1. Iehova ena hemami be edena bamona, bema mamoe ta be ia dekenai ia giroa lou?

VANEGAI ena stadi ai ita herevalaia bamona, Iehova ia gwau ia be mamoe naria tauna namona bamona, mai lalokau ida ena mamoe ta ta ia laloa bada. Bona ia ese idia raka oho mamoe ia tahua noho. Iehova ese ia idia rakatania Israela taudia ia hamaoroa: “Lau dekenai umui giroa mai neganai, . . . umui dekenai do lau giroa lou.” Ita itaia Iehova be unai bamona ia do laloa noho, badina ia gwau: “Lauegu kara lau haidaua lasi.” (Mal. 3:6, 7) Iesu ia gwau Iehova bona aneru idia moale bada bema ia raka oho mamoe ta be Ia dekenai ia giroa lou.​—Luka 15:10, 32.

2. Inai atikol ai dahaka do ita herevalaia?

² Inai atikol ai Iesu ena haheitalai toi do ita herevalaia, bona unai amo diba ita abia Iehova amo idia raka oho taudia ita durua totona. Danu, ia boio mamoe ita durua totona, do ita hahedinaraia kara namodia haida do ita herevalaia. Do ita itaia manoka taudia ita durua gaukarana be mai ena moale.

3-4. Dahaka dainai Luka 15:8-10 ese ia herevalaia hahine be ia hekwarahi, ia boio drekma koini ia tahua totona?

³ Namona be ita hekwarahi Iehova dekenai idia ura giroa lou taudia ita tahua totona. Luka ena Evanelia bukana ai Iesu ese parabole ta ia herevalaia, hahine ta be ia laloa bada gauna ta ia haboioa bona ia tahua, unai be ena drekma koini ta. Unai parabole ese hahine ena tahua gaukarana ia hahedinaraia.​—Luka 15:8-10 duahia.

⁴ Iesu be hahine ta ena sivarai ia gwauraia. Unai hahine be ia laloa bada drekma koini ta ia haboioa bona ia davaria ena hemami ia herevalaia. Iesu ena negai, Israela sinadia haida be natuna kekeni ta ena headava dinana ai ia dekenai drekma koini  10 idia henia. Reana unai drekma koini ia laloa bada badina ia be ena sinana ese ia henia gauna ta. Hahine ia laloa reana koini be foloa dekenai ia moru. Unai dainai lamepa ia gabua bona gabu ibounai ia tahua, to ia itaia lasi. Reana lamepa ena diari be hegeregere lasi unai siliva koini ia itaia totona. Dokonai, ia ese ruma ibounai ia daroa namonamo. Ia haboua kahu lalonai ia laloa bada drekma koini ia itaia, lamepa ena diari ese ia hahedinaraia. Ia moale bada! Iena turadia bona dekena taudia ia boiria unai sivarai namona ia hamaorodia totona.

5. Dahaka dainai ita hekwarahi be namo, kongrigeisen idia rakatania taudia ita tahua totona?

⁵ Iesu ena parabole amo ita itaia, ia boio gauna ita tahua totona namona be ita hekwarahi. Unai hegeregerena, kongrigeisen idia rakatania taudia ita davaria totona, ita hekwarahi be namo. Reana lagani momo lalonai ita idia bamoa lasi. Eiava gabu matamata dekenai idia noho, bona unuseniai idia be tadikaka ese idia diba lasi. To ita diba, hari unai manoka taudia haida be idia ura Iehova dekenai idia giroa lou. Idia ura tadikaka taihu ida Iehova idia tomadiho henia lou, bona iseda heduru idia abia be namo.

6. Manoka taudia tahua gaukarana ai daika ia heduru diba?

⁶ Manoka taudia tahua gaukarana ai daika ia heduru diba? Ita ibounai ita heduru diba​—elda taudia, painia taudia, ruma bese, bona kongrigeisen pablisa. Emu turana eiava varavara ta be ia manoka, a? Pablik gabudia ai eiava ruma-ta-ruma-ta haroro gaukarana ai, manoka tauna ta oi davaria, a? Bema unai tau ia ura ta ese ia vadivadi henia, namona be ena adres eiava fon namba oi abia bona elda taudia dekenai oi henia.

7. Elda tauna ta ladana Thomas ena hereva amo dahaka oi dibaia?

⁷ Elda taudia be edena dala namodia amo Iehova dekenai idia ura giroa lou taudia idia tahua diba? Elda tauna ta ladana Thomas, * ena hereva mani oi laloa. Ia be Spain ai ia noho bona tadikaka taihu 40 mai kahana ia durua kongrigeisen dekenai idia giroa lou totona. Thomas ia gwau: “Gau ginigunana be, tadikaka taihu idauidau lau nanadaia bema idia be manoka taudia edia noho gabuna idia diba. Eiava pablisa lau nanadaidia bema nega daudau hebou idia rakatania taudia haida idia diba. Kongrigeisen taudia momo be mai moale ida idia heduru, badina idia mamia idia be unai tahua gaukara lalonai idia vareai. Gabeai, manoka tadikaka taihu lau vadivadi henidia neganai, edia natudia bona varavara ma haida totona lau henanadai. Manoka taudia haida be guna hebou dekenai edia natudia idia abia mai, bona unai natudia be reana pablisa ai idia lao. Idia danu ita durua diba Iehova dekenai idia giroa lou totona.”

