DJAMBA DJƐ WEKELO 26
‘Nyokalɔ le lemi’
‘Nyokalɔ le lemi, ko lemi langokalɔ tenyo.’—Malaki 3:7.
YEEMBO 102 ‘Tokotshɛ anto walekɔ wɔdju’ (lá Otetela)
LA YOPASƐ *
1. Yehova ndawokaka ngetemo wina w’ɔnkɔkɔ wovungisa okalɔnde?
NGETE isɛnyi lá djamba djemboheta, Yehova ndaawɛndjɛka la onami w’ɛnkɔkɔ wɔ wɔlɔ wokotshɛ mposɛ y’ɛnkɔkɔ wɛnde wembovunga. Ntsha wɔmɔtshi wombovunga, nde ntshɔka ntóhone. Nde ashimelaka as’Isariyɛlɛ wowangwisa ante: ‘Nyokalɔ le lemi, ko lemi langokalɔ tenyo.’ Iso ndjewaka djɛ, nde akindje nangha akambo wopo w’ɔkɔmɔ te asembowangɔ lɔko kɛnɛ, ladjikɛnde nde ndjawolaka ante: ‘Lemi mpatshikitana.’ (Mal. 3:6, 7) Yeso atepelaka ante Yehova l’andjelo ndjalaka l’osasa w’efula wina w’ɔnkɔkɔ wovungisa okalɔnde.—Luka 15:10, 32.
2. Ɛnaso lɔɔ nge lá djamba djɛnɛ?
2 Tokoshishima ndjɔmbɔmba isato yɛ Yeso itɛnyɛ wopo wɔ nkotshɛ waambowangɔka me Yehova. Tongopika wiso lá wekeka ɛmɔtshi woyɛso la djonyi djɛ nkótshɛ ɛnkɔkɔ wembovunga dj’iwo nkalɔ tende. Lekomo tongɛna ladjikɛnge oyɛwɔ djonyi nsuka anto walekɔ wɔdju.
OHONELO WƆ N’KFUTA DJƐ ‘DRAKIMƐ N’TSHWISA’
3-4. Ladjikɛnge omoto wolumolawɔ lá Luka 15:8-10, ndahonaka n’kfuta djɛnde djɛ ndatshutshɛ la n’kɔmɛ tshɛ?
3 Iso ladjɛ ndjila welo efula djɛ ndjisola waakombola nkalɔ te Yehova. Lá ndjɔmbɔmba kɛnde kelekɔ lá Evanjiliyo wɔ Luka, Yeso ɛnyɛka lɛdji lɔ omoto ohonande ekete kɛnde kɛ n’tsho kinda tshutshɛ: N’kfuta dj’iyetaka drakimɛ. Ndjɔmbɔmba kɛkɔ nsepaka yambalo yɛso lá ohomba wɔ ndjewa mpona.—Wala Luka 15:8-10.
4 Yeso ɛnyɛ kɛnɛ kɛ omoto ɔsɔ ndooke wina wɔ ndisola drakimɛ djɛnde djɛ n’tsho djinda ntshutshɛ. Akokaki ndjala, l’ɛtɛndɔ kɛnde, wale w’amato amɔtshi wase Juda, wákandelaki wana awɔ wamato t’awala akfuta 10 wa drakimɛ. Mbala imɔtshi n’kfuta dj’iyakambe lá ndjɔmbɔmba kɛ Yeso, djawalemaki l’eteyi kɛ akfuta 10 wasɔ. Entengo omoto ndakanelaka ante yombɔnkfɔ nde lá looko, ndɔmbɔpɛtshɛ ikɔkɔpɔ y’avuta ko dombohona todjena tonkfumɔ, ko apɛnyi. Nkoka ndjala, owaya windapɛtshɛ wotapɛtaki wɔlɔ djɛ nde ndjisola n’kfuta djɛ daambi djetshwisa. L’ekomo, ndɔmbɔmba mvulu kɛnde k’otondo wɔlɔ. Ngo l’etoko winda tshumanyɛ, ndombɛna nkfuta djɛnde djɛ n’tsho djɛsɔ nghayingha m’esase w’owaya. Ɔsɔngo wɔlɔ ndoke! Ndombeta ntombe yɛnde la ansukanyi djɛ ndashimela losango lɔ wɔlɔ lɔsɔ.
