OMWATSI W’ERIGHA 26
“Munyisubeko”
“Munyisubeko, naghe nasyabasubako.”—MAL. 3:7.
OLHWIMBO 102 “Muwathikaye Abatseke”
EBIKENDI KANIBWAKO *
1. Yehova akayowa athi embuli yiwe yikamusubako?
NGOKU thwanakanaya omo mwatsi owahwere, Yehova akayilinganisaya n’omulisya mubuya oyukabuya-buya obuli mbuli yiwe. Kandi akasondekanaya owosi-wosi oyukathalha. Yehova mwabwira Abaisraeli ababya ibabirimusighania athi: “Munyisubeko, naghe nasyabasubako.” Thunasi ngoku akinayowa athya kundi akabugha athi: “Sindibinduka.” (Mal. 3:6, 7) Yesu mwabugha athi Yehova n’abamalaika bakatsema kutsibu omughuma w’okwa baghombe biwe akamusubako.—Lk. 15:10, 32.
2. Omo mwatsi ono thukendi kania okuki?
2 Thukanaye okw’isathu y’okwa misyo ya Yesu eyikakanganaya ngoku thwanga wathikya ababiriyisununulha oku Yehova. Thukendi lebya emibere mirebe eyo thukayithagha erithoka eriwathikya embuli eyithere erisuba oku Yehova. Kandi thukendi lhangira ekikaleka ikyabya ikikatsemesaya eriwathikya ababirisebebera.
ERISONDEKANIA EKINUSU EKYATHALHA
3-4. Ni kyahi ekyaleka omukali oyuli omu Luka 15:8-10, iniasondya ndeke ekinusu kiwe ekyathalha?
3 Thutholere ithwahiraho akaghalha eribana abanzire erisuba oku Yehova. Omwa musyo owali omwa Njiri ya Luka, Yesu mwakania ngoku omukali asondekanaya ekindu ky’obughuli ekyo athalhaya ekikahulhawamo drakima. Omusyo oyu akahira omuwatho w’okw’isondekania.—Soma Luka 15:8-10.
4 Yesu akakanaya ngoku omukali ayowa akabana ekinusu kiwe ekyathalha. Omwa buthuku bwa Yesu, abandi bamama Abayuda kikalhangirika ibakaha abaana babu b’obukali b’ebinusu ikumi by’edrakima bakathahibwa. Obundi ekinusu ekyo kyabya kighuma ky’okwa biri ng’ebyo. Omukali akalengekanaya athi mbwino ekinusu mukikathogheghera ahisi. Neryo akakaya etara n’erikisondya, aliwe akakibulha. Etara yiwe yanganaghana erikolerya ndeke eribana akanusu k’efeza ako. Neryo akathwamu eribirya enyumba eyosi inianemulebya ndeke. Omwa muthaka ogho alyabiraya akalhangira mw’ekinusu kiwe ky’obughuli ikinemukangabasania busana n’ekyakakalha ky’etara yiwe. Akatsema! Akabirikira banywani biwe n’abataka eribabwira ku amakibana.
5. Busana naki kyangana kalha eribana ababirisighania ekithunga?
5 Ngoku thwamalhangira omwa musyo wa Yesu, kikayithagha akaghalha eribana ekindu ekyabirithalha. Nethu thwangana yithagha erihiraho akaghalha eribana ababirisighania ekithunga. Hanganabya ihamabirilhaba myaka mingyi isibakiri bughuma nethu. Banganabya ibabirihumira n’omwa bulhambu eyo balikyethu bathabasi. Aliwe obundi lino abaghuma b’okwa bandu aba banzire ibasuba oku Yehova. Banzire erikolera Yehova ibane haghuma n’abaramya balikyabo, aliwe bakayithagha obuwathikya bwethu.
6. Abosi abali omwa kithunga bangasangira bathi omw’isondya ababirisebebera?
6 Ni bahi abanga sangira omw’isondekania ababirisebebera? Ithwe bosi—abasyakulhu, abatemburi, abahughu babu, n’abathuliri—thwangana wathikya omw’ibasondekania. Wunawithe omunywani kutse omuhughu oyuwabirisebebera? Wunewabana oyuwabirisebebera wukathulira nyumba okwa nyumba kutse ahakabya abandu bangyi? Mubwire wuthi amabya iniananzire eribungirwa, iwukendi tsema eriha abasyakulhu b’ekithunga kyenyu b’enamba yiwe y’esimu kutse eribabwira aho akabanika.
