ARTIKLE YA KULONGOKA 26
“Beno vutukila munu”
“Beno vutukila munu, mpe mu ke vutukila beno.”—MAL. 3:7.
NZIMBU 102 “ Venons en aide aux faibles ”
YINA BETO KE LONGOKA *
1. Yinki Yehova ke kanisá ntangu kisadi ya yandi mosi ke kwendá ntama na yandi?
FASO beto talak’ yawu na artikle me luta, Yehova ke faso ntwadisi ya mbote yina ke kipeke mosi na mosi ya mameme ya yandi. Mpe yandi ke sosá ba yina nyonso kotá madidi mpe kwendá ntama na yandi. Yehova zonzá na ba-izraelite nyonso yina kwendá ntama na yandi: “Beno vutukila munu, mpe mu ke vutukila beno.” Beto zaba ti Yehova ke kanisá kaka faso yina samu yandi zonzá: “Mu ke sobá ve.” (Mal. 3:6, 7) Yesu zonzá ti, Yehova na ba-ange ke talá kilengi mingi ntangu kisadi yina kwendá ntama na Yehova me vutukila Yandi.—Luke 15:10, 32.
2. Yinki beto ke zonzila na artikle yayi?
2 Beto tala bifwani tatu yina Yesu pesá, samu na kulakisa faso beto lenda sadisa ba yina me kwenda ntama na Yehova. Beto ke zonzila bifu ya mbote yina beto ke na yawu nsatu samu na kusadisa mameme ya Yehova yina zimbaná, na kuvutukila yandi. Mpe beto ke longoka ti beto ke kuzwa kilengi ya mingi, si beto sala bangolo na kusadisa ba yina kotá madidi, mpe biká kimvuka.
SOSA MBONGO YA KISENGO YINA ZIMBANÁ
3-4. Samu na yinki kento yina me zonzila Luke 15:8-10, sosá mbote-mbote mbongo yina zimbaná?
3 Beto zolá sala bangolo na kusosa ba yina nyonso ke na nsatu ya kuvutuka na Yehova. Na buku ya Luke, Yesu zonzilá disolo ya kento yina zimbisá mbongo ya valere yina ba ke bokilá drachme. Kima ya kusimba na disolo yayi, ni faso kento yayi ke na sosá mbongo ya yandi.—Tanga Luke 15:8-10.
4 Yesu zonzilá kilengi ya salá kento yina, ntangu yandi talá mbongo yina zimbaná. Na Izraele, ntangu mwana ya kento vandá kwelá, mama ya yandi vandá pesak’ yandi mbongo 8 ya bisengo. Mbongo yayi vandá ntalu na meso ya kento yayi samu ya katuká na mama ya yandi. Yandi vandá kanisa ti, mbongo yina kubwá na ntoto. Na yina, yandi baká mwinda samu na kusosa yawu, kasi yandi talá ata kima. Mwinda ya mafuta lenda pesa ve yandi lumière ya kulunga samu na kutala mbongo yina zimbaná. Na manima, yandi kombolá yinzo nyonso. Ni kuna, yandi talak’ yawu na kati ya bantoto. Yandi sepelá mingi ntangu yandi kuzwak’ yawu! Yandi bokilá bandiku ya yandi mpe ba yina ke vandá pene-pene na yandi samu na kuzonzila bawu nsangu ya mbote yayi.
5. Samu na yinki beto me bonga kusala bangolo na kusadisa ba yina biká kimvuka na kuvutula?
5 Beto me longoka na disolo ya Yesu yayi ti, ntangu beto ke zimbisá kima, beto ke salá nyonso samu na kuzwa yawu. Faso mosi mpe, beto me bonga kusala bangolo na kusadisa na kuvutula na kimvuka ba yina nyonso kwenda ntama na Yehova. Ya lenda vanda ti, bamvula mingi me luta, ba ke kwizá dyaka ve na balukutakanu. Ba ya nkaka kwendá na bayinsi ya nkaka. Bampangi ya kuna zaba ve bawu. Kasi, beto lenda ndima ti, ba ya nkaka ke na nsatu ya kuvutuka na Yehova. Ba zola dyaka kusambila Yehova kintwandi na bampangi ya bawu, kasi ba ke na nsatu beto sadisa bawu.
