LAHATSORATSY FIANARA 26
“Mimpolia Amiko”
“Mimpolia amiko, le himpoly aminareo aho.”—MAL. 3:7.
HIRA 102 ‘Ampio Ireo Mila Ampiana’
HO HITANAO ATO *
1. Ino ty tsapani-Jehovah lafa manompo azy ndraiky ty raiky amy aondriny reo?
NIHITANTSIKA tamy lahatsoratsy taloha teo, fa nampitovy ty vatany amy mpiaraky aondry raiky soa fanahy noho mikarakara ty aondriny Jehovah. Ilàny koa ze aondry nivio lala. Zao ty nivolanini-Jehovah tamy Israelita niala taminy rey: “Mimpolia amiko, le himpoly aminareo aho.” Mino tsika hoe mbo zay avao ty tsapany, satria nivola ie hoe: “Tsy miova aho.” (Mal. 3:6, 7) Nivola Jesosy fa falifaly biby Jehovah noho anjely reo ndre misy mpanomponi-Jehovah raiky avao nimpoly nanompo Azy ndraiky.—Lioka 15:10, 32.
2. Ino ty hodinihintsika amy lahatsoratsy toy?
2 Handiniky fanohara telo nataoni-Jesosy tsika. Mifantoky amy ty fanampea ani-ze tsy nanompo ani-Jehovah sasy fanohara reo. Horesahintsika ato ty toetsy mila ananantsika mba hahafahantsika manampy ty aondry jeby himpoly amy Jehovah. Ho hitantsika koa hoe tsy ho matiantoky tsika laha miezaky hanampy ani-azy malemy reo.
MILA DRALA TROBO
3-4. Manino ampela voaresaky amy Lioka 15:8-10 ao iny ro nila soa ani-dralany drakma iny?
3 Mila miezaky marè tsika mba hila ani-ze maniry himpoly amy Jehovah. Niresaky mikasiky ampela raiky nitrobo drala Jesosy tamy fanohara raiky voatantara amy Filazantsarani-Lioka ao. Lafovily amy ampela iny drala drakma io, ka nilàny. Ty ezaky mafy nataony mba hilà ani-drala io ro tena teani-fanohara io hifantohantsika.—Vakio Lioka 15:8-10.
4 Nitantaranini-Jesosy hoe manao akory ty fihetseham-poni-ampela raiky lafa nitrobo ty dralany lafovily drakma raiky, le bakeo nihitany. Lafa hanambaly ty ampela jiosy tamy androni-Jesosy, le mety hameani-reniny drala drakma folo. Mety ho raiky amy drakma folo reo azy nitrobo iny. Nieritseritsy ampela iny hoe nilatsaky an-tany eo drala iny. Namelo jiro ie bakeo nanenty ty manodidy azy, fe tsy hitany raha iny. Tsy tena nazava soa vasa jiro io mba ahità ani-drala volafoty maliniky io. Farany, nifafany soa ty anaty trano ao iaby. Io amy zay fa hitany dralany drakma iny, mipelapelatsy lafa tarafini-jiro amy lemboky navoriny rey eo. Zay ie vo nihetra! Nikaihiny iaby ty namany noho ty olo tanà raiky aminy mba hitantarany ani-vaovao soa iny.
5. Manino ro mety ho sarotsy ty mahita ani-azy fa tsy miaraky amy fiangona rey?
5 Nihitantsika tamy fanoharani-Jesosy iny fa misy asa tsy maintsy atao mba ho hita ndraiky ty raha nitrobo. Manahaky ani-zay koa fa mety mila miasa mafy tsika vo mahita ani-azy fa tsy miaraky amy fiangona rey. Mety fa an-taony maro zay ty tsy niarahan-drozy amintsika. Mety ho nifindra amy faritsy misy mpiara-manompo tsy mahay an-drozy rey mihintsy aza rozy. Fe azo antoky hoe maniry himpoly amy Jehovah ty sisany amin-drozy henanizao. Ta hanompo ani-Jehovah miaraky amy rahalahy noho anabavin-drozy reo rozy, fe mila ty fanampeantsika.
