1. Jehofa o ikwa bjang ge nku ya gagwe yeo e bego e timetše e boela go yena?

SEHLOGONG se se fetilego re bone gore Jehofa o itshwantšha le modiši yo mobotse yoo a hlokomelago e nngwe le e nngwe ya dinku tša gagwe. E bile o dira sohle seo a se kgonago go nyaka dinku tšeo di timetšego. Jehofa o ile a botša Baisiraele bao ba bego ba tlogetše go mo hlankela gore: “Boelang go nna, le nna ke tla boela go lena.” Re a tseba gore Jehofa o sa ikwa ka tsela yeo ka gobane o ile a bolela gore: “Ga se ka fetoga.” (Mal. 3:6, 7) Jesu o ile a bolela gore Jehofa le barongwa ba thaba kudu gaešita le ge o tee wa bahlanka ba Jehofa a boela go Yena.—Luka 15:10, 32.

2. Re tlo ithuta’ng sehlogong se?

² Sehlogong se re tlo ithuta ka dipapišo tše tharo tša Jesu tšeo di tlo re bontšhago seo re ka se dirago go thuša bao ba tlogetšego go hlankela Jehofa. Re tlo ithuta le gore re swanetše go ba le dika dife gore re kgone go thuša batho bao ba tlogetšego go hlankela Jehofa gore ba boele go yena. Le gona re tlo ithuta gore ke ka baka la eng go le bohlokwa kudu go thuša batho bao.

3-4. Ke ka baka la’ng mosadi yo go bolelwago ka yena go Luka 15:8-10 a ile a nyaka tšhelete ya gagwe ya tšhipi yeo e bego e timetše?

³ Re swanetše go šoma ka thata go hwetša batho bao ba nyakago go boela go Jehofa. Lengwalong la Luka, Jesu o ile a bolela ka mosadi yo a bego a timeditše tšhelete ya gagwe ya bohlokwa ya tšhipi yeo e bitšwago terakema. Ntlha ya bohlokwa papišong ye ke kamoo mosadi yo a ilego a dira sohle seo a se kgonago go nyakana le tšhelete yeo.—Bala Luka 15:8-10.

⁴ Jesu o ile a bolela gore mosadi yo o ile a ikwa bjang ka morago ga gore a hwetše tšhelete ya gagwe ya tšhipi yeo e bego e timetše. Mehleng ya Jesu, ge mosadi wa Mojuda a be a nyalwa, ka dinako tše dingwe mmagwe o be a mo nea ditšhelete tša tšhipi tša terakema tše lesome. Go ka direga gore mosadi yo go bolelwago ka yena papišong ya Jesu, o be a timeletšwe ke e nngwe ya ditšhelete tšeo a di hweditšego go mmagwe. Mosadi yoo o ile a nagana gore mohlomongwe  tšhelete yeo e ka ba e wetše fase lebatong. O ile a tšhuma lebone a leka go e nyaka eupša a se e bone. Go ka direga gore lebone leo le be le sa mo nee seetša se se lekanego go mo thuša go bona tšhelete yeo e nyenyane ya silifera. Mafelelong o ile a fsiela ntlo ka moka. O ile a hwetša tšhelete ya gagwe ya bohlokwa ditšhileng tšeo a bego a di fsietše. O ile a thaba kudu ka morago ga go e hwetša. Mosadi yoo o ile a bitša bagwera ba gagwe le baagišani go ba botša gore o e hweditše.

5. Ke ka baka la’ng go se bonolo go hwetša batho bao ba tlogetšego go hlankela Jehofa?

⁵ Papišo ye ya Jesu e re ruta gore, gore re hwetše selo seo se timetšego re swanetše go šoma ka thata. Ka mo go swanago, re swanetše go šoma ka thata gore re hwetše batho bao ba tlogetšego go hlankela Jehofa. Ka baka la’ng? Ka gobane ba bangwe ba ka ba ba feditše nako e telele ba tlogetše go hlankela Jehofa. Goba mohlomongwe ba bangwe ba ka ba ba hudugetše lefelong leo go se nago Hlatse ya Jehofa yeo e ba tsebago. Eupša seo re kgodišegilego ka sona ke gore ba bangwe ba batho bao ba tloga ba nyaka go boela go Jehofa. Ba nyaka go hlankela Jehofa le Bakristegotee le bona, eupša ba hloka thušo ya rena gore ba kgone go dira seo.