5. Ladjikɛnge okokande ndjala wolo djɛ ndjisola anto wambotshika otshumano ila?
5 Entengo ndjɔmbɔmba kɛ Yeso ɛnyɛwɔ, ngo nyɛna paa djɛ ndjisola ekete kɛngombotshutshɛ. Lɛdji lɔkɔ lɔmɔ ndeke, oyɛso ladjɛ nangha la weelo w’efula djɛ ndjisola anto wambotshika otshumano ilá. Nkoka ndjala wambonanghaka ɛnɔnyi efula, wapasaghana la owila wɔ Ndjambe. Mbala imɔtshi wambóheetaka, ko wambótintatshɛ lɔɔko kɛnɛ lá owila onkina wɔ w’ananyɔ l’ankaana iyopawewe. Koko, efula l’anteyi kɛwɔ nkombolaka nkalɔ te Yehova. Iwɔ nkɔpaka nkambela Ndjambe esanga la ankambi yɛnde koko, walekɔ la djonyi djɛ iso ndakotshɛ.
6. Wopo wɔkɔnge nsakodji kenkfumɔ oyɛnde ladjɛ ndjila lɔwɔ lá ohonelo wɔ w’ananyɔ l’ankaana imbɔhɔla lá lonyuma?
6 Kanga lokoka ntahone wananyɔ l’ankaana imbɔhɔla lá lonyuma? Onto onkfumɔ welá otshumano nkoka nkotshɛ kana ntepela ente tokokolo, taatekalo, anto walekɔ la boto djɛwɔ djɛmbɔhɔla lá lonyuma edjinge ansakodji inkfumɔ. Olekɔ la lotombe kana koko ose nkfumbo wɔmɔtshi wɔmbɔhɔla lá lonyuma? Ombopomaná nya wɔnanyɔ kana koko nkana kɛmɔtshi kɛmbɔhɔla lá lonyuma, wina woyalɛ l’olemo w’ipoposanyɛ wɔ mvulu la mvulu ntsha koko, l’olemo w’ipoposanyɛ wela n’tshandjawala? Ntsha onto wɔsɔ ambɔkɔpɛyɛ adrɛsɛ la nimɛro yɛnde yɛ telefɔnɛ ko, ambawola djɛ wɛ ntɔpɛyɛ tokokolo telá otshumano wɔkɔ, ongotapɛyɛ.
7. Olakanyelo wɔkɔnge ngombowa ma owakɛ wɔ ikokolo imɔtshi yetawɔ Thomas?
7 Akano wakɔnge wɛnama papoo tokokolo oyɛwɔ ladjɛ ndɔsa djɛ ntisola waakɔpa nkalɔ te Yehova? Kolenda wopo wonangha ikokolo imɔtshi yetawɔ Thomas * kangintatshɛ l’Espagne. Nde ambokotshɛ Ewakɛ ndekana 40 djɛ iwɔ nkalɔ ndjingela nsanghanyɛ y’otshumano la mpoposanyɛ. Nde apakisola ante: “Lemi ndjopolaka asakodji ntsha iwɔ djewaka idjena yitantshɛ wɔnanyɔ ɔmɔtshi wombohola lá lonyuma, la ntsha iwɔ ndjewaka wɔnanyɔ kana nkaana kɛmɔtshi kepingela nsanghanyɛ. Efula kɛ wananyɔ l’ankaana wangoyalake l’osasa wɔ ndahona ladjikɛnde iwɔ ndjewaka ambɔ edjinge iwɔ walekɔ l’olemo wɔ mpona anto wasɔ. Ko, wina wotshɔmi ntowembola winaso wɔmbɔhɔla lá lonyuma, lemi mponaka djɛ ndjewa nsango imɔtshi yɛ wana wande edjinge yɛ ase nkfumbo kɛnde. Wamɔtshi lanteyi kɛwɔ wayakalaki wana wawɔ lá nsanghanyɛ, ko wana wasɔ wakomaka edjinge ansakodji la n’tena mɔtshi. Iso nkoka nkótshɛ edjinge wana wasɔ dj’iwɔ nkalɔ te Yehova.”
