1. Anni i matageno ni Jehova nu manoli ta nisa i tadday nga nawawan nga karneruna?

NAGIGIAMMU tam ta nappasa nga artikulo nga nikumpara ni Jehova i baggina ta tadday nga mapia nga gumappastor nga meddu nga tangngallanna i kada karneruna. Aleganna gapa i maski sinni nga neyawawan. Kunnaw i kinagi ni Jehova ta Israelita ira nga pinanawadda yayya: “Manoli kamu niakan, ay tu manoli ngà nikamu.” Ammu tam nga kunnatun lagapa i mataga-tageno ni Jehova megafu ta kinagina: “Ari ngà nga manguli.” (Mal. 3:6, 7) Kinagi gapa ni Jesus nga magayayya si Jehova anna i anghel ira nu manoli nisa i maski tadday laman ta aripanna nga neyawawan.​—Luc. 15:10, 32.

2. Anni i ikonsidera tam taw nga artikulo?

² Ikonsidera tam i tallu nga ilustrasion ni Jesus nga nakasentro ta panguffun turi ira ta neyarayyu kani Jehova. Gigiammuattam gapa i kawagan ira nga kualidad tapenu moffunattam i neyawawan nga karneru nga manoli nisa. Ammuattam gapa nu ngatta magayayya ittam nu mappursigi ittam nga uffunan danuri inactive nga manoli.

3-4. Ngatta inaleg tu mapia na babay nga mabibbig ta Lucas 15:8-10 i nawawan nga baryana?

³ Mawag tu mappursigi ittam nga alegan danuri maya nga manoli kani Jehova. Ta Evanghelio ni Lucas, niyistoria ni Jesus i meyannung ta tadday nga babay nga nawawanna i nabalor nga barya nga magalan tu plata. I importante nga punto naw nga istoria ay i appursigi natun nga babay tapenu alegan i barya.​—Bibbigan i Lucas 15:8-10.

⁴ Dineskriba ni Jesus i mataga-tageno na babay nga nakaleg ta nawawan nga baryana. Ta kaggawan ni Jesus, regaluan na yena ira nga Judio i ánada nga babay tu mafulu nga plata ta kasalna. Awayyana nga i nawawan nga barya ay tadday tatun nga mafulu nga plata. Nononopan na babay nga nataga i barya  ta datag. Yatutta nisibona i allamparan anna inalegna yatun, ngem awan tu nasinganna. Ari tu makalanno i nawag nga maggafu ta allamparanna tapenu malegna i barya. Yatutta kinageranna i interu nga balay. Tapus, nasinganna i nabalor nga baryana ta kinageranna nga gavu nga kumili-kili megafu ta nawag na allamparanna. Anni ngana i ayayyana! Inagalanna i kokkofunna anna i kaddubana tapenu ikagi nira i makasta nga dumug.

5. Ngatta mariga nga alegan danuri inactive?

⁵ Magigiammu tam ta istoria ni Jesus nga nu egga i nawawattam nga gannug, mawag tu mappursigi ittam tapenu alegan yatun. Kurug gapa yatun ta inactive ira. Mawag tu mappursigi ittam tapenu alegan ira. Baka aru nga dagun ngana i nappasa turi ta nagimmang ira nga nakikavulu nittam. Awayyana paga lagu nga nagali ngana ira ta tanakuan nga lugar nga ari ira kilala na wawwaragi tam. Ngem ta maddaggun, makasiguradu ittam nga i karuan ta inactive ira ay kakayàda i manoli kani Jehova. Ikayada uli i masserbi kani Jehova kavulu i wawwaragida ngem mawagda i uffuttam.

6. Kunnasi nga makoffun i ngamin ta kongregasion ta pagaleg ta inactive ira?

⁶ Sinni i makoffun ta pagaleg tu inactive ira? Ngamin i publisher ta kongregasion nelagum ngana i elder, payunir, anna danuri egga i kafamiliada nga nabbalin tu inactive. Egga kari i kofummu onu parientes mu nga nabbalin tu inactive? Nakasimmu ka kari tu inactive ta pabbala-balay onu ta publiko nga pallayyagayyam? Nu umanugu yatun nga tolay nga iyawa i adres onu i cellphone number-na ta elder ira ta kongregasion, puedem nga iyawa yatun ta nira.

7. Anni i magigiammum ta kinagi na tadday nga elder nga mangngagan tu Thomas?

⁷ I elder ira i primeru nga makarresponsibilidad tapenu alegan danuri inactive nga maya nga manoli kani Jehova. Kunnasida nga kuan yatun? Egga i tadday nga elder nga mangngagan tu Thomas * nga maddian ta Spain. Maturu tu 40 ngana nga Saksi i noffunanna nga manoli ta kongregasion. Kinagina: “Ollu, iyavu ku ta wawwaragi nu ammuda nu sitaw ngana maddian i wawwaragi nga inactive. Iyavu ku gapa nira nu egga i manonoda nga wawwaragi nga ari ngana magata-atende ta study. Kakayà na wawwaragi nga manguffun megafu ta ammuda nga parte ira natun nga pagaleg. Sonu bisitakku i inactive ira, kumustakku gapa i ánada anna i paparientesda. Egga ira i inactive nga dati nga ivulu-vuluda i ánada ta study anna danatun nga ána ay nakipallawan ngana gapa. Pati gapa ira ay awayya tam uffunan nga manoli kani Jehova.”

