1. Na ngoi so mbeni taba ti Jéhovah oko akiri na lo, a yeke sara lo tongana nyen?

TONGANA ti so e bâ na yâ ti article so ahon, Jéhovah ahaka lo wani na mbeni nzoni berger so ayeke bâ lege ti ataba ti lo oko oko kue na ndoye. Nga lo yeke gi peko ti ala kue so ague yongoro na lo. Jéhovah atene na azo ti Israël so azia lo, atene: “Ala kiri na mbi, na mbi yeke kiri na ala.” E hinga so lo ngbâ ti pensé tongaso ndali ti so lo tene: “Mbi changé pëpe.” (Mal. 3:6, 7). Jésus atene so Jéhovah nga na a-ange ayeke na ngia mingi na ngoi so même mbeni wakua ti Jéhovah oko so ague yongoro na lo akiri na lo.—Luc 15:10, 32.

2. Nyen la e yeke bâ na yâ ti article so?

² Zia e gbu li na ndö ti atoli ti Jésus ota so afa na e akota ye ti manda na ndö ti fason ti mungo maboko na aita so ague yongoro na Jéhovah. E yeke sara tënë na ndö ti ambeni mbilimbili sarango ye so e bezoin ni ti mû maboko na ataba so agirisa ti kiri na Jéhovah. E yeke bâ nga so e yeke duti na ngia mingi na ngoi so e sara ngangu ti mû maboko na mbeni ita so azia ti fa tënë nga ti gue na bungbi ti kiri na Jéhovah.

3-4. Ngbanga ti nyen la wali so a sara tënë ti lo na Luc 15:8-10 agi lê ti nginza ti lo ti drachme so agirisa nzoni?

³ A lingbi e sara ngangu ti wara aita so aye ti kiri na Jéhovah. Na yâ ti mbeni toli so ayeke na yâ ti Évangile ti Luc, Jésus asara tënë ti mbeni wali so agi mbeni ye ti ngangu ngere so agirisa: lê ti nginza ti drachme. Toli so agboto lê ti e na ndö ti gingo lê ti nginza ni.—Diko Luc 15:8-10.

⁴ Jésus afa atënë ti bê ti mbeni wali so awara mbeni lê ti nginza ti drachme ti ngangu ngere so agirisa. Na ngoi ti Jésus, na bango ni amama so ayeke aJuif ayeke mû lani lê ti nginza ti drachme bale-oko na mbeni molenge ti ala ti wali na lango ti mariage ti  molenge ni. Peut-être lê ti nginza so ayeke lani kota ye mingi na lê ti wali so ndali ti so a yeke mbeni ye so mama ti lo amû na lo. Wali ni apensé so lê ti nginza ni atï na sese na yâ ti da. Tongaso, lo zia wâ na yâ ti lampe na lo gi ni, me lo bâ ye oko ape. Peut-être lampe so lo zia mafuta dä aza ngangu ape ti tene lo bâ kete lê ti nginza ti argent ni. Na nda ni, lo balê yâ ti da ni yeke yeke kue. Na yâ ti poussière so lo bungbi ni ndo oko, wâ ti lampe ni aza na ndö ti lê ti nginza ti drachme ti lo so ayeke ye ti ngangu ngere na lê ti lo. Bê ti lo adë! Lo iri akamarade ti lo nga na avoizin ti lo ti fa na ala nzoni tënë so.

5. Ngbanga ti nyen la a lingbi ti duti ngangu ti wara aita so ague yongoro na bungbi ti Jéhovah?

⁵ Tongana ti so toli ti Jésus so afa, ti wara mbeni ye so agirisa ahunda effort. Legeoko nga, ti hinga ndo so aita so azia ti fa tënë nga ti gue na bungbi ayeke dä, a lingbi e sara effort. Peut-être ala zia ti fa tënë nga ti gue na bungbi a sara angu awe. Peut-être ala gue na mbeni ndo so aita ti ndo ni ahinga ala ape. Me fadeso, kite ayeke dä ape so ambeni ita so azia ti fa tënë nga ti gue na bungbi aye ti kiri na Jéhovah. Ala ye ti sara na Jéhovah legeoko na sewa ti lo so avoro lo na lege ni, me ala bezoin mungo maboko ti e.

6. Tongana nyen la azo kue na yâ ti congrégation alingbi ti mû maboko ti gi aita so azia ti fa tënë nga ti gue na bungbi?