KOTSHƐ WANA WA YEHOVA W’AMPAME LA W’AMATO DJƐ IWƆ NKALƆ TENDE
8. Lá ndjɔmbɔmba kɛ wɔna wotshwisa kelekɔ lá Luka 15:17-24, wopo wɔkɔnge papa ndananghela wɔnande akambo wina wɔ ndakalɔ la mvulu?
8 Wekeka wakɔnge woyalaso la djonyi djɛ nkotshɛ anto wakɔpa nkalɔ te Yehova? Iso nkoka mba elakanyelo efula ma ndjɔmbɔmba kɛ Yeso kɛ wɔna wotshwisa. (Wala Luka 15:17-24.) Yeso apakisola kɛnɛ keyisa ndotshinda wɔna wɔkɔ djɛ nkalɔ te papa kɛnde. Ndombɔkɔkɔmɛ ante wina wɔ ndɔwɛnyi, papa kɛnde alotaka ntopomana lande, ko ndombovunda l’ɛwɔ epe djɛ ndɔwɛnyɛ ante nde ndɔɔkɔpaka. Wɔna ayalaki la odjito l’oloko la, ayaawokaki djɛnde apakoke ndjetama entengo wɔnande lonkina. Ko papa kɛnde owekamelaka wina wɔ ndoshimelaka wopo wɔ ndoyaawokaka, ko, owokaka djandji. M’eteyi, nde ananghaka akambo wa nyɛnyɛ wɔnande woyapɛlisa má ovunga ente, nde ambowawola ngete wɔnande wɔ ngandji efula koko, ape ngete ose olemo. Djɛ ndɔwɛnyɛ ente ambowawola, ndombónanghela fɛtɛ la ndɔmbɔpɛyɛ n’tshendja djɛ wɔlɔ efula.
9. Wekeka wakɔnge woyɛso la djonyi djɛ nkotshɛ wananyɔ l’ankaana yimbohɔla lá lonyuma dj’iwɔ nkalɔ te Yehova? (Lenda impapango yotepela ante: “ Wopo wɔ nkotshɛ waakɔpa nkalɔ te Yehova.”)
9 Yehova alekɔ ngete papa kelá ndjɔmbɔmba kɛnɛ. Nde nkɔpaka wananyɔ l’ankaana yɛmbɔhɔlaka lá lo nyuma edjinge nde nkombolaka dj’iwɔ nkalɔ tende. Ntsha tombowokola, tongewa ndaakotshɛ. Djɛ nangha nghɔsɔ, ngo iso ndjala la bale ntshitshi, ndaawoka entengo iwɔ oyaawokawɔ, edjinge ndjala la ngandji. Ladjikɛnge oyɛso la djonyi djɛ wekeka wɛsɔ enkfumɔ edjinge wopo wɔkɔnge okakaso nkamba la wekeka wɛkɔ?
10. Ladjikɛnge oyɛso la djonyi djɛ ndjala la bale ntshitshi djɛ nkotshɛ onto wohona nkɔnɔ la lonyuma?
10 Djɛ nkɔnɔ lá lonyuma ngo mba wina efula. Djɛko ndeke oyɛso ladjɛ ndjala la bale ntshitshi te waakombola nkalɔ te Yehova. Efula kɛ wananyɔ l’ankaana yɛhɔlisa lá lonyuma ndjawolaka ambɔ, ayalaka djonyi efula djɛ tokokolo l’anto ankina wela otshumano, ndaawembolaka mbala la mbala lá ntondo kɛ iwɔ ntateyɛ nkambela Yehova. Nkaana kɛmɔtshi k’etawɔ Nancy, kintatshɛ l’Asie, afunaka ante: “Ndjalaka la ilongo l’otshumano yenkotshisa efula. Nde ankɔpaki ngete mama kɛnde kɛ n’kfundu mmɔ. Nde avungolaki n’tena djɛ wɔlɔ dj’isayalaka isande. Wina wɔ moshimelaka wopo woyaawokami, nde apikaki lotoyi lɔnde la bale ntshitshi, edjinge atatshikáki mpɛyɛ lemi alako. Nde ayalaka ilongo yɛ nsɔsɔlɔ, áyalaki entshupa djɛ nkotshɛ lemi.”
