1. Mutapu ik ukatay kwiyov Yehova anch mukoku wend wamuchirikin?

MUDI mutapu twamanang mu mutu wa mulong wasambelang, Yehova wifanikeshin ni kafung muwamp uyibangidina amikoku end awonsu nich rukat. Ni ukat kumukimb mukoku mwawonsu ukata kupumbuk. Yehova wayileja in Isarel amulika anch: “[Chirikany] kudi am, niyam nikuchirik kudi en.” Twij anch udandamedin kand kusal mwamu nlel mulong ulondin anch: “Kinikarumukinap.” (Mal. 3:6, 7) Yesu walonda anch Yehova nau angel akat kwov musangar nakash anch kashalapol umwing wadia washadikina kal wamuchirikin Nzamb.​—Luka 15:10, 32.

2. Yom ik tukushinshikina mu mutu wa mulong winou?

² El tushinshikinany yishimu yisatu ya Yesu yitufundishina malejan ma usey piur pa mutapu wa kuyikwash antu alikina kal kumusadin Yehova. Tukwisambin mikadil yimwing ya pakampwil tufanyidina kumekesh chakwel tutwish kuyikwash amikoku ashadikina kal kumuchirikin Yehova. Ni tukuman mulong wak chidi cha usey kusal usu wa kuyikwash aziyina.

3-4. Mulong wak mband wisambidinau mu Luka 15:8-10 wasuraba rufalang rend rashadika?

³ Tufanyidin kusal usu nakash mulong wa kuyikimb antu akatina kumuchirikin Yehova. Mu chishimu chifundinau mu Evanjil wa Luka, Yesu warumburila mutapu wakimbay mband chom chend cha usey chashadishay—rufalang ra utad wa argent ratazukangau anch drachme. Chikunku cha usey nakash mu rusangu riner chawiy chilejena mutapu wakimbay mband winou rufalang.​—Tang Luka 15:8-10.

⁴ Yesu warumburila mutapu wiyovay mband pamanay rufalang rend ra usey ra utad wa argent rashadika. Chimeken anch pa chirung cha Yesu, amaku amwing in Yuda ayinkishang anau amband kamuchakat ka nfalang dikum ja drachme pa dichuku dia uruw wa mwanend. Pamwing ap rufalang rading rikimbinay mband winou rading ra usey nakash kudi ndiy mulong rading pakach pa nfalang jamwinkishau kudi makwend. Mband winou watonga anch pamwing ap raturikang kal pansh. Chawiy wakisha mwend wa kasu ni wasambisha kutalol nich, pakwez karimanap bwat. Chimeken anch  mwend wend wadingap umunyikina nakash mulong wa kutwish kuman karufalang kakemp ka utad wa argent. Chawiy, wakomba nawamp chikumbu chakabuj. Kupwa pa rufunfut rakombay pamekana chibayibay cha rufalang ra utad wa argent ku chitokish cha mwend wa kasu. Musangar mud ik wovay! Wayitazuka arund nend ni amutej nend ni wayijikisha rusangu ruwamp.

5. Mulong wak chikutwish kwikal chikash pa kuyijingunin antu alikina kal kukumangan ni kusal mudimu wa kulejan?

⁵ Mudi mutapu twamana kal mu chilakej chapanay Yesu, chitining kusal usu mulong wa kuman chom chashadikang kal. Chilik chimwing, tufanyidin kusal usu mulong wa kuyijingunin antu alikina kal kukumangan ni kusal mudimu wa kulejan. Pakutwish kusut mivu yivud kudiosh kwimikinau kukumangan ni kulejan pamwing niyetu. Pamwing ap ashemunikidin kal kwi ndond yakadiau kuyijik kudi akadivar a ndond yiniya. Pakwez tukutwish kwikal nich kashinsh anch katat amwing pakach pa antu inay alikina kal kusal mudimu wa kulejan akatin chakin kamu kumuchirikin Yehova. Akatin kumusadin kand Yehova pamwing ni akadivar ni anambaz nau, pakwez akutwish kusal mwamu ching anch twayikwash.

6. Mutapu ik ukutwishau antu awonsu mu chikumangen kwipan mu kuyikimb antu alikina kal kukumangan ni kusal mudimu wa kulejan?

