1. Yehova watiyaña ñahi neyi kambuñindi wajimbeli yafunta kudi yena?

NEYI chitwahanjekeli muchibaaba chinafumihu, Yehova wadesekeja nakabiña wakamenaña chiwahi nyikoku yindi. Nawa wakeñakeñaña mukoku wejima wunajimbali. Yehova walejeli aIsarela afumini kudi yena nindi: “Funtenu cheñi kudami, ami nawa nifunti kudenu.” Tweluka netu nimakonu dichatiyañayi muloña wahosha nindi: “Hinabalumukañaku.” (Mal. 3:6, 7) Yesu wahosheli nindi Yehova niañelu azañalalaña neyi kambuña Nzambi wajimbeli yafunta kudi Yena.—Luka 15:10, 32.

2. Tukuhanjekadi muchinu chibaaba?

² Tuhanjekenu hayakutalilahu yaYesu yisatu yinakuhosha hakukwasha antu aleka kumukalakela Yehova. Tukuhanjeka hayilwilu yitwatela kwikala nayu hakwila nawu tukwashi nyikoku yajimbala kulonda yifunti kudi yena. Nawa tukwiluka muzañalu wafumaña mukukwakwasha antu azeya kufunta muchipompelu.

3-4. Muloñadi mumbanda ashimunawu haLuka 15:8-10, chakeñakeñeliyi nankashi dirakima yajimbeli?

³ Twatela kuzata nañovu kulonda tuwani anakukeña kufunta kudi Yehova. Muchishimu chasonekawu muNsañu Yayiwahi yaLuka, Yesu washimwinimu chakeñakeñeliyi mumbanda chuma chalema chajimbesheliyi, iwayawaya dadirakima. Chikuma chalema munichi chakutalilahu hichazatiliyi nañovu hakukeñakeña iwayawaya.—Tañenu Luka 15:8-10.

⁴ Yesu walumbulwili chatiyiliyi ona mumbanda chelili yawani iwayawaya dadirakima dajimbesheliyi. Mumpinji yaYesu, chinamwekani neyi anvwali awambanda aYudeya enkeleña  mwanawu wamumbanda mawayawaya adirakima 10 hefuku dachawija chindi. Hadaha idi iwayawaya dadiña hakachi kanawa mawayawaya. Iwu mumbanda watoñojokeli nindi idi iwayawaya daholokeleli heseki. Dichi wambwili inoñu nakutalatala, ilaña hadimweniku. Inoñu dindi hidamunyikili nankashi hakwila yatweshi kumona idi iwayawayaku. Nkumininaku, wakombeli itala dejima. Haniyi nswadi yakombeliyi wamweni iwayawaya dakeñeleñayi dinakukekema muloña wachejeji. Watiyili kuwaha chadimweniyi. Watambikili amabwambu jindi niantuñi nindi kulonda azañaleli hamu.

5. Muloñadi chitwatela kuzatila nañovu kulonda tuwani antu aleka kupompa?

⁵ Neyi chitunamoni muchakutalilahu chaYesu, twatela kuzata nañovu hakwila tuwani chuma chinajimbali. Munjila yoyimu twatela kuzata nañovu kulonda tuwani antu aleka kupompa. Hadaha munahiti yaaka kufuma halekeleliwu kupompa. Hamwaha abuukila kwiluña kwabula kuyilukawu kudi amanakwetu akunodu iluña. Ilaña chayinu mpinji awa antu azeya anakukeña kufunta kudi Yehova. Anakukeña kutachika cheñi kumuzatila Yehova hamu nawamanakwetu niahela, ilaña anakukeña wakuyikwasha.

6. Ejima wetu muchipompelu tunateli kukeñakeña ñahi antu azeya?

⁶ Anyi atela kukeñakeña antu azeya? Ejima wetu, akulumpi, apayiniya, antu amuchisaka niakwakushimwina, anateli kukeñakeña azeya. Mudihu nebwambu hela ntaña wazeya? Mwawanahu dehi muntu wazeya himwashimwinineña kwitala nikwitala hela kudi antu amavulu? Neyi chakwila iwu muntu yayileja kwashakamañayi hela yayinka nambala yafoni yindi munateli kuyinka akulumpi.

7. Yumanyi yitunadizili kumazu ahosheli mukulumpi wejina daThomas?

⁷ Yumanyi yatela kwilawu akulumpi hakwila nawu awani antu anakukeña kufunta kudi Yehova? Talenu chahosheliyi mukulumpi wejina daThomas. * Washakamaña kuSpain nawa nakwashi aYinsahu kubadika ha 40 kulonda afunti muchipompelu. Thomas wahosheli nindi: “Nehulaña amanakwetu niahela kulonda anleji kunakushakama awa antu azeya. Nehulaña akwakushimwina neyi elukahu muntu waleka kupompa. Amavulu muchipompelu anlejaña namuzañalu muloña eluka nawu anakuzataku iwu mudimu wakukeñakeña azeya. Nkumininaku, neyi nayendeli amanakwetu hela ahela azeya, nayihulaña kutalisha hadi anyanawu niantaña jawu. Amakwawu azeya enjileña nawanyanawu nakupompa nawa hadaha mpinji yimu anyanawu adiña akwakushimwina. Niwena anateli kuyikwasha kufunta kudi Yehova.”

