OSHITOPOLWA SHOKUKONAKONWA 26
“Galukileni kungame”
“Galukileni kungame, nangame tandi galukile kune.” — MAL. 3:7.
EIMBILO 102 ‘Kwatheleni aankundi’
ELALAKANO LYOSHITOPOLWA *
1. Jehova oha kala e uvite ngiini, uuna yimwe yomoonzi dhe ya galukile kuye?
NGAASHI twe shi kundathana moshitopolwa sha tetekele, Jehova oti ifaathanitha nomusita omwaanawa, ngoka ha sile oshimpwiyu nawa onzi ye kehe. Oha kongo onzi ye kehe ndjoka ya kana. Jehova okwa li a lombwele Aaisraeli mboka ye etha po oku mu longela, a ti: “Galukileni kungame, nangame tandi galukile kune.” Shoka osho a hala aantu ya ninge nokunena, molwaashoka okwi ipopi, a ti: ‘Ihandi lunduluka.’ (Mal. 3:6, 7) Jesus okwa ti kutya Jehova naayengeli ohaya kala ya nyanyukwa noonkondo uuna gumwe gwomaapiya Ye a galukile Kuye. — Luk. 15:10, 32.
2. Otatu ka kundathana shike moshitopolwa shika?
2 Natu ka kundathaneni omayele gatatu gaJesus ngoka tage tu longo iiyilongomwa ya simana kombinga yokukwathela mboka ye etha po okulongela Jehova. Otatu ka kundathana wo omaukwatya gokondandalunde ngoka twa pumbwa okukala tu na, opo tu kwathele oonzi ndhoka dha kana dhi galukile kuye. Otatu ki ilonga wo kutya ohashi tu etele enyanyu enene, uuna tatu longo nuudhiginini, tu kwathele mboka inaayi ipyakidhila we, ya galukile kuJehova.
OKUKONGA OSHIMALIWA SHOKA SHA KANA
3-4. Omolwashike omukulukadhi ngoka a popiwa muLukas 15:8-10, a li a kongo nuudhiginini oshimaliwa she shoka sha kana?
3 Otu na okulonga nuudhiginini, opo tu mone mboka ya hala okugalukila kuJehova. Meyele ndyoka li li mEvaangeli lyaLukas, Jesus okwa popi kombinga yomukulukadhi ngoka a kanitha oshinima shi na ongushu, ano oshimaliwa shoshisiliveli. Shoka sha simanenena meyele ndyoka, oosho omukulukadhi a longo nuudhiginini a mone oshimaliwa shoka. — Lesha Lukas 15:8-10.
4 Jesus okwa hokolola nkene omukulukadhi ngoka a kanitha oshimaliwa, a li u uvite. Pethimbo lyaJesus, uuna omukadhona ta hokanwa muIsraeli, omathimbo gamwe yina okwa li he mu pe iimaliwa omulongo yoshisiliveli. Otashi vulika oshimaliwa shoka sha kanithwa komukulukadhi, sha li shomiimaliwa mbyoka twa zi nokupopya. Omukulukadhi okwa li ta dhiladhila kutya oshimaliwa osha gwile pevi. Onkene okwa tema olamba, e te shi kongo, ihe ine shi mona. Olamba ye otashi vulika ya li itaayi minikile nawa, opo a mone oshimaliwa shoshisiliveli shoka oshishona. Lwanima, okwa kombo nawa egumbo alihe. Oshimaliwa okwe ke shi adha miiyagaya mbyoka a gongele, sho a li ta kombo. Ka li tuu a nyanyukwa sho e shi mono! Okwi ithana ookuume ke naashiinda, e ya lombwele onkundana ndjoka ombwanawa.
5. Omolwashike tashi vulu okukala oshidhigu, tu mone mboka ya thiga po egongalo?
5 Ngaashi twe shi mona meyele lyaJesus, ohashi pula oonkambadhala dha mana mo, opo omuntu a mone oshinima shoka sha li sha kana. Sha faathana, otashi vulika twa pumbwa okulonga nuudhiginini, tu konge mboka ya thiga po egongalo. Otashi vulika pwa pita omimvo odhindji inaaye endathana natse. Otashi vulika nokuli ya tembukile kehala lilwe hoka aamwatate kaaye ya shi. Ihe yamwe mboka inaayi ipyakidhila we, oya halelela okugalukila kuJehova. Oya hala ishewe okulongela Jehova pamwe naamwahe, ihe oya pumbwa ekwatho lyetu.
