ARTÍCULO ÑA̱ KAʼVIYÓ 26
“Ndikóndó nu̱úi̱”
“Ndikóndó nu̱úi̱ ta yi̱ʼi̱ ndikói̱ nu̱úndó” (MAL. 3:7).
YAA 102 Ná taxiyó ndée ndaʼa̱ na̱ ndákava-ini
ÑA̱ KA̱ʼA̱NYÓ XA̱ʼA̱ *
1. ¿Ndáaña ndóʼo Jehová tá xítora ña̱ ndándikó iin na̱ ku̱xíka nu̱úra?
NDA̱A̱ táki̱ʼva xa̱a̱ ku̱nda̱a̱-iniyó nu̱ú artículo ña̱ ni̱ya̱ʼa, Jehová chítáʼanra miíra xíʼin iin pastor ta̱ viíní ndáa iin tá iin ndikachi sa̱na̱ra, ta nándukúra tí nda̱ñúʼu. Iin yichi̱, Jehová ni̱ka̱ʼa̱nra ña̱yóʼo xíʼin na̱ ñuu Israel na̱ ku̱xíka nu̱úra: “Ndikóndó nu̱úi̱ ta yi̱ʼi̱ ndikói̱ nu̱úndó”. Ta nda̱a̱ tiempo vitin saá íyo ña̱ káʼa̱n Jehová, chi káchira: “Va̱ása nása̱mai̱” (Mal. 3:6, 7). Ta saátu ni̱ka̱ʼa̱n ta̱ Jesús ña̱ kúsi̱íní-ini Jehová xíʼin na̱ ángel, tá xítona ña̱ ndándikó iin na̱ ku̱xíka nu̱úra (Luc. 15:10, 32).
2. ¿Ndáaña ka̱ʼa̱nyó xa̱ʼa̱ nu̱ú artículo yóʼo?
2 Nu̱ú ña̱ artículo yóʼo ka̱ʼa̱nyó xa̱ʼa̱ u̱ni̱ parábola ña̱ ni̱ka̱ʼa̱n ta̱ Jesús, ña̱ káʼa̱n xa̱ʼa̱ ña̱ xíniñúʼu chindeétáʼanyó xíʼin na̱ ku̱xíka nu̱ú Jehová. Sakuaʼayó ndáaña va̱ʼa kúú ña̱ xíniñúʼu kuumiíyó ña̱ va̱ʼa chindeétáʼanyó xíʼinna ña̱ ndandikóna nu̱úra, ta nda̱chun kúú ña̱ ndáyáʼviní chika̱a̱yó ndee̱ keʼéyó ña̱yóʼo.
NÁ NANDUKÚYÓ XU̱ʼÚN ÑA̱ NDA̱ÑÚʼU
3, 4. Nda̱a̱ táki̱ʼva káchi Lucas 15:8-10, ¿nda̱chun chi̱ka̱a̱ní ñá ñaʼá yóʼo ndee̱ ña̱ nandukúñá xu̱ʼún ña̱ nda̱ñúʼu?
3 Ña̱ va̱ʼa ndani̱ʼíyó na̱ ku̱xíka nu̱ú Jehová xíniñúʼu chika̱a̱níyó ndee̱. Nu̱ú Evangelio ña̱ Lucas, va̱xi iin parábola ña̱ ni̱ka̱ʼa̱n ta̱ Jesús xa̱ʼa̱ iin ñaʼá ñá xíka nándukú iin ña̱ʼa ña̱ ndáyáʼviní ña̱ nda̱ñúʼu, ña̱yóʼo kúú iin xu̱ʼún ña̱ dracma. Ña̱ káʼa̱n ña̱yóʼo xa̱ʼa̱ kúú, ña̱ chíka̱a̱níñá ndee̱ ña̱ nandukúñá xu̱ʼún yóʼo (kaʼvi Lucas 15:8-10). *
4 Tá tiempo ña̱ ni̱xi̱yo ta̱ Jesús, ki̱vi̱ ña̱ xi̱tindaʼa̱ ná ñaʼá ña̱ ñuu Israel, savaná xi̱taxi siʼíná 10 xu̱ʼún ña̱ dracma ndaʼa̱ná. Sana ñá ñaʼá ñá káʼa̱n ña̱ parábola yóʼo xa̱ʼa̱, sa̱ndáñúʼuñá iin xu̱ʼún ña̱ plata yóʼo. Ná káchiyó ña̱ nda̱kava xu̱ʼún yóʼo nu̱ú ñuʼú, ta nátunñá iin lámpara ña̱ xíniñúʼu aceite ña̱ va̱ʼa nandukúñá ña̱yóʼo, soo kǒoña ndáni̱ʼíñá. Sana ña̱ lámpara yóʼo va̱ása sándaye̱ʼe̱ va̱ʼaña ta va̱ása túvi kándúʼu xu̱ʼún. Xa̱ʼa̱ ña̱yóʼo viíní ndátiʼvíñá iníísaá ini veʼeñá. Tá ndi̱ʼi, tañu yáká ña̱ nda̱kayañá xi̱niñá ndíka̱a̱ iin ña̱ʼa ña̱ yéʼe̱, ña̱yóʼo kúú xu̱ʼúnñá ña̱ nda̱ñúʼu. Ta̱ Jesús ni̱ka̱ʼa̱nra ña̱ va̱ʼaní ku̱niñá ta ni̱kusi̱íní-iniñá, ña̱kán ka̱nañá ná migañá xíʼin ná íyo yatin xíʼinñá ña̱ va̱ʼa natúʼunñá xíʼinná xa̱ʼa̱ ña̱yóʼo.
