1. Ngapi a lizuvhu Jehova apa muntu ogu ga tengura monyima a tengura kwendi?

NGOMU ka tu yi zogerere mosirongwa sa ka pita, Jehova kwa lihetekanesa mwene komusita gomuwa ogu a pakere mbili nonzwi dendi nadinye. Ntani age kupapara nonzwi dendi edi da zumbana. Jehova kwa tanterere Vaisraeli ava va mu sigire asi: “Tengureni kwange, makura name ngani tengwire kweni.” Ose twa yi diva asi Jehova simpe kulizuvha monkedi zokulifana, morwa age kwa tanta asi: “Ame HOMPA kapi ani runduruka.” (Mara. 3:6, 7) Jesus kwa tente asi Jehova novaengeli kuhafa unene apa muntu a tengura kwendi.—Ruk. 15:10, 32.

2. Yisinke natu ka zogera mosirongwa esi?

² Tu zeni tu ka zogere yifanekeso yitatu eyi ga ruganesere Jesus, eyi ayi tu vatere tu dive omu natu vatera vantu ava va tengura monyima. Natu ka lironga yikara yimwe eyi twa hepa kukara nayo yipo tu vatere nonzwi dokuzumbana di tengure kwaJehova. Natu ka lironga hena konda zeyi natu litulira mo unene mokuvatera ava va tengura monyima.

3-4. Morwasinke mukadi ogu va tumbura mwaRukasa 15:8-10, ga paparere unene simaliwa sendi sokuzumbana?

³ Twa hepa kukondja unene yipo tu gwane vantu ava vana hara kutengura kwaJehova. Mosifanekeso esi sa kara mEvangeli lyaRukasa, Jesus kwa simwitira kuhamena mukadi ogu ga paparere simaliwa sendi esi sa zumbanene. Simaliwa oso kwa kere nomulyo. Sifanekeso esi kwa demenena omu mukadi ogo ga litulire mo unene mokupapara simaliwa sendi.—Resa Rukasa 15:8-10.

⁴ Jesus kwa fatwilire omu ga lizuvhire mukadi ogo apa ga gwene simaliwa sendi esi sa kere nomulyo. Apa mukadi goMuisraeli nga kwara momazuva gaJesus, ozina ngava mu pe yimaliwa yomuwaya-waya murongo. Simaliwa oso, nampo ozina va  si mu pere mukadi ogo apa ga kwere, eyi yiyo sa karerere nomulyo kwendi. Mukadi ogo kwa gazarere asi simaliwa sendi kwa gwililire pevhu, yipo nye age kwa hwamekere ramba yipo a si papare. Ramba zendi zomaholi nampo kapi za mu vaterere a gwane simaliwa sendi. Konyima, age kwa kombere zungo mudima yipo a papare nawa simaliwa sendi. Makura tasi mono kuna kuvembera, tasi damuna. Age kwa hefe sili unene makura ta zigida vakaume vendi novamusinda va ya mu hafese ko.

5. Morwasinke ayi karere udigu kugwana vantu ava va tengura monyima?

⁵ Sifanekeso saJesus kulikida asi nsene tuna zumbanesa sininke, twa hepa kurugana unene yipo tu si gwane. Mokulifana, twa hepa kurugana unene yipo tu gwane ava va tengura monyima. Vantu owo, nampo nare va hageka kuwiza komapongo ndi kuza mokuzuvhisa. Ndi nampo awo kwa dirukira komukunda oku va dira kuvadiva vanavazinyetu. Nye twa yi diva asi ngesi sinzi sovantu owo vana hara kutengura kwaJehova. Awo vana hara kukarera Jehova kumwe novapuli vakwawo. Nye kapi ta yi va tompoka nsene kapi tuna kuvavatera.

