STUDY ARTICLE 26
“Kambaek Long Mi”
“Sapos yufala kambaek long mi, bae mi kambaek moa long yufala.”—MALAKAE 3:7.
SONG 102 “Helpem Olketa wea Wik”
WANEM IUMI BAE STORYIM *
1. Hao nao feeling blo Jehovah taem wanfala lo olketa sheepsheep blo hem kam bak lo hem?
OLSEM iumi storyim lo study bifor diswan, Jehovah markem hemseleva witim wanfala gud shepherd wea barava lukaftarem each sheepsheep blo hem. And hem bae go lukaotem eniwan lo olketa wea go difren. Jehovah talem olketa Israelite wea lusim hem: “Sapos yufala kambaek long mi, bae mi kambaek moa long yufala.” Iumi savve Jehovah still garem semkaen feeling olsem bikos hem sei: ‘Mi no savve change.’ (Malakae 3:6, 7) Jesus sei, Jehovah and olketa angel blo hem hapi tumas taem wanfala lo olketa servant blo Hem wea go difren hem kam bak lo Hem.—Luke 15:10, 32.
2. Wanem nao iumi bae storyim lo disfala study?
2 Bae iumi storyim thrifala tokpiksa blo Jesus wea teachim iumi hao for helpem olketa wea lusim Jehovah. Iumi bae storyim tu samfala fasin wea iumi need for garem mekem iumi savve helpem wanfala sheepsheep wea lus for kam bak lo hem. And iumi bae lanem tu why hem important for iumi helpem olketa wea inactive.
LUKAOTEM COIN WEA LUS
3-4. Why nao datfala woman wea Luke 15:8-10 storyim, hem barava lukaotem drachma coin blo hem wea lus?
3 For lukaotem olketa wea laek for kam bak lo Jehovah, iumi need for waka hard. Lo wanfala tokpiksa lo Gospel blo Luke, Jesus storyim wanfala woman wea lukaotem wanfala samting wea spesol tumas lo hem, hem nao wanfala drachma coin wea lus. Disfala tokpiksa helpem iumi for ting raonem hao datfala woman mas waka hard for lukaotem datfala coin.—Readim Luke 15:8-10.
4 Jesus storyim feeling blo datfala woman taem hem faendem drachma coin blo hem wea lus. Lo taem blo Jesus, taem wanfala Israelite gele bae marit, samfala taem mami blo hem savve givim hem tenfala drachma coin lo wedding day blo hem. Maet datfala coin wea lus hem wanfala lo olketa coin wea mami blo woman hia givim hem taem hem marit. Lo tingting blo datfala woman coin hia maet foldaon lo floor. So hem laetem wanfala lamp and start for lukaotem, bat hem no lukim. Maet lamp blo hem no braet gud so hem hard for lukim datfala smol silver coin. Gogo, hem barava swipim gud full haos. Taem hem hipimap evri dust wea hem swipim, then hem lukim drachma coin blo hem shaen kam from insaed lo olketa dust hia. Hem hapi tumas! Hem kolem kam olketa fren and neiba blo hem for talem datfala hapi nius lo olketa.
5. Why nao samfala taem maet hem hard for faendem olketa wea inactive?
5 Olsem iumi lukim lo tokpiksa blo Jesus, man mas waka hard for faendem samting wea lus. Lo sem wei tu, iumi maet need for waka hard for lukaotem olketa wea lusim kongregeson. Maet samfala olketa inactive for staka year finis. Maet olketa muv tu lo ples wea olketa brata and sista no savve lo olketa. Bat iumi barava sure hao nomata lo distaem, samfala lo olketa hia wea inactive olketa barava laek for kam bak lo Jehovah. Olketa laek for servem Jehovah moa witim evri brata and sista lo kongregeson, bat olketa needim iumi for helpem olketa.