5. ¿Nda̱chun xíniñúʼu chika̱a̱níyó ndee̱ ña̱ nandukúyó na̱ ku̱xíka nu̱ú Jehová?
5 Parábola ña̱ ni̱ka̱ʼa̱n ta̱ Jesús, sánáʼa̱ña miíyó ña̱ tá kúni̱yó ndani̱ʼíyó iin ña̱ʼa ña̱ nda̱ñúʼu xíniñúʼu chika̱a̱níyó ndee̱. Ta ña̱yóʼo kúútu ña̱ xíniñúʼu keʼéyó tá nándukúyó na̱ ku̱xíka nu̱ú Jehová. Sana xa̱a̱ ku̱a̱ʼání ku̱i̱ya̱ kúú ña̱ ku̱xíka na̱yóʼo nu̱ú na̱ congregación. Ta sana ku̱a̱ʼa̱nna koona inka lugar, nu̱ú va̱ása xíni̱ na̱ hermano miína. Soo sava na̱yóʼo kúni̱na ndandikóna nu̱ú Jehová. Kúni̱na ndikóna kachíñuna nu̱úra xíʼin na̱ hermano, soo xíniñúʼu chindeétáʼanyó xíʼinna.
6. ¿Ndáaña kivi keʼé na̱ congregación ña̱ va̱ʼa nandukúna na̱ ku̱xíka nu̱ú Jehová?
6 ¿Ndáana kivi nandukú na̱ ku̱xíka nu̱ú Jehová? Ndiʼi na̱ congregación, na̱ veʼena, na̱ anciano, na̱ precursor xíʼin na̱ publicador. ¿Á íyo iin na̱ migoyó á iin na̱ veʼeyó na̱ ku̱xíka nu̱ú Jehová? ¿Á xa̱a̱ ndáni̱ʼíyó na̱ ku̱xíka nu̱ú Jehová tá ku̱a̱ʼa̱nyó nátúʼunyó veʼe tá veʼe á nu̱ú íyo ku̱a̱ʼá na̱ yiví? Ná ka̱ʼa̱nyó xíʼinna ña̱ tá kúni̱na ku̱ʼu̱n iin na̱ hermano kotonana, kivi taxiyó ki̱vi̱na xíʼin lugar nu̱ú ndóona ndaʼa̱ na̱ anciano ti̱xin congregación, tá táxi ley ñuu nu̱ú ndóoyó keʼéyó ña̱yóʼo.
7. ¿Ndáaña sákuaʼún xíʼin ña̱ nátúʼun iin ta̱ anciano ta̱ naní Thomas?
