ONTHELE YOKULILONGESWA 26
“Kondokei ku Ame”
“Kondokei ku ame, na ame mandyikondoka ku onwe.” — MAL. 3:7.
OTYIIMBO 102 “Kuateseiko Vana Vahapamene”
ETYI MATULILONGESA *
1. Siovaa ukala ñgeni tyina ongi yae yayekele-ko okuivisa nokuenda komaliongiyo yamakondoka kwe?
MONTHELE yokualamba tuelilongesile okuti Siovaa ulieleka nomunthita ulisa nawa onongi mbae. Wovola mbokuavomba. Pena omuvo umwe ova Isilayeli vayekelepo Siovaa. Ngwe evepopila okuti: “Kondokei ku ame, na ame mandyikondoka ku onwe.” Tutyii okuti na hono Siovaa ongotyo elitehelela, mokonda omukanda wa Malaquias 3:6, 7 upopia okuti Siovaa kapiluluka. Sesusi wapopile okuti Siovaa uhambukwa unene tyina amona omuumbili wae ukondoka kwe. No noandyu mbuhambukilwa kumwe na Siovaa. — Luka 15:10, 32.
2. Oityi matulilongesa monthele ei?
2 Matulilongesa ononthengele-popia ononthatu Sesusi apopile, mambutukuatesako okunoñgonoka etyi tuesukisa okulinga tyina tukuatesako omunthu wayekapo Siovaa. Tupu matulilongesa ovituwa vimwe tuesukisa okukala navio, opo tukuateseko vokuayekapo okuivisa nokuenda komaliongiyo. Konyima atupopi ehambu tukala nalio tyina tukuatesako omunthu okukondoka ku Siovaa.
OVOLA OMBONGO YOTYIVELA YAVOMBA
3-4. Omokonda yatyi omukai wapopiwa mu Luka 15:8-10, aovolele unene ombongo yae?
3 Tuesukisa okulinga ononkhono opo tuvase vana vahanda okukondoka ku Siovaa. Monthengele-popia imwe ivasiwa momukanda wa Luka, Sesusi wapopia omukai umwe wavombesa ombongo yae yotyivela itiwa ondalakima. Otyipuka tuhanda vali monthengele-popia oyo, ombili omukai oo akala nayo pokuovola ombongo yae. — Tanga Luka 15:8-10.
4 Sesusi wapopia oñgeni omukai oo akala etyi avasa ombongo yae. Etyi eivombesa, asoko okuti hamwe yatokela pohi. Ayakesa okandiyelo, mahi nii eheivasi. Tyafuile otyitei tyatyo ankho katyihi. Pahe asoko okukomba ondyuo aiho. Pokukomba, ombongo eivasi. Omutima wae aukondoka pomphangu! Ahambukwa unene, aihana omapanga ae, no vomunthele yae. Mahi omokonda yatyi elitehelela ngotyo? Pononthiki mba Sesusi, tyina omuhikuena anepwa, me yae ankho umuavela onombongo ekwi mbovivela mbutiwa ondalakima. Tyafuile, ombongo oyo yavomba ponombongo mbuna apelwe na me yae monthiki anepwa.
5. Omokonda yatyi pamwe tyipuiyila okuvasa omunthu wayekapo okuivisa nokuenda komaliongiyo?
5 Onthengele-popia oyo, ilekesa nawa okuti katyapepukile okuvasa otyipuka tyavomba. Tyesukisa okulinga ononkhono. Tupu otyo tuesukisa okulinga tyina tuovola vana vayekapo okuivisa nokuenda komaliongiyo. Hamwe pakala-le omanima omanyingi tunde apa vayekapo Siovaa. Ine hamwe vailukila kotyilongo otyikuavo, ngwe ovakuatate kavevei. Mahi tutyii okuti pahetyino ñga, ovakuatate ovanyingi vayekapo okuivisa nokuenda komaliongiyo, vahanda okukondoka ku Siovaa. Vahanda umwe okuliwaneka no onthue, mahi aveke kavetyivili. Tuesukisa okuvekuatesako.