6. Hao nao iumi evriwan savve lukaotem olketa wea inactive?
6 Hu nao fit for lukaotem olketa wea inactive? Iumi evriwan. Olketa elder, pioneer, famili member, and olketa pablisa lo kongregeson savve help for lukaotem olketa wea inactive. Waswe, iu garem wanfala fren or relative wea inactive? Waswe, iu meetim eniwan wea inactive taem iu go lo haos-tu-haos ministry or lo pablik witnessing? Explainim lo hem dat sapos hem laekem samwan for visitim hem, bae iu hapi for givim contact information blo hem lo olketa elder lo kongregeson blo iu.
7. Wat nao iu lanem from wanem datfala elder wea nem blo hem Thomas hem talem?
7 Wanem nao samfala samting wea olketa elder savve duim for faendem olketa wea laek for kam bak lo Jehovah? Tingim samting wea wanfala elder lo Spain wea nem blo hem Thomas * hem talem. Hem bin helpem winim 40-fala Witness for kam bak lo kongregeson. Thomas sei: “Firstaem, mi savve askem olketa brata and sista sapos olketa savve wea nao samfala inactive wan stap distaem. Or mi savve askem olketa pablisa sapos olketa savve tingim eniwan wea no savve kam nao lo olketa meeting. Staka lo kongregeson hapi for help bikos olketa feel olsem olketa duim samting for lukaotem olketa hia wea lus. Bihaen, taem mi visitim datfala inactive brata or sista, mi savve ask abaotem pikinini blo olketa and olketa nara relative. Samfala lo olketa wea inactive savve tekem kam olketa pikinini blo olketa lo meeting bifor, and samfala lo olketa pikinini hia olketa bin pablisa bifor. So olketa tu savve kasem help for kam bak lo Jehovah.”
TEKEM KAM BAK OLKETA SON AND DOTA BLO JEHOVAH WEA LUS
8. Lo tokpiksa abaotem son wea lus lo Luke 15:17-24, hao nao datfala dadi hem treatim son blo hem wea repent?
8 Olketa wanem fasin nao iumi mas garem mekem iumi savve helpem olketa wea laek for kam bak lo Jehovah? Tingim wanem iumi savve lanem from tokpiksa blo Jesus abaotem datfala son wea lusim hom. (Readim Luke 15:17-24.) Jesus explainim hao gogo datfala son kasem bak gudfala tingting and hem disaed for kam bak. Taem datfala dadi ran go for meetim son blo hem and hagem hem, datwan mekem son for luksavve dadi barava lovem hem. Datfala son feel guilty tumas and hem feel olsem hem no fit for dadi kolem hem son blo hem. Taem son hia talemaot feeling blo hem, dadi sorre lo hem. Then dadi duim samting for welkamim son blo hem and mekem hem feel hem part lo famili moa and no wanfala wakaman. For showimaot datwan, dadi wakem wanfala big feast and givim naes kaleko for datfala son blo hem wea repent.
9. Wat kaen fasin nao iumi mas garem mekem iumi savve helpem olketa wea inactive for kam bak lo Jehovah? (Lukim box “ Hao for Helpem Olketa wea Laek for Kam Bak.”)
9 Jehovah hem olsem dadi lo datfala tokpiksa. Hem lovem olketa inactive brata and sista blo iumi and hem laekem olketa for kam bak lo hem. Taem iumi followim example blo Jehovah, iumi savve helpem olketa for kam bak. For duim datwan, iumi mas patient, tingim feeling blo olketa, and lovem olketa. Why nao iumi shud showimaot olketa fasin hia, and hao nao iumi savve duim datwan?
10. Hao nao wei for patient savve helpem narawan for kam bak lo Jehovah?
10 Iumi need for patient bikos hem tek taem for helpem samwan for kam bak lo Jehovah. Staka wea bin inactive sei samting wea mekem olketa kam bak nao hem bikos olketa elder and olketa narawan lo kongregeson visitim olketa staka taem. Wanfala sista from Southeast Asia wea nem blo hem Nancy, hem raet olsem: “Wanfala klos fren blo mi lo kongregeson barava helpem mi tumas. Hem olsem big sista wea lovem mi tumas. Hem helpem mi for tingim bak olketa gud taem wea mitufala bin garem bifor. Hem barava patient for lisin taem mi talemaot feeling blo mi, and hem no hol bak for givim mi advaes. Hem wanfala tru fren wea redi for helpem mi lo enitaem wea mi needim.”