11. Ladjikɛnge oyɛso la djonyi djɛ ndjala la djandji djɛ nkotshɛ anto walekɔ l’ampota yɛ djingingi dj’iwɔ nkɔnɔ?
11 Djandji alekɔ djekeka djetokotshɛ djɛ ndaawoka wopo wɔ anto ankina oyawokawɔ. Etengo pɔmadɛ okaakitshɛnde nkangi k’olando, djandji djokaso anto nkoka ndaakotshɛ djɛ nkɔnɔla mpota yɛwɔ yɛ djingingi. Wamɔtshi wahɔlɔka lá lonyuma ladjikɛnde onto ɔmɔtshi wela otshumano ambakiyanyɛ lá n’kambo mɔtshi mɔkɔngɔ w’ɛnɔnyi efula. Lɔɔko kɛnɛ wakindjɛ ngo nama enkomba te anto waakiyanyisa, ko enkomba wɛsɔ ndashimbaka djɛ nkalɔ te Yehova. Ankina, wafɛnyɛ djɛ waananghelaka akambo la n’tshamba djɛ sii. Laasɔ, wakoka ndjala la djonyi djɛ onto wawekameyɛ. (Dja. 1:19) María, kanga lɔhɔlisa lá lonyuma l’etsho ɛmɔtshi awola ante: “Ndjalaka la djonyi dj’onto w’ondjekameyɛ, w’onsuka, wɔ mpɛyɛ alako la wɔ ndɔndjɛ lemi.”
12. La lɛdji lɔkɔnge ngandji kɛ Ndjambe ɛlamande la ɔkɔdji?
12 Bible ndjɛdjɛka ngandji kɛ Yehova te ankambi wande la ɔkɔdji kana oshinga. Djɛ ndjoka wɔlɔ tɔkɔsa ndjɔmbɔmba: Kokanela djɛ ɔmbɔkfɔ lá ndjale ko otanɔ washi, ko wambokowokela djakɛtɛ yɛ wɛ ntenda djepa nnɔ washi. Ipa la ehamo wɛ ongosasanga okotshɔ wɔsɔ ladjikɛnde wombokokotshɛ djepa wɛ nnɔ washi. Koko djakɛtɛ yɛsɔ toko djepangokoka nkowikɛ, ladjikɛnde washi walekɔ ntshitshi. Ntsha opingelisa lá waato djɛ mposa ma washi, opangowika ongovɔ la ntshitshi. Omboka djɛ ongoyala la djonyi dj’onto nkowokela ɔkɔdji djɛ nkosepa tá wato. Lá n’kambo dj’ase Isariyɛlɛ wowangwisa, Yehova atepelaka ante: ‘Lemi nkindjɛka ndasepa [. . .] la ɔkɔdji wɔmi wɔ ngandji.’ (Ozeya 11:4) Nghɔsɔ ndeke onanghande kanga lɔɔko kɛnɛ te wambotshikaka ndokambela la wɛna paa la ndjolo edjinge l’ekiyano. Nde nkɔpaka wawole ambɔ nde ndaakɔpaka. Nde nkɔpaka ndaasepa tende. Nde akoka nkamba lawɛ djɛ wɛ ndawɛnyɛ ngandji kɛnde tewɔ.
