1. Yehoba umvwa byepi inge mukooko wanji umo walekele kumwingijila watatula kumwingijila jibiji?

BYONKA byo twafunjile mu mutwe wafumako, Yehoba wiesakanya mwine ku kafunga wawama ulama bulongo mikooko yanji yonse. Kabiji ukeba yense waya mungi kubwela kwi aye. Yehoba wabuujile bena Isalela balekele kumwingijila amba: “Bwelai kwi amiwa ne amiwa nkabwela kwi anweba.” Twayuka’mba bino byo byo amona ne bakooka lelo jino mambo waamba’mba: “Kechi ngaluka ne.” (Mala. 3:6, 7) Yesu waambile’mba Yehoba ne bamalaika basangalala bingi inge kalume wanji umo walekele kumwingijila wabwela kwi aye.—Luka 15:10, 32.

2. Tusakwisamba pa ka mu uno mutwe?

² Twayai twisambe bishimpi bisatu byaambile Yesu bitukwasha kuta muchima pa kukwasha boba baleka kwingijila Yehoba. Tusakwisamba byubilo byo twafwainwa kwikala nabyo pa kuba’mba tukwashe mikooko yaeleka kubwela kwi Lesa. Kabiji tusakumona ene mambo o kyanemena kwingila na ngovu kukwasha bakooka.

3-4. Mambo ka mwanamukazhi watongolwa pa Luka 15:8-10, o akebejile jali janji ja muwayawaya jaelekele?

³ Twafwainwa kwingila na ngovu pa kuba’mba tukebe boba bakeba kubwela kwi Yehoba. Mu kishimpi kyanembwa mu Mambo Awama anembele Luka, Yesu walumbulwile mwanamukazhi wakebele kintu kyanemene bingi kyaelekele. Kino kintu ke jali ja muwayawaya ja dilakima. Lubaji lwanema bingi lwa kino kishimpi ke byo aingijile na mukoyo uno mwanamukazhi kukeba jali janji.—Tangai Luka 15:8-10.

⁴ Yesu walumbulwile byaumvwine uno mwanamukazhi byo ataaine jali janji ja muwayawaya jaelekele. Kimye Yesu kyo ajinga pano pa ntanda, mwanamukazhi Muyudea inge wasongolwa bamupanga mali a muwayawaya a madilakima jikumi pa juba ja masongola kwi bainanji. Kyamweka jino jali jaelekele janemene bingi  ku uno mwanamukazhi mambo jajinga pa mali o bamupele kwi bainanji. Uno mwanamukazhi walangulukile’mba jali janji japonena panshi mu nzubo. Onkao mambo, waambwile lampi ne kukenkenta monse mu nzubo, bino kechi wijimwene ne. Lampi wanji kechi watokeshe mu nzubo kya kuba wamona kajali kacheche ka siliva ne. Kepo apyangile nzubo yonse. Mu biswaswa byo apyangile mo mo amwene jali janji jo anemekele bingi ja dilakima saka jibena kubekauka na kyeya kya lampi. Waumvwine bingi bulongo. Waichile balunda nanji ne bakwabo mo bekela kinkalankulo ne kwibabuula.

5. Mambo ka o kyakonsha kukatezha kutaana boba baleka kupwila?

⁵ Byonka byo twamona byaamba kishimpi kya kwa Yesu, kikebewa kwibikako pa kuba’mba tutaane kintu kyaeleka. Kyo kimotu, twakonsha kwibikako pa kuba’mba tukebe boba baleka kupwila. Kampe papita myaka yavula kufuma kimye kyo balekele kupwanañana pamo ne atweba. Kampe bavilukijile ne ku mpunzha ko babula kwibayuka ku balongo. Bino pa kino kimye bamo bakooka babena kukebesha kubwela kwi Yehoba. Babena kukeba kwingijila Yehoba pamo na kisemi kyanji kya bapopweshi ba kine, bino twafwainwa kwibakwasha.

