1. Vɛɛ kɔllo wa yɛ Chɛhowa te wanaa mal ndu piɛiyo wa opilɛ bɛɛ miiŋgu pɛ?

A MƐƐ naŋ yaasiaa o buŋgɛi naŋ hiou ve niŋ yɛ, mi Chɛhowa tuu ndupila a wana mandaa lasaa buulaŋ le saa nduaa o kɛ kɛ wo. Nduyɛ opilɛ bɛɛ laasiaŋ pɛ, nuuviaa o nuuviaa ndu ni. Mi Chɛhowa dimul Isɔluɛiyaa ndaa mal ndu sindɛ wa aa: “La miiŋgu ya o ibuŋ, nduyɛ mi ya bɛɛ miiŋgu nya o ibuŋ.” Ŋ sina maa Chɛhowa nɔ wɔ hau yeemɛi hei kanifuule, o dimi maa “Mɛlɛka feŋaŋ o diom ndɔɔ choo le wo” o cho ni. (Mal. 3:​6, 7) Mi Chiisu dimi maa mi Chɛhowa a maalikɛiya naŋ kɔl tau te o yɔŋ pɛ mi wanaa mal Chɛhowa piɛiyo wa opilɛ bɛɛ miiŋgu ndu o ibuŋ.—Luku 15:​10, 32.

2. Yɛɛ naŋ cho yɛ yaasiaa o buŋgɛi hei niŋ?

² O buŋgɛi hei niŋ, ŋ cho yaasiaa talela Chiisulaŋ la yaa. Talelaŋ ndaŋ la chɔm nyɛ naŋ nɔ miŋ tosa le wanaa mal Chɛhowa piɛiyo wa malaa wo. Ŋ cho sina suliŋnda naŋ nɔ miŋ nɔ le waŋnda haa malaa ma miiŋgu Chɛhowa o ibuŋ ndo. I cho naa vɛlɛ chɔm nyaale naŋ sɔla wo te ŋ kindiŋ pɛ kpoke miŋ mala waŋnda haa ma miiŋgu Chɛhowa o ibuŋ.

3-4. Le yɛɛ chua Luku 15:​8-10 soo okɔɔ wo nuuviaa yɛ kanii nduɛi lo ve nyɛkɛndɛi?

³ Ŋ nɔ miŋ tosa wallo kalaŋ le wanaa mal Chɛhowa piɛiyo kɛ ma yeema ndu miiŋgoo o ibuŋ nda nuuviaa. O tale Chiisu dimi o Yau Luku wo niŋndo, mbo chɔm mɛɛ chuaa nuuviaa kanii lo ndu o ba ve yɛ. Nyɛ cho suɛi kulle o taloo hoo niŋndo cho nuuviaa chuaa hoo nuuviaa kanii nduɛi kalaŋ ndo ni.—Nuawɔ Luku 15:​8-10.

⁴ Mi Chiisu dimi maa mi chuaa hoo naŋ kɔl tau mɛɛ o che kanii nduɛi lo ve. O palɛi Chiisu ve niŋ, mi kalaŋ chuauwaa Chuuwa apum ndaa ke dɔɔ chua nda laandoo kanioŋ tɔ o paale o wa challe o nɔɔ leŋ choo. Naapum kanioŋ muŋ i pilɛ ndii lo chuaa hoo o ba ni. Mi chuaa hoo yiyaŋ maa lɛŋ kaniei hei del ni.  Le hei, mbo mɛndul lambuiyo le ndi nuuviaa kɛ o seeluŋ ndi le. Paŋgele lambui ndɔɔ ve letuu le mi kanii humbuii pɔmbuɛi hei woli mbo che ndi le. O mɛɛlulaŋ kpɔŋ, mbo bɛɛsuu chiɛiyo kpou. Mɛɛ o wa bil o bɛɛsuu wo kɔndɔɔ, mbo cha niŋ kanii nduɛi sɔvɛi hei woli wolioo o chundoo niŋ. Mbo naŋ kɔl tau! Okoŋ, mbo kɔ veelu chaaŋaa nduaa a wanaa balu ndu wa le nda dimullo maa o saaluŋ kanii nduɛi.

