OMWATSI W’ERIGHA 26
“Musube okw’ingye”
“Musube okw’ingye, nage nasyabasubako.”—MAL. 3:7.
OLWIMBO 102 “Muwatikaye abatawite kaghala”
EBIKENDIKANIBWAKO *
1. Yehova akayowa ati omughulu embuli yiwe yikamusubako?
NGOKO tunalyalangira omo mwatsi awalaba, Yehova akayisosekanaya n’omulisya mubuya oyutsomene kutsibu obuli mbuli yiwe. Kandi akarondaya embuli eyiherire. Yehova mwabwira Abaisraeli abaleka erimukolera ati: “Musube okw’ingye, nage nasyabasubako.” Tunasi ngoko amalengekania wiwe akine maghumerera kundi akabugha ati: “sindibinduka.” (Mal. 3:6, 7) Yesu mwabugha ati Yehova n’abamalaika bakatsema kutsibu omughulu omughombe wa Yehova oyulue inyabirihera akasuba okw’iye.—Luka 15:10, 32.
2. Omo mwatsi ono tukendikania okuki?
2 Tukanaye oko misyo isatu eyo Yesu akolesaya eyikakanganaya ngoko twangawatikya ababiriyihighula oko Yehova. Tukendikania oko mibere milebe eyo litolere itwabya nayo tutoke eriwatikya embuli eyabirihera erisuba oko Yehova. Kandi tukendilangira busanaki ni ky’omughaso eriwatikya ababirileka erikola basube oko Yehova.
ERISONDYA OLUFRANGA OLULYAHERA
3-4. Niki kyo kyaleka omukali oyukanibwe omo Luka 15:8-10, inyakwesa ekitsipa kiwe ekyaheraya?
3 Eribana abanzire erisuba oko Yehova litolere itwakola kutsibu. Yesu mwakania oko mukali mulebe oyo wahereya ekindu ky’obughuli bunene ekikahulawamo Kitsipa. Omo mukania oyo Yesu akakanganaya ngoko akola kutsibu eribana Ekitsipa ekyo.—Soma Luka 15:8-10.
4 Yesu mwakangania ngoko omukali oyo ayowa abere abana ekitsipa ky’obughuli ekyo aheraya. Omughulu Yesu abya oko kihugho, omumbesa Muisraeli inyakabya alunga, ikikanabya, mama wiwe inyamuha esyofranga, akatu k’ebitsipa ikumi. Alinga ekitsipa ekyo omukali oyo aheraya kyabya kighuma ky’oko ebyo mama wiwe amuha. Omukali oyo mwayibwira ati Ekitsipa kiwe kikendibya imukikatoghera omo nyumba. Neryo, mw’akya etala n’erisondyakyo ehosi-hosi omo nyumba, aliwe mwatasunga kindu. Ekyakakala ky’etala yiwe mukyabya kike, mwatatoka erisunga akitsipa ekyo kundi kyabya kike. Oko nduli, mwabirya enyumba yosi. Neryo omo lututu olo abiraya mwalangira mw’ekitsipa kiwe kikapalya-palya omo kyakakala ky’etala. Mwatsema kundu eribanakyo! Mwabirikira abira n’abahimbani biwe amatulirabo engulu mbuya eyo.
5. Busanaki kyanganakala eribana abandu ababirileka erikola?
5 Ngoko omusyo owo Yesu akolesaya amakangania, kikasaba erikola kutsibu eribana ekindu kilebe ekiryahera. Netu kutya, kyanganatolera itwakola kutsibu eribana abandu ababirileka erikola haghuma n’endeko. Banganabya ibabiribugha emyaka mingyi isibakihindana haghuma netu. Banganabya ibabirihumira omo kiharo ekyo batasibwemo n’abalikyetu. Aliwe, lino twanganikirirya ngoko abaghuma ba kubo banzire kundu erisubira Yehova. Banzire eritasyakolera Yehova ibane haghuma n’ekihanda ky’abaramya biwe ab’ekwenene, aliwe balaghire oko buwatikya bwetu.
6. Itwe bosi omo ndeko twangawatikya tuti erirondya ababirileka erikola?
6 Nindi yo wangawatikya erirondya ababirileka erikola? Abasyakulu b’endeko, abapainia, n’abandu b’oko kihanda ky’abandu abo, itwe bosi twanganawatikya erirondya ababirileka erikola. Unawite omwira kutse omundu w’omo kihanda kyaghu oyo abirileka erikola haghuma n’endeko? Wamahindana n’omundu oyukitekola ukatulira nyumba oko nyumba kutse ukatulira ahakabya abandu bangyi, umubwire uti amabya iniangananza abasyakulu b’endeko basyamubane, akubwire ahikere kutse akuhe e nimero yiwe y’etelefone ukenditwalirabyo abasyakulu b’endeko.
