ARTIKULO DIˈIB YAˈËXPËJKP 26
“Nijëmbijttëgëts”
“Nijëmbijttëgëts, ets ta nanduˈun nijëmbittët miitsëty” (MAL. 3:7).
ËY 102 Nˈokpudëjkëm diˈib amääy amutsk yajpatp
DIˈIB YAJNIMAYTYÄˈÄGÄÄMP *
1. ¿Wiˈixë Jyobaa nyayjyawëty ko jyëmbity tuˈugë byorreegë diˈib të yoˈoytyëgoy?
EXTËM të nˈijxëm mä jatuˈukpë artikulo, Jyobaa nyayˈijxkijpxyëty mët tuˈugë oybyë borreegë kuentˈäjtpë diˈib tsuj yajxon kyuentˈäjtypy tuˈuk tuˈugë byorreegë ets diˈib yˈëxtaapy ja diˈib të yoˈoytyëgoy. Jyobaa duˈun tëgok tˈanmääy ja israelitëty diˈibë nety të myëjagamgaˈagëdë: “Nijëmbijttëgëts, ets ta nanduˈun nijëmbittët miitsëty”. Ets tyam, nanduˈunyëm xyˈanmäˈäyëm mët ko yëˈë kyaj tyëgatsy (Mal. 3:6, 7). Jesus nanduˈun jyënany ko Jyobaa mëdë yˈanklëstëjk agujk jotkujk jyantsy nyayjyawëdë ko jyëmbity tuˈugë borreegë diˈib të yoˈoytyëgoy (Luk. 15:10, 32).
2. ¿Ti nˈixäˈänëm mä tyäˈädë artikulo?
2 Mä tyäˈädë artikulo nˈixäˈänëm tëgëëgë ijxpajtën diˈibë Jesus myaytyak. Ets yëˈë xytyukniˈˈixëyäˈänëm wiˈix mbäät nbudëjkëm pënaty të tmëjagamgaˈaktë Jyobaa. Nan nˈixäˈänëm wiˈix mbäät njäˈäyˈäjtëm parë nbudëjkëm pënaty të jyagamgaˈaktë ets tiko tsyobäädäˈäny mëjwiin kajaa ko nbudëjkëm.
NˈOKˈËXTÄˈÄYËM JA MEENYWYAˈKXY DIˈIB TË TYËGOY
3, 4. ¿Tiko ja toxytyëjk diˈib yajmaytyakp mä Lukʉs 15:8-10 tˈëxtääy mëktaˈaky ja myeenywyaˈkxy diˈibë nety të dyajtëgoy?
3 Nimëjääwdäˈägäämp parë nbatëm pënaty nyijëmbitandëp jatëgokë Jyobaa. Mä Lucas, japë Jesus tmaytyaky tuˈugë toxytyëjk diˈib yajtëgooy tuˈugë meenywyaˈkxy diˈibë nety yajtsobatypy mëjwiin kajaa. Diˈibën mas jëjpˈam yajnimaytyäˈägäämp mä tyäˈädë ijxpajtën, yëˈë ko tyäˈädë toxytyëjk jëënbadooybyëm ojts tˈëxtääynyë ja myeenywyaˈkxy (käjpxë Lukʉs 15:8-10).
4 Ja tiempë mä Jesus jyukyˈajty, ko ijty tuˈugë toxytyëjk pyeky, ta näˈäty ja uˈunktääk tmoˈoy ja nyëëx mäjkë meenywyaˈkxy. Mä ja ijxpajtën diˈibë Jesus myaytyak, waˈanë tyäˈädë toxytyëjk dyajtëgooy tuˈugë tyäˈädë meeny. Nˈokpëjtakëm ko ojts dyajkäˈäy. ¿Ti net tyuun? Yajtoyëˈk ja lyamprë ets tˈëxtääytyaay, per kyaj mä tpaty. Waˈan mët ko ja lyamprë kyaj nëgoo tyëˈkxy. Ta net tyëjkë padëˈk jäˈxëˈkpë. Ets mä nety të tnipatpety ja naxway, ta tˈijxy ko tam ti yˈadëˈkxy, ¡jaˈadëm ja myeenywyaˈkxy! Jesus jyënany ko tyäˈädë toxytyëjk agujk jotkujk jantsy nyayjyäˈäwë, ta ttukˈawanë ja myëtnaymyaayëbëty ets ja myëjënbäˈä myëdëjkpäˈä ko të nety tpääty ja myeenywyaˈkxy.