5. Le yɛɛ o wa yɛ lepum i kala le miŋ saaluŋ wanaa kelu kɔlaŋ o bɔŋaŋndaŋ nda?

⁵ A mɛɛ naŋ che o tale Chiisu wo niŋ yɛ, wallo pila yeemaŋ ni le nyɛ lo wo nuuviaa. Mɛɛ lende koni wallo yeemaŋ naa lepum o ba ni le wanaa kelu kɔlaŋ o bɔŋaŋndaŋ nda nuuviaa. Naapum wɔsilaŋ la hiou niŋ tau chɔŋ a teleŋ nda kelu kɔlaŋndo ɔɔ, apum faŋaŋ niŋ o fondaŋ nda wa paandu wo. Nduyɛ naa nda kuɛ wa, puaapiliaa cho loŋ nda sina nda le. Kɛ mɛɛ naŋ suaa naa yɛ bɛɛ, wanaa vi haa ŋdial le Chɛhowa piɛiyo wa apum yeema niŋ ma miiŋgu ndu o ibuŋ. A yeema ma piɛi Chɛhowa a yuŋgu ndɔ cho ndu piɛiyo o tonyaa choo wo latulu. Kɛ mɛɛ miŋ mala nda.

6. Vɛɛ kundaa kpou duau yɛ balaŋ diompilɛ le wanaa kelu kɔlaŋ o bɔŋaŋndaŋ nda nuuviaa?

⁶ Nɛɛ yaa nɔ yɛ ma nuuviaa wanaa kelu kɔlaŋ o bɔŋaŋndaŋ nda? Naa kpou nɔ ni miŋ nuuviaa nda. Bɛnduaa kundaa, kɔɔfaa, yuŋgu ndaa, a wanaa cho o kundaa niŋnda kpou nɔ ni ma dɔu balaŋ diompilɛ le nda nuuviaa. O chaaŋaa numnda tɛɛŋ ɔɔ wanayaŋ numndoŋ, a sina pa o kelu kɔlaŋ o bɔŋaŋndaŋ ndo? A komal niŋ pa wana waa ndoo o yooŋgu kɛndɔɔ dimioo niŋ chiɛiyo a chiɛiyo ɔɔ o luŋ kpendekele? Te waŋndo hoo chɛl pɛ mbo chɔm num fonda o cho wo ɔɔ mbo ke num nɔmbɛi foŋ ndɔɔ le ma ke bɛnduaa, dimul bɛnduaa cho o kunda numndo niŋ nda.

7. Yɛɛ ŋ pɛɛku yɛ o nyɛ bɛndu kunda pilɛ diolaŋ aa Tɔmɔsi dimi wo niŋ?

⁷ Kalaŋ bɛnduaa kpeekpei i cho ni le wanaa kelu kɔlaŋ o bɔŋaŋndaŋ ma yeema le miiŋgoo Chɛhowa o ibuŋ nda nuuviaa. Kɛ yɛɛ nda nɔ yɛ ma tosa le nda saalɔŋndo? Tɔmɔsi, * bɛndu kunda cho Speŋ ndo mala niŋ puaapiliaa a ndepiliaa hiouwɔɔ 40 ma miiŋgu o kundaa niŋ. Tofawɔ nyɛ o dimi wo: “Mi nyuuniaa fɛŋ puaapiliaa a ndepiliaa te a sina naa wanaa vi ŋdial le Chɛhowa piɛiyo wa cho wa. Ɔɔ mi nyuna nda te a sina pɛ wana ndoo huŋ paandu o bɔŋaŋndaŋ kɛ mbo kialu wo. Mi a bɔɔbɔɔ muli a dialuŋ fulaa nduyɛ, ma naŋ kɔl tau te a mala pɛ le nda nuuviaa. Okoŋ, te I kuɛ pɛ puaapilɛnɔɔ ɔɔ ndepilɛnɔ kelu kɔlaŋ o bɔŋaŋndaŋ ndo yilɔɔ, mi nyuna ndu a chuauwaa nduaa vɛlɛ a wanayaŋ ndɔŋ okɔɔ. Mi waŋnda haa apum ndaa hiŋ a chuauwaa ndaa o bɔŋaŋndaŋ. Nduyɛ, wanaa dimiaa yooŋgu kɛndiaa chuauwaa ndaa haa wa ni. Ŋ nɔ miŋ mala vɛlɛ kaŋ ma miiŋgu Chɛhowa o ibuŋ.”

