1. Kansi Yehova okumvwa tyani ngati m’mozi mwa atumiki ŵake wawelela?

MOLINGANA na mwetephunzilila m’nkhani yapita, Yehova ozilinganizhya na m’ciŵeta muweme wamene osamalila mwacifundo mbelele zake. Yove osakilasakila ŵanthu amene esiya gulu yake. Euzhya Aisiraeli amene emusiya kuti: “Welelani kuli neo, ndipo nane niwelele kuli mweo.” Nangu masiku ŵano akalukumvwa cimozimozi, niye cifukwa cake elaŵila kuti: “Nucinja lini.” (Mal. 3:6, 7) Yesu elaŵila kuti Yehova na angelo okondwela ngako ngati m’mozi mwa atumiki ŵake wawelela soti kuli yove.​—Luka 15:10, 32.

2. Tilaŵizhyane cinji m’nkhani ino?

² Lomba, tiyeni tilaŵizhyane mafanizo atatu a Yesu amene atiyavye kuona mwatingayavyile ŵanthu amene esiya gulu ya Yehova. Tilaŵizhyane minkhalidwe itatu yatufunikila kuti tiyavye ŵanthu efooka kuti awelele kwa Yehova. Ndipo tilaŵizhyane soti cifukwa cake n’cinthu cofunika ngako kuyavya ŵanthu efooka.

3-4. Ndaŵa yanji munakazi otomolewa pa Luka 15:8-10, eisakila mosamala ndalama yesoŵa?

³ Tufunika kuyesayesa kuti tipeze ŵanthu amene ofunishisha kuwelela kwa Yehova. Yesu efotokoza fanizo yokhuza munakazi wamene etaya ndalama yoitiwa kuti dalakima. Fanizo iyi yuonesha khama yecionesha posakila ndalama yesoŵa. ​—Ŵelengani Luka 15:8-10.

⁴ Yesu efotokoza mwecimvwila munakazi peciipeza ndalama yamene yesoŵa. Mu nthawi ya Yesu, ngati munakazi mu Isiraeli walunguliwa, amai ŵake enzomupasa madalakima okwanila 10. Cuoneka kuti ndalama izi zenze zofunika ngako. Munakazi pecitaya ndalama, etola lambi nosanika pansi koma  aliyoipeze. Lambi yake yenzosanika lini ngako kuti akwanishe kuona ndalama yesoŵa. Posilizhyila pake, epyela mu ng’anda yonse mosamala. Pavuli posilizhya kupyela, esanika niye peciipeza mu lito. Kulaŵila cendi, ecimvwa bwino ndipo eita ayake kuti akondwele nao pamozi.

5. Ndaŵa yanji cingankhale cinthu covuta kupeza ŵanthu ayakine amene efooka?

⁵ Monga ni mwatamvwila mu fanizo ya Yesu, penzofunika kuyesayesa kuti aipeze ndalama. Molingana na izi, tufunika kuyesayesa kusakila ŵanthu amene efooka. Ayakine papita vyaka vinyinji kufumila pecileka kusonkhana. Ndipo ayakine ekukila ku madela kwamene akwasu akwamene uko oŵaziŵa lini. Nangu n’tetyo, ayakine mwa akwasu amene aŵa ofunishisha kuwelela kwa Yehova. Ofuna kutumikila Yehova pamozi na akwasu na azilongosi, ndipo ofunikila thandizo yasu.

6. Kansi ofalisa onse mumpingo angatolemo tyani mbali posakila ŵanthu ofooka?

⁶ Kansi ni ŵani ofunika kusakila ŵanthu ofooka amene aŵa? Tonse tingatolemo mbali, koma makamaka akulu, apainiya na abanja. Kansi muli na muyanu olo wabanja wamene efooka? Ko mwekumanako na wofooka pemwenzolalikila ku ng’anda na ng’anda olo pemwenzocita ulaliki wapatuŵa? Ngati ekuuzhyankoni kwakunkhala olo ekupasankoni namba ya foni, mungayopasa akulu mumpingo wanu.

7. Tingaphunzilepo cinji pa mau yecilaŵila mkulu muyakine wa zina yakuti Thomas?

⁷ Akulu ali na udindo ukulu ngako wosakila ŵanthu efooka amene ofuna kuwelela kwa Yehova. Kansi angacite tyani zamene izi? Onani zecilaŵila mkwasu Thomas, * wamene ni mkulu onkhala ku Spain. Yove wayavya ŵanthu opitilila pa 40 kuti awelele mumpingo, ndipo eciti: “Coyamba nukonsha akwasu na azilongosi amene oziŵa kwakunkhala ŵanthu amene aŵa. Nukonsha soti ofalisa ngati okumbukila aliyense wamene eleka kusonkhana. Ayakine mumpingo osangalala kutolako mbali cifukwa okumvwa kuti ali na mbali pa nchito yamene iyi. Pavuli pake, nukonsha akwasu na azilongosi ofooka amene aŵa za ŵana na abanja ŵao, cifukwa kuvuli uku enzowela nao ku misonkhano, ndipo ayakine mwa ŵana amene aŵa enze ofalisa. Nao ofunika kuyavyiwa kuti awelele kwa Yehova.”