7. Wuk’ighaki okwa bya musyakulhu ya Thomas akabugha?
7 Kutsibu-tsibu ni byahi ebyo basyakulhu bangakolha eribana abanzire erisuba oku Yehova? Lhangira ebya omusyakulhu oyukahulhawamo Thomas, * oyuwikere e Spain akabugha. Abiriwathikya Abema abalhabire oku 40 erisuba omwa kithunga. Thomas akabugha athi: “Ngatsuka eribulya balikyethu muthina-muthina nga banasi aho abandu abo bikere. Kutse hakanayira inabulya abathuliri nga banasi owosi-wosi oyuthakihindana. Abangyi omwa kithunga wukabana ibabirianza eriwathikya kundi bakayowa ibatholere erisangira omw’isondya. Enyuma waho, ngabya ingabungira abalikyethu ababirisebebera, ngababulhaya abaana babu n’abahughu babu nga bali bathi. Abandi bakabya ibanabya bakasa n’abaana babu okwa mihindano, kandi abaana abo bakanabya ibanabya bathuliri. Nabu bangana wathikibwa erisuba oku Yehova.”
WATHIKAYA ABAANA BA YEHOVA ABABIRITHALHA ERIMUSUBAKO
8. Omwa musyo ow’omwana oyuwatsaha, owali omu Luka 15:17-24, thatha mwathwalha athi omwana wiwe oyuwayisubamo?
8 Thwamabya b’eriwathikya abanzire erisuba oku Yehova, ni mibere yahi eya thutholere ithwabya nayu? Thalebya ebya thwang’igha omwa musyo wa Yesu ow’omwana oyuwatsaha. (Soma Luka 15:17-24.) Yesu akasoborera ngoku omulhwana ayisunga-sunga n’erithwamu erisuba eka. Thatha wiwe mwayamuthangirira n’erimuwako, erimukakasya kw’amwanzire. Omulhwana mwayowa nabi n’eriyowa isyatholere eryahulhwamo mughalha wa thatha wiwe. Thatha mwakwira mughalha wiwe y’obulighe akamubwira eriyowa liwe. Thatha mwayira ebyo akakolha erikakasya mughalha wiwe kw’amathangirirwa, butsira ng’omukoli, aliwe ng’omwana mwanze. Erikangania ekyo, thatha mwatheghekania erirya inene n’eriha mughalha wiwe oyulyayisubamo esyongyimba esyuwene.
9. Ni mibere yahi eya thutholere ithwabya nayu erithoka eriwathikya ababirisebebera erisuba oku Yehova? (Lebaya akasanduko “ Ngoku Thwanga Wathikya Abanzire Erisuba oku Yehova.”)
9 Yehova ali nga thatha oyuli omwa musyo oyo. Anzire balikyethu ababirisebebera kandi anzire ibamusubako. Omw’igherererya Yehova, thwangana bawathikya erimusubako. Erikolha eki, thutholere ithwabya abakaghumisirizaya, abakalhumirirawa abandi, kandi ab’olhwanzo. Busana naki ithwakangania emibere eyi, kandi ekyo thwanga kikolha thuthi?
10. Busana naki thukayithagha erighumisirizya erithoka eriwathikya omundu erisuba oku Yehova?
10 Thukayithagha erighumisirizya kundi kikathwalha obuthuku omundu erilhama bunyakirimu. Abangyi ababya ibabirisebebera bakabugha bathi abasyakulhu n’abandi omwa kithunga mubababungira ngendo nyingyi ibo erisubulha. Mwali wethu ya Nancy owe Asia, akabugha athi: “Munywani waghe kundu omwa kithunga mwanyiwathikya kutsibu. Iniakanyikanganaya olhwanzo olhwa omundu angakangania mukulhu wiwe. Mwanyibukya ebibuya ebyo thwabya thukabana kera. Omw’ighumisirizya iniakanyihulikirira ingamubwira eriyowa lyaghe, kandi isyalighana erinyihabulha. Mwakangania ku ni munywani waghe kundu, iniakabya inianayitheghekire erinyiwathikya okwa ndambi yosi-yosi.”