8. O tale Chiisu dimi o Luku 15:​17-24 wo niŋ, vɛɛ finyaa poombɔ laasiaŋndo bii yɛ po ndɔɔ mɛɛ o siŋgaŋ?

⁸ Suliŋnda kuɛɛ naŋ nɔ yɛ miŋ nɔ le wanaa yeema ma miiŋgu Chɛhowa o ibuŋ nda malaa? Mi Chiisu dimi taloo a poombɔ laasiaŋ mbo mal wanaa nduaa wo okɔɔ. Tofawɔ nyɛ naŋ pɛɛku o taloo hoo niŋndo. (Nuawɔ Luku 15:​17-24.) Mi Chiisu dimi maa o mɛɛlulaŋ, mi poombɔɔ hoo kial suei le nyɛ o tosa wo nduyɛ mbo kɛɛsiaa le miiŋgoo o wanaa nduaa lo. Mɛɛ finya ndɔ che ndu hunɔɔ, mbo nyaanuŋ mbo kɔ demul ndu le ndu chɔmndo maa o kaala wɔ ndu. Kɛ poombɔɔ hoo kɔl ndɔ iyama wa ndu paaliaŋndo. Le hei, mbo dimul finya ndɔ maa o chua lɛ ndu maa chua ndɔ vialaa le. Mi nyiɛɛye bii fallo tau mɛɛ po ndɔɔ wa suɛi o ndu lo. Mi fallo tosa nyɛ cheleŋ le chɔmndo maa o mal ndu haki nduyɛ maa o cho wɔ wana sɔvɛ o yuŋgoo niŋ. Le po ndɔɔ malaa mbo bii hei bila, mi fallo kɛɛsiaa le  ma yau nyɛdiaa kɔl kɛndɔɔ nduyɛ, mbo ke po ndɔɔ nyɛla kɛndɛlaŋ le wounɔŋndo.

9. Suliŋnda kuɛɛ yeemaŋ yɛ naa o ba le wanaa kelu kɔlaŋ o bɔŋaŋndaŋ nda malaa ma miiŋgu Chɛhowa o ibuŋ? (Tofa kɔfoo hoo “ Mɛɛ Naŋ Mala Wanaa Yeema Miiŋgoo Wa Yɛ.”)

⁹ Chɛhowa cho ko maa finyaa hoo o taloo hoo niŋ. O kaala wɔ puaapiliaa a ndepiliaa kelu kɔlaŋ o bɔŋaŋndaŋ nda nduyɛ, o yeema nda ma miiŋgu ndu o ibuŋ. Te ŋ tol pɛ taamasi Chɛhowaa kɔɔli, ŋ nɔla miŋ mala nda ma miiŋgu o kundaa niŋ. Le batiuwaa hoo sɔlaa, mɛɛ miŋ wa wanaa biuwaŋ, miŋ nɔ nyiɛɛye, nduyɛ miŋ wa wanaa kaalaa ŋwaŋndachiee. Le yɛɛ suliŋndaŋ ndaŋ la yeemaŋ yɛ naa o ba nduyɛ, vɛɛ naŋ chɔm yɛ maa ŋ nɔ laŋ?

