LONGO DIA 26
“Vutugienu Gudi Ame”
“Vutugienu gudi ame, nu ame mbanguvutuga gudi enue.”—MAL. 3:7.
LUNGIMBO 102 « Venons en aide aux faibles »
NDAGA JIDI MU LONGO EDI *
1. Luholo lutshi Yehowa gana gudivua gula mukombeledi wenji mumoshi watotele wavutuga gudi muene?
LUHOLO tuayimonyi mu longo diabalega, Yehowa wana gudifuanesa nu mubambi wabonga yonu wana bamba muabonga imeme yenji. Wana kamba gimeme giagasue giatotshi. Yehowa wawambelele enya Isalele anyi atotele egi: “Vutugienu gudi ame, nu ame mbanguvutuga gudi enue.” Tudi mujiya egi uu numangino wana gudivua ngenyi handaga udi muzuela egi: ‘Ame ngasombegeselego.’ (Mal. 3:6, 7) Yesu wazuelele egi Yehowa nu anjelo ana suanguluga muavula gula mukombeledi mumoshi wa Yehowa watotele wavutuga gudi Muene.—Luka 15:10, 32.
2. Itshi tuza mumona mu longo edi?
2 Tutadilenu ifezegeselo thathu ya Yesu inyi idi gutumonesa luholo lua gukuatesa athu anyi atotele gale. Tuza muzuelela makalegelo tudi nawo funu ha gukuatesa gimeme gia gutota ha guvutuga gudi Yehowa. Tuza mumona luko mukunda natshi idi nu ndando egi tukuatese athu adi a guleba mu nyuma.
KAMBA MAKUTA ATOTELE
3-4. Mukunda natshi mukhetu owu muzuelela mu 15:8-10, gakhalele mukamba makuta enji a drakime?
3 Tudi naye gutshita ngolo ha gukamba aphangi anyi adi mutshigina guvutuga gudi Yehowa. Mu gishima giatele muene gidi mu Evanjile ya Luka, Yesu watele lumene lua mukhetu mumoshi wakhalele mukamba gima gia ndando giatotele: Kiamo gia drakime. Gima gia ndando giana zuelewa mu gishima giene gidi gukambewa gua makuta.—Tanga Luka 15:8-10.
4 Yesu wamonesele gusuanguluga guakhalele nago mukhetu muene tangua gahetele makuta enji atotele. Mu tangua dia Yesu, gula mukhetu wazudiwa mu ulo, idi mumonega egi gin’enji wakhalele gumuhana makuta kumi a drakime mu lusugu lua ulo. Yajiya gukhala egi, makuta a mukhetu owu adi makuta anyi gin’enji gamuhanele mu lusugu lua ulo. Mukhetu muene wakhalele mutangiza egi makuta ene amubuile hashi monzo. Wahagele muenda tshuya nu wasendesele gukamba, uvi gaamonelego. Muenda wene wakhalelego nu tshuya tuavula hagula amone makuta ene a utadi. Gungima, wakombele inzo yagasue muabonga. Wamonele makuta ene mu uto wakombele muene amuhenya gu kiajiji gia muenda. Wasuangulugile diago! Watamegele mafuta enji nu athu gana jinga nawo hehi ha gusuanguluga nawo.
5. Mukunda natshi yajiya gukhala lamba ha gumona aphangi anyi alebele gale mu nyuma?
5 Luholo gifezegeselo gia Yesu gidi guyimonesa, yana toga mudimo wavula ha guheta gima giatotele. Idi luholo lumoshi nu esue, tudi naye gutshita mudimo wakola ha gumona aphangi anyi alebele gale mu nyuma. Yajiya gukhala egi ivo yavula yabalegele gale sendese abembele gudibungisa nu esue. Yajiya gukhala luko egi ayile mujinga fundo diko, nu aphangi a fundo diene ana guajiya ndo. Uvi tuajiya diago gutshigina egi, aphangi anyi alebele mu nyuma adi diago nu funu ya guvutuga gudi Yehowa. Adi nu funu ya gukombelela Yehowa hamoshi nu aphangi a mu nyuma a mala nu a akhetu, uvi ajiyilego guyikalagala gula tuaakuateselego.
6. Luholo lutshi aphangi agasue mu hungu ajiya gukuatesa ha gukamba aphangi alebele gale mu nyuma?
6 Nanyi wajiya gukamba aphangi alebele gale mu nyuma? Akulu, avundji a njila, enya fami, nu alongeshi a mu hungu, mukut’etu agasue tuajiya guakuatesa ha guvutuga gudi Yehowa. Wakhala nu futa diaye nga muenya fami yaye yonu walebele gale mu nyuma ba? Watagenele gale nu phangi mumoshi walebele mu nyuma tangua wakhalele mulongesa inzo nu inzo nga tangua wakhalele mulongesa ha fundo dia athu avula ba? Gula idi ngenyi, wajiya guwambela phangi muene egi gula udi nu funu ya ukuateshi, wajiya gumukuatesa ha guhana numéro yenji ya telefone nga gudijiga fundo gana khala gudi akulu a mu hungu.