6. Ayehe megongalo otaya vulu ngiini okukwathela mokukonga mboka inaayi ipyakidhila we?
6 Olye ta vulu okukwathela mokukonga mboka inaayi ipyakidhila we? Aauvithi ayehe megongalo otaya vulu okukwathela, mwa kwatelwa aakuluntugongalo, aakokolindjila naapambele yaamboka inaayi ipyakidhila we. Mbela owu na kuume nenge omupambele ngoka ini ipyakidhila we? Mbela owa tsakanena naangoka ini ipyakidhila we, sho to longo egumbo negumbo nenge sho to gandja uunzapo wontukuluka? Ngele okwa hala a talelelwe po, mu yelithila kutya ota vulu e ku lombwele mpoka ha zi nenge e ku pe onomola yongodhi ye, opo wu ke yi gandje kaakuluntugongalo yomegongalo lyeni.
7. Owi ilongo shike mwaashoka sha popiwa komukuluntugongalo gwedhina Thomas?
7 Aakuluntugongalo oya pumbwa okuninga shike, opo ya mone mboka ya hala okugalukila kuJehova? Ndhindhilika shoka omukuluntugongalo gwedhina Thomas *, ngoka ha zi koSpania a ti. Okwa kwathela Oonzapo dhi vulithe 40, dhi galukile kuJehova. Okwa ti: “Tango ohandi pula aamwatate naamwameme yi ili noyi ili, mboka tashi vulika ye shi mpoka hapu zi mboka inaayi ipyakidhila we. Nenge ndi pule aauvithi ngele oye shi gumwe ngoka ihee ya we kokugongala. Oyendji megongalo ohaya kala ya nyanyukwa, molwaashoka ya kwatelwa mo mokukonga mboka inaayi ipyakidhila we. Lwanima, uuna nda ka talela po aamwatate naamwameme mboka inaayi ipyakidhila we, ohandi ya pula kombinga yoyana nosho wo aapambele yawo. Yamwe yomwaamboka inaayi ipyakidhila we, oya li haye ya noyana kokugongala, notashi vulika nokuli oyana ya li aauvithi. Aanona mboka otaya vulu wo okukwathelwa ya galukile kuJehova.”
KWATHELA MBOKA INAAYI IPYAKIDHILA WE, YA GALUKILE KEGONGALO
8. Meyele lyomumati ngoka a kanene, ndyoka li li muLukas 15:17-24, sho omumati i itedhulula, he okwi inyenge ngiini?
8 Omaukwatya geni twa pumbwa okukala tu na, ngele otwa hala okukwathela mboka ya hala okugalukila kuJehova? Ndhindhilika shoka tatu vulu okwiilonga meyele lyaJesus lyomumati a kanene, ngoka a li a thigi po egumbo lyaandjawo. (Lesha Lukas 15:17-24.) Jesus okwa yelitha nkene omumati ngoka lwanima a dhimbulula okukala kwe, e ta tokola a shune kegumbo. He okwa matuka e ke mu tsakaneke, e te mu papatele. Omumati eiyuvo lye olya li tali mu nyenyetele, nokwa li e uvite kutya ina gwana we okwiithanwa omwana. He okwa li e mu uvitile olukeno, sho e mu mbumbulile omutima gwe. Opo nduno, he okwa ningi po sha e mu shilipaleke kutya okwe mu taamba ko e li omwana omuholike, ihe hangaashi omuniilonga gwe. Opo u ulike kutya oku mu hole shili, he okwa ningi oshituthi, e ta gandja elombwelo omwana ngoka i iyela ombedhi a zalekwe onguwo ombwanawa.
9. Omaukwatya geni twa pumbwa okukala tu na, opo tu kwathele mboka inaayi ipyakidhila we ya galukile kuJehova? (Tala oshimpungu “ Nkene tatu vulu okukwathela mboka ya hala okugaluka.”)
9 Jehova okwa fa tate ngoka a popiwa meyele. Oku hole aamwatate naamwameme mboka inaayi ipyakidhila we, nokwa hala ya galukile kuye. Ngele otwa holele Jehova, otatu ka vula oku ya kwathela ya galukile kuye. Shoka otashi pula tu kale tu na eidhidhimiko, olukeno nohole. Omolwashike tu na okuulika omaukwatya ngoka gokondandalunde, nongiini tatu vulu oku shi ninga?
10. Omolwashike twa pumbwa eidhidhimiko uuna tatu kwathele gumwe a galukile kuJehova?
10 Otwa pumbwa eidhidhimiko, molwaashoka ohashi pula ethimbo, opo omuntu a galukile kuJehova. Oyendji mboka ya li inaayi ipyakidhila we, oye shi zimina kutya oya ka galukila owala kuJehova, konima sho ya talelwa po lwiikando kaakuluntugongalo nokuyalwe megongalo. Omumwameme gwedhina Nancy, a za kuumbangalantuzilo waAsia, okwa nyola a ti: “Kuume kandje kopothingo megongalo lyetu, okwa kwathele ndje noonkondo. Okwa li e hole ndje nda fa omumwayina omukuluntu. Okwa li a dhimbulukitha ndje iinima iiwanawa mbyoka twa li hatu ningi pamwe monakuziwa. Okwa li ha pulakene kungame neidhidhimiko, sho tandi mu lombwele nkene ndi uvite noka li ha kakadhala okupa ndje omayele. Okwe shi ulike kutya oku li kuume kashili, ngoka i ilongekidha aluhe okukwathela.”