11. Busana naki thukayithagha omubere w’erilhumirirwa abandi erithoka eriwathikya ababirihithanibwa?
11 Erilhumirirwa abandi liri ng’omubatsi owangaleka omundu iniayowa ndeke. Abandi babirisebebera kundi omundu omwa kithunga mwabahithania. Ekyo kyabirikubathirya eriyisunza lyabu ery’erisuba oku Yehova. Abandi bangana lengekania bathi mubakanganibwa obuthe bulingirirania. Bangana yithagha omundu oyukendi bahulikirira n’eriyitheghererya eriyowa lyabu. (Yak. 1:19) María, oyuwanasebebere, akabugha athi, “Munayithagha oyuwanga nyihulikirira, erinyihumulikania, erinyihabulha, n’erinyiwathikya.”
12. Iha eky’erileberyako ekikakanganaya ngoku olhwanzo lhwa Yehova lhukaleka ababirisebebera ibamusubako.
12 E Biblia yikakanaya oko lhwanzo olhwa Yehova awithire abandu biwe ng’ekikoba. Olhwanzo lhwa Nyamuhanga lhuli lhuthi ng’ekikoba? Lengekanaya okwa ky’erileberyako kino: Thalengekania iwabirithoghera omwa ngetse eyabirighunga neryo omundu iniakughusira ekyambalhu ekyanga kuwathikya. Omo kwenene iwukendi sima ekyo kundi ikikendi leka iwathoka erileletha oko maghetse. Aliwe ekyambalho ekyo kisa sikyangaleka wukalhama. Amaghetse ahuhirire, neryo erilhama wutholere iwahika oko bwathu. Wukayithagha oyuwanga kughusira okikoba n’erikukura erikuhikya oko bwathu. Yehova mwakania okwa Baisraeli ababya ibabirimusighania athi: “Munakurabo . . . omo bikono [bikoba, NW] by’olhwanzo.” (Hos. 11:4) Namunabwire Nyamuhanga kw’akinayowa athya busana n’ababirileka erimukolera abakalyambibawa omwa bitsibu n’amaghaniryo. Anzire ibaminya kw’abanzire, kandi kw’anzire ibamusubako. Kandi Yehova angana kukolesya iwabakangania olhwanzo olhu.
13. Iha eky’erileberyako ekikakanganaya amaaka w’olhwanzo lhw’abalikyethu.
13 Ni kikulhu erikakasya ababirisebebera ngoku Yehova abanzire kandi nethu ku thubanzire. Pablo, oyuli omwa mwatsi w’ahanyuma, mwasebebera habw’emyaka eyilhabire oku 30. Akabugha athi: “Kiro kighuma omwa ngyakya, ingalhua eka, muneya mwali wethu omukekulhu kandi amanyikanirya ndeke. Munatsuka erilira ng’omwana. Munamubwira indi Yehova angabya iyulyamuthuma okw’ingye. Obu bw’obuthuku obo nathwamu erisuba oku Yehova.”
OMO LHWANZO WATHIKAYA ABABIRISEBEBERA
14. Ngoku kiri omwa musyo owali omu Luka 15:4, 5, omulisya mwakolhaki akabana embuli eyathalha?
14 Thutholere ithwalholha embere eriwathikya ababirisebebera. Ng’omwana oyuwatsaha oyuli omwa musyo wa Yesu, nabu banganabya ibanemuyowa nabi. Kandi obundi banganabya ini batseke bunyakirimu busana n’ebyo balhabiremo omwa kihugho kya Sitani. Thutholere ithwabawathikya erighumya erikirirya lyabu omu Yehova. Omwa musyo w’embuli eyathalha, Yesu akasoborera ngoku omulisya akahira embuli okwa bithigho biwe n’erihekayo erisubya y’omwa kihangulho. Omulisya akabya iniabirikolesya endambi n’akaghalha erisondya embuli eyithere. Aliwe kandi akaminya ngoku akendi yithagha erihekayo erisubyayo omwa kihangulho kundi yikabya isiyiwithe akaghalha k’eriyisubulya.—Soma Luka 15:4, 5.