13. Kɔndɔla ɔnkɔndɔ wɛnyɛ nkfulu kele la ngandji kɛ onto la wɔna nyɛnghɛnde.
13 Alekɔ djonyi djiso nkotshɛ wananyɔ l’ankaana imbɔhɔlaka lá lonyuma dj’iwɔ ndaawoka ambɔ, Yehova ndaakɔpaka edjinge iso koko ndakɔpaka. Pablo, kisalumolá lá djamba djemboheta ahɔlaka lá lonyuma l’ilá k’ɛnɔnyi 30, atepela ante: “Nkɛsɛ mɔtshi, wina wɔ motaposaka ma lopango lɔmi, mpomanaka la nkaana kɛmɔtshi k’ekokolo k’oloko wɔlɔ, asawolaka la lemi la ngandji, ko ndelaka ngete ilɛngɛ. Ko momoshimela ente wopo wɛnami, alekɔ ngo Yehova ndeke lombokotoma. Ma loshi lɔsɔ ndeke mɔshi n’kano djɛ nkalɔ tende.”
SUKA WANƐ WALEKƆ WƆDJU
14. La nkilika ndjɔmbɔmba kelekɔ lá Luka 15:4, 5, kɛkɔnge kenangha onami w’ɛnkɔkɔ ntsha ambisola ɔnkɔkɔ?
14 Wina wɔ wananyɔ l’ankaana yimbɔhɔla lá lonyuma otateyɛwɔ ndjɛ lá nsanghanyɛ, iso la djɛ nkindjɛ ndaasuka. Etengo wɔna wotshwisa wela ndjɔmbɔmba kɛ Yeso, iwɔ nkoka ndjoka paa k’efula lá wɔɔngɔ. Ipa l’ehamo walekɔ la wɔdju la nyuma l’ɔtɛ w’akambo wapomanisa la wɔ l’andja wa Satana. Ngo iso ndaakotshɛ dj’iwɔ nkembɛ djawo djɛwɔ lonkina te Yehova. Lá ndjɔmbɔmba kɛ ɔnkɔkɔ wovungisa, Yeso akɔkɔmɛ ante onami w’ɛnkɔkɔ awɛmbaka nyama kɛmbɔtɛka lá apɛka ko ndombooyakala l’oloyi. Nde atshutshɛka wina la wolo wɔnde djɛ ntowisola. Kaanga oyɛwɔ nghɔsɔ nde ndjewaka ante ɔnkɔkɔ apalekɔ la wolo lonkina djɛ nyɔmɛlɛ nkalɔ tá oloyi ko ndɔmbɔwɛmba.—Wala Luka 15:4, 5.
15. Wopo wɔkɔnge wokokaso nsuka winaso wɔmbɔhɔla lá lonyuma wɔkɔpa nkalɔ tee Yehova? (Lenda impapango yetepela ante: “ Epeko kɛ n’tsho.”)
15 Ngo iso ntshutshɛ wina la welo efula djɛ nkotshɛ winaso wɔmbɔhɔla lá lonyuma djɛnde ndekana ekakasano woshimba djɛ nkambela Yehova. Koko ma okotshɔ wɔ nyuma kɛ Ndjambe, Otepela wɔnde la enkanda enkina weposɛ ɔlɔngɔswɛlɔ wɔnde, tokoka ndaakotshɛ djiwɔ nkalɔ mba wolo lá nyuma. (Ɔrɔ. 15:1) Wopo wɔkɔnge okokaso nangha? Ikokolo imɔtshi yembotshunda lá nyuma apakisola ante: “Efula kɛ wananyɔ l’ankaana yɛ mbɔhɔlaka lá lonyuma yekómbolá nkalɔ te Yehova walekɔ la djonyi djɛ ndjeka la wɔ Bible.” * Laasɔ ntsha wambɔkɔlɔmba djɛ wɛ ndjeka la ɔmɔtshi, lamo ngopawola odjito wɔ wɔlɔ wɔsɔ la osasa? Ikokolo yɛkɔ akɔkɔmɛ ante: “Nsakodji keeka la onto wɔmbɔhɔla lá lonyuma Bible, ladjɛ ndjala ilongo yɛnde yilande l’oloko.”