10. Le yɛɛ naŋ nɔ yɛ miŋ wa wanaa biuwaŋ te ŋ wa pɛ wana kelu kɔlaŋ o bɔŋaŋndaŋ ndo malaa?

¹⁰ Ŋ nɔ miŋ wa wanaa biuwaŋ kanifuule, teleŋndo pila yeemaŋ ni le waŋndo malaa mbo miiŋgu Chɛhowa o ibuŋ. Wanaa kelu paandu kɔlaŋ o bɔŋaŋndaŋ kɛ ma miiŋgu wa a bɔɔbɔɔ dimi maa, bɛnduaa a wanaa cheleŋ lambaŋ fɛŋ kɔlaŋ o nda lo malaŋ nda miiŋgu. Mi Naŋsi, ndepilɛnɔ pilɛ Eesiaa dimi aa: “Chaaŋ niŋ kpɛɛluŋ naŋ wa o kundaa niŋndo mala ya ni. Mbo kaala ya naŋ chaa kala pilɔɔ naŋ fula ni. Mbo loonuŋ ya a mɛɛ naŋ wa yoomu naa tueiyɔɔ yeela paandu yɛ. Mi ndoo yaŋ ya nilaŋ nyɛkɛndɛi te I wa pɛ suɛi o ndu lo nduyɛ, ndoo yɔŋ isiooŋ le ya silaa le. Mbo chɔm kɛsɛ maa chaaŋ ni kpeekpeiyo o cho ni nduyɛ o wa lɔɔlɔɔ o bɛɛndiaŋ le ya malaa.”

11. Le yɛɛ nyiɛɛye yeemaŋ yɛ le wana kɔl tuuwo dɛɛniaa?

¹¹ Nyiɛɛye cho ko maa kotooma nɛiyaa. I nɔla mii pɔlul kɔl tuu wa waŋndo niŋ ndo. Waŋnda apum kelu kɔlaŋ o bɔŋaŋndaŋ le mɛɛ waŋndo pilaŋ nda tana o kundaa niŋ yɛ. Mi che bɛɛ nyɔɔ viou niŋ tau, kɛ a cho wɔ suŋ suŋ a kɔl tuu  koŋ. Te a yiyaŋ pɛ a nyɛ keekaŋ nda tɛɛŋ ndo, a del pɛŋ kɔl le miiŋgoo Chɛhowa o ibuŋ te. Mi apum yiyaŋ maa kafalaŋ nda tosal nda ni. Le wanaa waa ndoo malaa, mɛɛ mi waŋndo yaŋ nda nilaŋ nyɛkɛndɛi nduyɛ mbo bii kɔl tambɛi ndaa bila. (Chemi. 1:​19) Mi Mali, ndepilɛnɔ kelu paandu kɔlaŋ o bɔŋaŋndaŋ ndo dimi aa: “Yaa yeema wana ya chɔm bahawɛi nuu mbo yaŋ ya nilaŋ, wɔɔsuu ya mɛmiaŋ nduyɛ mbo ke ya sila mala ya wo.”

12. Chɔmndɔ taamaseliiyo le sinaa mɛɛ kaala Chɛhowaa naŋ wanaa kelu kɔlaŋ o bɔŋaŋndaŋ nda o kundaa niŋ yɛ.

¹² Baabuiyo tuu kaala Chɛhowa nɔ le wanaa nduaa wo a yooleŋ. O nɛi kuɛɛ choo? Yiyaŋndɔ a taamaseliiyo hoo: Ŋ dimi wɔ maa a cho loo o peelo mi waŋndo wuulul num nyɛ ŋ saa a mɛɛya le wo. Ma naŋ kɔl tau kanifuule te a saa ndu pɛ, a mɛɛya lɛ o mɛŋndaŋ bɛŋgu le. Kɛ nyɛ nda wuulul num koŋ ma saa wo cho le tuu le. Kanifuule, saa ndu bɛɛ ma wa o mɛŋndaŋ choo, yoomu numndo cho wɔ o kpundɔɔ niŋ te a fula o peelo le. Le hei, mɛɛ mi wanaa cho o dɛndɔɔ niŋ nda wuulul num yooleŋ ma saa nduyɛ ma naŋ num o dɛndɔɔ. Mi Chɛhowa dimul Isɔluɛiyaa mal ndu wa aa: ‘Mi lo o koŋ, mi nanuŋ nda o ibuŋ . . . o koŋ kɔɔli mi chɔm nda kaalaa.’ (Hoosi. 11:​4) Chɛhowa cho wɔ hau nanɔɔ wanaa mal ndu nduyɛ ma wa mɛɛyaa o bahawɛila chieeŋndo hoo niŋ nda. O yeema nda ma sina maa o kaala wɔ nda nduyɛ ma miiŋgu ndu o ibuŋ. Chɛhowa nɔla mbo soliŋ num kpeku le nda malaa ma sina maa o kaala nda.