8. Luka 15:17-24 ena parabole ai, ia helalo-kerehai natuna be tamana ese edena bamona ia kara henia?

⁸ Edena kara namodia ita hahedinaraia be namo, bema ita ura haida ita durua Iehova dekenai idia giroa lou totona? Iesu be haheitalai ta amo ena ruma bese ia rakatania kara kava merona ia herevalaia. (Luka 15:17-24 duahia.) Iesu ia gwau, unai natuna be gabeai ia laloparara ia be kavakava karana ia karaia, bona ena tamana dekenai ia giroa lou. Tamana be ena natuna dekenai ia heau lao bona ia rosia, unai amo mero ia diba ena tamana ese ia lalokau henia. Mero be ena kerere dainai ia lalohisihisi bada bona ia mamia ia be hegeregere lasi tamana ese ena natuna bamona do ia kara henia. Mero be ena hemami ibounai ia gwauraia hedinarai bona tamana ese ia hebogahisi henia. Tamana be kara haida amo ia hahedinaraia ena natuna ia abia lou, gaukara tauna bamona lasi  to ena natuna lalokauna bamona. Unai ia hamomokania totona, tamana be aria ta ia karaia bona ia helalo-kerehai natuna dekenai dabua namo hereana ta ia henia.

9. Manoka taudia ita durua Iehova dekenai idia giroa lou totona, edena kara namodia ita hahedinaraia be namo? (Maua itaia: “ Idia Ura Giroa Lou Taudia Durua Dalana.”)

⁹ Iehova be unai parabole ese ia herevalaia tamana bamona. Ia ese iseda manoka tadikaka taihu ia lalokau henidia bona ia ura ia dekenai idia giroa lou. Namona be Iehova ita tohotohoa bona idia ita durua idia giroa lou totona. Unai ita karaia totona, haheauka, hebogahisi bona lalokau ita hahedinaraia be namo. Dahaka dainai unai kara ta ta do ita hahedinaraia, bona edena dala ai unai bamona ita karaia diba?

10. Dahaka dainai haheauka karana be gau badana bema ita ura ta ita durua ia goada lou totona?

¹⁰ Ita haheauka be gau badana, badina ia ura giroa lou tauna ena hetura karana Iehova ida be metairametaira do ia goada lou. Guna idia manoka taudia momo idia gwau, elda bona kongrigeisen taudia edia vadivadi loulou karana dainai, Iehova dekenai idia giroa lou. Asia ai, taihu ta ladana Nancy ia gwau: “Kongrigeisen ai tura namona ta ese lau ia durua bada. Lau be ena kakana bamona ia lalokau henia. Ia ese lau dekenai guna ai karaia hebou gaudia ia herevalaia. Egu hemami lau gwauraia neganai ia kamonai namonamo, bona mai gari lasi ida heduru herevadia ia henia. Ia be tura namona, bona ia noho hegaegae nega idauidau ai lau ia durua totona.”

11. Dahaka dainai ia lalohisihisi tauna ita hebogahisi henia be namo?

¹¹ Hebogahisi karana be muramura namona ta bamona; ta ena lalohisihisi ia hanamoa diba. Manoka taudia haida be lagani momo gunanai kongrigeisen ai ta ese edia lalona ia hahisia dainai  idia do badu noho. Unai hemami dainai idia ura lasi Iehova dekenai idia giroa lou. Reana haida idia mamia idia be idia kara namo henidia lasi. Idia ura ta ese idia ia kamonai henia bona edia hemami ia lalopararalaia be namo. (Iam. 1:19) Maria, guna ia manoka hahine ta ia gwau, “Lau ura ta ese lau ia kamonai henia, ia hagoadaia, sisiba namodia ia henia bona ia durua.”

12. Edena dala ai Dirava ena lalokau be varo bamona? Haheitalai gwauraia.

¹² Baibel ai, Iehova ese ena taunimanima ia lalokau henia karana be varo eiava kwanau ida ia hahegeregerea. Edena dala ai Dirava ena lalokau be varo bamona? Mani inai haheitalai oi laloa: Oi be davara mai ena hurehure bada lalonai oi maloa noho, bona ta be oi dekenai life jacket ia negea. Do oi moale bada badina unai gauna ese oi do ia durua oi maloa lasi totona. To, life jacket sibona ese oi do ia hamauria lasi. Davara be ia keru momokani dainai bema bouti maragina ta ese oi ia hamauria lasi, do oi mase diba. Ta ese oi dekenai varo ta ia negea mai bona bouti dekenai oi ia veria lao be namo. Iehova ese idia raka oho Israela taudia be inai bamona ia herevalaia: “Hebogahisi bona lalokau varodia amo idia lau veria mai.” (Hos. 11:4, BHḡ) Hari inai negai Iehova hesiai henia karana idia hadokoa, hekwakwanai momo idia davaria bona idia lalohekwarahi taudia be Iehova ese unai bamona ia lalodia danu. Ia ura do idia diba idia ia lalokau henia, bona ia kahirakahira idia lao be namo. Bona Iehova ese oi ia gaukaralaia diba idia dekenai iena lalokau oi hahedinaraia totona.

