1. ¿Imaynan Jehová Dios sientekun mayqen iñiqmasinchispas llaqtanman kutimpuqtin?

YACHAMUSQANCHIS jina, Jehová Diosqa munakuywanmi ovejankunata cuidan, chinkaqtinkutaq maskhan. Ñaupa tiempopin Israel llaqtaqa Jehová Diosmanta t’aqakapuran, jinan paykunata niran: “Kutirikamuwaychis, noqapas kutirimullasqaykichistaqmi”, nispa. Kay tiempopipas Jehová Diosqa munashanmi iñiyninkupi chiriyapuqkuna llaqtanman kutimpunankuta (Mal. 3:6, 7). Jesuspa willasqan jina, Jehová Diospas angelkunapas anchatan kusikunku mayqen iñiqmasinchispas Jehová Diospaq llaqtanman kutimpuqtinkuqa (Luc. 15:10, 32).

2. ¿Imamantan kay yachachikuypi yachasunchis?

² Kaypin yachasunchis Jesuspa kinsa yachachikuyninkunamanta, chaymi yanapawasun Jehová Diosmanta karunchakuqkunata yanapananchispaq. Yachallasuntaqmi imaynatas paykunata yanapasunman chayta, imaraykus paykunata yanapananchispaq kallpachakunanchis chaytapas.

3, 4. ¿Imaraykun juj warmi tarinankama juj dracma qolqenta maskharan?

³ Wakin chiriyapuq iñiqmasinchiskunaqa anchatan munashanku Jehová Diospaq llaqtanman kutimpuyta, ichaqa paykunata tarinanchispaqqa tukuy yuyaywanmi maskhananchis. Chaytan yachachiwanchis Lucas qelqapi warmipas, payqa anchatan kallpachakuran chinkachisqan qolqeta tarinankama maskhananpaq (leey Lucas 15:8-10).

⁴ Ñaupa tiempopi casarakuq warmikunaqa mamankumantan chaskiqku chunka dracma qolqeta, paykunapaqqa chay chaskisqankuqa ancha valorniyoqmi karan. Yaqapaschá Lucas qelqapi warmipas chay chunka dracma  qolqenmanta jujninta chinkachiran, jinaspa paypaq ancha valorniyoq kasqanrayku tarinankama maskharan. Chay dracma qolqeta tarinanpaqqa juj lamparata jap’ichispan maskharan. Mana tarispataq wasinta pichaspa sumaqllata maskharan, jinan pichashaspa qolqenta tariran jinaspa anchata kusikuran. Chay qolqe tarisqanmantan amigankunaman vecinankunamanpas willaran, paywan kuska kusikunankupaq.

5. ¿Imaraykun kallpachakunanchis iñiyninkupi chiriyapuq iñiqmasinchiskunata tarinanchispaq?

⁵ Jesuspa willasqan jina imatapas tarinanchispaqqa kallpachakunanchismi. Chhaynallataqmi iñiyninkupi chiriyapuq iñiqmasinchiskunawanpas, paykunata tarinanchispaqqa maskhananchismi. Paykunamanta wakinninkuqa unayñan mana juñukunkuchu, wakintaq karupi tiyanku. Ichaqa munashankuchá Diospa llaqtanman kutimpuyta, iñiqmasinchiskunawan kuska Jehová Dios serviytapas, chaymi paykunata yanapananchis.

6. ¿Imatan llapanchispas ruwasunman chiriyapuq iñiqmasinchiskunata yanapananchispaq?

⁶ ¿Pikunan chiriyapuq iñiqmasinchiskunata maskhaypi yanapakunkuman? Llapallanchismi yanapakunanchis, manan umalliqkunallachu. ¿Reqsinkichu mayqen chiriyapuq iñiqmasinchiskunatapas? ¿Tarirankichu Diosmanta willashaspa mayqen chiriyapuq iñiqmasinchistapas? Iñiyninkupi chiriyapuq iñiqmasinchiskunawan tupaspaqa tapusunmanmi sutinta, maypi tiyasqantapas, jinaspa umalliqkunaman willasunman.

7. ¿Imatan Thomas iñiqmasinchismanta yachasunman?

⁷ ¿Imatan umalliqkuna ruwankuman chiriyapuq iñiqmasikunata yanapanankupaq? España nacionpi iñiqmasinchis Tomasmanta * yachasun. Payqa tawa chunka chiriyapuq iñiqmasikunatan yanaparan Jehová Diospa llaqtanman kutimpunankupaq. Paymi nin: “Ñaupaqtaqa jujkunatan tapukuni chiriyapuq iñiqmasinchiskunamanta, chaymantapas tapullanitaqmi pikunas manaña juñunakuykunaman jamushankuchu chayta. Chiriyapuq iñiqmasinchiskunaman visitaspayqa tapukullanitaqmi wawankumanta, familiankumantapas. Wakin chiriyapuq iñiqmasikunaq wawankupas Diosmanta allinta willashaspan iñiyninkupi chiriyapuranku, chaymi paykunatapas Jehová Diospa llaqtaman kutimpunankupaq yanapani”, nispa.