8. Ta istoria ni Jesus ta Lucas 15:17-24, kunnasi i pattratu na yama ta mabbabbabawi nga anana?

⁸ Anni ira nga kualidad i kawagattam tapenu moffunattam danuri inactive nga maya nga manoli kani Jehova? Egga ira i magigiammu tam ta istoria ni Jesus meyannung ta ana nga lalaki nga neyawawan. (Bibbigan i Lucas 15:17-24.) Niyesplika ni Jesus nga nanono gabbalaman na ana nga lalaki i mapia anna limibbe ta baleda. Nakkara-karela i yama tapenu dafungan i anana nga lalaki, ginakkopanna yayya, anna nipatagenona nga ayatanna lagapa yayya. Makokkonsensia i ana nga lalaki anna natagenona nga ari ngana yayya mepangngo nga magalan tu anana. Turi ta kinagi na ana nga lalaki i mataga-tagenona, ziminatu i allo na yamana. Egga ira i kingngua na yama tapenu ipasiguradu ta anana nga malawa yayya uli ta baleda, ari tu bilang doroban, ngem bilang meddu nga anana. Tapenu pakurugan yatun, nappafiesta i  yama anna nipeyellungna i kakastan nga sinnun ta mabbabawi nga anana.

9. Anni ira nga kualidad i kawagan tapenu uffunan danuri inactive nga makatoli kani Jehova? (Innan i kahon nga “ Nu Kunnasi Uffunan Danuri Maya nga Manoli.”)

⁹ Tatun nga istoria, megitta si Jehova ta yama. Iddukanna i inactive nga wawwaragi tam anna ikayana nga manoli ira nisa. Nu parigattam si Jehova, moffunattam ira nga makatoli. Ngem tapenu makua yatun, kawagattam i pasensia, empatia, anna aya. Ngatta mawag nga ipasingattam danatun nga kualidad anna kunnasi tam makua yatun?

10. Ngatta mawag tam i pasensia tapenu moffunan i inactive nga maddukko uli kani Jehova?

¹⁰ Mawag tam i pappasensia megafu ta mappasa labbi i tiempo nige nga makatoli i tadday nga inactive. Inamin na dati ira nga inactive nga nagguyu laman ira turi ta mamippiga ira nga binisita na elder ira anna karuan nga wawwaragi ta kongregasion. Nitura ni sister Nancy nga taga-Southeast Asia: “Daka-dakal i neyuffun na tadday nga madukko nga kofukku ta kongregasion. Iddukannà anna gittana manang ku yayya. Nipanonona niakan i makkarasta ira nga ekspiriensami ta nappasa. Mapasensia yayya nga magginna niakan nu ikagì i mataga-tageno ku anna ari yayya magalangan nga manabarang niakan. Kurug yayya nga kofun anna sigga-paran yayya nga manguffun ta maski anni nga tiempo.”

11. Ngatta mawag tam i empatia tapenu uffunan i inactive nga nattaki i nonona?

¹¹ Megitta ta efektibo nga uru i empatia. Makoru yatun ta taki na nono. Piga ragun ngana nga laba-labanan na karuan nga inactive i taki na nonoda ta tadday nga wagi ta kongregasion. Megafu tatun, nawanan ira tu ganas nga manoli kani Jehova. Manono  na karuan nga ari tu patas i nikatratuda. Mawagda i magginna nira anna mangalippawa ta mataga-tagenoda. (Sant. 1:19) Kunnaw i kinagi ni Maria nga dati nga nabbalin tu inactive: “Mawag ku i magginna nio, mamanna-bannay nio, mangiyawa tu makasta nga tabarang, anna manguffun nio.”

12. Kunnasi nga megitta ta lubig i pangaya ni Jehova ta totolena?

¹² Ta Biblia, dineskriba ni Jehova i pangayana ta totolena nga gittana tadday nga galu onu lubig. Kunnasi nga negitta ta galu i pangaya na Dios? Imajinan nga malallaggabbang ka ngana ta aralam nga bebay tapus egga i nangitabbo nikaw tu salbabida. Siempre appresiammu yatun nga uffun megafu ta moffunakka natun nga gumataw. Ngem ari tu makalanno i salbabida tapenu matolay ka. Malallamming i danum anna ari ka nga matolay nu ariammu nga madde i barangay. Kawagammu i tolay nga mangitabbo nikaw tu lubig anna manguggun nikaw mappange ta barangay. Kunnaw i kinagi ni Jehova meyannung ta Israelita ira nga minarayyu nisa: “Gugguggunakku ira gukaban na gala-galu na aya.” (Os. 11:4) Kunnatun gapa i matageno na Dios turi ira ta nagimmang nga masserbi nisa anna malaggabbang ngana ira ta problema anna pakavurungadda. Ikayana nga mammuadda nga iddukanna ira, anna ikayana ira nga uffunan nga manoli nisa. Meyusa naka ni Jehova tapenu ipatageno nira yaw nga aya.

