1. Woo feelt Jehova sikj, wan eent von siene Schop trigjkjemt?

EN DÄN väajen Artikjel hab wie jeseenen, daut Jehova soo aus een gooda Hoad om jieda Schop sea bekjemmat es. Un hee sieekjt no aule, waut sikj vebeiselt haben. Aus de Israeliten am veloten hauden, säd hee to dee: “Kjikjt emol no mie opptoo, un dan woa ekj mie no junt opptoo rechten”. Wie weeten, daut Jehova sikj daut noch emma wenscht, wiels hee säd: “Ekj sie . . . de selwja aus ieeschtemma” (Mal. 3:6-7). Un Jesus säd, daut Jehova un de Enjel sikj sea freiden, wan eent von siene Deena trigjkjeem, waut sikj vebeiselt haud (Luk. 15:10, 32).

2. Waut woa wie en disen Artikjel unjasieekjen?

² Unjasieekj wie mol dree von Jesus siene Jlikjnisen, waut ons wiesen, woo wie soone halpen kjennen, waut sikj von Jehova trigjetrocken haben. Wie woaren uk von een poa Ieejenschoften räden, waut ons halpen de veloarne Schop bietostonen. Un wie woaren uk seenen, wuarom sikj daut loont, ons fa daut auntostrenjen.

3-4. Wuarom socht de Fru, wua Lukas 15:8-10 von rät, soo sea no äa Jeltstekj?

³ Wie motten ons aunstrenjen, no soone to sieekjen, waut trigj no Jehova komen wellen. Unjasieekj wie mol eent von Jesus siene Jlikjnisen en daut Bibelbuak Lukas. Daut rät von eene Fru, waut no een wieetvollet Selwastekj socht, waut see veloaren haud. Waut wia soo besonda aun dit Jlikjnis? Daut wia, woo sea de Fru no dit Jeltstekj socht (läs Lukas 15:8-10).

⁴ Jesus räd doavon, woo de Fru sikj feeld, aus see äa wieetvollet Selwastekj jefungen haud. Ieeschtemma kjrieejen de israelitische Mejalen eenjemol tieen Drachma, ooda Selwastekja, von äare Mame, wan see sikj befrieden. Veleicht haud  de Fru en daut Jlikjnis daut veloarne Selwastekj uk von äare Mame jekjräajen. See docht, daut daut raufjefollen wia. Doawäajen stekjt see eene Laump aun un kjikjt sea, oba see funk daut nich. Veleicht wia daut met äare Eelj-Laump nich dach jenuach. Tolatst deed see daut gaunze Hus sea krakjt utfäajen. Un doa mank daut Mell sach see äa wieetvollet Jeltstekj, waut von daut Laumpenlicht blenkjad! See wia soo froo, daut see äare Frind un Nobasch roopt un dee daut Nies vetald.

5. Wuarom kaun daut schwoa sennen, soone to finjen, waut nich mea no de Vesaumlunk komen?

⁵ Jesus sien Jlikjnis wiest ons, daut wie ons aunstrenjen motten, wan wie waut sieekjen, waut wie veloaren haben. Un wie motten ons woomäajlich uk aunstrenjen, om soone to finjen, waut nich mea no de Vesaumlunk komen. Veleicht wieren dee aul Joaren nich mea bie de Toopkomes ooda em Deenst. Ooda dee sent mau rajcht no eene aundre Jäajent jetrocken, wua de Breeda dee nich kjanen. Oba wie kjennen ons secha sennen, daut eenje von dee nu jroz trigjkomen wellen. Dee wellen Jehova wada met äare Breeda toop deenen, oba dee fält Help.

6. Woo kjennen aule methalpen, no soone to sieekjen, waut nich mea no de Toopkomes komen?

⁶ Wäa kaun no soone sieekjen, waut nich mea prädjen un nich mea no de Toopkomes komen? Nich bloos dee äa Frintschoft. Wie aula kjennen methalpen – de Eltestasch, de Pionieren un uk de Vekjindja. Es doa wäa von dien Frintschoft ooda von diene Frind, waut sikj von Jehova trigjetrocken haft? Ooda hast du mol soonen jetroffen, aus du von Hus to Hus ooda effentlich prädjen deetst? Du wurscht soonen kjennen sajen, daut du wellich de Eltestasch von diene Vesaumlunk dän siene Adrass ooda Fonnumma jäwen wurscht, daut doa wäa no dän komen kunn.