13. Vɛɛ nyɛ yɔŋnuŋ Pabulo wo chɔm yɛ maa kaala naŋ nɔ le puaapiliaa naa wo nɔla mbo tosa ma miiŋgu Chɛhowa o ibuŋ?

¹³ I cho bɔɔ suɛi sɔvɛ le wanaa kelu kɔlaŋ o bɔŋaŋndaŋ nda dimullo maa Chɛhowa kaala nda. Nduyɛ, ŋ nɔ vɛlɛ miŋ dimul nda maa ŋ kaala nda. Mi Pabulo naŋ soo a ndu okɔɔ o buŋgɛi naŋ hiou ve niŋndo kialu kɔlaŋ o bɔŋaŋndaŋ le  wɔsilaŋ 30 a nyɛ lechoo. Mbo dimi aa: “Mɛɛ ya wa malɔɔ o yalo bɛɛ idii pilɛ, mi ndepilɛnɔ yuwɛiyo opum komal la. Nduyɛ, mbo suaa o ya lo nyɛkɛndɛi. Mi kandu chaŋndo maa chɛlɛkpɛ. Okoŋ, mi dimul ndu maa wana che pɛ aa Chɛhowa vem ndu ni le suɛi o ya lo. O foofu koŋ choo ya kɛɛsiaa ni le miiŋgoo Chɛhowa o ibuŋ.”

14. A mɛɛ tale cho o Luku 15:​4, 5 niŋndo dimi yɛ, yɛɛ wana mandaa lasaa ndoo tosa yɛ mɛɛ o saaluŋ saa ndɔɔ?

¹⁴ Ŋ nɔ miŋ hiou lachi a wanaa kelu kɔlaŋ o bɔŋaŋndaŋ nda malaa te ŋ saaluŋ nda pɛ. Mɛɛ poombɔ laasiaŋ Chiisu soo o tale ndɔɔ niŋndo wa o saŋgaa niŋ yɛ, lende koni waŋnda haa nɔ kɔl saŋgaa niŋ ni. A cho niŋ yikpi o chieeŋ Setana wo hoo niŋ. Le hei, a nɔ lɛ chaŋyɛi kpɛɛluŋ a Chɛhowa maa paandu le. Ŋ nɔ miŋ mala nda le ma miiŋgu o chaŋyɛi niŋ a ndu. Mi Chiisu dimi taloo a saa laasiaŋndo okɔɔ. Mbo dimi maa mɛɛ wana mandaa lasaa saaluŋ saa hoo, mbo handuŋ ndu o choŋgu okoŋ, mbo kua a ndu o a tuaa choo. Mi wana mandaa lasaa hoo nuuviaa saa ndɔɔ le teleŋ vilɛi nduyɛ mbo saŋga tau. Kɛ mɛɛ o saaluŋ ndu mbo cha maa o nɔla lɛ kɔlaŋ a bandɔ le, mbo chua ndu le kɔlaŋ a ndu o kpakioo niŋ.—Nuawɔ Luku 15:​4, 5.

15. Vɛɛ naŋ mala yɛ wanaa kelu kɔlaŋ o bɔŋaŋndaŋ nduyɛ ma yeema Chɛhowa miiŋgoo o ibuŋ nda? (Tofa kɔfoo hoo “ O Cho Bɔɔ Yau Sɔvɛ.”)