6. Wa’ faso beto nyonso lenda tula diboko na kusosa ba yina ke kwizá dyaka ve na balukutakanu?
6 Ba nani zolá tula diboko na kusosa ba yina kwendá ntama na Yehova? Beto nyonso: bakuluntu, bapionier, bantu ya dikanda, mpe bampangi nyonso ya kimvuka. Nge ke kwandi na ndiku to muntu yina nge zaba yina me kwendá ntama na Yehova? Yinki nge ke sala si ntangu nge ke na salá predikasion ya yinzo na yinzo to ya nzila, nge me bwabana na muntu yina ke kwizá dyaka ve na balukutakanu? Zonza na yandi, si yandi zola ba kwiza tala yandi, nge ke vanda na kilengi ya kupesa adress to numero ya yandi ya telefone na bakuluntu ya kimvuka.
7. Yinki beto lenda longoka na mambu yina zonzá kuluntu mosi na nkumbu ya Thomas?
7 Bakuluntu ke na mantwala na kisalu ya kusosa ba yina nyonso ke na zolá kuvutukila Yehova. Wa’ faso ba lenda sala yawu? Tala mambu yina zonzá kuluntu mosi na nkumbu ya Thomas, * yina ke vandá na Espagne. Yandi sadisá batemwe ya Yehova 40 na kuvutuka na kimvuka. Thomas me zonza: “Kima ya ntete, mu ke yufulá na bampangi, si ba zaba bisika yina mase vandá, ba yina ke kwizá dyaka na balukutakanu. To mu ke yufulá na bampangi ya kimvuka, si ba me zaba ba yina me kotá madidi. Mingi na kimvuka ke kumá na tiya ya kusadisa samu ba zola ti ba yina kwendá, vutuka. Na manima, ntangu mu ke kwendá tala bawu, mu ke yufulá bawu byuvu yina me tadila bana ya bawu, to dikanda ya bawu. Ba ya nkaka vandá nata bana ya bawu na balukutakanu. Bana ya nkaka vandá baproklamatere. Beto lenda sadisa bawu mpe na kuvutuka na Yehova.”
VUTULA NA KIMVUKA BANA YA YEHOVA YINA ZIMBANÁ
8. Na kifwani ya mwana yina biká yinzo, yina ke na Luke 15:17-24, wa’ faso tata bakilá mwana ntangu yandi nyongá yimbi yina yandi salá?
8 Wapi bifu ya mbote beto zola vanda na yawu si beto zola kusadisa ba yina ke na sosá kuvutuka na Yehova? Beto tala bileso yina beto lenda benda na kifwani ya mwana yina biká yinzo ya Tata ya yandi. (Tanga Luke 15:17-24.) Yesu zonzá wa’ faso mwana yango kwizá zaba yimbi yina yandi salá mpe yandi baká desizion ya kuvutuka na yinzo. Tata kwendá bwabana yandi mbangu mpe yambak’ yandi. Na yina, tata lakisá mwana ti, yandi ke zolá kaka yandi. Mwana kuma na nsoni mingi samu na yimbi yina yandi salá, mpe yandi mangá tata bakila yandi dyaka faso mwana ya yandi. Tata kumá na kyadi ya mwana ya yandi, samu mwana fugulá ntima na yandi, mpe nyongá yimbi yina yandi salá. Tata salá kima mosi samu na kulakisa na mwana ti, yandi vandá na kilengi ya kuyamba yandi na yinzo, faso ngaamba ve, kasi faso mwana yina yandi ke zolá mingi. Na kulakisa yawu, tata me lwatisa yandi bilele ya kitoko, mpe me sala fete samu na yandi.
