1. Yehauvas xav li cas xwb thaum ib tug tub qhe uas ncaim nws lawm rov los?

ZOO li zaj uas peb kawm tas los, Yehauvas zoo li ib tug tswv yug yaj uas saib xyuas nws cov yaj zoo heev. Nws yuav mus nrhiav kom tau tus uas ploj lawm rov los. Yehauvas hais li no rau cov Yixalayees uas tso nws tseg tias: “Nej cia li tig rov los cuag kuv, kuv thiaj yuav tig los cuag nej.” Yehauvas yeej tseem xav ib yam li ntawd, rau qhov nws hais tias: “Kuv yeej tsis hloov li.” (Malakis 3:6, 7) Yexus hais tias Yehauvas thiab cov tubtxib saum ntuj zoo siab heev thaum lawv pom Yehauvas ib tug tub qhe uas ncaim nws lawd rov los.​—Lukas 15:10, 32.

2. Hauv zaj no peb yuav tham txog dabtsi?

² Cia peb tham txog Yexus 3 zaj lus piv txwv. Cov lus piv txwv no yuav qhia seb peb yuav pab cov uas ncaim Yehauvas lawm li cas. Peb yuav tham seb peb yuav tsum coj li cas peb thiaj pab tau lawv rov los cuag Yehauvas. Thiab thaum peb pab tau ib tug rov los, peb yuav zoo siab npaum li cas.

3, 4. Hauv Lukas 15:8-10, ua cas tus pojniam thiaj muaj siab nrhiav nws lub nyiaj npib uas poob lawm?

³ Peb yuav tsum rau siab thiab siv zog nrhiav cov uas xav rov los cuag Yehauvas. Hauv phau Lukas, Yexus piav txog ib tug pojniam uas nrhiav nws ib lub nyiaj npib uas ploj lawm. Zaj lus piv txwv no Yexus qhia tias tus pojniam mob siab nrhiav nws lub nyiaj npib npaum li cas.​—Nyeem Lukas 15:8-10.

⁴ Yexus piav tias thaum tus pojniam ntawd nrhiav tau nws npib nyiaj uas ploj lawd, nws zoo siab heev. Nyob rau Yexus tiam, thaum ib tug ntxhais mus yuav txiv muaj tej thaud nws niam muab 10 lub nyiaj npib pub rau nws. Tej zaum lub nyiaj npib uas poob lawm kuj yog cov nyiaj ntawd. Tus pojniam xav tias nws lub nyiaj npib poob rau hauv pem teb lawm, nws thiaj  li taws teeb thiab mus nrhiav thoob plaws tsev tiamsis nws nrhiav tsis pom. Tej zaum lub teeb tsis pom kev txaus nws thiaj nrhiav tsis tau. Nws thiaj cheb tag nrho lub tsev. Thaum nws muab lub teeb los xyuas nws pom lub nyiaj npib ci nplas ntawm pawg av uas nws cheb ntawd, ua rau nws zoo siab heev. Nws thiaj hu tag nrho nws cov phoojywg zej zog tuaj nrog nws zoo siab.

5. Ua cas peb yuav tsum siv dag siv zog mus nrhiav cov uas tso tseg tsis teev tiam Yehauvas lawm?

⁵ Yexus zaj lus piv txwv no qhia peb tias peb yuav tsum siv dag siv zog peb thiaj nrhiav tau tej yam uas ploj lawm. Thaum peb mus nrhiav cov uas tso tseg tsis teev tiam Yehauvas, peb yuav tau ua ib yam li ntawd thiab. Muaj tej tug, lawv twb tso tseg tau ntau xyoo lawm. Tej zaum lawv tsiv mus nyob lwm qhov uas cov kwvtij nkauj muam tsis paub txog lawv. Tiamsis peb paub tias lawv ib txhia xav rov los cuag Yehauvas thiab xav teev tiam nws nrog cov kwvtij nkauj muam. Tiamsis yuav tsum muaj tus pab lawv.

