Nkhani Yakupfunza 26
‘Bwererani kwa Ine’
‘Bwererani kwa ine, ndipo inepano nin’dzabwererambo kwa imwepo.’—MALAKIYA 3:7.
NYIMBO 102 Timbathandize Wale Omwe Mbakutepa
BZOMWE TIN’PFUNZA *
1. Kodi Yahova ambabva tani akawona kuti m’bodzi wa atumiki wace abwerera kwa iye?
NINGA momwe tawonera mu nkhani yapitayi, Yahova akubzindendemezera na makabusa wabwino omwe ambasamalira mabira yace mwalufoyi. Ndipo iye ambanyang’ana bira ali-wentse omwe wasiyana na mabira yanzace. Yahova adauza Ajirayeri omwe adasiya kumutumikira kuti: ‘Bwererani kwa ine, ndipo inepano nin’dzabwererambo kwa imwepo.’ Ifepano timbadziwa kuti iye alibe kucinja makumbukidwe yace thangwe ambatitsimikizira kuti: ‘Ndiribe kucinja.’ (Malakiya 3:6, 7) Jezu adalewa kuti Yahova pabodzi na anjo ambakomedwa kwene-kwene akawona kuti m’bodzi wa atumiki wa Yahova omwe akhadataika abwerera m’gulu lace.—Luka 15:10, 32.
2. Kodi mu nkhani ino tin’pfunza ciyani?
2 Bziratizo bzitatu bza Jezu bzimbawonesa momwe tingathandizire wale omwe asiya kutumikira Yahova. Mu nkhani ino tin’pfunza bziratizobzo ndipo tiniwona makhalidwe yanango yomwe tikufunikira kuti tithandize abale wathu omwe adjedjera mwauzimu kuti abwerere kwa Yahova. Tiniwonambo thangwe race kucita bzimwebzi kungakhale kwa phindu kwa abale wathuwo.
KUNYANG’ANA KOBIRI YAKUTAIKA
3-4. Thangwe ranyi mkazi wakufotokozedwa pa Luka 15:8-10, akhafunika kucita nyongo kwene-kwene kuti agumane kobiri yomwe akhadataya?
3 Ifepano tin’funika kucita nyongo kuti tigumane wale omwe akufuna kubwerera kwa Yahova. Mu bukhu la Luka, Jezu adafotokoza ciratizo ca mkazi omwe akhadataya kobiri ya drakima. Ndipo kobiriyo ikhali yakufunika kwene-kwene kwa iye. Mbali yakufunika kwene-kwene ya ciratizoci, ikhali yakuti mkaziyo adacita nyongo kuti agumane kobiriyo.—Werengani Luka 15:8-10. *
4 Jezu adafotokoza momwe mkaziyo adabvera pomwe adagumana kobiri yaceyo. Mu nthawe ya Jezu, akazi nthawe zinango akhapasidwa na azimai wawo kobiri 10 za drakima pa ntsiku ya malowozi yawo. Kobiri yomwe mkazi wa mu ciratizoco adataya pinango ikhali ibodzi mwa kobiri zomwe akhadapasidwa na mai wace. Mkaziyo akhana citsimikizo centse kuti kobiriyo ikhadagwa pantsi. Tenepo, iye adagasa mbvuniko aciinyang’ana, koma alibe kuigumana. Ceza ca mbvunikoyo cikhalibe mphanvu kuti cibvunike mpaka kobiriyo kuwoneka. Pakumalizira, mkaziyo adapsaira m’nyumba mwentse. Pomwe akhapsaira adawona cinthu cikuyetima pa mataka yomwe iye akhadagwezeka, ndipo cinthuco ikhali kobiri yomwe akhainyang’ana. Iye adakomedwa kwene-kwene pomwe adaigumana. Tenepo, iye adacemera axamwali na avizinyu wace aciwauza kuti wagumana kobiri yomwe akhadaitaya.
5. Thangwe ranyi bzingakhale bzakunesa kugumana omwe adadjedjera mwauzimu?
5 Ninga momwe tawonera mu ciratizo ca Jezu, kuti tigumane cinthu comwe cataika timbafunika kucita nyongo. Ifepano tin’funika kucitambo nyongo kuti tigumane abale na mpfumakazi omwe adadjedjera mwauzimu. Pinango papita magole mazinji pomwe iwo adaleka kuyenda ku mitsonkhano. Ndipo pinango iwo adafuluka aciyenda kukakhala ku mbuto inango ndipo kumweko ambadziwika lini na abale. Pomwe tikulewa pano, winango mwa abale omwe adadjedjera mwauzimuwa akufuna kubwerera kwa Yahova. Iwo akufuna kutumikira pomwe Yahova pabodzi na abale na mpfumakazi zawo, koma angakwanise lini kucita bzimwebzi tikasaya kuwathandiza.