7. Ebinywa bya Thomas, omusyakulu w’endeko, byamakwighisyaki?
7 Abasyakulu b’endeko bangakolaki eriwatikya abanzire erisuba oko Yehova? Tulebaye ebyo omusyakulu w’endeko oyo wikere omo Espanye oyukahulawamo Thomas * akabugha. Abiriwatikya abalikyetu abalabire oko 40 erisuba omo ndeko. Thomas akabugha ati: “Eky’erimbere, ngabulaya abaghala n’abali betu mbiriri-mbiriri nga banganaminya aho abandu abakitekola bikere lino. Kutse inabulya abatuliri balebe omo ndeko nga bangan’ibuka omundu mulebe oyo abiryumbya erihika oko mihindano. Abangyi omo ndeko bakatsema eriwatikya kundi bakayowa ibamawatikya erirondya ababirileka erikola. Neryo, ngabya nayabana abaghala n’abali betu ababirileka erikola, ngababulaya emyatsi milebe oko bana babo n’abandi bandu b’omo kihanda kyabo. Abaghuma b’oko ababirileka erikola babya ibakanaleta abana babo oko mihindano, kandi alinga abana abo mubanabya batuliri oko mughulu mulebe. Nabo kutya banganawatikibwa erisuba oko Yehova.”
USUBAYE ABANA BA YEHOVA ABABIRIHERA B’OMO NDEKO
8. Omo musyo w’omwana muhererya owali omo Luka 15:17-24, tata akakolera ati mughala wiwe oyo wayisubako?
8 Ni mibere yahi eyo tutolere eribya nayo twamanza eriwatikya abanzire erisuba oko Yehova? Lebaya emyatsi milebe eyo twang’igha omo musyo w’omwana muhererya owo Yesu akolesaya. (Soma Luka 15:17-24.) Yesu mwakangania ngoko oko nduli omwana mwayikubya b’omo busana n’ekyo akola, neryo mwayisogha erisuba eka wabo. Tata mwasa akatibita n’erisyawa oko mughala wiwe, erimukangania ngoko amwanzire kutsibu. Omwana muhererya oyo mwayowa muhanda omo mutima busana n’ebyo akola kandi mwayowa nga syakitolere eryahulwamo mughala. Abere abwira tata wiwe ngoko akayowa omo mutima, tata wiwe mwamukwira obulighe. Neryo tata mwakola emyatsi milebe erikangania mughala wiwe ngoko atsemire erimukokya eka nga mughala wiwe butsira ng’omughombe. Erikangania ekyo, tata mwateghekania ekisendebele kandi mwambalya omughala wiwe, oyo wayisubako, y’esyongyimba esyuwene.
9. Twamanza eriwatikya ababirileka erikola basubire Yehova, litolere itwakangania emibere yahi? (Lebaya ekisanduku “Ngoko twangawatikya abanzire erisubira Yehova.”)
9 Yehova ali nga tata ow’omo musyo oyo. Anzire abaghala n’abali betu ababirileka erikola kandi anzire ibasuba okw’iye. Twanganigha Yehova omw’iwatikyabo erisuba omo ndeko ya Yehova. Erikola ekyo, litolere itwabya n’omutima w’erilindirira, itwakwirabo obulighe, n’erianzabo. Busanaki litolere itwakangania emibere mibuya eyo, kandi twangakola ekyo kyo tuti?
10. Twamanza eriwatikya omundu eritasyasuba oko Yehova, busanaki litolere itwabya n’omutima w’erilindirira?
10 Litolere itwabya n’omutima w’erilindirira kundi omundu erisubira Yehova kikasaba endambi. Abangyi b’oko ababya ibabirileka erikola, bakabugha bati mubatasyatsuka erikolera Yehova babilendererwa ngendo nyingyi n’abasyakulu b’endeko n’abandi balikyetu. Mwali wetu Nancy, ow’omo Asia, mwahandika ati: “Omwira waghe ow’omo ndeko mwaniwatikya kutsibu. Mwanianza kutsibu nga tusubeneko. Mwan’ibukya emyatsi mibuya eyo twabya tukakola haghuma naye kera. Abya inyakanihulikirira butsira eriyihania omughulu nabya ngamukaniria ebiri oko mutima, kandi isyasaligha erinihana. Mwakangania ngoko ni mwira w’ekwenene, oyukawatikaya oko buli ndambi.”