OSASA NDJALAKA L’OLONGO EDJINGE LA LOOKO
16. Wopo wɔkɔnge wewaso djiso nkoka ndjila oloko lá okotshɔ wɔ andjelo?
16 Akambo efula wopomanisa l’anto wɛnyɛ djɛ, iso nkoka ndjila oloko lá okotshɔ wɔ andjelo dj’iso ndjisola wananyɔ l’ankaana yembɔhɔlaka lá lonyuma, yelekɔ la mposɛ k’efula kɛ nkambela Yehova lonkina. (Ndjiso 14:6) Ndjɔmbɔmba, Silvio, kangintatshɛ l’Équateur, alɔmbaka Yehova l’oloko ɔmɔ djɛ onto ɔmɔtshi ndookotshɛ djɛ nde nkalɔ tende. Lá ntondo kɛnde nshiyɛ lɔlɔmbɔ lɔkɔ, wakɔkɔlaka lá mvulu kɛnde. Iyayale nde tokokolo tope. Ko wayalaka l’osasa djɛ ntatsheyɛ ndokotshɛ ngo wina wɔkɔ.
17. Wɛlɔ wɛkɔnge wɛ songowa ntsha iso nkotshɛ waalekɔ la wɔdju lá lonyuma?
17 Tongowa osasa w’efula má nkotshɛ waalekɔ la wɔdju lá nyuma dj’iwɔ kalɔ te Yehova. Kolenda wopo woyawoka yat’ekalo yeyapɛyɛka efula te wananyɔ l’ankaana imbɔhɔla lá lo nyuma. Nde ante: “Mbala imɔtshi, lemi nkɛdjɛka wisɔyi w’osasa. Lemi ndjalaka l’osasa efula djɛ nyɛna djɛ Yehova ambowikɛ ɔnkɔkɔ wɔnde m’andja wa Satana, ko lemi mbaaka lomu djɛ lemi nkamba lande esanga l’olemo wɔkɔ!”—Elemo 20:35.
18. Ntsha wɛ ombɔhɔla lá lonyuma, kɛkɔnge kokokɛ ndjawola?
18 Ntsha wɛ ombotshikaka nsanghana esanga l’ankambi yɛ Yehova, ewa ente nde akindjɛ nkɔkɔpa. Nde nkɔpaka djɛ wɛ nkalɔ tende. Angoyala djonyi wɛ ndɔsa akano wakoka kokotshɛ djɛ wɛ nkalɔ tende. Koko, ngete papa kele la ndjɔmbɔmba kɛ Yeso, Yehova akongela okalwelo wɔko, nde angoyala l’osasa efula djɛ nkolongola!
YEEMBO 103 Anami w’ɛnkɔkɔ waleko epapɛyɛ wɛ Ndjambe (lá Otetela)
^ par. 5 Yehova nkombolaka djɛ waambotshika ndjingela nsanghanyɛ y’akristo nkalɔ te nde. Nde atomela leeta lɔnɛ ante: ‘Nyokalɔ le lemi.’ Iso nkoka nangha akambo efula djɛ nkotshɛ waakombola ndjawola leeta lɔkɔ. Lá djamba djɛnɛ tongɛna wopo wɔkɔnge wokokaso ndaakotshɛ.
^ par. 7 Nkombo imɔtshi imbotshikitana.
^ par. 15 Tokoka nkotshɛ winaso wɔmbɔhɔla lá lonyuma lá ndjeka lande toshapitrɛ tɔmɔtshi tele lonkanda Woho wa ntshikala lo ngandji ka Nzambi (Ntshikala lá ngadji kɛ Ndjambe) kana koko onkanda Yasukanya la Jehowa (Nyosukane la Yehova). Oloyi wɔ tokokolo telá otshumano wangɔsɔna onto wolekɔ l’akoka wa ndɔdjɛ wekelo wɔsɔ.
^ par. 68 NSAKISO Y’ASANGO N’KISHI : Wananyɔ asato wakotshɛ winawɔ wɔkɔpa nkalɔ te Yehova. Iwɔ nanghaka n’kambo n’tshɔ lá nsawolaka lande mbala efula, ndokotshɛ djɛnde nyɛna djɛ iwɔ ndɔkɔpaka edjinge ndowekameyɛ la djandji.