11. Omolwashike twa pumbwa olukeno, sho tatu kwathele gumwe ngoka u uvithwa nayi monakuziwa?
11 Olukeno olwa fa omuti ngoka hagu vulu okukwathela omuntu a aluke. Yamwe mboka inaayi ipyakidhila we ohaya kala ye nine onkone gumwe megongalo ngoka e ya uvitha nayi monakuziwa. Omolwoshinima shoka, ohashi kala oshidhigu kuyo ya galukile kuJehova. Otashi vulika yamwe ya dhiladhile kutya oya ungaungiwa nayo kaashi li pauyuuki. Otashi vulika ya kale ya pumbwa gumwe ngoka te ya pulakene noku uvite ko omaiyuvo gawo. (Jak. 1:19) María ngoka oshikando shimwe a li ini ipyakidhila we, okwa ti: “Onda li nda pumbwa ngoka ta pulakene kungame, ta hekeleke ndje nota pe ndje omayele nekwatho.”
12. Omeityo lini ohole yaJehova ya fa ongodhi?
12 Ombiimbeli otayi ti kutya ohole yaJehova yokuhola oshigwana she, oya fa ongodhi. Omeityo lini ohole yaKalunga ya fa ongodhi? Natu taleni kethaneko ndika: Natu tye ando oto hala okusa omeya mefuta lya pindjala, gumwe e te ku umbile okandjatha koku ku kwathele kuu se omeya. Kapu na omalimbililo kutya oto ka kala wa pandula ekwatho ndyoka, molwaashoka oke ku kwathela kuu ningine. Ihe okandjatha kokukwathela omuntu kaa se omeya hako owala ka pumbiwa. Omeya omatalala, noito ka hupa ngele ito vulu okuthika mombautu yokuhupitha. Owa pumbwa gumwe ngoka te ku umbile ongodhi e ku hilile mombautu. Jehova okwa popi kombinga yAaisraeli mboka ya li ye etha po oku mu longela, a ti: ‘Onde ya hilile kungame nomiya dhohole.’ (Hos. 11:4) Nokunena Kalunga osho u uvitile mboka ye etha po oku mu longela noya gwililwa po komaupyakadhi nokiimpwiyu. Okwa hala ya tseye kutya oku ya hole nokwa hala oku ya hilila kuye. Jehova ota vulu oku ku longitha e yu ulukile ohole ye.
13. Oshiholelwa shaPablo otashi ulike ngiini kutya ohole yetu otayi vulu okukwathela yamwe ya galukile kuJehova?
13 Osha simana okushilipaleka mboka inaayi ipyakidhila we kutya Jehova oku ya hole nonokutya natse otu ya hole. Omumwatate Pablo ngoka a popiwa moshitopolwa sha tetekele, okwa kala ini ipyakidhila we uule womimvo dhi vulithe 30. Okwa ti: “Ongula yimwe manga nda li tandi zi megumbo, omumwameme omukokele omunambili, okwa tsakaneke ndje e ta popi nangame momukalo gwopahole. Onda tameke okulila nda fa okanona. Onde mu lombwele kutya Jehova okwa fa owala oye e mu tumu, a popye nangame. Pethimbo opo tuu mpoka, onda tokola ndi galukile kuJehova.”
AMBIDHIDHA NOHOLE MBOKA INAAYI IPYAKIDHILA WE
14. Shi ikolelela keyele ndyoka li li muLukas 15:4, 5, omusita okwa ningi shike, sho a mono onzi ndjoka ya li ya kana?
14 Otwa pumbwa okukala hatu kwathele mboka inaayi ipyakidhila we. Ngaashi omumati a kanene gwomeyele lyaJesus, otashi vulika ye ehamekwa noonkondo pamaiyuvo, shoka tashi ka pula ethimbo ele, opo ya aluke. Otashi vulika ya nkundipala pambepo, molwoonkalo moka ya pita muuyuni mbuka waSatana. Otwa pumbwa oku ya kwathela ya koleke eitaalo lyawo muJehova. Jesus meyele lye lyonzi ya kana, okwa popi nkene omusita a humbata onzi ye komapepe, e te yi fala koonkwawo. Omusita okwa longitha ethimbo lye noonkondo dhe, opo a mone onzi ndjoka ya li ya kana. Ihe okwa mono kutya okwa pumbwa oku yi humbata, e yi shune koonkwawo, oshoka kayi na oonkondo dhokushuna ko kuyo yene. — Lesha Lukas 15:4, 5.