⁶ Anany akutwisha kukwash kuyikimb antu alikina kal kukumangan ni kusal mudimu wa kulejan? Etu awonsu​—amakurump, ayibol, antu a mu dijuku, ni in kulejan awonsu a mu chikumangen​—tukutwish kukwash kuyijingunin antu inay. Ov, ukweting murund ney ap mwanamakwey walikina kal kukumangan ni kusal mudimu wa kulejan? Ov, watanin muntu walikina kal kukumangan ni kusal mudimu wa kulejan piwadia ulejena ku chis ni chis ap pa ndond yidia antu avud? Murumburila muntu anch ang ukatishin anch amwendin pa chikumbu, ukusanger kutambul nimero wend wa telefon ap kwijik kushichay mulong wa kutwal nsangu jinej kudi amakurump a mu chikumangen chey.

7. Yom ik wilejidina ku yom yalonday mukadivar Thomas udia mukurump wa chikumangen?

⁷ Yom ik yikutwishau amakurump kusal pakampwil mulong wa kuyijingunin antu akatina kumuchirikin Yehova? Shinshikin yom yalonday mukadivar Thomas, * mukurump umwing wa chikumangen ushicha mwi ngand ya Espany. Wayikwashin kal akadivar ni anambaz 40 ni kusut kumuchirikin Yehova. Thomas ulondin anch: “Chakusambish, nikat kuyipulang akadivar ni anambaz kushalijan anch akutwish kwijik ndond yishichau antu alikina kal kukumangan ni kusal mudimu wa kulejan. Ap kand nikat kuyipul in kulejan anch avurikin muntu walikinap kal kukumangan. Antu avud mu chikumangen akat kusangar nakash kukwash mulong akat kwiyov anch niyau anungin chikas ku mudimu wa kuyikimb antu inay. Kupwa, anch nayendin akadivar ni anambaz alikina kal kukumangan ni kulejan, nikat kuyipul piur pa anau ni akadivar nau a ku mujimbu. Antu amwing alikina kal kukumangan ni kusal mudimu wa kulejan ayangang pamwing ni anau ku yikumangan, ni pamwing ap chisu chimwing an inay ading kand in kulejan. Chitin kand kuyikwash an inay mulong wa kumuchirikin Yehova.”

8. Mu chishimu cha mwan washadika, chirumburilau mu Luka 15:17-24, tatuku wamusadina mutapu ik mwanend wakarumuka?

⁸ Mikadil ik tufanyidina kumekesh anch tukimbin kuyikwash antu akatina kuchirik kudi Yehova? Shinshikin malejan mamwing tukutwisha kwilejin ku chishimu cha Yesu cha mwan wadiokala kwol kwau. (Tang Luka 15:17-24.) Yesu warumburila mutapu washikenay mwan kuchirish manangu ni kukwat mupak wa kuchirik kwol kwau. Tatuku waya mau kumwak mwan ni wamubwikata nich chirungul mulong wa kumekesh anch umukatin mwanend ikundj. Mwan wading ni kom kamufishina nich ni wiyova anch kawanyidinap kumutazuk kudi tatukwend anch  mwanend. Pading parumburilay mwan mutapu wading wiyovilay, tatukwend witeka pa ndond yend. Kupwa tatuku wakwata mupak wa kusal yom yimwing mulong wa kumwinkish mwanend kashinsh anch kamwakinap mudi muswik pakwez mudi mwan wa mu dijuku ukatinay. Mulong wa kumwinkish kashinsh kinak, tatuku watenchika musambu ni wamwinkisha mwanend wakarumuka masun mawamp.

9. Mikadil ik tufanyidina kumekesh mulong wa kuyikwash antu alikina kal kukumangan ni kusal mudimu wa kulejan chakwel amuchirikin Yehova? (Tal mushet ulondina anch “ Mutapu wa Kuyikwash Antu Akatina Kuchirik.”)

⁹ Yehova udi mudi tatuku wa mu chishimu chinech. Uyikatin akadivar ni anambaz netu alikina kal kusal mudimu wa kulejan ni ukatin anch amuchirikin. Anch twamwimburij Yehova, tukuyikwash chakwel achirik. Chinech chitin kushimpish muchim, kwitek pa ndond ya muntu, ni kumekesh rukat. Mulong wak tufanyidin kumekesh mikadil yiney ya pakampwil, ni mutapu ik tukutwisha kusal mwamu?

