26-زەرتتەۋ ماقالاسى
«ماعان قايتا ورالىڭدار»
«ماعان قايتا ورالىڭدار... سوندا مەن دە سەندەرگە ورالامىن» (زاك. 1:3).
102-ٵن السىزدەرگە كومەكتەسەيىك
اڭداتپا *
1. جوعالعان قويلارىنىڭ ٴبىرى تابىلعان كەزدە ەحوبا نە سەزىنەدى؟
الدىڭعى ماقالادا قاراستىرعانىمىزداي، ەحوبا ٶزىن قويلارىن قامقورلايتىن مەيىرىمدى باعۋشىعا تەڭەگەن. ول جوعالعان قويلارىنىڭ ٵربىرىن ىزدەيدى. ەحوبا ٶزىن تاستاپ كەتكەن يسرايلدىكتەرگە: «ماعان قايتا ورالىڭدار... سوندا مەن دە سەندەرگە ورالامىن»،— دەگەن (زاك. 1:3). ٴبىز ەحوبانىڭ ٵلى دە وسىنداي كوزقاراستا ەكەنىن بىلەمىز، ويتكەنى ول: «مەن... ەش وزگەرمەيمىن»،— دەگەن (مالح. 3:6). يسا اداسقان قىزمەتشىلەرىنىڭ بىرەۋى بولسا دا قايتا ورالعاندا ەحوبا مەن ونىڭ پەرىشتەلەرى قاتتى قۋاناتىنىن ايتقان (لۇقا 15:10، 32).
2. بۇل ماقالادا نە جايلى قاراستىرامىز؟
2 قازىر يسانىڭ ٷش مىسالىن قاراستىرىپ، ەحوبادان الشاقتاپ كەتكەندەرگە قالاي كومەكتەسۋگە بولاتىنىن ۇيرەنەمىز. جوعالعان قويلاردىڭ ەحوباعا قايتا ورالۋىنا كومەكتەسۋ ٷشىن ناقتى قانداي قاسيەتتەر تانىتۋىمىز قاجەت ەكەنىنە دە توقتالامىز. سونداي-اق السىزدەرگە كومەكتەسۋ نەگە ٴبىزدىڭ كۇش سالۋىمىزعا تۇراتىنىن كورەمىز.
جوعالعان كۇمىس تيىندى ىزدەۋ
3، 4. لۇقا 15:8—10 تارماقتاردا جازىلعان مىسالدا نەگە ايەل جوعالعان تيىنىن جان سالا ىزدەدى؟
3 ٴبىز ەحوباعا ورالعىسى كەلگەندەرگە كومەكتەسۋ ٷشىن بارىمىزدى سالۋىمىز كەرەك. لۇقا كىتابىندا ايتىلعان مىسالدا يسا ٴبىر ايەلدىڭ جوعالعان دراحما تيىنىن ىزدەگەنى جايلى ايتقان. ول بۇل مىسالدى جان سالا ىزدەۋگە نازار اۋدارۋ ٷشىن كەلتىرگەن (لۇقا 15:8—10 وقىڭىز).
4 يسا جوعالعان قۇندى تيىنىن تاپقان كەزدە ايەلدىڭ قالاي قۋانعانىن سيپاتتادى. يسانىڭ كەزىندە ياھۋدي انالار قىزدارى تۇرمىسقا شىققاندا، ولارعا ون دراحما تيىنىن بەرەتىن. مىسالداعى جوعالعان تيىن وسى ون دراحمانىڭ بىرەۋى بولسا كەرەك. تيىنى ەدەنگە ٴتۇستى دەپ ويلاعان ايەل شامىن جاعىپ، جان-جاعىن ىزدەي باستايدى. ٴبىراق ەشتەڭە تاپپايدى. كىشكەنتاي كۇمىس تيىندى بايقاۋعا مايشامنىڭ جارىعى جەتپەيدى. سودان ول بۇكىل ٷيدى جاقسىلاپ سىپىرىپ شىعادى. سوندا ول جينالعان ۇيىندىنىڭ اراسىنان شامنىڭ جارىعىنا جالت-جۇلت ەتكەن قۇندى تيىنىن كورەدى. ٴسۇيتىپ، ايەلدىڭ كوڭىلى جاي تابادى! ول قۋانىشىنا ورتاقتاسسىن دەپ، دوستارى مەن كورشىلەرىن شاقىرادى.