6. Ngapi natuvenye womombungakriste natu lihameka mo mokupapara vantu ava va tengura monyima?

⁶ Wolye nava lihameka mo mokupapara vantu ava va tengura monyima? Natuvenye twa hepa kulihameka mo, kukwatera mo vakuronambunga, vazuvhisi wokukarerera, mapata ntani vanavazinyetu navenye. Wa kara nakaume ndi gumwe gekoro ogu ga tengura monyima ndi? Wa ligwanekera rumwe nomuntu ogu ga tengura monyima, moyirugana ya tunda embo zende embo ndi apa wa rugene nositoroli ndi? Nsene yimo, hetekera ko kugwana mauzera gomuntu ogo nokugagava kovakuronambunga.

7. Yisinke ono lirongere ko komukuronambunga gedina Thomas?

⁷ Yisinke nava rugana vakuronambunga mokupapara ava vana hara kutengura kwaJehova? Koneka eyi ga uyunga mukuronambunga gumwe gedina Thomas. * Age kwa tunga moSipanye ntani age kwa vatera vanavazinyetu wokusika 40 va tengure kwaJehova. Thomas kwa tanta asi: “Pomuhowo, ame kupura vanavazinyetu wokulisiga-siga nsene va diva oku ga tunga munazinyetu ogu ga tengura monyima. Ntani hena ame kupura vanavazinyetu nsene va diva munazinyetu gumwe ogu ga hageka kuwiza komapongo. Sinzi sawo kuvatera nge morwa nawo kuna kulihameka mo mokupapara vantu owo. Konyima apa ani dingura vanavazinyetu ava va tengura monyima, ame kuvapura kuhamena vana vawo ntani nekoro lyawo. Vanavazinyetu vamwe ava va tengura monyima ngava wiza komapongo novana vawo ntani vana vawo kwa kere vazuvhisi. Vanona owo nawo twa hepa kuvavatera va tengure kwaJehova.”

8. Mosifanekeso saJesus somumati gokuzumbana esi sa kara mwaRukasa 15:17-24, ngapi omu guhya ga tekwire munwendi apa ga litezwilire?

⁸ Yikara musinke twa hepa kukara nayo yipo tu vatere ava vana hara kutengura kwaJehova? Koneka eyi natu lirongera ko kosifanekeso somumati ogu ga tokwere kutunda mo membo. (Resa Rukasa 15:17-24.) Jesus kwa tente asi mumati ogo ga ya dimbwilire asi age kwa tulire epuko makura yipo ga tokwere kutengura kembo. Oguhwe kwa dukire va ka ligwane namunwawo ntani nokumulidingira. Eyi kwa likidire asi awo va mu hara. Mumati ogo kwa lizuvhire unzoni kweyi ga rugene ntani kapi ga here oguhwe va mu tekure ngwendi munwawo. Oguhwe kwa fililire munwawo nkenda apa ga va tanterere omu ga lizuvhire. Ntani awo kwa rugene ko yuma yipo va likide asi awo  vana tambura munwawo ntani awo kapi ngava mu tekura ngwendi mukareli. Awo kwa ruganene munwawo ogu ga litezwilire sipito nokumudwareka yikoverero yoyiwa.

9. Yikara musinke twa hepa kukara nayo yipo tu vatere vantu ava va tengura monyima va tengure kwaJehova? (Tara kakende “ Omu natu vatera ava vana hara kutengura kwaJehova.”)

⁹ Jehova kwa fana ngwendi guhya gomosifanekeso esi ga geve Jesus. Age kwa hara vanavazinyetu ava va tengura monyima ntani age ana hara va tengure kwendi. Nsene tu honena Jehova, ose ngatu va vatera va tengure kwendi. Mokututompoka oyo, twa hepa kukara nelididimiko, nonkenda ntani neharo. Morwasinke natu karera noyikara oyo ntani ngapi omu natu yi likida?

