1. Йаһоԝа чь тʹәхмин дькә, гава хьзмәткʹарәки ԝи вәдьгәрʹә щәм ԝи?

ЧАԜА мә готара пешийа веда шеԝьр кьр, Йаһоԝа хԝә бәрамбәри шьване ԛәнщ дькә, йе кӧ бь дьл у щан бона пәзед хԝә хәм дькә. У әԝ һәр кәсе кӧ жь рʹийа рʹаст дур кʹәтийә, дьгәрʹә. Йаһоԝа готә Исраелийед кӧ әԝ һиштьн: «Вәгәрʹьн мьн, әзе жи вәгәрʹьм ԝә». Әм заньн, ԝәки иро жи Йаһоԝа ӧса йә, чьмки әԝи хԝәха гот, кӧ әԝ найе гӧһастьне (Малх. 3:6, 7). Иса гот кӧ Йаһоԝа у мәләк гәләк ша дьбьн, чахе һәма хьзмәткʹарәки жи вәдьгәрʹә щәм Хԝәде (Луԛа 15:10, 32).

2. Әме ве готареда дәрһәԛа чь шеԝьр кьн?

² Ԝәрә әм дәрһәԛа се мәсәлед Иса шеԝьр кьн, кʹижан нишан дькьн, кӧ ча али ԝан хушк-бьра бькьн, йед кӧ жь Йаһоԝа дур кʹәтьнә. Әме ӧса жи пебьһʹәсьн дәрһәԛа ԝан һʹӧнӧра, кʹижан кӧ мәрʹа лазьм ьн, ԝәки али пәзед ӧндабуйи бькьн кӧ вәгәрʹьн щәм Йаһоԝа. У әме бьвиньн кӧ чьрʹа һежа йә, ԝәки әм али йед сьст бькьн.

3-4. Чьрʹа әԝ кʹӧлфәт, дәрһәԛа кʹижани Луԛа 15:8-10-да те готьне, драһма хԝәйә ӧндабуйи рʹьнд дьгәрʹийа?

³ Сәва әм ван мәрьва бьгәрʹьн, йед кӧ дьхԝазьн вәгәрʹьн щәм Йаһоԝа, һьнәки щәфа лазьм ә. Кʹьтеба Луԛада Иса мәтʹәлок ани дәрһәԛа кʹӧлфәтәке, йа кӧ драхма демәк поләки зиви ԛимәт, ӧнда кьрьбу. Әԝ мәтʹәлок мәрʹа әʹйан дькә, ԝәки сәва кӧ тьштәки бьгәрʹьн, щәфа лазьм ә. (Бьхунә Луԛа 15:8-10.)

⁴ Иса гьли дькә кӧ әԝ кʹӧлфәт чь тʹәхмин дькә, гава әви поле ӧндабуйи дьвинә. Ԝәʹде Исада, чахе ԛизәке мер дькьр, дийа ԝе рʹожа дәʹԝате щара ча щьһез дәһә драһма дьда ԛиза хԝә. Дьԛәԝьмә ве мәтʹәлокеда һәма әв драһма ӧнда бьбу, йа кӧ де пʹешкʹеши ԝе кьрьбу. Әԝ кʹӧлфәт дьфькьри, кӧ әв пол кʹәтийә әʹрде, ләма жи әԝ чʹьра хԝә ведьхә у дьгәрʹә, ле навинә. Әԝ чʹьра ԝейә пе бьзьр, епʹещә шәԝԛ надә,  ԝәки әв пола зив бьвинә. Ахьрийеда чахе әԝ мале гези дькә, нава тʹозеда драһма хԝәйә ԛимәт дьвинә, кӧ жь шәԝԛа чʹьре дьбьрьԛә. Әԝ ӧса ша дьбә кӧ гази һәвал у щинаред хԝә дькә, ԝәки ԝанрʹа бежә, кӧ әԝе пола хԝә дитийә.

5. Чьрʹа лазьм ә һьнәки щәфа бькʹьшиньн, сәва ԝан хушк-бьра бьвиньн, йед кӧ жь щьвате дур кʹәтьнә?

