ISIHLOKO SAMA-26
‘Buyelani Kimi’
“Nanibuyela kimi, nami ngizakubuyela kini.”—MAL. 3:7.
INGOMA 102 Asisizeni Ababogabogako
OKUZOKUCOCWA NGAKHO *
1. UJehova uzizwa njani lokha isikhonzi sakhe ebesimlahlile sibuyela kuye?
NJENGOMBANA sicocile esihlokweni esidlulileko, uJehova uzifanisa nomalusi ozitlhogomela kuhle izimvu zakhe. Ufuna nanyana ngiyiphi imvu yakhe edurhileko. UJehova watjela ama-Israyeli ebewamtjhiyileko, wathi: “Nanibuyela kimi, nami ngizakubuyela kini.” Siyazi bona uzizwa ngendlela efanako nanamhlanjesi, ngombana uthi: “Angikaphenduki.” (Mal. 3:6, 7) UJesu wathi ngitjho noJehova neengilozi zithaba khulu nangabe ngitjho nesikhonzi sinye sibuya emhlambinakhe begodu simlotjha.—Luk. 15:10, 32.
2. Sizokucoca ngani esihlokwenesi?
2 Akhesikhulume ngemifanekiso emithathu kaJesu ekhuluma ngokusiza labo abatjhiye umhlambi kaJehova. Sizokucoca ngobuntu obuthathu ekufuze sibe nabo nasizakusiza iinceku zakaJehova ezilahlekileko bona zibuyele kuye. Begodu sizokubona ukuthi kuqakatheke kangangani ukusekela labo ababogabogako.
UKUFUNA ISIPAPARWANA ESILAHLEKILEKO
3-4. Kubayini umfazi okuLukasi 15:8-10, afunisisa isipaparwana sesiliva esilahlekileko?
3 Kufuze sisebenze budisi nasifuna labo abatjhiye uJehova bona babuyele kuye. Emfanekiswenakhe osencwadini kaLukasi, uJesu uveza indlela umfazi othileko afuna ngayo into emlahlekeleko eqakatheke khulu kuye, isipaparwana sesiliva. Umfanekiso lo usenza sicabangisise ngendaba yokufuna.—Funda uLukasi 15:8-10.
4 UJesu uhlathulula indlela umfazi lo azizwa ngayo ngemva kokufumana isipaparwana sesiliva ebesimlahlekele. Ngesikhathi sakaJesu, abomma bamaJuda bebanikela indodakazabo nayiyokutjhada iimpaparwana zesiliva ezilitjhumi ngelanga layo lomtjhado. Kungenzeka isipaparwanesi besiqakatheke khulu kumma wendodakazi etjhadako, kungenzeka bona naye umma lo wasifumana kummakhe nakatjhadako. Umfazi lo wacabanga bona kungenzeka isipaparwanesi sawela phasi, yeke wakhanyisa isibani bona afune isipaparwanesi, kodwana khenge asibone, umkhanyo wesibani sakhe bewungamnikeli ukukhanya okwaneleko bona akghone ukusibona. Nakathanyela yoke indawo phasi, lapha eentulini wasibona isipaparwana sesiliva esilahlekileko. Lokho kwamthabisa tle! Wabiza abangani bakhe nabomakhelwana bona bazokuthaba naye.
5. Kubayini kungaba budisi ukufuna labo abangasayi emihlanganweni?
5 Njengombana sibonile emfanekisweni kaJesu, kutlhoga bona sisebenze nasizakufumana okuthileko okulahlekileko. Ngokufanako, kungatlhoga bona sisebenze budisi nasizakufumana boke abatjhiye ibandla. Kungenzeka bona sekudlule iminyaka eminengi balisa ukuhlanganyela nebandla, kungenzeka sebathuthela endaweni la bangaziwa khona bafowethu nabodadwethu. Okwanje singaqiniseka ukuthi abantwaba bayafuna ukubuyela kuJehova, bafuna ukulotjha uJehova nabantu bakhe abamlotjha ngeqiniso kodwana bayalitlhoga isizo lethu.
6. Amalunga webandla angahlanganyela njani ekufuneni abantu abangasayi emihlanganweni?
6 Bobani abangahlanganyela ekufuneni labo abangasayi emihlanganweni? Soke singasiza, kungakhathaliseki ukuthi simaphayona, sibadala, simalunga womndeni namkha simalunga webandla, soke singasiza ekubafuneni. Kghani unesihlobo namkha umngani otjhiye uJehova? Kghani wakhe wahlangana nomuntu ongasayi emihlanganweni lokha nawutjhumayela endlini ngendlu namkha nawutjhumayela tjhatjhalazi? Nakwenzeka uhlangana nomuntu loyo begodu akuvumela ukuthi uthathe imininingwanakhe, ungayidlulisela ebadaleni bebandla okilo.