6. Cov nyob hauv lub koom txoos sib pab nrhiav cov uas tso tseg tsis teev tiam Yehauvas lawm li cas?

⁶ Leejtwg thiaj pab nrhiav tau cov uas tso tseg tsis teev tiam Yehauvas lawm? Tag nrho cov tshaj tawm hauv lub koom txoos, tsis hais cov txwj laus, cov tho kev, thiab cov uas muaj tus tso tseg tsis teev tiam Yehauvas lawd, puavleej mus pab nrhiav tau. Koj puas muaj ib tug phoojywg lossis ib tug txheeb ze uas tso tseg tsis teev tiam Yehauvas lawd? Thaum koj mus tshaj tawm koj puas tau ntsib cov ntawd ib tug dua li? Yog tias koj ntsib ces qhia rau nws tias yog nws xav kom ib tug tuaj xyuas nws thiab nrog nws tham ces kom nws muab nws qhov chaw nyob thiab xov tooj rau koj, koj mam muab rau cov txwj laus.

7. Peb kawm dabtsi ntawm ib tug txwj laus hu ua Thaumas?

⁷ Cov txwj laus yog cov uas muaj lub luag haujlwm mus nrhiav cov uas xav rov los cuag Yehauvas. Lawv yuav ua li ntawd li cas? Ib tug txwj laus hu ua Thaumas * uas nyob tebchaws Xapee pab tau 40 tawm tus Timkhawv rov los rau hauv lub koom txoos. Nws hais tias: “Kuv xub mus nug cov kwvtij nkauj muam seb lawv puas paub cov uas tso tseg tsis tuaj kev sib txoos lossis tsis mus tshaj tawm lawm nyob qhovtwg. Lossis kuv nug lawv seb lawv puas paub lwm cov uas tsis tuaj kev sib txoos lawm. Cov kwvtij nkauj muam hauv lub koom txoos feem coob yeej zoo siab hlo pab. Thaum kuv mus xyuas cov uas tso tseg tsis tuaj kev sib txoos lossis tsis mus tshaj tawm lawm kuv kuj nug txog lawv cov menyuam thiab lawv tej txheeb ze. Muaj tej tug thaum ub coj lawv cov menyuam tuaj kev sib txoos thiab tej zaum cov menyuam kuj ua ib tug tshaj tawm dua los lawm. Peb kuj pab tau cov menyuam rov los cuag Yehauvas thiab.”

8. Zaj lus piv txwv hauv Lukas 15:17-24, leej txiv ua li cas xwb thaum nws tus tub loj leeb rov los tsev?

⁸ Peb yuav tsum coj li cas yog peb xav pab lwm tus rov los cuag Yehauvas? Cia seb peb kawm tau li cas ntawm Yexus zaj lus piv txwv txog tus tub loj leeb. (Nyeem Lukas 15:17-24.) Yexus piav tias thaum tus tub no ras tias nws ua yuam kev lawm, nws xav tias nws yuav rov los tsev. Thaum leej txiv pom nws tus tub rov los, nws khiav mus puag nkaus nws tus tub rau qhov nws hlub nws tus tub heev. Thaum nws tus tub qhia tias nws tu siab rau qhov uas nws ua yuam kev thiab tsis tsim nyog nws ua nws txiv tus tub lawm, ua rau leej txiv khuvleej nws heev. Leej txiv thiaj ua li cas xwb? Leej txiv thiaj ua ib pluag mov loj loj tos txais nws thiab npaj khaub ncaws zoo rau nws hnav.  Qhov no qhia tias leej txiv zoo siab txais yuav nws tus tub rov los, tsis yog los ua ib tug tub qhe tiamsis rov los ua nws tus tub li qub.

9. Peb yuav tau coj li cas peb thiaj pab tau cov uas ncaim Yehauvas lawm rov los? (Saib lub ntsiab me “ Peb Yuav Pab Cov Uas Xav Rov Los Cuag Yehauvas Li Cas?”)

⁹ Yehauvas zoo li leej txiv hauv zaj lus piv txwv ntawd. Nws hlub peb cov kwvtij nkauj muam uas ncaim nws lawm thiab xav kom lawv rov los cuag nws. Yog peb hlub lawv ib yam li Yehauvas ces peb yuav pab tau lawv rov los. Tiamsis peb yuav tsum siab ntev, paub nrog lawv nyuaj siab, thiab hlub lawv. Vim li cas peb yuav tsum coj li no? Thiab peb yuav ua li cas peb thiaj coj tau li no?