7 Ta, ¿ndáaña kivi keʼé na̱ anciano ña̱ va̱ʼa ndani̱ʼína na̱ kúni̱ ndandikó nu̱ú Jehová? Ná kotoyó ndáaña káʼa̱n iin ta̱ anciano ta̱ íyo chí España ta̱ naní Thomas. * Ta̱yóʼo, xa̱a̱ yáʼaka 40 na̱ testigo chi̱ndeétáʼanra xíʼin ña̱ nda̱ndikóna ti̱xin congregación. Káchira: “Siʼna ndáka̱tu̱ʼíi̱n na̱ hermano á xíni̱na ndáa míí ndóo na̱ ku̱xíka nu̱ú Jehová. Ta saátu ndáka̱tu̱ʼíi̱n na̱ publicador á ndákaʼánna xa̱ʼa̱ na̱ hermano na̱ va̱ása xáʼa̱nka reunión. Ndiʼina kúsi̱í-inina ña̱ chindeétáʼanna xíʼi̱n ña̱ nandukúndi̱ na̱ ku̱xíka nu̱ú Jehová. Tá ndi̱ʼi, tá xáʼi̱n xítoi̱ na̱ ku̱xíka nu̱ú Jehová, ndáka̱tu̱ʼíi̱nna xa̱ʼa̱ se̱ʼena á xa̱ʼa̱ na̱ veʼena. Chi sava na̱yóʼo xi̱xa̱ʼa̱n se̱ʼena xíʼinna reunión, ta sana ni̱xi̱yona publicador. Ta kivitu chindeétáʼanyó xíʼin na̱yóʼo ña̱ ndikóna nu̱ú Jehová”.
NÁ CHINDEÉTÁʼANYÓ XÍʼIN SE̱ʼE JEHOVÁ ÑA̱ NDIKÓNA NU̱ÚRA
8. Nda̱a̱ táki̱ʼva káchi Lucas 15:17-24, ¿ndáa ki̱ʼva ke̱ʼé ta̱ ta̱a yóʼo xíʼin se̱ʼera ta̱ nda̱ndikó-ini?
8 ¿Ndáaña va̱ʼa kúú ña̱ xíniñúʼu kuumiíyó ña̱ va̱ʼa chindeétáʼanyó xíʼin na̱ kúni̱ ndandikó nu̱ú Jehová? Ná kotoyó ndáaña kivi sakuaʼayó xíʼin parábola ña̱ káʼa̱n xa̱ʼa̱ ta̱ loʼo ta̱ nda̱ñúʼu (kaʼvi Lucas 15:17-24). * Ta̱ Jesús ni̱ka̱ʼa̱nra ña̱ ta̱ loʼo yóʼo ki̱xáʼa ndákani vií xi̱níra xa̱ʼa̱ ña̱ ndóʼora, ta chi̱ka̱a̱-inira ña̱ ndikóra veʼera. Ta yivára xínura ni̱xa̱a̱ra nu̱úra ta nu̱mira ta̱yóʼo, tasaá ni̱na̱ʼa̱ra ña̱ kúʼvi̱ka-inira xínirara. Ta ta̱ loʼo yóʼo va̱ása va̱ʼa kúnira xa̱ʼa̱ ña̱ ke̱ʼéra, ta túvira ña̱ va̱ása xíniñúʼuka ka̱ʼa̱n yivára xíʼinra ña̱ kúúra se̱ʼera. Yivára ku̱ndáʼviní-inira xi̱nira ta̱yóʼo tá na̱túʼunra xíʼinra ña̱ ndándikó-inira xa̱ʼa̱ ña̱ ke̱ʼéra. Ña̱kán ke̱ʼéra iin vikó, ta ni̱ka̱ʼa̱nra xíʼin na̱ káchíñu nu̱úra ña̱ ná taxina iin ti̱ko̱to̱ míí ña̱ va̱ʼaka kundixi ta̱ loʼo se̱ʼera. Tasaá ni̱na̱ʼa̱ yivára ña̱ kúúkara se̱ʼera, ta su̱ví iin na̱ káchíñu nu̱úra.
9. ¿Ndáaña va̱ʼa xíniñúʼu kuumiíyó ña̱ va̱ʼa chindeétáʼanyó xíʼin na̱ ku̱xíka nu̱ú Jehová ña̱ ndandikóna nu̱úra? (Koto recuadro “ ¿Ndáa ki̱ʼva kivi chindeétáʼanyó xíʼin na̱ kúni̱ ndandikó nu̱ú Jehová?”).