7. Khuyini ongayifunda kilokho okwatjhiwo nguThomas ongumdala?
7 Ngimaphi amagadango ekufuze athathwe badala lokha nabafuna labo abafuna ukubuyela kuJehova? Akhutjheje lokho okwatjhiwo mdala ibizo lakhe linguThomas, * ohlala eSpain begodu sekasize aboFakazi abama-40 bona babuyele kuJehova. UThomas uthi: “Ngithoma ngokubuza abodadwethu nabafowethu abahlukahlukeneko ukuthi abantwabo bayabazi bona bahlalaphi na, ngezinye iinkhathi ngibuza abarhuweleli bona bakhona abanye ababakhumbulako abangasezi emihlanganweni yebandla na, abanengi ebandleni bayakuthabela ukusiza. Ngezinye iinkhathi ngibuza abarhuweleli bona bakhona abanye ababakhumbulako abangasezi emihlanganweni yebandla. Abanengi ebandleni bayakuthabela ukusiza. Ngezinye iinkhathi nangifuna labo abatjhiye ibandla, ngijayele ukubabuza ngabantwana babo namkha ngezinye iinhlobo zabo. Abantu abangasahlanganyeli ngezinye iinkhathi bebajayele ukuza nabantwana babo emihlanganweni, kanengi kuyenzeka ukuthi abantwana labo bebabatjhumayeli yeke nabo bangasizwa bona babuyele kuJehova.”
AMADODANA NAMADODAKAZI KAJEHOVA AWABUYELE KUYE
8. Emfanekisweni wendodana eyalahlekako ofumaneka kuLukasi 15:17-24, ubaba wayiphatha njani indodanakhe ebuyele ekhaya?
8 Ngibuphi ubuntu ekufuze sibe nabo nasizakusiza abanye babuyela kuJehova? Tjheja iimfundo esingazifunda emfanekisweni kaJesu wendodana eyalahlekako. (Funda uLukasi 15:17-24.) UJesu uhlathulula ukuthi indodana le yalemuka bona isidlhadlha, ngebanga lalokho yaqunta ukubuyela ekhaya. Uyise wathi nakayibonako, wagijima wayihlangabeza, wayisingatha wayiqinisekisa ngokuthi uyayithanda. Ngebanga lokudliwa ngunembeza, indodana le yazizwa ingakufaneli ukubizwa ngokuthi ndodana. Ubaba wayizwela indodanakhe lokha nayimhlathululela ngendlela ezizwa ngayo, ubaba wathatha amagadango atjengisa ukuthi uyayamukela indodanakhe ekhaya, ingasi njengesisebenzi kodwana njengelunga lomndeni elithandekako. Ukutjengisa ukuthi uyayamukela indodana le, ubaba wahlela umnyanya omkhulu, bewayinikela izambatho ezitjha ngebanga lokuthi ibuyile ekhaya.
9. Ngibuphi ubuntu ekufuze sibe nabo nasizakusiza labo abangasayi emihlanganweni bona babuyele kuJehova? (Qala ibhoksi elithi, “ Indlela Ongasiza Ngayo Abantu Ababuyela KuJehova.”)
9 UJehova ufana nobaba osemfanekisweni lo. Uyazithanda zoke iinkhonzi zakhe ezingasayi emihlanganweni begodu ufuna zibuyele kuye. Nathi kufuze silingise uJehova sizisize zibuyele kuye. Nasizakwenza ngokuphumelelako lokho kufuze sibekezele, sizwisise begodu sibathande. Kubayini kuqakathekile ukutjengisa ubuntobu begodu singabutjengisa njani?
10. Kubayini kufuze sibekezele nasisiza umuntu bona abuyele kuJehova?
10 Kufuze sibekezele ngombana kuthatha isikhathi bona umuntu abuyele kuJehova. Inengi lalabo ebebangasayi emihlanganweni kwatlhogeka bona livakatjhelwe iinkhathi ezinengi badala bebandla namanye amalunga webandla ngaphambi kobana libuyele kuJehova. Udade ibizo lakhe linguNancy we-Asia uthi: “Umngani ebengitjhidelene naye khulu ebandleni wangisiza tle. Bekangithanda kangangokuthi ngazizwa ngasuthi ngibelethwa naye. Wangikhumbuza ngeenkhathi ezimnandi esakhe sabanazo ndawonye. Bekangilalelisisa nangimtjela indlela engizizwa ngayo begodu nakutlhogeka anginikele iseluleko, bekanginikela. Mbala, waba mngani weqiniso kimi.”