7. Waut kjenn wie von daut lieren, waut een Eltesta säd?

⁷ Besonda de Eltestasch sellen no soone sieekjen, waut trigj no Jehova komen wellen. Woo kjennen dee daut doonen? See wie mol, waut een Eltesta deit, waut Thomas * heet. Hee wont en Spaunien un haft aul mea aus 40 veloarne Schop jeholpen. Hee sajcht: “Ieeschtlich froag ekj veschiedne Breeda un Sestren, aus dee weeten, wua soone nu wonen. Ooda ekj froag de Vekjindja, aus see nich wäm kjanen, dee nich mea no de Toopkomes kjemt. De mieeschte halpen wellich met, wiels dee uk no soone sieekjen wellen. Un wan ekj dan deejanje besieekj, waut sikj von de Vesaumlunk trigjetrocken haben, dan froag ekj uk no äare Kjinja un äa Frintschoft. Eenje von dee kjeemen ea emma met äare Kjinja toop no de Toopkomes un dee wieren woomäajlich uk mol Vekjindja. Dee kaun eena dan uk halpen, trigj no Jehova to komen.”

8. Woo behaundeld de Voda sienen Sän en daut Jlikjnis en Lukas 15:17-24?

⁸ Waut fa Ieejenschoften bruck wie toom deejanje halpen, waut trigj no Jehova komen wellen? Daut see wie aun daut Jlikjnis von dän veloarnen Sän (läs Lukas 15:17-24). Jesus räd doavon, woo de Sän von tus veleet, oba met de Tiet sienen Fäla ensach un sikj eenich wort, trigjtokomen. De Voda rand dän entjäajen un pakt dän ut Leew jescheit om. Dän Sän baudad daut Jewessen un feeld sikj daut nich wieet, soo fein oppjenomen to woaren aus een Sän. Hee vetald sienen Voda daut, woo hee sikj werkjlich feeld, un dän Voda jaumad daut äwa dän. Hee wees sienen Sän, daut hee am wada oppneem aus sien ieejnet Kjint un  nich bloos aus sienen Oabeida. Doawäajen muak hee een Fast un jeef sienen Sän, waut trigjekomen wia, feine Kjleeda.

9. Waut vonne Ieejenschoften bruck wie, wan wie wäm halpen wellen, trigj no Jehova to komen? (See dän Kausten “ Deejanje halpen, waut trigjkomen wellen”.)

⁹ Jehova es soo aus de Voda en dit Jlikjnis. Hee leeft de Breeda un Sestren, waut nich mea prädjen un nich mea no de Toopkomes wanken, un well, daut dee trigj no am komen. Wan wie Jehova nodoonen, dan kjenn wie dee uk halpen. Doatoo bruck wie Jedult, Metjefeel un Leew. Wuarom sell wie dise Ieejenschoften haben un woo kjenn wie dee wiesen?

10. Wuarom mott wie jeduldich sennen toom wäm em jeisteljen halpen?

¹⁰ Wie motten jeduldich sennen, wäajen daut siene Tiet brukt, wan wäa trigj no Jehova kjemt. Väle, waut sikj trigjetrocken hauden, säden, daut de Eltestasch un de aundre von de Vesaumlunk an emma wada besieekjen musten, ea see wada aunfungen Jehova to deenen. Eene Sesta von Asien, waut Nancy heet, schreef: “Eene goode Frind von de Vesaumlunk holp mie sea. See haud soo väl Leew fa mie, aus wan ekj wudd äare elre Sesta sennen. See vetald mie von de scheene Tiet, waut wie ieeschtemma toop hauden. See horcht mie jeduldich too, wan ekj ar säd, woo ekj mie feeld, un see jeef mie gaunz frie Rot. See wia eene woare Frind, waut emma reed wia toom halpen.”

11. Wuarom bruck wie Metjefeel toom wäm halpen, waut sikj velazt feelt?

¹¹ Metjefeel es soo aus eene feine Medizien fa deejanje, waut sikj velazt feelen. Eenje sent aul Joaren äwa wäm von de Vesaumlunk beleidicht ooda veoajat, un doawäajen  wellen dee nich trigj no Jehova komen. Un eenje jleewen veleicht, daut an wäa orrajcht behaundelt haft. Soone brucken wäm, waut an toohorcht un prooft to vestonen (Jak. 1:19). María haud sikj uk mol trigjetrocken von de Vesaumlunk. See sajcht: “Mie fäld wäm, dee mie toohorcht, treest un gooden Rot jeef un mie holp.”

12. Woo trakjt Jehova soone met Leew wada no sikj, waut sikj von am trigjetrocken haben? Jeff een Biespel.

¹² De Schreft wiest, daut Jehova ons met Leew trakjen deit. En waut fa Stekjen es siene Leew soo aus een Strank? See wie mol een Jlikjnis: Stal die väa, du best em Mäa nenjefollen. Daut Wota es sea kolt un de Walen sent huach un du motst aul meist vedrinkjen. Dan schmitt doa wäa eene Schwamwast no die. Secha wurscht du doa sea dankboa fäa sennen, oba die fält noch mea Help, daut du nich stoafst. Du motst ut daut Wota rut un opp een Boot nopp. Die fält wäm, waut eenen Strank no die schmitt un die dan em Boot nentrakjt. Jehova säd von de Israeliten, waut von am aufjekomen wieren: “Ekj trock gaunz natieedlich aun an; ekj wull an derch Leew jewennen” (Hos. 11:4). Krakjt soo denkjt Gott vondoag dän Dach äwa deejanje, waut am nich mea deenen un meist en äare Trubbels un Sorjen unjagonen. Hee well dee no sikj trakjen un dee weeten loten, daut hee an leeft. Un derch ons kaun dee an siene Leew wiesen.