10. Thaum peb pab ib tug rov los cuag Yehauvas, vim li cas peb yuav tau ua siab ntev?

¹⁰ Vim li cas peb yuav tsum ua siab ntev? Rau qhov yuav siv sijhawm ntev heev rau ib tug rov los cuag Yehauvas. Coob tus uas ncaim ntawm Yehauvas mus lawd hais tias tos lawv xav rov los, los twb yog cov txwj laus thiab lwm cov hauv lub koom txoos mus xyuas lawv tsis tseg. Ib tug muam hu ua Neexi (Nancy) nyob sab Axia sau tias: “Muaj ib tug phoojywg zoo hauv lub koom txoos pab kuv ntau kawg li. Nws hlub kuv ib yam li kuv yog nws tus niam hluas. Nws tham txog tej uas wb tau ua ua ke yav tas los. Thaum kuv qhia siab rau nws los nws yeej ua siab ntev mloog thiab yog muaj dabtsi yuav pab tau kuv los nws tsis ntshai qhia. Nws yog ib tug phoojywg zoo thiab kuv mus cuag nws thaum twg los tau.”

11. Vim li cas peb yuav tsum paub nrog lwm tus nyuaj siab?

¹¹ Thaum peb paub nrog ib tug nyuaj siab ces zoo ib yam li cov tshuaj pleev qhov txhab kom zoo. Muaj ib co tso tseg tsis mus koom txoos  lossis tsis mus tshaj tawm tau ntev lawm vim rau qhov muaj neeg hauv lub koom txoos ua rau lawv tu siab. Lawv tseem mob siab thiab chim heev lawv thiaj tsis xav rov los cuag Yehauvas. Muaj ib co xav tias luag ua tsis ncaj rau lawv lawm. Yuav tsum muaj ib tug ua siab ntev mloog lawv thiab to taub lawv txojkev nyuaj siab. (Yakaunpaus 1:19) Ib tug muam uas ncaim Yehauvas tau ib ntus hu ua Malias hais li no tias: “Kuv xav kom muaj ib tug mloog kuv, nplig kuv, thiab pab kuv.”

12. Yehauvas txojkev hlub zoo ib yam li ib txoj hlua li cas?

¹² Phau Vajlugkub muab Yehauvas txojkev hlub piv rau ib txoj hlua. Vim li cas phau Vajlugkub thiaj hais li ntawd? Piv xam tias koj poob deg lawm. Dej tob tob thiab txias txias heev. Koj txawm pib tog tiamsis muaj ib tug pov ib lub plab yas tuaj rau koj kom koj thiaj tsis tog. Koj yeej ris nws txiaj ntsig kawg tiamsis yuav kom koj dim, yuav tsum muaj ib tug pov ib txoj hlua tuaj rau koj thiab rub koj tawm hauv hav dej los. Yehauvas hais li no rau cov Yixalayees uas tso nws tseg lawm tias: “Kuv ua tib zoo rub lawv los cuag kuv thiab kuv hlub lawv kawg.” (Hauxeyas 11:4) Niaj hnub nimno los Yehauvas tseem xav ib yam li ntawd rau cov uas tso tseg tsis teev tiam nws thiab rau cov uas muaj kev nyuaj siab ntxhov plawv ntau yam. Nws xav kom lawv paub tias nws tseem hlub thiab xav pab lawv rov los cuag nws. Thiab Yehauvas yuav siv tau koj los pab lawv paub tias nws tseem hlub lawv.

13. Piav seb thaum peb hlub cov uas ncaim Yehauvas, pab tau lawv li cas.

¹³ Tseem ceeb heev rau peb qhia cov uas tau ncaim Yehauvas lawd tsis tseg tias Yehauvas hlub lawv thiab peb los kuj hlub lawv  ib yam nkaus. Hauv zaj tas los no peb tham txog ib tug kwvtij hu ua Phanplaum. Nws tau ncaim Yehauvas li 30 tawm xyoo. Nws hais tias: “Muaj ib tagkis, kuv tabtom tawm ntawm kuv lub tsev mus. Muaj ib tug niam tais laus laus los nrog kuv tham thiab hais lus zoo zoo rau kuv. Kuv txawm pib quaj li ib tug menyuam yaus rau nws. Kuv qhia nws tias cuag li Yehauvas xa nws tuaj nrog kuv tham ntag. Tamsim ntawd kuv thiaj txiav txim siab tias kuv yuav rov los cuag Yehauvas.”

14. Raws li zaj lus piv txwv hauv Lukas 15:4, 5, tus tswv yug yaj ua li cas xwb thaum nws nrhiav tau nws tus yaj uas ploj lawm?