11. Kubayini kufuze sizwisise nasizakusiza umuntu owaphathwa kabuhlungu?
11 Ukuzwisisa kufana nesihlahla esikghona ukusiza umuntu olimeleko bona aphole. Abanye balabo abangasezi emihlanganweni baphathwa kabuhlungu babantu abathileko ebandleni eminyakeni eminengi eyadlulako. Ngebanga lalokho abasafuni ukuya emihlanganweni. Basacabanga ukuthi khenge baphathwa kuhle. Lokho kwenza bona batlhoge umuntu ozobalalela begodu azwisise indlela abazizwa ngayo. (Jak. 1:19) UMaría naye ekhekwadlula isikhathi esithileko angayi emihlanganweni uthi, “Bengitlhoga umuntu ozongilalela, angizwisise begodu angisize.”
12. Sitjela ngesibonelo sendlela uJehova adosela ngayo abantu abangasahlanganyeli kuye.
12 IBhayibheli nalihlathulula ithando uJehova athanda ngalo abantu bakhe lithi lifana nomutja. Kubayini litjho njalo? Cabanga nganaku umfanekiso: Zicabange usemanzini begodu uyaminza kuthi kusesenjalo umuntu othileko akuphosele isambatho semanzini esizokusindisa. Asizazi ukuthi bewuzolithabela isizwelo ngombana bewungekhe usaminza. Iqiniso kukuthi isembathweso angekhe sakusindisa ngokuphelele ukuphila kwakho. Amanzi okiwo amakhaza yeke kufuze ufumane isikepe ozokukhwela kiso. Kufuze kube nomuntu ozokuphosela intambo akudosele esikepeni. Nakhu uJehova akutjho ngama-Israyeli ebekadurhileko: “Ngababophela ngomutja womusa nethando.” (Hos. 11:4) UZimu usazizwa ngendlela efanako nanamhlanjesi ngalabo abangasayi emihlanganweni ngebanga lokugandelelwa ziintjhijilo namatshwenyeko. Ufuna bazi ukuthi uyabathanda begodu ufuna ukubadosela kuye. Yeke, uJehova uzokusebenzisa wena bona abadose begodu abatjengise ukuthi uyabathanda.
13. Okwenzeka kuPablo kutjengisa njani ukuthi nasithanda abanye singabasiza babuyele kuJehova?
13 Kuqakatheke khulu ukuqinisekisa abantu abangasahlanganyeli ngokuthi uJehova uyabathanda begodu nathi siyabathanda. UPablo ekukhulunywe ngaye esihlokweni esidlulileko, besele anesikhathi esingaphezu kweminyaka ema-30 angasayi emihlanganweni. Uthi: “Ngelinye ilanga ekuseni ngisuka kwami, ngazithela phezu kodade olupheleko onomusa, udade lo wakhuluma nami ngomusa. Nakasakhuluma nami, ngalila njengomntwana. Ngamtjela ukuthi kubonakala ngasuthi uthunyelwe nguJehova bona azokukhuluma nami. Ngaqunta mhlokho ukubuyela kuJehova.”
SEKELANI ABABOGABOGAKO
14. Ngokomfanekiso osemtlolweni kaLukasi 15:4, 5, Khuyini eyenziwa ngumelusi ngemva kokufumana imvu edurhileko?
14 Kufuze siragele phambili sibakhuthaze labo abangasayi emihlanganweni nasibafumanako. Njengendodana eyalahlekako emfanekisweni kaJesu, kungenzeka basezwa ubuhlungu obuzokuthatha isikhathi eside bona buphele. Ngaphezu kwalokho, ngebanga lokuthi uSathana bekabenzisa izinto ezifunwa nguye, lokho kwenza bona bangabi nobuhlobo obuhle noJehova njengalokha nabathoma ukufunda ngaye. Kufuze sibasize bakhe ukukholwa kwabo kuJehova. Emfanekisweni wemvu edurhileko, uJesu uveza indlela umelusi athwala ngayo imvu ngokuyisingatha ayibeke emahlombe ayilethe emhlambini. Umalusi lo usebenzise isikhathi namandla bona afune imvu elahlekileko le. Nanyana kunjalo, ubona kuqakathekile bona ayithwale ayibeke emahlombe ngombana ayisanawo amandla aneleko wokubuyela emhlambini.—Funda uLukasi 15:4, 5.