8. Muchishimu chamwana wajimbeli, chidi haLuka 15:17-24, tata yawantu welili ñahi namwanindi wabalumukili mumuchima?

⁸ Twatela kwikala nayilwilwinyi hakwila tukwashi antu anakukeña kufunta kudi Yehova? Talenu yuma yitunateli kudizila kuchakutalilahu chaYesu chamwana wafumini hetala. (Tañenu Luka 15:17-24.) Yesu walumbulwili nindi iwu mwana chatachikili kutoñojokayi cheñi chiwahi wafuukwilihu kufunta hetala. Tata yindi watemukili nakumukumbata, hakumwekesha nindi wamukeña. Chinleji chamukabishili nawa wamweni nindi hichinashikilimu kumutena nawu mwanaku. Tata yawantu wamutiyilili wushona mwanindi wahosheli jadiña kumuchima. Tata yawantu  welili chuma chamwekesheli nawu wamutambwilili mwanindi hetala, bayi neyi ñambaku, ilaña neyi mwanindi akeñayi. Tata yawantu wamuloñesheleli mwanindi chawija nikumwinka yakuvwala yayiwahi kulonda yamwekeshi nindi wamukeña.

9. Yilwilwinyi yitwatela kwikala nayu hakwila nawu tukwashi azeya kulonda afunti kudi Yehova? (Talenu chikasha chinakwila nawu “ Chitunateli Kukwasha Antu Anakukeña Kufunta Kudi Nzambi.”)

⁹ Yehova wudi neyi tata yawantu wudi munichi chishimu. Wayikeña awa amanakwetu niahela azeya nawa nakukeña nindi afunti kudi yena. Neyi tuyikeña neyi chayikeñayi Yehova, tukuyikwasha kulonda afunti kudi yena. Hakwila tuyikwashi, twatela kwikala nawushona, kukeña nawa adiwunjika. Muloñadi chitwatela kwikalila naniyi yilwilu nawa tunateli kuyimwekesha ñahi?

10. Muloñadi chitwatela kwikalila adiwunjika neyi tunakukwasha muntu kulonda yafunti kudi Nzambi?

¹⁰ Hahitaña mpinji hakwila nawu muntu yafunti kudi Nzambi, dichi twatela kwikala adiwunjika. Antu amakwawu azeyelihu ahoshaña nawu ayendeleli mapampa amavulu kudi akulumpi niamakwawu muchipompelu hakwila afunti kudi Nzambi. Muhela Nancy wakuAsia, wasonekeli nindi: “Ibwambu dami wamuchipompelu wankwashili chikupu. Wankeñeli tuhu neyi twasemuka ivumu dimu. Wañanukishileña yuma yitwelilileña hamu. Neyi inakulumbulula chinakutiya, wadiwunjikileña nikunkwasha. Wadiña ibwambu wamuwahi nawa wankwashileña mpinji yejima.”

11. Wushona wakwashaña ñahi antu adi nachineñi?

¹¹ Wushona wudi neyi yitumbu, wunateli kuuka muntu wudi nachineñi. Amakwawu  azeya anatwalekihu kwikala nachineñi muloña wachuma chatama chayikoñeliwu kudi muntu wamuchipompelu. Muloña wanichi chineñi, akeñaña kufunta kudi Yehova wanyi. Hadaha amakwawu atoñojokaña nawu ayilili chatama. Akeñekaña muntu watela kuyitiyilila nikwiluka chinakutiyawu. (Yak. 1:19) María wazeyelihu wahosheli nindi: “Nakeñeleña muntu wunatela kushindamena, kuleja chinakutiya nawa wunateli kunkwasha.”

12. Munjilanyi kukeña kwaNzambi mukunekalili neyi monji? Lumbululenu.

¹² Bayibolu yalumbulula nawu kukeña kwayikeñayi Yehova antu jindi kudi neyi monji. Munjilanyi kukeña kwaNzambi mukunekalili neyi monji? Talenu ichi chakutalilahu: Fwikijenu mudi hakaloña munakukeña kunwina nawa mukwenu yayinatila nichuma chikuyiletesha mubuli kunekama. Chakadi nikujina mukumusakilila nankashi muloña chumichi chikuyikwasha kubula kunekama. Ilaña ichi chuma hidichikuyihandisha hohuku. Chineli menji atuta, mwatela kufuma mumenji hakwila nawu muhandi. Kwatela kwikala muntu wakuyinatila monji kulonda yayikokeli muwatu. Yehova wahosheli kutalisha hadi aIsarela afumini kudi yena nindi: “Nayikokeli nanyonji . . , yonyonji yakukeña.” (Hos. 11:4) Dichatiyañayi Nzambi nimakonu kutalisha hadi antu analeki kumukalakela nawa anakunwina muloña wakukala nikwakama. Nakukeña eluki nawu wayikeña nawa nakukeña kuyifuntisha kudi yena. Nawa Yehova nateli kuyizatisha enu kulonda muyikwashi awa antu eluki nawu wayikeña.