5. ¿Tiko nyimëjääwdaˈaky nˈëxtäˈäyëmë nmëguˈukˈäjtëm diˈib të tmëjagamgaˈaktë Jyobaa?
5 Ja ijxpajtën diˈibë Jesus myaytyak, yëˈë xytyukˈijxëm ko nimëjääwdäˈägäämp parë nbatëm ja diˈib të nyajtëgoˈoyëm. Nanduˈunën nyimëjääwdäˈägäˈäny ko nˈëxtäˈäyëm pënaty të tmëjagamgaˈaktë Jyobaa. Waˈan jekyë tiempë të nyäjxnë mä kyaj nyekytyuˈukmuktë mëdë myëguˈuktëjk. Ets waˈan tyam tsyëënëdë mä kyaj yˈixyˈatëdë nmëguˈukˈäjtëm. Per seguurë ko ta näägë tyäˈädë nmëguˈukˈäjtëm diˈib tyam nyijëmbitandëbë Jyobaa, ets myëdunandëp jatëgok mëdë myëguˈuktëjk, per parë duˈun ttundët, tsojkëp nbudëjkëm.
6. ¿Wiˈix mbäät niˈamukë nyäjkëmë naybyudëkë parë nbatëmë jäˈäy diˈib të nyaswäˈägëdë?
6 ¿Pënaty mbäät tˈëxtääytyë ja diˈib të tmëjagamgaˈaktë Jyobaa? Niˈamukë ninuˈun nˈëwäˈkx ngäjpxwäˈkxëm, pënaty tuundëp mëjjäˈäy, prekursoor ets pënaty ja jyiiky myëguˈuk të jyagamgaˈaktë. ¿Nˈixyˈäjtëm tuˈugë nmëtnaymyaayëbëˈäjtëm o tuˈugë jiiky mëguˈuk diˈib të nyaswäˈkënë? ¿Të nbatëm mä karruˈunk nadënäˈäyëm o mä ngäjpxwäˈkxëm tëjkmdëjkm tuˈugë nmëguˈukˈäjtëm diˈib të tmastutnë Diosë tyuunk? Nˈoktukmëtmaytyakëm ko pën tsyojkënyëˈajtypy ets pën nyinëjkxëdët mbäät nyäjknäjxëm mä ja mëjjäˈäytyëjk ja nyumero de telefënë ets ja dyireksion. Pën yajnasˈijxëp duˈun nduˈunëm mä ja nbaˈisˈäjtëm.
7. ¿Ti mdukniˈˈijxëbë yˈijxpajtënë Thomas diˈib tuump mëjjäˈäy?
7 Mëjjäˈäytyëjk, yëˈë diˈib mas niˈigyë patëdëp tˈëxtäˈäytyët pënaty nyijëmbitandëbë Jyobaa. ¿Wiˈix mbäät ttundë? Min nˈokˈijxëm wiˈix tnimaytyaˈagyë Thomas * diˈib tuump mëjjäˈäy ets tsyëënë España. Yëˈë ja të tpudëkë 40 nyaxyë nmëguˈukˈäjtëm parë jatëgok të jyëmbittë mä Diosë kyäjpn. Yëˈë jyënaˈany: “Diˈibëts tim jawyiin nduumpy, yëˈëts nyajtëëpy niganäägë nmëguˈukˈäjtëm pën nyijäˈäwëdëp mä tsyëënëdë pënaty të tmëjagamgaˈaktë Diosë kyäjpn. O pën jyamyajtstëp jam pën diˈib kyaj nyekynyijkxy reunyonk. Nmëguˈukˈäjtëm agujk jotkujk jantsy nyayjyawëdë ko nanduˈun tyundë mä yaˈëxtääyë pënaty të tmëjagamgaˈaktë Jyobaa. Tatsë net ninëjkxy ja nmëguˈukˈäjtëm, ok, tats nyajtëy pën jamë yˈuˈunk yˈënäˈk o jyiiky myëguˈuk. Näägë tyäˈädë nmëguˈukˈäjtëm wyoownëjkxtëp ijty mä reunyonk ja yˈuˈunk yˈënäˈk ets waˈan näägë tyäˈädë ënäˈkuˈunk tyuundë publikadoor. Yëˈëjëty nan yajpudëkëyandëp parë jatëgok tnijëmbittëdë Jyobaa”.