6. Batho ka moka ka phuthegong ba ka tsenya letsogo bjang go thuša go nyaka bao ba tlogetšego go hlankela Jehofa?

⁶ Ke mang a swanetšego go thuša go nyaka batho bao ba tlogetšego go hlankela Jehofa? Bohle ka phuthegong go akaretša bagolo, babulamadibogo, ba leloko le bagoeledi ba ka thuša go nyaka batho bao. Na go na le motho yo o mo tsebago yo a fodilego moyeng, e ka ba e le wa leloko goba e le mogwera? O swanetše go dira’ng ge o ka kopana le motho yo a fodilego moyeng ge o le tšhemong goba o bolela ditaba tše dibotse mafelong a batho bohle? Hlalosetša motho yoo gore ge e ba a ka rata gore bagolo ba mo etele, o tla ba nea aterese ya gagwe goba nomoro ya gagwe ya founo.

7. O ithuta’ng go seo mogolo yo a bitšwago Thomas a se dirago?

⁷ Ka ge bagolo e le bona ba nago le boikarabelo bjo bogolo bja go thuša batho bao ba fodilego moyeng go boela go Jehofa, ke dilo dife tšeo ba ka di dirago go ba hwetša? Ekwa seo mogolo yo a bitšwago Thomas * a se dirago. Ngwanabo rena Thomas o dula Spain, e bile o ile a thuša batho ba fetago 40 gore ba boele go Jehofa. Thomas o itše: “Sa pele, ke botšiša bana babo rena le dikgaetšedi ge e ba ba tseba moo motho yo a fodilego moyeng a dulago gona. Goba ke ba botšiša ge e ba ba tseba mogoeledi yo a se sa tlago dibokeng. Ba bantši ka phuthegong ba thabela go thuša ka ge ba tseba gore ba tsenya letsogo go nyakeng motho yoo. Ge ke etetše bana babo rena le dikgaetšedi bao ba fodilego moyeng, ke ba botšiša ka bana ba bona le ba meloko ya bona. Ba bangwe ba batho bao ba fodilego moyeng ba be ba tlwaetše go tla le bana ba bona dibokeng, e bile go ka direga gore bana bao e kile ya ba bagoeledi. Le bona re ka ba thuša go boela go Jehofa.”

8. Papišong ya morwa wa lehlaswa yeo e lego go Luka 15:17-24, tate o ile a swara bjang morwa wa gagwe yo a bego a itshola?

⁸ Re swanetše go ba le dika dife gore re kgone go thuša batho bao ba fodilego moyeng gore ba boele go Jehofa? Re ka ithuta’ng papišong ya Jesu ya morwa wa lehlaswa. (Bala Luka 15:17-24.) Jesu o hlalosa kamoo morwa yoo mafelelong a ilego a itshola gomme a dira phetho ya go boela gae. Tate o ile a kitimela morwa wa gagwe ke moka a mo gokarela a mo kgonthišetša gore o a mo rata. Morwa yo o be a ikwa a le molato kudu, e bile a ikwa eka ga a sa swanelwa go bitšwa morwa. Tate yoo o ile a kwela morwa wa gagwe bohloko ge a be a mmotša gore o ikwa bjang. O ile a bontšha ka ditiro gore o amogela morwa wa gagwe, le gona o ile a mo amogela bjalo ka morwa e sego bjalo ka mothwalwa. Tate yoo o ile a  bontšha gore ka nnete o amogela morwa wa gagwe, ka go mo direla monyanya o mogolo le go mo nea seaparo se sebotse.

9. Re swanetše go ba le dika dife e le gore re kgone go thuša batho bao ba fodilego moyeng gore ba boele go Jehofa? (Bona lepokisi leo le rego, “ Re ka Dira Eng go Thuša Batho Bao ba Fodilego Moyeng?”)

⁹ Jehofa o swana le tate wa papišong ye ya morwa wa lehlaswa. O rata bana babo rena le dikgaetšedi bao ba fodilego moyeng e bile o nyaka ba boela go yena. Ge re ka ekiša Jehofa, re ka kgona go thuša batho bao go boela go yena. Gore re kgone go ba thuša, re swanetše go se ba felele pelo, re ba kwele bohloko, re be re ba bontšhe gore re a ba rata. Ke ka baka la’ng re swanetše go bontšha dika tše, gona re ka dira seo bjang?