13. Ekspiriens ta amo iseda tadikaka taihu ita lalokau henidia karana ena namo oi herevalaia.

¹³ Namona be manoka taudia oi hadibaia Iehova ese idia ia lalokau henia bona oi hahedinaraia idia ita lalokau henia danu. Atikol  gunanai ita herevalaia tauna, Pablo, be lagani 30 mai kahana lalonai ia manoka. Ia gwau: “Daba ta ai, lau be egu ruma lau rakatania noho lalonai, taihu burukana ta ese lau ia hedavari henia bona mai gado namo ida ia hereva neganai, lau tai matamaia. Bona ia lau hadibaia, toana be Iehova ese ia siaia lau ia hereva henia totona. Unai nega amo egu lalona lau hadaia Iehova dekenai lau giroa lou totona.”

14. Luka 15:4, 5 ena haheitalai bamona, mamoe naria tauna be ia boio mamoe ia davaria neganai dahaka ia karaia?

¹⁴ Manoka taudia ita durudia bona hagoadaia noho be namo. Iesu ena parabole ai ia herevalaia boio merona bamona, reana idia be idia lalohisihisi bada. Bona idia be Satani ena tanobada ai idia davaria hekwakwanai dainai edia hetura karana Iehova ida be ia goada lasi. Namona be ita durudia edia abidadama Iehova dekenai idia hagoadaia totona. Iesu ese ia boio mamoe ena haheitalai ai ia herevalaia mamoe naria tauna, be ena pagana dekenai mamoe ia atoa bona mamoe serina dekenai ia abia giroa. Mamoe naria tauna be ena nega bona goada ia gaukaralaia unai boio mamoe ia tahua totona. To, ia laloparara mamoe be goada lasi sibona ia giroa lou totona, unai dainai ia ese mamoe ia huaia bona ia abia giroa be namo.​—Luka 15:4, 5 duahia.

15. Edena dala ai Iehova dekenai idia ura giroa lou manoka taudia ita durua diba? (Maua itaia: “Tulu Namona Ta.”)

¹⁵ Namona be iseda nega bona goada ita gaukaralaia manoka taudia ita durua edia manoka gaudia idia hanaia totona. To, Iehova ena lauma helaga, iena Hereva, bona kongrigeisen ai ita abia pablikeisen idauidau amo idia ita durua edia hetura karana Iehova ida idia hagoadaia totona. (Roma 15:1) Edena dala ai unai ita karaia diba? Mai ena ekspiriens elda tauna ta ia  gwau, “Iehova dekenai idia ura giroa lou manoka taudia momo ese Baibel stadi idia abia be namo.” * Unai dainai bema oi idia noia manoka tauna o hahinena ta do oi stadi henia, mai moale ida unai noinoi oi abia dae be namo. Unai elda ma ia gwau, “Stadi do ia hakaua pablisa be tura namona ai ia lao be namo, unai amo manoka tauna ese ena lalohekwarahi gaudia ia herevalaia diba.”

16. Edena dala ai ita diba aneru ese ita idia durua noho?

¹⁶ Ekspiriens momo ese idia hahedinaraia, aneru be ita idia durua noho Iehova dekenai idia ura giroa lou manoka taudia ita davaria totona. (Apok. 14:6) Hegeregere Ecuador ai, manoka tadikaka ta ladana Silvio, be kongrigeisen dekenai ia giroa lou totona Iehova ia guriguri henia goadagoada. Ia guriguri noho lalonai, elda rua be ena ruma dekenai idia ginidae. Unai vadivadi lalonai, elda taudia be mai moale ida ia idia durua matamaia.

17. Manoka taudia ita durua neganai dahaka hahenamo ita abia?

¹⁷ Manoka taudia ita durua Iehova dekenai idia giroa lou neganai do ita moale bada. Manoka taudia ia durua painia ta be inai bamona ia gwau: “Iehova dekenai idia giroa lou manoka taudia lau laloa neganai, nega haida egu matana ranu idia diho badina lau moale bada. Danu lau moale badina Iehova ese ia lalokau henia mamoe ta be Satani ena tanobada amo ia hamauria, bona unai gaukara ai Iehova ida lau gaukara hebou.”​—Kara 20:35.

18. Bema oi be oi manoka, dahaka oi diba be namo?

¹⁸ Bema oi be Iehova ena taunimanima bamoa karana oi hadokoa, namona be oi diba Iehova be oi ia do lalokau henia noho. Ia ura ia dekenai oi giroa lou. Unai bamona oi karaia totona dala haida oi badinaia be namo. Iesu ena haheitalai ai ia gwauraia tamana bamona, Iehova be oi ia naria noho oi giroa lou totona, bona mai moale ida oi do ia abia dae.