1. Ino Yehova alalinyumfwa buyani na musebenshi wakwe wakalinga waboolela mwisule watalika alimwi kumusebensela?

BWEENKA mbuli mbotwakabandika mumutwi wamana, Yehova alalikoshanisha ku mweembeshi mubotu uyo ubikila maano abuumbi ku mbelele yomwi a yomwi. Alimwi alalangoola ili yoonse yasoweka. Yehova wakalwiita bene Isilaeli bakalinga baswa kuli nguwe ayi: “Amuboolele kuli ndime, kwaamba ayi anebo mboole kuli ndimwe.” Tulishi kwaamba ayi apacecino ciindi Yehova mbwaalinyumfwa ubu, mukwiinga wakaamba ayi: “Nshipilooki.” (Mala. 3:6, 7) Yesu wakaamba ayi Yehova alimwi abaanjelo balasangalala abuumbi na musebenshi wakwe Lesa womwi wakalinga wasoweka waboolela.​—Luka 15:10, 32.

2. Ino nshiinshi nsheshi tubandike mumutwi uyu?

² Amuleke tubandike shikoshanyo shotatwe shakaamba Yesu, shitondesha kuyandika kwakucafwa baabo bakaboolela mwisule. Tutobandika amibo njotweelete kubaayo kwaamba ayi tucikoonshe kucafwa mbelele shakasoweka kuboolela mulitanga alimwi. Alimwi tutobandika ashibotu shiswaamo mukucafwa balefukite.

3-4. Ino nciinshi cakapa kwaamba ayi mwanakashi waambwa pa Luka 15:8-10, alangoole cakubikila maano lyaali lyakwe lyakalinga lyasoweka?

³ Tulyeelete kusebensa cankusu kwaamba ayi tucane baabo basuni kuboolela kuli Yehova. Mucikoshanyo Yesu ncaakaamba ncetucana mulibuku lya Makani Abotu lyakwe Luka, Yesu wakaamba makani amwanakashi umwi wakalinga wasowa lyaali lya muulo unene lyakalinga kwiitwa ayi dilakima. Lubasu luyandika abuumbi mumakani aya, ndubasu lwaamba mwanakashi mbwaakalangoola lyaali ilyo.​—Amubelenge Luka 15:8-10.

⁴ Yesu wakasansulula mwanakashi mbwaakalinyumfwa ndyaakalicana lyaali lya silifa lyakalinga lyasoweka. Muciindi cakwe Yesu, na mwanakashi mu Isilaeli weebwa, cimwi ciindi banyina bakalinga kumupa maali asilifa ali 10. Mpashi lyaali ili lyakalinga kuyandika abuumbi ku mwanakashi uyu mukwiinga lyakalinga lyomwi pamaali ayo ngaakapekwa kuswa kuli banyina. Mwanakashi uyu wakalinga kuyeeya ayi  mpashi lyaali ili lyalokela panshi muŋanda. Aboobo wakanyasha lilampi akutalika kulangoola, sombi akulicanawobo. Cilyeelete kwaamba ayi lilampi ilyo talyakalinga kunyakisha abuumbi cakwaamba ayi inga wacikonsha kubona palokela lyaali ilyo lya silifa. Mukweelaako, wakabwesa cipyaango akutalika kupyanga ŋanda yoonse, lyalo ndyaakacana lyaali lyakwe lyakalinga kuyandika abuumbi. Aboobo wakakondwa abuumbi! Wakeeta beshicibusa bakwe abaabo mbwaakalinga kubambenaabo kwaamba ayi abalwiite ayi walicana lyaali lyakwe.

5. Ino nciinshi ceenga capa kwaamba ayi cibe ciyumu kucana baabo bakaboolela mwisule?

⁵ Bweenka mbuli mbotwabona kuswa kucikoshanyo Yesu ncaakaamba, tulyeelete kusebensa cankusu kwaamba ayi tucane cintu cakasoweka. Ubu mbocibete akulangoola bakaboolela mwisule, tulyeelete kusebensa cankusu kwaamba ayi tubacaane. Mpashi peenda myaaka iinji kuswa ciindi ndyebakacileka kusa kumabungano. Alimwi mpashi bakalongela kumusena kumwi bamakwesu abenankashi nkobatabeshi. Nacibi boobo, inga twashoma kwaamba ayi pacecino ciindi balyeelete balisuni abuumbi kuboolela kuli Yehova. Cilyeelete kwaamba ayi balisuni kusebensela Yehova pomwi abamakwesu abenankashi, ano mpashi inga tabacikoonshi kwakubula lucafwo.

6. Ino nshiinshi soonse mulibungano nsheenga twaciita kwaamba ayi tucafwilishe mukulangoola bamakwesu abenankashi bakaboolela mwisule?