¹⁴ Peb yuav tsum mus pab thiab txhawb cov uas ncaim Yehauvas lawd tsis tseg tsis tu. Zoo ib yam li Yexus zaj lus piv txwv txog tus tub loj leeb, lawv yeej xav rov los tiamsis lawv lub siab tseem tshum lawv. Tsis tas li ntawd xwb, vim lawv ncaim mus nyob hauv Xatas lub qab ntuj, lawv txojkev sib raug zoo nrog Yehauvas yuav tsis zoo li qub lawm. Peb yuav tau pab kom lawv txojkev ntseeg rov ruaj khov dua. Hauv Yexus zaj lus piv txwv txog tus yaj uas ploj lawm, Yexus piav tias thaum tus tswv yug yaj nrhiav tau tus yaj, nws muab tus yaj tsaws hlo rau saum nws xub pwg. Nws paub tias yog nws tsis ua li ntawd ces tus yaj yuav mus tsis taus rau qhov nws tsis muaj zog lawm.​—Nyeem Lukas 15:4, 5.

15. Peb yuav txhawb tus qaug zog kom nws rov los cuag Yehauvas li cas? (Mus saib lub ntsiab me “ Ib Phau Ntawv Uas Zoo Kawg Li.”)

¹⁵ Tej zaum peb yuav tau siv dag siv zog thiab sijhawm ntau heev mus pab tus ncaim Yehauvas lawd kom nws peem dhau tej uas ua nyuaj rau nws rov los cuag Yehauvas. Tiamsis muaj Yehauvas lub hwj huam, nws Txojlus, thiab  cov ntaub ntawv hauv lub koom txoos pab peb. Peb yeej yuav pab tau lawv rov muaj kev sib raug zoo nrog Yehauvas dua. (Loos 15:1) Ib tug txwj laus hais tias: “Cov uas xav rov los cuag Yehauvas feem ntau yuav tsum tau kawm Vajlugkub nrog ib tug dua.” * Yog tias cov txwj laus thov kom koj qhia Vajlugkub rau ib tug uas xav rov los cuag Yehauvas, koj puas yuav zoo siab hlo ua li ntawd? Tus txwj laus kuj hais ntxiv tias, “Tus tshaj tawm uas qhia Vajlugkub rau tus ntawd yuav tsum yog ib tug uas nws tso siab tau rau thiab tsis ntshai qhia siab rau.”

16. Ua cas peb thiaj paub tias cov tubtxib saum ntuj pab peb nrhiav cov uas xav rov los cuag Yehauvas?

¹⁶ Muaj ntau zaus yeej yog cov tubtxib saum ntuj pab peb mus nrhiav cov uas xav rov los cuag Yehauvas. (Tshwmsim 14:6) Xws li muaj ib tug kwvtij uas tau ncaim Yehauvas ib ntus hu ua Xiviyaus (Silvio). Thaum nws tseem tabtom thov kom Vajtswv xa neeg tuaj pab nws, txawm muaj 2 tug txwj laus tuaj txog ntawm nws qhov rooj. Ob tug txwj laus no zoo siab hlo pab nws rov los cuag Yehauvas.

17. Ua li cas xwb thaum peb pab tau ib tug rov los cuag Yehauvas?

¹⁷ Thaum peb pab tau ib tug rov los cuag Yehauvas, yuav ua rau peb zoo siab heev. Ib tug kwvtij tho kev uas rau siab mus pab cov uas tso tseg tsis mus kev sib txoos lossis tsis mus tshaj tawm lawd hais tias: “Thaum kuv xav txog cov uas rov los cuag Yehauvas ua rau kuv zoo siab heev kuv cia li los kua muag. Kuv zoo siab tias Yehauvas tseem cia kuv mus pab coj nws cov tub qhe uas ncaim mus rau Xatas lub qab ntuj rov los rau hauv lub koom txoos.”​—Tes Haujlwm 20:35.

18. Yog koj tso tseg tsis nrog Yehauvas cov neeg ua ke lawm los nco ntsoov li cas?

¹⁸ Yog koj tso tseg tsis nrog Yehauvas cov neeg ua ke lawm los nco ntsoov tias Yehauvas yeej tseem hlub koj. Nws xav kom koj rov los cuag nws. Koj yuav tsum siv zog tiag koj thiaj rov los cuag tau nws. Zoo ib yam li leej txiv hauv Yexus zaj lus piv txwv, Yehauvas yeej tos ntsoov hnub koj rov los thiab nws yuav zoo siab heev tos txais koj.