8. Mu fanizo yupezeka pa Luka 15:17-24, kansi awisi a mwana woloŵelela ecita cinji?

⁸ Kansi tufunika kunkhala na minkhalidwe yotyani kuti tiyavye ŵanthu ofuna kuwelela kwa Yehova? Tiyeni tione zatingaphunzile mu fanizo ya Yesu yokhuza mwana woloŵelela. (Ŵelengani Luka 15:17-24.) Yesu efotokoza kuti mwana ezindikila kuti aliyocite vinthu mwanzelu ndipo eganiza zowelela ku ng’anda. Ausuwake emuutukila nomukumbatila, zamene zeonesha kuti enzom’konda. Koma mwana wao eziimba mlandu cifukwa ca vinthu vecicita, ndipo eziona kunkhala wosayenelela kunkhala mwana wao. Ausuwake emumvwila cifundo peciŵauzhya mweenzomvwila. Pavuli pake ausuwake ecitapo kanthu mwa kumulondela osati monga wanchito, koma monga mwana wao. Kuti aoneshe kuti omukonda cendi, em’konzela phwando nomupasa vovwala viweme.

9. Kansi tufunika kunkhala na minkhalidwe yotyani kuti tiyavye ofooka kuwelela kwa Yehova? (Onani bokosi yakuti “ Mwatingayavyile Ŵanthu Ofuna Kuwelela kwa Yehova.”)

⁹ Yehova ali monga ni atata a m’fanizo iyi.  Yove oŵakonda akwasu na azilongosi ndipo ofuna kuti awelele kuli yove. Mwa kutolela cisanzo ca Yehova, tingayavye ŵanthu amene aŵa kuti awelele. Kuti tikwanishe kucita izi, tufunika kunkhala odekha, acifundo koma soti acikondi. Ndaŵa yanji tufunika kuonesha minkhalidwe iyi, ndipo tingacite tyani zamene izi?

10. Ndaŵa yanji tufunika kunkhala odekha kuti tiyavye ayakine kuwelela kwa Yehova?

¹⁰ Tufunika kunkhala odekha cifukwa popita nthawi kuti munthu awelele kwa Yehova. Ŵanthu anyinji amene efookapo olaŵila kuti, akulu na ayakine mumpingo enzoŵatandalila kanyinji akaliyoyamba soti kutumikila Yehova. Kalongosi wa zina yakuti Nancy wa ku Southeast Asia, elaŵila kuti: “Muyangu wa mumpingo eniyavya ngako, ndipo enzonikonda ngako. Enifotokozela nthawi petenzocitila vinthu pamozi, ndipo enzomvwishila modekha ngati nufotokoza mwanumvwila koma soti enzonipasa malangizo. Izi zeonesha kuti enze muyangu cendi wamene ni okonzeka kuniyavya pa nthawi iliyonse.”

11. Ndaŵa yanji tufunikila kunkhala acifundo kuti titonthoze ŵanthu amene ekhumudwa?

¹¹ Cifundo cili monga ni mankhwala amene angayavye munthu wamene ekhumudwa kuti amvwe bwino. Ayakine ankhala ofooka kwa vyaka vinyinji cifukwa cokhumudwishiwa na ayakine mumpingo. Cifukwa ca izi, ofuna lini kuwelela kwa Yehova. Ove oona kuti aliyoŵacitile cilungamo. Tetyo, enzofunika munthu muyakine amene angaŵamvwishile. (Yak. 1:19) Kalongosi María, wamene enze efooka panthawi iyakine elaŵila kuti: “Nenzofunika  munthu wamene anganimvwishile, kunitonthoza nonipasa malangizo aweme amene anganiyavye.”

12. Fotokozani cisanzo coonesha mwamene Yehova odonsela ŵanthu ofooka kuti awelele ku gulu yake.

¹² Baibo yulaŵila kuti cikondi caali naco Yehova pa ŵanthu cili monga ni nthambo. Motyani? Ganizilani kuti muli m’nyanja ndipo mwayamba kumbila, koma munthu muyakine wakuponyelani cinthu kuti cikuyavyeni kuti osati mumbile. Kulaŵila cendi, mungayamikile cifukwa cinthu camene ico cingakuyavyeni. Koma cinthu camene ico tyala cingankhale lini cokwanila kuti mupulumuke. Nayo manzi ni yozizila cakuti mungankhale lini na moyo kwa nthawi itali. Koma ngati ŵanthu ayakine angawele na boti nokuponyelani nthambo mpaka mwafwika m’boti, niye pamungapulumuke. Yehova euzhya Aisiraeli amene enze epatuka kuti: “Nepitilizhya kuŵadonsa na nthambo yacikondi.” (Hos. 11:4) Nangu masiku ŵano Yehova okumvwa cimozimozi ngati ŵanthu aleka kumutumikila, ndipo okumana na mavuto osiyanasiyana. Yove ofuna kuti ŵanthu amene aŵa aziŵe kuti oŵakonda ndipo ofuna kuti awelele kuli yove. Yehova angakuseŵenzesheni kuti muyavye ŵanthu amene aŵa kuona kuti oŵakonda.