9. Wapi bifu ya mbote yina beto me lunga kuvanda na yawu samu na kusadisa ba yina kumá madidi mpe kwendá ntama na Yehova? (Tala tablo “ Wa’ faso beto lenda sadisa ba yina ke na sosá kuvutuka na Yehova.”)
9 Yehova ke faso tata yayi. Yandi ke zolá bampangi ya beto yina kumá madidi mpe kwendá ntama na yandi mpe yandi ke na nsatu ba vutukila yandi. Na kulanda kifwani ya Yehova, beto lenda sadisa bawu na kuvutuka na kimvuka. Na kusala yawu, beto me lunga kulakisa ntima ya yinda, kifu ya kukabulá mpasi ya bampangi, ntima ya kyadi, mpe luzolo. Samu na yinki beto me lunga kulakisa bifu ya mbote yayi, mpe wa’ faso beto lenda lakisa yawu?
10. Samu na yinki beto me lunga kuvanda na ntima ya yinda samu na kusadisa ba yina zola kuvutula kindiku na Yehova?
10 Beto me lunga kuvanda na ntima ya yinda samu ti ya ke baká ntangu na muntu na kuvutuka na Yehova. Mingi ya ba yina biká kimvuka, ke zonzá ti avant ba vutukila Yehova, bakuluntu na bampangi ya nkaka vandá kwenda tala bawu bambala mingi. Mpangi mosi ya kento ya yinsi ya Asie na nkumbu ya Nancy soniká: “Ndiku mosi ya tsyeleka ya kimvuka sadisá munu na faso ya mbote. Yandi zolá munu faso yaya ya yandi. Yandi vandá zonzila munu bantangu ya mbote yina beto vandá lutisá kintwandi. Na ntima ya yinda nyonso, yandi vandá kuwá munu mbote-mbote ntangu mu vandá zonzilak’ yandi bamambu yina vandá na munu na ntima, mpe yandi vandá pesa munu malongi. Yandi lakisá ti yandi ke ndiku ya tsyeleka yina me bonga samu na kusadisa ntangu nyonso”.
11. Samu na yinki beto me lunga kuvanda na kifu ya kukabulá mpasi ya bampangi samu na kusadisa ba yina biká kimvuka?
11 Kifu ya kukabulá mpasi ya bampangi ke faso mafuta ya ngolo, yina lenda belusa mputa ya ntima. Ba ya nkaka biká kimvuka samu mpangi mosi lwalisá bantima ya bawu. Ya ke salá ti ba vanda na nkele. Samu na yawu, ba ke ve na nsatu ya kuvutuka na Yehova. Ba ya nkaka lenda kanisa ti kimvuka zola ve bawu. Ba lenda vanda na nsatu ya muntu yina ke kuwa bawu mpe yina lenda vanda na kisika ya bawu. (Zaki 1:19) María, yina biká kimvuka na ntama, me zonza: “Mu vandá na nsatu ya muntu yina ke kuwa munu, ke pesa mu ngolo, ke sadisa munu mpe ke pesa munu malongi ya mbote.”
12. Samu na yinki luzolo ya Yehova ke faso singa?
12 Biblia ke zonzá ti luzolo ya Yehova samu na bisadi ya yandi ke faso singa. Samu na yinki? Beto tala kifwani yayi. Kanisa ntete, nge ke na dyamá na kati ya maza ya la-mer yina ke madidi. Muntu mosi me losila nge kilele yina ke sadisa nge na kudyama ve. Ntembe ve, nge ke zola mambu yina yandi me sala, samu ya lenda sadisa nge na kudyama ve. Kasi, kilele ya pamba me lunga ve. Nge ke dyaka na nsatu ya kima ya nkaka samu na kuvuuka. Samu maza ke madidi, nge zola basika na maza. Na yawu, nge ke na nsatu muntu yina ke na bato losila nge singa yina ke sadisa nge na kubasika na maza. Yehova zonzá na ba-izraelite yina kwendá ntama na yandi: “Mu lembá ve kubenda bawu na basinga ya bantu, na basinga ya luzolo.” (Oze 11:4) Bubu yayi mpe, Nzambi ke kaka na makanisi ya faso yayi samu na ba yina biká kusadila yandi, yina ke na lutisá bantangu ya mpasi mpe yina ke na basusi mingi. Yandi zola ba zaba ti yandi zola bawu, mpe yandi zola kusadisa bawu na kuvutuka na yandi. Mpe Yehova lenda sadila nge na kulakisa bawu luzolo ya yandi.