6. Ino ty azon’olo iaby amy fiangona eo atao mba hilà ani-olo fa tsy miaraky amy fiangona rey?
6 Ia ty afaky mila ani-olo fa tsy miaraky amy fiangona rey? Samby afaky manao raha tsika iaby, na anti-panahy, na mpisava lala, na fianakaviany, na mpitory amy fiangona eo. Mana nama na fianakavia fa tsy mitory sasy va iha? Nisy fotoa va iha nahita olo tsy mitory sasy lafa nitory santrano na anjavalala? Hazavao amin’olo iny fa laha teany ty hotsidihy, le ho azonao amea ani-anti-panahy aminareo eo ty adiresiny na ty nimerony.
7. Ino ty azonao ianara baka amy raha nivolanini-anti-panahy raiky atao hoe Thomas?
7 Ino iaby ty dingana azoni-anti-panahy orihy mba hahità ani-ze olo ta himpoly amy Jehovah? Henteo moa ty raha nivolanini-anti-panahy raiky atao hoe Thomas. * Mipetraky an’Espaigny any ie, le fa mandilatsini-40 ty rahalahy noho anabavy nampeany mba himpoly amy fiangona eo. Hoy ty asany: “Anontaneako tse ze rahalahy noho anabavy mety hahay hoe aia henanizao ty trano misy ani-olo sisany tsy nitory sasy. Na anontaneako ty mpitory vasa mahatiaro hoe ia ty olo fa ela tsy nivory. Samby manome valiny iaby ty ankamaroan-drozy, satria mahatsapa hoe tafilitsy amy filà iny. Ka lafa mitsidiky ani-rahalahy noho anabavy rey amy zay aho afara atoy, le manontany mikasiky ty anakin-drozy noho ty longon-drozy hafa. Nanday ty anakiny nivory ty sisany amin’olo rey taloha, sady mety fa nitory koa ajà rey tamy zay. Azo ampea mba himpoly amy Jehovah koa rozy rey.”
AMPEO ANAKINI-JEHOVAH REY MBA HIMPOLY NDRAIKY
8. Laha hentea ty fanohara amy Lioka 15:17-24 ao, ino ty nataoni-baba iny lafa nibebaky anakilahiny nitrobo iny?
8 Ino ty toetsy tokony hananantsika lafa hanampy ani-azy ta himpoly amy Jehovah rey? Hianatsy raha maromaro baka amy fanoharani-Jesosy mikasiky ani-anaky niala tan-tranoni-babany tao iny tsika. (Vakio Lioka 15:17-24.) Nivola Jesosy fa nitsapani-anaky iny avao hoe tsy mety ty nataony, farany nanapa-kevitsy holy ie. Nilomay namonjy azy babany, le bakeo nandrakoky azy marè mba ho tsapany hoe tea azy babany. Tsy nampilamy ty eritseritsiny ty raha nataony ka tsy maeva azy sasy hoasany ty kaihy hoe anaky. Niferinesani-babany ie, lafa naboakiny ty tam-pony tao. Bakeo nanao raha babany mba hanomeza toky azy fa tena falifaly ie mandramby azy ndraiky. Tsy hataony sahala amy mpikarama io koa ie, fa anaky tena teany. Mba hanaporofoa ani-zay, le nandamy fety babany sady nameany akanjo soasoa anakilahiny iny.
9. Ino koa ty toetsy tokony hananantsika lafa hanampy olo raiky tsy nitory mba himpoly amy Jehovah? (Henteo ty efajoro hoe “ Akory ty Hanampea ani-Ze Ta Himpoly Ndraiky?”)
9 Manahaky ani-baba amy fanohara io Jehovah. Teany rahalahy noho anabavintsika fa tsy mitory sasy rey ka teany himpoly aminy ndraiky. Laha manahaky ani-Jehovah tsika, le ho afaky hanampy an-drozy himpoly. Ho vitantsika raha zay laha mana fahareta, fiferinesa, noho fitiava tsika. Manino tsika ro tokony hana ani-toetsy reo, le akory ty hananantsika azy?
10. Manino tsika ro mila manam-pahareta lafa manampy olo hifandramby soa amy Jehovah ndraiky?
10 Mila manam-pahareta tsika satria mitaky fotoa zay vo himpoly amy Jehovah ndraiky olo iny. Maro amin’olo tsy nitory sasy taloha rey ro nieky hoe fa nitsidiky azy imaro ty anti-panahy noho ty mpiara-manompo hafa, zay ie vo nimpoly amy Jehovah ndraiky. Hoy Nancy, ranabavy baka antimo antinanani-Azỳ any: “Tena nanampy ahy rahavavy raiky tena namako amy fiangona ao zay. Teany sahala amy zokiny io aho. Nampitiaroviny ahy ty fotoa mamy niarahanay taloha rey. Janjininy soa aho lafa namoaky ty fihetseham-poko, le tsy misalasala koa ie manome soso-kevitsy ahy. Asehony hoe tena nama parè hanampy amy fotoa iaby ie.”