¹⁵ Ŋ nɔ miŋ mala wanaa kelu kɔlaŋ o bɔŋaŋndaŋ nda ma chɔulaba bahawɛila cho nda kuunaa le Chɛhowa miiŋgoo o ibuŋ ndo. Teleŋndo pila yeemaŋ naa o ba ni le hei tosaa. Kɛ nyina Chɛhowaa, Baabuiyo a yaula naalaŋ la nɔla mi la mala naa le nda malaa ma miiŋgu o chaŋyɛi niŋ a Chɛhowa. (Luomaŋ. 15:​1) Vɛɛ naŋ tosa yɛ hei? Mi bɛndu kunda pilɛ dimi aa, “Wanaa kelu kɔlaŋ o bɔŋaŋndaŋ nda a bɔɔbɔɔ  nɔ ma pɛɛku vɛlɛ Baabuiyo te a kɛɛsiaa pɛ le miiŋgoo Chɛhowa o ibuŋ.” * Lelaŋ te bɛnduaa kundaa dimul num pɛ le wana waa ndoo pɛɛkoo, chɛl te a sina pɛ maa a tiuba. Mi bɛndu kundaa hoo dimi vɛlɛ aa: “Wanaa nda dimul le wanaa waa ndoo pɛɛkoo wa nɔ ma tosa ma wa fɛɛsɛŋ a nda. A nɔ ma tosa ma nɔ tiindaŋndo maa a dimul nda bɛɛ bahawɛi ndaa, wana cheleŋ cho sina a ndi okɔɔ le.”

16. Vɛɛ naŋ looku yɛ sina maa mi maalikɛiya bɛɛ mala naa?

¹⁶ Mi maalikɛiya bɛɛ mala naa le wanaa kelu kɔlaŋ o bɔŋaŋndaŋ kɛ ma yeema le miiŋgoo Chɛhowa o ibuŋ nda saalɔŋndo. Sɔɔŋ yɔŋnaŋndoŋ cho tau ŋ mala naa le hei sinaa wo. (Sɔɔŋ. 14:​6) Le taamaseliiyo, mi Silvio cho Ikueedɔ wo piɛi kalaŋ o Chɛhowa lo le mbo mala ndu mbo miiŋgu o kundaa niŋ. O wa wɔ piɛileŋ mi bɛnduaa kundaa a ŋiɔɔŋ kundu dio ndɔɔ. Paale leŋ nda kandu ndu malaa ni nduyɛ, ma naŋ kɔl tau.

17. Vɛɛ kɔllo wa yɛ naa te ŋ mala pɛ wanaa kelu kɔlaŋ o bɔŋaŋndaŋ nda?

¹⁷ Miŋ sɔla nyaaloo tau te ŋ mala pɛ wanaa kelu kɔlaŋ o bɔŋaŋndaŋ nda ma miiŋgu Chɛhowa o ibuŋ. Kɔɔfanɔ pilɛ diolaŋ Salvadɔ kindiŋ niŋ tau le waŋnda haa malaa. Tofawɔ nyɛ o dimi wo: “Te I yiyaŋ pɛ a wanaa miiŋgu niŋ Chɛhowa o ibuŋ nda, mi mɛmɛma kɔl kɛndiaŋ ma tol la kpasu kpasu. Mi naŋ kɔl tau te I tosa pɛ wallo diompilɛ a Chɛhowa nduyɛ mi che mbo soli saa nduaa opilɛ o chieeŋ Setana wo niŋ.”—Walta. 20:​35.

18. Te o yɔŋ pɛ aa kelu niŋ kɔlaŋ o bɔŋaŋndaŋ, tiindaŋ yɛɛ ŋ nɔ yɛ ma nɔ?

¹⁸ Te o yɔŋ pɛ aa kelu niŋ kɔlaŋ o bɔŋaŋndaŋ, mɛɛ nɔ tiindaŋndo maa Chɛhowa kaala wɔ num tau. O yeema num ma miiŋgu ndu o ibuŋ. Nduyɛ, a nɔ ma dɔu sɛmbɔɔ le hei tosaa. Chɛhowa cho lehɔl o nɛi le num mɛɛ finya Chiisu soo a ndu okɔɔ o tale ndɔɔ niŋndo wa lehɔl o nɛi le po ndɔɔ yɛ. Nduyɛ o cho num lakɔ demul paale o cho num chɔ hunɔɔ leŋ.