9 Jehová íyora nda̱a̱ táki̱ʼva íyo ta̱ yivá ta̱ káʼa̱n ña̱ parábola yóʼo xa̱ʼa̱. Kúʼvi̱ní-inira xínira na̱ hermano na̱ ku̱xíka nu̱úra, ta kúni̱ra ná ndikóna nu̱úra. Tá ná keʼéyó nda̱a̱ táki̱ʼva kéʼéra, kivi chindeétáʼanyó xíʼin na̱ ku̱xíka nu̱úra ña̱ ndandikóna. Xa̱ʼa̱ ña̱yóʼo xíniñúʼu kúee koo iniyó xíʼinna, na̱ʼa̱yó ña̱ kúnda̱a̱-iniyó xíʼin ña̱ ndóʼona ta kuʼvi̱-iniyó kuniyóna. ¿Nda̱chun kúú ña̱ xíniñúʼu kuumiíyó ña̱yóʼo, ta ndáa ki̱ʼva na̱ʼa̱yóña?
10. ¿Nda̱chun xíniñúʼu kúee koo iniyó ña̱ va̱ʼa chindeétáʼanyó xíʼin na̱ ku̱xíka nu̱ú Jehová?
10 Xíniñúʼu kúee koo iniyó xíʼinna, saáchi va̱ása kama ndakutáʼan viína xíʼin Jehová. Ku̱a̱ʼání na̱ ku̱xíka nu̱ú Jehová káʼa̱nna ña̱ ku̱a̱ʼá yichi̱ ni̱xa̱ʼa̱n na̱ anciano xíʼin na̱ hermano ña̱ congregación xi̱tonana ña̱ va̱ʼa ndikóna nu̱ú Jehová. Iin ñá hermana ñá naní Nancy, ñá íyo chí Asia, ka̱ʼyíña ña̱yóʼo: “Iin migai̱ ñá ndíka̱a̱ ti̱xin congregación va̱ʼaní chi̱ndeétáʼanñá xíʼi̱n. Xi̱kuʼvi̱ní-iniñá xi̱xiniñá yi̱ʼi̱ ta nda̱a̱ táki̱ʼva íyo ku̱ʼvii̱ saá ni̱xi̱yoñá xíʼi̱n. Xi̱sandákaʼánñá yi̱ʼi̱ xa̱ʼa̱ ña̱ va̱ʼaní xi̱táʼanndi̱ tá ya̱chi̱. Tá xi̱natúʼi̱n xíʼinñá xa̱ʼa̱ ña̱ xi̱ndoʼi̱ kúeení ni̱xi̱yo iniñá, ta viíní xi̱xiniso̱ʼoñá yi̱ʼi̱, ta va̱ʼaní consejo xi̱taxiñá ndaʼíi̱. Va̱ʼaní miga ni̱xi̱yoñá, ta ndiʼi tiempo chi̱ndeétáʼanñá xíʼi̱n”.
11. ¿Nda̱chun xíniñúʼu kunda̱a̱-iniyó xíʼin ña̱ ndóʼo na̱ xóʼvi̱ ña̱ va̱ʼa chindeétáʼanyó xíʼinna?
11 Ña̱ na̱ʼa̱yó ña̱ kúnda̱a̱-iniyó xíʼin ña̱ ndóʼona, íyoña nda̱a̱ táki̱ʼva íyo ta̱tán ña̱ sándaʼa nu̱ú tu̱kue̱ʼe̱. Savana ku̱xíkana nu̱ú Jehová saáchi iin na̱ ndíka̱a̱ ti̱xin congregación ke̱ʼéna iin ña̱ va̱ása va̱ʼa xíʼinna, ta ni xa̱a̱ ni̱ya̱ʼa ku̱a̱ʼání ku̱i̱ya̱ sáa̱kavana. Ta xa̱ʼa̱ ña̱yóʼo va̱ása kúni̱na ndikóna nu̱ú Jehová. Sana ndákanixi̱nína ña̱ va̱ása va̱ʼa ña̱ níkeʼéna xíʼinna. Ña̱kán, ña̱ xíniñúʼuna kúú ña̱ ná kuniso̱ʼo inkana ña̱ nátúʼunna, ta kunda̱a̱-inina xíʼin ña̱ ndóʼona (Sant. 1:19). Iin ñá hermana ñá naní María, ñá ku̱xíka ku̱a̱ʼá tiempo nu̱ú Jehová, káchiñá: “Xi̱kuni̱i̱ ña̱ ná kuniso̱ʼona ña̱ nátúʼi̱n, chindeétáʼanna xíʼi̱n ta sandíkona-inii̱”.
12. ¿Nda̱chun káʼa̱nyó ña̱ nda̱a̱ táki̱ʼva íyo iin yoʼo̱ saá íyo ña̱ kúʼvi̱-ini Jehová xínira miíyó?