6. Kodi ni mbani omwe anganyang’ane omwe adadjedjera mwauzimu, ndipo angacite tani?
6 Kodi ni mbani omwe anganyang’ane omwe adadjedjera mwauzimu? Apalizi wentse wa m’gwere angathandize kunyang’ana omwe adadjedjera mwauzimu, kuyambira akulu wa gwere, apainiya na wa m’banja la munthu wakudjedjerayo. Kodi imwepo muna xamwali ayai m’bale wanu omwe adadjedjera mwauzimu? Kodi mungacite ciyani mukagumana na munthu wakudjedjera mwauzimu pomwe mukupalizira nyumba na nyumba ayai mukupalizira mu nsewu? Mubvunzeni penu angafune kuzungiridwa ndipo muuzeni kuti mun’dzakomedwa kwene-kwene kuuza akulu wa gwere bza nkhaniyo.
7. Kodi mukupfunza ciyani na bzomwe mkulu wa gwere wakucemeredwa Thomas ambacita?
7 Kodi akulu wa gwere angacite tani kuti agumane wale omwe akufuna kubwerera kwa Yahova? Onani bzomwe Thomas, * omwe ni mkulu wa gwere wa ku Espanha ambacita kuti athandize abale omwe adadjedjera mwauzimu. Ndipo iye wathandiza kale abale wakupirira 40 kubwerera kwa Yahova. Iye adati: “Cakuyamba, nimbabvunza abale wakusiyana-siyana kuti ndibve penu iwo akudziwa komwe ambakhala abale omwe adjedjera mwauzimu. Ayai nimbabvunza abalewo kuti ndidziwe penu alipo m’bale omwe waleka kutsonkhana. Abale azinji ambakomedwa kwene-kwene thangwe ambabzibva kuti akuthandizirambo pa kunyang’ana abale wakutaikawo. Ndipo ndikazungira m’bale omwe adadjedjera mwauzimu, nimbamubvunza kuti andifototokozere momwe aliri wana wace na abale wace winango. Abale winango pomwe akhanati kudjedjera mwauzimu, akhayenda ku mitsonkhano na wana wawo, ndipo pinango wanawo adafika pakukhala apalizi. Tenepo, wanawo angafunikembo kuthandizidwa kuti abwerere kwa Yahova.
KODI TINGATHANDIZE TANI WANA KUTI ABWERERE KWA YAHOVA?
8. Mwakubverana na Luka 15:21-24, kodi baba adalatiza tani kuti akhafuna mwana wace omwe akhadakungula?
8 Kodi tin’funika kukhala na makhalidwe yaponi kuti tithandize wale omwe akufuna kubwerera kwa Yahova? Onani bzomwe tingapfunze na ciratizo ca Jezu cakulewa bza mwana omwe adacoka pamui. (Werengani Luka 15:21-24. *) Jezu adafotokoza bzomwe bzidacitika na mwanayo pomwe adagumana na mabvuto acikhumba kubwerera kumui. Baba wace adamuthamangira ndipo adamukumbatira mwamphanvu, bzomwe bzidalatiza kuti akhamufuna mwanayo. Mwanayo adabzipasa mulandu ndipo adakumbuka kuti akhathemera lini pomwe kuwonedwa ninga mwana wa pamuipo. Iye adafotokozera baba wacewo momwe akhabvera ndipo babayo adamubvera ntsisi ndipo adalatizambo kuti akhabvesesa bzomwe bzikhadacitika na mwanayo. Tenepo babayo adacita bzinthu bzinango bzomwe bzidalatiza mwanayo kuti adamutambira na manja mawiri, sikuti ninga nyabasa koma ninga mwana omwe ambamufuna. Kuti alatize kuti ambamufuna, babayo adakonzera madyo mwana wace wakukungulayo ndipo adamupasa bzakubvala bzabwino kuti abvale.
9. Kodi tin’funika kukhala na makhalidwe yaponi kuti tithandize wale omwe akufuna kubwera kwa Yahova? (Onani kwadru yakuti “ Kodi Tingathandize Tani Wale Omwe Akufuna Kubwerera kwa Yahova?”)