10. Morwasinke twa hepera kukara nelididimiko nsene tuna hara kuvatera muntu a tengure kwaJehova?

¹⁰ Twa hepa kukara nelididimiko, morwa ayo kugusa siruwo komeho muntu a tengure kwaJehova. Sinzi sovantu ava va tengwire monyima nare kwa tanta asi komeho va tameke hena kukarera Jehova, vakuronambunga novanavazinyetu vamwe kwa va dingwire yikando yoyinzi. Munazinyetu gomukadi gedina Nancy gomoAsia kwa tanta asi: “Ame kwa vaterere nge kaume gwange gomombungakriste. Age kwa likidire nge eharo ngwendi mukurwendi. Age kwa diworokesere nge yininke eyi ngatu rugana kumwe apa na dilire kutengura monyima. Age kwa purakenene nge apa na mu tanterere omu nina kulizuvha ntani age kwa korangedere nge. Age kwa kere kaume gomuwa ogu nga vatere nge nkenye apa.”

11. Morwasinke twa hepera nkenda nsene tuna hara kuvatera muntu ogu ga handuka?

¹¹ Apa muntu a handuka, age kulizuvha kukora komutjima ngwendi muntu ogu ana remana. Nsene tu likida nkenda komuntu  ogo, ayo kuna kara ngwendi kuna kutura mutji posironda sendi. Vanavazinyetu vamwe ava va tengura monyima kwa va handukisa gumwe gomombungakriste ntani awo simpe kulizuvha kukora komutjima. Eyi kuvaninkisa va dire kukara neharo lyokutengura kwaJehova. Vamwe nampo kulizuvha asi awo kwa va tekura momudona. Awo vana hepa muntu ogu nava purakena ntani nokukwata egano omu vana kulizuvha. (Jak. 1:19) Munazinyetu María ogu ga tengwire monyima kwa tanta asi: “Ame kwa here muntu ogu na purakena nge, na hengagwida nge ntani ogu na vatera nge.”

12. Ngapi eharo lyaJehova lyafana ngwendi rugodi? Yi fanekesa.

¹² Bibeli kutanta asi Jehova kwa hara vantu vendi ngwendi rugodi. Ngapi omu eharo lyaJehova lyakara ngwendi rugodi? Gazara asi ove kuna gwire mefuta. Mema gemefuta kuna kupupa ntani ago utenda. Nye hararasi muntu gumwe ogu ana kara mosikepa ta ku zugumine sininke esi nasi kuvatera yipo o dire kudama. Ove no kara norupandu komuntu ogo. Nye mokuninka asi o paruke, ove wa hepa kutunda mo momema. Vantu ava vana kara mosikepa va hepa kukuzugumina rugodi nokukuvatera o ze mosikepa. Apa Vaisraeli va sigire Jehova, age kwa tente asi: “Ame kwa va koka nonongama [nonongodi] dovantu neharo.” (Hos. 11:4) Jehova ana hara kurugana yokulifana kovantu ava va hageka kumukarera ava vana kuligwanekera nomaudigu. Jehova kuna hara va lizuvhe asi age ga va hara ntani ana hara kuvavatera va tengure kwendi. Jehova kuvhura a kuruganese yipo a va likide omu ga va hara.

13. Gava sihonena esi sina kulikida eyi ya karera nomulyo kulikida eharo kovanavazinyetu.

¹³ Ya kara nomulyo tu tantere vantu ava va  tengura monyima omu ga va hara Jehova ntani nomu twa va hara nose. Munazinyetu Pablo ogu va tumbwire mosirongwa sa ka pita, kwa tengwire monyima ure wonomvhura dokupitakana 30. Age kwa tanta asi: “Ezuva limwe apa na pwege membo lyange, munazinyetu gomukadi gomukurupe kwa gwene nge ntani nokuuyungisa nge neharo. Ame kwa lilire ngwendi munonagona. Ame kwa lizuvhire ngwendi Jehova yige ana mu tumu aya uyungise nge. Konyima zosihorokwa esi, ame kwa tokwere kutengura kwaJehova.

14. Kuliza nosifanekeso saJesus esi sa kara mwaRukasa 15:4, 5, yisinke ga rugene musita apa ga gwene nzwi zendi zokuzumbana?