11. Why nao iumi need for tingim feeling blo man wea feel nogud?
11 Disfala wei for tingim feeling blo narawan hem olsem wanfala strong medicine, wea savve helpem man for gud bak moa. Samfala inactive wan bin feel nogud lo samwan insaed kongregeson for staka year finis. From datwan, olketa faendem hem hard for kam bak lo Jehovah. Olketa maet ting wanem hem happen lo olketa hem no stret. Olketa maet needim samwan wea savve lisin lo olketa and minim feeling blo olketa. (Jas. 1:19) María wea inactive bifor, hem sei: “Mi needim nomoa samwan for lisin taem mi story, for mi krae lo hem, and for hem helpem mi for savve wanem for duim.”
12. Storyim tokpiksa abaotem hao love blo Jehovah pullim olketa wea inactive for kam bak lo pipol blo hem.
12 Bible storyim hao love blo Jehovah hem olsem rope. Lo wanem wei nao love blo God hem olsem wanfala rope? Tingim disfala tokpiksa: Sapos iu klosap for draon lo raf sea and samwan torowem kam wanfala laef jacket lo iu. For sure, iu bae barava tinghae lo datwan bikos datwan bae helpem iu for no stragol for float. Bat datfala laef jacket seleva bae no savve sevem laef blo iu. Sea hem barava cold, and iu bae laef only sapos iu go insaed wanfala laefboat. Bat iu needim samwan for torowem kam wanfala rope and pullim iu go lo datfala laefboat. Jehovah story olsem abaotem olketa Israelite wea go difren from hem. Hem sei: “Mi pulum hemi kam long mi an mi liftim hem ap fo karim hem.” (Hosea 11:4) Distaem God feel olsem tu abaotem olketa wea inactive and wea olsem olketa draon insaed olketa problem and hevi. Hem laekem olketa for savve dat hem lovem olketa, and hem laek for pullim olketa kam bak lo hem. And Jehovah savve iusim iu for helpem olketa hia for feelim wei wea hem lovem olketa.
13. Storyim wanfala experience wea showimaot hao love for olketa brata hem garem paoa.
13 Hem barava important for helpem olketa inactive wan for savve dat Jehovah lovem olketa and iumi tu lovem olketa. Pablo, wea iumi storyim lo study bifor diswan, hem inactive for winim 30 years. Hem sei: “Lo wanfala morning, taem mi redi for lusim haos, mi meetim wanfala naes olo sista and hem barava story kaen lo mi. Mi start for krae olsem wanfala smol pikinini nao. Mi talem hem dat luk olsem Jehovah nao sendem hem kam for story lo mi. Lo datfala taem nao mi disaed for mas kam bak lo Jehovah.”
SHOWIMAOT LOVE TAEM IUMI HELPEM OLKETA WEA WIK
14. Olsem tokpiksa lo Luke 15:4, 5, wanem nao shepherd duim sapos hem faendem sheepsheep wea lus?
14 Olketa inactive wan barava needim for iumi gohed sapotim olketa. Olsem datfala son wea lus lo tokpiksa blo Jesus, olketa maet garekil saed lo feeling blo olketa. And maet why olketa wik lo spiritual wei hem bikos olketa stap longtaem tumas lo world blo Satan. Iumi need for helpem olketa for strongim bak moa faith blo olketa lo Jehovah. Lo datfala tokpiksa abaotem sheepsheep wea lus, Jesus storyim hao shepherd putim datfala sheepsheep lo shoulder blo hem and karem go bak lo olketa nara sheepsheep blo hem. Datfala shepherd hem bin iusim taem and strong blo hem for faendem datfala sheepsheep wea lus. Bat hem luksavve hem need for karem go bak bikos datfala sheepsheep hem no garem strong for go bak seleva.—Readim Luke 15:4, 5.