NˈOKPUDËJKËM PARË TNIJËMBITTËDË JYOBAA PËNATY TË JYAGAMGAˈAKTË
8. Extëm jyënaˈanyë Lukʉs 15:17-24, ¿wiˈix ja uˈunkteety ojts tˈagëˈë tˈaxäjë ja yˈuˈunk diˈib jodëmbijt?
8 ¿Tijaty jäˈäyˈäjtën mbäät nyajnigëxëˈkëm pën nbudëkëyäˈänëm pënaty nyijëmbitandëbë Jyobaa? Min nˈokˈijxëm tijaty xytyukniˈˈijxëm ja ijxpajtën diˈibë Jesus pyëjtak mä ja mixy diˈib tsoˈon mä tyëjk (käjpxë Lukʉs 15:17-24). Jesus nyimaytyak ko tyäˈädë mixy yajtëjkë jyot wyinmäˈäny ets ta ttuknibëjtakë jyëmbitäˈäny. Ko ja tyeety yˈijxpatë, ta jyëjpëyëˈkëˈkë ets myënaandäˈtsë parë tyukˈijxë ko duˈunyëmë nety tsyokyëty. Ja mixy, axëëk jyantsy nyayjyäˈäwë ets wyinmääy ko kyaj nyekynyitëkëty yaˈuˈunkniwäˈänët. Ja uˈunkteety ojts jyotˈamutskë ko tˈijxy ja yˈuˈunk të jyodëmbity ets ko dyaˈˈawäˈätsyë kyorasoon. Ta ttuknibëjtakë käˈäy ukën ets ojts tniˈanaˈamë parë ja yˈuˈunk yajtukxoxët ja witë mas oybyë. Ko tyäˈädë uˈunkteety duˈun ttuuny, ta dyajnigëxëˈky ko kyaj nety tˈagëˈë tˈaxäjë extëm tuˈugë tuumbë mosë.
9. ¿Diˈibaty jäˈäyˈäjtën tsojkëp parë mbäät nbudëjkëm pënaty nyijëmbitandëbë Jyobaa? (Ixë rekuäädrë “ ¿Wiˈix mbäät nbudëjkëm pënaty jëmbitandëp?”).
9 Jyobaa duˈun extëmë tyäˈädë uˈunkteety diˈibë Jesus myaytyak. Tsyojkypy ja nmëguˈukˈäjtëm diˈib të myëjagamgaˈagëdë ets tsyojkënyëˈajtypy parë nyijëmbitëdët. Pën nbanëjkxëmë Jyobaa yˈijxpajtën, mbäät nanduˈun nbudëjkëm parë jyëmbittët pënaty të jyagamgaˈaktë. Parë duˈun nduˈunëm, tsojkëbë maˈkxtujkën, njäˈäwëm wiˈix nyayjyawëdë ets ntsojkëm. ¿Tiko tyäˈädë jäˈäyˈäjtën tyimtsokyëty, ets wiˈix mbäät nyajnigëxëˈkëm?
10. Ko nbudëjkëm tuˈugë nmëguˈukˈäjtëm diˈib të tmëjagamgeˈegyë Dios, ¿tiko tsyokyëty nmëmaˈkxtujkëm?
10 Parë ja nmëguˈukˈäjtëm jatëgok oy yˈitët mëdë Jyobaa myënëjkxaambyë tiempë, pääty tsyokyëty nmëmaˈkxtujkëm. Nimayë nmëguˈukˈäjtëm diˈib të jyëmbittë, jyënäˈändë ko jantsy kanäkˈok nyimiindë mëjjäˈäytyëjk etsë nmëguˈukˈäjtëm parë jatëgok tyëjkëdë Dios mëduumbë. Nancy, tuˈugë nmëguˈukˈäjtëm diˈib tsënaapy Asia, jyënaˈany: “Mëjwiin kajaajëts xypyudëjkë tuˈugëtsë nmëtnaymyaayëbë diˈibëts nety mët tuˈugyë nˈyoˈoy reunyonk. Duˈunëts njäˈäwë extëmtsë ntsëˈë. Xytyukjamyajtsëts wiˈixëts mëët agujk jotkujk nyajpattë. Kots ndukmëtmaytyaky wiˈixëts nnayjyawëty, maˈkxtujkën myëët tmëdoowˈijty ets xymyooyëtsë ëwij käjpxwijën. Njantsy myëtnaymyaayëbëˈäjtëtsë duˈun ets xëmëts xypyudëjkë”.