11. Twamanza eriwatikya omundu oyukinahitene, busanaki kyuwene eriyihira omo mwanya wiwe?
11 Erikwira abandi b’obulighe liri ng’obubalya obuli n’obutoki bw’erilamya, obwangawatikya omundu eriyowa ndeke. Ababirileka erikola balebe mubakoserwa n’omundu mulebe omo ndeko hamabilaba emyaka mingyi neryo bakinahitene kutsibu busana n’ekyo. Ekyo kyabirileka ibatanza erisuba oko Yehova. Abaghuma banganalengekania bati mubaghonerwa. Banganabya ibalaghire oko mundu oyo wangahulikirirabo ndeke n’eriyihira omo mwanya wabo. (Yak. 1:19) María, oyo waleka erikola oko mughulu mulebe, akabugha ati: “Nabya nilaghire oko mundu oyo wanganihulikirira ndeke, oyo wanganilirikya n’oyo wanganisondola.”
12. Teka eky’erileberyoko ekikakanganaya ngoko olwanzo lwa Yehova lukawatikaya ababirileka erikola erisuba omo katikati k’abandu biwe.
12 EBiblia yikasosekanaya olwanzo lwa Yehova oko bandu biwe ng’omuliki kutse olukoba. Olwanzo lw’oMungu luli ng’olukoba omo nzira syahi? Terilengekania oko mwatsi ono: Tubughe tuti wamasenda omo ngetse eyabiritsatsuha neryo omundu mulebe inyakughusira ekindu ekyangakuwatikya erileleta oko maghetse. Kwenene iwukenditsemera obuwatikya bwiwe kundi ekindu ekyo ikikendikuwatikya eritendisenda. Aliwe ekindu ekyangakuwatikya erileleta oko maghetse, ikyo kisa sikyangakulamya. Amaghetsi ahuhirire kutsibu, neryo siwangatoka eribyaho wamatendibana obwato obo wangasaghiramo. Iwukendilagha oko mundu oyo wangakughusira ekikoba n’erikukurira omo bwato. Yehova mwakania oko Baisraeli abayihighula okw’iye ati: “Munakurabo omo ngoba syʼomundu, nʼomo bikono byʼolwanzo”. (Hos. 11:4) Na munabwire oMungu kwakinayowa atya busana n’abandu ababirileka erimukolera n’abakalaba omo myatsi mingyi eyikalire n’erihangya-hangya. Anzire ibaminya kw’abanzire, kandi anzire ibasuba okw’iye. Kandi Yehova anganakukolesya eribakangania olwanzo lwiwe olo.
13. Teka eky’erileberyako ekikakanganaya ngoko olwanzo lw’eKikristo lwanganawatikya abandi erisuba oko Yehova.
13 Ni ky’omughaso erikangania ababirileka erikola ngoko Yehova anzirebo netu kutya. Mughala wetu Pablo, oyo twakanayako omo mwatsi owalaba mwabugha emyaka 30 inyabirileka erikola haghuma n’endeko. Akabugha ati: “Kiro kighuma omo tututu ngalua eka waghe, munahindana mwali wetu oyukekeluhire mwakania naghe omo lwanzo. Munatsuka erilira ng’omwana. Munamubwira niti: ‘Alinga Yehova yulyakutuma erikania naghe.’ Oko ndambi eyo, munalunayisogha erisuba oko Yehova.”
UWATIKAYE ABATE N’AMAKA OMO LWANZO
14. Erikwamana n’omusyo awali omo Luka 15:4, 5, omulisya mwakolaki abere abana embuli eyahera?
14 Ababirileka erikola balaghire oko buwatikya bwetu mughulu wosi. Ng’omwana muhererya oyo Yesu akanayako, banganabya ibawite obwaghali bunene omo mutima obutebwangalama luba. Kandi alinga babiryoloba bunya-kirimu busana n’ebyo bakalabamo omo kihugho kya Sitani. Litolere itwawatikyabo eritasyawatya obwikirirya bwabo oko Yehova. Omo musyo w’embuli eyahera, Yesu akakanganaya ngoko omulisya akahira embuli y’oko bitigho biwe n’erisubyayo omo kihangulo. Omulisya abya inyabirilabya endambi n’akaghala kanene embere abane embuli eyahera. Aliwe, mwahekayo oko bitigho biwe kundi mwalangira ngoko siyikiwite akaghala k’eriyighendera eyiyene.—Soma Luka 15:4, 5.
