omu chigereranyo cha Yesu, birholere akasanzi okuderha oku omuntu abone echintu chaherere. Konakuguma n’okulonza abachihenwire oku chibaga. Birhuhemere rhukole n’obushiru yi rhubabona. Emyaka minene yakaba eyi yamagera gurhenga bachirhuhenwireko. Bakaba eyi bahamire n’emunda bene-berhu barhabamenyere. Aliko omu mango mali nk’amola, baguma mw’abola baholere bakaba eyi bayunvirhe bakenere okugalukira Yehova. Basimire bakolere Yehova haguma n’omulala gwage gw’abanamuharamya omu kuli, aliko eyi bakenere owabarhabala.

6. Gurhe abantu boshi omu chibaga bakashangira akasi k’okulonza abaholere?

⁶ Bande bakakola oku kasi k’okulonza abaholere? Buli muguma werhu k’okuderha; abashamuka, ba painia, abantu b’omulala, abahubiri b’omuchibaga boshi bakarhabala kumenya ngahe abaholere bali. Oherhe mwira wawe changwa muchi wawe waholere si? Hali omuntu waholere walibuganene naye si omu mahubiri m’enju oku nju changwa omu mahubiri m’okumugaro-garo si? Ofasiriye oyola muntu oku akaba alonzeze bamulambagirire, wasima bwenene okuha abashamuka b’ah’olamire adrese n’enimero yage.

7. Bichi ebi omushamuka oyirikirwe Thomas aderhere bikuyigirize?

⁷ Intambu zihe z’akamaro ahanene abashamuka bakarhola omu kulonza abalonzenze kugalukira Yehova? Yunva ebi mushamuka muguma oyirikirwe Thomas, * olamire omu Espanye warhabere bantu barhalwise 40 bagaluke omu chibaga aderhere: “Ech’oburhanzi, Inambaza bene-berhu na bali berhu akaba bamenyere ngahe owaholere akaba alamire. Changwa nanabaza abahubiri akaba hali eyibayibukire orhachiyinja oku mbuganano. Abanene omu chibaga banarhabala n’omurhumambo bulala babwene oku akola kasi kabalolere nabo. Buzinda, eyinalambagirira bene-berhu na bali berhu baholere, nanababaza eju ya bana babo changwa abandi bachi babo. Baguma baholere bakaba eyi bagendaga baheka abana babo oku mbuganano, n’abola bana bakaba eyi bachigerere kuba bahubiri mango maguma. Nabo bakarhabalwa bagalukire Yehova.”

8. Omu chigereranyo ch’omurhabana waheraga chili omu Luka 15:17-24, gurhe omulume alikolere omugala wahungamaga?

⁸ Ngeso zihe rhukwanene rhugwarhe akaba rhulonzeze kurhabala balala basimire bagalukire Yehova? Lola mpanulo ziguma-ziguma rhwakayiga omu mufano gwa Yesu g’omwana w’engali-gali warhengaga ahamwabo. (Osome Luka 15:17-24.) Yesu afasiriye gurhe buzinda obwenge bwagalukaga oyola murhabana akana okugaluka emwabo. Eshe amuyababira amuhobera n’obushagaluke, omu kuyereka omugala oku achimuzigire. Ezamiri y’oyola murhabana yaliri yamukonga n’okuchiyunva oku arhakwanene chiro kuyirikwa  mugala w’eshe. Oyola mulume ayunvira omugala akababaro, achimubwira gurhe koshi achiyunvirhe. Naho, eshe ajira ebintu bibonekene by’okuyemeza omugala oku kweri ayankirirwe omu lugo arhali nka munya-kasi si nka muzigirwa w’omu mulala. Omu kuyerekana okuntyo ku amubwene ajira efete, aha n’oyola mugala wahungamire emishangi ekwirire.

9. Borhere buhe rhukwanene kugwarha yirhurhabala abaholere bagalukire Yehova? (Olole echisanduku “ Okuntu Rhwakarhabala Abalonzeze Bagalukire Yehova.”)