⁵ Ль гора ве мәтʹәлока Иса, рʹасти жи һьнәки зәʹмәт лазьм ә, ԝәки тьште ӧндабуйи бьвиньн. Мәрʹа жи дьбәкә лазьм ә һьнәки щәфе бькʹьшиньн, ԝәки ԝан хушк-бьра бьвиньн, йед кӧ жь щьвате дур кʹәтьнә. Дьԛәԝьмә ида гәләк сал дәрбаз бунә, кӧ ԝана хьзмәтийа хԝә данә сәкьнандьне. Әԝана дьԛәԝьмә дәрбази ԝи щийи бунә, кʹидәре хушк-бьра ԝана нас накьн. У жь ԝана һьнәк, гәләк дьхԝазьн вәгәрʹьн щәм Йаһоԝа. Әԝана дьхԝазьн тʹәви малбәта хԝәйә рʹӧһʹани Йаһоԝарʹа хьзмәт бькьн, ле ԝанрʹа аликʹари лазьм ә.

6. Ча тʹәмамийа щьвате дькарә аликʹарийе бьдә легәрʹина ԝан хушк-бьрада, йед кӧ хьзмәтийа хԝә данә сәкьнандьне?

⁶ Кʹе дькарә ԝан хушк-бьред кӧ жь щьвате дур кʹәтьнә, бьгәрʹә? Гьшк, демәк рʹуспи, пешәнг, нәфәред мале, у хушк-бьред щьвате дькарьн ве йәкеда аликʹарийе бьдьн. Дьбәкә һәвал йан мәрьвед ԝәйи незик хьзмәтийа хԝә данә сәкьнандьне. Йан жи дьбәкә һун мал бь мал, йан ԝәʹде хьзмәтийа бәр стенде, рʹасти ԝан бен. Ԝанрʹа бежьн кӧ һәрге әԝана ԛайил ьн ԝәки кәсәк тʹәсәлийа ԝан бькә, әме бь шабун адрес йан һәжмара тʹела ԝан, бьдьнә рʹуспийед мьһала ԝан.

7. Һун жь мәсәла Томас чь һин дьбьн?

⁷ Ле рʹуспи чь дькарьн бькьн, ԝәки али ԝан хушк-бьра бькьн, йед кӧ дьхԝазьн вәгәрʹьн щәм Йаһоԝа? Дина хԝә бьдьнә мәсәла Томас *, рʹуспики жь Испанйайе. Әԝи али 40 хушк-бьра кьр, кӧ вәгәрʹьн щьвате. Әԝ дьбежә: «Пешийе әз жь хушк-бьра дьпьрсьм, ԝәки әԝед ӧндабуйи ньһа кʹидәре дьжин. Йан жи дьбежьм, ԝәки биньн бира хԝә, һәла кʹе ида гәләк ԝәхт найе щьвате. Хушк-бьра бь дьл у щан ве йәкеда аликʹарийе дьдьн, чьмки әԝана жи легәрʹинеда кʹомәке дьдьн. Паше әз тʹәсәлийа ԝан хушк-бьра дькьм, йед кӧ жь щьвате дур кʹәтьн, у дьпьрсьм һәла зарʹ у мәрьвед ԝани незик ча ньн. Һьнәк жь ԝан хушк-бьра бәре тʹәви зарʹед хԝә дьһатьнә щьвате, у әԝ зарʹ дьбәкә ԝәʹдәки мьзгинван бун. Ԝанрʹа жи аликʹари лазьм ә, ԝәки вәгәрʹьн щәм Йаһоԝа».

8. Мәтʹәлока дәрһәԛа кӧрʹе ӧндабуйида, кӧ Луԛа 15:17-24-да те гьликьрьне, бав ча хԝә да кʹьфше һьндава кӧрʹе хԝәйи кӧ тʹобә кьр?

⁸ Ле кʹижан һʹӧнӧр мәрʹа лазьм ьн, ԝәки али ԝан бькьн, йед кӧ дьхԝазьм вәгәрʹьн щәм Йаһоԝа? Дина хԝә бьдьне, жь мәтʹәлока Иса дәрһәԛа кӧрʹе кӧ жь мал чу, әм чь дькарьн һин бьн. (Бьхунә Луԛа 15:17-24.) Иса шьровәдькә кӧ әв кӧрʹ ахьрийеда һатә сәр һʹьше хԝә у сафи кьр вәгәрʹә мала хԝә. Бав дьрʹәвә пешийа кӧрʹ, ле һʹәмез дькә у һʹьзкьрьна хԝә ԝирʹа дьдә кʹьфше. Исафа кӧрʹ ԝи дьчәрчьранд у әԝи гот кӧ һежайи кӧрʹтийа баве хԝә нинә. Ле гава бав әԝ йәк бьһист, дьле ԝи шәԝьти. Паше бав пе кьред хԝә избат кьр, ԝәки ша йә кӧ әԝ вәгәрʹийа мал, у ԝи ԛәбул кьр нә кӧ ча пʹалә, ле ча кӧрʹе хԝәйи дәлал. Әԝи сьфрәкә гәләк мәзьн вәкьр у чӧхе лапи рʹьнд кӧрʹе хԝә кьр, йе кӧ тʹобә кьр.