6. Bonse ba mu kipwilo bakonsha kwivwangamo byepi mu mwingilo wa kukeba bakooka?

⁶ Bañanyi bakonsha kwingilako uno mwingilo wa kukeba bakooka mu lwitabilo? Atweba bonse, ko kuba’mba, bakulumpe mu kipwilo, bapainiya, ba mu kisemi, ne basapwishi bonse bakonsha kwingilako uno mwingilo wa kukeba bakooka. Nanchi mujipo na mulunda nenu nangwa mulongo wenu wakooka nyi? Nanchi mwamonañanapo na muntu waleka kwingijila Lesa kimye kyo muya na kusapwila ku nzubo ku nzubo nangwa mu busapwishi bwa ku mvula bantu nyi? Inge kya kuba uno muntu waswa kupana keyala wanji nangwa nambala wa foni ku bakulumpe mu kipwilo kyenu, mwafwainwa kupana bino bintu kwi abo.

7. Mwafunjilako ka ku byambo byaambile mukulumpe mu kipwilo wa jizhina ja Thomas?

⁷ Ñanyi bintu byakonsha kuba bakulumpe mu kipwilo pa kuba’mba bakebe boba bakeba kubwela kwi Yehoba? Umvwai byaambile mukulumpe mu kipwilo wa jizhina ja Thomas * wikala ku Spain. Wakwasha Bakamonyi 40 kubwela mu kipwilo. Mulongo Thomas waambile’mba: “Kitanshi, ngipuzha balongo ne banyenga inge bayukapo kwikala muntu wakooka. Kabiji bimye bimo ngipuzha basapwishi inge babena kuvulukapo muntu waleka kupwila. Bavula mu kipwilo bakumbula na lusekelo mambo bomvwa bulongo kwibavwangamo mu mwingilo wa kukeba bakooka. Mu kuya kwa kimye inge nafwakesha balongo nangwa banyenga bakooka, nebepuzha pa baana babo ne pa balongo babo. Bamo bakooka baiyanga na baana babo ku kipwilo, kabiji bano baana babo kampe baikele ne basapwishi. Nabo twakonsha kwibakwasha kubwela kwi Yehoba.”

8. Mu kishimpi kya mwana waelekele kyanembwa pa Luka 15:17-24, Shanji mwana waubile byepi na mwananji walapijile?

⁸ Ñanyi byubilo byo twafwainwa kwikala nabyo pa kuba’mba tukwashe boba bakeba kubwela kwi Yehoba? Monai bintu bimo byo twakonsha kufunjilako ku kishimpi kya kwa Yesu kya mwana waikele na byubilo byabula kufwainwa ne kufuma pa nzubo. (Tangai Luka 15:17-24.) Yesu walumbulwile uno mwana byo alubulukile muchima ne kufuukulapo kubwela pa nzubo. Bashanji byo bamumwene, bamunyemejile ne kumupakachilamo, ne kumubuula kuba’mba bamutemenwe. Uno mwana wizhachishenga mwine pa byo aubile kabiji kechi wakebelenga kumutela’mba mwana ne. Bashanji bamubijile lusa pa kumvwa byo ebabuujile. Kabiji baubile bintu bimo pa kuba’mba bamumweshe’mba bamutambwijile bulongo kuba’mba mwanabo ye batemenwe  kechi kumumona nobe wa mwingilo ne. Pa kuba’mba bamweshe’mba bamutemenwe, bashanji banengezhezhe kijiilo ne kumupa bivwalo byawama uno mwanabo walapijile.

9. Ñanyi byubilo byo twafwainwa kwikala nabyo pa kuba’mba tukwashe bakooka kubwela kwi Yehoba? (Monai kakitenguluzha ka kuba’mba “ Byo Twakonsha Kukwasha Boba Bakeba Kubwela.”)

⁹ Yehoba uji nobe nsemi wa mu kino kishimpi. Wibatemwa balongo ne banyenga yetu bakooka kabiji ukeba’mba babwele kwi aye. Inge ketulondele Yehoba, twakonsha kwibakwasha kubwela. Pa kuba’mba tube bino, twafwainwa kutekanya, kwikala na kifyele, ne butemwe. Mambo ka o twafwainwa kumwesheshanga bino byubilo, kabiji twakonsha kuba byepi kino?