5. قاۋىمنان قول ٷزىپ قالعانداردى تابۋ نەگە كۇش سالۋدى تالاپ ەتەدى؟
5 يسانىڭ مىسالىنان بايقاعانىمىزداي، جوعالعان نارسەنى تابۋ ٴبىراز كۇشتى تالاپ ەتەدى. سول سياقتى، قاۋىمنان قول ٷزىپ قالعانداردى تابۋ ٷشىن بىزگە ٴبىراز تەر توگۋ قاجەت بولۋى مۇمكىن. ولاردىڭ قاۋىمنان الشاقتاپ كەتكەنىنە تالاي جىل وتكەن شىعار. ال ولار باسقا جاققا كوشىپ كەتكەن بولسا، جەرگىلىكتى باۋىرلاستار ولاردى بىلمەۋى مۇمكىن. قاۋىمنان قول ٷزىپ قالعان بۇل باۋىرلاستاردىڭ كەيبىرى ەحوباعا قايتا ورالۋدى اڭساپ جۇرگەنىندە كۇمان جوق. ولار رۋحاني وتباسىمەن بىرگە ەحوباعا قىزمەت ەتكىسى كەلەدى. ٴبىراق ولارعا ٴبىزدىڭ كومەگىمىز قاجەت.
6. قاۋىمداعىلاردىڭ ٴبارى قاۋىمنان قول ۇزگەندەردى تابۋعا قالاي ۇلەس قوسا الادى؟
6 قاۋىمنان قول ۇزگەندەردى تابۋعا كىمدەر ۇلەس قوسا الادى؟ بارلىعىمىز، مىسالى اقساقالدار، ٸزاشارلار، قاۋىمداعى جاريالاۋشىلار، سونداي-اق وتباسى مۇشەلەرى. ٴسىزدىڭ قاۋىمنان قول ٷزىپ، ۋاعىزداماي كەتكەن دوسىڭىز نە تۋىسىڭىز بار ما؟ ۇيمە-ٷي نە كوپشىلىك ورىندارىندا ۋاعىزداپ جۇرگەندە، سونداي باۋىرلاستى كەزدەستىرگەنسىز بە؟ كەزدەستىرىپ جاتساڭىز، وعان: «ەگەر اقساقالداردىڭ كەلگەنىن قالاساڭىز، ولارعا مەكەنجايىڭىزدى نە تەلەفون ٴنومىرىڭىزدى بەرە الامىن»،— دەسەڭىز بولادى.
7. توماس دەگەن اقساقالدىڭ سوزدەرىنەن نە ٴتۇيدىڭىز؟
7 ەحوباعا ورالعىسى كەلەتىندەردى تابۋ ٴبىرىنشى كەزەكتە اقساقالدارعا جۇكتەلگەن. ولار مۇنى قالاي ىستەي الادى؟ يسپانيادا تۇراتىن توماس * ەسىمدى اقساقالدىڭ نە دەيتىنىن كورەيىك. 40 قا جۋىق كۋاگەردىڭ قاۋىمعا ورالۋىنا كومەكتەسكەن ول بىلاي دەيدى: «الدىمەن مەن ٵرتۇرلى باۋىرلاستاردان قاۋىمنان قول ٷزىپ قالعانداردىڭ مەكەنجايىن سۇراستىرامىن. يا بولماسا جاريالاۋشىلاردان قاۋىمعا كەلمەي كەتكەن قانداي باۋىرلاستى بىلەتىنىن سۇرايمىن. قاۋىمداعىلاردىڭ كوبىسى قۋانا-قۋانا كومەكتەسەدى، ويتكەنى ولاردى ىزدەۋگە ٶز ۇلەستەرىن قوسىپ جاتقانىن تۇسىنەدى. كەيىن قاۋىمنان قول ۇزگەن باۋىرلاستاردىڭ ۇيىنە بارعاندا، مەن ولاردان بالالارى مەن تۋىستارى جايلى سۇراستىرامىن. كەيبىرەۋلەرى بۇرىن بالالارىن قاۋىمعا اكەلىپ تۇرعان. ولاردىڭ كەيبىرى جاريالاۋشى بولعان بولۋى مۇمكىن. ٴبىز ولارعا دا ەحوباعا ورالۋعا كومەكتەسۋىمىز قاجەت».