6. Oñgeni atuho mewaneno tupondola okukuatesako okuvasa vana vayekapo okuivisa nokuenda komaliongiyo?
6 Mahi olie upondola okuvekuatesako okukondoka ku Siovaa? Aveho mewaneno vapondola okuvekuatesako, okukutikinyamo ovakulu vewaneno, novakokoli-ndyila, nombunga yae. Okuti una epanga ine ombunga yove wayekapo Siovaa? Oityi molingi inkha nthiki imwe movilinga viokuivisa ulivasa nomunthu wayekapo Siovaa? Upondola okumupula apa akala, nokumuita ombalulo yotelefone yae, oyavela ovakulu vewaneno lienyi.
7. Oityi welilongesila ku etyi Tomasi ehole okulinga?
7 Oityi ovakulu vewaneno vapondola okulinga opo vavase vana vahanda okukondoka ku Siovaa? Omukuatate umwe omukulu wewaneno ukala ko Espanha utiwa o Tomasi, * wakuatesako-ale ovanthu valamba po 40 okukondoka ku Siovaa. Wapopia etyi ehole okulinga. Wati: “Tete, ndyipula ovakuatate mewaneno inkha pena ou wii oku ovanthu ovo vakala pahe. Tupu pamwe ndyipula ovaivisi ine vahinangela omukuatate umwe wayekapo okuya komaliongiyo. Ovanyingi vakumbulula nawa mokonda navo vahanda okukuatesako okuvevasa. Tyina namaende-ko, ndyivepula oñgeni ovana vavo vekahi no vakuavo vali. Vamwe ankho vatuala ovana avo komaliongiyo. Ovana vamwe atee umwe vehikile kokukala ovaivisi. Navo vapondola okukuatesuako okukondoka ku Siovaa.”
ETEI OVANA VA SIOVAA MEWANENO
8. Monthengele-popia ya Sesusi ikahi mu Luka 15:17-24, oñgeni he alingile omona wae welivela?
8 Ovituwa patyi tuesukisa okukala navio opo tutyivile okukuatesako vana vahanda okukondoka ku Siovaa? Tala etyi tupondola okulilongesila konthengele-popia ya Sesusi yomona watunda meumbo. (Tanga Luka 15:17-24.) Sesusi wapopia etyi tyalundile omona okulivela akondoka meumbo lya he. Etyi ehika, tate yae emuhatekela, emuhumbakana. Ankho uhanda omona wae ahinangele okuti umuhole. Omona elitehelela omapita, apopi okuti ñgeno ukala vala omupika wa he. Etyi apopia ngotyo, he emuetesila-mo okankhenda, alingi ovipuka vimwe opo omona wae atule omutima. Mongeleka, emuavela ovikutu ovipe, emulingila-po otyipito. Walinga ngotyo opo omona ehelitale okuti omupika.
9. Ovituwa patyi tuesukisa okukala navio pokukuatesako vana vayekapo okuivisa nokuenda komaliongiyo? (Tala okakasa kati: “Oñgeni Tupondola Okukuatesako Vana Vahanda Okukondoka ku Siovaa?”)
9 Siovaa ukahi nga he wapopiwa monthengele-popia oyo. Uhole unene ovakuatate vetu no nomphange vayekapo okuivisa nokuenda komaliongiyo, iya uhanda vakondoke. Onthue matutyivili okuvekuatesako inkha tuhetekela Siovaa. Tuesukisa okupwa-elundo navo nokukala nokankhenda navo noluembia. Omokonda yatyi tuesukisila ovituwa ovio pokukuatesako vakuetu okukondoka ku Siovaa?
10. Omokonda yatyi tuesukisila okupwa-elundo tyina tukuatesako vakuetu okukondoka ku Siovaa?
10 Tuesukisa okupwa-elundo mokonda tyesukisa omuvo opo omunthu akondoke ku Siovaa. Ovanyingi vayekelepo okuivisa nokuenda komaliongiyo, vapopia okuti vakondoka vala etyi vakuatesuako ehimbwe novakulu vewaneno, novakuatate ovakuavo. Omphange umwe ukala ko Asia utiwa Nancy, wahoneka okuti: “Ndyina epanga liankhuatesileko okukondoka. Unthyole unene, uti hamwe omukulu wange. Wanthyinangelesile ovipuka ovinyingi tualingile nae, anthehelela nawa tyina ndyipopia etyi tyikahi momutima wange, ehelikondola okumphopila etyi ndyina okulinga. Ovipuka alinga, vilekesa nawa okuti epanga ewa, likuatesako momuvo wovitateka.”