⁶ Azo wa la alingbi ti mû maboko ti gi aita so azia ti fa tënë nga ti gue na bungbi? E kue, a-ancien, apionnier, afami ti ala nga na awafango tënë. Eskê mo yeke na mbeni kamarade wala mbeni fami so azia ti fa tënë nga ti gue na bungbi? Eskê mo tingbi na mbeni ita so azia ti fa tënë nga ti gue na bungbi na ngoi so mo yeke fa tënë da na da wala na mbeni lege nde? Fa na zo ni so tongana lo yeda ti tene mbeni zo aga abâ lo, a yeke nzere na mo ti mû numéro ti lo wala adresse ti lo na a-ancien ti congrégation ti ndo ni.

7. Nyen la e lingbi ti manda na lege ti atënë ti mbeni ancien so iri ti lo ayeke Thomas?

⁷ A yeke kozoni kue kua ti a-ancien ti gi aita so azia ti fa tënë nga ti gue na bungbi so aye ti kiri na Jéhovah. Me ala lingbi ti sara ni tongana nyen? Bâ tënë so mbeni ancien so ayeke na Espagne, so iri ti lo ayeke Thomas *, atene. Lo mû maboko na aTémoin ahon 40 ti kiri na congrégation. Thomas atene: “Kozoni, mbi hunda na aita nde nde wala ala hinga ndo so aita tongaso ayeke dä. Wala mbi yeke hunda awafango tënë wala ala hinga mbeni ita so ayeke ga na bungbi encore ape. Mingi ti aita ti congrégation ayeke na ngia ti mû maboko na mbi ndali ti so ala bâ so ala kue ala yeke gi mara ti aita tongaso. Na pekoni, tongana mbi gue na ndo ti aita so azia ti fa tënë nga ti gue na bungbi, mbi yeke hunda ala na ndö ti amolenge ti ala nga na afami ti ala. Ambeni ita tongaso ayeke gue lani na amolenge ti ala na bungbi, na peut-être amolenge ni ayeke lani awafango tënë na mbeni ngoi. A lingbi nga ti mû maboko na ala ti kiri na Jéhovah.”

8. Na yâ ti toli ti molenge so agirisa, so ayeke na Luc 15:17-24, tongana nyen la babâ ni asara ye na mbage ti molenge ti lo so achangé bê ti lo?

⁸ Asarango ye wa la e bezoin ni ti mû maboko na aita so aye ti kiri na Jéhovah? Bâ ambeni ye so e lingbi ti manda na lege ti toli ti Jésus na ndö ti molenge so aquitté yanga-da. (Diko Luc 15:17-24.) Jésus afa tongana nyen la na nda ni li ti molenge ni aga dä na lo mû desizion ti kiri na yanga-da. Babâ ni amû loro lo wara molenge ni nga lo gbu lo na kate ti fa na lo so lo ngbâ ti ye lo. Conscience ti molenge ni afâ ngbanga na li ti lo nga lo bâ so lo lingbi ape ti tene babâ ni airi lo molenge ti lo. Molenge ni azi bê ti lo na babâ ti lo na babâ ni abâ mawa ti lo. Na pekoni, babâ ni asara ambeni ye ti fa na molenge ni so lo yamba  lo tongana mbeni membre ti sewa ni so lo ye lo mingi, me pëpe tongana zo ti kua. Ti fa ni, babâ ni aleke mbeni matanga nga lo mû na molenge ti lo so achangé bê ti lo apendere bongo.

9. Asarango ye wa la e bezoin ni ti mû maboko na azo so ague yongoro na bungbi ti Jéhovah ti kiri na lo? (Bâ encadré “ Lege ti mû maboko na aita so aye ti kiri.”)

⁹ Jéhovah ayeke tongana babâ ti yâ ti toli so. Lo ye mingi aita ti e so ague yongoro na bungbi ti lo na lo ye si ala kiri na lo. Tongana e mû tapande ti Jéhovah, e lingbi ti mû maboko na ala ti kiri. A hunda ti tene e kanga bê na ala, e bâ mawa ti ala nga e ye ala. Ngbanga ti nyen la a lingbi e duti na ambilimbili sarango ye so? E lingbi ti fa ni tongana nyen?