ەحوبانىڭ جوعالعان ۇلدارى مەن قىزدارىن قايتارايىق
8. لۇقا 15:17—24 تارماقتارداعى مىسالدا اكەسى اداسقان ۇلىنا قالاي قارادى؟
8 ەحوباعا قايتا ورالعىسى كەلەتىندەرگە كومەكتەسۋ ٷشىن قانداي قاسيەتتەر تانىتۋىمىز قاجەت؟ قازىر يسانىڭ اداسقان ۇل جايلى مىسالىنان نە ۇيرەنۋگە بولاتىنىن كورەيىك (لۇقا 15:17—24 وقىڭىز). يسا اداسقان ۇلدىڭ اقىر سوڭىندا ەسىن جيىپ، ۇيىنە ورالعانى جايلى ايتقان. اكەسى ونىڭ الدىنان جۇگىرىپ شىعىپ، جاقسى كورەتىنىن كورسەتىپ ىستىق قۇشاعىنا الدى. ۇلىنىڭ ار-ۇجدانى مازالاپ، ول ٶزىن اكەسىنىڭ ۇلى دەپ اتالۋعا لايىقسىز سەزىندى. اكەسى ىشىندەگىسىن اقتارىپ ايتقان ۇلىنا ەلجىرەپ، جانى اشىپ كەتتى. اكەسى ۇلىن جالشى رەتىندە ەمەس، وتباسىنىڭ باعالى مۇشەسى رەتىندە قابىل الاتىنىن ىسىمەن كورسەتتى. ول وكىنگەن ۇلى ٷشىن توي جاساپ، وعان ەڭ جاقسى شاپان كيگىزدى.
9. قاۋىمنان قول ۇزگەندەرگە كومەكتەسۋ ٷشىن قانداي قاسيەتتەر تانىتۋىمىز كەرەك؟ (« قايتا ورالعىسى كەلگەندەرگە كومەكتەسىڭىز» دەگەن قورشاۋدى قاراڭىز.)
9 ەحوبا مىسالداعى اكەگە ۇقسايدى. ول قاۋىمنان قول ٷزىپ قالعان باۋىرلاستاردى جاقسى كورەدى، ولاردىڭ ورالعاندارىن قالايدى. ٴبىز دە ەحوباعا ەلىكتەپ، ولارعا قايتا ورالۋعا كومەكتەسە الامىز. بۇل ٷشىن شىدامدىلىق، جاناشىرلىق پەن سۇيىسپەنشىلىك تانىتۋىمىز كەرەك. نەگە ٴبىز ٴدال وسى قاسيەتتەردى تانىتۋىمىز قاجەت جانە ولاردى قالاي تانىتا الامىز؟
10. ادامنىڭ رۋحاني ساۋىعۋىنا كومەكتەسكەن كەزدە، شىدامدىلىق تانىتۋ قانشالىقتى ماڭىزدى؟
10 ادامنىڭ رۋحاني ساۋىعۋىنا كوپ ۋاقىت قاجەت. سوندىقتان ٴبىزدىڭ شىدامدى بولعانىمىز اسا ماڭىزدى. قاۋىمعا قايتا ورالعانداردىڭ كوبىسى بىردەن ەمەس، اقساقالدار مەن باۋىرلاستار قايتا-قايتا كەلگەننەن كەيىن عانا ورالعاندارىن ايتادى. ازيادا تۇراتىن نەنسي باۋىرلاس بىلاي دەيدى: «قاۋىمداعى جاقىن قۇربىم ماعان كوپ كومەكتەستى. ول مەنى ٶز سىڭلىسىندەي جاقسى كوردى. ول بۇرىن بىرگە وتكىزگەن جاقسى كەزدەرىمىزدى ەسىمە سالدى. ىشتەگى سەزىمدەرىمدى شىداممەن تىڭدادى جانە كەڭەس بەرۋدەن تارتىنبادى. ول ماعان كەز كەلگەن ۋاقىتتا كومەككە كەلەتىن ناعىز دوس بولا ٴبىلدى».