13. Wa’ faso kifwani ya Pablo ke na lakisá ti luzolo ya beto lenda sadisa ba ya nkaka na kuvutuka na Yehova?
13 Ya ke mbote na kulakisa na ba yina me kumá madidi ti Yehova ke zolá kaka bawu faso beto mpe ke zolá bawu. Pablo yina beto me zonzila na artikle yina me luta, biká kimvuka bamvula pene-pene na 30. Yandi me zonza: “Kilumbu mosi, mu basiká na yinzo na suka, mu bwabaná mpangi mosi ya kento ya kukula. Yandi sololá na munu na luzolo nyonso. Mpe mu bandá kudila nete mwana ya fioti. Mu zonzá na yandi ti ya me talana faso ni Yehova muntu filisak’ yandi na kuzonza na munu. Samu na munu, ntangu lungá ya kubaka desizion ya kuvutuka na Yehova.”
NA LUZOLO NYONSO SADISA BA YINA KE YA KULEMBA
14. Faso ke na zonzilá kifwani ya Luke 15:4,5, yinki ntwadisi ya mameme salá ntangu yandi talá dimeme yina zimbaná?
14 Ntangu ba yina kumá madidi mpe biká kimvuka ke vutuká, beto zola kontinye na kusadisa bawu mpe na kupesa bawu ngolo. Faso disolo ya mwana yina biká yinzo, bantima ya bawu mpe lenda fuluka na basusi mpe ba lenda baka mwa ntangu na kubeluka. Samu ba me lutisa ntangu mingi na yinza ya Satan, ba ke dyaka ve na kindiku ya ngolo na Yehova faso na ntama. Beto me lunga kusadisa bawu na kutunga dyaka kiminu ya bawu na Yehova. Na kifwani ya dimeme yina zimbaná, Yesu lakisá faso ntwadisi ya mameme, tulá dimeme na zulu ya mapeka. Mpe malembe-malembe, yandi natak’ yandi na kisika yina vandá mameme ya nkaka. Ntwadisi ya mameme baká ntangu mpe tulá bangolo ya yandi nyonso samu na kukwenda sosa dimeme yina zimbaná. Kasi, yandi zabá ti dimeme yango vandá na nsatu ba sadisa yawu na faso ya kulutila. Dimeme yina vandá dyaka ve na ngolo ya kutambula tii na kisika yina mameme ya nkaka vandá. Na yina, yandi sadisak’ yawu na kuvutuka.—Tanga Luke 15:4, 5.
15. Wa’ faso nge lenda sadisa muntu yina ke na sosá kuvutuka na Yehova? (tala tablo “Mukanda mosi ya mfunu mingi.”)
15 Beto me lunga kusala bangolo, mpe kulutisa ntangu mingi na kusadisa ba yina biká kimvuka, na kubika bamambu nyonso yina ke na kangá bawu nzila ya kusadila dyaka Yehova. Na nzila ya mpeve ya santu ya Yehova, ya Bibila, mpe ya mikanda yina beto ke zwá na kimvuka, beto lenda sadisa bawu na kukuma dyaka ngolo na kimpeve. (Rom. 15:1) Wa’ faso beto lenda sala yawu? Kuluntu mosi yina me zaba mingi, me zonza: “Mingi ya ba yina ke baká desizion ya kuvutuka na Yehova, ke bandá dyaka kulongoka Biblia.” * Na yina, si ba me lomba na nge na kulongoka na mosi ya bawu, ndima kusala yawu si nge ke na ngolo ya kusala yawu. Kuluntu yango me zonza dyaka: “Proklamatere yina ke longoka Biblia na yandi zolá vanda ndiku ya mbote, yina yandi lenda zonza mambu ke na yandi na ntima.”