10. Mulong wak tufanyidin kushimpish muchim mulong wa kumukwash muntu chakwel achirish urund wend ni Yehova?

¹⁰ Tufanyidin kushimpish muchim mulong chitining chisu pakwel anch muntu amuchirikin Yehova. Akadivar ni anambaz avud alika kukumangan ni kusal mudimu wa kulejan pakur alondin anch amuchirikina Yehova kupwa kwa kuyendin tupamp tuvud kudi amakurump ni kudi antu akwau mu chikumangen. Nambaz Nancy wa mu Aziy ufundin anch: “Murund umwing wa piswimp mu chikumangen wankwasha nakash. Wading winkatin mudi yayend. Wanvurisha piur pa yisu yiwamp twasutisha nend pakur. Wata matu ni kwintesh nawamp chisu namuleja yovil yam, ni wanginkisha yiyul pakad kwidjidjek. Wamekesha anch udi murund wakin, udia kwaku mulong wa kukwash chisu chawonsu.”

11. Mulong wak tufanyidin kwitek pa ndond ya muntu mulong wa kumukwash muntu ukweta ujim?

¹¹ Anch muntu amujimesh, chikutwish kumwovish kusansan mudi chitat. Kwitek pa ndond ya  muntu kudi mudi mon ukweta usu ukutwisha kumukwash muntu kuyerik. Antu amwing alikina kal kukumangan ni kusal mudimu wa kulejan ayijimesha kudi muntu kanang mu chikumangen kwasutin kal mivu yivud ni adandamedin kwov ujim ni kusansan mulong wa yom yayisalau. Yom yiney yayikatwil kal impu ya kumuchirikin Yehova. Amwing akutwish kutong anch ayisadina yom yakad kutentam. Akutwish kwikal ni kuswir kwa muntu ukutwisha kuyitesh ni kwov kurumburik kwa yovil yau. (Jak. 1:19) María, walika kusal mudimu wa kulejan mu chisu kanang ulondin anch: “Nading nikwet kuswir kwa muntu ukutwisha kwintesh, kwinkasikesh, kwinginkish yiyul yiwamp ni kwinkwash.”

12. Let chilakej chimekeshina mutapu ukata rukat ra Yehova kuyikwash antu alikina kal kusal mudimu wa kulejan chakwel amuchirikin.

¹² Bibil ufanikeshin rukat ra Yehova mulong wa antu end ni moj. Mu mutapu ik ufanikena rukat ra Yehova ni moj? Shinshikin chilakej ech: Tongin bil mudi wajiy kal mu karung ukweta mambek nakash ni kupwa muntu kanang wakudjibwil mbemb wa pa mem (gilet de sauvetage). Chakin kamu ukusanger nakash ukwash winou mulong ukukukwash chakwel upempam. Pakwez kupwa kwa kwikal ni mbemb wa pa mem, chitin kand chom chikwau mulong wa kupand. Mulong mem matalel nakash, chawiy ukutwishap kupand anch wandaminap mu waat. Ukuswiriken anch muntu kanang akudjibwil moj ni akupwit chakwel wandam mu waat. Yehova walonda piur pa in Isarel ading apumbukina kal anch: “Nayipwitila kudi am nich [moj] wa rukat.” (Ozey 11:4) Winou wawiy mutapu wiyovilay Nzamb nlel piur pa antu alikina kal kumusadin ni arishina ni milong yikash ni yakamish. Ukatin anch antu inay ijik anch uyikatin ni ukatin kuyikwash chakwel achirik kudi ndiy. Ni Yehova ukutwish kukusadin ey chakwel ayimekeshin antu inay rukat riner.

13. Yom yamanay Pablo yimekeshin mutapu ik anch rukat retu rikutwish kuyikwash antu akwau kuchirik kudi Yehova?

¹³ Chidi cha usey nakash kuyinkish antu alikina  kal kukumangan ni kusal mudimu wa kulejan kashinsh anch Yehova uyikatin, ni anch niyetu tuyikatin. Pablo wajimbulangau mu mutu wa mulong wasambelang, walikap kukumangan ni kusal mudimu wa kulejan mu mivu 30 ni kusut. Ulondin anch: “Dichuku dimwing pamanch, pinading nidiokila kwol kwam, nasankanijana ni nambaz umwing ipal wading muntu muwamp ni wangambambisha mu mutapu wa rukat. Nasambisha kudil mudi mwanikanch. Namuleja anch chimeken anch Yehova wamutuma chakwel ambamb nam. Pa chisu chinicha pawiy nakwata mupak wa kuchirik kudi Yehova.”

14. Kukwatijan ni chishimu chidia mu Luka 15:4, 5, yom ik yasalangay kafung anch wamuman mukoku wend wadia washadikang kal?

