1. Eaa to Iehova manako me ariu mai tetai o tana mamoe?

MEI ta tatou i uriuri i te atikara o mua ake, kua akaaite a Iehova iaia ki te tiaki mamoe meitaki tei akono maru i tana mamoe. Ka aruaru aia i te kimi i tei aere ke. Akakite a Iehova ki to Iseraela tei akaruke iaia: “E ariu mai kotou kiaku, e naku e ariu atu kia kotou.” Kite tatou ko te reira rai tona manako no te mea karanga aia: “Kare au e tu ke ke.” (Mala. 3:6, 7) Karanga a Iesu, e rekareka maata to Iehova e te au angera me oki mai Tona tavini tei aere ke, Kiaia.—Luka 15:10, 32.

2. Eaa ta tatou ka uriuri i teia atikara?

² Ka akara tatou i ta Iesu akatutuanga e toru no te tauturu anga i te aronga tei aere ke mei ia Iehova. Ka uriuri tatou i te au tu ka akaari, me tauturu i te au mamoe ngaro kia oki mai kiaia. E ka kite tatou i te tumu maata no te tauturu i te aronga paruparu te akarongo.

3-4. Eaa te tumu i kimi marie ei te vaine tei taikuia ia Luka 15:8-10, i tana moni diderama tei ngaro?

³ Ka tauta pakari tatou i te kimi i te aronga tei inangaro i te oki mai kia Iehova. I roto i tetai parabole tei tataia i roto i ta Luka Evangeria, kua akakite mai a Iesu i tetai vaine tei tauta pakari i te kimi i te apinganui tei ngaro—tana moni diderama. Kua akamārama mai teia akatutuanga i te puapinga no te kimi marie.—E tatau ia Luka 15:8-10.

⁴ Akamārama maira Iesu i te tu o te vaine i tona kite anga i tana moni diderama tei ngaro. I to Iesu tuatau, ka oronga te metua vaine ngati Iuda i te kou moni diderama e tai ngauru ki te tamaine i tona rā akaipoipoanga. Penei ko te reira tei tupu i konei. Manako teia vaine e kua topa te moni ki runga  i te taua. No reira kua tutungi aia i te ramepa e kua kimi atura kare ra e apinga. Penei kare e marama ana tana ramepa no te kimi i te moni ario meangiti. Ka purumu marie aia i te are katoa. I roto i te pueu i purumu mai aia kua kitea tana diderama e kanapa ra i roto i te mori. Mataora tikai aia! Kua akaputu mai aia i tona au taeake e te aronga i te pae mai i te akakite i tana nuti mataora.

5. Eaa ra ka ngata ai i te kimi i te aronga tei akaruke i te putuputuanga?

⁵ Mei ta tatou i kite mei ta Iesu akatutuanga, ka tauta pakari tetai i te kimi i te apinga tei ngaro. Pera katoa ka anoanoia tatou kia tauta pakari i te kimi i te aronga tei akaruke i te putuputuanga. Kua roa te tuatau kare ratou i kapiti mai ana kia tatou. Penei kua neke ratou ki te ngai kare te au taeake i reira i kite ia ratou. Teianei taime, penei te inangaro ra teia aronga paruparu te akarongo i te oki mai kia Iehova. Inangaro ratou i te tavini akaou ia Iehova e te kapiti ki te au taeake akamori mou, inara te anoano maira ratou i te tauturu.

6. Akapeea te katoatoa i roto i te putuputuanga me tauturu i te kimi i te aronga paruparu te akarongo?

⁶ Koai ma ka tauturu i te kimi marie i te aronga paruparu te akarongo? Ko tatou katoatoa—te aronga pakari, te au painia, te au mema pamiri, e te au papuritia o te putuputuanga—ka kimi ia ratou. E oa me kore e kopu tangata ainei toou kua paruparu te akarongo? Aravei ana ainei koe i tei paruparu te akarongo i roto i te angaanga tutu aere me kore i te ngai tangata? Akamārama kiaia me ka inangaro aia kia atoroia atu, ka mataora koe i te oronga i tona numero, tona ngai nooanga ki te aronga pakari i reira.

7. Eaa taau i kite mai mei te tangata pakari ko Thomas?

⁷ Eaa te au takainga tau ka rave te aronga pakari no te kimi i te aronga tei inangaro i te oki mai kia Iehova? Akamanako ana i ta tetai tangata pakari ko Thomas i akakite mai, * tei noo ana i Paniora. Kua tauturu aia e 40 tuma Au Kite kia oki mai ki te putuputuanga. Karanga a Thomas: “Mea mua, ka ui au ki te au taeake e te au tuaine tei kite i te ngai e noo ana te reira au taeake. Me kore ka ui au ki te au papuritia me kua maara ia ratou i tetai pae kare e aere akaou ana ki te uipaanga. Ka maoraora te katoatoa i te tauturu no te mea te inangaro ra ratou i te kimi. Muri mai me aere au i te aravei i te au taeake paruparu, ka ui au peea maira te tamariki e tetai atu kopu tangata. E apai mai ana te aronga paruparu i ta ratou tamariki ki te uipaanga, e kua riro ana ei papuritia i te putuputuanga. Ka tauturu ia ratou kia oki mai kia Iehova.”