KILENGI NA ZULU MPE NA NTOTO
16. Wa’ faso beto me zaba ti ba-ange ke sadisá beto?
16 Beto ke na bifwani mingi yina ke na lakisá ti, ba-ange ke sadisá beto na kusosa ba yina nyonso ke na nsatu ya kuvutuka na Yehova. (Luz. 14:6) Na kifwani, Silvio, yina ke na bwala ya Equateur, vandá sambila mingi samu Yehova filisa yandi muntu yina ke sadisa yandi na kuvutuka na kimvuka. Kaka ntangu yina yandi manisa kusambila, bakuluntu zole soneke na porte ya yandi. Ntangu ba vandá solola na yandi, ba vandá na kilengi samu ba bandá kupesa yandi yina yandi vandá na yawu nsatu.
17. Yinki ya ke salá beto na ntima ntangu beto ke sadisá ba yina biká kimvuka?
17 Beto lenda kuzwa kilengi mingi na kusadisa ba yina ke ya kulemba na kimpeve, na kuvutuka na Yehova. Beto tala yinki Salvador, pionier yina ke salá bangolo mingi na kusadisa ba yina biká kimvuka. Yandi me zonza: “Ntangu ya nkaka mu ke dilá na kilengi, ntangu mu ke kanisá na ba yina nyonso vutuká na Yehova. Mu ke na kilengi mingi ya kusala kintwadi na Yehova, samu na kusadisa bisadi yina ke ntalu na meso ya yandi, na kubasika na yinza ya Satan, mpe na kuvutuka na kimvuka.”—Bis. 20:35.
18. Si nge ke mosi ya ba yina kwendá ntama na Yehova, yinki nge zolá zimbana ve?
18 Si nge ke mosi ya ba yina kwendá ntama na Yehova, kuzimbana ve ti Yehova ke zolá kaka nge. Yandi zola nge vutukila yandi. Nge me bonga kusala bangolo samu na kuvutuka na yandi. Na yawu, faso tata ya kifwani yina Yesu pesá, maboko ya Yehova ke ya kufuguka; yandi ke na vingilá nge vutukila yandi, mpe yandi ke yamba nge na kilengi nyonso na kimvuka ya yandi.
NZIMBU 103 Les bergers, des dons de Dieu
^ par. 5 Yehova zola ti ba yina nyonso kumá madidi mpe biká kimvuka, vutukila yandi. Beto lenda sala nyonso samu na kusadisa ba yina biká kimvuka, na kundima yina Yehova me zonza: “Beno vutukila munu.” Na artikle yayi, beto ke tala wa’ faso beto lenda sadisa bawu na kusala yawu.
^ par. 7 Ba me soba bankumbu ya nkaka.
^ par. 15 Bantu ya nkaka yina biká kimvuka lenda longoka buku Restez dans l’amour de Dieu, ba ya nkaka mpe lenda longoka dyaka bikapu ya buku Approchez-vous de Jéhovah. Komite ya servise ya kimvuka ke sola proklamatere yina ke na ngolo ya kulongoka na muntu yina me vutuka na Yehova.
^ par. 68 YINA BAFOTO KE NA ZONZILAKA. Bampangi tatu ya bakala ke na sadisá mpangi mosi yina ke na zolá kuvutuka na Yehova. Na yawu, ba vutuká na kutala yandi bambala mingi, samu na kulakisa yandi ti ba ke zolak’ yandi, mpe ba vandá baka ntangu ya kuwa yandi mpe kuvanda na kisika ya yandi.