7. Longo ditshi wazula mu ndaga jiazuelele mukulu Thomas?
7 Ndaga jitshi akulu adi naye gutshita ha gumona aphangi anyi alebele gale mu nyuma ha guvutuga gudi Yehowa? Tala ndaga yazuelele mukulu mumoshi mu jina dia Thomas, * yonu wana jinga gu Espagne. Wakuatesele gale aphangi 40 nu holu ha guvutuga mu hungu. Udi muzuela egi: “Thomo, ngana hula aphangi a mala nu a akhetu gula adi mujiya fundo diakhala aphangi anyi alebele mu nyuma. Nga ndo, ngana hula alongeshi gula adi mujiya nga phangi mumoshi wabembele gale guza mu gudibungisa. Aphangi avula ana hana mvutu nu gusuanguluga guagasue handaga ana jiya egi ene nji adi naye guakamba. Gula ngaya mutala aphangi a mala nu a akhetu anyi alebele gale mu nyuma, ngana guahula gula an’awo nu enya fami yawo adi gikuatshi. Mukatshi dia aphangi anyi alebele gale mu nyuma, ako akhalele muza nu an’awo mu gudibungisa, an’awo ene akhalele nji alongeshi mu tangua dimoshi ngenyi. Ene nji ajiya gukuatesewa ha guvutuga gudi Yehowa.”
VUTULA ANA A YEHOWA ATOTELE MU HUNGU
8. Mu gishima gia mona watotele gidi mu Luka 15:17-24, luholo lutshi tata gakalegele ndaga gudi mun’enji wavutugile guembo?
8 Makalegelo tshi tudi naye gukhala nawo gula tudi mutshigina gukuatesa athu anyi adi mutshigina guvutuga gudi Yehowa? Tala malongo tuajiya guzula mu gishima gia Yesu giatadila mona yonu watotele. (Tanga Luka 15:17-24.) Yesu wamonesele luholo mona muene gajiyile gubola guenji, nu gazudile desizio dia guvutuga guembo. Sh’enji wayile mu phushi gumutagana nu wamuyambele nu gusuanguluga, wakuatesele mona muene ha gujiya egi wana gumuzumba. Mona muene wakhalele nu gikenene giavula nu wakhalele gudimona egi gashigo watagana ha gukhala mun’enji. Tata Muene wavuidile mun’enji khenda jiavula mukunda nu mbimbi jiazuelele mona muene. Gungima, tata muene wakalegele ndaga imoshi ha gutshiginyisa mun’enji egi wasuanguluga luholo gavutuga guembo, gashigo gumukalegela ndaga gifua muenya mudimo wenji, uvi gifua mun’enji wa guzumba. Ha gumutshiginyisa, sh’enji wakalegele wano nu wamusudigishile milele ya ndando.
9. Makalegelo atshi tudi naye gukhala nawo ha gukuatesa aphangi anyi alebele mu nyuma ha guvtuga gudi Yehowa? (Tala galuanda “ Luholo Tuajiya Gukuatesa Aphangi adi nu Funu ya Guvutuga Gudi Yehowa.”)
9 Yehowa udi gifua tata yonu adi muzuelela mu gishima egi. Wana zumba aphangi etu anyi alebele mu nyuma nu wana gutshigina egi avutuge gudi mune. Gula tualandula gifezegeselo gia Yehowa, tuajiya guakuatesa ha guvutuga gudi muene. Ha guakuatesa, tudi naye gumonesa khadilo dia guhuiminyina, dia khenda, nu dia guzumba. Mukunda natshi tudi naye gumonesa makalegelo awa, nu luholo lutshi tuajiya guamonesa?
10. Mukunda natshi tudi naye gumonesa khadilo dia guhuiminyina ha gukuatesa athu ha guvutuga gudi Yehowa?
10 Tudi naye gukhala nu khadilo dia guhuiminyina handaga yajiya guzula tangua diavula hagula muthu avutuge gudi Yehowa. Aphangi anyi alebele thomo mu nyuma ana zuela egi, gutuama egi avutuge gudi Yehowa, akulu nu aphangi ako ayile guatala iphungu yavula. Phangi mumoshi ya mukhetu gu Asie mu jina dia Nancy, wasonegele egi: “Futa diami mumoshi wa mu hungu wangukuatesele muavula sha. Wakhalele gunguzumba muavula gifua phangi’ami vumo dimoshi. Wanguwunguluishile ndaga jiawaha tuakalegele n’enji mu masugu abalega. Wakhalele gungutegelela muabonga tangua ngakhalele muzuela, nu gakhalelego muvua musonyi ha gunguhana malongo. Wamonesele diago egi wakhalele futa diawaha, wakhalele hehi ha gungukuatesa tangua diagasue.”