15. Twangawatikya tuti omundu oyukitawite akaghala bunya-kirimu oyo wanzire erisuba oko Yehova? (Lebaya ekisanduku “ Akatabu k’obughuli ako twangakolesya.”)
15 Kyanganatusaba endambi n’akaghala kanene eriwatikya ababirileka erikola batoke erikinda ekikaleka ikyabakalako erisuba oko Yehova. Aliwe, erilabira ekirimu kya Yehova, eKinywa kiwe, n’ebichapo ebikateghekanibawa n’endondeko yiwe, twanganabawatikya eritasyawatya obwira bwabo haghuma na Yehova. (Rom. 15:1) Twangakola ekyo kyo tuti? Omusyakulu w’endeko mughuma oyo wasi emyatsi mingyi akabugha ati: “Ababirileka erikola bangyi bakabya bayisogha kundu eritasyasubira Yehova, kikatolera ibatasigha eBiblia.” * Neryo, wamabisabwa erigha eBiblia n’omundu ng’oyo, litolere iwaligha omubírí oyo n’obutseme wamabya iwanganatokagho. Omusyakulu oyo akatomekako ati: “Omutuliri oyukasondola efunzo ng’eyo atolere inyabya mwira oyuwene, oyo omundu oyukitekola angayiketera.”
OBUTSEME ELUBULA N’OKO KIHUGHO
16. Tukaminya tuti ngoko abamalaika bakatuwatikaya eribana ababirileka erikola?
16 Hali emyatsi mingyi eyikakanganaya ngoko abamalaika banemutuwatikya eribana ababirileka erikola abanzire erisuba oko Yehova. (Erib. 14:6) Eky’erileberyako, mughala wetu Silvio, ow’omo kihugho kye Equateur, mwasaba Yehova ati amutumire omundu oyo wangamuwatikya erisuba omo ndeko. Inyakinasaba, mwowa abandu bakakongota oko mulango wiwe. Babya basyakulu b’endeko babiri. Mubatsema erimuha obuwatikya obo abya alaghireko.
17. Tukabanaki omughulu tukawatikaya ababiryoloba bunya-kirimu?
17 Twamabiwatikya ababiryoloba bunya-kirimu erisuba oko Yehova, itukenditsema kutsibu. Salvador, omupainia oyukatsomana ababirileka erikola bo kutsibu, akabugha ati: “Hakanabya endambi ikyanikalako eriyikakirya erilira busana n’obutseme. Kikanitsemesaya kutsibu erilangira ngoko Yehova mwakalusaya embuli eyanzire omo kihugho kya Sitani kandi ngoko naghe mungabya n’olusunzo lw’erikola haghuma naye omubírí oyo.”—Emib. 20:35.
18. Wamabya iwabirileka erikola haghuma n’endeko, litolere iwaminya omwatsi wahi?
18 Wamabya iwabirileka erikola haghuma n’endeko, uminye ngoko Yehova akinakwanzire. Anzire iwasuba okw’iye. Kikendikusaba eriyikasa erisuba okw’iye. Aliwe, nga tata w’omo musyo wa Yesu, Yehova anemulindilira umusubire, kandi akendikukokya n’obutseme ukasuba omo ndeko, eka wenyu.
OLWIMBO 103 Abalisya ni bihembo by’omo bandu
^ par. 5 Yehova anzire abandu ababirileka erikola haghuma n’endeko basube okw’iye. Twanganayikasa eriwatikya abandu abakitekola abanzire eriligha erikokibwa lya Yehova lino: “Musube okw’ingye.” Omo mwatsi ono, tukendilangira ngoko twangawatikyabo erikola batya.
^ par. 7 Amena malebe mwakabindulawa.
^ par. 15 Ababirileka erikola balebe banganawatikibwa omw’igha esyosura silebe sy’ekitabu Muyitsinge Eribya omo Lwanzo lw’oMungu, abandi ibo, mubawatikibwa omughulu bakangiriribawa buhya-buhya esyosura silebe sy’ekitabu Mkaribie Yehova. Akatunga k’Omubírí ak’Endeko ko kakasombola omutuliri oyutolere erisondola efunzo ng’eyo.
^ par. 68 ERIKANIA OKO SYOPITSA: Abaghala betu basatu banemuwatikya oko ndambi mbiriri-mbiriri mughala wetu oyo wanzire erisuba omo ndeko. Bakakola batya bakamulenderera kangyi-kangyi, bakamukangania ngoko anzirwe, n’erimuhulikirira ndeke.