10. Mambo ka kutekanya o kwawamina pa kukwasha muntu kuba’mba abwele kwi Yehoba?

¹⁰ Twafwainwa kutekanya mambo papita kimye pa kuba’mba muntu abwele kwi Yehoba. Bavula bakookele kala baswa kuba’mba baswile kubwela byo bebafwakashijile pa bimye byavula ku bakulumpe mu kipwilo ne bakwabo ba mu kipwilo. Nyenga wa jizhina ja Nancy wikala ku Southeast Asia wanembele’mba: “Mulunda nami mu kipwilo ye wankwashishe bingi. Wantemenwetu nobe nekolojanji wa mukazhi. Wamvulwilemo bintu byawama byo twaubilanga pamo. Watelekanga bingi inge mbena kwamba byajinga ku muchima wami, kabiji kechi wakankazhamanga kunkwasha ne. Wajinga mulunda wa kine, wankwashanga kimye kyonse.”

11. Mambo ka o twafwainwa kwikela na kifyele pa kuba’mba tukwashe muntu wazhingila?

¹¹ Inge kya kuba muntu wazhingila, kikola bingi ku muchima nobe kilonda. Bino kifyele kiji nobe muchi wakonsha kukwasha muntu kumvwako bulongo. Bamo bakooka na mambo a kuba’mba bebazhingijishe ku umo mu kipwilo kabiji batwajijila kuzhingila pa myaka yavula. Na mambo  a kino, bamo kibakatazha kubwela kwi Yehoba. Bamo bakonsha kulanguluka’mba bebobile nshiji. Bakebewa muntu wakonsha kuteleka ne kumvwisha byo balanguluka. (Yako. 1:19) María wakookele pa kimye kimo waambile’mba: “Nakebelengatu muntu wakonsheshe kuteleka, uji na kifyele kabiji wakonsheshe kunkwasha.”

12. Lumbululai butemwe bwa Yehoba byo bwakonsha kubwezha bantu bakooka kwi aye?

¹² Baibolo walumbulula’mba butemwe Yehoba bo atemwa bantu banji bujitu nobe muzhinge wakosa nangwa lutambo. Mu ñanyi jishinda butemwe bwa Lesa mo bwaikela nobe muzhinge wakosa? Langulukai pa kino: Fwanyikizhai kuba’mba mwaponena pa kalunga ka mema kabiji muntu wimutayila kintu kya kwimukwasha kubula kwibila pa mema. Kwa kubula nangwa kuzhinaukatu ne, mwakonsha kusanta bingi pa buno bukwasho mambo kino kintu kisakwimukwasha kowa ne kubula kufwa pa mema. Pano bino, kino kintu kyo emupa kechi kyo kyonka kyakonsha kwimulengela kubula kufwa ne. Mema auba munyango, kabiji kechi mwakonsha kupuluka inge mwabula kukanjila mu bwato ne. Kwafwainwa kwikala muntu wafwainwa kwimutayila lutambo ne kwimukokela mu bwato. Yehoba waambile pa bena Isalela balekele kumwingijila amba: “Nebatangijilenga na ntambo ya bantu ne na mizhinge ya butemwe.” (Ho. 11:4) Lesa byo byo omvwa ne luno pa boba baleka kumwingijila na mambo a makatazho ne bijikila. Ukeba’mba bayuke’mba wibatemwa, kabiji ukeba kwibakwasha kubwela kwi aye. Kabiji Yehoba wakonsha kwimwingijisha kumwesha butemwe bwanji ku bano bantu.

13. Ambai kyamwekele kimwesha buneme bwa kumwesha butemwe.

¹³ Kyanema bingi kubuula bantu bakooka amba Yehoba wibatemwa ne kuba’mba ne atweba twibatemwa. Pablo watongolwa mu mutwe wafumako, wakookele mu lwitabilo pa myaka 30.  Waambile’mba: “Juba jimo lukelo, byo nafuminenga pa nzubo, namonañene na nyenga wakoma wajinga bingi na kifyele kabiji wisambile ne amiwa na kifyele. Najijiletu nobe mwana wamucheche. Nabuujile uno nyenga amba kyamweka Yehoba ye wamutumine kwiya na kwisamba ne amiwa. Pa kyonkakya kimye popo nafuukwilepo kubwela kwi Yehoba.”