11. Mukunda natshi tudi naye gumonesa khenda ha gukuatesa phangi yonu udi nu khabu?
11 Khenda jiakhala gifua gihemba; jiajiya gusaga muthu udi nu gikenene mu mutshima. Aphangi avula anyi alebele mu nyuma, ana khala nu gikenene nga khabu ivo yavula mukunda nu ndaga imoshi yaakalegele phangi mumoshi mu hungu. Ndaga eyi yana kanga muthu njila ha guvutuga gudi Yehowa. Ako ajiya gutangiza egi aakalegele ndaga mu luholo luabola. Ajiya gukhala nu funu ya phangi wajiya guategelela muabonga tangua adi muzuela ndaga adi mutangiza. (Yak. 1:19) Phangi mumoshi wa mukhetu mujina dia María walebele nji mu nyuma, udi muzuela gamba: “Ngakhalele nu funu ya phangi mumoshi wajiya gungutegelela, gunguhana gikhesa nu malongo abonga ha gungukuatesa.”
12. Hana gifezegeselo gidi mumonesa luholo guzumba gua Yehowa guana gunana athu enji atotele ha guvutuga gudi muene.
12 Biblia idi muzuela egi guzumba gua Yehowa mukunda nu athu enji gudi gifua shinga. Mu luholo lutshi guzumba gua Yehowa gudi gifua shinga? Tufezegese gale: Tangiza gale egi udi mu shuga mu muta wakoma, muthu mumoshi wagusonela gilet de sauvetage. Idi yadiago egi udi naye gusuanguluga luholo muthu muene gagukuatesa handaga, idi gugukuatesa hagula ushugigo. Uvi gilet de sauvetage yene hakhenji yajiyilego guguhuluisa. Meya adi diago ahuma, nu wajiyilego guhuluga gula wanginyinego mu wato. Udi nu funu ya muthu mumoshi agusonele shinga nu agunane mu wato. Yehowa wawambelele enya Isalele anyi atotele egi: ‘Ngalanduile guanana gudi ame, nu shinga ya guzumba.’ (Hosh. 11:4) Mangino, Nzambi wana gudivua nji ngenyi mukunda nu athu anyi alebele gale mu nyuma mukunda nu malamba nu gikenene. Udi mutshigina egi athu ene ajiye egi wana guazumba, nu wana tshigina egi avutuge gudi muene. Yehowa wajiya gugukalegela aye ha gumonesa guzumba guenji gudi aphangi ene.
13. Hana gifezegeselo gidi mumonesa funu ya gumonesa guzumba gua uphangi.
13 Idi diago nu ndando ha gumonesa athu alebele mu nyuma egi Yehowa wana guazumba, nu esue nji tuana guazumba. Phangi Pablo yonu tuazuelela mu longo diabalega, walebele mu nyuma ivo 30. Udi muzuela egi: “Lusugu lumoshi mu gimenegena, ngakhalele muzoga mu luphango, ngatagenele nu phangi mumoshi wa mukhetu wa gukula, wanguwambelele ndaga nu guzumba guagasue. Ngasendesele gudila gifua mona wazonda. Ngamuwambelele egi idi mumonega egi, Yehowa wagutumi ha guza gungutala. Ngazudile desizio lusugu luene ha guvutuga gudi Yehowa.”
KUATESA APHANGI A GULEBA MU NYUMA NU GUZUMBA GUAGASUE
14. Ha gutadila gifezegeselo gidi mu Luka 15:4, 5, ndaga itshi mubambi wa imeme adi mutshita tangua gamona gimeme giatotele?
14 Gula tuamona aphangi anyi alebele gale mu nyuma, tudi naye gulandula guakuatesa nu guahana gikhesa. Ajiya gukhala nu ndaga yana guasagesa mu matangi ivo yavula, gifua muakhalele mona wa mu gishima gia Yesu. Ana khala a guleba mu nyuma mukunda nu ndaga ana tagana najio mu mavu awa a Satana. Tudi naye guakuatesa ha gukolesa gutshigina guawo gudi Yehowa. Mu gifezegeselo giahanele Yesu giatadila gimeme giatotele, Yesu wamonesele luholo mubambi wa imeme gabatele gimeme ha phanga nu luholo gagikuatesele ha guvutuga mu dinda. Mubambi muene wabalegesele tangua nu ngolo jiavula ha gumona gimeme ginyi giatotele. Uvi mubambi muene wakotelesa egi udi naye gukuatesa gimeme giene ha guvutuga mu dinda, handaga giene gishigo nu ngolo jia guvutuga giene hakhenji.—Tanga Luka 15:4, 5.