10. Ngbanga ti nyen la a lingbi e kanga bê ti mû maboko na mbeni ita ti kiri na Jéhovah?

¹⁰ A lingbi e kanga bê ndali ti so ti tene mbeni ita akiri na Jéhovah ahunda ngoi. Aita mingi so azia lani ti fa tënë nga ti gue na bungbi atene so ala kiri na Jéhovah na peko ti so a-ancien nga na aita asara vizite na ala fani mingi. Nancy, mbeni ita-wali so ayeke na Asie du Sud-Est atene: “Mbeni kota kamarade ti mbi na yâ ti congrégation amû maboko na mbi lani mingi. Lo ye mbi tongana yaya ti lo ti wali. Lo dabe ti mbi na apendere ngoi so e duti ndo oko ândö. Lo yeke kanga bê lo mä mbi na ngoi so mbi yeke fa atënë ti bê ti mbi nga lo sara mbeto ape ti mû na mbi wango. Lo fa so lo yeke tâ kamarade so ayeke nduru ti mû maboko na mbi na ngoi kue.”

11. Ngbanga ti nyen la a lingbi e zia terê ti e na place ti zo so bê ti lo ason?

¹¹ Ziango terê na place ti zo ayeke tongana mbeni nzoni pommade so asara si songo ti ye adë, a lingbi ti dë bê ti zo so ason. Bê ti ambeni ita so azia ti fa tënë nga ti gue na bungbi ason na terê ti mbeni ita na yâ ti congrégation teti ngu mingi. A sara si ala yeke na nzara ti kiri na Jéhovah  ape. Peut-être ambeni apensé so a sara ye na ala na lege ni ape. Peut-être ala bezoin mbeni zo ti mä ala nga ti comprendre ala (Jacq. 1:19). María, so na mbeni ngoi azia ti fa tënë nga ti gue na bungbi, atene: “Mbi bezoin lani mbeni zo ti mä mbi, ti dë bê ti mbi, ti mû na mbi anzoni wango nga ti mû maboko na mbi.”

12. Na lege wa la ndoye ti Jéhovah ayeke tongana mbeni kamba?

¹² Bible atene so ndoye ti Jéhovah na mbage ti azo ti lo ayeke tongana mbeni kamba. Na lege wa? Bâ tapande so: Tara ti bâ so mo tï na ngu na ngoi so amapo ayeke sara, na mo yeke nyon ngu. Mbeni zo abi na mo mbeni ye so mo peut ti gbu ni si mo linda ngu ape. Kite ayeke dä ape so mo yeke kiri singila ndali ti mungo maboko so ndali ti so asara si a yeke ngangu na mo mingi ape ti ngbâ na ndö ti ngu. Me gï ye so mo gbu so alingbi ape ti sara si mo ngbâ na fini. Ngu ni adë, nga mo yeke ngbâ na fini gï tongana mo si na terê ti bateau so aga ti sö mo. Mo bezoin mbeni zo ti bi na mo kamba na ti gboto mo na mbage ti bateau ni. Jéhovah atene na ndö ti azo ti Israël so ague yongoro na lo, lo tene: ‘Mbi mû akamba si mbi gboto na ala, akamba ti ndoye.’ (Os. 11:4). Laso Jéhovah angbâ ti sara nga tongaso na azo so azia ti sara na lo nga so akpale na agingo bê ahon ndö ti ala. Lo ye si ala hinga so lo ye ala nga lo ye ti gboto ala na mbage ti lo. Jéhovah alingbi ti sara kua na mo ti sara si ala hinga so lo ye ala.

13. Tongana nyen la ye so asi na Pablo afa so ndoye ti e alingbi ti mû maboko na ambeni zo ti kiri na Jéhovah?

¹³ A yeke kota ye ti sara si aita so azia ti fa tënë nga ti gue na bungbi ahinga biani so Jéhovah aye ala mingi nga so e kue e ye ala mingi. Pablo, so a sara tënë ti lo na yâ ti article so ahon, azia lani ti fa tënë nga ti gue na bungbi ahon ngu 30.  Lo tene: “Na mbeni ndapre, na ngoi so mbi yeke quitté yanga-da ti hon, mbi tingbi na mbeni ita-wali so ayeke mbakoro so ayeke na nzoni bê, lo sara tënë na mbi na ndoye. Mbi komanse ti toto tongana mbeni kete molenge. Mbi tene na lo so na bango ni Jéhovah la atokua lo na mbi. Na ngoi ni so la mbi mû desizion ti kiri na Jéhovah.”