¹⁴ Tufanyidin kudandamen kuyikwash ni kuyikasikesh antu alikina kal kukumangan ni kusal mudimu wa kulejan. Mudi mwiyovay mwan washadika wisambidinau mu chishimu cha Yesu, antu inay akutwish kudandamen kwov kusansan kwitina chisu chilemp chakwel lel kupwa. Ni aziyin pamwing ap mu spiritu mulong wa yom yayishikedina mu mangand ma Satan. Tufanyidin kuyikwash chakwel akasikesh kand ritiy rau mudiay Yehova. Mu chishimu cha mukoku washadika, Yesu warumburila mutapu kafung wamutekay mukoku pa makij mend ni kumuchirish pa chisak cha amikoku akwau. Kafung wading wasutishang kal chisu chivud ni wasala usu nakash mulong wa kumukimb mukoku wading washadikang kal. Pakwez wamana kand anch chitin kumuchirish mukoku winou pa chisak cha akwau mulong kakutwishap kuchirik amwinend.​—Tang Luka 15:4, 5.

15. Mutapu ik tukutwisha kuyikwash antu aziyina akatina kumuchirikin Yehova? (Tal mushet ulondina anch “ Broshir wa Usey Nakash.”)

¹⁵ Chikutwish kutwit chisu chivud ni usu mulong wa kuyikwash antu alikina kal kukumangan ni kusal mudimu wa kulejan chakwel atwish kupandikan yom yiyikangeshina kumuchirikin Yehova. Pakwez kusutil ukwash wa spiritu wa  Yehova, Dizu diend, ni mikand yibudishinau kudi dirijek diend, tukutwish kuyikwash kwikal kand akash mu spiritu. (Rom 15:1) Mutapu ik tukutwisha kusal mwamu? Mukurump umwing wa chikumangen ukweta ukaliweny ulondin anch: “Antu avud alikina kal kukumangan ni kusal mudimu wa kulejan akweting kuswir kwa kwilejiril Bibil kupwa kwa kukwat mupak wa kumuchirikin Yehova.” * Chawiy anch akwit kwilej ni muntu wa mutapu winou, ufanyidin kwitiy nich musangar chisend chinech. Mukurump winou ulondin kand anch: “Mwin kulejan wilejina ni muntu mudi winou ufanyidin kwikal murund muwamp, muntu ukutwishau kuchingejin ni kumulej yom patok kudi muntu wilejinay nend.”

16. Mutapu ik twija anch tukutwish kuchingejin ukwash wa mwiur?

¹⁶ Kudi yilakej yivud yimekeshina anch angel akat kutukwashang kuyijingunin antu alikina kal kukumangan ni kusal mudimu wa kulejan pakwez akatina kumuchirikin Yehova. (Kuj. 14:6) Chilakej, Silvio wa mwi ngand ya Équateur wamulembilang Yehova chisu chawonsu chakwel aman muntu ukutwisha kumukwash. Padingay ukat kulembil, akokala ku chikumbu chend. Amakurump aad ading pa chis. Dichuku dinidia, amakurump inay ading ni musangar ujim wa kusambish kumukwash mukadivar winou.

17. Chiyukish ik tukata kutambul anch twayikwash antu aziyina mu spiritu?

¹⁷ Tukwikal ni musangar nakash anch twayikwash antu aziyina mu spiritu kumuchirikin Yehova. Shinshikin yom yilondinay mukadivar Salvador, udia chibol wasala usu wa kuyikwash antu alikina kal kukumangan ni kusal mudimu wa kulejan, ulondin anch: “Yisu yimwing nikat kudil mansoj ma musangar. Chikat kwinsangaresh nakash anch naman anch Yehova wamupandish kal mukoku wend mu mangand ma Satan ni kuman anch nading ni dilau dia kusal pamwing ni Yehova mu chisend chinech.”​—Mid. 20:35.

18. Anch walikin kal kukumangan ni kusal mudimu wa kulejan, ukutwish kwikal ni kashinsh ik?

¹⁸ Anch walikin kal kubombakan pamwing nau atushalapol a Yehova, ukutwish kwikal nich kashinsh anch Yehova udandamedin kukukat. Ukatin anch uchirik kudi ndiy. Ufanyidin kusal usu wa kuchirik kudi ndiy. Pakwez mudi tatuku wisambidinau mu chishimu cha Yesu, Yehova uchingedin anch uchirik ni ukukwak nich musangar nakash.