15. Luholo lutshi tuajiya gukuatesa phangi walebele mu nyuma ha guvutuga gudi Yehowa? (Tala galuanda “ Gikadikilo gia Ndando.”)
15 Tudi naye gubalegesa tangua dietu, nu ngolo jietu ha gukuatesa aphangi anyi alebele gale mu nyuma ha gubinga ndaga jinyi jiana guakanga njila ha gukombelela Yehowa. Tuajiya guakuatesa ha gukolesa ufuta wawo nu Yehowa mu njila ya nyuma yenji, ya Biblia, nu ya mikanda tuana heta mu hungu. (Lomo 15:1) Luholo lutshi tuajiya guyikalagala? Mukulu mumoshi udi nu eksperianse udi muzuela egi: “Aphangi avula alebele gale mu nyuma ana tshigina luko gulonguga Biblia, gungima ana zula desizio dia guvutuga gudi Yehowa.” * Gula agutoga ha gulonguga Biblia nu phangi walebele gale mu nyuma, udi naye gutshigina ginemo giene nu gusuanguluga guagasue. Mukulu muene udi muzuela luko egi: “Mulongeshi yonu udi mulonguga Biblia nu phangi yonu walebele gale mu nyuma, udi naye gukhala futa wabonga, muthu yonu phangi muene gajiya guwambela mene jiagasue.”
GUSUANGULUGA MU DILU NU HA MAVU
16. Luholo lutshi tudi mujiya egi anjelo ana gutukuatesa?
16 Gudi nu ndaga jiavula jidi mumonesa egi, anjelo ana gutukuatesa ha gumona aphangi alebele gale mu nyuma anyi adi nu funu ya guvutuga gudi Yehowa. (Yat. 14:6) Ha gufezegesa, phangi mumoshi wa yala gu gifutshi gia Équateur mu jina dia Silvio, walebele mu nyuma; lusugu lumoshi watogele Yehowa ha gutuma muthu mumoshi ha gumukuatesa. Hakhalele muene musamba, akulu mbadi ajile mu luphango luenji. Mu tangua diene, akulu asuangulugile ha gumukuatesa.
17. Mbatudivua gikuatshi gula tuakuatesa phangi walebele gale mu nyuma ha guvutuga gudi Yehowa?
17 Mbatukhala nu gusuanguluga guavula ha gukuatesa aphangi alebele gale mu nyuma ha guvutuga gudi Yehowa. Muvundji wa njila mumoshi mu jina dia Salvador, wana gutala muabonga aphangi anyi alebele gale mu nyuma, udi muzuela egi: “Matangua ako, ngana dila nu gusuanguluga gula phangi wavutuga. Yana gungusuanguluisa muavula ha gujiya egi, ngana gukalagala hamoshi nu Yehowa ha gukatula gimeme gienji mu mavu awa a Satana, nu gugivutula mu hungu dienji.”—Makal. 20:35.
18. Gula walebele gale mu nyuma, ndaga itshi ushigo naye gujimbila?
18 Gula walebele gale mu nyuma, ujimbilago egi Yehowa yowu genji wana guguzumba. Wana tshigina egi umuvutugile. Udi naye gukalagala ngolo ha gumuvutugila. Yehowa udi gifua tata yonu adi muzuelela mu gishima gia Yesu, wana gunenga tangua mbawuvutuga, muene mbawuguyamba nu gusuanguluga guagasue.
LUNGIMBO 103 Les bergers, des dons de Dieu
^ par. 5 Yehowa wana tshigina egi athu anyi agasue atotele gale avutuge gudi muene. Tudi naye gutshita ngolo ha guhana gikhesa gudi athu adi mutshigina emvitasio eyi ya Yehowa: “Vutugienu gudi ame.” Mu longo edi, tuza mumona luholo tuajiya guakuatesa ha guvutuga gudi Yehowa.
^ par. 7 Mu longo edi, majina ako asombegesewe.
^ par. 15 Aphangi ako alebele gale mu nyuma ana kuatesewa ha gulonguga mukanda Restez dans l’amour de Dieu. Uvi ako ana longuga mikhapho iko ya mukanda Approchez-vous de Jéhovah. Akulu a mu Komite ya Mudimo wa Gulongesa adi nu ginemo gia gutomba mulongeshi udi naye gulonguga nu phangi walebele gale mu nyuma.
^ par. 68 UKOTELESHI WA IFUANESA: Aphangi a mala thathu a gudisha adi mukuatesa phangi mumoshi wa yala ha guvutuga gudi Yehowa. Adi muya gumutala tangua diagasue, adi gumutshiginyisa egi Yehowa wana gumuzumba, nu adi gumutegelela muabonga.