⁶ Ino mbaani beenga bacafwilisha muncito yakulangoola bamakwesu abenankashi bakaboolela mwisule? Soonsebo mulibungano​—bamanene, bapainiya, abeshikamukowa bacite baabo bakaboolela mwisule. Sa kuli mukwesu na nankashi ngomushi wakaboolela mwisule? Ino inga mwacita buyani na mwakumanya mukwesu na nankashi wakaboolela mwisule ndyemutooshimikila kuŋanda aŋanda na mumisena mucanika bantu baanji? Na muntu uyo inga wasumina kumulwiita nkwaacanika na kumupa fooni namba yakwe, inga mwapa makani ayo kubamanene mulibungano.

7. Ino mweeya nshi kumakani akaamba mukwesu Thomas?

⁷ Ino bamanene inga bacita buyani kwaamba ayi bacane bamakwesu abenankashi bakaboolela mwisule basuni kutalika alimwi kusebensela Yehova? Amunyumfwe shakaamba mukwesu umwi munene mulibungano waliina lya Thomas, * ukala kucishi ca Spain alimwi wacafwa bamakwesu abenankashi beendilila 40 bakalinga baboolela mwisule. Mukwesu Thomas wakaamba ayi: “Cakutaanguna, ndeepusha bamakwesu abenankashi bapusenepusene beenga bashiba nkwaakala uyo wakaboolela mwisule. Na mpashi kwiipusha beshikushimikila na kuli mukwesu na nankashi ngobeshi wakacileka kusa kumabungano. Baanji balakumbula cakukondwa mukwiinga abalo balisuni kwaabanamo lubasu mukulangoola. Pesule na ndaaya mukufwakashila baabo bakaboolela mwisule, ndabeepusha pabana babo alimwi abamwi mumukwashi. Bamwi bakaboolela mwisule bakalinga kusa abana babo kumabungano, alimwi mpashi baana abo bakalinga beshikushimikila paciindi cimwi. Baana abalo inga bacafwikwa kuboolela kuli Yehova.”

8. Ino mushali musankwa waambwa mucikoshanyo ncotucana pa Luka 15:17-24, wakacita buyani mwanaakwe musankwa ndyaakaana?

⁸ Ino njimibo nshi njotweelete kutondesha kwaamba ayi tucikoonshe kucafwa baabo bakaboolela mwisule basuni kuboolela kuli Yehova? Amuleke tubandike nsheenga tweeya kuswa kucikoshanyo cakaamba Yesu ca mwaana wakalinga waswa paŋanda. (Amubelenge Luka 15:17-24.) Yesu wakaamba ayi mwaana musankwa ulya wakesa mukushiba ayi taakwe kusala kabotu, aboobo wakasala kuboolela kuŋanda. Baishi bakamucicila akumukumbata, aboobo wakashiba kwaamba ayi balimusuni. Mwaana uyu wakalinyumfwa cibiibi abuumbi pashintu nshaakacita alimwi wakalinga kuyeeya ayi taeeleli kutambulwa mbuli mwaana alimwi. Baishi bakamunyumfwila nkumbu ndyaakalinga kusansulula mbwaakalinga kulinyumfwa. Bakacitawo comwi kwaamba ayi bamutondeshe ayi bamutambula, kuteshi mbuli musebenshi, sombi mbuli mwanaabo ngobasuni. Kwaamba ayi batondeshe ayi ncakwiila  bamutambula camaansa obilo, baishi bakabamba kusekelela akumupa shakufwala shibotu.

9. Ino njimibo nshi njotweelete kubaayo kwaamba ayi tucikoonshe kucafwa bakaboolela mwisule kuboolela kuli Yehova? (Amubone kabokosi kacite mutwi utokwaamba ayi “ Nsheenga Twaciita Kwaamba ayi Tucafwe Baabo Basuni Kuboolela Kuli Yehova.”)

⁹ Yehova ali mbuli mushali waambwa mucikoshanyo cilya. Alibasuni bamakwesu abenankashi boonse bakaboolela mwisule, alimwi alisuni kwaamba ayi baboolele kuli nguwe. Inga twabacafwa na twakonkela cakubonenaako cakwe Yehova. Kwaamba ayi tucikoonshe kucita boobo tulyeelete kukalika moyo, kutondesha nkumbu, alimwi alusuno. Ino nceebonshi ncotuyandikila kutondesha mibo iyi, alimwi ino inga twaitondesha buyani?