11. ¿Tiko tsyokyëty njäˈäwëm ti yajkëjxy yajnäjxypy ja nmëguˈukˈäjtëm diˈib të jyotˈambëky?
11 Ko tuˈugë jäˈäy të jyotˈambëky, duˈun dyajnaxyë jäj jëmuˈumën extëmxyëp të tsyayuty. Per ko njäˈäwëm ti yajkëjxy yajnäjxypy, duˈunxyëp extëm ndukjäˈxëmë pomäädë parë oy nyayjyawëdët. Ta nääk diˈib jagamgaktë mët ko yajjotˈambëjkëdë tuˈugë nmëguˈukˈäjtëm diˈibë nety mëët yoˈoytyë reunyonk ets duˈunyëm mëk tjawëdë, pääty kyaj tnijëmbitäˈändë Jyobaa. Ets ta netë wiinkpë diˈib winmääytyëp ko kyaj nyitëkëdë extëm yajtuundë. Ets waˈanë net ttsoktë parë pën tmëdoowˈitët ets tjaygyukët wiˈix nyayjyawëdë (Sant. 1:19). María diˈib tuk tiempë myëjagamgakë Diosë kyäjpn, jyënaˈany: “Nyajtëgoyˈajtypyëtsë nety parë pën tmëdoowˈitët wiˈixëts nnayjyawëty, pënëts xyjyotkujkmoˈoyëp, pënëts xymyoˈoyëbë ëwij käjpxwijën etsëts xypyudëkët”.
12. ¿Wiˈixënë Jyobaa tsyojkën yaˈijxkijpxyë mët tuˈugë tejpxyny?
12 Biiblyë jyënaˈany ko pääty nmëwingoˈonëmë Jyobaa mët ko xytsyojkëm. ¿Wiˈixën duˈun ttuny? Min nˈokpëjtakëm tuˈugë ijxpajtën. Okpawinmay ko mgënaxy mä tuˈugë jut diˈib jantsy këk ets kyaj mbäät këˈëm mbëtsëmy. Parë mbäät mbëtsëmy, tsojkëp pën tkuwëjnaxët tuˈugë tejpxyny etsë net mjuudëdët. Jyobaa, duˈun tˈanmääy ja israelitëty diˈibë nety të myëjagamgaˈagëdë: “Mëët ja tsojkën jaˈawën nyajmiintës maas ëjtsën” (Os. 11:4, TY). Jyobaa nanduˈun tyam tjawë pënaty të myëjagamgaˈagëdë, pes duˈun yajpäättë extëmxyëp të kyënaxtë jutoty ets jap yajjiˈkxäˈänëdë ja yˈamay jyotmay. Jyobaa pyudëkëyaampy parë jatëgok jyëmbittët ets tyuknijawëyaampy ko tsyojktëp. Ets mbäät ëtsäjtëm xyyajtuˈunëm parë tyäˈädë nmëguˈukˈäjtëm tˈixtët ko tsojkëdëbë Jyobaa.
13. ¿Wiˈixë Pablo yˈijxpajtën xytyukˈijxëm ko mbäädë nmëguˈukˈäjtëm pyudëkëdë ko ndukˈijxëm ja tsojkën parë tnijëmbittëdë Jyobaa?
13 Jëjpˈam ets xëmë nˈanmäˈäyëm pënaty të jyagamgaˈaktë ko tsojkëdëbë Jyobaa ets ko ëtsäjtëm nan ntsojkëm. Pablo, diˈib të yˈokˈyajmaytyakpë mä jatuˈukpë artikulo, ja tmëjagamgekyë Diosë kyäjpn naxy 30 jëmëjt. Jyënaˈany: “Tëgok, tsoˈombëtsë nety jopyëp, kots ojts xykyäjpxpoˈkxy tuˈugë nmëguˈukˈäjtëm diˈib mëjjäˈäy mëˈˈënäˈknë ets tsuj yajxonëts ojts xymyëtkajpxy xymyëtmaytyaˈaky. Tëjkëts jëëy yaxpë extëmë ënäˈkuˈunk. Tats nˈanmääy ja nmëguˈukˈäjtëm ko duˈunxyëp extëmë Jyobaa të kyexyëty parëts xymyëtmaytyäˈägët. Ets desde jatsë nwinmäˈäny nbëjtaky kots nnijëmbitäˈänyë Jyobaa”.