13. Mangistoria tu ekspiriensa nga mangipasingan nga makoffun i aya tam tapenu manoli i inactive ira.

¹³ Importante nga ikagi tam ta inactive ira nga iddukan ira ni Jehova anna ipasingattam gapa nga iddukattam ira. Trenta dagun nga nabbalin tu inactive si Pablo nga nakagi  ta nappasa nga artikulo. Istorianna: “Tadday nga umma, nanaw ngà ta balemi tapus nadafukku i tadday nga bako nga sister anna meddu nga kiniyuvovugnà. Siminangi ngà nga gittana abbing. Kinagì nisa nga gittana nidog yayya niakan ni Jehova tapenu kiyuvovugannà. Tatun nga oras, nanono ku i manoli kani Jehova.”

14. Segun ta istoria ta Lucas 15:4, 5, anni i kingngua na gumappastor turi ta naleganna i nawawan nga karneru?

¹⁴ Kawagan na inactive ira i tulu-tuloy nga uffun anna pamagaram kabalittam ira nga nalegan. Kagitta nari na nawawan nga ana ta istoria ni Jesus, baka aralam i bigagda ta emosion yatutta mabayag ira nga mammapia. Posible gapa nga nakkafi i espiritualidadda megafu ta naekspiriensada ta mundo ni Satanas. Mawag tu uffunattam ira nga pasikannan uli i pangurugda kani Jehova. Ta ilustrasion ni Jesus meyannung ta nawawan nga karneru, dineskribana nu kunnasi nga niyabaga na gumappastor i karneru anna nitolina yatun ta kural. Nangufu ngana tu tiempo anna sikan i gumappastor tapenu alegan i nawawan nga karneru. Ngem ammuna nga mawag tu iyabagana nga itoli i nawawan nga karneru megafu ta awan tu sikan natun nga manoli lagapa ta kural.​—Bibbigan i Lucas 15:4, 5.

15. Kunnasi tam moffunan danuri makafi nga maya nga manoli kani Jehova? (Innan i kahon nga “ Rimienta nga Nabala-balor i Keyusanna.”)

¹⁵ Aru nga tiempo anna appursigi i kawagattam tapenu uffunan danuri inactive nga labanan i makefugag nira nga masserbi uli kani Jehova. Ngem ta uffun na espiritu ni Jehova, na Biblia, anna na publikasion ira nga niyawa na organisasionna, moffunattam ira nga massikan uli ta espiritual. (Roma 15:1)  Kunnasi tam nga makua yaw? Kunnaw i kagian na tadday nga ekspiriensadu nga elder: “Magaru ta inactive ira nga naddesision nga manoli ngana kani Jehova ay kawagadda i Bible study.” * Yatutta nu sikaw i neyasayn na elder nga manuddu ta inactive, magayayya ka nakuan nga alawatan yatun nga pribilehio. Kunna paga na elder: “Mawag tu i publisher nga mangikondukta ta Bible study ay yuri i pattalakkan anna awayya nga pangistorian na inactive ta mataga-tagenona.”

16. Kunnasi tam ammu nga uffunan ittam na anghel ira?

¹⁶ Aru nga ekspiriensa i mamakurug nga makipattrabahu ittam ta anghel ira tapenu malegan danuri inactive nga maya nga manoli kani Jehova. (Nep. 14:6) Angngariganna, nakimemallo kani Jehova i inactive nga si Silvio nga taga-Ecuador nga mangidob yayya tu manguffun nisa. Durante nga makimallo pagalaman yayya, nagguni i doorbell-na. Egga i dua nga elder ta puertana. Tatun nga pabbisitada, magayayya ira nga nanguffun nisa.

17. Anni i matageno tam nu uffunattam danuri inactive?

¹⁷ Kuruga magayayya ittam nu uffunattam danuri inactive nga makatoli kani Jehova. Kunnaw i kagian ni Salvador, tadday nga payunir nga nakafokus ta panguffun ta inactive ira: “Nu mittan, ariakku mafugaddan i tumangi megafu ta ayayya ku. Sobra i ayayya ku kada nonopakku nga nipaliag ni Jehova i tadday ta meddu nga karneruna tapenu makapanaw ta mundo ni Satanas anna egga i pribilehiò nga makipattrabahu nisa.”​—King. 20:35.

18. Nu tadday ka nga inactive, anni i mepasiguradu nikaw?

¹⁸ Nu nabbalikka tu inactive, mepasiguradu nikaw nga iddeddukan naka lagapa ni Jehova. Ikayana nga manoli ka nisa. Mawag tu mappursigi ka tapenu manoli nisa. Gittana yama ta istoria ni Jesus, iinnaggan naka ni Jehova nga manoli, anna magayayya yayya nga alawatakka uli.