9 Yahova ali ninga baba wa mu ciratizoci. Iye ambafuna abale na mpfumakazi zathu ndipo akufuna kuti iwo abwerere kwa iye. Ifepano tikatewezera Yahova tin’dzathandiza abalewo kubwerera kwa iye. Kuti bzimwebzi bzikwanisike tin’funika kukhala wakupirira, wa ntsisi na walufoyi. Thangwe ranyi tin’funika kumbalatiza makhalidwe yamweya ndipo tingayalatize tani?
10. Thangwe ranyi tin’funika kukhala wakupirira tikambathandiza munthu kuti abwerere kwa Yahova?
10 Tin’funika kupirira thangwe pambatenga nthawe kuti munthu abwerere kwa Yahova. Abale azinji omwe akhadadjedjera mwauzimu adazindikira kuti adakwanisa kubwerera kwa Yahova thangwe ra kuzungiridwa mwakubwereza-bwereza na akulu wa gwere na abale winango. Mpfumakazi ya ku Ásia, yakucemeredwa Nancy idanemba kuti: “Xamwali wangu wa m’gwere wa ponda ndipondembo adandithandiza kwene-kwene! Iye akhandifuna kwene-kwene ndipo akhandiwona ninga mng’ono wace. Iye adandithandiza kukumbukira nthawe zabwino zomwe tikhacita bzinthu pabodzi. Iye akhanditetekera mwatceru pomwe ndikhamufotokozera bza mu mtima mwangu, ndipo akhazeza lini kundipasa malango. Iye adalatiza kuti akhali xamwali wa cadidi, wakukonzeka kuthandiza nthawe iri-yentse.”
11. Thangwe ranyi tin’funika kukhala wa ntsisi kuti tithandize munthu omwe ana makumbukidwe yakuphonyeka?
11 Ntsisi ziri ninga mankhwala yamphanvu kwene-kwene yomwe yangathandize munthu kubzibva bwino. Abale winango wakudjedjera ambakoyera cakumtima mwanzawo wa m’gwere kwa magole mazinji, ndipo bzimwebzi bzingacitise abalewo kusaya kufuna kubwerera pomwe kwa Yahova. Ayai winango angawone kuti adacitiridwa bzinthu bzakusaya cirungamo. Abale wakudjedjerawa ambafunikira munthu omwe angawatetekere na kubvesesa makumbukidwe yawo. (Tiyago 1:19) María, omwe akhadadjedjera mwauzimu adalewa kuti: “Inepano ndikhafunikira munthu kuti anditetekere, anditsangalaze, andipase malango na thandizo.”
12. Kodi lufoyi la Yahova liri ninga cingwe mwa njira iponi?
12 Bibliya limbandendemezera lufoyi lomwe Yahova analo kuna wanthu wace na cingwe. Kodi lufoyi la Yahova liri ninga cingwe mwa njira iponi? Kumbukirani cakucitika ici: Yezezerani kuti mwagwa m’madzi pa nyaza ndipo mukumira. Ndipo munthu winango wakuthusirani cigubu cakusaya madzi kuti cikuthandizeni kusaya kumira. Kulewa mwakusaya kupenukira, imwepo munitenda kwene-kwene munthuyo thangwe cigubuco cin’kuthandizani kuyengama. Koma cigubuco cin’kupulumusani lini. Tsono kuti mupulumuke bzin’funika kuti munthu abwere na barco akuthusireni cingwe acikupfuwani ndipo akuikheni m’barcomo. Yahova adalewa bza Ajirayeri omwe akhadasiya kumutumikira kuti: ‘Ndidapitiriza kuwatsogolera mwakudeka mtima na mwalufoyi.’ (Ozeya 11:4) Mulungu ambabvambo bzibodzi-bodzi na wale omwe adaleka kumutumikira ndipo tsapano akubonera na mabvuto na thupo. Iye akufuna kuti wanthuwo adziwe lufoyi lomwe iye analo kuna iwo ndipo akufunambo kuwapfuwa kuti abwerere kuna iye. Ndipo Yahova angaphatisire basa imwepo kuti alatize lufoyi lace kuna wale omwe adadjedjera mwauzimu.