11. Omokonda yatyi tuesukisila okankhenda opo tukuateseko omunthu wanumana?
11 Okankhenda kekahi ngotyihemba. Kapondola okuhakula omutima weihamenwa. Vamwe vayekapo Siovaa mokonda yokuanumanena umwe mewaneno. Pamwe na hono otyo velitehelela ngotyo. Onkhongo oyo, ikahi ngotyimato tyaya peulu tyivetyika okukondoka ku Siovaa. Hamwe velitehelela okuti valingwa onya. Ngotyo, vesukisa omunthu uvetehelela nawa tyina vapopia, eveetehila-mo okankhenda. (Tia. 1:19) Omphange umwe wayekelepo Siovaa utiwa o María, wati: “Ankho nesukisa omunthu unthehelela nawa, unkhengelela iya umphakaila-mo.”
12. Omokonda yatyi oluembia lwa Siovaa luelekelwa nepanda? Popia ongeleka.
12 Ombimbiliya yeeleka oluembia Siovaa ena novanthu vae nepanda. Omokonda yatyi? Soka ñgeno ukahi nokuyauka ondongi yeyula, omaande ahimbika okukutuala. Epanga liove, mukahi nokuenda nae, ekuyumbila epanda. Okuti epanda lituuka? Au. Wesukisa okukunanena liwa koluhimba opo uhankhie. Siovaa wapopilile ova Isilayeli ankho vemuyekapo okuti: ‘Natualako okuvenana nomapanda oluembia.’ (Osé. 11:4) Na hono Siovaa otyo alinga vana vemuyekapo. Uvenana mokonda vekahi nokutyindwa nomaande, ine ovitateka viouye uno. Uhanda vahinangele okuti uvehole iya uhanda vakondoke kwe. Olie Siovaa apondola okutuma opo alekese okuti uhole vana vemuyekapo? Ove yatyo.
13. Popia ongeleka ilekesa okuti okukala noluembia na vakuetu tyipondola okuvelunda okukondoka ku Siovaa.
13 Ovakuatate vayekapo okuivisa nokuenda komaliongiyo, vesukisa okuhinangeleswa apeho okuti, onthue na Siovaa tuvehole unene. Pablo, wapopiwa monthele yokualamba, wakalele omanima alamba po 30 tyihaivisa nokuenda komaliongiyo. Wati: “Nthiki imwe komuhuka, atuhonyena nomphange umwe omukulukai. Amphopila monkhalelo yentyika komutima. Omukulukai una ankho ukahi nawa. Andyihimbika okulila ngomona. Andyimupopila okuti tyafuile o Siovaa wekutuma. Okutuka opo, andyitokola okukondoka ku Siovaa.”
KUATESAKO VANA VASOYA
14. Monthengele-popia tuvasa mu Luka 15:4, 5, oityi omunthita alinga etyi avasa ongi?
14 Tyina tuamavasi vana vayekapo okuivisa nokuenda komaliongiyo, tuesukisa okutualako okuvekuatesako. Hamwe velitehelela omapita ngomona omupeseli. Tupu vetupu oupanga omuwa na Siovaa mokonda ankho veli mouye wa Satanasi. Ngotyo, tuesukisa okuvekuatesako okupameka ekolelo liavo. Monthengele-popia yongi yavomba, Sesusi wapopia etyi omunthita alinga etyi eivasa. Weikuata, eipake potyipepe, eituala mohambo (otyunda). Tala okuti omunthita walinga-le ononkhono mbokuovola ongi atee eivasa. Mahi wamona okuti otyo vala katyituuka. Wamona okuti yesukisa okutyindwa, mokonda kaityivili okukondoka vala aike. Ngatyo umwe alinga. — Tanga Luka 15:4, 5.