9. Кʹижан һʹӧнӧр мәрʹа лазьм ьн кӧ али хушк-бьра бькьн, ԝәки вәгәрʹьн щәм Йаһоԝа? (Бьньһерʹә чаргошә « Ча Али Ԝан Бькьн, йед кӧ Дьхԝазьн Вәгәрʹьн»).

⁹ Йаһоԝа жи мина ԝи баве жь мәтʹәлоке, зарʹед хԝәйә кӧ дьхԝазьн вәгәрʹьн щәм ԝи, гәләк һʹьз дькә. Һәрге әм чʹәʹв бьдьнә  Йаһоԝа, әме бькарьбьн али ԝан хушк-бьра бькьн, ԝәки вәгәрʹьнә щьвате. Ле бона ве йәкә, әм гәрәке дьлшәԝат бьн, бь сәбьр у бь һʹьзкьрьн бьн. Чьрʹа әв һʹӧнӧр ӧса фәрз ьн, у әм ча дькарьн ԝан һʹӧнӧра бьдьнә кʹьфше?

10. Чьрʹа сәбьр лазьм ә сәва али ԝан бькьн, йед кӧ жь щьвате дур кʹәтьнә?

¹⁰ Әм гәрәке бь сәбьр бьн, чьмки ԝәʹдә лазьм ә, ԝәки мәрьв вәгәрʹә щәм Йаһоԝа. Гәләк хушк-бьред кӧ вәгәрʹийанә щьвате, гьли дькьн кӧ рʹуспи у хушк-бьред щьвате гәләк щар тʹәсәлийа ԝан дькьрьн, у әве йәке ԝана һелан кьр, кӧ вәгәрʹьнә щьвате. Ненси, хушкәкә жь Асйайе, ньвиси: «Һәвала мьнә незик жь щьвате, гәләк али мьн кьр. Әԝе әз ча хушка хԝәйә мәзьн һʹьз дькьрьм. Әԝе тʹьме дьани бира мьн, кӧ бәре мә ԝәʹдә ча хԝәш дәрбаз дькьр. Чахе мьн дьле хԝә жерʹа вәдькьр, әԝе бь сәбьр гӧһ дьда мьн у әз ширәт жи дькьрьм. Әԝе избат кьр ԝәки һәваләкә баш ә у һазьр ә һәр гав аликʹарийе бьдә».

11. Чьрʹа әм гәрәке дьлшәԝат бьн һьндава ԝанда, йед кӧ щьватеда жь кәсәки хәйидинә?

¹¹ Дьлшәԝати әԝ һәйә дәрманәкә ԛәԝи, кӧ дькарә али мәрьвед дьлбьриндар бькә. Һьнә хушк-бьра жь щьвате дур кʹәтьнә, чьмки бь сала пешда, щьватеда әԝана данә хәйидандьне, жь бо ве йәке әԝана һʹәта ньһа һерс ьн у нькарьн әԝе йәке бир кьн. У дьбәкә һьнәк дьфькьрьн, кӧ һьндава ԝанда нәһәԛи һатийә кьрьнә. Әԝ һәр тьшт рʹе ԝан дьгьрә, кӧ вәгәрʹьн щәм Йаһоԝа. Ләма жи әԝана һʹәԝщә нә, кӧ кәсәк гӧһ бьдә ԝан у ԝана фәʹм кә (Аԛуб 1:19). Мариа, йа кӧ ԝәхтәки жь щьвате дур кʹәтьбу, гьли дькә: «Мьн дьхԝәст кәсәк гӧһе хԝә бьдә мьн, бәр дьле мьнда бе, у али мьн бькә».

12. Чь щурʹәйи һʹьзкьрьна Йаһоԝа мина тʹоге йә?