11. Manino tsika ro mila mahay miferinay lafa manampy olo kivy?
11 Lafa miferinay olo kivy tsika, le sahala manosotsy fanafody mba hahajanga ty feriny. Mbo meloky amin’olo amy fiangona eo avao ty olo sisany tsy mitory sasy, ndre fa ela afara atoy aza. Manjary sarotsy aminy amy zay ty mimpoly amy Jehovah. Mahatsapa vasa ie hoe tsy rariny ty raha natao taminy. Mety hila olo hijanjy azy noho mahatakatsy ty fihetseham-pony ie. (Jak. 1:19) Fa nisy fotoa María tsy nitory sasy. Hoy ty asany: “Nila olo mba mijanjy ahy aho, olo azoko amoaha ty ranomasoko noho afaky manoro hevitsy ahy.”
12. Manino ty fitiavani-Jehovah ro maninto olo himpoly aminy ndraiky? Hazavao amy ohatsy.
12 Ampitovizini-Baiboly amy taly ty fitiavani-Jehovah ty vahoakiny. Manino ro azo ampitovizy amy taly ty fitiavani-Jehovah? Toy misy ohatsy: Eritsereto hoe tafilatsaky anivo riaky eny iha. Manintsy biby rano iny sady marè ty lozoky. Fa manomboky milentiky iha, fe nisy olo nanday laka marìny eny, le nanoraky raha azonao ivahara. Azo antoky fa ho falifaly iha. Fe mbo mila raha hafa iha zay vo ho avotsy. Mila manoraky taly ho anao olo nanday laka iny, le maninto anao baka anaty rano ao. Nivola ho zao Jehovah, mikasiky ani-Israelita niala taminy rey: “Nitariky an-drozy avao aho, ... tamy talim-pitiava.” (Hosea 11:4) Mbo manahaky ani-zay avao koa ty tsapa-Ndranahary henanizao, lafa mahita hoe milentiky anatini-fahasahirana noho fiasan-doha azy tsy manompo azy sasy rey. Teany ho tsapan-drozy ty fitiavany, sady taominy rozy mba himpoly aminy. Afaky mampiasa anao Jehovah mba hampiseho amin-drozy hoe teany rozy.
13. Manino ty tantarani-Pablo ro mampiseho hoe afaky manampy olo himpoly amy Jehovah tsika lafa mana fitiava?
13 Tena mila amea toky azy tsy mitory sasy rey hoe tea an-drozy Jehovah, le tsika koa tea an-drozy. Fa tanatini-30 tao Pablo, azy voaresaky tamy lahatsoratsy teo iny ro tsy nitory sasy. Hoy ty asany: “Ndraiky maray zay lafa niala tan-trano ao aho, le nifankatojiky tamy ranabavy raiky be tao. Soa fanahy ie lafa niresaky tamiko. Nilatsaky ty ranomasoko, le nanomboky nitany manahaky anakajà io aho. Nivolaniko ie hoe atao raha Jehovah io ro naniraky azy mba hiresaky amiko. Tamy fotoa iny avao aho le nanapa-kevitsy himpoly amy Jehovah.”
AMPEO AM-PITIAVA TY MALEMY
14. Laha hentea fanohara voaresaky amy Lioka 15:4, 5 io, ino ty nataoni-mpiaraky aondry iny laha vo nihitany aondry nitrobo iny?
14 Mila ampeantsika noho ampaherezintsika matetiky azy tsy mitory sasy rey. Mety hatahotsy manahaky ani-anaky trobo tamy fanoharani-Jesosy iny rozy. Niay amy tontoloni-Satana any koa rozy, ka mety fa nihanalemy ara-panahy. Tokony hampeantsika rozy mba hanatanjaky ty finoan-drozy ani-Jehovah. Niresahini-Jesosy tamy fanohara mikasiky ani-aondry trobo iny fa nataoni-mpiaraky aondry iny an-tsorokiny eo aondry iny, le nateriny amy namany rey eny. Fa nandany fotoa noho hery mpiaraky aondry iny mba hahità ani-aondry nitrobo io. Fe hainy hoe mila andesy amy namany rey any aondry iny satria tsy hana hery hanaova ani-zay am-batany.—Vakio Lioka 15:4, 5.