12 Ña̱ Biblia chítáʼanña ña̱ kúʼvi̱-ini Jehová xínira na̱ káchíñu nu̱úra xíʼin iin yoʼo̱. ¿Nda̱chun íyo ña̱yóʼo saá? Ná ka̱ʼa̱nyó xa̱ʼa̱ iin ejemplo. Ndakanixi̱ní ña̱ kúni̱ kuviún ini iin yu̱ta tá ndeéní ku̱a̱ʼa̱n, ta iin na̱ níndichi chí yuʼú yu̱ta sákanana iin yoʼo̱ ndaʼún. Ta sana táxiún tíxa̱ʼvi ndaʼa̱na, chi ña̱yóʼo chindeétáʼanña xíʼún ña̱ va̱ása ku̱ʼún xíʼin yu̱ta. Soo ni xa̱a̱ kúúmiíún ña̱yóʼo, íyo inkaka ña̱ xíniñúʼún ña̱ va̱ʼa ka̱kún. Xa̱ʼa̱ ña̱ ndeéní ku̱a̱ʼa̱n tá yu̱ta yóʼo, ña̱ va̱ʼa ka̱kún xíniñúʼu xi̱tána yóʼó xíʼin yoʼo̱ ña̱ va̱ʼa xa̱ún nda̱a̱ yuʼú tá yu̱ta. Jehová ni̱ka̱ʼa̱nra ña̱yóʼo xa̱ʼa̱ na̱ ñuu Israel na̱ ku̱xíka nu̱úra: “Nda̱kundeíi̱ ni̱xitái̱na [...] xíʼin yoʼo̱ ña̱ kúʼvi̱-ini” (Os. 11:4). Ña̱yóʼo kúú ña̱ kúni̱ Ndióxi̱ keʼéra xíʼin na̱ ku̱xíka nu̱úra tiempo vitin, na̱ íyoní tu̱ndóʼo nu̱ú ta ndíʼi̱ní-inina. Kúni̱ra chindeétáʼanra xíʼinna ña̱ ndikóna nu̱úra, ta saátu ná kunda̱a̱-inina ña̱ kúʼvi̱ní-inira xínirana. Ta kivi kuniñúʼura miíyó ña̱ na̱ʼa̱yó ña̱yóʼo nu̱úna.
13. Tá kúʼvi̱-iniyó xíniyó na̱ ku̱xíka nu̱ú Jehová, ¿ndáa ki̱ʼva kivi chindeétáʼanyó xíʼinna ña̱ ndikóna nda̱a̱ táki̱ʼva ndo̱ʼo ta̱ Pablo?
13 Ndáyáʼviní ka̱ʼa̱nyó xíʼin na̱ ku̱xíka nu̱ú Jehová ña̱ kúʼvi̱ní-inira xínirana ta saátu miíyó. Ta̱ Pablo ta̱ xa̱a̱ ni̱ka̱ʼa̱nyó xa̱ʼa̱ nu̱ú artículo ña̱ ni̱ya̱ʼa, yáʼaka 30 ku̱i̱ya̱ ku̱xíkara nu̱ú Jehová, ta̱yóʼo káchira: “Iin xi̱ta̱a̱n tá ki̱tai̱ veʼi̱, iin ñá hermana ñá xa̱a̱ chée chi̱ndeéñá yi̱ʼi̱, ta viíní ni̱ka̱ʼa̱nñá xíʼi̱n. Ta ki̱xáʼíi̱ xákui̱ nda̱a̱ táki̱ʼva kéʼé iin na̱ va̱lí. Ni̱ka̱ʼi̱n xíʼinñá ña̱ mií Jehová kúú ta̱ chi̱ndaʼáñá ña̱ va̱ʼa ka̱ʼa̱nñá xíʼi̱n. Ta saá kúú ña̱ chi̱ka̱a̱-inii̱ ña̱ ndikói̱ nu̱ú Jehová”.