11. جاندارى جارالى باۋىرلاستارعا كومەكتەسۋ ٷشىن نەلىكتەن جاناشىرلىق قاجەت؟
11 جاناشىرلىق قاسيەتى جارالى جاندى ەمدەيتىن شيپاماي ىسپەتتى. قاۋىمنان قول ۇزگەندەردىڭ كەيبىرى قاۋىمداعى بىرەۋگە رەنجىپ، جىلدار بويى سول وكپەسىنەن ارىلماعان. بۇنداي سەزىم ەحوباعا قايتا ورالۋعا دەگەن قالاۋدى تۇنشىقتىرادى. بالكىم، كەيبىرەۋلەر ادىلەتسىزدىك كورگەندەي سەزىنەتىن شىعار. بۇنداي باۋىرلاستار وزدەرىن تىڭدايتىن جانە سەزىمدەرىن تۇسىنەتىن بىرەۋگە مۇقتاج بولۋى مۇمكىن (جاق. 1:19). ٴبىر كەزدەرى قاۋىمنان قول ٷزىپ قالعان ماريا بىلاي دەيدى: «مەن بىرەۋدىڭ مەنى تىڭداعانىنا، جۇباتقانىنا، كەڭەس بەرىپ، كومەكتەسكەنىنە ٴزارۋ بولدىم».
12. ەحوبا قاۋىمنان قول ۇزگەندەردى سۇيىسپەنشىلىگىمەن قالاي وزىنە جاقىنداتىپ تارتاتىنىن مىسالمەن ٴتۇسىندىرىڭىز.
12 كيەلى كىتاپتا ەحوبانىڭ ٶز حالقىن سۇيىسپەنشىلىكپەن جەتەلەپ، وزىنە جاقىنداتىپ تارتاتىنى ايتىلعان. ول مۇنى قالاي ىستەيدى؟ مىناداي جاعدايدى ەلەستەتىپ كورەيىك: ٴسىز بۋىرقانعان تەڭىزدىڭ ورتاسىندا سۋعا باتىپ بارا جاتىرسىز. سوندا بىرەۋ سىزگە قۇتقارۋ شەڭبەرىن لاقتىرادى. ٴسىز بۇعان قۋانىپ كەتەسىز، ويتكەنى سونىڭ ارقاسىندا باتپاي، سۋ بەتىندە قالقىپ تۇرا الاسىز. الايدا امان قالۋ ٷشىن بۇل جەتكىلىكسىز. سۋ وتە سۋىق بولعاندىقتان، ٴسىز قايىققا جەتىپ الۋىڭىز كەرەك. ٴبىراق ول ٷشىن بىرەۋ ٴجىپ نە ارقان لاقتىرىپ، ٴسىزدى تارتىپ شىعارىپ الۋ كەرەك. ەحوبا كەزىندە وزىنەن الشاقتاپ كەتكەن يسرايلدىكتەر جايلى: «مەن ولاردى... سۇيىسپەنشىلىكتىڭ جىبىمەن جەتەلەپ ٴجۇردىم»،— دەگەن (وشيا 11:4). بۇگىندە ەحوبا وزىنە قىزمەت ەتپەي كەتكەن جانە قيىندىقتارعا باتىپ جۇرگەن باۋىرلاستارعا تۋرا وسىلاي قارايدى. ەحوبا ولاردى جاقسى كورەدى جانە ولاردى وزىنە جاقىنداتىپ تارتقىسى كەلەدى. ولارعا سۇيىسپەنشىلىگىن كورسەتۋ ٷشىن ەحوبا ٴسىزدى قولدانۋى مۇمكىن.
13. باۋىرلاستىق سۇيىسپەنشىلىكتىڭ كۇشىن كورسەتەتىن ٴبىر وقيعانى ايتىپ بەرىڭىز.
13 قاۋىمنان قول ٷزىپ، ۋاعىزداۋدى دوعارعان باۋىرلاستارعا ەحوبانىڭ ولاردى جاقسى كورەتىنىن ايتىپ وتىرعانىمىز ماڭىزدى. ٶزىمىز دە ولارعا سۇيىسپەنشىلىگىمىزدى كورسەتە بەرۋىمىز كەرەك. وتكەن ماقالادا ايتىلعان پابلو 30 جىلدان اسا ۋاقىت بويى قاۋىمنان جىراقتا جۇرگەن. ول بىلاي دەيدى: «بىردە تاڭەرتەڭ ۇيدەن شىعىپ بارا جاتقانىمدا، ٴبىر مەيىرىمدى قارت ايەل باۋىرلاس مەنى كورىپ، وتە جۇمساق مانەردە سويلەستى. مەن جاس بالاشا جىلاي باستادىم. مەن ول باۋىرلاسقا ونى ماعان ەحوبانىڭ ٶزى جىبەرگەنىن ايتتىم. سول ساتتە مەن ەحوباعا ورالامىن دەپ شەشتىم».