10. Ino nceebonshi ncotuyandikila kukalika moyo kwaamba ayi tucafwe muntu kuyumya bushicibusa bwakwe a Yehova?

¹⁰ Tulyeelete kutaanguna kukalika moyo mukwiinga cilatola ciindi kwaamba ayi muntu aboolele kuli Yehova. Baanji bakalinga baboolela mwisule bakaamba ayi bamanene alimwi abamwi mulibungano bakabafwakashila mankanda aanji kwaamba ayi batalike kusebensela Yehova alimwi. Nankashi waliina lya Nancy ukala ku Asia, wakaamba ayi: “Shicibusa ngondakalinga kusuni mulibungano ngowakancafwa. Wakalinga kunsunibo anga ngu munene wangu. Wakanjibalusha mbotwakalinga kusangalala pomwi kale kale. Wakalinga kukutika cakukalika moyo ndyentoosansulula mbondakalinga kulinyumfwa, alimwi taakalinga kuwayawaya kundwiitako nsheenga ndaciita. Wakalinga ngushicibusa wancine, ulibambite kuncafwa paciindi cili coonse.”

11. Ino nciinshi ncotweelete kutondeshela nkumbu kumuntu wakakalashikwa?

¹¹ Na muntu wakalala, cilacisa abuumbi bweenka mbuli cilonda. Aboobo inkumbu shili anga ngumusamu ucite nkusu shakucafwa muntu utonyumfwa kucisa kunyumfwako kabotu. Bamwi bakaboolela mwisule ceebo ca kukalashikwa amuntu umwi mulibungano  balatola myaaka iinji kabakalalitebo. Kulinyumfwa boobo kulapa kwaamba ayi baalilwe kuboolela kuli Yehova. Mpashi bamwi balayeeya ayi nshobakacitwa tashakalinga kabotu. Inga bayandika muntu weenga wabakutika akunyumfwishisha mbobatoolinyumfwa. (Jemu. 1:19) Nankashi waliina lya María, uyo wakalinga waboolela mwisule paciindi cimwi wakaamba ayi: “Ndakalinga kusuni muntu weenga wankutika, kunjuminisha, alimwi weenga wancafwako kushiba shakucita.”

12. Ino lusuno lwakwe Yehova luli anga ndutaambo munshila nshi?

¹² Baibo ilaamba ayi lusuno lwakwe Yehova luli anga ndutaambo. Ino lusuno lwakwe Yehova luli anga ndutaambo munshila nshi? Atwaambe cikoshanyo: Amuyeeye kwaamba ayi mwawita mulweenge lwa maaba alimwi lucite maanshi atontola. Lyalo mwatalika kupila, ano muntu umwi uli mubwaato wamuwaalila nceenga mwacataako kwaamba ayi mutapili. Ncakutatoonsha kwaamba ayi inga mwalumba palucafwo ulo mukwiinga inga lwamucafwa kwaamba ayi mutapili. Nacibi boobo, cakucataako ceenkabo inga tacimucaafwi kutolelela kuba abuumi. Mulyeelete kuswa mumaanshi. Mulyeelete kusenga bali mu bwaato kwaamba ayi bamuwaalile lutaambo ndweshi mucateeko kwaamba ayi bamukwelele mubwaato. Yehova wakalwiita bene Isilaeli bakalinga bacileka kumusebensela ayi: ‘Ndakatolelela kubakwela, antaambo sha lusuno.’ (Osi. 11:4) Ubu bweenka Lesa mbwaalinyumfwa amunshiku shino, pabaabo bakacileka kumusebensela alimwi bacite mapenshi aanji ashakulisukama. Alisuni kwaamba ayi bashibe ayi alibasuni alimwi alisuni ayi baboolele kuli nguwe. Alimwi Yehova inga wasebensesha ndimwe kubatondesha ayi alibasuni.

13. Amwaambe cakacitika citondesha lusuno mbweenga lwacafwa muntu kuboolela kuli Yehova?

¹³ Tulyeelete kucafwa baabo bakaboolela mwisule kushiba kwaamba ayi Yehova alibasuni alimwi akubatondesha ayi aswebo tulibasuni. Mukwesu waliina lya Pablo ngotwakabandikaawo mumutwi wamana, uyo wakalinga waboolela mwisule kwa myaaka  iindilila 30, wakaamba ayi: “Bushiku bumwi macuunsa ndyendakalinga kuswa paŋanda, ndakakumanya nankashi umwi wacinene ucite nkumbu, wakabandika andime munshila ili kabotu abuumbi. Ndakalila anga ngu mwaana muniini. Ndakamulwiita ayi cakalingabo anga ngu Yehova wamutuma ayi ese abandike andime. Ici ncecakapa kwaamba ayi mboolele kuli Yehova.”

14. Kweelana acikoshanyo ncetucana pa Luka 15:4, 5, ino mweembeshi wakalinga kucita buyani na waicana mbelele yakalinga yasoweka?