NÁ CHINDEÉTÁʼANYÓ XÍʼIN NA̱ NDA̱KAVA-INI
14. Nda̱a̱ táki̱ʼva káchi Lucas 15:4, 5, ¿ndáaña kéʼé iin ta̱ pastor tá ndáni̱ʼíra ndikachi tí nda̱ñúʼu?
14 Tá xa̱a̱ nda̱ndikó na̱ ku̱xíka nu̱ú Jehová, xíniñúʼu ndakundeéyó chindeétáʼanyó xíʼinna ta chika̱a̱yó ndee̱ xíʼinna. Sana xóʼvi̱na nda̱a̱ táki̱ʼva ndo̱ʼo ta̱ loʼo ta̱ ni̱ka̱ʼa̱n ta̱ Jesús xa̱ʼa̱. Ta sana xa̱ʼa̱ ña̱ ku̱xíkana nu̱ú Jehová va̱ása viíka íyo ña̱ kítáʼanna xíʼinra. Xa̱ʼa̱ ña̱yóʼo, xíniñúʼu chindeétáʼanyó xíʼinna ña̱ ndundakú ña̱ kándíxanara. Nu̱ú parábola ña̱ káʼa̱n xa̱ʼa̱ tí ndikachi tí nda̱ñúʼu, ta̱ Jesús ni̱ka̱ʼa̱nra ña̱ nda̱kiʼin ta̱ pastor tíyóʼo númindaara ta níʼirarí ku̱a̱ʼa̱n xíʼinra nu̱ú ndóo tí inka. Ta̱ pastor xi̱niñúʼura tiempora xíʼin ndee̱ra ña̱ na̱ndukúrarí. Ta kúnda̱a̱-inira ña̱ xíniñúʼu chindeétáʼanra xíʼinrí ña̱ ndandikórí, chi va̱ása kuchiñu iinlá miírí keʼérí ña̱yóʼo (kaʼvi Lucas 15:4, 5). *
15. ¿Ndáa ki̱ʼva kivi chindeétáʼanyó xíʼin na̱ nda̱kava-ini na̱ kúni̱ ndikó nu̱ú Jehová? (Koto recuadro “ Iin ña̱ va̱ʼaní chíndeétáʼan xíʼinyó”).
15 Ta sana xíniñúʼu kuniñúʼuyó tiempoyó xíʼin ndee̱yó, ña̱ chindeétáʼanyó xíʼin na̱ ku̱xíka nu̱ú Jehová ña̱ ndakutáʼan viína xíʼinra (Rom. 15:1). Ta ña̱ kivi chindeétáʼan xíʼinyó kúú espíritu santo Jehová, Biblia xíʼin tutu ña̱ tává na̱ ñuura. ¿Ndáa ki̱ʼva kivi chindeétáʼanyó xíʼinna? Iin ta̱ xa̱a̱ ku̱a̱ʼání ku̱i̱ya̱ kúú anciano, káchira: “Tá chíka̱a̱-ini na̱ ku̱xíka nu̱ú Jehová ndandikóna, xíniñúʼu chindeétáʼan iin na̱ publicador xíʼinna ña̱ kaʼvina Biblia”. * Xa̱ʼa̱ ña̱yóʼo, tá káʼa̱n iin na̱ anciano xíʼinyó ña̱ chindeétáʼanyó xíʼin iin na̱ ku̱xíka nu̱ú Jehová, xíʼin ña̱ si̱í-ini ná keʼéyóña. Ta̱ anciano ta̱ xa̱a̱ ni̱ka̱ʼa̱nyó xa̱ʼa̱, káʼa̱nkara: “Na̱ publicador na̱ xíniñúʼu kaʼvi xíʼin na̱ ku̱xíka nu̱ú Jehová xíniñúʼu viíní kutáʼanna xíʼinna ña̱ va̱ʼa kandíxanana”.
KÚSI̱ÍNÍ-INI NA̱ NDÓO CHÍ NDIVÍ TA SAÁTU NA̱ NDÓO NU̱Ú ÑUʼÚ
16. ¿Nda̱chun va̱ʼa kúnda̱a̱-iniyó ña̱ chíndeétáʼan na̱ ángel xíʼinyó?
16 Íyo ku̱a̱ʼání experiencia ña̱ náʼa̱ nu̱úyó ña̱ chíndeétáʼan na̱ ángel xíʼinyó ña̱ ndani̱ʼíyó na̱ ku̱xíka nu̱ú Jehová, na̱ kúni̱ ndandikó nu̱úra (Apoc. 14:6). Tá kúú, ta̱ Silvio ta̱ íyo chí Ecuador, ni̱ka̱ʼa̱n ndáʼvira xíʼin Jehová ña̱ ná chindeétáʼanra xíʼinra ña̱ ndandikóra ti̱xin congregación. Tá káʼa̱nkara xíʼin Jehová u̱vi̱ na̱ anciano ka̱nindaʼa̱na yéʼéra. Tasaá ki̱xáʼana chíndeétáʼanna xíʼinra.