8. Lucas 15:17-24 nisqan jina, ¿imaynatan chinkasqa wawanta chaskiran?

⁸ ¿Imaynatan qhawarinanchis chiriyapuq iñiqmasinchiskunata? Chaypaq yachasunchis munakuq tayta chinkasqa wawanta imayna chaskisqanmanta (leey Lucas 15:17-24). Jesuspa willasqan jina, chinkasqa waynaqa mana allin ruwasqanta reparakuspan wasinman kutipuran. Chayta rikuspan taytanqa abrazaykunanpaq phawariran, chaywanmi rikuchiran wawanta anchata munakusqanta. Chay waynaqa pesapakuspan taytanta niran kamachinta jinalla chaskinanpaq. Ichaqa pesapakusqanta rikuspan taytanqa allin mijunata wayk’uchipuran, allin p’achawantaq p’achachiranpas. Chaykunata ruwaspan taytanqa wawanta jina chaskikapusharan, manan kamachinta jinachu.

9. ¿Imayna runan kananchis chiriyapuq iñiqmasikunata yanapananchispaq? (Qhaway “ Imaynatan yanapasunman kutimpuy munaq iñiqmasinchiskunata” nisqata).

 ⁹ Jehová Diosqa yachamusqanchis munakuq tayta jinan. Payqa munakunmi iñiyninkupi chiriyapuq iñiqmasinchiskunata, munashantaqmi llaqtanman kutimpunankutapas. Chaymi noqanchispas Jehová Dios jina munakuq khuyapayakuy, pacienciayoq ima kananchis chiriyapuq iñiqmasikunata yanapananchispaq. ¿Imaraykun munakuq, khuyapayakuy, pacienciayoq kananchis?

10. ¿Imaraykun pacienciayoq kananchis iñiyninkupi chiriyapuqkunata yanapananchispaq?

¹⁰ Yaqapaschá iñiyninkupi chiriyapuq iñiqmasinchiskunaqa mana usqhayllachu Diospa llaqtanman kutimpunqaku, chaymi pacienciayoq kananchis. Wakin iñiqmasinchiskunaqa askha kutita umalliqkuna juj hermanokunapas yanapaqtinkuñan Diospa llaqtanman kutimpunku. Chaymi Asia ladomanta hermananchis Nanciwanpas pasasqa, paymi nin: “Iñiq t’aqamanta amigaymi anchata yanapawaran, payqa kuraq ñañay jinan karan. Jehová Diosta kusisqa servisqaykutan yuyariq kayku. Imayna tarikusqayta willaqtiypas pacienciawanmi uyariwaq, consejotapas qowaq. Payqa cheqaq amigaymi karan, yanapawashallarantaqmi kanpas”, nispa.

11. ¿Imaraykun khuyapayakuq kananchis k’irisqa tarikuq iñiqmasinchiskunata yanapananchispaq?

¹¹ Khuyapayakuq kayqa juj jampi jinan. Wakin iñiqmasinchiskunaqa iñiq t’aqapi phiñachinakuspan Diospa llaqtanmanta t’aqakapuranku. Chaymi ancha k’irisqa sientekuspa mana munankuchu Diospa llaqtanman kutimpuyta. Chaymantapas wakin iñiqmasinchiskunaqa yaqapaschá mana  chanin tratasqa kanankupaq piensanku, jinaspa imayna sientekusqankumanta jujkunawan rimayta munashankuman (Sant. 1:19). Chaymi pasasqa hermananchis Mariawanpas, payqa iñiyninpin juj tiempo chiriyapuran. Paymi nin: “Maytan munasharani imayna sientekusqayta jujkunawan willayta”, nispa.

12. ¿Imaynatan Jehová Dios yanapan chiriyapuq iñiqmasinchiskunata?

¹² Jehová Diosqa anchatan munakun iñiyninkupi chiriyapuq iñiqmasinchiskunata, chaymi payman, llaqtanmanpas kutimpunankupaq yanapan. Chaypaq kaypi piensay: Juj pozoman urmaykuwaq chayri, ¿imatan ruwawaq? Manan sapallaykiqa chay pozomantaqa lloqsiyta atiwaqchu ¿riki? Chay pozomanta lloqsinaykipaqqa jujmi waskhata wijch’uykamusunayki, chutasunayki ima chaymanta lloqsinaykipaq. Chaytan Jehová Diospas ruwaran paymanta karunchakuq Israel runakunawan payqa ‘munakuyniywanmi, paykunaman [...] k’iraykuran’ otaq yanaparan (Oseas 11:4). Kay tiempopipas Jehová Diosqa yanapaytan munashan paymanta karunchakuq iñiqmasinchiskunata. Chay iñiqmasinchiskunamanta wakinqa imaymana sasachakuykunapi tarikuspan juj pozopi jina kashanku. Chhaynaña kaqtinpas Jehová Diosqa munashanmi paykunata yanapayta, llaqtanmanpas munashanmi pusamuyta. Munashallantajmi noqanchispas chaypi yanapakunanchista.