13. Woo wiest Pablo siene Jeschicht, daut onse Leew aundre halpen kaun, trigj no Jehova to komen?

¹³ Wie sellen dee, waut nich mea prädjen gonen un nich mea no de Toopkomes wanken, emma wada weeten loten, daut Jehova un uk wie an leewen. Pablo, wua wie en dän  väajen Artikjel aul von räden, haud sikj äwa 30 Joa von de Vesaumlunk trigjetrocken. Hee sajcht: “Eenen Zemorjes bejäajend ekj eene feine elre Sesta un dee räd sea leeftolich met mie. Ekj funk aun to roaren, soo aus een kjlienet Kjint. Ekj säd to dee, daut sikj mie daut soo späad, aus wan Jehova ar no mie jeschekjt haud. Doa jroz wort ekj mie eenich, daut ekj wada wull trigj no Jehova komen.”

14. Waut deed de Hoad no Lukas 15:4-5 no, aus hee daut veloarne Schop jefungen haud?

¹⁴ Dee, waut sikj trigjetrocken haben, fält daut, daut wie dee emma wada biestonen. Veleicht haben dee daut noch lang sea schwoa, soo aus de veloarna Sän en Jesus sien Jlikjnis. Un wäajen dee en dän Soton siene Welt wieren, sent dee woomäajlich schwak em Gloowen. Wie motten dee halpen, daut dee wada stoakj woaren. En daut Jlikjnis von daut veloarne Schop sajcht Jesus, daut de Hoad sikj daut Schop oppe Schulren nemt un daut trigj no de Häad drajcht. Daut haft dän aul väl Tiet un Krauft jekost, daut hee daut funk. Oba hee weet, daut hee daut trigjdroagen mott, wäajen daut nich de Krauft haft, selfst trigjtogonen (läs Lukas 15:4-5).

15. Woo kjenn wie dee biestonen, waut trigj no Jehova komen wellen? (See dän Kausten “ Eene wieetvolle Help”.)

¹⁵ Wie brucken veleicht uk väl Tiet un Krauft, wan wie wäm halpen wellen, met siene Trubbels foadich to woaren un Jehova wada to deenen. Oba derch Jehova sienen Jeist un derch sien Wuat un derch onse Bieekja kjenn wie dän halpen, em jeisteljen wada stoakj to woaren (Reem. 15:1). Woo kjenn wie daut doonen? Een erfoarna Eltesta sajcht: “De mieeschte, waut nich  mea prädjen un nich mea no de Toopkomes komen, brucken een Bibelstudium, wan dee opp iernst wada trigj no Jehova komen wellen.” * Wudd daut nich eene scheene Oppgow sennen, wan du met soonen kust de Bibel studieren? Dis Eltesta sajcht uk: “De Vekjindja, waut met soonen studieet, mott een gooda Frint sennen, daut deejanja sikj to dän utschedden un opp dän veloten kaun.”

16. Woo weet wie, daut de Enjel ons halpen?

¹⁶ Väle haben daut beläft, daut de Enjel ons halpen soone to finjen, waut trigj no Jehova komen wellen (Opb. 14:6). Silvio biejlikj, waut en Ekuador wont, bäd sea, daut Jehova am halpen sull, trigj no de Vesaumlunk to komen. Hee haud noch nich mol verecht met bäden, aus twee Eltestasch bie am vere Däa stunden. Dee freiden sikj, daut see am fuaz halpen kunnen, wada trigj no Jehova to komen.

17. Waut woa wie beläwen, wan wie wäm halpen, waut em Gloowen schwak es?

¹⁷ Daut woat ons groote Freid brinjen, wan wie soone, waut em Gloowen schwak sent, halpen trigj no Jehova to komen. Salvador es een Pionia, waut sikj sea aunstrenjt daut to doonen. Hee sajcht: “Eenjemol mott ekj meist fa Freid roaren. Daut moakt mie emma soo schaftich, met Jehova tooptoschaufen un eent von siene leewe Schop to halpen, ut dän Soton siene Welt ruttokomen un wada en de Vesaumlunk nenn” (Apj. 20:35).

18. Äwa waut kaun eena sikj secha sennen, wan eena sikj von Jehova sien Volkj trigjetrocken haft?

¹⁸ Wan du die von Jehova sien Volkj trigjetrocken hast, dan kaust du die secha sennen, daut hee die noch emma leeft. Hee wenscht sikj, daut du trigj no am kjemst. Doatoo es daut needich, jewesset to doonen. Oba Jehova es soo aus de Voda en Jesus sien Jlikjnis. Hee luat aul doano, daut du trigjkjemst, un woat die wellich wada oppnämen.