17. ¿Ndáaña va̱ʼa ndákiʼinyó xa̱ʼa̱ ña̱ chíndeétáʼanyó xíʼin na̱ ku̱xíka nu̱ú Jehová ña̱ ndakutáʼan viína xíʼinra?
17 Tá ná chindeétáʼanyó xíʼin na̱ ku̱xíka nu̱ú Jehová ña̱ ndandikóna, kusi̱íní-iniyó. Ná kotoyó ña̱ káʼa̱n iin ta̱ kúú precursor ta̱ naní Salvador, ta̱yóʼo chíka̱a̱níra ndee̱ ña̱ chindeétáʼanra xíʼin na̱ ku̱xíka nu̱ú Jehová: “Sava yichi̱ nda̱a̱ kúni̱ kuakui̱ xa̱ʼa̱ ña̱ kúsi̱íní-inii̱. Kúsi̱íní-inii̱ tá ndákanixi̱níi̱ xa̱ʼa̱ ña̱ sa̱kǎku Jehová iin na̱ káchíñu nu̱úra ti̱xin ñuyǐví ta̱ Ndi̱va̱ʼa, ta chi̱ndeétáʼi̱n xíʼinra ña̱ ke̱ʼéra ña̱yóʼo” (Hech. 20:35).
18. Tá ku̱xíkaún nu̱ú Jehová, ¿ndáaña kivi kandíxaún?
18 Tá yóʼó ku̱xíkaún nu̱ú na̱ ñuu Jehová, kivi kandíxaún ña̱ kúʼvi̱ní-inira xínira yóʼó ta kúni̱ra ña̱ ná ndikóún nu̱úra. Ta xa̱ʼa̱ ña̱yóʼo xíniñúʼu keʼún sava ña̱ʼa. Soo ndakaʼún xa̱ʼa̱ ña̱ ke̱ʼé yivá ta̱ loʼo ta̱ ni̱ka̱ʼa̱n ta̱ Jesús xa̱ʼa̱. Jehová ndátura ña̱ ná ndikóún nu̱ú na̱ ñuura, ta xíʼin ña̱ si̱í-ini ndakiʼinra yóʼó.
YAA 103 Na̱ anciano ndáana miíyó
^ párr. 5 Na̱ xa̱a̱ ku̱a̱ʼá tiempo va̱ása xáʼa̱nka nátúʼun xa̱ʼa̱ Ndióxi̱ á va̱ása ku̱a̱ʼa̱nkana reunión, káʼa̱nra ña̱yóʼo xíʼinna: “Ndikóndó nu̱úi̱”. Ndiʼiyó kivi chika̱a̱yó ndee̱ xíʼin na̱ ku̱xíka nu̱ú Jehová na̱ kúni̱ ndikó nu̱úra. Nu̱ú ña̱ artículo yóʼo kunda̱a̱-iniyó ndáa ki̱ʼva kivi chindeétáʼanyó xíʼinna ña̱ ndikóna nu̱úra.
^ párr. 3 Lucas 15:8-10: “Tá iin ñaʼá kúúmiíñá u̱xu̱ xu̱ʼún ña̱ dracma ta sa̱ndáñúʼuñá iin ña̱yóʼo, ¿á va̱ása natuunñá lámpara ta tiʼvíñá veʼeñá ta viíní nandukúñá ña̱yóʼo nda̱a̱ ná ndani̱ʼíñáña? 9 Tá ndáni̱ʼíñá ña̱yóʼo, kánañá ná migañá xíʼin ná íyo yatin xíʼinñá, ta káchiñá xíʼinná: ‘Kusi̱í-inindó xíʼi̱n, saáchi nda̱ni̱ʼíi̱ xu̱ʼún ña̱ dracma ña̱ sa̱ndáñúʼi̱ʼ. 10 Ta ki̱ʼva saá kúsi̱í-ini na̱ ángel na̱ káchiñu nu̱ú Ndióxi̱ tá ndándikó-ini iin na̱ ni̱ki̱ʼvi ku̱a̱chi”.
^ párr. 7 Na̱sama sava ki̱vi̱na.