 ¹² Кʹьтеба Пироз һʹьзкьрьна Йаһоԝа бәрамбәри тʹоге дькә. Ле әԝ чь щурʹәйи мина тʹоге йә? Дина хԝә бьдьнә ве мәсәле: Бьдьнә бәр чʹәʹве хԝә, ԝәки һун бәʹреда, йа кӧ пʹелед ԝе рʹабунә, дьхәньԛьн у кәсәк еләк давежә бал ԝә. Бешьк, һуне жь ԝи кәси гәләк рʹази бьн, чьмки һуне бькарьбьн хԝә сәр аве хԝәй кьн. Ле сәва әʹмьре хԝә хьлаз кьн, тʹәне еләк бәс нинә. Ав гәләк сар ә, ләма жи һʹәта һун нәгьһижьнә ԛәйька бона хьлазкьрьне, һуне хьлаз нәбьн. Лазьм ә кәсәк тʹоге бавежә бал ԝә у ԝә бькʹьшинә бәрбь ԛәйьке. Йаһоԝа готә Исраелийед кӧ жь ԝи дур кʹәтьбун: «Мьн ԝана бь тʹога һʹьзкьрьне дькʹьшанд» (Һос. 11:4, ДТʹ). Хԝәде иро жи ӧса нә һьндава ԝанда, йед кӧ жь ԝи дур кʹәтьнә, у проблем у хәмед хԝәда дьхәньԛьн. Йаһоԝа дьхԝазә әԝана бьзаньбьн, кӧ әԝ ԝана гәләк һʹьз дькә, у дьхԝазә ԝана бькʹьшиньнә щәм хԝә. Йаһоԝа дькарә бь сайа ԝә һʹьзкьрьна хԝә ԝанрʹа нишан кә.

13. Сәрһатийа Пабло ча нишан дькә, кӧ ԛәԝата һʹьзкьрьне гәләк мәзьн ә?

¹³ Гәләк фәрз ә тʹьме ԝана, йед кӧ хьзмәтийа хԝә данә сәкьнандьне, бьдьнә баԝәркьрьне, ԝәки Йаһоԝа у ӧса жи әм ԝана гәләк һʹьз дькьн. Пабло, дәрһәԛа кʹижани готара пешийа веда һатә готьне, 30 сала зедәтьр нәдьһатә щьвате. Әԝ дьбежә: «Щарәке шәбәԛе чахе әз жь мал дәркʹәтьм, хушкәкә гәләк ширьн кӧ әʹмьрда мәзьн ә, рʹасти мьн һат у ӧса бь һʹьзкьрьн тʹәви мьн хәбәр да, кӧ әз мина зарʹа бьчʹук гьрийам. Мьн жерʹа гот, ԝәки Йаһоԝа әԝ шандийә щәм мьн, кӧ тʹәви мьн хәбәр дә. Һәма ве дәме мьн хԝәрʹа ԛьрар кьр, кӧ вәгәрʹьм щәм Йаһоԝа».

14. Ль гора мәтʹәлока жь Луԛа 15:4, 5, шьван чь кьр паши ве йәке, чахе пәза ӧндабуйи дит?

¹⁴ Әм гәрәке тʹьме хушк-бьред кӧ жь щьвате дур кʹәтьнә, бьшьдиньн у али ԝан бькьн. Әԝана жи дьбәкә мина кӧрʹе ӧндабуйи мәтʹәлока Исада, дьлшкәсти нә. Фәʹмдари йә, әԝана рʹӧһʹанида жи сьст ьн, чьмки ве дьнйа Шәйтʹанда бе Йаһоԝа нә. Ләма жи ԝанрʹа аликʹари лазьм ә, ԝәки диса баԝәрийа хԝә һьндава Йаһоԝа ԛәԝи кьн. Иса мәтʹәлока дәрһәԛа пәза ӧндабуйида гьли дькә, кӧ шьван ве һьлдьдә һʹәмеза хԝә у дьбә дькә нав кәри. Шьван епʹещә ԝәʹдә хәрщ кьрийә у щәфа кʹьшандийә һʹәта кӧ әԝ дитийә. Ле паше әԝ фәʹм дькә, кӧ гәрәке әве пәзе бьвә бькә нав кәри, чьмкʹи ԛәԝата ԝе тʹӧнә йә кӧ хԝәха вәгәрʹә. (Бьхунә Луԛа 15:4, 5.)