15. Ongiini tatu vulu okukwathela mboka inaayi ipyakidhila we ya galukile kuJehova? (Tala oshimpungu “ Oshilongitho sha simana.”)
15 Otashi vulika twa pumbwa okulongitha ethimbo noonkondo dhetu, tu kwathele mboka inaayi ipyakidhila we ya sinde uupyakadhi mboka tawu ya imbi ya longele Jehova. Ihe kekwatho lyombepo yaJehova, Oohapu dhe niileshomwa mbyoka hatu pewa okupitila megongalo, otatu vulu oku ya kwathela ya koleke ekwatathano lyawo naJehova. (Rom. 15:1) Ongiini mbela tatu vulu oku shi ninga? Omukuluntugongalo gumwe ngoka a pyokoka okwa ti: “Oyendji mboka inaayi ipyakidhila we ohaya kala ya pumbwa ekonakonombiimbeli, konima ngele ya tokola okugalukila kuJehova.” * Onkee ano, ngele owa pulwa wu konakone nagumwe, shi zimina nomutima aguhe. Omukuluntugongalo ngoka okwa gwedha ko a ti: “Ngoka ta konakona nomuntu ngoka, okwa pumbwa okukala e li kuume ke, omuntu ngoka ta vulu okwiinekela nokupopya naye a manguluka.”
ENYANYU MEGULU NOKOMBANDA YEVI
16. Otu shi shi ngiini kutya aayengeli otaya vulu oku tu kwathela tu mone mboka inaayi ipyakidhila we?
16 Iimoniwa oyindji otayi ulike kutya aayengeli ohaya longo pamwe natse, tu mone mboka ya halelela okugalukila kuJehova. (Eh. 14:6) Pashiholelwa, omumwatate Silvio gwokoEcuador, okwa li a galikana a mana mo a mone ekwatho, opo a vule okugalukila kuJehova. Manga a li ta galikana, aakuluntugongalo yaali oya konkola pegumbo lye. Petalelopo ndyoka, aamwatate mboka yaali oya li ya nyanyukwa oku mu pa ekwatho ndyoka a li a pumbwa.
17. Ohatu kala tu uvite ngiini, uuna twa kwathele mboka inaayi ipyakidhila we?
17 Okukwathela mboka inaayi ipyakidhila we ya galukile kuJehova, otashi ke tu etela enyanyu enene. Ndhindhilika shoka sha popiwa kuSalvador, omukokolindjila ngoka e hole okukwathela mboka inaayi ipyakidhila we. Okwa ti: “Omathimbo gamwe, ohandi kala tandi hala okulila omolwenyanyu. Ohashi nyanyudha ndje okulonga pamwe naJehova, a kwathele onzi ye, yi ze mo muuyuni waSatana noyi galukile kuye.” — Iil. 20:35.
18. Ngele ino ipyakidhila we, uushili wuni to vulu okukala wu na?
18 Ngele ngoye ino ipyakidhila we, kala wu na uushili kutya Jehova natango oku ku hole. Okwa hala wu galukile kuye. Ihe otashi ke ku pula wu katuke oonkatu, opo wu shi ninge. Ngaashi tate gwomeyele lyaJesus, Jehova naye okwa tegelela nondjuulukwe wu galukile kuye, note ke ku taamba ko nenyanyu.
EIMBILO 103 Aasita oye li omagano
^ okat. 5 Jehova okwa hala mboka ihaaye endathana we negongalo ya galukile kuye. Otatu vulu okuninga oshindji, tu ladhipike mboka ya hala okutaamba ko ehiyo lyaJehova ndyoka tali ti: “Galukileni kungame.” Moshitopolwa shika, otatu ka kundathana nkene tatu vulu oku ya kwathela ye shi ninge.
^ okat. 7 Omadhina gamwe oga lundululwa.
^ okat. 15 Yamwe yomwaamboka inaayi ipyakidhila we otaya vulu okukwathelwa mokukonakona iitopolwa yimwe yomembo Nkene tu na okwiikaleka mohole yaKalunga, omanga yamwe ya mona uuwanawa mokukonakona oontopolwa dhembo Hedha popepi naJehova. Okomitiye yIilonga yEgongalo oyo tayi ka tokola yi mone kutya olye lela a gwana okukonakona nayo.
^ okat. 68 OMATHANO: Aamwatate yatatu taya gandja ekwatho kwaangoka a hala okugalukila kuJehova. Otaye shi ningi mokukala ye na ekwatathano naye, moku mu shilipaleka kutya oku holike nomokupulakena kuye neitulomo.