14. Ti gue oko na toli so ayeke na Luc 15:4, 5, na ngoi so berger ni awara taba ti lo so agirisa, nyen la lo sara?

¹⁴ A lingbi e mû maboko lakue na aita so azia ti fa tënë nga ti gue na bungbi. Legeoko tongana ti molenge so agirisa ti yâ ti toli ti Jésus, peut-être kä so ayeke mü hio ape ayeke na bê ti ala. Âmanke ala woko na lege ti yingo ndali ti aye so asi na ala na yâ ti dunia ti Satan so. A lingbi e mû maboko na ala ti kiri ti duti na mabe na Jéhovah. Na yâ ti toli ti taba so agirisa, Jésus afa tongana nyen la berger ni ayô taba ni, lo kiri na lo na yâ ti kundu ni. Kozo ti tene lo wara taba ni, lo mû ngoi nga na ngangu ti lo ti gi lo. Me lo bâ so a lingbi lo yô taba ni ti kiri na lo na yâ ti kundu ni ndali ti so taba ni ayeke na ngangu ape ti tambela ti kiri.—Diko Luc 15:4, 5.

15. Tongana nyen la e lingbi ti mû maboko na aita so awoko so aye ti kiri na Jéhovah? (Bâ encadré “ Mbeni kpengba brochure.”)

¹⁵ Peut-être e bezoin ti mû ngoi nga na ngangu ti e ti mû maboko na ambeni ita so azia ti fa tënë nga ti gue na bungbi ti hon ndö ti mbeni kpale so asara si a yeke ngangu na ala ti kiri na Jéhovah. Me grâce na yingo ti Jéhovah, Bible nga na ambeti so bungbi ti Jéhovah asigi na ni, e lingbi ti mû maboko na ala ti kiri ti kpengba na lege ti yingo (aRom. 15:1). E lingbi ti sara ni tongana nyen? Mbeni ancien so ayeke na kode mingi atene: “Mingi ti aita so azia ti fa tënë nga ti gue na  bungbi abezoin ti tene a manda Bible na ala na peko ti so ala mû desizion ti kiri ti sara na Jéhovah.” * Tongaso tongana a hunda na mo ti manda Bible na mbeni ita tongaso, a lingbi mo yeda na ni na ngia. Ancien so atene nga, atene: “A lingbi wafango tënë so amanda Bible na ita ni aduti mbeni nzoni kamarade, mbeni zo so ita ni alingbi ti zi bê ti lo na lo.”

16. E hinga tongana nyen so a-ange ayeke mû maboko na e?

¹⁶ Aye mingi so asi afa so a-ange ayeke mû maboko na e ti wara aita so azia ti fa tënë nga ti gue na bungbi so aye ti kiri na Jéhovah (Apoc. 14:6). Na tapande, Silvio, so ayeke zo ti Équateur, asambela na bê ti lo kue ti wara mungo maboko ti kiri na yâ ti congrégation. Na ngoi so lo ngbâ ti sambela, a-ancien use asi na yanga-da ti lo. Na ngoi ti vizite ni, ala yeke na ngia ti komanse ti mû na lo mungo maboko so lo bezoin ni.

17. Tongana e mû maboko na aita so awoko na lege ti yingo, nyen la e yeke wara na pekoni?

¹⁷ E yeke wara ngia mingi tongana e mû maboko na aita so awoko na lege ti yingo ti kiri na Jéhovah. Bâ ye so Salvador, mbeni pionnier so asara ngangu mingi ti mû maboko na aita so azia ti fa tënë nga ti gue na bungbi, atene: “Tongana mbi pensé na aita so azia ti fa tënë nga ti gue na bungbi so akiri na Jéhovah, terê ti mbi anzere na ngu ti lê ti mbi asigi. A nzere na mbi mingi so mbi lingbi ti sara kua maboko na maboko na Jéhovah ti mû maboko na awakua ti lo, so ayeke ye ti ngangu ngere na lê ti lo, ti sigi na yâ ti dunia ti Satan ti kiri na yâ ti congrégation.”—Kus. 20:35.

18. Tongana mo zia ti fa tënë nga ti gue na bungbi, nyen la mo lingbi ti duti na confiance na ni?

¹⁸ Tongana mo zia ti fa tënë nga ti gue na bungbi, mo lingbi ti duti na confiance so Jéhovah angbâ ti ye mo. Lo ye ti tene mo kiri na lo. A lingbi mo sara ambeni ye ti kiri na lo. Me legeoko tongana babâ ti yâ ti toli ti Jésus, Jéhovah ayeke ku ti tene mo kiri na lo nga lo yeke yamba mo na ngia.