13. Kodi ciratizo ca Pablo cikulatiza tani kuti lufoyi lathu lingathandize winango kubwerera kwa Yahova?
13 Mpsakufunika kuti timbauze omwe adadjedjera mwauzimu kuti Yahova ambawafuna ndipo ifepano timbawafunambo. Pablo, omwe afotokozedwa mu nkhani yapitayi adadjedjera mwauzimu kwa magole yakupitirira 30. Iye adati: “Ntsiku inango ku macibese pomwe ndikhacoka pamui ndidagumana na mpfumakazi yacikulire ndipo idalewalewa nande mwalufoyi. Inepano ndidayamba kulira. Ndipo ndidauza mpfumakaziyo kuti ikhadatumidwa na Yahova kuti idzalewelewe nande. Kucokera pamwepo ndidakumbuka kubwerera kwa Yahova.”
THANDIZANI MWALUFOYI OMWE ADJEDJERA MWAUZIMU
14. Mwakubverana na Luka 15:4, 5, kodi n’ciyani comwe makabusa adacita pomwe adagumana bira wakutaika?
14 Tikagumana omwe adadjedjera mwauzimu tin’funika kupitiriza kuwathandiza na kuwalimbikisa. Ninga mwana wakutaika wa m’ciratizo ca Jezu, pinango iwo angakhale na bzinthu bzizinji bzakukumbuka, tenepo pangatenga nthawe kuti ayebwe. Ndipo thangwe ra bzinthu bzomwe agumana nadzo m’dziko la Sathaniri, pinango uxamwali bwawo na Yahova bungakhale lini bwakulimba ninga momwe bukhaliri pakuyamba. Ndipopa, tin’funika kuthandiza omwe adjedjera mwauzimu kuti alimbise cikhulupiro cawo kwa Yahova. Mu ciratizo ca Jezu cakulewa bza bira wakutaika, iye adalewa kuti makabusa adaikha bira wace paphewa acimuyendesa kuna mabira yanzace. Makabusayo akhadamala kale mphanvu na nthawe izinji pakunyang’ana birayo. Koma iye akhadziwambo kuti birayo angakwanise lini kufamba yekha, ndipo makabusayo angafunikire kumunyamula pakuyenda naye komwe kukhana mabira yanzaceko.—Werengani Luka 15:4, 5. *
15. Kodi tingacite tani kuti tithandize omwe adadjedjera mwauzimu kubwerera kwa Yahova? (Onani kwadru yakuti “ Kabukhu Kakufunika Kwene-kwene.”)
15 Pinango tingafunike nthawe na mphanvu kuti tithandize omwe adadjedjera mwauzimu kumalisa mabvuto yawo. Koma na thandizo la mzimu wa Mulungu, Fala lace na mabukhu yanango, ifepano tingakwanise kuwathandiza kuti alimbise uxamwali bwawo na Yahova. (Waroma 15:1) Kodi tingacite tani bzimwebzi? Mkulu wa gwere winango omwe akutumikira kwa magole mazinji adati: “Azinji omwe adadjedjera mwauzimu akabwerera kwa Yahova ambafunikira munthu kuti apfunze nawo Bibliya.” * Ndipopa akulu akakukumbirani kuti mucitise pfunziro munthu omwe adadjedjera mwauzimu, imwepo mun’funika kubvuma mwayi umweyu. Mkulu winango adalewa kuti: “Mpalizi omwe akucitisa pfunziro munthu wakudjedjera mwauzimu an’funika kukhala xamwali wabwino, bzomwe bzingacitise kuti nyakudjedjerayo amukhulupirire.”
CIKONDWESO KUDZULU NA PA DZIKO LA PANTSI
16. Kodi tikudziwa tani kuti anjo ambatithandiza?
16 Pana bzinthu bzizinji bzomwe bzikulatiza kuti anjo akutithandiza kugumana anyakudjedjera mwauzimu omwe akufuna kubwerera kwa Yahova. (Cibvumbulutso 14:6) Mwa ciratizo, Silvio wa ku Equador adadandaulira Yahova mu mpembo kuti amuthandize kubwerera m’gwere. Akanati kumaliza mpemboyo, adabva kugogodza kwa nsuwo, akhali akulu awiri wa gwere omwe akhali pa nsuwopo. Akuluwo adakomedwa kwene-kwene kupasa Silvio thandizo lakuyamba lomwe iye akhafunikira.