13. Kansi cokumana naco ca Pablo cuonesha tyani kuti cikondi cingayavye ayakine kuti awelele kwa Yehova?

¹³ N’cinthu cofunika kuŵasimikizhyila ofooka kuti Yehova na seo tuŵakonda ngako. Mkwasu Pablo wa ku South America wamene enkhala wofooka kwa vyaka vopitilila 30, elaŵila kuti: “Siku iyakine m’mawa, penenzofuma pa ng’anda, nekumana na kalongosi  wacikulile wamene elaŵila nane mwacikondi. Cifukwa ca izi, neyamba kulila monga ni mwana ndipo nemuuzhya kuti cuoneka kuti Yehova niye wakutumani kuti mulaŵile nane. Kufumila nthawi yamene iyo, neganiza zowelela kwa Yehova.”

14. Molingana na fanizo yopezeka pa Luka 15:4, 5, kansi m’ciŵeta ofunika kucitanji ngati waipeza mbelele yesoŵa?

¹⁴ Tufunika kupitilizhya kuyavya ofooka ngati taŵapeza. Molingana na mwana woloŵelela wa m’fanizo ya Yesu, ŵanthu ofooka angovutika mumtima cakuti pangapite nthawi kuti ankhale otang’a mwauzimu. Angankhale ofooka mwauzimu cifukwa ca vinthu vakukumana navo m’calo cino. Tetyo, tufunika kuŵayavya kuti atang’ishe cikhulupililo cao. Mu fanizo ya mbelele yosoŵa, Yesu efotokoza mwamene m’ciŵeta oikila mbelele pa pewa pake noiwezhyela pa gulu ya ziyake. Olo kuti m’ciŵeta waononga nthawi na mphamvu kusakila mbelele yesoŵa, ofunika mphela kuinyamula noitwala kuli ziyake, cifukwa ingakwanishe lini kuyenda yeka kuti ikafwike kuli ziyake.​—Ŵelengani Luka 15:4, 5.

15. Kansi tingaŵayavye tyani ŵanthu efooka kuti awelele kwa Yehova? (Onani bokosi yakuti “ Cida Coyavya.”)

¹⁵ Tufunikila kuseŵenzesha nthawi na mphamvu zasu kuti tiyavye ofooka kuti akwanishe kugonjesa mavuto yakukumana nayo. Koma moyavyiwa na mzimu, Mau ŵake na zofalisa zatulondela, tingaŵayavye kuti ankhale soti otang’a. (Aro. 15:1) Ko tingacite tyani zamene izi? Mkulu muyakine wamene watumikila vyaka vinyinji elaŵila kuti: “Ŵanthu ofooka ngati ofuna kuyamba soti kutumikila  Yehova, ofunika kuphunzila nao Baibo.” * Tetyo, ngati akusengani kuti mukophunzila na wofooka, mufunika kusangalala. Epitilizhya soti kuti “wofalisa wamene wapasiwa mwai wamene uyu, ofunika kunkhala munthu wakuti angamasuke naye.”

16. Kansi tuziŵa tyani kuti angelo angatiyavye posakila ŵanthu efooka?

¹⁶ Pali zocitika zosiyanasiyana zamene zuonesha kuti angelo otiyavya kusakila ŵanthu ofooka amene ofuna kuwelela kwa Yehova. (Chiv. 14:6) Mwacisanzo, mkwasu Silvio wamene onkhala ku Ecuador peenze wofooka, epemphela mofumila pansi pamtima kuti awelele kwa Yehova. Peenzopemphela, akulu aŵili egogoda paciseko. Pa ulwendo wamene uyu, akulu esangalala kuyavya mkwasu wamene uyu kuti awelele kwa Yehova.

17. Ni mapindu otyani yatupeza ngati tayavya munthu wofooka mwauzimu?

¹⁷ Tunkhala osangalala ngako ngati tayavya munthu wofooka mwauzimu kuti awelele kwa Yehova. Onani zakucita Salvador mpainiya wamene oyesayesa mwakhama kuti ayavye ofooka. Eciti: “Nikaona munthu enze wofooka wawelela soti kwa Yehova, misozi yacisangalalo yofuma. Nusangalala ngako poziŵa kuti nuseŵenzela pamozi na Yehova poyavya atumiki ŵake, amene ni amtengo wapatali kuti awelele mumpingo.”​—Mac. 20:35.

18. Ngati nimwe ofooka, kansi mungankhale osimikizhya za cinji?

¹⁸ Ngati mweleka kusonkhana na gulu ya Yehova, mungankhale osimikizhya kuti Yehova okukondani. Ofuna kuti muwelele kuli yove, tetyo mufunika kuyesayesa. Koma molingana na atata a m’fanizo ya Yesu, Yehova okuyembekezelani kuti muwelele, ndipo akulondeleni.