السىزدەرگە سۇيىسپەنشىلىكپەن قولداۋ كورسەتەيىك
14. لۇقا 15:4، 5 تەگى مىسالدا باعۋشى قويى تابىلعاندا نە ىستەدى؟
14 قاۋىمنان الشاقتاپ كەتكەن باۋىرلاستاردى تاپقاننان كەيىن، ولارعا ۇزدىكسىز قولداۋ كورسەتە بەرۋىمىز كەرەك. يسانىڭ مىسالىنداعى اداسقان ۇل سياقتى ولاردىڭ دا كوڭىلدەرى قاجىپ جۇرگەن بولۋى مۇمكىن. بالكىم، ولار شايتاننىڭ دۇنيەسىندە جۇرگەندىكتەن، رۋحاني ٵلسىز شىعار. ٴبىز ولارعا ەحوباعا دەگەن سەنىمدەرىن قايتادان نىعايتۋعا كومەكتەسۋىمىز كەرەك. ال جوعالعان قوي جايلى مىسالىندا يسا باعۋشىنىڭ قويدى ٶز يىعىنا سالىپ، وتارعا اكەلگەنىن ايتقان. بۇل باعۋشى جوعالعان قويىن تابۋعا كوپ ۋاقىتى مەن كۇشىن جۇمسادى. ٴبىراق ول قويدى تاۋىپ قانا قويماي، ونىڭ ٶز كۇشىمەن وتارعا قايتا المايتىندىعىن ٴتۇسىنىپ، قويدى كوتەرىپ اكەلدى (لۇقا 15:4، 5 وقىڭىز).
15. ەحوباعا قايتا ورالعىسى كەلەتىن رۋحاني ٵلسىز باۋىرلاستارعا قالاي قولداۋ كورسەتە الامىز؟ (« باعا جەتپەس قۇرال» دەگەن قورشاۋدى قاراڭىز.)
15 باۋىرلاستارعا قاۋىمعا ورالۋعا كەدەرگى بولىپ جاتقان السىزدىكتەرىن جەڭۋگە كومەكتەسۋ ٷشىن، كوپ ۋاقىت پەن كۇش جۇمساۋىمىز قاجەت بولۋى مۇمكىن. ەحوبانىڭ كيەلى رۋحىنىڭ، كيەلى كىتاپتىڭ جانە ۇيىم شىعاراتىن ادەبيەتتەردىڭ كومەگىمەن ٴبىز ولارعا قايتادان رۋحاني مىقتى بولۋعا كومەكتەسە الامىز (ريم. 15:1). بۇنى قالاي ىستەسەك بولادى؟ ٴبىر تاجىريبەلى اقساقال بىلاي دەيدى: «قاۋىمنان قول ۇزگەندەر ەحوباعا قايتا ورالۋدى نىق شەشىپ جاتسا، ولاردىڭ كوبىسىمەن كيەلى كىتاپتى زەرتتەۋ * قاجەت بولىپ جاتادى». ەگەر اقساقال سىزدەن وسىنداي باۋىرلاسپەن زەرتتەۋدى سۇراسا، بۇعان قۋانا-قۋانا كەلىسىڭىز. الگى اقساقال تاعى بىلاي دەپ قوستى: «زەرتتەۋدى جۇرگىزەتىن باۋىرلاس زەرتتەۋشى سەنىم ارتا الاتىنداي جاقسى دوس بولا ٴبىلۋ كەرەك».