⁹ Yehova ali nk’oyola muzere wa mw’echola chigereranyo. Azigire abola bene-berhu na bali berhu baholere analonzeze bamugalukire. Omu kuyiganya Yehova rhwakabarhabala kugaluka. Echola chihemere okulembera, akababaro n’obuzigire oku ngambo yerhu nerhu. Bulagurhe bihemere rhuyerekane ezola ngeso z’akamaro na gurhe rhwakajira ntyo?

10. Bulagurhe bihemere okuba muntu w’okulindira amango rhuli rhwalonza kurhabala omuntu ashube agalukire Yehova?

¹⁰ Bihemere rhube bantu b’okulindira bulala binarhola esiku okuderha oku omuntu ashube agalukire Yehova. Bantu banene bali baholere mira banaderha oku banayemera kugaluka okwenge tu abashamuka n’abandi bantu omu chibaga bashubirize kubalambagirira. Mwali-werhu muguma oyirikirwe Nancy w’omu Azi, ayandikire ntya: “Mwira wani wahofi-hofi omu chibaga alintabere loshi. Alinsimire nkanandi mwali wabo wa mira. Ahanza anyibusa ebihe binja rhwagezeze haguma. Alikwanene ayunvirize bwenene n’okulindira amango indi namubwira gurhe inchiyunvirhe, arhanaliri aleka kumpanula. Achihangana kunyereka oku ali mwira mwinja, oli tayari kuntabala amango moshi-moshi.”

11. Bulagurhe bihemere akababaro omu kuhorohoza omuntu wavunikire enzoka?

 ¹¹ Akababaro kali nka pomade eherhe emisi; yakarhabala kufumya ebibabeze omuntu oku murhima. Baguma omu baholere balwisize myaka minene okuchiyunva kubi eju ya muntu mulebe omu chibaga. Okola kuchiyunva ntyo kwagera ahakwahubya enyorha y’okugalukira Yehova. Baguma bakawaza oku bakolerwe kubi. Bakaba bakenere omuntu wabayunviriza n’okuyunva gurhe bachiyunvirhe. (Yak. 1:19) María, wali waholere mango maguma aderhere ntya: “Nalikenere okurhwiri k’okunyunviriza, echirhugo nakayamira ko, n’efune yakantabala kunyerekeza.”

12. Lerha omufano guyerekene gurhe obuzigire bwa Yehova bunakulula abaholere bagaluke omu lubaga lwage.

¹² Ebiblia efasiriye obuzigire bwa Yehova nka mugozi changwa akamba. Mu bugenda buchi obuzigire bwa Mungu buli nka kamba? Rhola omufano: Waza gurhe wakaba oli washurha emindubu-ndubu eyi okala wazika omu nyanja nene ekumbuukire, naho omuntu akulikize esovetage. Kweri wakasima bulala yakurhabala ogale kuyorha oyererere. Aliko eyola sovetage yonyine erhakaba eyi etosheze kuderha oku ogenderere kulama. Amenji maganyire, na ntako wakagenderera kulama akaba orhajire omu bote. Wakaba eyi okenere omuntu oli omu bote okulikize akamba okafarhe naye akukululire omu bote. Yehova aliderhere ntya kuyerekera abaizraeli bachikulaga kuye: “Naliri nabakulula n’akamba k’obuzigire.” (Ho. 11:4) Intyo konako ku Mungu anayunva na muganola mango kuyerekera balala balekere kumukolera bali bashurha emindubu-ndubu omu milago n’akahinda. Asimire bamenye oku abasimire n’oku alonzeze abakulule emunda ali. Kandi Yehova akakukolesa omu kuyerekana obuzigire bwage.

13. Obale ebyachigerere kuba biyerekene ok’okuzigira bene-berhu kuherhe emisi.

 ¹³ Bili by’engenzi okuyereka abaholere oku Yehova anabasima n’oku nerhu rhunabasima. Pablo, oganirirwe omu mwazi g’oburhanzi, alimalire myaka 30 eyi aholere. Aderhere ntya: “sezi liguma, oku nanarhenga ahambuga, mwali werhu muguma mwinja bwenene okala mugekulu ambugana anganiza omu bulyo buyerekene obuzigire. Nahwanza kulira nka mwana. Namubwira oku bishushire oku Yehova yi wamurhumaga ayinje aganire nani. Agola mango yi nakanaga kugalukira Yehova.”