8. Te akatutuanga no te tamaiti ngaro ia Luka 15:17-24, akapeea te metua tane i te akono anga i tana tamaiti tataraara?

⁸ Eaa te au tu ka akaari tatou me tauturu i te aronga e inangaro ra i te oki mai kia Iehova? Akara ana i te apiianga mei ta Iesu akatutuanga no te tamaiti ngaro tei akaruke i te kainga. (E tatau ia Luka 15:17-24.) Akamārama mai a Iesu e kua rako tangata maira taua tamaiti e kua oki mai ki tona kainga. Oro atura tona metua i te aravei iaia, takave atura, e kua ongi atura i tana tamaiti. Kinokino te akava ngakau o te tamaiti e kua manako kare aia e tau kia kapikiia ei tamaiti. Kua tangi rai te metua tane i tana tamaiti, tei akakite i tona manako kiaia. Kua rave te metua i tetai angaanga tei akairo i tona inangaro ki tana tamaiti e kua ārikiia aia ei  tamaiti nana, kare ei tavini. Tana i rave, kua maani umukai te metua tane e kua akakakau i tana tamaiti tataraara ki te kakau pu meitaki.

9. Eaa te au tu ka akaari tatou no te tauturu i te aronga paruparu te akarongo kia oki mai kia Iehova? (Akara i te pia “ Me Tauturu i te Aronga ka Oki Mai.”)

⁹ Aite a Iehova ki te metua tane i roto i te reira akatutuanga. Akaperepere aia i to tatou au taeake e te au tuaine paruparu te akarongo, inangaro aia ia ratou kia oki mai. Na te aru anga ia Iehova, ka tauturu tatou ia ratou kia oki mai. Ka anoanoia tatou kia akakoromaki, kia akaaroa, e kia inangaro ia ratou. Eaa te tumu ka akaari tatou i teia au tu, e akapeea tatou me rave i teia?

10. Akapeea te tu akakoromaki me tauturu i tetai kia maroiroi akaou i te pae vaerua?

¹⁰ Kia akakoromaki tatou no te mea ka anoanoia te tuatau no tetai taeake kia maroiroi akaou i te pae vaerua. Akakite mai te aronga tei paruparu i mua ana e kua ariu mai ratou no te mea kua atoro putuputu te aronga pakari e tetai pae o te putuputuanga ia ratou. Tata te tuaine ko Nancy, no Southeast Asia, e: “Kua tauturu mai toku oa mou iaku i roto i te putuputuanga. Akaperepere aia iaku mei te tuakana rai. Akamaara mai aia i to maua au tuatau mataora. Ka akarongo marie aia me tuatua au i toku manako, e ka ako mai i te tauturu iaku. E oa mou tikai aia, kua papa i te tauturu i te au taime ravarai.”

11. Eaa te tumu ka akaaroa i tetai tei ngakau mamae?

¹¹ Te tu akaaroa mei te manongi maru rai te tu; ka akaoraora i te ngakau mamae. Tetai pae kua paruparu e kua akamoupuku no te mamae a tetai taeake i rave kiaia i roto i te  putuputuanga. No teia tumu kare ratou e inangaro i te oki mai kia Iehova. Manako ratou kare i tau tei tupu kia ratou. Penei ka inangaro ratou i tetai tangata kia akarongo e kia mārama i to ratou manako. (Iako. 1:19) Karanga a María, tei paruparu te akarongo i mua ana e, “Kua inangaro au i tetai kia akarongo mai i toku manako, kia akapumaana iaku, e kia tauturu mai iaku.”

12. Akatutu mai i to Iehova aroa i te akamaroiroi i te aronga paruparu kia oki mai ki tona iti tangata.

¹² Akamārama mai te Pipiria i to Iehova aroa akaperepere no tona iti tangata ki te taura te tu. Na roto i teea tu? Akara ana i teia akatutuanga: Akamanako ana me maremoia koe e kua pei atu tetai tangata i te apinga papanu kia koe. Ka mareka koe i te reira no te mea kua tauturu aia ia koe. Inara kare e rava ua te apinga papanu e ora ai koe. Anu te vai kare koe e ora me kare koe e uutiia ki runga i te poti. Ka anoanoia tetai tangata kia pei i te taura kia koe e ka uuti mai ia koe ki runga i te poti. Karanga a Iehova no te aronga Iseraela tei aere ke: “Kua arataki au ia ratou ki te taura a te tangata nei, i te au ri ra i te aroa.” (Hose. 11:4) Aiteite rai to te Atua manako no te aronga tei akamutu i te tavini iaia, kua maremoia kua rokoia e te manamanata e te taitaia. Inangaro aia ia ratou kia kite e te akaperepere ra aia ia ratou e ka tauturu ia ratou kia oki mai kiaia. Ka taangaanga katoa a Iehova ia koe kia aroa ia ratou.