14. Kwesakana na kishimpi kyanembwa pa Luka 15:4, 5, kafunga waubile byepi byo ataaine mukooko waelekele?

¹⁴ Twafwainwa kutwajijila kukwasha ne kutundaika bakooka inge twibataana. Byonkatu byajinga mwana waelekele wa mu kishimpi kya kwa Yesu, bakonsha kwikala na binyenge kabiji pakonsha kupita kimye pa kuba’mba bipwe. Kabiji na mambo a kuba’mba bajinga mu ntanda ya kwa Satana, kechi bakonsha kufikenatu kwikala na bulunda bwakosa ne Yehoba byonka byo bajinga kala ne. Twafwainwa kwibakwasha kukosesha lwitabilo lwabo mwi Yehoba. Mu kishimpi kya mukooko waelekele, Yesu walumbulwile kafunga byo asenda uno mukooko pa bipuzhi byanji ne kumubwezha pa jitanga. Uno kafunga wingijisha kimye ne ngovu kukeba mukooko waeleka. Bino uyuka kuba’mba wafwainwa kusenda uno mukooko ne kumubwezha mu kipaka mambo wayuka’mba wakooka kechi uji na bulume bwa kwiendela aye mwine ne.—Tangai Luka 15:4, 5.

15. Twakonsha kukwasha byepi bakooka bakeba kubwela kwi Yehoba? (Monai ka kakitenguluzha kuba’mba “ Kingijisho Kyawama Bingi.”)

¹⁵ Twakonsha kwingijisha kimye kyabaya ne ngovu pa kuba’mba tukwashe muntu wakooka kushinda lukatazho lo aji nalo lubena kumulengela kukatazha kutendeka kwingijila Yehoba jibiji. Bino na bukwasho bwa mupashi wa Yehoba, Baibolo, ne mabuku o tutambula ku kipwilo, twakonsha kwibakwasha kukosesha bulunda bwabo ne Lesa. (Loma 15:1) Twakonsha kuba byepi kino? Mukulumpe mu kipwilo waingila pa  myaka yavula waambile’mba: “Bavula bakooka bakebewa kwibafunjisha Baibolo inge bafuukulapo kuba’mba babena kukeba kubwela kwi Yehoba.” * Onkao mambo, inge bemwambila’mba mufunjishenga muntu wakooka, mwafwainwa kutambwila uno mwingilo na lusekelo. Uno yenka mukulumpe mu kipwilo waambile ne kuba’mba: “Musapwishi ubena kufunjisha Baibolo muntu wakooka wafwainwa kwikala nobe mulunda nanji, pa kuba’mba awa wakooka akasuluke kwamba biji ku muchima.”

16. Twayuka byepi kuba’mba bamalaika baketukwasha mu mwingilo wa kukeba bakooka?

¹⁶ Kuji bimweka byavula bingi bimwesha kuba’mba bamalaika bengijila pamo ne atweba mu mwingilo wa kukeba bakooka bakeba kubwela kwi Yehoba. (Lum. 14:6) Ba Silvio ba ku Ecuador, balombele kwi Lesa na muchima yense kuba’mba ebakwashe kubwela mu kipwilo. Byo bakilombelenga, ngengele ya ku kinzhilo kyanji yavumine. Bakulumpe mu kipwilo babiji bo bakonkonsheshe ku kinzhilo. Jonkaja juba, bano bakulumpe mu kipwilo baumvwine bingi bulongo kukwasha ba Silvio.

17. Twakonsha kumvwa byepi inge twakwasha muntu wakooka kwikala na bulunda bwakosa ne Yehoba jibiji?

¹⁷ Tukekala bingi na lusekelo pa kwingila mwingilo wa kukwasha bakooka mu lwitabilo kubwela kwi Yehoba. Painiya wa kimye kyonse wa jizhina ja Salvador uta muchima pa kukwasha bakooka waambile’mba: “Pa bimye bimo, njila ne mipolo. Kindetela bingi lusekelo kuyuka kuba’mba Yehoba wapokolola mukooko wanji kufuma mu ntanda ya kwa Satana, ne kuba’mba ñingijila pamo ne aye pa kukwasha bakalume banji bakooka kubwela mu kipwilo.”—Byu. 20:35.

18. Inge mwakooka, mwafwainwa kushiinwa’mba ka?

¹⁸ Inge mwaleka kupwanañana na bantu ba Yehoba, mwakonsha kushiinwa’mba watwajijila kwimutemwa. Ukeba’mba mubwele kwi aye. Mwafwainwa kubapo bintu bimo pa kuba’mba mubwele kwi aye. Bino byonkatu byajinga nsemi wa mu kishimpi kya kwa Yesu, Yehoba ubena kwimupembelela kubwela kwi aye, kabiji ukemutambwila na lusekelo.