13. ¿Imaynatan munakuyninchis yanapanman iñiyninkupi chiriyapuq iñiqmasinchiskuna Diospa llaqtanman kutimpunankupaq?

¹³ Iñiyninkupi chiriyapuq iñiqmasinchiskunata yanapananchispaqqa munakuqmi  kananchis. Ñaupaq yachachikuypi rimamusqanchis iñiqmasinchis Pablon nin: “Wasiymanta lloqsimushaqtiymi juj kuraq hermanaqa sumaqta napaykuwaran, munakuywantaq rimapayawaranpas. Chay munakuwasqanta reparaspan juj wawa jina waqaykurani. Jinan hermanata nirani: ‘Jehová Dioschá kachamurasunki’, nispa. Chaymantapachan Diospa llaqtanmanqa kutimpurani”, nispa.

14. Lucas 15:4, 5 nisqan jina, ¿imatan oveja michiq ruwan chinkasqa ovejanta tarispa?

¹⁴ Kutimpuq iñiqmasinchiskunataqa yanapashanallanchismi, kallpachashanallanchistaqmi kanpas. ¿Imarayku? Yaqapaschá paykunaqa sinchi llakisqaraq tarikushankuman. Chaymantapas millay pachapitaq kasharanku chayqa, iñiyninkupi kallpachanatan munanku. Chaymi paykunata iñiyninkupi yanapananchispaq, kallpachananchispaq ima kallpachakunanchis. Ñaupaqpi Jesuspa willasqan jina, oveja michiqqa tukuy yuyaywanmi chinkasqa ovejanta maskharan, chinkasqa ovejanta tarispataq much’un patapi wakin ovejankunaq kasqanman aparan, chaymantataq munakuywan jampiran, cuidaran ima (leey Lucas 15:4, 5).

15. ¿Imaynatan yanapasunman Diospa llaqtanman kutimpuq iñiqmasinchiskunata? (Qhaway “ Chiriyapuq iñiqmasinchiskunapaq juj sumaq yanapay” nisqata).

¹⁵ Kutimpuq iñiqmasinchiskunataqa yanapananchismi allin iñiyniyoq kanankupaq (Rom. 15:1). Chaypaqmi yanapawasun Jehová Diospa santo espiritun, Biblia, juj qelqanchiskunapas. Juj umalliqmi nin: “Mayqen chiriyapuq iñiqmasinchispas kutimpuqtinqa, necesitanmi Bibliawan juj  qelqanchiskunawanpas yanapanata”, nispa. * Chhaynaqa, sichus umalliqkuna niwasun chiriyapuq iñiqmasinchiskunata yanapananchispaq chayqa, kusisqan yanapananchis. Chay umalliqmi nillantaq: “Diospa llaqtanman kutimpuq iñiqmasinchiskunaqa maytan munanku juj iñiqmasikunawan parlariyta, amigoyoq kaytapas”, nispa.

16. ¿Imaynapin yachanchis angelkuna yanapawashasqanchista?

¹⁶ Angelkunapas yanapawanchismi iñiyninkupi chiriyapuqkunata tarispa yanapananchispaq (Apo. 14:6). Ecuador nacionmanta Silvio sutiyoq iñiqmasinchismi nin: “Jehová Diosmantan tukuy sonqoywan mañakurani llaqtanman pusawananpaq. Mañakushallaqtiyraqmi iskay umalliqkunaqa punkuyta takamuranku, jinan kaq rato yanapawaranku Jehová Diospa llaqtanman kutipunaypaq”, nispa.

17. ¿Imaynan sientekusunchis iñiyninkupi chiriyapuq iñiqmasinchiskunata yanapaspa?

¹⁷ Ancha kusikunapaqmi iñiyninkupi chiriyapuq iñiqmasinchiskunata yanapayqa. Tukuy tiemponwan Jehová Diosta serviq Salvador sutiyoq iñiqmasinchismi nin: “Iñiyninkupi chiriyapuq iñiqmasinchiskuna kutimpuqtinkuqa anchatan kusikuni, chaymi mayninpiqa kusikuymanta waqaniraq. Kusikullanitaqmi Jehová Dios ovejachankunata kay millay pachamanta llaqtanman pusamusqanmantapas, chaymi iñiyninkupi chiriyapuqkunata yanapanaypaq kallpachakushallani”, nispa (Hech. 20:35).

18. Jehová Diospa llaqtanmantaña karunchakuranki chaypas, ¿imamantan mana iskayanaykichu?

¹⁸ Diospa llaqtanmantaña karunchakuranki chaypas Jehová Diosqa anchatan munasunki, jinaspapas payqa munashanmi llaqtanman kutimpunaykita. Chaypaqmi ichaqa kallpachakunayki kanqa. Jesuspa willasqan jina, Jehová Diosqa juj munakuq tayta jinan anchata munakusunki.