كوكتەگى قۋانىش پەن جەردەگى قۋانىش
16. بىزگە پەرىشتەلەردىڭ كومەكتەسەتىنىن قايدان بىلەمىز؟
16 ەحوباعا قايتۋدى اڭسايتىن باۋىرلاستاردى تابۋعا پەرىشتەلەر دە ۇلەس قوساتىنى كوپ جاعدايلاردان كورىنەدى (ايان 14:6). مىسالى، ەكۆادوردا تۇراتىن سيلۆيو ەحوباعا بار جۇرەگىمەن دۇعا ەتىپ، قاۋىمعا قايتۋعا كومەكتەسۋىن سۇراعان ەكەن. ول ٵلى دە دۇعا ەتىپ جاتقاندا، ەسىك قاعىلادى. قاراسا، ەكى اقساقال كەلىپ تۇر ەكەن. سول كەزدەن باستاپ اقساقالدار وعان قاجەتتى كومەكتى كورسەتەدى.
17. رۋحاني السىزدەرگە كومەكتەسۋ ٴبىزدى قانداي سەزىمگە بولەيدى؟
17 رۋحاني ٵلسىز باۋىرلاستارعا ەحوباعا قايتۋعا كومەكتەسسەك، زور قۋانىشقا كەنەلەمىز. سالۆادور دەگەن ٸزاشار قاۋىمنان قول ٷزىپ قالعاندارعا كوپ كوڭىل بولۋگە تىرىسادى ەكەن. ول بىلاي دەيدى: «كەيدە قۋانىشتان كوزىمە جاس كەلەدى. ەحوبا تاعى ٴبىر باعالى قىزمەتشىسىن شايتاننىڭ دۇنيەسىنەن الىپ شىققانىن جانە وسى ورايدا ەحوبامەن قىزمەتتەس بولعانىمدى ويلاسام، بويىمدى شەكسىز قۋانىش كەرنەيدى» (ەل. ٸس. 20:35).
18. ٴسىز دە قاۋىمنان قول ٷزىپ قالعان بولساڭىز، نە نارسەگە سەنىمدى بولا الاسىز؟
18 ەگەر ٴسىز ەحوبانىڭ حالقىنان اجىراپ قالعانداردىڭ ٴبىرى بولساڭىز، ەحوبانىڭ ٴسىزدى ٵلى دە جاقسى كورەتىنىنە سەنىمدى بولىڭىز. ول ٴسىزدىڭ ورالعانىڭىزدى قالايدى. وعان ورالۋ ٷشىن ٶز تاراپىڭىزدان ارەكەت ەتۋىڭىز كەرەك بولادى. ٴبىراق يسانىڭ مىسالىنداعى اكە ىسپەتتى ەحوبا دا ٴسىزدىڭ جولىڭىزعا قاراپ ٴجۇر. ول ٴسىزدى قۇشاق جايا قارسى الۋعا دايىن!
103-ٵن باعۋشىلار — قۇدايدىڭ سيى
^ 5-ابزاس ەحوبا قاۋىمنان قول ٷزىپ قالعاندار وزىنە قايتا ورالسا ەكەن دەيدى. ٴبىز ەحوبانىڭ «ماعان قايتا ورالىڭدار» دەگەن شاقىرۋىن قابىل العىسى كەلگەندەرگە كومەكتەسۋ ٷشىن، كوپ نارسە ىستەي الامىز. بۇل ماقالادان ولارعا قالاي كومەكتەسە الاتىنىمىز جايلى بىلەمىز.
^ 7-ابزاس كەيبىر ەسىمدەر وزگەرتىلگەن.
^ 15-ابزاس قاۋىمنان قول ٷزىپ، ۋاعىزداۋدى دوعارعان كەيبىر باۋىرلاستار «قۇداي سۇيىسپەنشىلىگىنە بولەنە بەرىڭىز» دەگەن كىتاپتىڭ كەيبىر بولىكتەرىن زەرتتەسە، كەيبىرى «ەحوباعا جاقىندا» (حانزۇشا) كىتابىنىڭ كەيبىر تاراۋلارىن قاراستىرۋى مۇمكىن. مۇنداي زەرتتەۋدى كىم جۇرگىزەتىنىن قاۋىمنىڭ قىزمەت كوميتەتى شەشەدى.
^ 68-ابزاس سۋرەت سيپاتتاماسى: ٷش باۋىرلاس قاۋىمعا ورالعىسى كەلەتىن باۋىرلاسقا كومەكتەسۋدە. ولار ونىمەن حابارلاسىپ تۇرادى، ونى جاقسى كورەتىنىن كورسەتەدى جانە ونى تۇسىنىكپەن تىڭدايدى.