¹⁴ Tulyeelete kutolelela kucafwa baabo bakaboolela mwisule na twabacana. Bweenka mbuli mwaana musankwa wakalinga wasoweka Yesu ngwakaamba mu cikoshanyo, mpashi inga peenda ciindi kwaamba ayi bakacileeke kulinyumfwa cibiibi. Alimwi mukwiinga balinga mucishi cakwe Satana, cilyeelete kwaamba ayi tabalinyumfwi kuba pafwiifwi a Yehova mbuli mbobakalinga kulinyumfwa kale kale. Tulyeelete kubacafwa kuyumya lushomo lwabo muli Yehova. Mucikoshanyo ca mbelele yakasoweka, Yesu wakasansulula mweembeshi mbwaakanyamuna mbelele yakwe pacifushi akwiiboosha kulitanga. Mweembeshi wakalinga kusebensa cankusu alimwi kwaciindi cilaamfu kwaamba ayi acane mbelele yakasoweka. Nacibi boobo, wakalinga kucishi ayi wakalinga kweelete kwiinyamuna mukwiinga tayakalinga kucite nkusu shakweenda.​—Amubelenge Luka 15:4, 5.

15. Ino inga twacita buyani kwaamba ayi tucafwe balefukite basuni kuboolela kuli Yehova? (Amubone kabokosi kacite mutwi utokwaamba ayi “ Cisebensesho Ciyandika Abuumbi.”)

¹⁵ Mpashi inga twayandika kucana ciindi ankusu shakucafwa bakaboolela mwisule kwaamba ayi bacikoonshe kukoma lipenshi litoopa kwaamba ayi baalilwe kutalika kusebensela Yehova alimwi. Nacibi boobo, Mushimu wakwe Lesa, Maswi akwe, alimwi amabuku ngotutambula kwiinda mulibungano, inga shatucafwa kwaamba ayi tucikoonshe kubacafwa kuba bayumu lwakumushimu alimwi. (Loma.  15:1) Ino inga twabacafwa buyani? Mukwesu umwi wasebensa mbuli munene kwa myaaka iinji wakaamba ayi, “Baanji bakaboolela mwisule basuni kuboolela kuli Yehova, balayandika ciiyo ca Baibo.” * Aboobo na bamusenga ayi mutalike ciiyo ca Baibo amuntu wakalinga waboolela mwisule, mulyeelete kucibona mbuli coolwe cinene. Mukwesu wakatolelela akwaamba ayi, “Shikushimikila wapekwa mukuli wakwiisha muntu wakaboolela mwisule, alyeelete kupanga bushicibusa amukwesu na nankashi uyo ngwaapekwa kucafwa. Kucita boobo kulaakupa kwaamba ayi uyo ngwatoocafwa abe wangulukite alimwi umushoma.”

16. Ino tulishi buyani ayi baanjelo balatucafwa?

¹⁶ Kuli shiinji shitondesha kwaamba ayi baanjelo balatucafwa kucana bantu bakaboolela mwisule abo basuni kuboolela kuli Yehova. (Ciyu. 14:6) Kucakubonenaako, mukwesu waliina lya Silvio ukala kucishi ca Ecuador, uyo wakalinga waboolela mwisule, wakapaila abuumbi kwaamba ayi Yehova amucaafwe kuboolela kuli nguwe. Ndyaakalinga kupaila, bamanene bobilo bakashika. Aboobo bushiku bweenka bulya bamanene balya bakatalika kucafwa mukwesu Silvio kwaamba ayi aboolele kuli Yehova.

17. Ino inga twalinyumfwa buyani na twacikonsha kucafwa wakaboolela mwisule kuboolela kuli Yehova?

¹⁷ Tulaakucana lusangalalo lwancinencine na katucafwa bamakwesu abenankashi bakaboolela mwisule kuboolela kuli Yehova. Mukwesu waliina lya Salvador, usebensa mbuli painiya waciindi coonse alimwi weelesha cankusu kulangoola bakaboolela mwisule wakaamba ayi: “Cimwi ciindi, ndalosha minsonshi kukukondwa na ndayeeya bakalinga baboolela mwisule sombi bakaboolela kuli Yehova. Ndasangalala abuumbi ceebo cakushiba kwaamba ayi ndacikonsha kusebensela pomwi a Yehova mukucafwa musebenshi wakwe ngwaasuni abuumbi kuswa mucishi cakwe Satana akuboolela mulibungano.”​—Milimo 20:35.

18. Ino nshiinshi nshomweelete kushiba na mwakaboolela mwisule?

¹⁸ Na mwakaboolela mwisule, amushibe kwaamba ayi Yehova acimusuni. Alisuni kwaamba ayi muboolele kuli nguwe. Mulyeelete kucitawo comwi kwaamba ayi muboolele kuli nguwe. Alimwi bweenka mbuli mushali musankwa Yesu ngwakaamba mucikoshanyo, Yehova atoomulindila, alimwi alaakumutambula camaansa obilo.