10. Ke ka baka la’ng re sa swanela go felela motho pelo ge re mo thuša go boela go Jehofa?

¹⁰ Ga se ra swanela go fela pelo ka gobane go ka tšea motho nako go boela go Jehofa. Batho ba bantši bao ba bego ba fodile moyeng ba re bagolo le ba bangwe ka phuthegong ba ile ba swanelwa ke go ba etela gantšinyana pele ba ka boa ka phuthegong. Kgaetšedi Nancy wa kua Asia o ngwadile gore: “Mogwera wa ka yo mogolo wa ka phuthegong o ile a nthuša kudu. O be a le bjalo ka sesi go nna. O ile a nkgopotša ka dilo tše dibotse tšeo re ipshinnego ka tšona nakong ya ge ke be ke sa le ka phuthegong. O be a ntheetša ka go se mphelele pelo ge ke dutše ke mmotša maikwelo a ka, e bile o be a sa tšhabe go nnea keletšo. O ile a mpontšha gore e tloga e le mogwera wa kgonthe, e bile o ikemišeditše go nthuša ka dinako tšohle.”

11. Ke ka baka la’ng re swanetše go ba le kwelobohloko gore re kgone go thuša motho yo a kwelego bohloko?

¹¹ Ge motho a kwele bohloko, go ka swana le ge a tšwile ntho e bohloko, bjale kwelobohloko e swana le sehlare seo se thušago motho yo go fola. Ba bangwe ba batho bao ba fodilego moyeng  ga e sa le ba kgopišwa kgale ke motho yo mongwe ka phuthegong, gomme seo se sa ba kweša bohloko. Go ka direga gore seo ke sona se ba paledišago go boela go Jehofa. Ba bangwe ba ka ikwa eka ba ile ba swarwa ka go hloka toka. Ba ka ba ba hloka motho yo a ka ba theetšago gabotse le go kwešiša kamoo ba ikwago ka gona. (Jak. 1:19) Kgaetšedi María yo a kilego a fola moyeng o re: “Ke be ke hloka motho yo a ka ntheetšago, yo nka llelago go yena, motho yo a ka nkhomotšago le go nthuša.”

12. Lerato la Jehofa le swana bjang le thapo? Nea mohlala.

¹² Beibele e swantšha lerato la Jehofa le thapo. Lerato la Jehofa le swana bjang le thapo? Ka mohlala, nagana o wetše ka lewatleng. Go na le maphoto a magolo, meetse a gona a a tonya e bile o kgauswi le go nwelela. Ke moka motho yo a lego ka sekepeng seo se lego kgauswi le wena, o go lahlela selo se sengwe gore o itshwareletše ka sona gore o se ke wa nwelela. O go thušitše, eupša ga se gwa felela moo, o sa hloka thušo e nngwe. O swanetše go tšwa ka meetseng ao. Ka gona go nyakega gore batho bao ba lego ka sekepeng ba go fošetše thapo gomme ba go thuše go tšwa ka meetseng. Ka mo go swanago, ge Jehofa a be a bolela ka Baisiraele bao ba tlogetšego go mo hlankela o ile a re: ‘Ke ile ka dula ke ba goga ka dithapo tša lerato.’ (Hos. 11:4) Jehofa o sa ikwa ka tsela e swanago ka bao ba tlogetšego go mo hlankela lehono, bao ba imelwago ke mathata le dipelaelo. O nyaka ba tseba gore o a ba rata, e bile o nyaka go ba thuša go boela go yena. Jehofa a ka diriša wena go thuša batho bao ba fodilego moyeng go bona gore o a ba rata.

13. Phihlelo ya Pablo e bontšha bjang gore ge e ba re bontšha gore re rata ba bangwe, seo se ka ba thuša go boela go Jehofa?

¹³ Go bohlokwa kudu gore re dule re botša batho bao ba fodilego moyeng gore Jehofa o a ba  rata, le gore le rena re a ba rata. Pablo yoo go boletšwego ka yena sehlogong se se fetilego, o ile a fetša mengwaga e fetago e 30 a fodile moyeng. O itše: “Mesong e mengwe ge ke etšwa ka ntlong ke ile ka kopana le kgaetšedi yo mongwe yo a tšofetšego. Kgaetšedi yo o be a le botho e bile o ile a boledišana le nna gabotse kudu. Ke ile ka thoma go lla bjalo ka ngwana. Ke ile ka mmotša gore ke bona eka ke Jehofa yo a mo rometšego go nna. Ka nako yeo ke ile ka ipotša gore ke boela go Jehofa.”