17. Kodi timbabva tani tikathandiza omwe adadjedjera mwauzimu?
17 Kuthandiza omwe adadjedjera mwauzimu kuti abwerere kwa Yahova kumbatikondwesa kwene-kwene. Onani bzomwe mpainiya winango wakucemeredwa Salvador ambacita kuti athandize omwe adadjedjera mwauzimu. Iye adati: “Nthawe zinango, nimbakomedwa kwene-kwene mpaka kufika pakugwesa misozi. Bzimbakondwesa kwene-kwene kudziwa kuti Yahova wapulumusa m’bodzi mwa mabira yace ku dziko la Sathaniri ndipo inembo ndakhala na mwayi wakuthandizira basa limweri.”—Mabasa 20:35.
18. Penu imwepo mudadjedjera mwauzimu, kodi mun’funika kudziwa ciyani?
18 Penu imwepo mudaleka kutsonkhana pabodzi na atumiki wa Yahova, dziwani kuti iye akadakufunani. Iye an’funa kuti imwepo mubwerere kwa iye. N’cadidi kuti imwepo mun’funika kucita nyongo kuti mubwerere. Tsono ninga baba wa mu ciratizo ca Jezu, Yahova akukudikhirirani kuti mubwerere. Ndipo iye an’dzakutambirani na manja mawiri.
NYIMBO 103 Akulu wa Gwere ni Mphaso Yakucokera kwa Yahova
^ ndi. 5 Yahova akufuna kuti wale omwe adasiya kutsonkhana na kupalizira abwerere kwa iye. Ifepano tingacite bzizinji kuti tiwalimbikise kuti abvume mcemo wa Yahova wakuti: ‘Bwererani kwa ine.’ Mu nkhani ino tiniwona bzomwe tingacite kuti tiwathandize kubwerera kwa Yahova.
^ ndi. 3 Luka 15:8 “Nguponi mkazi omwe akakhala na kobiri 10 za drakima, ndipo ibodzi icitaika, angagase lini mbvuniko, acipsaira m’nyumba mwace, aciinyang’ana bwino-bwino mpaka kuigumana? 9 Ndipo akaigumana, mkaziyo ambatsonkhanisa axamwali na anantsi wace aciwauza kuti: ‘Kondwani nane, pakuti ndagumana kobiri ya drakima yomwe ikhadanditaikira ire.’ 10 Tenepo ndikukuzani kuti, pambakhala na cikondweso cikulu pakati pa anjo wa Mulungu thangwe ra nyakuphonya m’bodzi omwe wakungula.”
^ ndi. 7 Madzina yanango yacinjidwa.
^ ndi. 8 Luka 15: 21 Mwanayo adawauza kuti: ‘Baba, ndaphonyera kudzulu ndipo ndaphonyerambo imwepo. Nin’themera lini pomwe kucemeredwa mwana wanu.’ 22 Tsono babayo adauza akapolo wace kuti: ‘Fulumizani! Bweresani mkanjo wabwino mudzamubvazike, ndipo mumubvazikembo mphete ku boko lace, na xango ku nzayo zace. 23 Ndipo bweresanimbo kamphulu kakunenepa, mucikapha kuti tidye ticikondwa, 24 thangwe mwana wanguyu akhadafa, tsono wakhala pomwe na moyo; iye akhadatayika tsono wawoneka.’ Tenepo adayamba kucita madyoyo.
^ ndi. 14 Luka 15:4 “Mbani wa imwepo, omwe acimbakhala na mabira 100, ndipo bira m’bodzi n’kutaika, angasaye kusiya mabira 99 ku dambo, aciyenda kukanyang’ana bira wakutaikayo mpaka kumugumana? 5 Akam’gumana, animutakula paphewa, acikondwa.”
^ ndi. 15 Anyakudjedjera mwauzimu winango, bzingakhale bwino kupfunza nkhani zinango za m’bukhu la Bzomwe Tingacite Kuti Timbafunidwe na Mulungu. Kwa winango, tingabwerezere nawo misolo inango ya bukhu lakuti Yandikirani kwa Yehova. Komiti ya Utumiki ya Gwere ndiyo ingasankhule mpfumakazi ayai m’bale omwe angakhale wakuthemera kucitisa pfunziro munthu omwe adadjedjera mwauzimu.
^ ndi. 71 BZOMWE BZINKUCITIKA PA CITHUNZI-THUNZI: Abale atatu wakusiyana-siyana akuthandiza m’bale winango omwe akufuna kubwerera kwa Yahova. Iwo akucita bzimwebzo mwakupitiriza kuceza naye, kumutsimikizira kuti Yahova ambamufuna ndipo gwere limbamufunambo na kumutetekera iye akambafotokoza bzomwe bziri mu mtima mwace.