15. Thwanga wathikya thuthi ababirisebebera abanzire erisuba oku Yehova? (Lebaya akasanduko “ Ekitabu ky’Omughaso Munene.”)
15 Thwangana yithagha erikolesya endambi n’akaghalha kethu eriwathikya ababirisebebera balebe erirwanisya obutseke bwabu. Busana n’omulimu wa Yehova, Ekinywe kiwe, n’ebitabu ebya ekithunga kikahulhukaya, thwangana bawathikya erithasyaghumya obunyakirimu bwabu. (Abar. 15:1) Eki thwanga kikolha thuthi? Omusyakulhu oyuwasi bingyi akabugha athi, “Ababirisebebera bangyi bakayithagha erithasy’igha e Biblia bakathwamu ngoku banzire erisuba oku Yehova.” * Abasyakulhu bamakusaba eryeghesya oyulhue iniabirisebebera, ambi iwaligha olhusunzo olho. Omusyakulhu oyo kandi akabugha athi, “Omuthuliri oyukeghesaya omwigha ng’oyo atholere iniabya munywani, iniabya mundu oyo oyusebebere angathoka erikanirania nayu.”
OBUTSEME OMWA LHUBULHA N’OKWA KIHUGHO
16. Thukaminya thuthi ngoku abamalaika bakendi thuwathikya?
16 Ni bingyi ebikakanganaya ngoku abamalaika bakathuwathikaya eribana ababirisebebera abanzire erisuba oku Yehova. (Erib. 14:6) Ng’eky’erileberyako, Silvio owe Ecuador, mwasaba Yehova amuwathikaye asube omwa kithunga. Abere akinasaba, mwowa omundu akakongotha okwa lhuyi lhwiwe. Babya ini basyakulhu babiri. Omwa lhubungo olho, mubatsema eritsukiraho erimuha obuwathikya obo abya akayithagha.
17. Thukayowa thuthi thwamawathikya ababirisebebera?
17 Ithukendibana obutseme thwamawathikya ababirisebebera erisuba oku Yehova. Thalebya ekya Salvador, omutemburi oyukahiraho akaghalha eriwathikya ababirisebebera, akabugha: “Hakanayira ingatsema kutsibu. Ngatsema kutsibu ingaminya ngoku nabirikolha haghuma na Yehova eriwathikya embuli yiwe y’obughuli erilhua omwa kihugho kya Sitani erisuba omwa kithunga.”—Emib. 20:35.
18. Wamabya iwabirisebebera, wutholere iwabya iwunasiki?
18 Wamabya iwabirisebebera, wuminye ngoku Yehova akinakwanzire. Anzire iwamusubako. Hane ebya wukendi yithagha erikolha erimusubako. Aliwe nga thatha oyuli omwa musyo wa Yesu, Yehova anakulindirire, kandi akendi kw’angirira n’ebitsange.
OLHWIMBO 103 Abalisya Ni Balhume b’Olhusunzo
^ enu. 5 Yehova anzire ababirisebebera ibamusubako. Thwangana wathikya kutsibu abanzire eriligha erikokya lya Yehova erya: “Munyisubeko.” Omo mwatsi ono, thukendi lebya ngoku thwanga bawathikya erikolha ekyo.
^ enu. 7 Awandi mena abirihindulhwa.
^ enu. 15 Abandi ababirisebebera bangana wathikibwa omw’igha ebitsweka birebe eby’ekitabu Ngoku Wanga Sighalha omo Lhwanzo Lhwa Nyamuhanga, n’abandi babirighasirwa omw’isoma esyosura esy’ekitabu Draw Close to Jehovah. Akathunga ak’Omubiiri ak’Ekithunga ikakendi thwamu oyutholere eryeghesya omwigha ng’oyo.
^ enu. 68 ERISOBORERA EBISASANI: Baghalha bethu muthina-muthina basathu bakawathikaya mughalha wethu oyuwanzire erisubulha. Bakakolha ekyo omw’ibya ibanemukanirania nayu, erimukakasya ngoku anzibirwe, n’erimuhulikirira ndeke.