13. Shimunenu chakutalilahu chinakumwekesha kukeña chikunateli kukwasha antu anazeyi?

 ¹³ Twatela kutwalekahu kuyileja antu azeya netu Yehova wayikeña nawa netu ninetu twayikeña. Pablo, ashimunawu muchibaaba chinafumihu wazeyeli hadi yaaka kubadika ha 30. Wahosheli nindi: “Ifuku dimu nantetemena, hinafumineña hetala, muhela wumu wakula dehi wambulakeni nawa wahosheli nanami munjila yakukeña. Nadilili neyi mwana wanyanya. Namuleji nami Yehova wakutemesha kulonda wuhoshi nanami. Yadiña mpinji yinafuukwilihu nami nifunti kudi Yehova.”

14. Kwesekeja nachakutalilahu chidi haLuka 15:4, 5, kabiña welili ñahi chelili yawani mukoku wajimbeli?

¹⁴ Twatela kutwalekahu kuyikwasha nikuyikolesha antu azeya. Kufwana mwana wajimbeli wamuchishimu chaYesu, awa antu akweti chineñi hanateli kushimbula hakwila nawu chimani. Hadaha anazeyi kuspiritu muloña wakukala kwamweniwu mukaayi kaSatana. Twatela kuyikwasha kulonda amukuhweleli cheñi Yehova. Muchishimu chamukoku wajimbeli, Yesu walumbulwili nindi kabiña wasendeli mukoku hamafwiji nakumufuntisha hamukanka. Kabiña wazatishili mpinji yeneni niñovu hakwila yawani mukoku wajimbeli. Welukili nindi mukoku nazeyi, dichi watela kumusenda nakumufuntisha hamukanka.—Tañenu Luka 15:4, 5.

15. Tunateli kukwasha ñahi azeya anakukeña kufunta kudi Yehova? (Talenu chikasha chinakuhosha nawu “ Chitwa Chazatikaña Nankashi.”)

¹⁵ Twatela kuzatisha mpinji yeneni niñovu kulonda tukwashi azeya ashindi yuma yinakuyikañesha kumukalakela Yehova. Ilaña nawukwashu waspiritu yaYehova, Izu dindi  ninyikanda yitwatambwilaña muchipompelu, tunateli kuyikwasha kukolesha wubwambu wawu naYehova cheñi. (Rom. 15:1) Tunateli kwila ñahi mwenimu? Mukulumpi wumu wahosheli nindi: “Azeya amavulu akeñekaña kuyidizisha Bayibolu neyi amwekesha chikupu nawu anakukeña kufunta kudi Yehova.” * Dichi mwatela kwiteja neyi ayileja nawu mudizisheña muntu wazeya Bayibolu. Iwu mukulumpi wahosheli cheñi nindi: “Mukwakushimwina wunakudizisha iwu muntu, watela kwikala wakasunuka nawa muntu anateli kukuhwelelawu kudi wazeya.”

16. Tuneluki ñahi netu añelu atukwashaña?

¹⁶ Kudi yakutalilahu yayivulu yinakumwekesha nawu añelu atukwashaña kuwana antu azeya anakufwila kufunta kudi Yehova. (Chim. 14:6) Chakutalilahu, Silvio wakuEcuador walombeli chikupu nindi yafunti muchipompelu. Hampinji yadiña nakulombayi, akulumpi ayedi adondomweneni kuchiisu. Haniyi mpinji yamuhempwiliwu atachikili kumukwasha.

17. Twatiyaña ñahi neyi tukwasha antu azeya?

¹⁷ Mwafumaña muzañalu neyi tukwasha antu azeya kufunta kudi Yehova. Talenu chahosheliyi Salvador payiniya wakwashaña antu azeya, wahosheli nindi: “Nazañalalaña chikupu hakumona muntu wazeya nafunti kudi Yehova. Natiyaña kuwaha hakumona Yehova chanamwiniyi mukoku windi wakeñayi kufuma mukaayi kaSatana nawa nazañalalaña kuzatila hamu nindi muniwu mudimu.”—Yilw. 20:35.

18. Neyi mwazeya, chumanyi chimwatela kwanukaña?

¹⁸ Neyi chakwila mwaleka kudikunda nawantu jaYehova, anukenuña nenu Yehova wuchidi wayikeña. Nakukeña nindi mufunti kudi yena. Mwatela kuzata nañovu hakwila mufunti kudi yena. Kufwana tata yawantu wamuchishimu chaYesu, Yehova nakuyihembelela nindi mufunti nawa wakayitambwila namuzañalu.