13. Akakite mai i tetai akaraanga e akatutu maira i te ririnui o te aroa taeake.

¹³ E puapinga i te akapapu ki te aronga paruparu te akarongo e te akaperepere ra a  Iehova e tatou katoa ia ratou. Kua paruparu te akarongo o Pablo, tei taikuia i te atikara i mua ake, e 30 tuma mataiti. Karanga aia: “Tetai popongi te akaruke ra au i toku kainga kua aravei mai teia tuaine pakarikari maru iaku e kua tuatua marie mai kiaku. Kua aue au mei tetai tamaiti rai. Akakite atu au kiaia e kua tono mai a Iehova iaia kia tuatua kiaku. I te reira taime kua iki au i te oki mai kia Iehova.”

14. Kia tau ki te akatutuanga o Luka 15:4, 5, eaa ta te tiaki mamoe i rave i te kite anga i te mamoe ngaro?

¹⁴ Ka tauturu ua atu tatou i te aronga paruparu te akarongo. Mei te tamaiti ngaro i roto i ta Iesu akatutuanga, ka roa te tuatau e maru mai ei ratou. Paruparu ratou i te pae vaerua no te mea kua tavarenga to Satani ao ia ratou e kua paruparu to ratou pirianga kia Iehova. Ka anoanoia tatou kia tauturu ia ratou kia maroiroi akaou to ratou akarongo ia Iehova. Roto i te akatutuanga o te mamoe ngaro, akamārama mai a Iesu e ka tuku te tiaki mamoe i te mamoe ki runga i tona pakauivi e ka apai atura ki te anana. Kua roa te taime no te tiaki mamoe i te kimi maroiroi i te mamoe ngaro. Kite aia e ka amo aia i te reira ki te anana, kare te reira e maroiroi ana.—E tatau ia Luka 15:4, 5.

15. Akapeea tatou me tauturu i te aronga paruparu ka inangaro i te oki mai kia Iehova? (Akara i te pia “ Apinga Tauturu Maata.”)

¹⁵ Penei ka anoanoia tatou kia akapou i te taime e te maroiroi no te tauturu i te aronga paruparu kia autu i to ratou turanga. Mari ua ake te tauturu a te vaerua o Iehova, tana Tuatua, e te au puka i roto i te  putuputuanga, ka maroiroi akaou ratou i te pae vaerua. (Roma 15:1) Akapeea tatou me rave i teia? Karanga te tangata pakari e, “Ka anoano te maata anga o te aronga paruparu te akarongo i te apii Pipiria me iki ratou i te oki mai kia Iehova.” * Me patiia koe kia tauturu i te apii i tetai tei paruparu te akarongo, e āriki puareinga i te reira akameitakianga? Karanga katoa aia, “Te papuritia ka apii kiaia, ka anoanoia aia ei oa mou ka tuatua tei paruparu i tona manako kiaia.”

16. Akapeea tatou e kite ei ka tauturu te au angera ia tatou?

¹⁶ Maata te au tupuanga e akaari maira e kua tauturu te au angera i te kimi i te aronga tei paruparu te akarongo e tei inangaro i te oki mai kia Iehova. (Apo. 14:6) Ei akaraanga, ko Silvio, no Ecuador, kua pure akatenga kia rauka te tauturu i te oki mai ki te putuputuanga. Iaia e pure ra, kua topapaia mai tona ngutupa. Tae mai nga tangata pakari. Kua mataora raua i te tauturu iaia.

17. Eaa ta tatou akameitakianga me tauturu i tetai tei paruparu i te pae vaerua?

¹⁷ Ka rekareka maata tatou i te tauturu i tetai tei paruparu i te pae vaerua kia oki mai kia Iehova. Akara i ta Salvador i tuatua, e painia tei tauturu i te aronga paruparu: “Tetai taime ka ngata iaku i te tapu i toku roimata mataora. Mareka maata au e kua akaora a Iehova i tana mamoe akaperepere mei to Satani ao e kua rauka iaku te akameitakianga i te akatupu i tona anoano na te tauturu anga i te aronga paruparu te akarongo.”—Anga. 20:35.

18. Me paruparu toou akarongo, eaa taau i papu?

¹⁸ Me kua akamutu koe i te kapiti ki te iti tangata o Iehova, papu ia koe te akaperepere maira aia ia koe. Inangaro aia ia koe kia oki mai kiaia. Ka anoanoia ra koe kia rave i te au takainga maroiroi kia oki mai kiaia. Mei te metua tane i roto i ta Iesu akatutuanga, tapapa maira a Iehova ia koe kia oki mai e ka āriki pumaana aia ia koe ki te are.