NˈOKPUDËJKËM TSUJ YAJXON PËNATY YAJPATTËP AMÄÄY AMUTSK
14. Extëm jyënaˈanyë Lukʉs 15:4, 5, ¿ti tyuumpy tuˈugë borreegë kuentˈäjtpë ko tpääty ja byorreegë diˈib të yoˈoytyëgoy?
14 Ko nety të jyëmbittë ja nmëguˈukˈäjtëm diˈib myëjagamgaktë Jyobaa, tsojkëp nbudëjkˈadëtsëm ets njotkujkmoˈoyëm. Pes mbäät duˈunyëm axëëk jyantsy nyayjyawëdë extëm ja mixy diˈib tsoˈon mä tyëjk diˈibë Jesus myaytyak. Ets kom jap të yajpäättë mä Satanásë jyaˈay, seguurë ko kyaj oy mëk yajpäättë Dios windum. Pääty tsyokyëty nbudëjkëm parë jatëgok dyajkëktëkëdët ja myëbëjkën mä Jyobaa. Ja ijxpajtën diˈibë Jesus pyëjtak mä ja borreegë diˈib yoˈoytyëgooy, jyënany ko ja borreegë kuentˈäjtpë tpaty, ta ttsaˈanëˈky ets ojts tmënëjkxy mä ja myëguˈuktëjk. Ja borreegë kuentˈäjtpë yajtuun ja xyëëw tiempë etsë jyot myëjääw parë tˈëxtääy. Per kuanë ko net tpudëjkë parë dyajjëmbijty mä ja myëguˈuktëjk, pes kyaj nety tnekymyëdaty ja jot mëjääw parë naytyuˈuk jyëmbitët (käjpxë Lukʉs 15:4, 5).
15. ¿Wiˈix mbäät nbudëjkëm pënaty kyaj oy mëk yajpäättët Dios windum? (Ixë rekuäädrë “ Tuˈugë foyetë diˈib mëjwiin kajaa tsobatp”).
15 Tsojkëbë tiempë etsë jot mëjääw parë nbudëjkëm näägë nmëguˈukˈäjtëm diˈib të jyëmbittë parë jatëgok tmëdundëdë Jyobaa (Rom. 15:1). Parë duˈun nduˈunëm, Jyobaa xytyukpudëkëyäˈänëmë yˈespiritë santë, Biiblyë etsë ëxpëjkpajn diˈib yajpëtsëëmbyë kyäjpn. ¿Wiˈix mbäät nbudëjkëm? Tuˈugë nmëguˈukˈäjtëm diˈib jeky kujk tyuunë mëjjäˈäy, jyënaˈany: “Nimayë tyäˈädë nmëguˈukˈäjtëm diˈib jatëgok nyijëmbijttëbë Jyobaa, tsojkëp pën yaˈëxpëkëdët”. * Pääty, pën xytyuknipëjkëmë mëjjäˈäytyëjk parë nyaˈëxpëjkëmë tyäˈädë nmëguˈukˈäjtëm diˈibë nety të jyëmbity, nˈokkupëjkëm xondaˈakyˈääw xondaˈakyjyot. Tyäˈädë nmëguˈukˈäjtëm yˈakjënaˈany: “Pënaty të tnijëmbittë Jyobaa, tsyojktëp ets ja diˈib yaˈëxpëjkëdëp yˈittët extëm tuˈugë oybyë myëtnaymyaayëbë ets diˈib mbäät ttukjotkujkˈattë”.
JAMˈÄJTPË XONDAKËN TSÄJPOTM ETS YÄ NAXWIINY
16. ¿Wiˈix nnijäˈäwëm ko xypyudëjkëmë anklëstëjk?