^ párr. 8 Lucas 15:17-24: “Tá nda̱kani vií xi̱níra, ni̱ka̱ʼa̱nra: ‘Ndiʼi na̱ káchíñu nu̱ú yivái̱ va̱ása kúma̱ní ña̱ kuxuna, ta yi̱ʼi̱ kúni̱i̱ kuxui̱ íyoi̱ yóʼo. 18 Ndandikói̱ veʼe yivái̱. Ta ka̱ʼi̱n xíʼinra: “Yivá ni̱ki̱ʼvii̱ ku̱a̱chi nu̱ú Ndióxi̱ xíʼin nu̱ú miíún. 19 Va̱ása xíniñúʼuka ka̱ʼún xíʼi̱n ña̱ kúi̱ se̱ʼún. Nda̱a̱ táki̱ʼva kéʼún xíʼin na̱ káchíñu nu̱ún saá keʼún xíʼi̱n”ʼ 20 Tasaá nda̱kiʼinra ku̱a̱ʼa̱nra ta ndi̱kóra veʼe yivára. Tá xíkaka va̱xira, yivára xi̱nira ña̱ va̱xira ta ku̱ndáʼviní-inira xi̱nirara. Ta xínura ni̱xa̱a̱ra ta nu̱mira ta̱yóʼo ta chi̱túra nu̱úra. 21 Tasaá ni̱ka̱ʼa̱nra xíʼin yivára: ‘Yivá, ni̱ki̱ʼvii̱ ku̱a̱chi nu̱ú Ndióxi̱ xíʼin nu̱ú miíún. Ta va̱ása xíniñúʼuka ka̱ʼún xíʼi̱n ña̱ kúi̱ se̱ʼún. Nda̱a̱ táki̱ʼva kéʼún xíʼin na̱ káchíñu nu̱ún saá keʼún xíʼi̱nʼ. 22 Soo yivára ni̱ka̱ʼa̱nra xíʼin na̱ káchíñu nu̱úra: ‘Kamandó, tavándó iin ti̱ko̱to̱ ña̱ káni̱, míí ña̱ va̱ʼaka ná kundixira, ta chika̱a̱ndó iin seʼe̱ ndaʼa̱ra ta taánndó ndu̱xa̱n xa̱ʼa̱ra. 23 Taxindó iin si̱ndi̱ki̱ loʼo tí nduʼú va̱ʼa, ta kaʼníndórí, ta ná kuxuyó ta kusi̱í-iniyó, 24 saáchi se̱ʼi̱ yóʼo nda̱a̱ táki̱ʼva íyo ta̱ ni̱xi̱ʼi̱ saá ni̱xi̱yora ta nda̱takura, ta nda̱ñúʼura ta nde̱tara vitinʼ. Ta ki̱xáʼana kúsi̱í-inina”.
^ párr. 14 Lucas 15:4, 5: “¿Ndáa ndóʼó kúúmií 100 ndikachi ta sa̱ndáñúʼundó iin tíyóʼo, á va̱ása sandákoondó tí 99 chí yuku̱, ta ku̱ʼu̱nndó nandukúndó tí nda̱ñúʼu nda̱a̱ ná ndani̱ʼíndórí? 5 Tá ndáni̱ʼíndórí númindaandórí ta kúsi̱íní-inindó”.
^ párr. 15 Ña̱ kivi chindeétáʼan xíʼin sava na̱ ku̱xíka nu̱ú Jehová kúú ña̱ kaʼvina sava táʼví ña̱ libro Ná ndakundeéyó kuʼvi̱ka-iniyó kuniyó Ndióxi̱, ta ña̱ kivi chindeétáʼan xíʼin inkana kúú ña̱ kaʼvina sava capítulo ña̱ libro Acerquémonos a Jehová. Na̱ anciano ti̱xin congregación kúú na̱ ndaka̱xin ndáana kivi kaʼvi xíʼin na̱ ku̱xíka nu̱ú Jehová.
^ párr. 71 ÑA̱ KÁʼA̱N XA̱ʼA̱ NA̱ʼNÁ: U̱ni̱ na̱ hermano chíndeétáʼanna xíʼin iin ta̱ ku̱xíka nu̱ú Jehová, ta̱ kúni̱ ndandikó nu̱úra. Kéʼéna ña̱yóʼo tá káʼa̱n ni̱ʼina xíʼinra, ta náʼa̱na ña̱ kúʼvi̱-inina xíninara ta viíní xíniso̱ʼona ña̱ káʼa̱nra ta kúnda̱a̱-inina xíʼin ña̱ ndóʼora.