15. Singabasekela njani ababogabogako abafuna ubuyela kuJehova? (Qala isihloko esithi, “ Ithulusi Eliphuma Phambili.”)
15 Kungatlhoga siziphe isikhathi namandla bona sikghone ukusiza labo abangasahlanganyeli balwisane nezinto ezenza kube budisi bona bahlanganyele. Ngesizo lommoya kaJehova, iliZwi lakhe kunye neencwadi esizifumana ehlanganwenakhe, singabasiza bakhe ubuhlobo obuhle noJehova godu. (Rom. 15:1) Singakwenza njani lokho? Omunye umdala ongumakadebona uthi: “Inengi lalabo abapholileko abafuna ukubuyela kuJehova kufuze benzelwe ilungiselelo lokufundelwa iBhayibheli.” * Nangabe abadala bakubawa bona ufunde iBhayibheli nomuntu obekangasezi emihlanganweni, kuthabele lokho begodu ukwamukele. Umdala lo uraga uthi: “Umuntu ozokuraga isifundweso kufuze kube mumuntu ozokulwela ukuba mngani womuntu ofundelwako, lokho kuzosiza umuntu ofundelwako bona akghone ukumthululela isifuba ngokutjhaphulukileko.”
KUBA NETHABO EZULWINI NEPHASINI
16. Sazi njani ukuthi iingilozi zisisiza sifumane labo abangasayi emihlanganweni?
16 Zinengi izenzakalo ezitjengisa ukuthi iingilozi ziyasisiza bona sifumane abantu abatjhiye uJehova bona babuyele kuye. (IsAm. 14:6) Ngokwesibonelo, uSilvio we-Ecuador obekangasayi emhlanganweni wabawa uJehova bona amlethele umuntu ozomsiza abuyele kuJehova. Nakasathandaza, kwakokoda abantu emzinakhe. Abadala ababili bebasemnyangwakhe. Bakuthabela ukumsiza.
17. Sizozizwa njani nasisize umuntu bona abuyele kuJehova?
17 Kuzosithabisa ukusiza abantu abatjhiye uJehova bona babe nobuhlobo obuhle naye. Tjheja lokho okutjhiwo nguSalvador, iphayona elizikhandlako ngokufuna labo abangasayi emihlanganweni, lithi: “Ngithaba bengilile nangicabanga ukuthi uJehova ungivumele bona ngisebenze naye ekusindiseni imvu yakhe ephasini elimbi lakaSathaneli.”—IzE. 20:35.
18. Nawungasayi emihlanganweni, khuyini ongaqiniseka ngakho?
18 Nawungasayi emihlanganweni, qiniseka ngokuthi uJehova usakuthanda. Ufuna ubuyele kuye. Kuzokufuze ulinge ngamandlakho woke bona ubuyele kuye. Njengobaba osemfanekisweni kaJesu, uJehova ulindele bona ubuyele kuye begodu uzokwamukela.
INGOMA 103 Abelusi Bazizipho Ezibabantu
^ isig. 5 UJehova ufuna boke labo abangasayi emihlanganweni begodu bangasatjhumayeli bona babuyele kuye. Kunengi esingakwenza bona sikhuthaze labo abafuna ukubuyela kuJehova bamukele isimemo sakhe esithi: ‘Buyelani kimi.’ Esihlokwenesi sizokubona bona yini esingayenza bona sibasize babuyele kuJehova.
^ isig. 7 Amanye amabizo atjhugululiwe.
^ isig. 15 Abanye ebebangasayi emihlanganweni basizwe kufunda iingcenye ezithileko zencwadi ethi, Kutjho Ukuthini Ukuhlala Ethandweni LakaZimu? Bese kuthi abanye basizwe kufunda izahluko zencwadi ethi, Hlalani Ethandweni LakaZimu. Ikomidi yeKonzo yeBandla izokukhetha bona ngubani ozokuraga isifundweso.
^ isig. 68 IHLATHULULO YEENTHOMBE: Abafowethu abathathu abahlukeneko basiza umfowethu ofuna ukubuyela kuJehova. Benza lokho ngokumhlola, bamqinisekise ngokuthi bayamthanda begodu bayamzwisisa.