15. Әм ча дькарьн али сьста бькьн, йед кӧ дьхԝазьн вәгәрʹьн щәм Йаһоԝа? (Бьньһерʹә чаргошә « Һʹащәтәкә Пʹьрʹ Ԛимәт».)

¹⁵ Мәрʹа жи дьбәкә епʹещә ԝәʹдә у щәфа лазьм бә, ԝәки али йед сьст бькьн кӧ бькарьбьн вәгәрʹьн щәм Йаһоԝа. Әм дькарьн бь сайа рʹӧһʹе Йаһоԝайи пироз, Хәбәра ԝи, у әʹдәбйәтед кӧ әм щьватеда дьстиньн, али ԝан бькьн кӧ диса рʹӧһʹанида ԛәԝи бьн (Рʹом. 15:1). Ле ча ве йәке бькьн? Рʹуспики щерʹьбанди гот: «Һʹәчʹи зәʹф йед кӧ бь рʹасти дьхԝазьн вәгәрʹьн щәм Йаһоԝа, һʹәԝще һинбуна Кʹьтеба Пироз ьн». * Һәрге рʹуспи ԝәрʹа бежьн, кӧ тʹәви фьланкәсе һинбуна Кʹьтеба Пироз дәрбаз кьн, бь дьл у щан ве щабдарийе  ԛәбул кьн. Әви рʹуспийи ӧса жи гот: «Мьзгинване кӧ һинбуне дәрбаз кә, гәрәке бьбә һәвале баш, ԝәки әԝ хушк йан бьра итʹбарийа хԝә ԝи биньн у бькарьбьн дьле хԝә вәкьн».

16. Әм жь кʹӧ заньн ԝәки мәләк али мә дькьн?

¹⁶ Гәләк мәсәлә нишан дькьн, кӧ мәләк жи кʹомәке дьдьнә мә, ԝәки әм ԝан хушк-бьра бьвиньн, йед кӧ дьхԝазьн вәгәрʹьн щәм Йаһоԝа (Әʹйан. 14:6). Мәсәлә, Силвио жь Әкԝадоре, дӧа-дьрозгә дькьр, ԝәки Йаһоԝа кәсәки бьшинә щәм ԝи кӧ али ԝи бькә ԝәки әԝ вәгәрʹә щьвате. Чахе әԝи дӧа дькьр, һәма ве дәме кәсәк дәри хьст. Әԝ дӧ рʹуспи бун. Ԝәʹде ве сәрледане, әԝ рʹуспи гәләк ша бун, кӧ ԝе аликʹарийе бьдьнә ԝи, чьда әԝ һʹәԝщә йә.

17. Әме чь кʹаре бьстиньн һәрге али хушк-бьред рʹӧһʹанида сьст бькьн?

¹⁷ Дьле мә ша дьбә чахе әм али йед рʹӧһʹанида сьст дькьн, кӧ вәгәрʹьн щәм Йаһоԝа. Пешәнгәк наве кʹижани Салвадор ә, кӧ дина хԝә дьдә сәр хушк-бьред рʹӧһʹанида сьст, ӧса дьбежә: «Щара, әз жь шабуне нькарьм һесьре хԝә бьгьрьм. Дьле мьн ша дьбә чахе әз дьфькьрьм, кӧ Йаһоԝа ча жь ве дьнйа Шәйтʹан пәзәкә хԝә хьлаз кьр, у ԛәдьрәки ӧса дайә мьн, кӧ әз тʹәви Ԝи ве йәкеда һәвкʹарийе дькьм» (Кʹар. Шанд. 20:35).

18. Һәрге һун жь Йаһоԝа дур кʹәтьнә, чьда һун гәрәке дӧдьли нәбьн?

¹⁸ Һәрге һун жь щьмәʹта Йаһоԝа дур кʹәтьнә, дӧдьли нәбьн, ԝәки Йаһоԝа диса ԝә һʹьз дькә. Әԝ дьхԝазә һун вәгәрʹьн щәм ԝи. Ле бона ве йәке һун гәрәке һьнә гава бавежьн. Бәле, мина баве жь мәтʹәлока Иса, чʹәʹве Йаһоԝа тʹьме рʹийа ԝә йә у ԝе бь дьл у щан ԝә ԛәбул кә мала хԝә.