15. Akory ty azontsika anampea ty malemy ta himpoly amy Jehovah? (Henteo ty efajoro hoe “ Fitaova Tena Ilà.”)
15 Mety hanoka fotoa noho hery tsika mba hanampea ani-azy tsy mitory sasy rey handresy ani-ze raha manaka azy tsy himpoly amy Jehovah. Fe hanampy antsika ty fanahy masini-Jehovah noho ty Safàny, voho ty boky noho gazety amea antsika, ka ho vitantsika ty hanampy an-drozy mba hatanjaky ara-panahy ndraiky. (Rom. 15:1) Akory ty hanaovantsika ani-zay? Niresaky ho zao ty anti-panahy raiky fa ampy traikefa: “Lafa tapa-kevitsy himpoly amy Jehovah ty olo raiky tsy nitory sasy, le mila ampianary Baiboly.” * Ka tsy ho teanao va laha iha ro amea tombontsoa hampianatsy Baiboly olo tsy nitory sasy? Nivola koa anti-panahy iny hoe: “Tokony ho tena namany azy mpitory mampianatsy azy iny, ka ho azony atokisa noho iresaha soa.”
MISY HAFALEA TY AN-DANITSY ANY NOHO AN-TANY ETOY
16. Manino tsika ro matoky fa manoha antsika ty anjely?
16 Hita tamy fitantarà maro hoe manampy antsika ty anjely mba hahita olo tsy nitory sasy fe maniry himpoly amy Jehovah. (Apok. 14:6) Nivavaky marè, ohatsy, Silvio baka an’Ekoatera any, mba hisy olo hanampy azy himpoly ndraiky. Mbo anatini-mivavaky ie, le nisy anti-panahy roe niavy am-baravarany eo. Tamy fitsidiha iny, le nifalifaly biby rozy satria nanome ze fanampea nilàny.
17. Ino ty soa azontsika lafa manampy olo malemy ara-panahy?
17 Falifaly biby tsika lafa manampy olo malemy ara-panahy himpoly amy Jehovah ndraiky. Nahatsapa ani-zay ty mpisava lala manoka raiky kaihy hoe Salvador, lafa niezaky nanampy olo tsy nitory sasy. Nivola ie hoe: “Falifaly marè iha kindraiky, ka tsy tanjakinao ty ranomasonao. Tena falifaly aho lafa mieritseritsy hoe nanavotsy ty raiky amy aondriny tena teany reo baka amy tontoloni-Satana any Jehovah, le nana tombontsoa hiaraky miasa Aminy aho.”—Asa. 20:35.
18. Ino ty raha azonao atokisa laha tsy nitory sasy iha?
18 Laha nijano tsy niaraky amy vahoakini-Jehovah sasy iha, le afaky matoky fa mbo tea anao ie. Teany himpoly aminy iha. Mitaky ezaky aloha ty fimpolia aminy. Fe manahaky baba tamy fanoharani-Jesosy iny Jehovah. Tsy lininy ty himpolianao, sady ho falifaly mandramby anao ie lafa moly iha.
HIRA 103 Lehilahy ho Fanomezana Ireo Mpiandry
^ feh. 5 Teani-Jehovah himpoly aminy ndraiky azy fa tsy niaraky amy fiangona rey. Manasa an-drozy Jehovah hoe: “Mimpolia amiko.” Maro ty raha azontsika atao mba hampahereza ani-ze ta haneky ani-fanasà io. Hodinihintsika amy lahatsoratsy toy ato hoe akory ty azontsika anampea an-drozy himpoly ndraiky.
^ feh. 7 Novà ty anara sisany.
^ feh. 15 Mba hanampea ani-azy tsy nitory sasy rey, le mety hianatsy tampany vitsivitsy amy boky Mijanòna amy Fitiava-Ndranahary Ao ty sisany, fa ty ilany nampimpoly nianatsy toko vitsivitsy amy boky Manatòna an’Andriamanitra. Ty Komitini-Fanompoani-Fiangona ro mandiniky hoe ia ro mety soa hitariky ani-fampianara io.
^ feh. 68 SARY: Samby miezaky manampy rahalahy raiky ta himpoly rahalahy telo rey. Miezaky mifandramby aminy avao rozy, manome toky azy hoe tea azy, sady mijanjy noho miezaky hahatakatsy ty raha mahazo azy.