¹⁴ Konyima zokugwana ava va tengura monyima, twa hepa kutwikira kuvavatera nokuvakorangeda. Ngwendi mumati gomosifanekeso saJesus, awo nampo kulizuvha kukora komutjima ntani ngayi va gusa siruwo mokuveruka. Ntani mokumona asi awo kuna kutunda mouzuni waSatana, awo nampo kapi vana kara nelikwatakano naJehova ngwendi nare. Yipo nye, twa hepa kuvavatera va nkondopeke epuro lyawo mwaJehova. Mosifanekeso saJesus sonzwi zokuzumbana, Jesus kwa tente asi musita kwa gusire nzwi nokuzilikambeka pomapepe yipo azi tware kononkwawo. Musita ogo kwa ruganesere siruwo sendi nonokondo dendi mokupapara nzwi ozo. Nye age ga dimbwilire asi nzwi zendi za hepa evatero. Azo kapi za kere nononkondo dokutengura kovakwawo. Yipo nye, age kwa zi damwine nokuzitengwida kononkwawo.—Resa Rukasa 15:4, 5.

15. Ngapi omu natu vatera vantu ava va tengura monyima, ava vana hara kutengura kwaJehova? (Tara kakende “ Siruganeso sosiwa.”)

¹⁵ Twa hepa kuruganesa siruwo sosinzi nononkondo detu mokuvatera ava va tengura monyima va funde po eyi yina kuvakarera udigu mokutengura kwaJehova. Nye nevatero lyompepo zokupongoka, Bibeli ntani  noyimbapiratjangwa eyi atu gwana mombungakriste, ayo kuvhura yi tu tompoke mokuvatera ava va tengura monyima va nkondondopeke elikwatakano lyawo naJehova. (Rom. 15:1) Ngapi natu yi rugana? Munazinyetu ogu ga kara mukuronambunga siruwo sosire kwa tanta asi: “Sinzi sovanavazinyetu ava va tengura monyima, va hepa kulironga Bibeli nagumwe nsene vana tokora kutengura kwaJehova.” * Yipo nye, nsene vana kupura o lironge Bibeli nomuntu ogu ga tengura monyima, ya wapa kutambura situmbukira oso. Mukuronambunga ogo kwa tanta hena asi: “Muntu ogu ana kulironga nagumwe ogu ga tengura monyima, ga hepa kukara kaume gomuwa ntani ogu na vhura kuhuguvara.”

16. Ngapi omu twa yi diva asi vaengeli kutuvatera tu gwane vantu ava vana hara kutengura kwaJehova?

¹⁶ Yihorokwa yoyinzi kulikida asi vaengeli kuruganena kumwe nose mokutuvatera tu gwane vantu ava vana hara kutengura kwaJehova. (Ehor. 14:6) Pasihonena, munazinyetu Silvio gomoEcuador kwa kandererere kwaJehova yipo a mu tumine muntu ogu na vhura kumuvatera a tengure kwaJehova. Apa ga kanderere, vakuronambunga vavali kwa ngongwere konzugo zendi. Apa va mu dingwire awo kwa yi haferere mokumuvatera.

17. Uwa musinke atu gwanene mo apa atu vatere vantu ava va tengura monyima?

¹⁷ Apa atu vatere vantu va tengure kwaJehova, ayo kutuhafesa sili. Muzuvhisi gokukarerera gedina Salvador ogu a vatere vantu ava va tengura monyima kwa tanta asi: “Apa ani gazara kuhamena vantu ava va tengura kwaJehova, ayo kuhafesa nge sili. Ayo kuhafesa nge pokudiva asi ame kwa ruganena kumwe naJehova mokuvatera vakareli vendi va tunde mouzuni waSatana nokutengura kwendi.”—Yirug. 20:35.

18. Ehuguvaro musinke wa hepa kukara nalyo nsene asi ove kwa tengura monyima?

¹⁸ Nsene asi ove kwa tengura monyima, kara nehuguvaro asi Jehova simpe ga ku hara ntani age ana hara o tengure kwendi. Nye wa hepa kurugana ko yuma yipo o tengwire kwendi. Ngwendi guhya gomosifanekeso saJesus, Jehova kuna kukundindira o tengure kwendi ntani nga kutambura nomawoko gavali.