16 Extëm yajnimaytyäˈäktë mayë nmëguˈukˈäjtëm, yëˈë xytyukˈijxëm ko anklëstëjk xypyudëjkëm parë nbatëmë tyäˈädë nmëguˈukˈäjtëm diˈib jyantsy nyijëmbitandëbë Jyobaa (Diˈibʉ Jat. 14:6). Extëm nˈokpëjtakëm, Silvio diˈib Ecuador, myëwäˈän myëtsoˈowë Jyobaa parë pyudëkëdët ets jatëgok jyëmbitët mä kyäjpn. Mä nety jap nyuˈkxtaˈaky, ta ja timbrë yaxy ets yëˈëdëm nimajtsk ja nmëguˈukˈäjtëm diˈib tuundëp mëjjäˈäy, ta xondaˈakyˈääw xondaˈakyjyot pyudëjkëdë parë tnijëmbitëdë Jyobaa.
17. ¿Wiˈix nnayjyäˈäwëm ko nbudëjkëm tuˈugë nmëguˈukˈäjtëm diˈib yajpatp amääy amutsk Dios windum?
17 Agujk jotkujk nnayjyawëyäˈänëm ko nbudëjkëm pënaty amääy amutsk yajpattëp Dios wyindum parë jatëgok jyëmbittët. Salvador, tuˈugë nmëguˈukˈäjtëm diˈib tuump prekursoor, mëjwiin kajaa ttunyë mëjääw parë tpudëkë pënaty nyijëmbitandëbë Jyobaa, yëˈë jyënaˈany: “Agujk jotkujkëts nnayjyawëty kots nˈixyë nmëguˈukˈäjtëm tnijëmbittë Jyobaa, ets näˈäty, kuanëts kots ndëkë jëëy yaxpë. Agujk jotkujkëts nnayjyawëty kots nduunmuky mëdë Jyobaa mäts nbudëkë tuˈugë nmëguˈukˈäjtëm parë pyëtsëmy mä Satanásë jyaˈay ets jyëmbity mä Diosë kyäjpn” (Apos. 20:35).
18. Pën mijts të xymyastuˈutyë Diosë kyäjpn, ¿mä ti mbäät mˈity seguurë?
18 Pën mijts të xymyastuˈutyë Diosë kyäjpn, it seguurë ko Jyobaa, duˈunyëm mtsokyëty ets tsyojkypy parë mjëmbittët. Per tsojkëp xytyunëdë mëjääw parë xynyijëmbitët. Jamyats ja ijxpajtën diˈibë Jesus pyëjtak mä ja uˈunkteety, Jyobaa mˈawijx mjëjpˈijxëp parë jatëgok mjëmbitët ets tsuj yajxon mˈagëˈëjëyaˈany mˈaxäjëyaˈanyëty mä ja nyax kyäjpn.
ËY 103 Dios nyayäjkë yetyëjkëty diˈib xykyuentˈäjtëm
^ parr. 5 Pënaty kyaj yˈoknëjkxnëdë ëwäˈkx käjpxwäˈkxpë ets reunyonk, duˈunë Jyobaa yˈanëˈëmxëdë: “Nijëmbijttëgëts”. Niˈamukë mbäät nbudëjkëm parë tkupëktët ko duˈunë Jyobaa yˈanëˈëmxëdë. Mä tyäˈädë artikulo nˈixäˈänëm wiˈix mbäät nbudëjkëm parë jyëmbittët.
^ parr. 7 Mä tyäˈädë artikulo të näägë xyëëw tyëgatstë.
^ parr. 15 Näägë nmëguˈukˈäjtëm diˈib të jyëmbittë, mbäät pyudëkëdë ko tˈëxpëktëdë liibrë “Nayaˈitëdë xëmë mä ja Diosë tsyojkën” tuk kapitulo majtsk kapitulo, etsë wiinkpë mbäät yëˈë pyudëkëdë liibrë Acerquémonos a Jehová. Ja komitee diˈib yˈijxtëp wiˈix tyuˈuyoˈoyë Diosë tyuunk mä ja tuˈukmujkën, yëˈë diˈib yˈixandëp pën mbäädë tyäˈädë nmëguˈukˈäjtëm yaˈëxpëkyëty.
^ parr. 68 YAJNIMAYTYAˈAGYË DIBUJË: Wiˈixëm ja nmëguˈukˈäjtëm tpudëkëdë ja diˈib të tmëjagamgeˈegyë Jyobaa. Tam tuˈuk diˈib nyijäˈäyëp, jatuˈuk ttukˈixy ko duˈunyëm ttsoky ets jatuˈuk tmëdoowˈity ets tjaygyukë wiˈix nyayjyawëty.