14. Go ya ka papišo yeo e lego go Luka 15:4, 5, modiši o ile a dira’ng ka morago ga gore a hwetše nku ya gagwe yeo e bego e timetše?

¹⁴ Re swanetše go dula re thuša le go kgothatša batho bao ba fodilego moyeng. Go swana le morwa wa lehlaswa, batho bao ba fodilego moyeng ba ka tšea nako e telele gore ba fole bohloko bjo ba bo kwago. Le gona ka ge ba be ba le ka ntle ga phuthego, go ka direga gore segwera sa bona le Jehofa ga se sa swana le mathomong. Re swanetše go ba thuša go lokiša segwera sa bona le Jehofa. Papišong ya nku yeo e timetšego, Jesu o ile a bolela gore modiši o ile a e rwala a e bea magetleng a gagwe ke moka a e bušetša mohlapeng. Modiši yo o be a feditše nako e bile a dirišitše matla a gagwe gore a kgone go hwetša nku e timetšego. Ka ge modiši yo a be a tseba gore nku yeo e ka se kgone go boela mohlapeng ka boyona o ile a e rwala gomme a e thuša.—Bala Luka 15:4, 5.

15. Re ka thuša bjang batho bao ba fodilego moyeng bao ba nyakago go boela go Jehofa? (Bona lepokisi leo le rego, “ Sedirišwa sa Bohlokwa Kudu.”)

¹⁵ Re ka swanela ke go ipha nako le go diriša matla a rena go thuša batho bao ba fodilego moyeng go fenya mafokodi ao a ba paledišago go boela go Jehofa. Moya wa Jehofa, Lentšu la Gagwe gotee le dikgatišo tša mokgatlo, di ka re thuša  gore re kgone go matlafatša batho bao ba fodilego moyeng. (Baroma 15:1) Re ka dira seo bjang? Mogolo yo mongwe yo a nago le phihlelo o re: “Batho ba bantši bao ba fodilego moyeng ge ba dira phetho ya gore ba nyaka go hlankela Jehofa gape ba swanetše go swarelwa thuto ya Beibele.” * Ka gona, ge o kgopelwa gore o badiše motho yo a fodilego moyeng, amogela seo ka diatla tše pedi. Mogolo yoo o ile a bolela le gore: “Motho yo a badišago motho yo a fodilego moyeng, o swanetše go dira gore motho yoo a mo tshepe e bile a kgone go mo ntšhetša sa mafahleng.”

16. Re tseba bjang gore barongwa ba tla re thuša?

¹⁶ Go na le diphihlelo tše dintši tšeo di bontšhago gore barongwa ba re thuša go hwetša batho bao ba fodilego moyeng bao ba nyakago go boela go Jehofa. (Kut. 14:6) Ka mohlala, ngwanabo rena Silvio wa kua Ecuador, o ile a rapela Jehofa gore a romele motho yo a ka mo thušago go boela ka phuthegong. Ge a sa le gare a rapela, batho ba ile ba kokota mojako. Bagolo ba babedi ba be ba mo etetše. Bagolo bao ba ile ba thabela go mo thuša go boela go Jehofa.

17. Re hwetša moputso ofe ge re thuša batho bao ba fodilego moyeng go boela go Jehofa?

¹⁷ Re tlo thaba kudu ge re thuša batho bao ba fodilego moyeng go boela go Jehofa. Ka mohlala, ngwanabo rena Salvador yo e lego mmulamadibogo yo a dirago maiteko a magolo go thuša batho bao ba fodilego moyeng o itše: “Ka dinako tše dingwe, ke palelwa ke go thibela megokgo ya lethabo. Ke thaba kudu go šoma gotee le Jehofa go thuša le ge e ka ba o tee wa bahlanka ba gagwe go boela ka phuthegong.”—Dit. 20:35.

18. Ge e ba o fodile moyeng, ke’ng seo o swanetšego go kgodišega ka sona?

¹⁸ Ge e ba o fodile moyeng, kgodišega gore Jehofa o sa go rata. O nyaka gore o boele go yena. O swanetše go dira maiteko gore o boele go yena. Go swana le tate wa papišong ya morwa wa lehlaswa, Jehofa o emetše gore o boele go yena e bile o tlo go amogela ka diatla tše pedi.