15. Oñgeni tupondola okukuatesako vana vahanda okukondoka ku Siovaa? (Tala okakasa kati: “ Otyiti Tyikuatesako Unene.”)
15 Pamwe vana vokuayekapo okuivisa nokuenda komaliongiyo, vena ovipuka vimwe vivetyilika okukondoka. Opo tuvekuateseko okukala vali noupanga omuwa na Siovaa tyesukisa omuvo, nononkhono. Siovaa metulekesa oñgeni tyilingwa pokati kononkhono mbae, Nondaka yae, nomikanda tupewa neongano liae. (Loma 15:1) Omukulu umwe wewaneno uhole okukuatesako vakuavo okukondoka ku Siovaa, wati: “Ovanyingi vokuhanda okukondoka meongano, vesukisa okulongeswa vali Ombimbiliya.” * Ngotyo, inkha ovakulu vewaneno vekuita ulongese omukuatate ine omphange wayekelepo okuivisa nokuenda komaliongiyo, uhaanye. Omukulu wewaneno oo, wayawisako okuti: “Omuivisi memulongesa, una okukala omunthu uyumbwa onthumbi opo etyivile okumupopila onkhalelo elitehelela.”
EHAMBU KEULU NA PANO POHI
16. Oñgeni tutyii okuti onoandyu mbutukuatesako?
16 Kuna onongeleka ononyingi mbulekesa okuti onoandyu mbutukuatesako okuvasa ovakuatate vahanda okukondoka ku Siovaa. (Ehol. 14:6) Mongeleka, Silvio ukala ko Ecuador, welikuambelele opo Siovaa emukuateseko okukondoka kwe. Puetyi ankho ekahi nokulikuambela, ovakulu vewaneno vevali, avatotola pepito liae. Avatomphola nae, avemupopila etyi esukisa okulinga opo akondoke.
17. Oñgeni tukala tyina tukuatesako vana vayekapo okuivisa nokuenda komaliongiyo?
17 Okukuatesako omunthu okukondoka ku Siovaa, otyipuka tyihambukiswa unene. Otyo tyapopia omukokoli-ndyila umwe uhole okukuatesako vakuavo okukondoka ku Siovaa, utiwa o Salvador. Wati: “Pamwe ndyitokesa umwe ononkhuka! Tyinthyambukiswa unene okunoñgonoka okuti nakuatesako Siovaa okuyovola vali imwe ponongi mbae mouye wa Satanasi.” — Ovil. 20:35.
18. Inkha wayekapo okuivisa nokuenda komaliongiyo, oityi wesukisa okuhinangela?
18 Inkha wayekapo okuivisa nokuenda komaliongiyo, hinangela okuti Siovaa nkhele ukuhole unene iya uhanda ukondoke kwe. Pena ovipuka vimwe mosukisa okulinga opo ukondoke. Mahi uhalimbueko okuti Siovaa ukahi nga he una Sesusi apopile monthengele-popia yae. Ukahi vala nokukevelela onthiki mokondoka na ekuliepese nawa.
OTYIIMBO 103 Ovanthita Vetu Otyiawa Tuapewa na Huku
^ pal. 5 Siovaa uhanda vana vayekapo okuivisa nokuenda komaliongiyo vakondoke kwe. Tuna ovipuka ovinyingi tupondola okulinga opo tukuateseko ovanthu ovo okutavela etyi Siovaa evekonga okuti: “Kondokei ku ame.” Monthele ei, matulilongesa ovipi ovipuka ovio.
^ pal. 7 Omanyina amwe apilululwa.
^ pal. 15 Vamwe otyipuka tyipondola okuvekuatesako, okuvelongesa ovikapitulu vimwe viomukanda Oñgeni Motualako Okukala Mohole ya Huku? Ovakuavo, okulilongesa ovikapitulu vimwe viomukanda Achegue-se a Jeová (mo putu). Ovakulu vewaneno, ovo mavapopi olie memulongesa.
^ pal. 68 ONONDAKA MBOKUHANGUNUNA OLUTALATU: Ovakuatate vetatu vekahi nokukuatesako omukuatate wayekapo okuivisa nokuenda komaliongiyo. Wo tete, ukahi nokumuhonekela mo telefone. Wa vali, ukahi nokumulekesa okuti wesuka nae. Wa tatu, ukahi nokumutehelela nawa.