14. Nk’oku echigereranyo chili omu Luka 15:4, 5 chiyerekene, bichi omungeri anajira amango amabona entama yabaga yaherere?

¹⁴ Abaholere bakenere rhubagwase bwenene. Kuguma n’olala murhabana waheraga omu chigereranyo cha Yesu, bakachiyunva kubi bwenene ahakagarhi kabo. Kandi hali oku bakaba bazamba bwenene omu kiroho eju y’ebi balolereko mw’elila gulu lya Shetani. Rhusimire rhubarhabale bashube bakomeze obuyemere bwabo mu Yehova. Omu chigereranyo ch’entama yaherere, Yesu aliyerekene gurhe omungeri anayiheka okubirhugo byage n’okuyigalula omu zindi. Omungeri anaba eyi ahezeze emisi n’ebisanzi okuderha mpu abone entama yaherere. Aliko anabona oku bihemere ashube ayiheke ayigalule omu zindi bulala yowe yonyine erhaherhe misi y’okuchigalula omu zindi.​—Osome Luka 15:4, 5.

15. Gurhe rhwakagwasa omuzamba olonzeze kugalukira Yehova? (Olole echisanduku “ Echikoleso ch’Akamaro.”)

¹⁵ Byakarhuhema rhukolese ebisanzi n’emisi omu kurhabla abaholere bahime obuzamba bwabo. Aliko kugerera eroho lya Yehova n’ebitabu anarhuha kugerera oku lubaga lwage rhwakarhabala abaholere bashube bagwarhe  emisi y’ekiroho. (Ro. 15:1) Gurhe rhwakajira ntyo? Mushamuka muguma okomeere aderhere ntya: “Abanene omu baholere baba eyi bakenere bashube bayigirizwe Ebiblia amango bamachishoga kugalukira Yehova.” * Che chirhumire amango bamakuhema ok’oyige n’omuntu wali waholere, chakarhuma orhayemera n’obushagaluke? Oyola mushamuka ashubire kuderha: “Omuhubiri oli waongoza efunzo lya mene elyola akwanene kuba mwira mwinja na muntu olala wali waholere akachizera.”

16. Bichi biyerekene oku rhwakalangalira oku bamalaika barhurhabala?

¹⁶ Hali binene biyerekene oku bamalaika banaba eyi bali haguma nerhu omu kasi k’okulonza abaholere bali bachifija kugalukira Yehova. (Ufu. 14:6) Omufano; Silvio w’omu Ekwatere, abaga eyi ali asalira apate echakamurhabala kugaluka omu chibaga. Oku anachili asalira, ayunva bakongorha oku mulyango gwange. Babere bali ahola, basima bwenene okurhangira kumuha omusada alikenere.

17. Gurhe rhwakachiyunva amango rhwamarhabala omuzamba w’ekiroho?

¹⁷ Rhwapata obusime bunene omu kurhabala abazamba bagalukire Yehova. Waza oku bi painiya muguma mpu ye Salvador waliri wachihangana kuseza obwenge oku baholere aderhere: “Hali amango inanchiyunva intakagala kugalula emiziga y’obusime. Binansimisa bwenene okubona Yehova afumya nguma y’omuntama zage asima, kurhenga omu gulu lya Shetani n’okubona oku nani nakolere haguma naye mw’akola kasi.”​—Mdo. 20:35.

18. Akaba waholere, bichi bihemere obe eyi onamenyere?

¹⁸ Akaba wachikulire oku bantu ba Yehova, omenye oku kweri Yehova yewe anachikuzigire. Alonzeze omugalukire. Kweri, bikuhemere ochihangane y’ogalukira Yehova. Aliko kuguma n’ola muzere w’omuchigereranyo cha Yesu, Yehova yaba alanguza emunda wahuluka oli wamugalukira, kandi akuyankirira n’obusime bunene omu mulala.