15. Hao nao iumi savve sapotim olketa wea wik wea laek for kam bak lo Jehovah? (Lukim box “ Wanfala Important Tul.”)
15 Maet iumi need for iusim staka taem and strong for helpem samfala inactive wan for winim olketa problem wea mekem hem hard for olketa kam bak. Bat witim help blo holy spirit, Bible, and olketa pablikeson wea organization provaedem, iumi savve helpem olketa for kamap strong moa. (Rome 15:1) Hao nao iumi savve duim diswan? Wanfala experience elder sei, “Staka lo olketa wea inactive needim wanfala Bible study bihaen olketa disaed for kam bak lo Jehovah.” * So sapos olketa askem iu for study witim wanfala inactive wan, hem gud for acceptim datfala privilege. Datfala elder sei tu, “Pablisa wea conductim study witim datfala inactive wan need for kamap wanfala gud fren wea hem bae feel free for story witim.”
HAPI KAMAP LO HEVEN AND LO EARTH
16. Hao nao iumi savve olketa angel bae helpem iumi?
16 Staka experience showimaot hao olketa angel waka witim iumi for helpem iumi for faendem olketa wea inactive wea laek for kam bak lo Jehovah. (Rev. 14:6) Olsem example, Silvio, from Ecuador, prea and barava askem Jehovah for helpem hem kam bak lo kongregeson. Taem hem gohed prea yet doorbell lo haos blo hem krae. Tufala elder nao front lo door blo hem. Lo datfala visit, tufala elder hia hapi for duim samting for start for helpem hem.
17. Wanem gud samting nao iumi kasem from wei for helpem olketa wea wik lo spiritual wei?
17 Bae iumi hapi tumas taem iumi helpem olketa wea wik lo spiritual wei for kam bak lo Jehovah. Tingim wanem Salvador, wanfala pioneer wea traem best for helpem olketa inactive, hem talem: “Samfala taem, mi hapi gogo mi laek krae nao. Mi hapi tumas taem mi tingim hao Jehovah sevem wanfala lo olketa sheepsheep blo hem from world blo Satan and hao mi garem privilege for waka tugeta witim Hem for duim datwan.”—Acts 20:35.
18. Sapos iu wanfala wea inactive, wanem nao iu mas tingim?
18 Sapos iu stop for associate witim pipol blo Jehovah, plis tingim hao Jehovah hem still lovem iu. Hem laekem iu for kam bak lo hem. Iu bae need for waka hard for duim samfala samting for kam bak lo hem. Bat olsem datfala dadi lo tokpiksa blo Jesus, Jehovah hem gohed lukluk for iu kam bak, and hem bae hapi tumas for welkamim iu bak.
SONG 103 Olketa Shepherd—Present From God
^ par. 5 Jehovah laekem olketa wea lusim kongregeson for kam bak lo hem. Iumi savve duim staka samting for encouragem olketa wea laek for acceptim invitation blo Jehovah wea sei: “Kambaek long mi.” Lo disfala study article, bae iumi story raonem hao iumi savve helpem olketa for duim datwan.
^ par. 7 Mifala changem samfala nem.
^ par. 15 Samfala wea inactive maet kasem gud samting taem olketa studyim samfala chapter lo datfala buk Gohed Kasem Gud Samting From Love Bilong God, bat olketa narawan maet kasem gud samting taem olketa reviewim samfala chapter lo datfala buk Kam Klos Long Jehovah. Kongregeson Service Komiti bae disaedem hu nao fit for conductim study witim olketa wea inactive.
^ par. 68 PIKSA: Thrifala brata helpem wanfala brata wea laek for kam bak. Olketa duim datwan taem olketa contactim hem, helpem hem for savve olketa lovem hem, and lisin gud and trae for minim feeling blo hem.
